Ngondo wa 10

Yehowa wakatuadija kusungula bela manyi panyima pa dibishibua dia Yezu ku lufu. Bidi bimueneka ne: bonso bavua mu tshisumbu tshia bena Kristo mu bidimu lukama bia kumpala bavua bela manyi. Kutuadijila mu bidimu lukama bia kumpala too ne ku ntuadijilu kua matuku a ku nshikidilu, bantu ba bungi bavua badiamba ne: mbena Kristo bavua bena Kristo ba dishima, Yezu wakabafuanyikija ne “lupela.” Nansha nanku, mu bidimu abi, Yehowa wakela bakese ba kudibu bavua ne lulamatu manyi, ne bakaleja muvuabu bafuanangane ne “mponda” ivua Yezu muambe. (Mat. 13:24-30) Mu matuku a ku nshikidilu aa, Yehowa mmutungunuke ne kusungula bantu bua kukumbaja bungi bua bantu 144 000. Nunku padi Nzambi wangata dipangadika dia kusungula bamue ba ku bantu aba kumpala kua nshikidilu kuluaye, mbimpe tuitabe ne: tshidiye wenza ntshimpe. (Yesh. 45:9; Dan. 4:35; Lomo 9:11, 16) Tudi ne bua kuikala ne budimu bua kubenga kuenza malu bu bena mudimu bavua badiabakene bua mushindu uvua mfumu muenzele aba bavua batuadije kuenza mudimu mu dîba dia 11 malu.​—Mat. 20:8-15. w16.01 4:15

Lelu, Yehowa kena utulomba bua kuenza bualu bua nunku to. Kadi udi utulomba bua kumutumikila nansha padi mikenji yende mitukolele bua kuyitumikila anyi patudi katuyi tumvua tshidiye muelele mikenji ayi. Nzambi ukadiku mukulombe bua kuenza bualu kampanda buudi umona bukole bua kubuenza anyi? Bua bamue bana betu, kuyisha mmudimu mukole. Pamuapa badi mua kuikala ne bundu anyi bamona bibakolele bua kuyisha bantu badibu kabayi bamanye. Bakuabu badi batshina bua kabikadi bashilangane ne bantu bakuabu ku mudimu anyi mu tulasa. (Ekes. 23:2; 1 Tes. 2:2) Ukadiku mudiumvue bu Abalahama, bienza anu bu ne: udi ubanda mukuna wa Moliya bitekete bitekete bua kuenza mudimu uudi umona mukukolele anyi? Biobi nanku, ela meji ku tshilejilu tshia Abalahama tshia ditabuja ne dikima. Patudi tuelangana meji bua bilejilu bia bantu bavua ne lulamatu balume ne bakaji, bidi mua kutusaka bua kubidikija ne kusemena pabuipi ne mulunda wetu Yehowa.​—Eb. 12:1, 2. w16.02 1:3, 14

Bu muvua Shaula mudisuike bua kushipa Davidi, lulamatu lua Yonatana luvua mu diteta dikole. Nansha muvua Yonatana mudie tshipungidi ne Davidi, uvua kabidi ukokela tatuende. Kadi, Yonatana uvua mumanye ne: Nzambi uvua ne Davidi, kavua ne Shaula to, nunku wakasungula bua kulamata Davidi pamutu pa kulamata Shaula. Wakadimuija Davidi bua kusokoma, pashishe wakakula bimpe bua bualu buende kudi Shaula. (1 Sam. 19:1-6) Tuetu katuyi badimuke, lulamatu luetu kudi tshisumbu tshia malu a manaya, tshilongelu anyi ditunga ludi mua kupita lulamatu lutudi nalu kudi Nzambi. Tshilejilu, Henry uvua munange kunaya dinaya kampanda didi bu dia dame (Jeux d’échecs) ne bena mu tshilongelu tshiabu, ne uvua musue kupatuka wa kumpala. Kadi wakamba ne: “Ku kakese ku kakese, dinaya edi divua dilue ne mushinga wa bungi kundi kupita mumvua mulamate Nzambi. Bu mutuvua tunaya ku ndekelu kua lumingu luonso, tshivua ne dîba dia kuyisha anyi kubuela mu bisangilu to. Nunku ngakangata dipangadika dia kulekela kunaya dinaya edi.”​—Mat. 6:33. w16.02 3:10, 12

Bu muudi nsonga, kudi mishindu iudi mua kumanya bikala dipangadika diebe dia kutambula difumina mu muoyo webe. Tshilejilu, wewe ne dijinga dikole dia kuenzela Yehowa mudimu, nedimuenekele mu masambila ebe. Bungi bua misangu iutu usambila ne malu autu ulomba mu masambila ebe nebileje bikala malanda ebe ne Yehowa makole. (Mus. 25:4) Yehowa utu misangu ya bungi wandamuna masambila etu ku diambuluisha dia Bible. Nunku, didienzeja dietu bua kulonga Bible mmushindu mukuabu utudi tuleja ne: tudi bushuwa basue kusemena pabuipi ne Yehowa ne kumuenzela mudimu ne muoyo wetu wonso. (Yosh. 1:8) Diebeja ne: ‘Mmalu kayi antu ndomba mu masambila anyi? Ntuku ndilongela Bible pa tshibidilu anyi?’ Bikala dîku dienu dia bena Kristo dilongolole bua kuenza Ntendelelu wa mu dîku, diebeja ne: ‘Ntuku musue kubuelamu anyi?’ Mandamuna a nkonko eyi neakuambuluishe bua kumanya bikala dipangadika diebe dia kutambula difumina mu muoyo webe. w16.03 1:11, 13

