Ngondo 3

Bakulu badi bababidila malu badi bapitshisha dîba ne bana betu ba balume batshidi bansonga bua kubalondela malu avuabu bapete mu mudimu wa Nzambi uvuabu benze ne lulamatu. (Mus. 71:17, 18) Bakulu badi balongesha bakuabu badi dibenesha kudi mikoko. Badi bakolesha bena mu tshisumbu. Mushindu kayi? Bionso bidi bakulu benza bua kulongesha bakuabu nebifikishe bana betu ba balume ba bungi bua kuluabu bakumbane bua kuambuluisha bena mu tshisumbu bua kuikalabu bashindame, ne kuikalabu mu buobumue lelu ne nangananga mu ntatu yamueneka mu tshikondo tshia dikenga dinene. (Yeh. 38:10-12; Mika 5:5, 6) Ke bualu kayi bakulu wetu, tudi tunulomba bua nuvuije dilongesha bakuabu bualu bua pa tshibidilu mu mudimu unudi nawu lelu. Bulelela, tudi tumvua ne: bua dîba dinudi nupitshisha bua kuenza midimu ya mushinga mukole ya mu tshisumbu, nudi mua kumona ne: makanda enu a mubidi akadi makepele. Nunku, nudi mua kuangata ndambu wa dîba adi bua kulongesha bakuabu. (Muam. 3:1) Panudi nuenza nunku, nudi nuenza mudimu bimpe ne dîba dienu. w15 15/4 1:8-10

Kakuyi mpata udi witaba ne: Bible udi ne mukenji wa Nzambi bua bantu bonso. Kadi Bible udiku kabidi uleja muudi mua kusemena pabuipi ne Yehowa anyi? Eyowa. Mushindu kayi? Paudi ubala Bible ne umulonga pa tshibidilu, utangila bienzedi biebe ne tshidiye wamba, pashishe welangana meji mudi bualu abu butangila nsombelu webe, udi upetesha Yehowa mushindu wa kuyukila nebe ku diambuluisha dia Dîyi diende. Kuenza nunku nekukuambuluishe bua kukolesha malanda ebe nende. (Eb. 4:12; Yak. 1:23-25) Tshilejilu, bala ne elangana meji bua mêyi a Yezu a ne: “Lekelayi kudibutshila biuma pa buloba.” Wewe mumone ne: nsombelu webe mmumane kuimanyina pa diteka malu a Bukalenge pa muaba wa kumpala, neudiumvue muanyishibue kudi Yehowa. Kadi wewe mumone ne: bidi bikengela kupepeja nsombelu webe bua kudifila bikole ku malu a Bukalenge, Yehowa mmukuleje muaba uudi mua kuakaja bua umone mua kusemena pabuipi nende menemene.​—Mat. 6:19, 20. w15 15/4 3:3-5

Anu bu Paulo, patudi ne bia bungi bia kuenza mu mudimu wa diyisha, tudi ne dishindika dia ne: Yehowa ‘neatusakidile’ bintu bikuabu bionso bitudi nadi dijinga. (Mat. 6:33) Bu mutudi bamanyishi ba Bukalenge, ‘mbatupeshe lumu luimpe’ ne Yehowa udi utuangata bu ‘benzejanganyi nende ba mudimu.’ (1 Tes. 2:4; 1 Kol. 3:9) Tuetu tuenza mudimu wa Nzambi bikole, nebikale bipepele bua kuindila diambuluisha diende. Nunku, etshi ke tshikondo tshia tuetu kukolesha malanda etu ne Nzambi. Bikala bualu kampanda bututatshisha, tubumone bu mushindu wa tuetu kusemena pabuipi ne Yehowa. Eyowa, patudi tudifila mu Dîyi dia Nzambi, tutungunuka ne kusambila ne kuditua mu midimu ya bena Kristo, tuikalayi batuishibue ne: Yehowa udi umona tshitudi bilondeshile nsombelu utudi nende mpindieu ne udi kabidi umona bualu buonso budi butuindile kumpala. w15 15/4 4:17, 18

Lutambishi ludi mua kunyanga ditalala dia tshisumbu. Lukuna lukole ne didimona bapite bakuabu bidi mua kunyanga ngakuilu wetu ne malu atudi tuenza, bifikisha ku dinyingalaja bakuabu. (Nsu. 12:18) Tuetu tudimona bapite bakuabu, mbimpe tuvuluke ne: ‘Muntu yonso udi ne lutambishi mu muoyo udi tshintu tshibi kumpala kua Yehowa.’ (Nsu. 16:5, NWT) Mbimpe tukonkonone kabidi mushindu utudi tumona bantu ba makoba makuabu, ba bisamba bikuabu anyi ba bibidilu bikuabu. Tuetu tumona ne: tudi tuditambisha bua dikoba dietu anyi bua tshisamba tshietu, tudi tupua muoyo ne: Nzambi uvua muenze “bisamba bionso bia bantu bifumine mu muntu umue.” (Bien. 17:26) Mu mushindu eu, tuetu bonso tudi bantu bamue bualu bantu bonso badi ne nkambua umue Adama. Ke bualu kayi mbibi bua kuela meji ne: bantu ba dikoba kampanda mbapite ba dikoba kansanga anyi mbashadile kudi bakuabu. Kuela meji mushindu eu kudi kukumbaja tshipatshila tshia Satana tshia kunyanga dinanga dietu dia bena Kristo ne buobumue buetu. (Yone 13:35) Bua kuluangana ne Satana ne kumutshimuna, tudi ne bua kukandamena mishindu yonso ya lutambishi lubi.​—Nsu. 16:18. w15 15/5 2:8, 9

