Ngondo 6

Dinanga didi disaka Yehowa bua kutubela, kutuyisha, ne kutulongesha bua tushale mu dinanga diende ne mu njila udi ufikisha ku muoyo. Kadi kudi misangu idi dinyoka mua kukongoloja malu makuabu pa kumbusha kufila mibelu. Muanetu kampanda yeye muenze mpekatu munene, dinyoka didi mua kuikala dijimija majitu mu tshisumbu. Nansha yeye mujimije majitu, dinyoka dia nunku didi anu dileja mudi Nzambi mumunange. Tshilejilu, dijimija majitu didi mua kuambuluisha muntu bua kujingulula ne: bidi ne mushinga bua kudifilaye ku dilonga Bible, ku dielangana meji, ne ku disambila. Nunku bidi mua kukolesha malanda ende ne Nzambi. (Mis. 19:7) Mu kupita kua matuku, badi mua kumupingajila majitu ende. Nansha dipatshibua mu tshisumbu didi padi dileja mudi Nzambi mutunange bualu didi dikuba tshisumbu ku buenzeji bubi. (1 Kol. 5:6, 7, 11) Bu mudi Nzambi unyoka bantu mu mushindu muakanyine, dipatshibua mu tshisumbu didi mua kufikisha muntu ku dimona bunene bua mpekatu wende ne didi mua kumusaka ku dinyingalala.—Bien. 3:19. w18.03 24 §5, 6

Mulami wa buloko udibu bakuile mu mvese eu kavua muibidilangane ne Mifundu to. Nunku, bua kupeta dimanya dishindame dia Mifundu, uvua ne bua kulonga malongesha a nshindamenu a mu Bible, kumanya tshidi kuikala muena mudimu wa Nzambi kumvuija, ne kudisuika bua kutumikila malongesha a Yezu. Mu matuku makese, dimanya dia malongesha a nshindamenu a mu Mifundu ne dianyisha divuaye nadi bua malongesha au biakamusaka bua kubatijibua. (Bien. 16:25-33) Kakuyi mpata, wakatungunuka ne kuvudija dimanya diende panyima pa batismo wende. Bu muudi mumanye bualu ebu, ntshinyi tshiudi mua kuenza padi muanebe uleja dianyisha dilelela bua malongesha a nshindamenu a mu Mifundu adi akongoloja diumvuija ne mushinga wa didilambula ne batismo? Udi mua kuitaba bua aye kuyukila ne bakulu bua bamone ni udi ukumbaja malu malomba bua kubatijibua. Anu bu bayidi bakuabu bakadi babatijibue, neatungunuke ne kuvudija dimanya dia malu a Yehowa matuku ende onso a muoyo, anyi mene bua kashidi.—Lomo 11:33, 34. w18.03 10 §8, 9

Patudi tudienzeja bua kukola mu nyuma, nyuma muimpe neatupeshe bukole bua kushintulula meji etu. Nyuma eu udi mua kutuambuluisha bua kutuadija kuela meji ku kakese ku kakese anu bu Kristo. Kabidi, neatuambuluishe bua kumbusha majinga a mubidi ne kupeta ngikadilu idi isankisha Nzambi. Kuikala ne ngelelu wa meji wa Kristo nekuakaje ngakuilu wetu, bikadilu bietu ku mudimu anyi mu kalasa, ne mapangadika atudi tuangata dituku dionso. Mapangadika au nealeje mutudi tudienzeja bua kuikala bayidi ba Kristo. Bu mutudi bantu ba mu nyuma, katuena basue tshintu nansha tshimue tshinyange malanda etu ne Tatu wetu wa mu diulu to. Patudi kumpala kua mateta, meji a buena a Kristo atudi nawu neatusake bua kuakandamena. Patudi tusua kuangata mapangadika, mbimpe kuanji kuimana, kudiebeja ne: ‘Mmêyi kayi manene a mu Bible adi mua kungambuluisha? Kristo uvua mua kuenza tshinyi mu bualu ebu? Ndipangadika kayi diasankisha Yehowa?’ w18.02 25 §12; 26 §14

