Ngondo wa 10

Yehowa udi “Nzambi udi ufila bukole bua kunanukila ne busambi.” (Lomo 15:5) Anu Yeye nkayende ke udi umvua bimpe malu adi atufikila, meji etu ne nsombelu wetu. Nunku mmumanye bimpe menemene tshitudi natshi dijinga bua kunanukila. Mmunyi mudi Nzambi wandamuna masambila etu patudi tumulomba bukole bua kunanukila? Tuetu balombe Yehowa bua atuambuluishe bua kutantamena ntatu, ‘neatulongoluele njila wa kupatukamu.’ (1 Kol. 10:13) Mmunyi mudiye wenza nanku? Imue misangu, udi mua kutumbushila lutatu alu. Kadi misangu ya bungi, udi ulongolola njila wa kupatukamu ‘bua tumone mua kuditantamena.’ Eyowa, Yehowa udi utupesha bukole bua “kutantamena malu onso ne lutulu ne disanka.” (Kolos. 1:11) Bu mudi Yehowa mumanye bimpe mikalu itudi nayi ku mubidi, mu meji ne mu lungenyi, kakulekela nsombelu utukolela, utufikisha too ne ku dijimija lulamatu luetu kudiye to. w16.04 2:5, 6

Bible udi utuambila bua kutumikila mbulamatadi ya bantu, kadi udi utuambila kabidi ne: tudi ne bua kutumikila Nzambi pamutu pa bantu. (Bien. 5:29; Tito 3:1) Mvese eyi idiku ibengangana anyi? Tòo! Dîyi dinene dikuabu didi diakula bua dikokela didi dituambuluisha bua kumvua mikenji eyi ne kuyitumikila. Yezu wakaleja mu tshikoso dîyi dinene edi pavuaye muambe mêyi adi mu mvese wa lelu aa. Tudi tukokela bumfumu bua mbulamatadi wa muaba utudi patudi tutumikila mikenji idiye muele, tunemeka bamfumu ba mbulamatadi ne tufuta bitadi. (Lomo 13:7) Kadi padi mbulamatadi utuambila bua kubenga kutumikila Nzambi, tudi tubenga, kadi ne kanemu. Tudi tubenga kulamata ku luseke kampanda mu malu a tshididi a mu bulongolodi ebu. (Yesh. 2:4) Bu mudi Yehowa mulekele mbulamatadi ya bantu ikokesha, katuena ne bua kuyiluisha to. Katuena kabidi tubuelakana nansha mu malu a buena muetu anyi a buena ditunga to. (Lomo 13:1, 2) Katuena tuenza bua kushintulula mbulamatadi anyi kusaka bena tshididi bua kuenza malu kampanda peshi tuelela muntu kakanda mu tshikondo tshia masungulangana ta tulua bena tshididi to. w16.04 4:1, 2

Bilumbu bidi mua kujuka pankatshi pa bena Kristo babidi, ne bia bungi bia kudibi badi ne bua kubijikija bobu nkayabu. Kadi imue misangu bidi mua kuikala bikole bua bobu kubijikija. Bimue bilumbu bidi mua kulomba diambuluisha dia bantu bakuabu bilondeshile Matayi 18:15-17. ‘Bubi’ budi Yezu mutele muaba eu kabuvua buleja tshilumbu tshikese tshidi mua kumueneka pankatshi pa bena Kristo to. Bua tshinyi tudi tuamba nanku? Yezu wakamba ne: bikala muenji wa bubi ubenga kunyingalala padiye uyukila ne muanetu udiye nende tshilumbu, ne bamanyi ba bualu, ne bana betu ba balume badi ne majitu, badi ne bua kumumona “bu muntu wa bisamba bia bende ne bu mulambuishi wa bitadi.” Lelu, ebi bidi biumvuija ne: udi ne bua kuipatshibua mu tshisumbu. ‘Bubi’ ebu budi bukongoloja malu a bungi bu mudi kuibila anyi kushiminyina muntu bualu. Bidia bisatu bivua Yezu muleje mu Matayi 18:15- 17 mbia kulonda anu miaba idi malu aa enzeka. w16.05 1:14

Bible kena utuelela mikenji bua kalu ne kalu konso ka mu nsombelu wetu to. Tshilejilu, Bible kena ne mikenji misunguluke bua bilamba bidi bena Kristo ne bua kuvuala to. Bualu ebu budi buleja mudi Yehowa ne meji. Nansha mudi bantu ba pa buloba bujima bavuala bilamba bia mishindu mishilashilangane, ne mvuadilu ushintuluka ku tshikondo ne ku tshikondo, Bible utu anu wambuluisha mu bikondo bionso. Kena kabidi ne mikenji ya bungi bua midimu itudi ne bua kuenza anyi bua dijikija dia lutetuku ditudi ne bua kusungula peshi tshitudi ne bua kuenza menemene bua kuikala ne makanda a mubidi to. Mmunyi mutudi mua kuangata mapangadika mimpe padi Bible kayi utuambila patoke tshitudi ne bua kuenza? Pamutu pa kuenza anu tshitudi basue, tudi ne bua kuela meji bimpe bua nsombelu wetu ne kuangata dipangadika dikala mua kusankisha Yehowa. Pashishe, tudi ne bua kuikala bashindike ne: neatuambuluishe bua kupatula bipeta bimpe.—Mis. 37:5. w16.05 3:2, 6