Ndisanka kayipu ditudi nadi patudi tubala mu Annuaire bua bipeta bia mudimu wa kuyisha udi wenzeka pa buloba bujima! Ela kabidi meji bua mutudi mu buobumue pa buloba bujima patudi mu mpungilu ya rejon, ya pa buayi ne ya bantu bafumine mu matunga a bungi. Mu mpungilu eyi tutu tuteleja miyuki ya malu a mu Bible ne tulonda drama ne manaya a bilejilu mu buobumue bitu bitukankamija bua kuenzela Yehowa mudimu ne muetu muonso. Tshivulukilu tshia lufu lua Yezu tshidi kabidi tshituambuluisha bua kuikala mu buobumue. Tutu tudisangisha tshidimu tshionso bua kuenza tshibilu etshi mu dia 14 ngondo wa Nisana, dîba dimane kubuela bua kuleja ne: tudi ne dianyisha bua tshivua Yehowa mutuenzele ne bua kutumikila dîyi dia Yezu. (1 Kol. 11:23-26) Mu mbingu ya kumpala kua Tshivulukilu, tutu tuenza mudimu pamue bua kubikila bantu ba bungi bua kudisangisha netu mu tshibilu tshia mushinga mukole etshi. Muntu umue kena mua kuyisha bantu bonso nkayende to. Kadi bu mutudi tuenza mudimu pamue, tudi mua kuambila bantu miliyo ya bungi malu a Yehowa ne kuambuluisha bamue bua kutumbishabu Yehowa ne kumupesha bunême. w16.03 3:4, 6, 7

Badi ne bua kulongesha bana betu ba balume badi balonga bua kuenzela tshisumbu mudimu bua kuela meji bilondeshile mêyi menene a mu Bible. Tshilejilu, elabi meji ne: mukulu udi ulomba muanetu wa balume bua kulama kumpala kua Nzubu wa Bukalenge ne mankenda ne kuenza bua kuikale muaba muimpe udi bantu mua kuendela. Udi mua kumubadila Tito 2:10 bua kumuleja ne: padiye wenza mudimu au, udi ‘ulengeja dilongesha dia Nzambi Musungidi wetu.’ Udi kabidi mua kumulomba bua kuela meji bua bakulakaje badi mu tshisumbu ne mushindu wikala dikumbaja mudimu wende eu mua kubambuluisha. Kuyukila nende mushindu eu bua kumulongesha nekumuambuluishe bua kutamba kutabalela bantu pamutu pa kuimanyina pa mikenji miela. Neumvue disanka dia bungi dia kumona mudi mudimu udiye wenza wambuluisha bana betu mu tshisumbu. Bualu bukuabu, mukulu udi ne bua kuikala wela muanetu udiye ulongesha kalumbandi bua bionso bidiye wenza bua kutumikila mibelu. Kuela muntu uudi ulongesha kalumbandi ne muoyo mujima kudi kumukolesha anu bu mudi mâyi akolesha mutshi. w15 15/4 2:7, 8

Kudiku imue misangu iutu udimona nkaya paudi mu lutatu kampanda anyi? Ludi mua kuikala lua dipangila mudimu wa bianza, lua ditatshishibua mu tulasa, lua kusama, anyi lua malu makuabu. Pamuapa uvua mulombe bantu bua bakuambuluishe, kadi kabayi bafike ku dikupesha diambuluisha diuvua nadi dijinga. Bushuwa, imue ntatu kabena mua kuyijikija kudi bantu to. Mu nsombelu ya mushindu eu, mubelu wa mu Bible wa ‘kueyemena Yehowa’ udi patupu anyi? (Nsu. 3:5, 6) Kawena ne mushinga anyi? Udi ne mushinga. Diambuluisha dia Nzambi ndilelela anu mudibi bileja mu miyuki ya bungi ya mu Bible. Nunku, pamutu pa kukutondabi bua mudibu kabayi bakuambuluishe mu nsombelu mikole eyi, mbimpe uyimone bu muvua mupostolo Paulo muyimone, mbuena kuamba ne: angata tshikondo etshi bu tshikondo tshia kueyemena Yehowa bikole ne kudimuenena mudiye ukutabalela ne dinanga. Nunku dimueyemena diebe nedikole ne malanda ebe nende nealue malelela menemene. w15 15/4 4:3-5

Satana udi mua kupambuisha bantu kudi Yehowa Nzambi wa dinanga anu ne dishima. (1 Yone 4:8) Ku diambuluisha dia dishima, Satana udi upangisha bantu bua kujingululabu ne: “mbapele mu malu a mu nyuma.” (Mat. 5:3) Nunku, “mmufofomije mêsu a meji a badi kabayi bitabuja, bua butoke bua lumu luimpe lua butumbi lua Kristo udi tshimfuanyi tshia Nzambi kabubatokeshi.” Bitendelelu bia dishima ke umue wa ku mishindu minene idi Satana ushima nayi bantu. Udi usanka bikole padiye umona bantu batendelela bankambua babu, bifukibua anyi nyama, mmumue ne: batendelela muntu anyi tshintu kampanda pamutu pa kutendelela Yehowa udi ‘Nzambi wa mukawu.’ (Ekes. 20:5) Nansha bantu ba bungi badi bela meji ne: badi batendelela Nzambi mu mushindu muimpe badi babasaka bua kulonda malongesha a dishima ne mikiya ya patupu. Badi mu nsombelu mukuate luse, mufuanangane ne wa bantu bavua Yehowa muambile ne: ‘Nudi nufila lupetu lua ku mudimu wenu bua kusumba tshidi katshiyi tshinukuatshisha munyi? Binuangumvuile bimpe, mitshima yenu neyisanke mu biakudia bidi ne manyi.’​—Yesh. 55:2. w15 15/5 1:14, 15