Mu matuku a Henoka, tatuende wa kakuende wa Noa, bantu kabavua banemeka Nzambi nansha kakese. Bavua bamuamba too ne “malu adi enza bundu.” (Yuda 14, 15) Tshikisu tshivua anu tshienda tshivula. Ke bua tshinyi mu matuku a Noa, “buloba buvua buwule ne tshikisu.” Banjelu babi bakavuala mibidi ya bantu, kudisunguila bakaji, kulelabu nabu bana ba tshikisu bavua dimiinu dishilangane ne dia bantu. (Gen. 6:2-4, 11, 12) Kadi Noa uvua mushilangane bikole ne bantu bakuabu. “Wakadileja kayi kalema munkatshi mua bantu ba tshikondo tshiende. Noa wakenda ne Nzambi mulelela.” (Gen. 6:9) Mvese eu udi usua kuamba tshinyi bua Noa? Bumue bualu budi ne: Noa kakenda ne Nzambi munkatshi mua bantu babi ba kumpala kua Mvula wa kabutu bidimu 70 anyi 80 patupu, bidi ba bungi balala ne muoyo lelu to. Kadi wakasomba ne bantu abu bidimu bitue ku 600! (Gen. 7:11) Kabidi, bishilangane netu lelu, Noa kavua ne tshisumbu tshia bena kuitabuja nende bavua mua kumuambuluisha mu malu a Nzambi to. Bidi bimueneka ne: nansha bana babu ba ku mubidi kabavua bamuambuluishe to. w18.02 4 §4, 5

Bantu badi banange makuta batu anu bajinga makuabu, ne padibu badienzeja bua kuapeta, badi badituadila “tunyinganyinga tua bungi.” (1 Tim. 6:9; Muam. 5:10) Bushuwa tuetu bonso tudi dijinga ne makuta. Adi atupetesha ndambu wa bukubi. (Muam. 7:12) Kadi muntu udiku mua kuikala bushuwa ne disanka yeye anu ne makuta makumbane bua majinga ende manene anyi? Eyowa! (Muam. 5:12.) Agû muana wa Yake wakafunda ne: “Kumpeshi bupele anyi bubanji nansha. Ndie anu tshianyi tshitupa tshia biakudia.” Tudi mua kumvua bipepele bua tshinyi kavua musue kuikala mupele wa menemene to. Anu muvuaye mumvuije pashishe, kavua musue kutetshibua bua kuiba to, bualu kuiba kuvua mua kupendesha Nzambi. Kadi bua tshinyi wakalomba bua kalu mubanji? Wakafunda ne: “Bua tshilu kukuta ne ndue kukuvila ngamba ne: ‘Yehowa nnganyi?’” (Nsu. 30:8, 9) Yezu wakamba ne: “Muntu nansha umue kena mua kuenzela bamfumu babidi mudimu to; bualu neakine umue ne neanange mukuabu, anyi nealamate umue ne neapetule mukuabu. Kanuena mua kuikala bapika ba Nzambi ne ba Biuma popamue to.”—Mat. 6:24. w18.01 24 §9-11

Tudi tukolesha buobumue buetu patudi tufuilangana luse ne muoyo mujima. Patudi tufuila badi batuenzele bibi luse, tudi tuleja mutudi tuanyisha mudi Yehowa utubuikidila mpekatu yetu ku diambuluisha dia mulambu wa kupikula nawu bantu wa Kristo. Bala tshilejilu tshivua Yezu mufile tshidi mu Matayi 18:23-34, udiebeje ne: ‘Ndiku ndiumvua musakibue bua kutumikila tshivua Yezu mulongeshe anyi? Ntuku ndeja bena Kristo nanyi lutulu ne mbumvuila anyi? Ndiku pabuipi bua kufuila badi bangenzela bibi luse anyi?’ Bushuwa imue mpekatu mminene kupita mikuabu, ne bu mutudi bapange bupuangane, bana betu badi mua kutuenzela bimue bilema bidi mua kutukolela bua kubafuila luse. Nansha nanku, tshilejilu etshi tshidi tshituleja tshidi Yehowa musue bua tuenze. Yezu mmuleje patoke ne: Yehowa kakutufuila luse bituikala katuyi petu tufuila bana betu luse padibi bikengela kuenza nanku. Ebu mbualu butudi ne bua kuelela meji bikole. Tudi tukuba buobumue buetu ne tubulama patudi tufuilangana luse anu mudi Yezu mutulongeshe. w18.01 15 §12