Kakuyi mpata, yonso wa kutudi utu ne tshiende tshitupa tshia mu Bible tshituye munange bikole. Bamue mbanange Evanjeliyo bualu idi ileja bumuntu buimpe bua Yehowa ku butuangaji bua Yezu. (Yone 14:9) Bakuabu mbanange mikanda idi ne mêyi a buprofete bu mudi wa Buakabuluibua udi utuleja “malu adi ne bua kuenzeka mu katupa kîpi emu.” (Buak. 1:1) Banga badi bakoleshibua padibu babala mukanda wa Misambu, ne bakuabu pabu mbanange kubala mibelu mimpe ya mu mukanda wa Nsumuinu. Nunku bidi bimueneka ne: Bible mmukanda wa bantu bonso. Bu mutudi banange Bible, tudi kabidi banange mikanda yetu bualu mmimanyine mu Dîyi dia Nzambi. Mikanda, broshire, bibejibeji ne bintu bikuabu bionso bitudi tupeta mbiakudia bidi Yehowa utupesha. Tudi bamanye ne: bintu bionso ebi bidi bituambuluisha bua kushala batabale, badishibue bimpe mu nyuma, ne “bakole mu ditabuja.”—Tito 2:2. w16.05 5:1-3

Nyuma muimpe udi mua kutufumba mu mishindu ya bungi. Tshilejilu, udi mua kutuambuluisha bua kuidikija bumuntu bua Yezu ne kuleja ngikadilu mishilashilangane ya dimuma dia nyuma. Umue wa ku ngikadilu ya dimuma dia nyuma edi ndinanga. Tudi banange Nzambi ne basue kumutumikila ne basue bua atufumbe bualu tudi bamanye ne: mikenji yende kayena ne bujitu to. Nyuma muimpe udi kabidi mua kutupesha bukole budi butuambuluisha bua kubenga kufumbibua kudi bulongolodi ebu bubi ne nyuma wabu. (Ef. 2:2) Pavua mupostolo Paulo nsonga, wakalonda lungenyi lua bamfumu ba bitendelelu ba bena Yuda bavua ne lutambishi. Wakalua kufunda ne: “Bua malu onso, ndi ne bukole ku diambuluisha dia yeye udi umpesha bukole.” (Filip. 4:13) Tudi petu mua kulomba nyuma muimpe, bamanye ne: Yehowa neandamune masambila atudi tuenza ne muoyo mujima.—Mis. 10:17. w16.06 1:12

Yehowa ke Nzambi wetu umue ne umuepele. Tudi tumulamata yeye nkayende patudi tumutendelela anu yeye. Katuena mua kutendelela nzambi mukuabu nansha umue anyi kubueja ngenyi peshi bilele bia dishima patudi tutendelela Yehowa to. Kena bu kanzambi kadi ku mutu kua tunzambi tukuabu tuonso anyi kadi ne bukole bua bungi kutupita to. Yeye ke Nzambi mulelela. Bua kutendelela anu Yehowa nkayende, tudi ne bua kuikala badimuke bua bintu bikuabu kabiangatshi muaba wa Yehowa mu nsombelu wetu anyi kuabanyangana nende muaba wende to. Bintu ebi bidi mua kuikala binganyi? Mu Mikenji dikumi, Yehowa wakamba ne: bantu bende kabavua ne bua kutendelela nzambi mikuabu pa kumbusha yeye to, ne kabavua ne bua kukukuila mpingu ya mushindu kayi wonso to. (Dut. 5:6-10) Lelu, kudi mishindu ya bungi ya kukukuila mpingu, ne imue ya kudiyi idi mua kuikala mikole bua kuyijingulula. Kadi Yehowa ki mmushintulule mikenji yende to. Utshidi anu “Yehowa umue.”—Mâko 12:29. w16.06 3:10, 12

Pavua Petelo muebeje Yezu bua kumanya ni tudi mua kufuila muntu luse “too ne ku misangu muanda mutekete,” Yezu wakamuambila ne: “Ndi nkuambila ne: ki nganu misangu muanda mutekete to, kadi mmisangu makumi muanda mutekete ne muanda mutekete.” Yezu mmutulongeshe ne: tudi ne bua kuitaba bua kufuilangana luse misangu yonso. (Mat. 6:15; 18:21, 22) Vuluka ne: bu mutudi tuetu bonso tuenza bilema, udi pebe mua kuenzela bakuabu malu mabi. Nunku, wewe mujingulule ne: udi munyingalaje muntu, tumikila mibelu ya mu Bible. Umulombe bua akufuile luse ne udienzeje bua kukeba nende ditalala. (Mat. 5:23, 24) Tutu tusanka patu bakuabu batufuila luse. Nunku tudi ne bua kubenzela bia muomumue. (1 Kol. 13:5; Kolos. 3:13) Tuetu bafuile bakuabu luse, Yehowa neatufuile petu luse. Nunku padi bantu bakuabu benza bilema, tudi mua kubafuila luse anu mudi Tatu wetu Yehowa utufuila luse.—Mis. 103:12-14. w16.06 4:15, 17