Abele uvua pamuapa mua kuikala muele meji bikole bua mulayi eu ne mujingulule ne: bavua ne bua ‘kusuma muntu kampanda ku tshikankanyi tshiende’ bua kufikisha bantu ku dikala bapuangane anu bu muvua Adama ne Eva kumpala kua kuenzabu mpekatu. Abele uvua ne ditabuja dishindamene pa mulayi wa Nzambi, ke bualu kayi Yehowa wakitaba mulambu wende. (Gen. 4:3-5; Eb. 11:4) Noa wakapanduka ku Mvula wa kabutu bualu uvua ne ditabuja. (Eb. 11:7) Panyima pa Mvula wa kabutu, ditabuja diakamusaka bua kulambula Nzambi milambu ya nyama. (Gen. 8:20) Anu bu Abele, Noa uvua mujadike ne: bavua ne bua kupikula bantu ku bupika bua mpekatu ne lufu. Mu tshikondo tshibi tshia panyima pa Mvula wa kabutu tshivua Nimeloda wenza malu bu muluishi wa Yehowa, Noa uvua yeye anu ne ditabuja ne ditekemena. (Gen. 10:8-12) Uvua mua kuikala mukoleshibue ku muoyo pavuaye muele meji bua muvuabu mua kupikula bantu ku bupika bua bukokeshi bubi, ku mpekatu udibu bapiane ne ku lufu. Tuetu petu tudi mua ‘kumona’ tshikondo tshilenga etshi. Bushuwa, tshikadi pabuipi.​—Lomo 6:23. w15 15/5 3:4, 6

Tunyinganyinga tubi tudi mua kutuenzela bibi ku mubidi ne mu nyuma. Tueyemenayi Yehowa ne tuvuluke mêyi a mu mvese wa lelu. Mêyi mimpe adi akankamija a kudi muntu udi utumvuila adi mua kusankisha muoyo wetu. Kueyemena baledi betu, muena dibaka netu anyi mulunda wetu udi umona malu mudi Nzambi uamona kudi mua kutuambuluisha bua kupeta disulakana. Kakuena muntu nansha umue udi umvua tunyinganyinga tuetu bimpe kupita Yehowa to. Paulo wakafunda ne: “Kanusamishi mutu bua tshintu nansha tshimue, kadi mu malu onso mu disambila ne mu disengelela pamue ne disakidila, numanyishe Nzambi milombu yenu; ne ditalala dia Nzambi didi dipite dijingulula dionso dia malu nedilame mioyo yenu ne lungenyi luenu ku butuangaji bua Kristo Yezu.” (Filip. 4:6, 7) Tuele meji bua bantu badi batuambuluisha bua kutukuba mu nyuma bu mudi: bena Kristo netu, bakulu, mupika wa lulamatu, banjelu, Yezu ne Yehowa muine. w15 15/5 4:16, 17

Ku Nord kua ntempelo, mu Yelushalema, kuvua dijiba dia mâyi divuabu babikila ne: Beteseda. Bantu ba bungi bavua basama ne bavua balema bavua baya ku dijiba edi bela meji ne: bavua ne bua kuondopibua mu tshishima. Luse ke luvua lusake Yezu bua kusemena pabuipi ne muntu uvua mutuadije kusama bidimu bia bungi Yezu kayi muanji kulua pa buloba. (Yone 5:6-9) Yezu wakamuebeja ni uvua musue kumvua bimpe. Muntu au wakamuandamuna diakamue. Uvua musue kuondopibua, kadi kavua ne mushindu to, bualu kavua ne muntu uvua mua kumuambuluisha bua kumuela mu dijiba dia mâyi. Yezu wakamuambila bua kuenzaye bualu buvuaye kayi mua kuenza, mmumue ne: bua kuambula kalalu kende ne kuenda. Muntu au wakatumikila dîyi dia Yezu, kuambulaye kalalu kende ne kutuadija kuenda. Bualu ebu budi kadiosha ka tshienza Yezu mu bulongolodi bupiabupia. Tshishima etshi tshidi tshileja kabidi mudi Yezu ne luse. Uvua wenda ukeba bantu bavua dijinga ne diambuluisha. Tshilejilu tshia Yezu etshi tshidi ne bua kutusaka bua kutungunuka ne kukeba bantu ba mu teritware wetu badi malu mabi adi enzeka mu bulongolodi ebu matonde. w15 15/6 2:8-10

