Nsombelu wa ditalala mu Bulongolodi bupiabupia

Anji tangilabi bimfuanyi bidi pa kabeji aka. Udi umvua bishi? Muoyo kawenaku ukusunsuma, ujinga bua wewe kusomba ku matshi talalaa, kuikala ne disanka, ne kuikala ne bintu bidi nabi bantu aba anyi? Nsombelu mulenga wa mushindu’eu udiku mua kufika bulelela dimue dituku pa buloba apa anyi?

Pamu’apa bantu bavule badi mua kuandamuna ne: tòo, kabiena mua kuenzeka to! Amue a ku malu adi enzeka lelu nguowu aa: mvita, dibunda dia bilumbu, nzala, masama ne bukulakaje. Kadi, kudi tshidi mua kutuambuluisha bua kutekemena nsombelu mulenga eu. Tshilejilu, Bible udi utuambila ne: “Bilondeshile dilaya [dia Nzambi], tudi bindile diulu dipiadipia ne buloba bupiabupia, muajamabo kudi buakane.”​—⁠2 Petelo 3:​13, Mukanda wa Mvidi Mukulu; Yeshaya 65:⁠17.

Bilondeshile Bible, “diulu dipiadipia” ne “buloba bupiabupia” ebi, kabiena diulu ne buloba bitudi tumona ne mêsu ebi to. Buloba ne diulu bidi bimueneka ne mêsu ebi bivua bifukibue bipuangane, ne Bible udi uleja ne: nebishale tshiendelele. (Musambu 89:​36, 37; 104:⁠5) “Buloba bupiabupia” mbantu bakane bikala ne muoyo pa buloba, ne “diulu dipiadipia” mmbulamatadi anyi mbukalenge buakane ne bupuangane bualombola bantu bakane bikala ne muoyo pa buloba. Kadi, tuitabe ne: “buloba bupiabupia,” peshi bulongolodi bupiabupia bulenga menemene ebu nebulue anyi?

Katuena ne bua kupua muoyo se: ku tshibangidilu, Nzambi uvua musue bua kuikale nsombelu mulenga pa buloba. Wakateka bantu ba kumpala mu Edene, muaba uvua Mparadizu wa pa buloba, ne kubapesha mudimu mulenga wa dikema. Wakabambila ne: ‘Nulelangane, nukumbane ba bungi, nuuje buloba tente; nubukokeshe.’ (Genese 1:​28) Bushuwa, Nzambi uvua mulongolole se: mulume eu ne mukajende balele bana ne badiundishe Mparadizu pa buloba bujima. Nansha muakaluabu pashishe kutombokela Nzambi, e kuleja muvuabu kabayi bakumbanyine muoyo wa kashidi, Nzambi kakashintulula lungenyi luende luvuaye nalu ku ntuadijilu to. Malu avua Nzambi mulongolole aa neakumbane palua bulongolodi bupiabupia!​—⁠Yeshaya 55:⁠11.

Mene mu disambila dia “Tatu wetu udi mu diulu,” tutu tulomba bua Bukalenge bua Nzambi kuluabu, bua Mbulamatadi wa mu diulu kumbushaye bubi pa buloba ne kukokesha pa buine bulongolodi bupiabupia abu. (Matayo 6:​9, 10) Nzambi neakumbaje kakuyi mpata tshitudi tumulomba mu disambila edi, bualu Dîyi diende didi dilaya ne: ‘Bantu bakane nebapiane buloba, nebashikamemu tshiendelele.’​—⁠Musambu 37:⁠29.

Nsombelu mu bulongolodi bupiabupia bua Nzambi

Bukalenge bua Nzambi nebututuadile malu malenga kaayi kuamba pa buloba; nebuenzele bantu bilenga bionso bivua Nzambi mubalongoluele ku ntuadijilu. Dikinangana ne kansungasunga kabiakuikalaku kabidi to. Muntu yonso nealue mulunda wa muntu nende yonso. Nzambi udi ulaya mu Bible ne: ‘nealekeshe mvita bua ijika too ne ku mfudilu kua buloba.’ ‘Tshisamba katshiakutudila tshikuabu muele wa mvita; bantu kabakulonga mua kuluangana mvita kabidi.’​—⁠Musambu 46:⁠9; Yeshaya 2:⁠4, MMM.