Nansha muvua kusambila kuteka muoyo wa Danyele mu njiwu, wakapangadija too ne bua kubenga kufikisha bantu ku diela meji ne: uvua mulekele ntendelelu wende. Yehowa wakabenesha dipangadika divuaye muangate ne dikima ne meji onso, kuenzaye tshishima bua kumusungila ku lufu lubi mu buina bua ntambue. Bushuwa, dimusungila adi diakafikisha bantu ba miaba ya kule menemene ya mu bukalenge bua bena Madayi ne bena Pelasa bua kumanyabu Yehowa! (Dan. 6:25-27) Mmunyi mutudi mua kupeta ditabuja bu dia Danyele? Bua tuetu kupeta ditabuja dikole, katuena anu ne bua kubala Dîyi dia Nzambi patupu to, kadi tudi ne bua ‘kudijingulula.’ (Mat. 13:23) Tudi tujinga kumanya mudi Yehowa umona malu ne kujingulula mêyi manene a mu Bible. Nanku, tudi ne bua kuelangana meji a malu atudi tubala. Kuikala ne tshibidilu tshia kusambila ne muoyo mujima, nangananga patudi tutuilangana ne ntatu anyi nsombelu mikuabu mikole, kudi paku ne mushinga wa bungi. Patudi tulomba Yehowa ne ditabuja dionso meji ne bukole, udi utupeshabi mulekelele tshianza.—Yak. 1:5. w18.02 10-11 §13-15

Nansha wewe mubatijibue mulue mutendeledi wa Nzambi, udi mua kulabula buimpe bua Yehowa paudi udimuenena mudiye ukuambuluisha paudi uyisha bakuabu mu buambi anyi mu kalasa. Bitu bikolela bamue bana bua kuyisha balongi nabu mu kalasa. Udi mua kumvua bua tshinyi bitu bikole. Bualu kuena mumanye ni bitaba anyi ni babenga. Bidi mua kukukolela kabidi nangananga bua kuakula ne bantu ba bungi kupita muudi mua kuakula ne mulongi umue tshianana. Ntshinyi tshidi mua kukuambuluisha? Tshia mushinga, manya bua tshinyi malu audi witabuja mmalelela. Bintu bia kudilongela nabi Bible bidi mu site wa jw.org bidi mu muakulu wenu anyi? Wewe kuyi mumanye ni bidiku, keba dîba dia kubikeba. Mbabienze bua kukuambuluisha bua kuelangana meji a malu audi witabuja, tshidi tshikusaka bua kuitabuja, ne muudi mua kuumvuija bakuabu. Paudi utuishibua bikole bua malu aa, ne udilongolola bimpe, nebikusake bua kumanyisha bantu dîna dia Yehowa.—Yel. 20:8, 9. w17.12 26 §12, 14, 15

Kulongesha bana malu a Nzambi kakuena kulomba anu kubalongesha malu adi mu Bible ne miyuki ya bantu badibu batelamu patupu to. Bible udi wamba bua Timote ne: bavua kabidi ‘bamufikishe ku ditaba.’ Mu tshiena Greke, tshiambilu etshi tshidi tshiumvuija “kuikala mujadike” anyi “kuikala mutuishibue ne mushindike bulelela bua bualu kampanda.” Timote uvua mumanye Mifundu ya tshiena Ebelu katshia ku buana. Kadi kuvua bijadiki binene biakalua kumutuishisha ne: Yezu uvua Masiya. Mmunyi muudi mua kuambuluisha bana bebe bua bikale ne dituishibua diabafikisha pabu ku ditaba, anu bu Timote? Kuikala ne lutulu kudi ne mushinga. Muntu katu utuishibua anu musangu umue to. Paudi wewe witabuja bualu kampanda kabiena bisua kumvuija ne: bana bebe nebabuitabuje diakamue to. Muana yonso udi ne bua kuenza mudimu ne ‘tshieledi tshiende tshia meji’ bua kukolesha dituishibua diende bua bulelela bua mu Bible. (Lomo 12:1) Bu muudi muledi, udi ne mudimu munene mu bualu ebu, nangananga padi muanebe ukuela nkonko. w17.12 19 §3, 5, 6