Patudi tuamba ne: “Tatu wetu” kadi katuyi tuamba ne: “Tatu wanyi,” bidi bileja ne: tudi mu ‘tshisumbu tshia bana betu’ badi banangangane bikole. (1 Pet. 2:17) Edi ndiakalenga dinene ditudi nadi! Bena Kristo bela manyi badi bangatshibue bu bana ba Nzambi badi ne ditekemena dia kuya mu diulu, mbakumbane bua kuangata Yehowa bu “Tatu” wabu menemene. (Lomo 8:15-17) Bena Kristo badi ne ditekemena dia kusomba kashidi pa buloba badi pabu bangata Yehowa bu “Tatu” wabu. Yeye ke Mubapeshi wa muoyo, ne udi ukumbajila batendeledi bende bonso balelela majinga abu ne dinanga dionso. Aba badi ne ditekemena dia kusomba pa buloba nebalue bana ba Nzambi mu ngumvuilu mulelela paluabu bapuangane ne pashalabu ne lulamatu mu diteta dia ndekelu. (Lomo 8:21; Buak. 20:7, 8) Baledi batu bapesha bana babu dipa dimpe padibu babalongesha bua kusambila ne babambuluisha bua kuangata Yehowa bu Tatuabu wa mu diulu udi ubatabalela. Dipa dinene didi baledi mua kupesha bana babu nkubambuluisha bua kuikala mu malanda makole ne Yehowa. w15 15/6 4:4-6

Bua kuenza malu mu diumvuangana ne dilomba dia ne: “Utusungile kudi mubi,” tudi ne bua kuenza muetu muonso bua kubenga ‘kuikala ba pa buloba’ bua Satana. Katuena ne bua ‘kunanga buloba [bua Satana] anyi bintu bia pa buloba’ to. (Yone 15:19; 1 Yone 2:15-17) Bua kuenza nunku bidi bikengela kutungunuka ne kudienzeja. Netupete disulakana pikala Yehowa muandamune dilomba edi pa kubutula Satana ne bulongolodi buende bubi. Kadi tudi ne bua kuvuluka ne: pavuabu bimanshe Satana pa buloba, uvua mumanye ne: uvua ne tshikondo tshîpi. Bu mudiye ne tshiji tshikole, udi wenza muende muonso bua kunyanga muoyo wetu mutoke. Nunku tudi ne bua kutungunuka ne kusambila bua Nzambi atusungile kudi Satana. (Buak. 12:12, 17) Udiku musue kupeta disanka edi anyi? Nunku mbimpe utungunuke ne kusambila bua Bukalenge bua Nzambi butumbishishe dîna dia Nzambi ne bua disua diende dienzeke pa buloba. Lomba Yehowa bua akukumbajile majinga ebe a mu nyuma ne a ku mubidi. Eyowa, ikala mudisuike bua kuenza malu mu diumvuangana ne disambila dia tshilejilu.​—Mat. 6:9-13. w15 15/6 5:12, 17, 18

Katuena bamanye bimpe menemene muenzeka malu mu tshikondo tshia diteta atshi to, kadi tudi bamanye ne: nebikengele kudipangisha amue malu. Mu bidimu lukama bia kumpala, bena Kristo bavua ne bua kushiya nzubu yabu ne kutantamena ntatu bua kupanduka. (Mâko 13:15-18) Netuitabaku bua kushiya bintu bia ku mubidi bua kushala ne lulamatu anyi? Netuikalaku badiakaje bua kuenza tshionso tshidi tshikengela bua kushala ne lulamatu kudi Yehowa anyi? Anji elabi meji! Tshikondo atshi, anu tuetu ke bikala batendelela Nzambi wetu nansha mu nsombelu wa mushindu kayi, anu muvua muprofete Danyele muenze. (Dan. 6:10, 11) Etshi katshiakuikala tshikondo tshia kuyisha “lumu luimpe lua Bukalenge” to. Tshikondo tshia kuyisha netshikale tshimane kupita. Tshikondo tshia “nshikidilu” netshikale tshimane kulua. (Mat. 24:14) Kakuyi mpata bantu ba Nzambi nebamanyishe ne dikima mukenji mukole wa dilumbuluisha watangila bantu bonso. Mukenji eu udi mua kuikala dimanyisha dia ne: bulongolodi bubi bua Satana bukadi pa kubutuka buonso. w15 15/7 2:3, 8, 9

Yezu ukavua mutudimuije ne: bantu bakuabu nebatukine bualu katuena tubuelakana mu malu a pa buloba to, nunku kabiena ne bua kutukemesha to. Tuvuluke ne: bantu ba bungi badi batuluisha ki mbamanye malu a Bukalenge bua Nzambi to. Nunku, kabena bumvua bua tshinyi tudi balamate bikole Bukalenge bua Nzambi pamutu pa kulamata mbulamatadi ya bantu. Bua kulamata Yehowa, tudi ne bua kumutumikila nansha bantu bakuabu batuamba anyi batuenzela malu kayi. (Dan. 3:16-18) Bidi mua kukolela nangananga bansonga bua kuenza malu bishilangane ne bakuabu. Baledi wetu, ambuluishayi bana benu bua bikale ne dikima mu tulasa. Bana benu badi mua kutshina bua kubenga kunemekela dibendele anyi kubenga kuenza bibilu bia buena ditunga. Mu ntendelelu wenu wa mu dîku, nudi mua kulonga bua kumanya mudi Yehowa umona malu aa. Ubalongeshe mua kumvuija patoke ne kanemu konso malu adibu bitabuja. (Lomo 1:16) Kuoku mushindu, ambuluisha bana bebe pa kuyukila ne balongeshi babu bua malu atudi tuitabuja. w15 15/7 3:15, 16

