Ngondo wa 9

Kumpala kua Abalahama ne Izaka kushiyangana ne bena mudimu bavuabu baye nabu, Abalahama wakamba ne: ‘Nuenu nushale kuneku ne nyama wa mpunda; tuetu netuye ne nsongalume, netutendelele, netupingane kunudi.’ (Gen. 22:5) Ntshinyi tshivua Abalahama usua kuamba? Uvuaku ubashima ne: uvua ne bua kupingana ne Izaka, pende mumanye ne: uvua ne bua kumulambula anyi? Tòo. Bible udi utuleja malu makese bua mushindu uvua Abalahama wela meji. (Eb. 11:19) Abalahama ‘wakela meji ne: Nzambi uvua ne bukole bua kubisha Izaka ku lufu.’ Eyowa, Abalahama uvua witaba dibika dia bantu ku lufu. Uvua mumanye ne: Yehowa uvua mumupeshe bukole bua kupeta muana wa balume nansha mukavuaye yeye ne Sala bakulakaje bikole. (Eb. 11:11, 12, 18) Nunku, wakajingulula ne: kakuvua tshivua mua kukolela Yehowa to. Uvua ne ditabuja dia ne: nansha bualu bua mushindu kayi mua kuenzeka dituku adi, Yehowa uvua ne bua kubisha muanende munanga ku lufu bua milayi yonso ya Nzambi ikumbane. Ke bua tshinyi badi babikila Abalahama ne: “tatu wa bantu bonso badi ne ditabuja.”​—Lomo 4:11. w16.02 1:3, 13

Nansha muvua Nzambi musungule Shaula bua kuikalaye mukalenge, Shaula wakalua pashishe kubenga bua kutumikila Yehowa, ne Yehowa wakamubenga. (1 Sam. 15:17-23) Nansha muvua Nzambi kayi mumumbushe diakamue mu nkuasa, bikadilu biende bibi biakakebela bantu bonso ne aba bavua pabuipi nende ntatu. Nunku, bivua bikole bua kushalabu ne lulamatu kudi Nzambi bu muvua mukalenge uvua musombe mu “nkuasa wa Yehowa” wenza malu mabi menemene. (1 Kul. 29:23) Kadi, Yonatana muana wa Shaula wakashala ne lulamatu kudi Yehowa. Tuetu petu, tudi mua kuleja lulamatu kudi Yehowa patudi tutumikila mbulamatadi wa mu ditunga ditudi bilondeshile mudi Nzambi utulomba, nansha bikala bamue kabayi bakumbane bua tuetu kubanemeka. Tshilejilu, munene wa mbulamatadi kampanda udi mua kutuenzela malu mu mushindu mubi, kadi tudi tumunemeka bualu Yehowa udi utulomba bua kunemeka “bakokeshi badi ku mutu.” (Lomo 13:1, 2) Bushuwa, tuetu bonso tudi tuleja mutudi ne lulamatu kudi Yehowa patudi tunemeka bantu badiye mupeshe bukokeshi.​—1 Kol. 11:3; Eb. 13:17. w16.02 3:5, 6, 8

Bible udi wamba ne: batendeledi ba Yehowa bonso too ne bansonga, ‘nebadifile ku budisuile’ bua kumuenzela mudimu. Nunku, muntu udi musue kutambula udi ne bua kuikala mujadike ne: ndijinga diende menemene. Bidi mua kukulomba bua kukonkonona dijinga diebe bimpe menemene. Bua tshinyi? Bualu nsombelu webe pautshidi nsonga udi mua kuikala mushilangane ne wa bansonga bakuabu mu mushindu kampanda. Tshilejilu, udi mua kuikala mukolele mu bulelela. Paudi wenda ukola, udi mua kuikala mumone mudi bantu ba bungi batambule, pamuapa nansha bamue balunda bebe ne bana benu. Bikalabi ne: ke nsombelu uudi nende, ntshinyi tshiudi ne bua kudimukila? Ikala mudimuke bua kutuadiji kuela meji ne: udi ne bua kutambula anu bualu ukadi mukumbaje bidimu bungi kampanda anyi bualu muntu kampanda udi utambula to. Mmunyi muudi mua kujadika ne: udi umona batismo mudi Yehowa umumona? Ikala misangu yonso ukeba dîba dia kuela meji bua kumanya bua tshinyi batismo udi ne mushinga wa bungi. w16.03 1:11, 12

Bu mutudi bena Kristo, mmunyi mutudi mua kukumbaja mudimu wa dibikila bantu eu? Tudi mua kuwenza anu tuetu ‘balamakaja pamue bimpe ne benze bua kuikale dikuatshishangana.’ (Ef. 4:16) Bua kuyisha bantu ba bungi menemene lumu luimpe lua Bukalenge, tudi ne bua kuikala balongolola bimpe bua mudimu wetu wa kuyisha. Nunku, tudi tupeta mibelu mu tshisumbu. Buludiki budibu batupesha mu bisumbu pa buloba bujima budi butuambuluisha bua kuenza mudimu eu mu buobumue. Panyima pa tshisangilu tshia buambi, tutu tuya kuambila bantu lumu luimpe lua Bukalenge. Tutu kabidi tubapesha mikanda ya malu a mu Bible miliyo ya bungi pa buloba bujima. Utuku udienzeja bua kulonda buludiki butubu batupesha bua kuyisha mu bikondo bia pa buabi anyi? Paudi wenza nunku, udi udisangisha pamue ne bantu bakuabu miliyo ya bungi badi mu buobumue bamanyisha mukenji udi nawu ‘muanjelu udi upapala munkatshi mua diulu’ udibu batele mu Buakabuluibua 14:6. w16.03 3:4, 5