Ku ndekelu wa bionso, buloba nebulue mparadizu. Bible udi wamba ne: ‘Tshipela ne buloba bûme nebikale ne disanka; tshipela tshia lusenga netshisanke; netshimeneshe bintu bu mudi tshilongo tshia nsungubidi tshienza, bualu bua mishimi ya mâyi neyipatuke mu buloba bua patupu, misulu neyipueke mu tshipela tshia lusenga. Lusenga ludi lubalakana neluandamuke dijiba dia mâyi, ne buloba budi kabuyi ne mâyi nebuikale ne mishimi ya mâyi.’​—⁠Yeshaya 35:​1, 6, 7.

Mu Mparadizu nemuikale bintu bionso bituikala nabi dijinga bua kuikala ne disanka. Bantu kabakufua kabidi ne nzala nansha. Bible udi utuambila ne: ‘Biakudia nebivulangane pa buloba.’ (Musambu 67:​6; 72:​16, MMM) Muntu yonso neasanke ne mudimu wa bianza biende. Mufuki wetu udi utulaya ne: ‘Nebatentule mionji ya tumuma tua mvinyo mu madimi, nebadie tumuma tuayi. Kabena bakuna bintu bua mukuabu abidie.’​—⁠Yeshaya 65:​21, 22.

Mu bulongolodi bupiabupia bua Nzambi, bantu kabakuikala kabidi basombela mu nzubu umue bapitepite bungi to, anyi mu bizubuzubu ne tuzubuzubu tua manyanu to. Nzambi udi wamba ne: ‘Nebase nzubu, nebashikamemu. Kabena basa nzubu bua mukuabu abuelemu.’ Bible udi ulaya kabidi ne: ‘Kabena bakuata mudimu wabu patupu.’ (Yeshaya 65:​21-23) Nenku bantu nebikale ne mudimu wa bushuwa. Nsombelu kakutonda muntu nansha.

Bukalenge bua Nzambi nebupingajilule malanda a ditalala avua mu budimi bua Edene pankatshi pa nyama ne nyama, ne pankatshi pa bantu ne nyama. Bible udi wamba ne: ‘Tshimungu netshilale mu nzubu umue ne muana wa mukoko, ne nkashama nealale popamue ne muana wa mbuji. Muana wa ngombe ne nyama wa ntambue ne nyama udi ne manyi neyidie mashinde muaba umue, ne muana mutekete neayilombole.’​—⁠Yeshaya 11:​6-⁠9; Hoshea 2:⁠18.

Masama onso ne kalemalema konso ka mubidi nebijimine mu Mparadizu. Disanka dia bungi be! Mukanda wa Nzambi udi utushindikila ne: ‘Muena musoko kêna wamba ne: ndi ne disama.’ (Yeshaya 33:​24) ‘[Nzambi] neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’​—⁠Buakabuluibua 21:⁠4.

Wewe pebe udi mua kupeta mabenesha aa

Kakuyi mpata, mutshima webe udi usanka paudi umvua bua bualu bua malu adi Nzambi mulaye adi atangila nsombelu wa mu bulongolodi bupiabupia bua buakane. Nansha mudi bakuabu bela meji se: malu malenga aa kaakuenzeka, tshitudi ne bua kumanya ntshia se: Mufuki wetu wa dinanga kakupanga kutuenzela malu onso aa to.​—⁠Musambu 145:​16; Mika 4:⁠4.

Kadi bua kuikala ne muoyo wa tshiendelele mu Mparadizu walua pa buloba eu, kudi malu adi muntu ne bua kukumbaja. Yezu wakamanyisha bualu budi ne mushinga wa bungi kupita makuabu mu disambila dikuabu nunku. Wakamba ne: ‘Eu udi muoyo wa tshiendelele, bua bobu bakumanye wewe Nzambi umuepele mulelela ne yeye uwakatuma, Yezu Kristo mene.’​—⁠Yone 17:⁠3.

Nenku, bituikala basue bua kubuela mu bulongolodi bupiabupia budi Nzambi mulaye, tshia kumpala, tudi ne bua kuanji kulonga mua kumanya malu adi Nzambi musue ne pashishe kuatumikila. Bualu ebu mbulelela: ‘Bia panu bidi bijimina ne bijingajinga biabi; kadi muntu udi wenza mudi [Nzambi] musue, udi ushala kashidi’ bua kupetaye mabenesha a tshiendelele a kudi Mufuki wetu wa dinanga.​—⁠1 Yone 2:⁠17, MMM.

Padiku kakuyi kamanyinu, mvese yonso mmiangata mu Mukanda wa Nzambi. Padi NW ulonda mvese mutela, bidi bileja ne: mmukudimuna biangatshile mu New World Translation of the Holy Scriptures​—⁠With References, nkudimuinu wa mu Anglais.