Yehowa wakatupesha dipa dia tshia kupikula natshi bua “tupete muoyo.” (1 Yone 4:9) Mupostolo Paulo wakafunda bua mushindu muimpe uvua Nzambi muleje dinanga eu ne: “Kristo wakafua bua bantu babi mu tshikondo tshijadika. Mbualu bukole bua muntu kufuila muntu muakane; bulelela, imue misangu muntu udi mua kuitaba bua kufuila muntu muimpe. Kadi Nzambi wakaleja dinanga diende kutudi mu bualu ebu ne: patutshivua benji ba malu mabi Kristo wakafua bua bualu buetu.” (Lomo 5:6-8) Tshia kupikula natshi ntshilejilu tshitambe bunene tshia dinanga dia Nzambi ne tshidi tshipesha bantu mpunga wa kukoleshabu malanda abu nende. Tshia kupikula natshi tshidi tshileja mudi Yehowa munange bantu bonso. Bidi bituenza disanka bua kumanya ne: tuetu ne ditekemena dia kupeta muoyo pa buloba ne batungunuke ne kuenzela Nzambi mudimu ne lulamatu, neatupeshe muoyo mutambe buimpe mu bulongolodi bupiabupia. Nunku tulejayi ne: tudi tuangata ne mushinga tshia kupikula natshi tshidi tshikale tshijadiki tshinene tshia dinanga dia Nzambi didi dishala kashidi kutudi. w15 15/8 1:13, 15

Netuikale ne diakalenga dia kuenza mudimu mu bulongolodi bupiabupia pikala Bukalenge bua Nzambi bukokesha tuetu tutumikila bulongolodi bua Yehowa ku mpindieu ne tuenza mudimu wonso udibu batupesha. Kadi misangu mikuabu badi mua kutushintulula mu midimu yetu. Tshilejilu, mbatume bamue bana betu ba ku Betele wa mu États-Unis bua kuya kuenza mudimu mu teritware. Bu mukadi bamue batangidi bena ngendu balue bantu bakole anyi bua nsombelu kampanda, mbabashintulule mu mudimu wabu, balue bampanda-njila ba pa buabu. Badi ne disanka bua mudimu wabu mupiamupia ne Yehowa udi ubabenesha. Tuetu balombe Yehowa diambuluisha, tuenze muetu muonso bua kumuenzela mudimu, netulonge mua kuanyisha mudimu wonso udibu batupesha, nunku netuikale ne disanka ne Yehowa neatubeneshe. (Nsu. 10:22) Kadi netuambe tshinyi bua malu atudi batekemene? Tudi mua kuikala tuela meji bua kusomba muaba kampanda mu bulongolodi bupiabupia, kadi badi mua kutulomba bua kuya kusomba muaba mukuabu. Tshikondo atshi, ki mmuaba utuikala mua kusombela anyi tshituikala mua kuenza bikala ne bualu to. Netuikale amu ne dianyisha bua kuikala mu bulongolodi bupiabupia. w15 15/8 3:8

Noa uvua ne muoyo mu tshikondo tshivua bantu benza malu mabi, kadi kavua ne dijinga dia kulua mulunda wabu to. Kavua mudie bulunda ne bantu bavua kabayi banange Yehowa to. Yeye ne bena mu dîku diende muanda mutekete bakatungunuka ne kuenza mudimu uvua Nzambi mubapeshe wa kuenza buatu. Noa uvua kabidi “muyishi wa buakane.” (2 Pet. 2:5) Bu muvua Noa ne mukajende ne bana bende ba balume basatu ne bakaji babu badie bulunda buimpe munkatshi muabu, bakatungunuka ne kuenza malu avua asankisha Nzambi, bu tshipeta, bakapanduka ku Mvula wa kabutu. Tuetu bonso lelu tudi ndelanganyi yabu, nunku tudi ne dianyisha bua muvua Noa ne bena mu dîku diende batumikile Yehowa ne bepuke malunda mabi. Bia muomumue, bena Kristo ba mu bidimu lukama bia kumpala kabavua badie bulunda ne bantu bavua kabayi banange Yehowa to. Bakamutumikila ne bobu kupanduka pakabutulabu Yelushalema mu 70.​—Luka 21:20-22. w15 15/8 4:17, 18

Ki ndijikija dionso dia lutetuku didi mua kutuambuluisha anyi kutupetesha bukole to. Katuena ne bua kupitshisha dîba dia bungi mu dijikija dia lutetuku to. Mmunyi mudi kondo ketu ka muoyo mua kutuambuluisha bua dijikija lutetuku didi Yehowa wanyisha ditusankishe ne dituambuluishe? Bible udi utudimuija bua kuepuka “malu adi mubidi wenza.” Mu malu aa mudi: “masandi, malu a bukoya, tshikadilu tshibi tshia dikamakama, ditendelela dia mpingu, dienza dia malu a mîdima, lukuna, matandu, mukawu, tshiji tshikole tshia lukasa, dikokangana, matapuluka, tusumbusumbu, dialakana, dikuatshika dia maluvu, bibilu bibi bia bisankasanka ne malu a buena aa.” Paulo wakamba ne: “Bantu badi benza malu aa kabakupiana Bukalenge bua Nzambi.” (Gal. 5:19-21) Nunku tudi mua kudiebeja ne: ‘Kondo kanyi ka muoyo kadiku kangambuluisha bua kuepuka manaya adi ne malu a mvita anyi adi asaka bantu ku dikala ne lungenyi lua ditembangana, lua buena ditunga anyi lua tshikisu anyi? Kondo kanyi ka muoyo kadiku kandimuija pandi mu diteta dia kumona filme ya bantu kabayi bilamba anyi idi ne malu a tshiendenda, a dikuatshika dia maluvu anyi a mîdima anyi?’ w15 15/9 2:11, 12