Bible udi utuambila ne: mu bulongolodi bupiabupia netupete mikanda yikala ne buludiki bupiabupia. Palonga bantu bonso ne aba babishibua ku lufu malu aa, nebafike ku dimanya malu adi Nzambi musue bua benze. Mikanda eyi neyituambuluishe bua kumanya malu a bungi a mutu Yehowa umona malu. Bu muikala bantu bapeta ne muoyo mu Mparadizu pa buloba ne dimanya dia bungi dia Dîyi dia Nzambi ne dia malu ikala mu mikanda mipiamipia, nebenzele bakuabu malu ne dinanga ne kanemu ne bunême. (Yesh. 26:9) Ela meji bungi bua malu atualonga ne atualongesha bantu bakuabu bikala ku bulombodi bua Mukalenge Yezu Kristo! Bantu badi bitaba malu adi ‘mafunda mu mikanda’ ayi nebapete muoyo. Bantu badi bashala ne lulamatu kudi Nzambi mu tshikondo tshia diteta dia ndekelu, neafunde mêna abu mu “mukanda wa muoyo” bua kashidi. Netupete muoyo wa tshiendelele. w16 03 4:19, 20

Bakulu bakadi bamonamone malu badi baleja mudibi ne mushinga bua kutuadija kulongesha bana betu ba balume patshidibu bansonga, padibu babapesha midimu mu tshisumbu idi mikumbanangane ne bidimu biabu. Kutuadija mushindu eu kudi kuambuluisha bansonga bua kushala batuishile mêsu abu ku bipatshila bia mu nyuma nansha pikalabu ne bidimu bipatshila ku 20, tshikondo tshidi ne malu a bungi adi afila ditanaji. (Mus. 71:17) Mukulu yeye mumvuije kabidi muanetu udiye ulongesha tshidiye ne bua kuenza ne bua tshinyi udi ne bua kutshienza, neakoleshe dijinga diende dia kuenzela tshisumbu mudimu. Padi bakulu bamba malu adi asaka muntu bua kuenza nunku, badi bidikija Yezu, Mulongeshi munene. Tshilejilu, kumpala kua Yezu kupesha bapostolo bende mudimu wa kuvuija bantu bayidi, wakabambila bua tshinyi bavua ne bua kuwenza. Wakamba ne: “Bakadi bampeshe bukokeshi buonso mu diulu ne pa buloba.” Pashishe kusakidilaye ne: “Nunku, ndayi nuvuije bantu ba mu bisamba bionso bayidi.”​—Mat. 28:18, 19. w15 15/4 2:5, 6

Bivua njiwu mikole mu tshikondo kampanda bua kuikala muena Kristo mu Lomo. Bu muvuabu babanda bayidi ba Kristo ne: bavua batue tshimenga tshia Lomo kapia mu tshidimu tshia 64, bavua babakengesha bikole. Bidi bimueneka ne: mu nsombelu mukole eu ke muvuabu bele mupostolo Paulo mu buloko bua musangu muibidi mu Lomo. Bena Kristo bakuabu bavuaku bamuambuluishe anyi? Bivua mua kuikala bitonde Paulo ku ntuadijilu bua bualu ebu, bualu wakafundila Timote ne: “Mu didibingisha dianyi dia kumpala, muntu nansha umue kavua ku luseke luanyi, kadi bonso bakandekela.” (2 Tim. 4:16) Nansha nanku, Paulo uvua anu mumanye ne: kavua mushale nanku kayi ne diambuluisha. Uvua mutekemene ne: Yehowa uvua mua kumuambuluisha bua kutantamena ntatu ivuaye nayi ne mikuabu ivua mua kumufikila. Ke bualu kayi wakamba diakamue ne: “Mukalenge neampandishe ku tshienzedi tshibi tshionso.” (2 Tim. 4:18) Bushuwa, Paulo wakapeta dilongesha dia ne: nansha diambuluisha dia bantu diodi dishikile, diambuluisha didi Yehowa ne Muanende bafila ndilelela. w15 15/4 4:1-3

Pakalelabu Yezu, Satana uvua mumanye ne: muana uvuabu balele eu uvua mua kukola ne kulua Masiya uvuabu balaye. Satana uvuaku muele meji ne: kushipa muana eu kuvua kubi menemene anyi? Satana kena ne mikenji ya bikadilu bimpe to. Wakatuadija diakamue kuluisha Yezu patshivuaye muana. Mushindu kayi? Mukalenge Helode wakafiika munda bikole pavua bena lubuku lua mitoto bamuebeje bua ‘mukalenge wa bena Yuda uvuabu balele,’ wakangata dipangadika dia kumushipa. (Mat. 2:1-3, 13) Helode wakatuma dîyi bua bashipe bana ba balume bonso kumbukila ku bidimu bibidi kupueka, ba mu Beteleheme ne ba mu nseke yende yonso bua kujadikaye ne: bavua bashipe muana au. (Mat. 2:13-18) Yezu wakapanduka ku dishipa dia bana dibi edi, kadi bualu ebu budi butuleja tshinyi bua muluishi wetu Satana? Bidi bimueneka patoke ne: kena wangata muoyo wa bantu ne mushinga to. Kena umvuila bana luse nansha lukese to. Satana udi bushuwa “ntambue udi ukungula.” (1 Pet. 5:8) Katuena mua kupepeja luonji ludiye nalu nansha kakese. w15 15/5 1:10, 12, 13