Mu tshikondo tshia ku nshikidilu etshi, bantu ba Yehowa badi ne mudimu wa kuyisha ‘lumu luimpe lua Bukalenge pa buloba bujima budi bantu basombe bua luikale bujadiki kudi bisamba bionso.’ (Mat. 24:14) Lumu luimpe lua Bukalenge ludi kabidi “lumu luimpe lua ngasa wa Nzambi” bualu masanka onso atuapeta ku diambuluisha dia Bukalenge bua Nzambi netuapete bua bulenga bua Yehowa. (Bien. 20:24; Ef. 1:3) Paulo wakaleja muvuaye ne dianyisha bua ngasa wa Yehowa pavuaye uyisha ne tshisumi. Tudiku tuidikija tshilejilu tshia Paulo anyi? (Lomo 1:14, 15) Bu mutudi bena mibi, tudi tupeta masanka mu mishindu ya bungi ku diambuluisha dia ngasa wa Yehowa. Bu mutudi bapete masanka a bungi, tudi ne bujitu bua kulongesha bantu bakuabu mudi Yehowa uleja dinanga diende ne mudibu mua kupeta masanka ku diambuluisha dia dinanga edi. w16.07 4:4, 5

Matuku makese kumpala kua Yezu kufua, wakavuluija bayidi bende bua “mukokeshi wa buloba ebu” misangu isatu. (Yone 12:31; 14:30; 16:11) Diabolo udi wenza mudimu ne bitendelelu bia dishima bua kushima bantu. Ke bualu kayi bantu ba bungi lelu kabena bateya ntema ku milayi ya mu Bible idi ileja patoke ne: nshikidilu wa bulongolodi ebu ukadi pabuipi menemene. (Sef. 1:14) Bidi bimueneka patoke ne: Satana “mmufofomije mêsu a meji a badi kabayi bitabuja.” (2 Kol. 4:3-6) Ke bualu kayi patudi tuambila bantu ne: nshikidilu wa ndongoluelu eu ukadi pabuipi ne Kristo ukadi ukokesha, ba bungi ba kudibu kabatu batuteleja to. Nansha mudi bantu ba bungi kabayi bateya ntema ku milayi ya mu Bible, katuena mua kulekela mmuenenu wabu eu ututekesha to. Tudi bamanye bua tshinyi bidi ne mushinga bua kushala batabale. w16.07 2:11, 12

Patu musedianganyi umona mukaji muimpe udiye usela dituku dia dibaka, bubidi buabu batu ne disanka dipite bungi. Yehowa Mufuki wa dibaka mmusue bua muena dibaka yonso ikale mu dibaka dimpe dia disanka, ke bualu kayi mmufile mibelu ya meji mu Bible, Dîyi diende. (Nsu. 18:22) Nansha nanku, Bible udi utuambila ne: bantu bapange bupuangane badi babuela mu dibaka nebikale ne bilumbu anyi “makenga mu mubidi wabu.” (1 Kol. 7:28) Mmunyi mudi bena mabaka mua kukepesha bilumbu ebi? Mmunyi mudi bena Kristo mua kuikala bimpe mu dibaka? Bible udi ulongesha ne: dinanga nngikadilu udi ne mushinga wa bungi. Kadi kudi mishindu mishilashilangane ya dinanga idi bena mabaka ne bua kulejangana. Tshilejilu, badi ne bua kulejangana dinanga dikole ne dinanga dia mulume ne mukaji. Bobu ne bana, dinanga dia bena mu dîku didi dilua kabidi ne mushinga wa bungi. Kadi dinanga didi dimanyine pa mêyi manene ke didi dienza bua dibaka dikale dimpe. w16.08 2:1, 2

Timote ukavua uyisha munkatshi mua bidimu bia bungi. Timote uvua mumanye ne: bantu batu bashintuluka, ne nsombelu itu payi ishintuluka. Uvua musue bua bantu batungunuke ne kumuteleja, nunku uvua ne bua ‘kudimuka,’ ne uvua ne bua kutungunuka ne kuakaja ne kushintulula mushindu uvuaye ubalongesha. Lelu patudi tuyisha, tudi ne bua kuenza bia muomumue. Mu imue miaba, patudi tuyisha ku nzubu ne ku nzubu, tudi tumona ne: bantu ba bungi kabatu ku nzubu yabu to. Mu miaba mikuabu, bantu badi mua kuikala ku nzubu yabu, kadi katuyi ne mushindu wa kufika ku biibi bia nzubu yabu, pamuapa bualu katuena mua kubuela mu mpangu idibu. Biobi bikale nanku mu teritware webe, kuenaku mua kukeba mishindu mikuabu bua kuyisha bantu lumu luimpe anyi? Bana betu ba bungi batu basanka bua kuyisha muaba udi bantu ba bungi. Tshilejilu, batu baya mu gare ya kawulu, miaba itu mashinyi imanyina, mu bisalu ne miaba ya dilamina nyama bua kupeta bantu ba kuyukila nabu. w16.08 3:14-16