Bible udi utulongesha ne: Nzambi kavua mutufuke ne bukenji bua kudisunguila tshidi tshimpe ne tshidi tshibi to. Kupanga kumanya bualu bua mushinga ebu nekutukebele ntatu mibi menemene. Bualu ebu budi ne mushinga bua diakalenga dietu. Tudi mua kupeta ditalala ne nsombelu muimpe anu tuetu bitabe bumfumu bua Nzambi. Bushuwa, Yehowa mmutunange bua mudiye musungule bua kutubuluila bulelela ebu bua mushinga! Tatu muimpe udi wela meji bikole bua tshikala bana bende mu matuku atshilualua, musue bua bikale ne nsombelu muimpe. Bia dibungama, bantu ba bungi lelu badi ne buôwa bua matuku atshilualua, ne ba bungi badi bapitshisha dîba mu dienza mudimu bua bintu bidi kabiyi bishala kashidi. (Mus. 90:10) Bu mutudi bana ba Nzambi, tudi tudiumvua ne: mmutunange bikole bualu mmutulaye nsombelu mutambe buimpe mu matuku atshilualua. Bualu ebu budi buenza bua tuikale ne nsombelu muimpe mpindieu. w15 15/9 4:10, 11

Ku kale, bantu ba bungi bavua ne mushindu wa kumona anyi kumvua muvua Nzambi muambuluishe bena Isalele. Yehowa uvua muenze bishima bua kupatula bantu bende mu bupika mu Ejipitu ne bua kutshimuna bakalenge ba bungi. (Yosh. 9:3, 9, 10) Bena Isalele bakatshimuna bena lukuna babu bualu bavua babenge kuitaba ne: Yehowa uvua uluangena bantu bende mvita. Pashishe, mukalenge mubi Ahaba uvua mupete mishindu ya bungi ya kumona tshianza tshia Nzambi. Pavua Eliya mulombe Yehowa bua kapia kafume mu diulu, kuoshe mulambu, Ahaba uvua mumone kapia aku. Pashishe, Eliya wakaleja ne: Yehowa uvua ne bua kuimanyika minanga ivuaku, kuambilaye Ahaba ne: ‘Upueke biebe bua mvula kakukandi.’ (1 Bak. 18:22-45) Nansha muvua Ahaba mumone bishima bionso ebi, wakabenga bua kuitaba ne: uvua mumone bukole bua Yehowa. Tshilejilu etshi ne bikuabu bidi bitulongesha bualu bua mushinga ebu: tudi ne bua kukeba bua kumona tshianza tshia Nzambi mu nsombelu wetu. w15 15/10 1:4, 5

Tudi ne bua kuikala batuishibue ne: tuetu balonde buludiki bua Yehowa, neatuambuluishe. Tudi ne bua kuikala ne ditabuja dikole kudi Muntu udi bushuwa mua kutuambuluisha. Paulo udi utuvuluija ne: Nzambi ke “udi mua kuenza bivule bipitshidile kule ne kule malu onso atudi tulomba anyi tuelela meji, bilondeshile bukole buende budi buenza mudimu munda muetu.” (Ef. 3:20) Batendeledi ba Yehowa badi badienzeja bikole bua kuenza disua dia Nzambi, kadi mbamanye kabidi ne: badi ne mikalu. Tudi ne dianyisha bua mudi Nzambi muikale netu ne mudiye ubenesha bionso bitudi tuditatshisha bua kuenza. Tudiku mua kutekemena ne: netupete diandamuna ku dilomba dietu dia kupeta ditabuja dia bungi anyi? Yehowa udi utujadikila ne: tudi mua kudipeta tuetu “tulomba bilondeshile disua diende.” (1 Yone 5:14) Tuetu beyemene Yehowa ne muoyo wetu mujima, neatuanyishe. Neandamune dilomba dietu dia kupeta ditabuja dia bungi, ditabuja dietu nedikole menemene, ne ‘netukumbanyine Bukalenge bua Nzambi.’​—2 Tes. 1:3, 5. w15 15/10 2:16-18

Kuelangana meji bua Yehowa ne Yezu kudi mua kuambuluisha muntu bua kulua muena Kristo mushindame ne kuikala ne ditabuja dikole. (Eb. 5:14; 6:1) Muntu udi kayi nangananga ne dîba dia kuelangana meji bua Yehowa ne bua Yezu, ditabuja diende neditekete. Muntu wa nunku udi mu njiwu ya kupambuka anyi kulekela bulelela. (Eb. 3:12) Yezu wakamba ne: tuetu katuyi tumvua Dîyi dia Nzambi anyi tuditaba “ne muoyo muakane ne muimpe,” ‘katuakudilama’ to. Kadi, ‘tunyinganyinga, bubanji ne masanka a muoyo eu’ bidi mua kutusesuisha bipepele, ne ‘tupangila mua kupatula mamuma mabobe.’ (Luka 8:14, 15) Nunku, tutungunukayi ne kuelangana meji bua malu adi mu Dîyi dia Nzambi. Kuenza nunku nekutusake bua kumuenesha butumbi bua Yehowa, kuidikija ngikadilu yende ne bumuntu buende anu mudibi bileja mu Bible. (2 Kol. 3:18) Mmalu kayi makuabu atudi mua kukeba bua kumanya? Kupeta dimanya dia bungi dia Nzambi ne kuikala muanyishibue bua kumuenesha butumbi buende ndiakalenga dinene, ne mbualu budi kabuyi ndekelu. Tudi tuenza nunku patudi tutungunuka ne kulonga mua kuidikija Tatu wetu wa mu diulu udi ne dinanga.​—Muam. 3:11. w15 15/10 4:13, 14