Mâta mulunda wa Yezu wa pa muoyo ne muyidi wende uvua mubungame bikole. Muanabu Lazalo uvua mufue. Kuvuaku tshintu tshivua mua kukepesha kanyinganyinga kende anyi? Eyowa. Yezu uvua mumujadikile ne: “Muanenu neajuke.” (Yone 11:20-23) Mâta uvua mutuishibue ne: bualu abu buvua ne bua kuenzeka mu matuku atshivua alua kumpala. Kadi Yezu wakenza tshishima. Kujulaye Lazalo ku lufu anu dituku adi mene. Lelu, kakuena bualu budi mua kutusaka bua kutekemena ne: Yezu anyi Tatuende batuenzele tshishima tshia nunku to. Nansha nanku, udi pebe mutuishibue anu bu Mâta ne: muntu uudi mufuishe neabishibue kumpala eku anyi? Pamuapa udi mua kuikala mufuishe muena dibaka nebe, mamuebe, tatuebe, anyi kakuebe. Peshi udi mua kuikala ne kanyinganyinga bua lufu lua muanebe. Udi ujinga bikole bua kuakidila muntu uudi mufuishe, kuyukila nende, ne kusekaku nende. Bualu bua disanka budi ne: udi pebe bua kuamba anu bu Mâta ne: ‘Ndi mumanye ne: kampanda wanyi ukadi mufue neajuke ku dibishibua dia bantu ku lufu.’ Kuelangana meji a tshidi tshitujadikila ne: bantu nebabishibue ku lufu kudi mua kuambuluisha muena Kristo yonso. w17.12 3 §1, 2

Yezu uvua munange Mikenji ya Mose. Kabiena bikemesha to, bualu Mikenji ayi ivua mifumine kudi Tatuende Yehowa, muntu udi ne mushinga wa bungi menemene mu nsombelu wa Yezu. Mvese wa lelu ukavua muleje mu mêyi a buprofete mudi Yezu munange mikenji ya Nzambi bikole. Yezu wakajadika ku mêyi ne bienzedi biende mudi Mikenji ya Nzambi mipuangane, yambuluisha, ne mudiyi ne bua kukumbana. (Mat. 5:17-19) Nunku pavua Yezu umona bafundi ne Bafalese bakonyangaja Mikenji ya Tatuende, bivua bimunyingalaja bikole be! Bavua batumikila ne mu katoba amue malu makese a mu Mikenji, bualu Yezu wakamba ne: “Nudi nufila tshia dikumi tshia tshisosa tshia mante ne tshisosa tshia anete ne tshia kimen.” Nunku tshilumbu tshivua bishi? Wakasakidila ne: ‘Kadi nudi nulengulula malu a mushinga mukole a mu Mikenji aa: buakane, luse ne ditabuja.’ (Mat. 23:23) Yezu uvua mushilangane ne Bafalese bavua badiangata bu bakane abu, bualu yeye uvua ujingulula tshivuabu bafundile Mikenji, mmumue ne: ngikadilu ya Nzambi ivua imuenekela mu mukenji wonso. w17.11 13 §1, 2

Bantu badi mua kutuambila ne: “Mbimpe kusanka paudi ne muoyo. Kusangila ne muntu udi kayi muena dibaka nebe nkubi ku tshinyi?” Lungenyi lua ne: muena Kristo udi ne bua kuanyisha dienda masandi ndubi. Bua tshinyi? Bualu Dîyi dia Nzambi ndikandike kuenda masandi. (1 Tes. 4:4-8) Yehowa udi ne bukenji bua kutuelela mikenji bualu yeye ke udi mutufuke. Mikenji ya Nzambi idi yanyishila anu mulume ne mukaji badi baselangane bua kusangila, ke muvuaye mulongolole. Nzambi mmutuelele mikenji bualu mmutunange. Mikenji yende idi ituambuluisha. Bena mu mêku badi batumikila mikenji ya Nzambi, badi banangangana, banemekangana, ne badi mu bukubi. Nzambi kena wanyisha dibenga kutumikila mikenji yende ku bukole to. (Eb. 13:4) Dîyi dia Nzambi didi ditulongesha mua kuepuka dienda masandi. Mushindu munene utudi mua kuenza nanku nkutabalela bitudi tutangila. (Mat. 5:28, 29) Nunku, muena Kristo udi ne bua kuepuka ditangila anyi dibala malu a porno, peshi diteleja mizike idi ne mêyi a busenji.—Ef. 5:3-5. w17.11 22 §9, 10