Yehowa mmutupeshe bana betu ba balume ne ba bakaji pa buloba bujima badi batutabalela ne badi mua kutukankamija. (Eb. 12:12, 13) Bena Kristo ba bungi ba mu bidimu lukama bia kumpala bakapeta diambuluisha dia nunku kudi bena Kristo nabu. Ke mudibi kabidi lelu. Anji elabi meji muvua Alona ne Hû bakoleshe bianza bia Mose pavuabu bashale babikuate pavua bena Isalele baluangana ne bena Amaleka. (Ekes. 17:8-13) Lelu, tuetu petu tudi mua kukeba mishindu ya kukankamija bakuabu ne kubambuluisha. Bamue bana betu badi batatshishibua kudi bukulakaje, masama, buluishi bua kudi bena mu mêku abu, bunkaya anyi mbafuishe muntu kampanda uvuabu banange. Tudi kabidi mua kukolesha bansonga badibu basaka misangu yonso bua kuenza malu mabi anyi bua kuya kumpala mu malu a mu bulongolodi ebu. (1 Tes. 3:1-3; 5:11, 14) Keba mishindu ya kuleja muudi ne dijinga dilelela dia kutabalela bakuabu ku Nzubu wa Bukalenge, mu buambi, panudi nudia pamue anyi paudi uyukila ne muntu ku telefone. w16.09 1:13, 14

Tudi ne dibanza kudi Nzambi wetu wa tshijila, kudi bena Kristo netu ne kudi bantu ba mu teritware wetu dia kuvuala mu mushindu udi utumbisha Yehowa ne udi upesha mukenji utudi tuyisha bujitu. (Lomo 13:8-10) Bitudi tuvuala bidi nangananga ne mushinga patudi tuya mu bisangilu bietu bia bena Kristo anyi patudi tuyisha. Tudi ne bua kuvuala “mu mushindu udi mukumbanyine [bantu] badi bamba mudibu batshina Nzambi.” (1 Tim. 2:10) Bushuwa, bimue bilamba bidi mua kuikala bikumbane bua muaba kampanda, kadi kabiyi bikumbane bua muaba mukuabu to. Nunku, nansha tuetu basombele muaba kayi, bu mutudi Bantemu ba Yehowa tudi ne bua kuepuka bua kulenduisha bakuabu ne mvuadilu wetu. Patudi tuya mu mpuilu ne mu mpungilu, mvuadilu wetu udi ne bua kuikala mukumbane ne wa nkatshinkatshi. Katuena ne bua kuidikija mishindu minekesha ya mvuadilu idi mitangalake mu bulongolodi ebu to. Netuikale ne disanka dia kudimanyisha bu Bantemu ba Yehowa, ne netuikale pabuipi bua kuyisha dîba dionso. w16.09 3:7, 8

Bushuwa, nzubu wetu muena dîna eu mmuenza anyi mmuibaka kudi muntu kampanda. Kakuyi mpata, bintu bia muoyo bidi bikole menemene bua kubienza kupita nzubu bidi ne bua kuikala bienza kudi muntu kampanda. Udi mua kuenza mudimu ne ngelelu wa meji eu paudi uyukila ne muntu udi kayi witaba Bible. Keba bua kumanya tshidiye witabuja ne malu adiye munange. (Nsu. 18:13) Yeye munange malu a sianse, mupeshe bilejilu bia mu Bible bidi bileja ne: malu a sianse adi Bible wamba atu misangu yonso malelela. Yeye munange miyuki ya malu a kale, udi mua kumuleja bualu kampanda budibu baleje mu mikanda ya malu a kale ne kumuleja mukavua Bible muakule bua bualu abu bidimu bia bungi kumpala kua kuenzekabu. Bantu bakuabu badi mua kukuteleja wewe mubaleje bualu kampanda bua mu Bible budi mua kubambuluisha mu nsombelu wabu bu mudi: mibelu idi mu Muyuki wa Yezu wa pa mukuna. Ikala mumanye ne: tshipatshila tshietu ntshia kusungila mioyo ya bantu, ki ntshia kukokangana nabu to. Nunku ikala uteleja bantu bimpe. Ela bantu nkonko mimpe ne akula ne budipuekeshi ne bukalanga, nangananga wewe uyukila ne muntu mukole kuudi. Wewe unemeka bakuabu, nebakunemeke pebe. w16.09 4:14-16

Bua kuambuluisha bantu badi bafume mu matunga makuabu bua kudiumvuabu bimpe mu tshisumbu, diebeja ne muoyo mujima ne: ‘Meme muye mu ditunga dikuabu, mvua mua kujinga bua bantu bangenzele malu mushindu kayi?’ (Mat. 7:12) Ikala ne lutulu kudi bantu badi badienzeja bua kuibidilangana ne nsombelu wa mu ditunga dikuabu. Ku ntuadijilu, katuena mua kumvua bimpe mushindu wabu wa kuela meji anyi wa kuenza malu. Kadi pamutu pa kutekemena bua bele meji ne benze malu bilondeshile bibidilu bia kuenu, bua tshinyi kuena mua kubanyisha anu mudibu amu? Tuetu bakebe dîba dia kumanya malu adi atangila ditunga ne bibidilu biabu, nebikale bipepele bua tuetu kubamanya bimpe. Mu ntendelelu wetu wa mu dîku, tudi mua kuenza amue makebulula bua kumanya bibidilu bia bantu ba mu matunga makuabu badi mu tshisumbu tshietu anyi mu teritware wetu. Mushindu mukuabu wa kuibidilangana ne bantu badi bafume mu matunga makuabu, nkubabikila ku nzubu kuetu bua kudia nabu. Bu mukdi Yehowa “munzuluile bantu ba bisamba bia bende tshiibi,” katuenaku mua kunzuluila benyi badi “bana betu mu ditabuja” tshietu tshiibi anyi?—Bien. 14:27; Gal. 6:10; Yobo 31:32. w16.10 1:15, 16

