Ditangidila bijadiki
“Diulu, buloba, ne bionso bidimu bidi mua kudienzekela nkayabi kabiyi bifumina ku tshintu tshikuabu to.’’—Stephen Hawking ne Leonard Mlodinow, bamanyi ba malu a fizike, 2010.
“Nzambi wakafuka diulu ne buloba.”—Bible, Genese 1:1.
Muoyo, diulu, buloba, ne bionso bidimu bavua babifuke kudi Nzambi anyi mbilue ku mpukampuka? Mêyi a bamanyi ba malu a fizike babidi atudi bafunde mu tshiena-bualu etshi ne mêyi a ntuadijilu adi mu Genese 1:1 adi afila mandamuna abidi mashilangane ku lukonko alu. Kudi bantu badi bitaba mandamuna onso abidi au, kadi ba bungi kabena baitaba to. Mu mikanda idi mimanyike bikole ne ku TV, bantu badi bakokangana bikole mu tshilumbu etshi.
Balongeshi benu ba mu tulasa badi mua kuikala bambe ne dishindika dionso ne: muoyo, diulu, buloba, ne bionso bidimu mbilue ku mpukampuka, kabidi ne: Nzambi katuku to. Kadi balongeshi abu mbanupeshaku bijadiki bidi bileja ne: Mufuki katuku anyi? Ku lukuabu luseke, ukadi pamuapa mumvue bamfumu ba bitendelelu bayisha ne: Mufuki utuku. Kadi bavuaku bafile bijadiki bidi bileja tshidibu bamba atshi anyi? Peshi bavua banulombe bua kuitaba ne: Nzambi udiku, bualu badi bamba ne: utuku anyi?
Kakuyi mpata, ukadi mudiele lukonko alu ne mumone pamuapa ne: kakuena muntu udi mua kuamba bikala Mufuki utuku to. Pamuapa udi mua kudiebeja kabidi ne: bidi ne mushinga bua kumanya diandamuna dia lukonko alu anyi?
Tabulukayi! eu nealeje tshia kumpala bimue bijadiki bidi bifikishe ba bungi ku ditaba ne: Mufuki utuku. Pashishe nealeje bua tshinyi kumanya diandamuna dia lukonko ludi lutangila mutudi bafike ku dikala ne muoyo pa buloba kudi ne mushinga.