Bukole butudi nabu bua kudianjila kumona mu lungenyi luetu bintu kampanda bitudi katuyi banji kumona ndipa dia kudi Nzambi. Budi butuambuluisha bua kulongolola malu bimpe ne kutangija mêsu etu ku bintu bimpe. Yehowa udi mua kudianjila kumona malu atshilualua ne udi utuambila mu Bible tshikondo tshikalawu mua kuenzeka. Tudi ne bukole bua kumona mu lungenyi luetu tshikala mua kuenzeka. Bushuwa, bukole butudi nabu bua kumona mu lungenyi bintu bitudi katuyi banji kumona budi butuambuluisha bua kuikala ne ditabuja. (2 Kol. 4:18) Pavua Hana mupitshishe dîba dia kuelangana meji bua tshivua mua kuenzeka pavuaye uya ne muanende Samuele bua enze mudimu ku ntenta wa kusambakena, tshivuaye mudianjile kumona mu lungenyi tshivua ne nshindamenu kampanda. Tshivua tshishindamene pa bualu buvuaye mudisuike bua kuenza, ne biakamuambuluisha bua kutuishila mêsu ku tshipatshila tshiende. (1 Sam. 1:22) Tuetu tudianjila kumona mu lungenyi malu adi Nzambi mulaye bua kuenza, tudi tuelangana meji bua bualu buikala ndekelu wa bionso ne bua kuenzeka. (2 Pet. 1:19-21) Kakuyi mpata, bantu ba bungi bavua ne lulamatu mu bikondo bivuabu bafunda Bible bavua badianjile kumona mu lungenyi malu avua Nzambi mulaye. w15 15/5 3:1-3

Muntu yeye udifuanyikijila mulue mubanji kadi kayi udifila bikole mu malu a Nzambi mbuteyi. Yezu uvua mulonde bualu kampanda bua kuleja nsombelu mubi wa “muntu udi udilamina biuma, kadi kayi mubanji ku mêsu kua Nzambi.” (Luka 12:16-21) Yehowa udi usanka patudi tuenza malu adi amusankisha. (Nsu. 27:11) Tudi tupeta disanka padiye utuanyisha bualu tudi badibutshile “biuma mu diulu.” (Mat. 6:20) Kakuyi mpata, malanda mimpe atudi badie ne Yehowa adi ne mushinga wa bungi kupita biuma bitudi mua kuikala nabi. Fuanyikija kanyinganyinga kakole katudi mua kupeta tuetu badisunsule bua kudibutshila “biuma pa buloba.” (Mat. 6:19) Yezu wakafila tshilejilu bua kuleja ne: “tunyinganyinga tua malu a mu ndongoluelu wa malu eu, ne mashimi adi nawu biuma” bidi mua kufimpakaja dîyi dia Bukalenge.​—Mat. 13:18, 19, 22. w15 15/5 4:15, 16

Bukole bua Nzambi buakambuluisha Yezu Kristo bua kuenza bishima bia bungi bishilashilangane bidi bikemesha. Kavua muondope anu nsudi to, kadi uvua muondope kabidi masama a mishindu yonso ne bulema bua mishindu yonso. Bua kuleja luse lua mushindu eu, Yezu kavua dijinga ne bantu bavua mua kufila bitupa kampanda bia mubidi wabu bua kubipingaja pa muaba wa bia bantu bakuabu bivua bisama to. Wakuondopa tshitupa tshionso tshia mubidi tshivua tshisama. Uvua wondopa bantu diakamue, ne imue misangu ubondopa nansha yeye muikale ku bule. (Yone 4:46-54) Bishima bidi bikemesha ebi bidi bileja tshinyi? Bidi bileja ne: bu mudi Yezu mpindieu Mukalenge mu diulu, udi ne bukole ne dijinga dia kuondopa bantu bua kashidi. Kumanya mushindu uvua Yezu wenzela bantu malu kudi kutupesha dishindika dia ne: mu bulongolodi bupiabupia, mulayi wa buprofete wa ne: “Neafuile udi mutekete ne udi ukengela dikuatshisha luse” newukumbane. (Mus. 72:13) Eyowa, Yezu neakumbaje dijinga didi mu muoyo wende dia kuambuluisha bonso badi bakenga. w15 15/6 2:6