Paulo mumane kuakula bua balume ne bakaji ba ditabuja, wakaleja muntu wa pa buende uvua bantu bonso ne bua kuidikija bu tshilejilu, Yezu Kristo Mukalenge wetu. Udi wamba mu Ebelu 12:2 ne: “Bua disanka divua dimutekela kumpala, wakatantamena mutshi wa makenga, kulengululaye bundu, ne mmusombe ku tshianza tshia balume tshia nkuasa wa bukalenge wa Nzambi.” Bushuwa, tudi ne bua ‘kuela meji bimpe’ bua tshilejilu tshia ditabuja divua nadi Yezu kumpala kua ntatu mitambe bukole. Anu bu Yezu, bena Kristo ba bungi ba mu bidimu lukama bia kumpala, bu mudi Antipa, bavua babashipe bualu bavua ne lulamatu kudi Yehowa. (Buak. 2:13) Bavua ne bua kubabisha ku lufu bua kuikalabu ne muoyo mu diulu bu difutu dipite “dibishibua dimpe menemene” divua batendeledi ba Nzambi ba kumpala kuabu bindile ne muoyo kuulu kuulu. (Eb. 11:35) Matuku makese Yezu mumane kulua Mukalenge mu 1914, bena Kristo bela manyi bakavua bafue, bakabishibua bua kupeta muoyo udi kawuyi ufua mu diulu bua kukokesha bukua bantu pamue ne Yezu.—Buak. 20:4. w16.10 3:12

Bamue baledi kabatu bakankamija bana babu bualu babu baledi kabavua babakankamija to. Bena mudimu ba bungi batu badiabakena ne: kabatu babela kalumbandi bua mudimu utubu benza to. Tudi mua kukankamija bakuabu pa kubela kalumbandi bua bualu kampanda buimpe budibu benze. Tudi kabidi mua kukankamija bakuabu pa kubambila ne: badi ne ngikadilu mimpe anyi “kuakula ne mêyi a busambi kudi badi babungame.” (1 Tes. 5:14) Muaku wa mu tshiena Greke utubu pa tshibidilu bakudimuna ne: “dikankamija” utu umvuija “dibikila bua kuikala ku luseke lua muntu kampanda.” Bu mututu ne bana betu ba balume ne ba bakaji misangu yonso, tudi ne mpunga ya bungi ya kubambila bualu budi bubakankamija. (Muam. 4:9, 10) Nunku, diebeja ne: ntuku ndeja bakuabu bua tshinyi ndi mbangata ne mushinga ne mubanange anyi? Kumpala kua tuetu kuandamuna lukonko elu, mbimpe tuele meji bua mêyi a mu Bible aa: ‘Monayi mudi dîyi diamba mu tshikondo tshiakane mudidi diakane!’—Nsu. 15: 23. w16.11 1:3-5

Nzambi uvua mudianjile kuamba bua bantu bende ne: ‘Nembasangishe popamue bu mikoko mivule mu lupangu.’ (Mika 2:12) Yehowa wakamba kabidi ku butuangaji bua muprofete Sefanya ne: ‘Nenkudimune muakulu wa bantu ba bende bua wikale muakulu wa ku mishiku milengejibue [wa bulelela bua mu Bible]; bua bobu bamanye mua kubikila dîna dia Yehowa, bamukuatshile mudimu ne diapa dionso muinshi mua bujitu [anyi “kumutendelela mu buobumue.”].’ (Sef. 3:9) Bidi bituenza disanka bua mutudi tutendelela Yehowa mu buobumue. Bidi bimueneka patoke ne: pavua bena Kristo ba mu bidimu lukama bia kumpala balonde buludiki bua mu Mukanda wa Nzambi, bisumbu biabu bivua bikezuke, bivua mu ditalala ne mu buobumue. (1 Kol. 1:10; Ef. 4:11-13; 1 Pet. 3:8) Lelu bantu ba Yehowa badi pabu mu buobumue ne mbalongolola bimpe, badi bayisha lumu luimpe pa buloba bujima. w16.11 2:16, 18

Mu bidimu nkama mikese bia ntuadijilu panyima pa Kristo, bantu ba bungi bavua babala Bible mu tshiena Greke anyi mu Latin. Bavua bafuanyikija malongesha a mu Dîyi dia Nzambi ne a mu bitendelelu. Pavua bamue bantu bamone ne: malongesha a bitendelelu avua a dishima, bavua baalekela. Kadi kuambila bantu bakuabu mmuenenu wabu kuvua kubakebela njiwu, ne bavua mene mua kubashipa pavuabu benza nunku. Mu kupita kua matuku, anu bantu bakese ke bavua bakula tshiena Greke anyi Latin. Bamfumu ba bitendelelu kabavua banyishile bantu bua kukudimuna Dîyi dia Nzambi mu miakulu ivua bantu bamanye to. Bavua banyoka bikole muntu uvua ubenga kuitaba malongesha a bitendelelu. Bena Kristo bela manyi ba lulamatu bavua badisangisha pamue mu tusumbu tukese pa nkayabu, kadi bamue kabavua ne mushindu wa kudisangisha to. Bela manyi bavua “bakuidi bikale bakalenge” kabavua mua kutendelela Nzambi mu mushindu mulongolola to. Babilona Munene uvua ne dîsu dikole kudi bantu. w16.11 4:8, 10, 11