Kakuyi mpata tudi tusanka bua mudi Nzambi mulaye bela manyi ba lulamatu muoyo udi kawuyi ufua mu diulu ne mulaye “mikoko mikuabu” ya Yezu idi ne lulamatu muoyo wa tshiendelele pa buloba. (Yone 10:16; 17:3; 1 Kol. 15:53) Bushuwa, bantu bapeta muoyo udi kawuyi ufua mu diulu anyi bapeta muoyo wa tshiendelele pa buloba kabakuikala ne ntatu itudi nayi lelu to. Yehowa mmumanye tunyinganyinga tutudi natu anu muvuaye mumanye muvua bena Isalele bakenga pavuabu bapika mu Ejipitu. Bulelela, ‘mu makenga abu onso yeye wakumvua dikenga.’ (Yesh. 63:9) Bidimu nkama ya bungi pashishe, bena Yuda bavua ne buôwa bualu baluishi babu bavua babapangisha bua kuibakulula ntempelo, kadi Nzambi wakamba ne: ‘Udi ubisha tshianza tshiende kudi bena Isalele udi utua mu kamonyi ka dîsu dia Yehowa.’ (Zek. 2:8) Anu bu mudi mamu munange bikole muanende wa mu maboko, ke mudi Yehowa wenzela bantu bende malu ne dinanga. (Yesh. 49:15) Mu mushindu kampanda Yehowa udi uditeka pa muaba wa bakuabu, ne mmutufuke petu ne bukole ebu.​—Mus. 103:13, 14. w15 15/5 4:2

Yezu uvuaku usua kuleja ne: bapele bavua ne bua kuikalaku pa buloba kashidi anyi? Tòo, uvua usua kuleja ne: bapele bavua ne bua kuikalaku mu tshikondo tshitshidi bulongolodi bubi ebu buikalaku. Majinga manene a bantu ba bungi kaena akumbana lelu anu bua bukokeshi bubi bua bantu. Kadi disulakana dikadi pabuipi. (Mus. 72:16) Bishima bia Yezu bidi bitujadikila mudiye ne bukole ne dijinga dia kuenza mudimu mu katupa kîpi emu ne bukokeshi buende bua diakalenga dietu. (Mat. 14:14-21) Nansha mutudi katuyi mua kuenza bishima, tudi mua kukoka ntema ya bantu ne disanka ku Dîyi dia Nzambi difundisha ku nyuma wende. Milayi ya mu Bible idi itujadikila ne: netupete nsombelu muimpe kumpala eku. Bu mutudi Bantemu ba Yehowa badi ne dimanya dia mushinga edi bua matuku atshilualua, katuenaku tumona ne: tudi ne dibanza kudi bantu bakuabu anyi? (Lomo 1:14, 15) Kuelangana meji bua bualu ebu kudi kutusaka bua kuambila bakuabu lumu luimpe lua Bukalenge bua Nzambi.​—Mus. 45:1; 49:3. w15 15/6 1:7, 10, 11

Tuetu tuangata malanda etu ne Yehowa ne mushinga, netuenze muetu muonso bua kumusankisha mu bualu buonso ne mu lungenyi luetu. Netuenze bua kuikala ne ‘muoyo mukezuke’ pa kutangija meji etu ku malu adi makezuke, adi mimpe ne a kutumbisha. (Mus. 24:3, 4; 51:6, NWT; Filip. 4:8) Bushuwa, Yehowa mmumanye bimpe ne: tudi bantu bapange bupuangane. Mmumanye ne: muoyo wetu utu utusaka anu ku majinga mabi. Kadi tudi bamanye ne: bidi bimutonda patudi tushala balame majinga mabi pamutu pa tuetu kuenza muetu muonso bua kuumbusha. (Gen. 6:5, 6) Kuelangana meji bua bualu ebu kudi kutuambuluisha bua kulama meji etu makezuke. Kuleja Yehowa mu disambila dijinga dietu dia kumbusha majinga mabi mmushindu muimpe wa kuleja mutudi bamueyemene ne muoyo mujima. Patudi tusemena pabuipi ne Yehowa mu disambila, yeye pende udi usemena pabuipi netu. Udi utupesha ne muoyo mujima nyuma wende muimpe udi ukolesha dipangadika dietu dia kukandamena meji a tshiendenda ne dia kushala bakezuke. w15 15/6 3:4, 5