Bantu ba bungi badi mua kuambulula disambila dia Tatu wetu ku muoyo. Patutu tuyisha ku nzubu ne ku nzubu, tutu misangu ya bungi tuakula bua disambila edi bua kuambuluisha bantu bua bumvue ne: Bukalenge bua Nzambi mmbulamatadi mulelela washintulula malu pa buloba. Anyi tutu tuakula bua dilomba dia kumpala dia mu disambila edi bua kuleja bantu ne: Nzambi utu ne dîna didibu ne bua kutumbisha anyi ‘kuitaba ne: ndinsantu.’ (Mat. 6:9, note.) Yezu uvuaku musue kuleja ne: dîba dionso ditudi tusambila tudi ne bua kuambulula disambila edi ku muaku ku muaku bu mutu bena bitendelelu bikuabu benza anyi? Tòo. Kumpala kua Yezu kulongesha disambila dia tshilejilu edi, uvua muambe ne: “Panudi nusambila, kanuambuludi malu amue amue” to. (Mat. 6:7) Musangu mukuabu, wakambulula disambila edi kadi mu mêyi mashilangane. (Luka 11:1-4) Nunku Yezu mmutuambuluishe bua kumanya malu atudi ne bua kulomba ne dilondangana diawu bilondeshile mushinga wawu. Nunku, mbikumbane bua kubikila disambila edi ne: disambila dia tshilejilu. w15 15/6 4:1, 2

Yehowa udi utupesha nyuma wende muimpe udi utupesha bukole ne utuambuluisha bua kukandamena diteta. Nzambi udi utudimuija kabidi ku diambuluisha dia Dîyi diende ne dia tshisumbu bua nsombelu itudi ne bua kuepuka bu mudi: kujimija dîba dia bungi, makuta ne makanda a mubidi bua bintu bia ku mubidi bidi kabiyi ne mushinga. Espen ne Janne bavua kumpala bampanda-njila badi ne bana babidi badibu bakolesha. Espen udi wamba ne: “Misangu ya bungi tutu tusambila Yehowa bua katukuluki mu diteta mpindieu utudi katutshiyi ne mushindu wa kupitshisha dîba dia bungi mu malu a ntendelelu wetu bu mutuvua tuenza kumpala. Tudi tulomba Yehowa bua atuambuluishe bua kulama malanda etu nende ne tshisumi tshietu mu mudimu wa buambi.” Diteta dikuabu didi ditambe kumuangalaka matuku etu aa nditangila dia bimfuanyi bia bantu kabayi bilamba. Bamue mbakuluke mu diteta edi pavuabu batuma meji abu ku malu mabi. Kadi tudi mua kukandamena diteta edi, anu mudi bana betu ba bungi badikandamene.​—1 Kol. 10:13. w15 15/6 5:15, 16

Ntshinyi tshienzeka panyima pa kabutu ka bitendelelu bia dishima? Netshikale tshikondo tshia tuetu kuleja tshidi mu muoyo wetu menemene. Tshikondo atshi, bantu ba bungi nebakebe bukubi ne diambuluisha mu malongolodi a bantu adi bu “mabue manene a ku mikuna.” Mu ngumvuilu wa mu tshimfuanyi, bantu ba Yehowa nebanyemene kudi Yehowa bua kukeba bukubi. Pavuabu ‘bakepeshe’ matuku a buluishi mu bidimu lukama bia kumpala, katshivua tshikondo tshivua bena Yuda bonso ne bua kulua diakamue bena Kristo to. Kadi tshivua tshikondo tshivua aba bakavua bena Kristo ne bua kupatuka mu Yelushalema bu muvua Yezu muambe. Bia muomumue mu matuku atshilualua, ‘pakepeshabu’ matuku a dibunda Babilona munene, katuena mua kutekemena ne: bantu ba bungi nebalue diakamue bena Kristo balelela to. Kadi netshikale tshikondo tshia batendeledi balelela bonso kulejabu mudibu banange Yehowa ne bambuluisha bela manyi.​—Mat. 25:34-40. w15 15/7 2:7

Tuetu bonso tudi bamanye ne: batendeledi ba Yehowa mbantu bamue, nunku katuena ne bua kuangata muaba kampanda anyi ditunga kansanga bu dipite dikuabu to. Kadi bena mu dîku dienu ne bantu banudi bakole nabu bavua mua kuikala bakusake bua kunanga muaba uudi mufumine. Pamuapa utshidi ne meji mabi bua bantu ba matunga makuabu, ba bibidilu bikuabu, muakulu mukuabu peshi dikoba dikuabu. Ntshinyi tshidi mua kukuambuluisha bua kushintuluka? Elangana meji bua mushindu udi Yehowa umona bantu badi baditumbisha bua ditunga diabu anyi badi bela meji ne: mbapite bakuabu. Enza makebulula bua malu aa ne makuabu adi apetangana nawu. Pashishe lomba Yehowa bua akuambuluishe bua umone bantu bakuabu mudiye ubamona. (Lomo 12:2) Tudi ne bua kuenza malu aa bualu mu matuku makese anyi pashishe, batendeledi ba Yehowa nebatuilangane ne nsombelu idi kondo kabu ka muoyo kabenzeja bua kuenza malu bishilangane bikole ne bantu badi batunyunguluke bu mudi bena mudimu netu, balongi betu, bena mutumba ne balela betu. Kadi tudi ne bua kushala bashindame. w15 15/7 3:14, 15