Bushuwa, tudi ne bua kuepuka dienza mpekatu minene ivua bamue bena mu Kolinto benze. Bidi ne mushinga anu tuetu bitabe ngasa wa Nzambi ne tuamba ne: ‘bubi kabuena ne bua kutukokesha.’ Kadi tudiku badisuike kabidi bua kuenza muetu muonso bua ‘kutumikila [Yehowa] ne muoyo mujima’ pa kubenga kuenza mpekatu idi bamue bamona bu mikese anyi? (Lomo 6:14, 17) Tuangate tshilejilu tshia mupostolo Paulo. Wakafunda ne: “Meme ndi muntu wa mubidi, musumbisha ku bubi. Bualu tshiena ngumvua tshindi ngenza. Bualu tshindi musue, tshiena ntshienza to; kadi tshindi mukine ke tshindi ngenza.” (Lomo 7:14, 15) Nansha muvua Paulo kayi wenza malu adibu batele mu 1 Kolinto 6:9-11, wakitaba ne: uvua muena mibi. Uvua musue kusankisha Yehowa, ke bualu kayi uvua uluangana bua kubenga kuenza malu mabi. (Lomo 7:21-23.) Tuidikijayi tshilejilu tshiende ne tuenzayi muetu muonso bua ‘kutumikila [Yehowa] ne muoyo mujima.’ w16.12 1:15, 16

Paudi ne tunyinganyina, Tatu webe wa mu diulu udi ne dinanga mmusue bua umuleje muudi udiumvua mu muoyo webe. Wewe mumane kuenza tshionso tshiudi mua kuenza bua kujikija lutatu luebe, kusambila Yehowa ne muoyo mujima nekukuambuluishe bikole pamutu pa kusamisha mutu. (Mis. 94:18, 19) Anu mudibu baleje mu Filipoyi 4:6, 7, Yehowa udi wandamuna masambila etu atudi tuenza ne muoyo mujima ne dinanukila? Mushindu kayi? Udi mua kutuambuluisha bua kudiumvua bimpe ne kuepuka ngenyi mibi ne meji mabi. Pamutu pa tuetu kuikala ne tunyinganyinga ne buôwa, Nzambi udi utuambuluisha bua kuikala ne ditalala dia mu muoyo ditudi katuyi mua kupeta muaba mukuabu. Bana betu ba bungi ba balume ne ba bakaji mbapete ditalala edi. Udi pebe mua kudipeta. “Ditalala dia Nzambi” didi mua kukuambuluisha bua kutantamena lutatu kayi luonso. Udi mua kueyemena ne muoyo mujima mulayi wa Yehowa eu: ‘Kukenzakanyi bua buôwa nansha, bualu bua ndi Nzambi webe; nenkukoleshe, bulelela, nenkukuatshishe.’—Yesh. 41:10. w16.12 3:3, 4

Mose wakabenga masanka a mu Ejipitu, kadi kusungulaye “bua kukengeshibua ne bantu ba Nzambi pamutu pa kuikala ne disanka dia tshitupa tshîpi dia bubi.” (Eb. 11:25, 26) Tuidikijayi ditabuja dia bantu bavua ne lulamatu aba, bu mudi Mose ne tuanyishayi budikadidi buetu bua kudisunguila malu, tuenza nabu mudimu bua kuenza disua dia Nzambi. Bidi mua kumueneka bipepele bua kusaka muntu mukuabu bua kutuangatshila dipangadika, kadi katuakupeta dimue dia ku masanka manene a budikadidi bua kudisunguila malu to. Bible udi udileja mu Dutelonome 30:19, 20. Mvese wa 19 udi utuleja disungula divua Nzambi mulombe bena Isalele bua kuenza. Mu mvese wa 20, tudi tumvua ne: Yehowa wakabapesha mpunga bua kulejabu muvuabu bamunange bikole. Tuetu petu tudi mua kusungula bua kutendelela Yehowa. Tudi kabidi ne mpunga wa pa buende bua kuenza mudimu ne budikadidi bua kudisunguila malu bua kutumbisha Yehowa ne kuleja mutudi bamunange bikole. w17.01 2:10, 11

Yehowa mmusue bua tuenze mudimu bimpe ne bipedi bietu. Bua tshinyi? Bualu mmutunange ne mmumanye ne: tuetu benze mudimu ne bipedi bidiye mutupeshe, netuikale ne disanka. Kadi Yehowa mmumanye kabidi ne: bantu badi ne mikalu. Tshilejilu, katuena mua kujikija dipanga bupuangane, bubi ne lufu tuetu nkayetu to. Katuena kabidi mua kulombola bantu bakuabu to, bualu muntu yonso udi ne budikadidi bua kudisunguila malu. (1 Bak. 8:46) Nansha tuetu ne dimanya bungi kayi anyi ne dimonamona dia malu dia mushindu kayi, netuikale anu bu bana ku mêsu kua Yehowa. (Yesh. 55:9) Tudi ne bua kulekela Yehowa utulombola misangu yonso, bashindike ne: neatukuatshishe ne neatuenzele bitudi tukengela bitudi katuyi tukokesha bua kudienzela nkayetu. Kadi Yehowa mmusue kabidi bua tuele meji bua tshitudi mua kuenza bua kujikija bilumbu ne bua kuambuluisha bakuabu. Mu tshikoso, tudi ne bua ‘kueyemena Yehowa ne kuenza malu adi mimpe’; tudi ne bua ‘kuenza malu ne lulamatu.’ w17.01 1:2-4