Mona ne: muaba eu muntu kena ulomba bua tshiakudia “tshiende” nkayende tshia dituku to, kadi udi ulomba bua tshiakudia “tshietu” tshia dituku. Victor, mutangidi wa tshijengu mu Afrike udi wamba ne: “Ntu ngela Yehowa tuasakidila ne muoyo mujima bua mundi meme ne mukajanyi katuyi tutamba kusamisha mutu bua biakudia bia dituku didi dilonda anyi bua makuta a kufuta nzubu. Bana betu batu batutabalela bimpe dituku dionso. Kadi ntu nsambila bua bana betu badi batuambuluisha bamone mua kupita bimpe ne ntatu ya malu a mpetu idibu batuilangana nayi.” Tuetu ne ndambu wa biakudia bikumbane bua matuku a bungi, tudi mua kuvuluka bana betu badi mu bupele anyi badi bipupu bikuate. Katuena ne bua kusambila anu buabu patupu to, kadi tudi ne bua kuenza malu mu diumvuangana ne masambila etu. Tshilejilu, tudi mua kuambuluisha bena Kristo netu badi mu lutatu ne bintu bitudi nabi. Tudi kabidi mua kuikala tufila mapa bua mudimu wa pa buloba bujima bamanye ne: badi benza nawu mudimu bimpe.​—1 Yone 3:17. w15 15/6 5:4-6

Mu Yeshaya 60:17, bavua badianjile kuleja ne: bavua ne bua kushintulula ne kuakaja malu a bungi mu tshitupa tshia bulongolodi bua Nzambi tshia pa buloba. Bena Kristo batshidi bansonga anyi batshidi bapiabapia mu bulelela bakadi babale anyi bumvuile malu adibu bashintulule aa kudi bakuabu. Kadi kudi bana betu ba bungi badi bapete diakalenga dia kumona mudi mashintuluka mimpe aa menzeke. Bana betu aba mbatuishibue ne: Nzambi udi wenza mudimu ne Mukalenge wetu Yezu bua kuludika ne kulombola bulongolodi buende. Mbamanye ne: dituishibua diabu didi ne bijadiki, bijadiki bitudi tuetu bonso tuambila bakuabu. Patudi tuteleja malu adi bena Kristo netu aba bamba ne muoyo mujima, ditabuja dietu ne dieyemena dietu kudi Yehowa bidi bikola. Tudi ne bua kuambila bantu bakuabu malu adi atangila bulongolodi bua Yehowa nansha tuetu tukadi ne bidimu bungi kayi mu bulelela. Dikalaku dia mparadizu wa mu nyuma mu bulongolodi bubi ebu, bunyanguke ne budi ne bantu badi kabayi ne dinanga ntshishima mu matuku etu aa! w15 15/7 1:12, 13

Mvita ya Armagedone neyifikishe ku ditumbishisha dîna dinsantu dia Yehowa. Bantu bonso badi bu mbuji “nebaye mu kabutu ka tshiendelele.” (Mat. 25:31-33, 46) Kakuakuikala malu mabi pa buloba to, ne “musumba munene wa bantu” newupanduke ku Armagedone tshitupa tshia ndekelu tshia dikenga dinene. Bu mutudi bindile malu mimpe akadi pa kuenzeka aa, ntshinyi tshidi yonso wa kutudi ne bua kuenza mpindieu? Mupostolo Petelo muenzeja kudi nyuma muimpe wa Nzambi wakafunda ne: “Bu mudi bintu bionso ebi ne bua kuvingutuka mushindu eu, nuelangane meji bua kumanya ne: nudi ne bua kuikala bantu ba mushindu kayi mu bikadilu bia tshijila ne mu bienzedi bia dilamata Nzambi, panudi nuindila ne nulama bimpe mu meji dikalaku dia dituku dia Yehowa . . . Nunku bananga, bu munudi bindile malu aa, nuenze muenu muonso bua ndekelu wa bionso anusangane kanuyi katoba, kanuyi kalema, ne mu ditalala.” (2 Pet. 3:11, 12, 14) Nunku, tudisuikayi bua kushala bakezuke mu nyuma ne tutuayi Mukalenge wa ditalala Yezu Kristo nyama ku mikolo. w15 15/7 2:17, 18

Bantu ba Yehowa pa buloba bujima badi benza mudimu mukole bua kufila makuta ne kuibaka Nzubu ya Bukalenge. Bena budisuile badibu kabayi bafuta batu benza plan ya nzubu eyi, bayibaka ne bayakajilula. Ke bualu kayi mu bidimu 15 bishale ebi katshia mu ngondo wa 11 mu 1999, tudi bibake Nzubu ya Bukalenge mimpe mipite pa 28 000 pa buloba bujima, mmumue ne: Nzubu ya Bukalenge mitue ku 5 dituku dionso. Bulongolodi bua Yehowa butu butuma bena budisuile ne butula makuta bua kuibaka Nzubu ya Bukalenge muaba wonso udibu nayi dijinga. Tudi tulonda dîyi dinene dia mu Bible dia ne: badi ne bia bungi badi mua kuambuluisha badi kabayi nabi “bua kuikale dikumbanangana.” (2 Kol. 8:13-15) Mbipeta kayi bidi bimueneke? Mbibakile bisumbu bivua kabiyi ne mushindu Nzubu ya Bukalenge ya bungi. w15 15/7 4:9-11

