Yezu Kristo Nnganyi?
“NANSHA bantu bavule badi kabayi bena Kristo badi bitabuja ne: Uvua mulongeshi munene ne wa meji. Uvua bulelela umue wa ku bantu ba katshia ne katshia badi batambe kushintulula nsombelu wa bantu.” (The World Book Encyclopedia) Nnganyi au? N’Yezu Kristo, muntu wakatuadija Buena-Kristo. Udi mumanye tshidiye anyi? Udiku mua kushintulula nsombelu webe anyi?
Malu akenza Yezu mu mudimu wende mbaafunde mu Bible mu mikanda inayi ya malu a kale idibu babikila ne: Evanjeliyo. Miyuki eyi mmilelela anyi? Kunyima kua Will Durant, mufundi wa miyuki ya kale muende lumu mumane kuyikonkonona, wakafunda ne: “Kuamba bua se: bantu ba tshianana bungi bukese ba mu tshimue tshipungu bakafuikakaja muyuki wa muntu wa bukole ne udi usankisha, muena bikadilu bitambe buimpe ne utamba kusaka bantu ku dimanya mua kusomba ne bakuabu, ntshishima tshia dikema kupita bishima bionso bidibu balonde mu Evanjeliyo.”
Pabi, bantu miliyo ne miliyo ba mu Asia ne ba miaba mikuabu kabatu bamanye Yezu Kristo to. Badi mua kuitabuja ne: uvuaku, kadi kabena bamone ne: nsombelu wabu udi umutangila nansha. Bakuabu badi bamona Yezu bu muntu udi kayi ne mushinga ku mêsu kuabu bilondeshile malu adi bantu badi badiamba mudibu balongi bende benze. Bamue bena ditunga dia Japon batu bamba ne: ‘Bena Kristo si ke bavua bele bombe mu Nagasaki, tshimenga tshivua ne bena Kristo ba bungi kupita bimenga bikuabu bia mu Japon.’
Kadi, udiku mua kudiula munganga bua disama dia mubedi kampanda bikala mubedi eu mubenge bua kulonda mêyi a munganga anyi? Tòo. Bena mu Bukua-buena-Kristo mbalengulule kukadi mutantshi mule mêyi a Yezu a mushindu wa kujikija ntatu ya ku dituku ne ku dituku. Nunku, pamutu pa wewe kubenga Yezu bua malu adi abengangana ne mikenji yende adi bena Kristo ba ku dîna benza, bua tshinyi kuenaku mua kulonga amue malu adi amutangila? Wewe mutangile mu Bible neumone tshidi Yezu menemene, ne mushindu udiye mene mua kukushintulula.
Yezu wakatuma dîyi bua bantu banangangane
Yezu Kristo uvua mulongeshi munene uvua musombele mu Palestine kukadi bidimu bu 2 000. Tudi bamanye anu malu makese patupu a ku buana buende. (Matayo, nshapita wa 1 ne 2; Luka, nshapita wa 1 ne 2) Pakakumbaja Yezu bidimu 30, wakatuadija mudimu wende wa “kujadikila bantu bulelela.” (Yone 18:37, Mukanda wa Mvidi Mukulu; Luka 3:21-23) Bafundi banayi ba malu a Yezu bakatamba kuimanyina pa mudimu wakenzaye munkatshi mua bidimu biende bisatu ne tshitupa bia ndekelu bia matuku akenzaye pa buloba.
Yezu wakaleja bayidi bende dîyi dinene didibu ne bua kulonda bua kumona mua kujikija bilumbu kabukabu bia mu nsombelu wabu. Dîyi adi divua dîyi kayi? Tshivua dinanga. Mu umue wa ku miyuki mitambe kumanyika bimpe mu malu a kale, udibu babikila ne: Muyuki wa pa Mukuna, Yezu wakalongesha bayidi bende mushindu wa kunanga bantu nabu. Wakamba ne: “Nuenzele bantu malu onso anudi basue banuenzele.” (Matayo 7:12) Batu babikila dîyi edi ne: Mukenji wa mushinga mukole. Mu “bantu” bakatela Yezu muaba eu mudi too ne baluishi betu. Mu muyuki umue-umue au, wakamba ne: “Nangayi baluishi benu, nusambile bua badi banukengesha.” (Matayo 5:44, MMM) Dinanga dia mushindu’eu kadienaku mua kujikija bilumbu bia bungi bitudi tumona lelu anyi? Ke tshiakaleja mulombodi wa bena Hindu, Mohandas Gandhi. Mbatele mêyi ende akambaye ne: “Tshikondo [tshituikala bafikile bonso] ku ditumikila malongesha majadika kudi Kristo mu Muyuki wende wa pa Mukuna, dîba adi netujikije bilumbu . . . bia buloba bujima.” Bantu buobu batumikile malongesha a Yezu pa bidi bitangila dinanga, badi mua kujikija bilumbu biabu bionso.