Bâzilai wakabenga dilomba edi. Bua tshinyi? Bu mukavuaye muntu mukulumpe, wakambila Davidi ne: kavua musue kuikala bujitu kudiye to. Nanku Bâzilai wakalomba bua Kimehama, uvua pamuapa muanende, angate muaba wende. (2 Sam. 19:31-37) Bupuekele buvua buambuluishe Bâzilai bua kuangata dipangadika dimpe. Kavua mubenge dibikila dia Davidi bualu uvua udimona kayi mukumbane bua kuambula majitu anyi ujinga kuikala ne nsombelu mupepele to. Wakajingulula ne: nsombelu wende uvua mushintuluke, kuitabaye mikalu yende. Kavua musue kuambula majitu makuabu avuaye kayi mua kuambula to. (Gal. 6:4, 5.) Anu bu Bâzilai, tudi ne bua kuikala bena bupuekele. Pamutu pa kuimanyina pa bitudi basue anyi kudifuanyikija ne bakuabu, tuenzele Yehowa mudimu ne muetu muonso. Bualu ebu budi ne mushinga wa bungi kupita kuikala ne mudimu kampanda wa pa buawu anyi kuikala mumanyike bikole. (Gal. 5:26) Tuetu ne bupuekele, netuenze mudimu pamue ne bena Kristo netu bua kutumbisha Yehowa ne kuambuluisha bantu bakuabu.—1 Kol. 10:31. w17.01 4:5, 6

Yehowa mMufuki wa kunemeka bikole. Bintu bionso bidiye mufuke mbimpe be! (Yel. 10:12) Yehowa wakelela bifukibua biende bionso mikalu bimpe menemene. Wakelela bintu bidiye mufuke mikenji, kuelaye kabidi mikenji ya bikadilu bilenga. Wakela mikenji eyi bua bintu bionso bidi mu diulu ne pa buloba bienze mudimu bimpe pamue. (Mis. 19:7-9) Bintu bionso bidi mu diulu ne pa buloba bidi ne muaba wabi ne mudimu wabi mu dilongolola dia Nzambi. Yehowa mmuele mikenji ya mudi bifukibua ne bua kutumika pamue. Tshilejilu, mukenji wa bukole budi bukoka bintu bua bimate panshi udi ulama kapepe pabuipi ne buloba ne udi ulombola mbuu mialabale ne dibanda ne dipueka dia mâyi. Bu mukenji eu kawuyiku, kakuvua mua kuikala muoyo pa buloba to. Mikalu idi Yehowa muelele bintu bidiye mufuke, mmienze bua bulongame buimpe buikalaku mu diulu ne pa buloba. Bulongame budi mu bufuki budi buleja patoke ne: Nzambi udi ne malu adiye mulongolole bua buloba ne bantu. Patudi tuyisha, tudi mua kuambuluisha bakuabu bua bafike ku dimanya Mufuki wa bionso bidi mu bulongame bidi bitukemesha ebi.—Buak. 4:11. w17.02 1:4, 5

Mose wakafua, bakamupingana kudi Yoshua, Bible udi wamba ne: ‘Mukalenge wa musumba wa Yehowa,’ anyi muanjelu, wakambuluisha Yoshua bua kutshimuma mvita yabu ne bena Kanâna. (Yosh. 5:13-15; 6:2, 21) Panyima pa matuku, Hezikiya wakatuilangana ne tshiluilu tshinene tshia bena Ashû tshivua tshifuna bua kubutula Yelushalema. Mu butuku bumue, ‘muanjelu wa Yehowa wakaya, wakashipa bantu binunu lukama ne makumi muanda mukulu ne bitanu.’ (2 Bak. 19:35) Banjelu mbapuangane. Kadi bantu bavuabu bambuluishe kabavua bapuangane to. Tshilejilu, musangu mukuabu Mose kavua mutumbishe Yehowa to. (Nom. 20:12) Yoshua kakalomba Nzambi tshia kuenza pavua bena Gibeona basue kumvuangana nende to. (Yosh. 9:14, 15) Musangu kampanda, Hezikiya ‘wakadisua mu mutshima wende.’ (2 Kul. 32:25, 26) Nansha muvua bantu aba bapange bupuangane, bena Isalele bavua balombibue bua kulonda bulombodi buabu. Yehowa uvua wenza mudimu ne banjelu bende bua kuambuluisha bantu aba. Bulelela, Yehowa uvua ulombola bantu bende. w17.02 3:7-9