Bua malu a mu tshimanyinu tshia dikalaku dia Kristo kukumbajawu tshipatshila tshiawu, avua ne bua kumueneka patoke kudi bantu bavua batumikile mubelu wa Yezu wa ‘kushala batabale.’ (Mat. 24:27, 42) Ke tshidi tshienzeke katshia mu 1914. Kutuadijila anu tshikondo atshi, malu a mu tshimanyinu tshia Yezu adi enda akumbana. Bidi bimueneka patoke ne: tudi mu matuku a ku nshikidilu mmumue ne: mu tshikondo tshîpi tshidi tshifikisha ku kabutu ka ndongoluelu eu mubi. (Mat. 24:3) Kadi, bua tshinyi lelu bena Kristo badi ne bua kutungunuka ne kuindila? Bualu tudi tutumikila Yezu Kristo. Kabidi, tudi bajingulule ne: tshimanyinu tshivuaye mufile bua matuku a ku nshikidilu tshidi tshienda tshikumbana. Tudi bajadike ne: nshikidilu ukadi musemene pabuipi, ki mbualu tudi tuitaba bualu buonso budibu batuambila to, kadi mbualu tudi batuishibue ne: mulayi wa buprofete wa mu Bible udi wenda ukumbana. Tudi ne bua kushala badimuke ne badilongolole bua dilua dia nshikidilu. w15 15/8 2:8, 9

Mu Mparadizu kupitshisha amue mêba bua kuenza malu adi atusankisha ne kujikija lutetuku nebikale ne wabi muaba. Tuanjibi kuamba, bua tshinyi Yehowa mmutufuke ne dijinga dia kuikala ne malu adi atusankisha ne dia kujikija lutetuku pikalaye kayi musue kutukumbajila majinga aa mudibi bikengedibua? (Muam. 2:24) Mu mushindu kayi wonso, Yehowa neikalanu ne bua ‘kukumbaja dijinga dia tshintu tshionso tshidi ne muoyo.’ Tutu ne dijinga dia kujikija lutetuku ne dia kuikisha, kadi bua majinga aa kutusankishawu bikole, tudi ne bua kuteka malanda etu ne Yehowa pa muaba wa kumpala. Ke muikalabi kabidi mu Mparadizu. Nunku, mbimpe tuetu kuteka majinga etu pa muaba wawu ne kukeba tshia kumpala Bukalenge ne kuimanyina pa masanka atudi tupeta patudi tuenzela Yehowa mudimu. (Mat. 6:33) Mu bulongolodi bupiabupia, nsombelu neikale muimpe kupita ne mutudi tuela meji. Tulejayi mutudi ne dijinga dikole dia kusomba mu Mparadizu pa kudilongolola ku mpindieu. w15 15/8 3:17, 18

Yezu uvua muntu mupuangane, kadi pavuaye pa buloba, uvua munkatshi mua bantu bapange bupuangane. Baledi bende ne bana babu ba balume ne ba bakaji bavua bonso bapange bupuangane. Nansha bayidi bende bavua bamulamate bavua ne ngikadilu bu mudi lutambishi ne budinangi. Tshilejilu, butuku bua kumpala kua lufu luende, “bakakokangana bikole munkatshi muabu bua kumanya muntu uvua umueneka munene mupite bakuabu.” (Luka 22:24) Nansha muvua bayidi ba Yezu bapange bupuangane, Yezu uvua mujadike ne: bavua ne bua kulua bena Kristo bashindame ne kuenza tshisumbu tshivua mu buobumue. Butuku abu, Yezu wakasambila bua bobu kuikalabu mu buobumue, kulombaye Tatuende wa mu diulu wamba ne: ‘Bikale tshintu tshimue, anu bu muudi wewe Tatu mu buobumue nanyi ne meme mu buobumue nebe, bua bobu pabu bikale netu mu buobumue, bua bikale tshintu tshimue bu mutudi nebe tshintu tshimue.’​—Yone 17:21, 22. w15 15/9 1:10, 11

Tudi mua kufuanyikija tshipepele tshikole ne mavuala bivua bituta Petelo pavuaye wendela pa mbuu wa Galela ne ntatu ya bungi ne mateta bidi bena Kristo batuilangana nabi lelu. Nansha mudi ntatu eyi mikole menemene, Yehowa udi mua kutuambuluisha bua tuikale bakole. Kadi vuluka ne: Petelo kavua mudine mu mâyi bua tshipepele tshikole ne mavuala bivua bimututa to. Kadi Bible udi wamba ne: “Pakatangilaye tshipepele, wakumvua buôwa.” (Mat. 14:24-32) Petelo uvua mulekele kutangila kudi Yezu, ke ditabuja diende kutuadijadi kuteketa. Bia muomumue, tudi mua kutuadija kudina tuetu batuadije ‘kutangila tshipepele,’ kutuma ntema ku bukole buatshi ne kutuadija kuelakana ne: Yehowa kena mua kutuambuluisha. Tudi ne bua kumanya ne: ditabuja dietu didi mua kukepa bualu Bible udi wamba ne: kujimija ditabuja ‘mbubi budi butujingila bipepele.’ (Eb. 12:1) Anu bu Petelo, tuetu tuimanyina anu pa malu mabi, ditabuja dietu didi mua kuteketa lukasa. w15 15/9 3:1, 6, 7