Dinanga diende didi dimuenekela ku bienzedi
Yezu uvua wenza malu avuaye ulongesha. Uvua ukeba diakalenga dia bakuabu kumpala kua diende yeye ne uvua uleja dinanga diende mu bienzedi. Dimue edi, yeye ne bayidi bende bakayisha bantu ba bungi, kupangabu too ne dîba dia kuela tshianza mukana. Yezu kumonaye ne: bivua bikengela bua bayidi ‘kuikisha tshitupa’; nenku bakaya batangile ku muaba uvua kauyi bantu. Kadi bantu tshisumbu tshinene bakabakosela kumpala ne kushalabu babalamine. Ntshinyi tshiuvua mua kuikala muenze bu wewe muikale Yezu? Yezu ‘wakadi nabu luse’ ne ‘wakabanga kubayisha malu a bungi.’ (Mâko 6:30-34) Luse elu lukole luvuaye nalu luakamusaka bua kuambuluisha bantu.
Yezu kavua ulongesha bantu anu malu a mu nyuma to. Uvua kabidi ubambuluisha ne bintu. Tshilejilu, dimue dituku wakadiisha bantu 5 000 (pa kumbusha bakaji ne bana) bavua bamuteleje dinda too ne dilolo. Munga musangu wakadiisha bantu 4 000. Musangu wa kumpala, wakadiisha bantu ne mampa atanu ne mishipa ibidi, ne musangu muibidi, wakabadiisha ne mampa muanda-mutekete ne tu-mishipa tukese. (Matayo 14:14-21; 15:32-38; Mâko 6:35-44; 8:1-9) Bua bishima anyi? Yezu uvua ubienza!
Yezu wakuondapa kabidi babedi ba bungi: bafofo, balema, bena nsudi ne bena mapapa. Wakabisha mene too ne bafue! (Luka 7:22; Yone 11:30-45) Umue musangu, muena nsudi wakamusengelela wamba ne: “Unkezulaku bu wewe mua kusua.” Ntshinyi tshiakenza Yezu? “[Wakolola] tshianza, kumulenga umuamba ne: ‘Ndi musue; kezukaku.’ ” (Mâko 1:40, 41, MMM) Yezu uvua ne dijinga dikole dia kuambuluisha bantu. Wakaleja mu bishima ebi muvuaye munange bakengi.
Mbikole bua kuitaba bualu ebu anyi? Yezu wakenza bishima biende bia bungi munkatshi mua bantu. Nansha baluishi bende, bavua dîba dionso bakeba bualu bua kumubanda nabu, kabavua mua kuvila muanda wa se: uvua wenza bishima to. (Yone 9:1-34) Kabidi, bishima biende bivua ne tshipatshila. Bivua biambuluisha bantu bua kujingululabu se: Nzambi ke uvua mumutume.—Yone 6:14.
Tuetu bakonkonone mu tshikoso malongesha ne nsombelu wa Yezu, netufike ku dimunanga bikole ne nebitusake bua kuidikija dinanga diende. Kadi, eu ki mmushindu umuepele udi Yezu mua kushintulula nsombelu wetu nansha. Kavua anu mulongeshi munene wakalongesha dinanga to. Wakaleja ne: uvuaku kumpala kua kuluaye pa buloba, ne: uvua Muana umuepele mulela wa Nzambi. (Yone 1:14; 3:16; 8:58; 17:5; 1 Yone 4:9) Wakatungunuka kabidi ne kuikala ne muoyo pakumbukaye pa buloba, ne apa ke padiye ulua kuikala ne mushinga wa bungi kuudi. Bible udi uleja ne: Nzambi wakajula Yezu ku lufu ne mmumuteke mpindieu Mfumu wa Bukalenge Buende. (Buakabuluibua 11:15) Yezu wakamba ne: ‘Eu udi muoyo wa tshiendelele, bua buobu bakumanye wewe, Nzambi umuepele mulelela, ne yeye uwakatuma, Yezu Kristo mene.’ (Yone 17:3; 20:31) Kupeta dimanya dia Yezu Kristo kudi mua kumvuija bulelela kupeta muoyo kauyi ndekelu mu Mparadizu! Mushindu kayi? Bua tshinyi kubengaku kulonga malu makuabu adi atangila Yezu ne kumona mushindu udi ‘dinanga dia Kristo dituenzeja’ bua kumuidikija? (2 Kolinto 5:14) Bantemu ba Yehowa badi ne disanka dia kukuambuluisha bua kulonga malu aa.—Yone 13:34, 35.
Padiku kakuyi kamanyinu, mvese yonso mmiangata mu Mukanda wa Nzambi.