Tshia kuenza bua kuikala mu ditalala ne bakuabu

Ikala ufuilangana luse

“Nutungunuke . . . ne kufuilangana luse ne muoyo mujima nansha muntu yeye tshilumbu ne mukuabu.”​—KOLOSAYI 3:13.

Tuetu bonso tutu tuenza bilema. Tudi mua kunyingalaja bakuabu, anyi bobu badi mua kutunyingalaja. Mbuena kuamba ne: tuetu bonso tudi ne bua kufuila bakuabu luse bua bobu pabu batufuilalu. Tuetu bafuile muntu udi mutuenzele bibi luse, katuakumulamina munda to. ‘Katuakumupingajila bubi ku bubi’ to, ne katuakuikala tumuvuluija ku musangu ne ku musangu bilema biende anyi butekete buende to. (Lomo 12:17) Kadi netuambe bishi muntu yeye mutunyingalaje bibi menemene katuyi mua kupua bualu bubi budiye mutuenzele abu muoyo? Dîba adi mbimpe tuyukile nende bua bualu abu ne kanemu konso, bikale pa nkayetu. Tshipatshila tshietu ntshia kukeba ditalala, ki ntshia kukokangana tukeba bua tuetu tubinge to.​—Lomo 12:18.

Ikala ne didipuekesha ne kanemu

“Ne didipuekesha, numone bakuabu bu banupite nuenu.”​—FILIPOYI 2:3.

Tuetu ne didipuekesha ne kanemu, bantu nebajinge bua kusomba netu. Bualu mbamanye ne: netuikale nabu bimpe ne netubatue mushinga, ne katuakuikala ne meji a kubamba mêyi adi mua kubuosha to. Kadi tuetu tudimona bapite bakuabu anyi tusunsuma anu bua bakuabu bitabe tshitudi tuamba, tudi tukebesha dikokangana ne difikilangana munda. Bantu nebatuepuke, ne ba bungi kabakujinga bua kusomba netu.

Kuikadi ne kansungansunga to

“Nzambi kena ne kansungansunga to, kadi udi witaba muntu wa mu tshisamba tshionso udi umutshina ne udi wenza malu makane.”​—BIENZEDI 10:34, 35.

Mufuki wetu kena wanyisha bantu bua ditunga diabu, muakulu wabu, mudimu udibu nawu, anyi bua dikoba diabu to. “Wakenza bisamba bionso bia bantu bifumine mu muntu umue.” (Bienzedi 17:26) Mu ngumvuilu kampanda, bantu bonso mbana ba muntu. Tuetu tutua bantu bonso mushinga ne tubenzela malu ne bulenga, nebumvue disanka, tuetu petu netumvue disanka dia bungi, ne netusankishe Mufuki wetu.

Ikala ne bupole

“Vualayi . . . bupole.”​—KOLOSAYI 3:12.

Tuetu bikale ne bupole, batudi nabu nebadiumvue badilekelele. Dîba adi badi mua kutukuatshila malu, kutupingaja too ne mu njila anu bualu mbamanye ne: netushale anu batukije. Bualu bukuabu, muntu yeye mutufikile munda, tuetu bamuandamune ne bupole, tshiji tshiende atshi tshidi mua kutuya. Nsumuinu 15:1 udi wamba ne: “Diandamuna dia bupole didi dituyisha luonji, kadi dîyi dishile didi dilundula tshiji.”

Ikala ne dianyisha, upeshanganga bintu

“Disanka dia kufila ndipite dia kuangata.”​—BIENZEDI 20:35.

Lelu bantu ba bungi badi ne lukuka ne mbadinange anu bobu. Kadi badi bapeshangana bintu ke badi bapeta disanka dilelela. (Luka 6:38) Bantu badi bapeshangana bintu badi ne disanka bualu mbanange bantu kupita bintu. Dinanga adi ke didi dibasaka bua kuikala ne dianyisha bua tshintu tshidi muntu ubapesha ne bamuela tuasakidila. (Kolosayi 3:15) Diebeja ne: ‘Ntu musue kusomba ne muntu utu kayi ufiita ne kayi ne dianyisha anyi? Peshi ntu musue kusomba ne muntu utu ufiita ne muikale ne dianyisha?’ Bualu bua kukuata mbuobu ebu: Ikala muntu udi bakuabu basue kusomba nende.​—Matayi 7:12.