Bu muudi muledi, udi musue bua bana bebe bikale pabuipi ne Yehowa. Nzambi mmusue bua ubakoleshe “ne mibelu ne didimuija bia Yehowa.” (Ef. 6:4) Nunku, udi ne bua kuenza mudimu ne bukokeshi budi Nzambi mukupeshe bua kulongesha bana bebe. Tuangate tshilejilu etshi: udi uditatshisha bua bana bebe balonge kalasa bualu udi mumanye ne: kalasa kadi ne mushinga ne udi musue bua bamanye malu mapiamapia. Bia muomumue, udi ne bua kuditatshisha bua babuele mu bisangilu, mu mpuilu ne mu ntendelelu wa mu dîku bua ‘didimuija dia Yehowa’ dibambuluishe. Bu mudi dilongesha didibu bapeta kudi Yehowa mua kusungila mioyo yabu, bambuluishe bua banange malu a Yehowa ne bua banyishe meji adibu bapeta. Anu bu muvua Yezu muenze ne bayidi bende, ambuluisha bana bebe bua bikale ne disanka dia kulongesha bantu bakuabu Dîyi dia Nzambi ne kuyisha pa tshibidilu. w15 15/11 2:6

Nansha mudi ndongoluelu yonso udi Nzambi muenze wenda ku diambuluisha dia mikenji ya bumfumu, dinanga didi nangananga ne mushinga wa bungi. Kadi Yehowa mmusue bua mulume ikale mfumu udi ne dinanga, kayi ne tshikisu. Nansha mudi mulume muikale ku mutu kua mukaji, Bible udi umulomba bua ‘apeshe mukajende bunême.’ (1 Pet. 3:7) Umue mushindu udi balume mua kunemeka bakaji babu mpa kutabalela majinga abu ne kunemeka malu adibu banange. Bible udi wamba ne: “Balume, tungunukayi ne kunanga bakaji benu, anu bu mudi Kristo pende munange tshisumbu ne mudifile bua bualu buatshi.” (Ef. 5:25) Eyowa, Yezu wakafila too ne muoyo wende bua bayidi bende. Padi mulume ulombola ne dinanga anu bu Yezu, nebikale bipepele bua mukajende kumunanga, kumunemeka ne kuanyisha mapangadika ende.​—Tito 2:3-5. w15 15/11 4:6, 7

Bu muvua lumu luimpe luenda lumuangalaka, bena Kristo ba bungi bavua bakula tshiena Greke. Evanjeliyo wa Matayi, Mâko, Luka ne wa Yone, idi ne malu avua Yezu mulongeshe ne muenze, yakamuangalaka bikole mu bantu mu tshiena Greke. Nunku, bayidi ba bungi bavua bakula tshiena Greke pamutu pa tshiena Ebelu. Mikanda ya mupostolo Paulo ne mikanda mikuabu ya mu Bible ivua payi mifunda mu tshiena Greke. Bualu budi busankisha budi ne: pavua bafundi ba Mifundu ya bena Kristo ya mu tshiena Greke batela mêyi a mu Mifundu ya tshiena Ebelu, bavua misangu ya bungi bangata mêyi a mu Bible wa Septante. Imue misangu mêyi avuabu bangata avua mashilangane kakese ne miaku ya tshiena Ebelu tshia ntuadijilu. Nunku mudimu wa bakudimunyi bapange bupuangane mmulue tshitupa tshia Dîyi dia Nzambi, Nzambi udi kayi wangata muakulu kampanda anyi bibidilu kansanga bu bimpe bipite bikuabu.​—Bien. 10:34. w15 15/12 1:8, 9

Dituku dionso tutu tuakula, kadi katuena ne bua kuikala tuakula dîba dionso to. Bible udi wamba ne: kudi ‘tshikondo tshia kupuwa.’ (Muam. 3:7) Tshilejilu, kupuwa padi bakuabu bakula kudi kuleja mutudi ne kanemu. (Yobo 6:24) Katuena kabidi ne bua kuakula malu a bende anyi kuamba malu adi bakuabu kabayi ne bua kumanya to. (Nsu. 20:19) Padi muntu utufiikisha munda, netuleje mutudi ne meji tuetu tudikanda bua kubenga kupatula dîyi. (Mus. 4:4) Ku lukuabu luseke, Bible udi wamba kabidi ne: kudi “tshikondo tshia kuakula.” (Muam. 3:7) Mulunda webe yeye mukupeshe tshintu kampanda tshimpe, kuakutshiteka muaba uudi kuyi mua kutshimona to. Kadi, neuleje muudi ne dianyisha paudi wenza natshi mudimu bimpe menemene. Tudi tuleja dianyisha bua dipa dia kuakula didi Yehowa mutupeshe patudi tuakula mu mushindu muimpe. Abi bidi biumvuija ne: tudi mua kuleja bakuabu mutudi tudiumvua, malu atudi tujinga, kubakankamija ne kutumbisha Nzambi. w15 15/12 3:4, 5