Muntu yeye mukupeshe dipa kampanda, ntshinyi tshiutu wenza? Misangu ya bungi utu uleja muudi ne dianyisha bua dipa edi. Wewe wangata dipa edi ne mushinga, udi kabidi wenza nadi mudimu. Tudi ne dianyisha dia bungi bua mudi Yehowa mutupeshe tshintu tshionso tshitudi natshi dijinga bua kuikala ne muoyo ne disanka. Bualu ebu kabuenaku butusaka bua kumunanga petu anyi? Yehowa uvua mupeshe bena Isalele bintu bia bungi bimpe. Munkatshi mua bidimu nkama ya bungi, wakabalombola ku diambuluisha dia mikenji yende ne kubabeneshaye ku mubidi ne mu nyuma. (Dut. 4:7, 8) Pavua bena Isalele batumikila ne muoyo mujima Mikenji ya Nzambi bu mudi wa kumupesha ‘bintu bitambe buimpe bia ku bintu bidi bikola bia kumpala bia mu budimi,’ bavua batungunuka ne kupeta masanka aa. (Ekes. 23:19, NWT) Nunku bena Isalele bavua baleja ne: bavua ne dianyisha bua dinanga divua Yehowa ubaleja ne bua masanka avuaye ubapetesha.​—Dut. 8:7-11. w15 15/9 5:5, 6

Mmunyi mutudi mua kumona tshianza tshia Yehowa mu nsombelu wetu? Ela meji bua malu aa: udi mua kudiumvua ne: Yehowa mmukuambuluishe bua kupeta bulelela. Ukadiku mubuele mu bisangilu bia bena Kristo, muteleje muyuki, ne muambe ne: “Ke tshimvua natshi dijinga menemene!” Pamuapa udi mumone mudi Yehowa muandamune dimue dia ku masambila ebe. Pamuapa uvua musue kuenzela Yehowa mudimu wa bungi ne udi mumone mudiye mukuambuluishe bua kukumbaja tshipatshila tshiebe etshi. Anyi udi pamuapa mulekele mudimu uuvua wenza bualu udi ukuangata dîba dia wewe kuenzela Yehowa mudimu ne udi mumone pashishe mudi Nzambi mukumbaje mulayi wende wa ne: “Tshiakukulekela nansha kakese.” (Eb. 13:5) Tuetu batabale mu nyuma ne bikale ne “muoyo mutoke,” tudi mua kumona bipepele mudi Yehowa mutuambuluishe mu mishindu ya bungi. Mmunyi mutudi mua kuikala ne “muoyo mutoke”? Tudi ne bua kulama lungenyi luetu lukezuke ne kulekela kuenza bualu buonso budi bubi. (2 Kol. 4:2) Tuetu bakoleshe malanda etu ne Nzambi ne bikale ne bikadilu bimpe, netuikale munkatshi mua bantu badi mua kumona Nzambi. w15 15/10 1:17, 19

Bamue bena Greke bavua balue mu Yelushalema bua kuenza tshibilu tshia Pasaka bakamona tshivua Yezu muenze ne biakabakemesha bikole. Ke bobu kulomba mupostolo Filipo bua kumonanganabu ne Yezu. Kadi Yezu kavua ukeba bantu bavua mua kumuambuluisha ne kumuakuila kudi baluishi bende to. Uvua mumanye tshivua ne mushinga wa bungi. Wakashala muimanyine pa tshivua Yehowa musue bua enze, mmumue ne: kufila muoyo wende bu mulambu. Ke bualu kayi, yeye mumane kuvuluija bayidi bende ne: uvua ne bua kufua mu matuku makese, wakambila Andele ne Filipo ne: “Muntu udi munange muoyo wende udi uwushipa, kadi muntu udi mukine muoyo wende pa buloba ebu neawulame bua kupeta muoyo wa tshiendelele.” Pamutu pa kuenza tshivua bena Greke bajinga, wakakankamija bantu bua bidikije tshilejilu tshiende tshia kudipangisha malu ne kuambaye mêyi adi mu mvese wa lelu aa. Kakuyi mpata, Filipo uvua ne bua kuambila bena Greke aba mukenji udi ukankamija eu. (Yone 12:20-25) Nansha muvuaye mudifile bikole mu nsombelu wende bua kuyisha, kavua misangu yonso welangana meji anu bua mudimu eu to. w15 15/10 3:13, 14

Nansha muvua bayidi bende bakokangana misangu ya bungi bua kumanya uvua munene kupita bakuabu munkatshi muabu, Yezu kavua mulengulule tshilumbu etshi to. Kadi uvua ubabela ne lutulu ku musangu ne ku musangu. Misangu yonso uvua ne bulenga ne uvua windila tshikondo tshimpe ne ukeba muaba muimpe bua kubabela. (Mâko 9:33-37) Ikala unyoka bana bebe bua kuleja ne: udi mubanange. Imue misangu udi mua kubumvuija patupu bua tshinyi tshintu kampanda ntshimpe anyi ntshibi. Kadi bobu kabayi anu batumikila? (Nsu. 22:15) Idikija tshilejilu tshia Yezu. Tungunuka ne kubanyoka ne lutulu pa kubaludika, kubalongesha ne kubabela. Sungula tshikondo tshimpe ne muaba muimpe bua kubanyoka, ne enza nunku ne bulenga buonso. Elaine muanetu wa bakaji wa mu Afrique du Sud udi wamba ne: “ Baledi banyi kabavua bannyoka ne tshiji anyi bannyoka kabayi bangumvuija tshivuabu bannyokela to. Ke bualu kayi mvua ndiumvua mu bukubi. Mvua mumanye misangu yonso mikalu yanyi, ne tshivuabu bandombe bua kuenza.” w15 15/11 1:5, 6