Katshia ku kale, batendeledi ba Yehowa ba lulamatu batu anu batumbisha Yehowa ne misambu. Tumanye ne: pavua bena Isalele benzela Yehowa mudimu ne lulamatu, kuimba misambu kuvua ne muaba munene mu ntendelelu wabu. Tshilejilu, pavua mukalenge Davidi ulongolola midimu ya ku ntempelo, wakateka bena Lewi 4000 bua kuimba misambu ya butumbi. Munkatshi muabu muvua bena Lewi 288 ‘bakadi bayishibue bua kuimbilabu Yehowa misambu, bonso bakadi ne tshimbidi tshiakane.’ (1 Kul. 23:5; 25:7) Dituku dia dibanjija dia ntempelo, mizike ne dimba misambu bivua ne muaba munene. Bible udi wamba ne: ‘Pakelabu mpungi kudi bena mpungi ne bimbi ba misambu diatshimue bua kutumbishabu ne bua kusakidilabu Yehowa, ne pakimbabu ne mpungi ne biamu ne biombelu bia kutumbishabu nabi Yehowa, butumbi bua Yehowa buakuwuja nzubu wa Nzambi tente.’ Ela meji muvua bualu ebu mua kuikala bukoleshe ditabuja dia bena Isalele!—2 Kul. 5:13, 14; 7:6. w17.11 4 §4, 5

Yezu uvua mumanye ne: malongesha ende avua mua kutapulula bantu, ne aba bavua bamulonda bavua ne bua kuikala ne dikima bua kutungunuka ne kumulonda pavuabu babaluisha. Tshipatshila tshia Yezu tshivua tshia kuyisha mukenji wa Nzambi wa bulelela, kadi katshivua tshia kunyanga malanda a bantu to. (Yone 18:37) Nansha nanku, kulamata malongesha a Kristo kuvua mua kukebela muntu ntatu padi mulunda wende anyi mulela wende ubenga bulelela. Bua bayidi bende kulejabu ne: mbakumbanyine Kristo, bavua ne bua kunanukila pavuabu babaseka anyi bababenga kudi bena mu mêku abu. Nansha nanku, mbapete bia bungi kupita bidibu bajimije. (Mâko 10:29, 30) Nansha padi balela betu batuluisha bua tulekele kutendelela Yehowa, tudi tutungunuka ne kubananga, kadi tudi ne bua kuvuluka ne: dinanga dietu bua Nzambi ne Kristo ke didi ne bua kuikala pa muaba wa kumpala. (Mat. 10:37) Tudi ne bua kumanya kabidi ne: Satana neakebe bua kubuelela pa dinanga ditudi nadi bua bena mu dîku dietu bua kunyanga muoyo wetu mutoke. w17.10 13 §3-6

Tshitupa etshi tshia tshikena kumona tshidi tshileja ne: Yehowa kakuanyisha bua bubi bua mushindu kayi wonso buikale munkatshi mua bantu bende to. Yehowa yeye mumone bualu kampanda bubi, udi ubumbusha ne lukasa luonso. (1 Kol. 5:13) Muanjelu udi utujadikila bualu ebu padiye ukanga tshibuikidiji tshia tshiamu tshia ntende ku mushiku wa tshipiminu ne lukasa luonso. Tshikena kumona etshi tshivua bushuwa tshikoleshe bena Isalele ba mu matuku a Zekâya, mmumue ne: tshibajadikile ne: Yehowa uvua ne bua kulama ntendelelu wende mukezuke kayi ne bubi. Kadi, tshikena kumona etshi tshivua kabidi tshivuluija bena Yuda bujitu buvuabu nabu bua kulama bukezuke bua ntendelelu wabu. Kabakuanyisha nansha kakese bua bubi kubuelabu munkatshi mua bantu ba Yehowa ne kushalamu to. Bu mukadibu batubueje mu bulongolodi bua Yehowa mutudi mu bukubi ne batutabalelamu bimpe, tudi ne bujitu bua kuambuluisha bua kulama bukezuke ebu. Tutuku ne muoyo wa kulama “nzubu” yetu mikezuke anyi? Bubi nansha bua mushindu kayi kabuena ne muaba mu mparadizu wetu wa mu nyuma to. w17.10 24 §14, 15; 25 §17, 18

Mikanda 39 ya kumpala ya mu Bible ivua mifunda kudi bena Isalele anyi bena Yuda. Bobu ke bantu ba kumpala bavuabu ‘bapeshe mêyi a tshijila a Nzambi.’ (Lomo 3:1, 2) Kadi mu bidimu bia 200 kumpala kua Yezu, bena Yuda ba bungi kabatshivua bumvua tshiena Ebelu to. Bua tshinyi? Bualu Alexandre Munene uvua mudiundishe bukalenge bua Grece pavuaye mutshimune tshitupa tshinene tshia buloba. (Dan. 8:5-7, 20, 21) Bu muvua bukalenge bua Grece bumuangalake bikole, tshiena Greke ke tshiakalua muakulu uvua bantu ba bungi bakula, too ne bena Yuda bavua bamuangalake mu tshitupa tshinene atshi. Kadi bu muvua bena Yuda ba bungi batuadije kuakula tshiena Greke, biakakolela ba bungi ba kudibu bua kumvua Mifundu ya mu tshiena Ebelu. Ntshinyi tshiakenzabu? Bakajikija dikudimuna mikanda ya mu Bible ivua mu tshiena Ebelu mu tshiena Greke mu bidimu bia 100 kumpala kua Yezu. Bakalua kubikila mikanda yonso eyi misangisha pamue ne: nkudimuinu wa Septante wa mu tshiena Greke. Nkudimuinu wa Septante ke nkudimuinu wa kumpala wa Mifundu yonso ivua mu tshiena Ebelu. w17.09 20 §7-9

