Musa Kupwila Mavita ne Bya Lūma

LEZA USA KUFUDIJA MALUDIKI A BANTU

Leza usa kufudija maludiki a bantu kupityila ku kyokya kitwa na Bible bu Amakedona.a (Kusokwelwa 16:16) Mu kyokya kitatyi, “balopwe ba ntanda yonso ikelwe na bantu” basa kwibungila pamo mwanda wa kulwa “divita dya difuku dikatampe dya Leza Mwinē Bukomo Bonso.” (Kusokwelwa 16:14) Amakedona i divita dya Leza disa kupwija mavita onso.

Leza usa kupingakanya maludiki a bantu na Bulopwe bwandi, nansha amba umbikalo wandi, mwine usa kuludika tamba kokwa kūlu kadi keukonakanibwapo. (Danyele 2:44) Leza i mutonge wandi Mwana, Yesu Kidishitu, bu Mulopwe wa buno Bulopwe. (Isaya 9:​6, 7; Mateo 28:18) Uno umbikalo i Bulopweb bwine bwāfundije Yesu bandi bana ba bwanga bebulombe mu milombelo. (Mateo 6:​9, 10) Bantu bonso basa kubikalwa na umbikalo umo kete kujokoloka ntanda yonso, ne Muludiki wa uno umbikalo i Yesu.

Kwishila na baludiki bana ba bantu, Yesu aye kakengidijapo lupusa lwandi mwanda wa kamweno ka aye mwine. Byadi moloke kadi wampikwa mboloji, i kutupu muntu ukazumbija mutyima amba ubwanya kulongelwa bintu na ntondo nansha na bukondame pa mwanda wa lukoba lwandi, muzo wandi, nansha kabila kandi. (Isaya 11:​3, 4) Kadi kebikalombepo bantu kulwa mwanda wa balongelwe bintu na boloke. Mwanda waka? Mwanda Yesu ukata muntu ne muntu mutyima. “Ukakūlanga mulanda wabija bukwashi, ne mupēlulwe ne yewa ense wampikwa mukwashi. . . . Ukebakūlanga ku malwa ne ku lūma.”—Ñimbo ya Mitōto 72:​12-14.

Bulopwe bwa Leza busa kutalula’ko byabulwi byonso bipayañana. (Mika 4:3) Kadi busa kutalula’ko bantu babi bene kebasakepo kuleka mavita kadi basanshija bantu bakwabo. (Ñimbo ya Mitōto 37:​9, 10) Muntu yense ekale i mwana-mulume, mwana-mukaji ne mwanuke, basa kwikala na mutyima-ntenke konso kobenda pano pa ntanda.—Ezekyele 34:28.

Bantu basa kwikala na būmi buyampe munshi mwa buludiki bwa Leza. Busa kutalula’ko bintu byonso bilengeja bantu balwe pamo bwa bulanda, nzala, ne kubulwa mwa kushikata. Muntu ne muntu usa kwikala na byakudya bivule ne na kifuko kiyampe mwa kushikata.—Ñimbo ya Mitōto 72:16; Isaya 65:​21-23.

Bulopwe bwa Leza busakutalula’ko bintu byonso bibi biletwa na mavita. Muno mubadilwa kwitundapa bilonda byonso bya ku ngitu, bya mu ñeni, ne bya mu malango bisusula bantu pa mwanda batenwe na mavita. Enka ne boba ke bafwe basa kusangulwa bekale bōmi pano pa ntanda. (Isaya 25:8; 26:19; 35:​5, 6) Bisaka bisa kwikala monka pamo, kadi milangwe mibi itala mavita isa kubadilwa mu ‘bintu bya kala bisa kupita.’—Kusokwelwa 21:4.

LEZA USA KUTALULA’KO BUBI

Bulopwe bwa Leza busa kulengeja bantu banze kutōtela mu bumo Leza wa bine Yehovac, “Leza wa buswe ne wa ndoe.” (2 Bene Kodinda 13:11) Bantu basa kushikata pamo mu ndoe. (Isaya 2:​3, 4; 11:9) Boba bonso bengidija byobefunda basa kukūlwa ku bubi.—Bene Loma 8:​20, 21.

LEZA USA KONAKANYA SATANA NE BANDEMONA BANDI

Bulopwe bwa Leza busa konakanya Satana ne bandemona bandi, batulenga-byanzwe ba mavita. (Kusokwelwa 20:​1-3, 10) Pampikwa lupusa lwabo lubi, bine “ndoe ikavula.”—Ñimbo ya Mitōto 72:7.

Tubwanya kukulupila amba milao ilaile Leza ya kupwija mavita ne bya lūma isa kufikidila. Usakanga kupwija mavita kadi udi na bukomo bwa kwiapwija.

• Leza udi na tunangu ne bukomo busakilwa pa kupwija mavita ne bya lūma. (Yoba 9:4) Kekudipo kintu kyakabwanyapo kulonga.—Yoba 42:2.

• Leza kasakengapo kumona bantu basusuka. (Isaya 63:9) Kadi “ushikilwe yewa ense usenswe bya lūma.”—Ñimbo ya Mitōto 11:5.

• Leza ufikidijanga nyeke byobya byanena; kabwanyapo kubepa.—Isaya 55:​10, 11; Tetusa 1:2.