Elabi meji muvua nsombelu wa bantu mua kuikala bu Nzambi kayi mubanange. Bantu bavua mua kutungunuka ne kudilombola ne kuikala ku bulombodi bua Satana Diabolo, nzambi udi kayi ne dinanga ne muena lukinu. (2 Kol. 4:4; 1 Yone 5:19; Buak. 12:9, 12) Ebi bidi bileja muvua nsombelu wa matuku atshilualua mua kuikala mubi menemene bu Yehowa kayi mutunange. Pavua Satana mutombokele bukokeshi bua Yehowa Nzambi, wakelesha mpata bukenji bua Nzambi bua kuikala Mfumu wa diulu ne buloba. Satana wakaleja muvua bukokeshi buende mua kuikala buimpe kupita bua Nzambi. (Gen. 3:1-5) Nansha muvua Yehowa mulekele Satana bua kujadikaye tshivuaye muambe atshi, bivua bua tshitupa tshîpi. Nunku Yehowa wakaleja muvuaye ne meji pakalekelaye tshikondo tshile tshipita bua kulejaye patoke mudi bukokeshi bukuabu kabuyi mua kuikala buimpe bu buende. Kadi malu adi menzeke adi aleja patoke ne: Satana anyi bantu kabena mua kulombola bimpe to. w15 15/11 3:3, 4

Budipuekeshi budi butuambuluisha bua kutumikila dîyi dinene dia mushinga divua Yezu muambe. Wakamba mu Muyuki wende wa pa mukuna ne: “Nuakumvua tshivuabu bambe ne: ‘Udi ne bua kunanga muntu nebe, kadi kukina muena lukuna webe.’ Kadi ndi nnuambila ne: Tungunukayi ne kunanga badi nenu lukuna, ne kulombela badi banukengesha Nzambi; bua kuleja munudi bana ba Tatu wenu wa mu diulu, bualu utu ubandishila bantu babi ne bantu bimpe dîba diende ne ulokeshila bantu bakane ne badi kabayi bakane mvula.” (Mat. 5:43-45) Eyowa, bu mutudi batendeledi ba Nzambi, tudi ne bua kunanga ‘bena lukuna betu’ nansha bobu batuenzela malu mushindu kayi. Bantu ba Yehowa badi ne bua kuleja mu nsombelu wabu mujima mu ngenzelu wabu wa malu ne mu bikadilu biabu ne: mbanange Yehowa ne muntu nabu. Tshilejilu, nansha bamue bantu batuluisha ne bakine mukenji wetu, tutu tubambuluisha padibi bikengela. w15 15/11 4:17, 19, 20

Bantu ba Nzambi batu misangu yonso benza mudimu ne tshipedi tshia muakulu bua kutumbisha Yehowa ne bua kuambila bantu bakuabu malu ende. Mu bidimu bishale ebi, bantu ba Nzambi mbenze mudimu ne tshipedi etshi bua kukudimuna Bible bua bantu ba bungi balonge bua kumanya Yehowa. Kudi nkudimuinu ya Bible binunu bia bungi, kadi mmishilangane mu mushindu udiyi milamate ku mukenji wa mu mifundu ya ntuadijilu. Mu bidimu bia 1940, Komite wa dikudimuna Bible wa Nkudimuinu wa bulongolodi bupiabupia wakaleja malu manene avua bakudimunyi ba mu miakulu mipite pa 130 ne bua kutumikila aa: 1) Kunemeka dîna dia Nzambi ne kudipingaja mu Dîyi diende miaba yonso ivuadi mu mifundu ya ntuadijilu. (Mat. 6:9) 2) Kukudimuna mukenji wa ntuadijilu ku muaku ku muaku padiku mushindu. Koku kakuyi mushindu, kukudimuna diumvuija dilelela. 3) Kukudimuna mu muakulu udi mupepele bua kubala ne kumvua.​—Neh. 8:8. w15 15/12 2:1, 2

Muadi wa mpungi wowu kawuyi umvuika bimpe, bivua mua kukebela basalayi bavua baya batangile kumpala njiwu. Bia muomumue, tuetu katuyi tumvuija malu bimpe, bantu badi mua kupeta tshibuejakaji anyi kuitaba bualu budi kabuyi bulelela. (1 Kol. 14:9) Nansha mutudi basue bua bantu bumvue bimpe tshitudi tuamba, tudi ne bua kuikala badimuke bua kubenga kuamba mêyi a dipanga bukalanga anyi kanemu. Yezu mmutushile tshilejilu tshitambe buimpe tshia mushindu wa kusungula mêyi avua bantu mua kumvua bipepele. Tukonkononayi muyuki wende muîpi kadi udi ne bukole udi mu Matayi nshapita 5 too ne wa 7. Yezu kavua muenze mudimu ne miaku mikole anyi ivua kayiyi ne mushinga bua kukemesha bantu to, ne kavua muambe malu avua mua kunyingalaja bakuabu to. Kadi wakasungula miaku mimpe, mipepele ne idi yumvuika bimpe bua kulenga mioyo ya bantu bavua bamuteleja. Tshilejilu, bua kuambuluisha bantu bua kubenga kusamisha mutu bua tshivuabu ne bua kudia dituku dionso, wakabaleja mudi Yehowa udisha nyunyi. Pashishe, wakaleja mudi bantu bavua bamuteleja bashilangane ne nyunyi pakebejaye ne: “Nuenu kanuena bayipite ku mushinga anyi?” (Mat. 6:26) Kuakula ne miaku mipepele idi yumvuika bimpe bua kulenga mioyo ya bantu mmushindu muimpe wa dikema bua kubambuluisha. w15 15/12 3:13, 14