Yehowa utu ututeleja patudi tumusambila ne utumvuila nansha padiku kakuyi muntu udi mua kutumvuila. Udi uleja mudiye ne dinanga didi dishala kashidi padiye wandamuna masambila etu. Tudi mua kupeta malongesha a mushinga mukole mu masambila adi mu Bible. Imue misangu mbimpe kukonkonona amue a ku masambila aa mu ntendelelu wa mu dîku. Tuetu tuelangana meji bua masambila avua batendeledi ba Nzambi ba kale benze ne muoyo mujima, netulengeje masambila etu. Tshilejilu, longa disambila divua Yona muenze ne budipuekeshi pavuaye munda mu mushipa munene. (Yona 1:17–2:10) Konkonona disambila divua Solomo muenzele Yehowa ne muoyo mujima pavuabu babanjija ntempelo. (1 Bak. 8:22-53) Pashishe elangana meji bua disambila dia Yezu dia tshilejilu. (Mat. 6:9-13) Bualu bua mushinga mukole budi ne: tuikale ne tshibidilu tshia ‘kumanyisha Nzambi milombu yetu.’ Nunku, “ditalala dia Nzambi didi dipite dijingulula dionso dia malu nedilame mioyo yenu ne lungenyi luenu.”​—Filip. 4:6, 7. w15 15/8 1:11, 12

Mu bulongolodi bupiabupia, netuikale ne disanka bua kulonda buludiki budi bufumina kudi bulongolodi bua Yehowa buatuambuluisha bua kuvuija buloba ebu mparadizu mulenga ne kulongesha bantu babishibua ku lufu. Kadi ntshinyi tshitudi mua kuenza padi aba badi batulombola batulomba bua kuenza bualu kampanda butudi katuyi basue? Netukokelaku bulombodi ebu, kuenza muetu muonso bua kuenza mudimu udibu batupeshe ne kuwanyisha anyi? Ba bungi ba kutudi nebandamune ne: Eyowa. Bua kudilongolola bua muoyo wa tshiendelele mu bulongolodi bupiabupia, tudi ne bua kulonda buludiki budi bufumina kudi bulongolodi bua Yehowa anu ku mpindieu. Tuetu basue kuikala badilongolole bua nsombelu wa mu bulongolodi bupiabupia, tudi ne bua kulonga mua kusanka ne bitudi nabi ne kueleshangana diboko ne bulongolodi bua Yehowa ne bantu bakuabu. Tshilejilu, padibu batupesha mudimu kampanda wa kuenza, mbimpe tuitabe bua kuwenza ne tuenze muetu muonso bua kuikala ne disanka ne kuwunanga. Tuetu balonge ku mpindieu mua kueleshangana diboko ne bantu badi batulombola, pamuapa netuenze bia muomumue mu bulongolodi bupiabupia. w15 15/8 3:6, 7

Malunda mabi akanyanga meji a Solomo ne kakashala ne lulamatu kudi Yehowa to. (1 Bak. 11:1-6) Edi ndidimuija bua muena Kristo udi wela meji a kuselangana ne muntu udi kayi munange Yehowa. Kadi ntshinyi tshidi muntu udi mulue mutendeledi wa Yehowa pakadiye mu dibaka mua kuenza ne muena dibaka nende udi kayi muena kuitabuja? Bible udi wamba ne: “Nuenu bakaji nukokele babayenu, bua bikala bakuabu kabayi batumikila dîyi dia Nzambi, bakokibue kakuyi dîyi, bua bikadilu bia bakaji babu.” (1 Pet. 3:1) Bushuwa, nansha mulume udi pende mua kutumikila mubelu eu bikala mukajende kayi mutendeledi wa Yehowa. Mubelu wa mu Bible eu mmutoke: ikala mulume anyi mukaji muimpe ne tumikila mikenji ya Nzambi idi yakula bua dibaka. Pashishe padi muena dibaka nebe umona ne: udi mulongolole nsombelu webe, udi mua kuitaba pende bua kulua mutendeledi wa Yehowa. Ke tshidi bena mabaka ba bungi benze. w15 15/8 4:15, 16

Kudi mua kuikala amue masama adi kaayi ne buanga. Nunku tudi ne bua kuikala ne budimu bua manga kampanda adi bantu bamba ne: adi ondopa disama kansanga kadi kabayi ne bijadiki. Paulo wakafunda ku diambuluisha dia nyuma muimpe ne: “Enzayi bua bantu bonso bamanye ne: kanuena bena malu makole.” (Filip. 4:5) Kuikala ne nkatshinkatshi nekutuambuluishe kabidi bua kutamba kuimanyina pa ditendelela dietu dia Yehowa pamutu pa kutuma meji etu onso ku makanda etu a mubidi. Bikala diditatshisha bua makanda etu a mubidi dilue ne mushinga wa bungi mu nsombelu wetu, tudi mua kulua badinangi. (Filip. 2:4) Tudi bamanye ne: katuena mua kuikala ne makanda a mubidi mimpe mu bulongolodi ebu to, nunku kuenzela Yehowa mudimu ke bualu budi ne mushinga wa bungi mu nsombelu webe. (Filip. 1:10) Mu tshilumbu bu mudi tshia makanda a mubidi, yonso wa kutudi udi ne bua kudiangatshila dipangadika ne kudiambuila bujitu buadi. w15 15/9 2:8, 10