Tudi tuleja bakuabu bunême patudi tubangata ne mushinga wa bungi ne tubanemeka. Pa tshidibidilu, tutu tupesha bantu bunême bua bualu kampanda budibu benze anyi bua mudimu peshi muanzu munene udibu nawu. Nanku mbimpe tudiebeje ne: Mbanganyi batudi ne bua kupesha bunême? Bua tshinyi mbubakumbanyine? Anu mudi Buakabuluibua 5:13 uleja, “Yeye udi musombe mu nkuasa wa bukalenge” ne “Muana wa mukoko” mbakumbanyine bunême. Mu Buakabuluibua nshapita 4, badi baleja bumue bualu budi buleja bua tshinyi Yehowa mmukumbane bua kumupesha bunême. Bifukibua bia mu diulu bidi bibandisha mêyi bitumbisha Yehowa, “Yeye udi ne muoyo kashidi ne tshiendelele.” Bidi biamba ne: “Wewe, Yehowa Nzambi wetu, udi mukumbane bua kuangata butumbi ne bunême ne bukole, bualu wakafuka bintu bionso, ne bua disua diebe biakikalaku ne biakafukibua.”—Buak. 4:9, 11. w17.03 1:1, 2

Lelu, bantu ba bungi batu balonda muoyo wabu patubu bangata mapangadika. Kadi abi bidi mua kukebesha njiwu. Bible udi utudimuija bua kubenga kulonda muoyo wetu anyi meji etu a bantu bapange bupuangane patudi tusua kuangata mapangadika. Kudi bilejilu bia bungi bia mu Bible bidi bileja bipeta bibi bia dieyemena muoyo wetu wa bantu bapange bupuangane. Tshilumbu tshinene tshidi ne: munda mua bantu bapange bupuangane mudi ‘mutshima udi upita bintu bionso kudinga muntu, ne udi utamba kunyanguka.’ (Yel. 3:17; 13:10; 17:9; 1 Bak. 11:9) Nunku, ntshinyi tshidi mua kuenzeka tuetu balonde muoyo wetu patudi tuangata mapangadika? Tshilejilu, ntshinyi tshidi mua kuenzeka tuetu bangate mapangadika patudi ne tshiji? Diandamuna didi mua kuikala ditoke bituikala tukadiku benze nanku. (Nsu 14:17; 29:22) Mbikole kabidi bua muntu udi mutekeshibue mu mikolo kuenzaye disungula dimpe. (Nom. 32:6-12; Nsu. 24:10) Patudi tusua kuangata mapangadika manene, katuena ne bua kulekela meji etu alombola tshitudi tuenza to. w17.03 2:12, 13

Tuetu bonso tudi bapange bupuangane ne tutu tuenza bilema. Diakalenga, Yehowa mmutupeshe tshia kupikula natshi bantu, ne udi pabuipi bua kutufuila luse. Nunku tuetu ne budipuekeshi ne banyingalale, tudi mua kumulomba bua atubuikidile. Tuikale batuishibue ne: Yehowa kakutuenzela malu “bu mudi mibi yetu” to. (Mis. 103:10) Kadi anu bu muvua Davidi muambile Solomo, bua Yehowa kuitaba ntendelelu wetu wa ku dituku ne ku dituku, tudi ne bua ‘kumukuatshila mudimu ne muoyo mujima.’ (1 Kul. 28:9, NWT) Muntu udi wenzela Nzambi mudimu ne “mutshima mutoke” anyi ne muoyo mujima, mmunange Yehowa bikole ne mmusue kumutendelela bua kashidi. Mu Bible, muaku “mutshima” anyi muoyo utu pa tshibidilu uleja tshitudi munda muetu. Udi kabidi ukonga mushindu utudi tuela meji, bitudi banange, bitudi basue kuenza mu nsombelu wetu, ne tshidi tshitusaka bua kuenza malu kampanda. Nansha mutudi bapange bupuangane, tudi mua kutendelela Yehowa ne muoyo mujima. Tudi tumuenzela mudimu bualu ndijinga dietu menemene, kadi ki mbualu tudi ne bua kuenza nanku to, anyi bualu mbualu bua pa tshibidilu to.—2 Kul. 19:9. w17.03 3:1, 3

Patudi tupeta malu mimpe anyi padi bakuabu batutumbisha, ntshinyi tshitudi mua kuenza? Mushindu utudi tuenza malu neuleje tshidi mu muoyo wetu. Tshilejilu, muanetu wa balume udi mua kuikala mudienzeje bikole bua kulongolola muyuki ne kuwenza kumpala kua bantu ba bungi. Bantu ba bungi badi bamutumbisha bua bidiye muenze. Ntshinyi tshienzaye bua mudibu bamutumbisha? Padibu batutumbisha, tudi ne bua kuvuluka misangu yonso tshivua Yezu muambe etshi: “Panuenza malu onso avuabu banuambile bua kuenza, nuambe ne: ‘Tudi bapika ba tshianana. Tudi benze anu tshituvua ne bua kuenza.’” (Luka 17:10) Bualu buvua bufikile Hezikiya budi mua kutupesha dilongesha. Vuluka ne: pakapeta Hezikiya lutambishi, “kakaleja dianyisha bua malu mimpe avuabu bamuenzele” to. (2 Kul. 32:24-27, 31, NWT) Tudi mua kuelangana meji bua malu adi Yehowa mutuenzele bua kuepuka ngenzelu wa malu utuye mukine. Tudi mua kuakula ne dianyisha bua Yehowa ne bua mudiye wambuluisha batendeledi bende ne lulamatu. w17.03 4:12-14