Kunangangana bu bana ba muntu kudi kumvuija tshinyi? Muaku wa mu tshiena Greke philadelphia udi Paulo muenze nawu mudimu muaba eu udi umvuija ku muaku ku muaku “kunanga muanetu bikole.” Dinanga dia bana ba muntu ndinanga dikole didi pankatshi pa bena mu dîku anyi balunda. (Yone 11:36) Katuena tudiamba patupu mutudi bana ba muntu to, kadi tudi bushuwa bana ba muntu. (Mat. 23:8) Dinanga dikole ditudi nadi bua bana betu ndileja bimpe mu mêyi aa: “Mu dinanga dia bana benu, nunangangane bikole. Nuikale ba kumpala mu dipesha bakuabu bunême.” (Lomo 12:10) Dinanga edi pamue ne dinanga didi dishindamene pa mikenji ya bena Kristo anyi agape, didi diambuluisha bantu ba Nzambi bua kuikala balunda ne kuikala mu buobumue. Buena Kristo budi bukonga batendeledi balelela bonso, nansha bobu ba mu ditunga kayi. (Lomo 10:12) Bu mutudi bana ba muntu, Yehowa mmutulongeshe bua kunangangana bu bana ba muntu.​—1 Tes. 4:9. w16.01 1:5, 6

Dinanga ditudi nadi bua Yezu didi ditusaka bua kuyisha bantu ne tshisumi ne kubavuija bayidi. (Mat. 28:19, 20; Luka 4:43) Mu tshikondo tshia Tshivulukilu, netuikale ne mpunga wa kulua mpanda-njila muambuluishi bua kuenza mêba 30 peshi 50. Udiku mua kulongolola nsombelu webe bua kuenza mudimu eu anyi? Tatu kampanda wa bidimu 84 ukadi mufuishe mukajende wakela meji ne: kavua ne mushindu wa kulua mpanda-njila to, bualu ukavua mukulakaje ne muikale ne tusamasama. Kadi, bampanda-njila ba muaba uvuaye bakajinga bua kumuambuluisha. Bavua bamufutshila njila ne bakamupesha teritware uvuaye mua kuyisha bimpe. Bu tshipeta, muanetu eu wakakumbaja tshipatshila tshiende tshia mêba 30. Udiku mua kuambuluisha muanetu kampanda bua kuluaye mpanda-njila muambuluishi mu tshikondo tshia Tshivulukilu anyi? Bushuwa, tuetu bonso katuakukumbana bua kulua bampanda-njila bambuluishi to. Nansha nanku, tudi mua kuenza mudimu ne dîba dietu ne makanda etu bua kuvudija mudimu utudi tuenzela Yehowa. w16.01 2:7, 11

Bu mudibi bikole bua kumanya mêna a bela manyi bonso badi pa buloba lelu, mmunyi mudi mikoko mikuabu mua “kuya” nabu? Tangila tshidi mulayi wa buprofete wa Zekâya wamba bua bantu dikumi ba mu tshimfuanyi. Bantu aba bavua ne bua ‘kukuata ku luzemba lua tshivualu tshia muena Yuda, bamuambila ne: tudi basue kuya nenu, bualu tudi bumvue ne: Nzambi udi nenu.’ Nansha mudi mvese eu wakula bua muena Yuda umue, muaku ‘nenu’ udi uleja bantu ba bungi. Nunku muena Yuda eu udi ne bua kuikala kasumbu kajima ka bela manyi, kadi ki mmuela manyi umue to. Ke bualu kayi kabiena ne mushinga bua kumanya dîna dia muena mu kasumbu aka yonso ne kumulonda to. Kadi tudi ne bua kumanya kasumbu ka bantu badi benza muena Yuda wa mu nyuma eu ne kuenza mudimu pamue ne kasumbu aka. Yezu ke Mulombodi wetu, ne Bible udi utuambila ne: tudi ne bua kumulonda anu yeye.​—Mat. 23:10. w16.01 4:4

Kutuadijila ku diledibua dia muntu too ne ku lufu luende, utu musue bua bamunange. Bantu batu basue kudia bulunda buimpe ne bukole, kadi ki mbulunda bua malu a mananga to. Tutu basue kudia bulunda ne bantu ne kuikala nabu mu malanda mimpe. Kadi dinanga dia Yehowa ndipite dinanga kayi diakuabu dionso. Bantu ba bungi kabatu bitaba ne: bantu badi mua kudia bulunda buimpe ne bukole ne Nzambi wa bukole buonso to. Kadi tudi bamanye bimpe ne: bantu badi mua kudia nende bulunda. Bible udi utuambila ne: kudi bantu bapange bupuangane bavua balue balunda ba Nzambi. Bilejilu biabu bidi mua kutulongesha, bualu kudia bulunda ne Nzambi ntshipatshila tshinene tshitudi ne bua kuikala natshi. Tshilejilu tshinene tshia muntu uvua mudie bulunda bua nunku ntshia Abalahama. (Yak. 2:23) Mmunyi muvuaye mulue mulunda wa Nzambi? Bulunda bukole buvua Abalahama mudie ne Nzambi buvua bushindamene pa ditabuja. Bible udi ubikila Abalahama ne: “tatu wa bantu bonso badi ne ditabuja.”​—Lomo 4:11. w16.02 1:1, 2