Yehowa udi “ulamata ku bushuwa.” (Mus. 31:5) Yehowa mmunange bana bende ne mmusue ne: butoke buende bua bulelela bubalombole mu nsombelu wabu yonso mujima, nangananga mu malu a ntendelelu. Mbulelela kayi budi Yehowa mutubuluile, ne mmunyi mudi bualu ebu buleja ne: mmutunange? Tshia kumpala, Yehowa mmutubuluile bulelela pa malu adi amutangila. Mmutuambile dîna diende didi mu Bible misangu ya bungi kupita mêna makuabu onso. Padi Yehowa wenza nunku, udi usemena pabuipi netu, ne utuambuluisha bua tumumanye. (Yak. 4:8) Yehowa mmutuleje tshidiye, mmumue ne: ngikadilu yende. Patudi tutangila bintu bidiye mufuke, tudi tujingulula ne: udi ne bukole ne meji ne patudi tubala Bible, tudi tujingulula mudiye muakane ne mutunange bikole. (Lomo 1:20) Yehowa kena bu tatu udi ne bukole ne meji nkayabi to, kadi udi kabidi ne buakane ne dinanga, ne udi wenza bua bikale bipepele bua bana bende kuikalabu nende mu malanda mimpe. w15 15/9 4:8, 9

Bantu ba bungi badi bamona ne: malu adibu benza kaena ambila Nzambi bualu. Badi bela meji ne: Nzambi kena uditatshisha bua malu adi afikila bantu to. Tshilejilu, pavua tshipepele tshikole tshinyangakaje bintu mu tshitupa tshinene tshia mu Philippines mu ngondo wa 11 mu 2013, mulombodi wa tshimue tshimenga tshinene tshia mu ditunga edi wakamba ne: “Nzambi udi mua kuikala muye muaba mukuabu.” Bantu bakuabu badi bela meji ne: Nzambi kena mua kumona malu adibu benza to. (Yesh. 26:10, 11; 3 Yone 11) Badi anu bu bantu bavua mupostolo Paulo muambe bua bualu buabu ne: ‘Kabavua banyishe bua kuikala ne Nzambi mu dimanya dijalame’ to. Bavua “buwule tente ne malu onso adi kaayi makane, ne muoyo mubi, ne lukuka, ne malu mabi.” (Lomo 1:28, 29) Netuambe tshinyi buetu tuetu? Tudi bamanye ne: Yehowa utu umona malu onso atudi tuenza. Tutuku tumona mudiye ututabalela ne mudi tshianza tshiende tshituambuluisha mu nsombelu wetu anyi? w15 15/10 1:1-3

Kuyisha mmushindu muimpe wa kuleja ditabuja dietu. Bua tshinyi? Bualu bua kuenza mudimu eu bidi bikengela kuikala ne ditabuja dia ne: Nzambi ukadi mujadike tshikondo tshia kubutula ndongoluelu wa malu eu ne kuitaba ne: ‘kena upanga kulua.’ (Hab. 2:3) Bua kumanya bikala ditabuja dietu dikole, tudi mua kukonkonona mushindu utudi tudifila mu mudimu wa diyisha. Tutuku tuenza tshionso tshitudi mua kuenza, pamuapa tukeba mishindu ya kuenza bia bungi mu mudimu utudi tuenzela Yehowa anyi? (2 Kol. 13:5) Eyowa, ‘kujukula ne mukana bua kupeta lupandu’ mmushindu mutambe bunene wa kuleja mutudi ne ditabuja mu muoyo wetu. (Lomo 10:10) Tudi kabidi tuleja mutudi ne ditabuja kudi Yehowa patudi tutantamena ntatu itudi tupeta. Tuetu tusama, batekeshibue mu mikolo, bikale ne tunyinganyinga, mu bupele anyi ne ntatu mikuabu, tudi ne bua kuikala ne ditabuja dia ne: Yehowa ne Yezu ‘nebatuambuluishe pa dîba dikumbane.’ (Eb. 4:16) Tudi tuleja Yehowa mutudi ne ditabuja edi patudi tumulomba diambuluisha. w15 15/10 2:12-14

Nansha mudiku nsombelu idi mua kukupangisha bua kuikala ne Bible, kua kupanga nansha kakese mushindu wa kuelangana meji bua mvese iutu munange bikole ne mêyi a misambu ya Bukalenge biuvua mubueje mu lungenyi luebe. (Bien. 16:25) Nyuma wa Nzambi neakuambuluishe bua kuvuluka malu mimpe auvua mulonge. Nunku dilongolola mpindieu bua kupeta dîba dia kubala ne kuelangana meji bua malu a mu dibala dia Bible dia ku lumingu luonso. Matuku makuabu, udi kabidi ne bua kulongolola dîba dia kubala Evanjeliyo wa Matayi, wa Mâko, wa Luka ne wa Yone ne kuelangana meji bua malu avua Yezu muambe ne muenze, ne newitabe bushuwa ne: Evanjeliyo eyi idi ne miyuki idi itangila nsombelu wa Yezu ne mudimu wende. (Lomo 10:17; Eb. 12:2; 1 Pet. 2:21) Bantu ba Nzambi badi kabidi ne mukanda udi uleja mudi malu a mu nsombelu wa Yezu menzeke malondangane. Mukanda eu udi mua kukuambuluisha bikole, nangananga paudi ubala ne welangana meji bimpe bimpe pa mvese idi mu nshapita yonso.​—Yone 14:6. w15 15/10 4:11, 12

