Meji adi afila disanka mu dîku

Balume, nangayi bakaji benu

“Balume badi ne bua kunanga bakaji babu bu mibidi yabu bobu bine. Muntu udi munange mukajende mmudinange yeye muine, bualu kakuena muntu ukadiku mukine mubidi wende, kadi udi uwudisha, uwunanga.”​—EFESO 5:28, 29.

Mulume udi ku mutu kua dîku. (Efeso 5:23) Kadi mulume muimpe katu ne malu makole anyi wenzeja mukajende malu ku bukole to. Udi utua mukajende mushinga, utabalela majinga ende a ku mubidi ne mudiye umvua. Udi udienzeja kabidi bikole bua kumusankisha, kayi usunsuma misangu yonso bua enze bidiye musue to. (Filipoyi 2:4) Udi umuambila malu patoke ne umuteleja padiye wakula. Kena umufikila “tshiji tshikole,” anyi umukuma peshi umuamba mêyi mashile to.​—Kolosayi 3:19.

Bakaji, nemekayi babayenu

‘Mukaji udi ne bua kuikala ne kanemu kakole kudi bayende.’​—EFESO 5:33.

Padi mukaji unemeka bayende ne utua mapangadika ende mpanda, ditalala nedikale mu dîku. Bayende yeye muenze tshilema, kena umupuekesha milongo to, kadi udi ushala anu mupole malu ne umunemeka. (1 Petelo 3:4) Yeye ne bualu bua kumukuatshila, udi ukeba tshikondo tshimpe tshia kumukuatshilabu ne kanemu konso.​—Muambi 3:7.

Ikala ne lulamatu kudi muena dibaka nebe

“Mulume . . . nealamate mukajende, ne nebalue mubidi umue.”​—GENESE 2:24.

Padi mulume ne mukaji baselangana, badi benza tshisuikidi tshimue tshia dîku. Nunku mulume ne mukajende badi ne bua kudienzeja bua kuikala bayukila ne muoyo mujima ne benzelangana tumalu tuimpe, dîba adi nebalame dibaka diabu bimpe menemene. Yonso wa kudibu kena ne bua kusangila ne muntu mukuabu to, anu ne muena dibaka nende; nunku nebaleje ne: mbalamatangane. Muntu udi upanga lulamatu kudi muena dibaka nende udi umuenzela bibi menemene. Biobi bienzeke nanku, bena dibaka kabakueyemenangana to, ne dîku nedipanduluke.​—Ebelu 13:4.

Baledi, longeshayi bana benu

“Longesha muana njila udiye ne bua kulonda; nansha padiye ukola kakumbukamu to.”​—NSUMUINU 22:6, dimanyisha.

Nzambi mmupeshe baledi mudimu wa kulongesha bana babu. Abi bidi bilomba kubalongesha mua kuenza malu ne kuikala tshilejilu tshimpe kudibu. (Dutelonome 6:6, 7) Padi muana wenza tshilema, muledi wa meji kena umukanyina to. Udi ne “lukasa ku diteleja, ne lujoko ku diakula, ne lujoko ku dikuata tshiji.” (Yakobo 1:19) Muledi yeye mumone ne: bidi bikengela kupesha muana dinyoka, udi umupeshadi ne dinanga, ki nne tshiji to.

Bana, tumikilayi baledi benu

“Nuenu bana, tumikilayi baledi . . . ‘Nemeka tatuebe ne mamuebe.’”​—EFESO 6:1, 2.

Bana badi ne bua kutumikila baledi babu ne kubenzela malu ne kanemu ka bungi. Padi bana banemeka baledi babu, nekuikale disanka dia bungi mu dîku ne benamu nebikale mu ditalala ne mu buobumue. Mbimpe bana bakadi bakulumpe batabalele baledi babu, ke mushindu wa kubanemeka. Abi bidi mua kulomba kutabalela nzubu wabu bimpe anyi kuikala kubapeshaku dikuta didibu nadi dijinga.​—1 Timote 5:3, 4.