Nansha muvua tatuende wa Hezikiya umue wa ku bakalenge babi menemene ba mu Yuda, Hezikiya yeye wakalua umue wa ku bakalenge bimpe menemene. (2 Bak. 18:6) Hezikiya wakadifila bua kujikija malu mabi a bungi avua tatuende muenze. Wakakezula ntempelo, kulomba Nzambi bua abuikidile bantu mibi yabu, ne kumbusha mpingu yonso ivua mu buloba buabu. (2 Kul. 29:1-11, 18-24; 31:1) Pashishe pavua Saneheliba mukalenge wa Suliya ujinga kuela Yelushalema mvita, Hezikiya wakaleja muvuaye ne dikima ne ditabuja dikole. Uvua ne dieyemena dia ne: Nzambi uvua ne bua kubasungila ne wakakolesha bantu ku mêyi ne ku tshilejilu tshiende. (2 Kul. 32:7, 8) Pakapita matuku, Hezikiya wakapeta lutambishi, kadi pavua Yehowa mumubele, wakadipuekesha ne kunyingalalaye. (2 Kul. 32:24-26) Bidi bimueneka patoke ne: Hezikiya kavua mulekele bibidilu bia mu dîku diabu binyanga nsombelu wende to. Kadi, wakaleja ne: uvua mulunda wa Yehowa, ne tshilejilu tshimpe tshia tuetu kuidikija. w16.02 2:11

Bulenga budi mua kukuambuluisha bua kuikala ne lulamatu kudi Yehowa ne kudi bantu bakuabu. Tshilejilu, udi mua kuikala ne tshijadiki tshia ne: muanetu kampanda mmuenze mpekatu munene. Udi musue kuikala ne lulamatu kudiye, nangananga yeye muikale mulunda webe wa pa muoyo anyi muena mu dîku dienu. Kadi wewe mubuikile mêsu pa mpekatu eu, neuleje muudi kuyi ne lulamatu kudi Nzambi. Bushuwa, lulamatu luebe kudi Yehowa ludi ne bua kuikala pa muaba wa kumpala. Ikala ne bulenga kadi ne dikima. Ambila muanenu au bua alombe diambuluisha kudi bakulu ne abambile bualu abu pa lukasa. Yeye kayi muenze nanku, wewe udi ne bua kuambila bakulu. Paudi wenza nunku, udi ushala mulamate Yehowa. Udi kabidi uleja muanenu bulenga bualu bakulu nebamuambuluishe bua kuikalaye kabidi mu malanda mimpe ne Yehowa.​—Lew. 5:1. w16.02 4:14

“Bienzedi bia dilamata Nzambi” bidi bikongoloja malu audi wenza mu tshisumbu bu mudi kuya mu bisangilu ne kuyisha. Bidi bikongoloja kabidi malu audi wenza pa nkayebe bu mudi kusambila ne kudilongela. Muntu udi mudilambule kudi Yehowa kena mua kuela meji ne: malu aa adi amunemena bujitu to. Neadiumvue anu bu mukalenge Davidi uvua muambe ne: “Ndi ne disanka bua kuenza disua diebe, Nzambi wanyi, bulelela, mukenji webe udi mu mutshima wanyi.” (Mus. 40:8) Vuluka ne: paudi udilambula kudi Yehowa ne utambula, newikale nende mu malanda mimpe. Nunku, bua kuenzela Yehowa malu kampanda kabiena bikengela bua baledi anyi muntu mukuabu kayi yonso akuambile tshia kuenza to. Bikadilu biebe bia tshijila ne bienzedi biebe bia dilamata Nzambi bidi bileja muudi mutuishibue ne: udi mupete bulelela ne musue kuya kumpala bua kutambula. w16.03 2:10, 12, 15

Mikenji ya Mose ivua ikuba bena Isalele ku malu a tshiendenda ne ku ntendelelu wa dishima wa mu bisamba bivua bibanyunguluke. Pavua bena Isalele batumikila Nzambi, uvua ubabenesha. Pavuabu babenga kumutumikila, bavua bakenga bibi be. (Dut. 28:1, 2, 15) Bena Isalele bavua dijinga ne buludiki bua bualu bukuabu. Mikenji ivua ilongolola bena Isalele bua bualu bua mushinga buvua mu malu avua Yehowa mulongolole, mmumue ne: dilua dia Masiya, Yezu Kristo. Mikenji ivua ivuluija bena Isalele ne: bavua bapange bupuangane. Ivua ibambuluisha kabidi bua kujingululabu ne: bavua dijinga ne tshia kupikula natshi, mmumue ne: mulambu mupuangane uvua ne bua kujimija mibi ya bantu bua kashidi. (Gal. 3:19; Eb. 10:1-10) Bualu bukuabu, Mikenji ivua ikuba ndelanganyi ya mu dîku divua Masiya ne bua kupatukila ne ivua miambuluishe bena Isalele bua kumumanya pakamuenekaye. Eyowa, Mikenji ivua anu bu mulombodi bua tshitupa tshîpi anyi “ndeji” uvua ufikisha kudi Kristo. w16.03 4:6, 7