Yezu kavua anu mfumu wa bapostolo bende to, kadi uvua kabidi mulunda wabu. Mu tshikondo tshivuabu bafunda Bible, mfumu kavua misangu ya bungi uyukila ne bapika bende bua kubambila muvuaye wela meji ne muvuaye udiumvua to. Kadi, Yezu kavua wangata bapostolo bende bu bapika to. Uvua mubanange ne upitshisha nabu dîba pamue. Uvua ne disanka bua kubambila muvuaye wela meji ne udiumvua, ne uvua ubateleja ne ntema yonso pavuabu bamuleja muvuabu bela meji ne badiumvua. (Mâko 6:30-32) Diyukidilangana divua pankatshi pa Yezu ne bapostolo bende edi diakakolesha bulunda buabu ne kulongolola bapostolo bua mudimu uvua mubindile. Yezu uvua mumanye ne: bapostolo bende bobu ne dijinga dikole dia kuenzela Yehowa mudimu ne bayisha lumu luimpe bikole, bavua mua kupeta disanka dilelela. Nunku, wakabakankamija bua kuyisha bikole ne kuvuija bantu bayidi, ne kubalaya ne: uvua ne bua kubambuluisha.​—Mat. 28:19, 20. w15 15/11 2:3, 5

Dinanga nngikadilu munene wa Yehowa Nzambi. (1 Yone 4:16) Yezu Kristo, tshifukibua tshiende tshia kumpala wakenza bidimu miliyo ya bungi mu diulu pamue ne Tatuende ne kulongaye mudi Yehowa muikale Nzambi wa dinanga. (Kolos. 1:15) Yezu mmuleje dinanga dia muomumue mu nsombelu wende mujima, mu diulu ne pa buloba, kulejaye ne: uvua mumanye bimpe menemene tshidi Yehowa Nzambi wa dinanga. Nunku, tudi ne bua kuikala bashindike ne: Yehowa ne Yezu nebatungunuke ne kukokesha ne dinanga. Pavua muntu mukuabu muebeje Yezu bua kumanya mukenji udi mupite mikuabu, Yezu wakamuambila ne: “‘Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso.’ Eu ke mukenji munene ne wa kumpala. Muibidi udi mufuanangane nawu udi ne: ‘Udi ne bua kunanga muntu nebe bu muudi mudinange.’” (Mat. 22:37-39) Mona ne: Yezu udi uteka dinanga Yehowa pa muaba wa kumpala ne dinanga muntu netu pa muaba muibidi. Bidi ne mushinga bua tuetu kuleja dinanga mu malanda etu ne bakuabu. w15 15/11 4:1-3

Yehowa kavua uyukila ne bantu anu mu tshiena Ebelu to. Pavua bena Isalele bapatuke mu bupika mu Babilona, bamue ba kudibu bavua bakula tshiena Alama. Pamuapa ke bualu kayi Yehowa wakasaka muprofete Danyele ne Yelemiya ne muakuidi Ezela bua kufunda bimue bitupa bia Bible mu tshiena Alama ku diambuluisha dia nyuma wende. Alexandre Munene wakakuata matunga a bungi, ne tshiena Greke tshia bantu bonso tshivuabu babikila ne: Koine tshiakalua muakulu munene mu matunga a bungi. Bena Yuda ba bungi bakatuadija kuakula tshiena Greke, ne ndekelu wa bionso bakakudimuna Mifundu ya tshiena Ebelu mu tshiena Greke. Bavua babikila nkudimuinu au ne: Septante. Bamanyi ba malu a mu Bible badi bitaba ne: bavua bakudimune Bible wa Septante mujima kudi bakudimunyi 72. Uvua nkudimuinu wa kumpala wa Bible ne uvua ne mushinga wa bungi. Bamue bavua bakudimune Mifundu ya tshiena Ebelu ku muaku ku muaku, kadi bakuabu kabavua benze nanku to. Kadi bena Yuda bavua bakula tshiena Greke ne bena Kristo bavua buonso buabu bitabe ne: nkudimuinu wa Septante uvua Dîyi dia Nzambi. w15 15/12 1:4-6