Katuena mu tshikondo tshidi muena Kristo mua kuenza mudimu ne “bipedi bia kuondopa” bua kutuondopa to. (1 Kol. 12:9) Kadi bamue bena Kristo netu badi basue kutuambuluisha badi mua kutupesha mibelu nansha tuetu katuyi babalombayi. Bulelela, muntu udi mua kukupesha imue mibelu idi mua kuambuluisha. Tshilejilu, Paulo uvua mubele Timote bua kunua ndambu wa mvinyo pavuaye usama tshifu, pamuapa bualu mâyi a muaba uvuaye avua mabi. Kadi ebi mbishilangane ne kuteta bua kuitabijija muena Kristo netu bua kunua buanga kampanda anyi bua kudia bisosa kansanga peshi bua kudia biakudia kampanda ta kulekela biakudia kankenga bidi kabiyi mua kumuambuluisha anyi bidi mua kumuenzela bibi mu mushindu kampanda. Bamue mbitabijije bantu bakuabu pa kubambila ne: ‘Mulela wanyi kampanda uvua ne disama dia muomumue, uvua muangate tshintu kampanda ne kumvuaye bimpe.’ Tudi ne bua kumanya ne: nansha bikala bantu ba bungi bakadi bangate buanga kampanda anyi babupeshe bantu bakuabu peshi bitabe ngondapilu kansanga, bidi anu mua kutukebela njiwu ya bungi.​—Nsu. 27:12. w15 15/12 4:13

Bu mutudi bapiane bubi, tuetu bonso tudi tupeta dinyoka dia bubi ebu didi lufu. (Lomo 5:12) Dinanga diakasaka Yehowa bua kutuma Yezu pa buloba bua “alabuile muntu yonso lufu.” (Eb. 2:9) Yehowa kavua anu musungile muoyo utudi nawu mpindieu to, kadi mmufile tshijadiki tshidi tshileja ne: neajimije lufu bua kashidi. (Yesh. 25:7, 8; 1 Kol. 15:22, 26) Muntu yonso udi uleja ditabuja kudi Yezu neapete muoyo wa kashidi ne neikale ne ditalala ne disanka pa buloba bua kashidi pikala Kristo ukokesha mu Bukalenge bua Nzambi, yeye muela manyi, neakokeshe pamue ne Kristo. (Lomo 6:23; Buak. 5:9, 10) Mmasanka kayi makuabu adi dipa dia Yehowa dikongoloja? Mu malu adi dipa dia Nzambi dikongoloja mudi kabidi dilua dia buloba mparadizu, dijikija masama ne dibishibua dia bantu ku lufu. (Yesh. 33:24; 35:5, 6; Yone 5:28, 29) Tudi bushuwa banange Yehowa ne Muanende munanga bua mudibu batupeshe ‘dipa difila tshianana didi kadiyi kuamba’ edi.​—2 Kol. 9:15. w16.01 2:5, 6

Kumpala kua Yehowa kubikila bena Kristo bela manyi bua kuyabu mu diulu, bavua ne ditekemena dia kusomba pa buloba kashidi. Bavua bindile ne muoyo kuulu kuulu tshikondo tshikala Yehowa mua kujikija malu mabi onso ne bavua basue kupeta masanka atshilualua aa. Pamuapa bavua badifuanyikijila mu lungenyi muvuabu mua kuakidila bananga babu bavua bafue. Bavua bindile ne muoyo kuulu kuulu bua kuibaka nzubu ne kusombamu anyi kukuna mitshi ne kudia bimuma biayi. (Yesh. 65:21-23) Bua tshinyi mbatuadije kuela meji mushindu mukuabu? Ki mbualu ditekemena edi kaditshivua kabidi dibasankisha to. Ki mbashintuluke bualu bavua ne tunyinganyinga peshi bakenga bikole to. Kabavua bangate diakamue dipangadika dia ne: kusomba bua kashidi pa buloba kuvua mua kubatonda ne kabavua mua kuikalapu ne disanka to. Kabavua basue anu bua kuya kudimuenena muikala nsombelu mu diulu to. Kadi, Nzambi ke udi mubasungule bua kuyabu mu diulu. Padiye ubabikila, udi wenza mudimu ne nyuma wende muimpe bua kushintulula mushindu udibu bela meji ne ditekemena diabu. w16.01 3:11, 13

Yehowa mMukalenge Mutambe bunene, mmufuke bintu bionso, ne udi ne meji ne bukole kabiyi mikalu. Yobo wakafika ku diumvua bualu ebu. Pavua Yehowa muele Yobo nkonko ivua itangila bufuki buende, Yobo wakamuambila ne: ‘Ndi mumanye ne: wewe udi ne bukole bua kuenza malu onso, ne kakuena muntu udi mua kukanda bualu buwakupangadija.’ (Yobo 42:2) Nansha mudi Yehowa mua kuenza tshintu tshionso tshidiye upangadija bua kuenza kayi dijinga ne diambuluisha dia muntu mukuabu, udi uleja mudiye ne dinanga padiye ulomba bantu bakuabu bua kuenza mudimu pamue nende bua kukumbaja malu adiye mulongolole. Nzambi wakafuka Muanende Yezu kumpala kua kufukaye muntu anyi tshintu kayi tshionso. Yehowa wakanyishila Muanende bua amuambuluishe bua kufuka bintu bikuabu bionso bidi bimueneka ne bidi kabiyi bimueneka. (Yone 1:1-3, 18) Nunku, Yehowa uvua mupeshe Muanende bunême pavuaye muenze nende mudimu wa bufuki ne muambile bantu bakuabu bua mudimu wa mushinga uvua nawu Muanende.​—Kolos. 1:15-17. w16.01 5:1, 2