Yakobo udi umvuija tshilejilu tshiende mu mvese 6. “Bushuwa, ludimi nkapia.” Ludimi ludi luleja bukole butudi nabu bua kuakula. Anu bu kapia, malu atudi tuamba adi mua kukebesha njiwu ya bungi. Bible udi mene wamba ne: “Lufu ne muoyo bidi mu bukokeshi bua ludimi.” (Nsu. 18:21) Kadi kabiena bisua kumvuija ne: tudi ne bua kubenga kuakula bua katulu kupatula dîyi dibi nansha, anyi mene katuena mua kubenga bua kuenza mudimu ne kapia anu bualu kadi mua kutuosha to. Tshia mushinga nkuenza nabi mudimu bimpe. Tshilejilu, tuetu benze mudimu bimpe ne kapia, kadi mua kutuambuluisha bua kulamba biakudia, bua kuota ne bua kukenkesha muaba utudi. Bia muomumue, tuetu batabalele mushindu utudi tuakula, tudi mua kuakula mu mushindu udi utumbisha Yehowa ne udi wambuluisha bantu bakuabu. (Mus. 19:14) Nansha tuetu tuambila bantu malu ne mukana muetu anyi mu jeste ne bianza bietu, tshipedi tshia kuambila bantu ngenyi yetu ne mushindu utudi tudiumvua ndipa dia mushinga mukole dia kudi Nzambi. Kadi tudi ne bua kuenza mudimu ne dipa edi bua kukolesha bakuabu, kadi ki mbua kubatekesha to.​—Yak. 3:9, 10. w15 15/12 3:1-3

Mbikumbane bua kuitaba ne: Luka uvua mupeshe Paulo mibelu bua makanda a mubidi ne mumuambuluishe yeye ne bantu bakuabu pavuabu mu ngendu yabu ya bumisionere. Bua tshinyi Luka uvua wenza nanku? Bualu nansha Paulo uvua musame pavuabu mu luendu. (Gal. 4:13) Luka uvua upesha bantu luondapu luvua lupetangana ne tshivua Yezu muambe etshi: “Bantu badi ne makanda a mubidi kabatu dijinga ne munganga to, anu badi basama.” (Luka 5:31) Bible kena uleja muaba anyi tshikondo tshivua Luka mulonge tulasa tua bumunganga to. Bidi bimueneka ne: Paulo uvua mutelele bena Kristo ba mu Kolosayi mudimu wa Luka wa bumunganga bualu bavua bamumanye. Tshia kumanya ntshia ne: kuvua tulasa tua bumunganga mu Laodikiya, tshimenga tshivua pabuipi ne Kolosayi. Nansha nanku, Luka kavua muntu wa tshianana uvua upeshangana mibelu bua makanda a mubidi to, uvua mulonge tulasa tua bumunganga. Ebi bidi bimuenekela mu miaku misunguluke ya malu a manga idi Luka muenze nayi mudimu mu Evanjeliyo ne mu mukanda wa Bienzedi, ne mu mushindu uvuaye mufunde miyuki ya bungi ya muvua Yezu muondope bantu. w15 15/12 4:11, 12

Pavua Yehowa mutume Muanende mulela umuepele pa buloba, wakatupesha dipa ditambe bunene didi dileja mudiye mutunange. (Yone 3:16; 1 Yone 4:9, 10) Mupostolo Paulo wakabikila dipa edi ne: ‘Dipa difila tshianana didi kadiyi kuamba.’ Paulo uvua mumanye ne: mulambu mupuangane wa Kristo uvua tshijadiki tshia ne: milayi mimpe yonso ya Nzambi neyikumbane bulelela. (2 Kol. 1:20) Nunku, ‘dipa difila tshianana didi kadiyi kuamba’ adi didi dikongoloja buimpe buonso ne dinanga dia lulamatu bidi Yehowa utuleja ku diambuluisha dia mulambu wa Yezu. Mbikole bua kumvuija dipa dia mushinga mukole edi mu mushindu utudi mua kumvua bimpe menemene. Dipa dia pa buadi edi didi ne bua kutusaka bua kudiumvua mushindu kayi? Mmalu kayi adi dipa edi ditusaka bua kuenza? Didiku dikusaka bua kukonkonona bienzedi biebe anyi mene kushintulula nsombelu webe anyi? Udiku udiumvua muenzejibue bua kupesha bakuabu bintu, kubananga ne kufuila muntu yonso udi mukuenzele bualu kampanda bubi luse anyi? Vuluka ne: dipa didi Yehowa mutupeshe ku diambuluisha dia Kristo nditambe bunene kupita dipa kayi dikuabu dionso didibu mua kutupesha.​—1 Pet. 3:18. w16.01 2:1, 2, 4, 5

Muntu udi muedibue manyi udi mua kudiebeja ne: ‘Bua tshinyi mbansungule? Bua tshinyi ki mbasungule muntu mukuabu, anu meme?’ Udi mene mua kudiebeja bua kumanya ni mmukumbanyine dibikila edi. Kadi kena welakana bua ne: Yehowa mmumusungule to. Udi ne disanka dia bungi ne dianyisha bua dipa edi. Bela manyi badi badiumvua anu muvua Petelo mudiumvue pakambaye ku diambuluisha dia nyuma muimpe ne: “Nzambi ne Tatu wa Mukalenge wetu Yezu Kristo atumbishibue, bualu bilondeshile luse luende lunene wakatulela tshiakabidi bua tupete ditekemena didi ne muoyo ku diambuluisha dia dibishibua dia Yezu Kristo ku lufu, bua tupete bumpianyi budi kabuyi mua kubola, kabuyi mua kunyanguka ne kabuyi mua kufubidila. Mbanulaminabu mu diulu.” (1 Pet. 1:3, 4) Padi bela manyi babala mêyi aa, badi bajingulula ne: Tatu wabu wa mu diulu udi uyukila nabu nkayabu, ne kabena ne dielakana nansha dikese to. w16.01 3:11, 12