Mfumuebe wa mudimu udi mua kutungunuka ne kukulomba bua kuenza mudimu mêba a pa mutu ku dilolo anyi ku ndekelu kua lumingu, tshikondo tshiutu muteke bua kuenza ntendelelu wa mu dîku, kuyisha, ne kubuela mu bisangilu. Bidi bikengela kuikala ne dikima bua kubenga dilomba dia nunku ne kuikala tshilejilu tshimpe kudi bana bebe. Tudi petu tuleja mutudi ne dikima patudi tuambuluisha bana betu balela bua kudifundila bipatshila bia mu nyuma ne kubikumbaja. Tshilejilu, bamue baledi badi mua kuelakana bua kukankamija muanabu bua kulua mpanda-njila, kuya kuyisha muaba udibu dijinga ne bamanyishi ba bungi, kuya ku Betele, anyi kuya kuibaka miaba yetu ya ntendelelu. Baledi badi mua kumvua buôwa bua ne: muanabu kakukumbana bua kubatabalela pakulakajabu to. Kadi baledi ba meji badi baleja dikima ne beyemena milayi ya Yehowa. (Mis. 37:25) Mushindu mukuabu uudi mua kuleja muudi ne dikima ne mueyemene Yehowa mpaudi wambuluisha muanebe bua kuenzaye pende bia muomumue.—1 Sam. 1:27, 28; 2 Tim. 3:14, 15. w17.09 30 §14, 15

Mmunyi muudi mua kuambuluisha bana bebe bua bikale ne didikanda? Baledi mbamanye ne: bana kabena mua kudipetela nkayabu ngikadilu eu to. Anu bu mudibi bua ngikadilu mikuabu yonso idi bana ne bua kulonga, baledi badi ne bua kuikala tshilejilu. (Ef. 6:4) Nunku wewe mumone ne: bana bebe badi ne lutatu lua kudikanda, diebeja biwikala wewe muine tshilejilu tshimpe. Kupepeji buenzeji buimpe buudi nabu paudi ne tshibidilu tshia kuyisha, kubuela mu bisangilu, ne kulombola ntendelelu wa mu dîku to. Kutshinyi bua kubenga kuenzela bana bebe malu kampanda adibu bakulomba biobi bikengela kubenga to! Yehowa uvua muelele Adama ne Eva mikalu ivua mua kubafikisha ku dimona bumfumu bua Yehowa mu mushindu muimpe. Bia muomumue, manyoka adi baledi bafila ne tshilejilu tshiabu bidi ne tshipatshila tshia kulongesha bana bua kuikala ne didikanda. Kunanga bumfumu bua Nzambi ne kunemeka mikenji yende ngamue malu a mushinga mukole audi mua kuambuluisha bana bebe bua kuenza.—Nsu. 1:5, 7, 8. w17.09 7 §17

Netutungunuke ne kupeta ntatu too ne padi bulongolodi bua Satana butua ku ndekelu. Tudi tupeta ntatu bu mudi: bulofu, masama makole, dikengeshibua, bipupu, dijimija dia bintu dikebesha kudi buenzavi anyi ntatu mikuabu. Bua tuetu kuambuluishangana patudi mu makenga anyi buluishi, tudi ne bua kuditeka pa muaba wa bakuabu ne muoyo mujima. Diditeka pa muaba wa bakuabu ne dinanga dionso neditusake bua kuenzelangana malu ne bulenga. (Ef. 4:32) Ngikadilu ya bumuntu bupiabupia eyi neituambuluishe bua kuidikija Nzambi ne kukolesha bakuabu. (2 Kol. 1:3, 4) Mmunyi mutudi mua kuleja ne: tudi tuangata bantu ba ku babende anyi badi kabayi ne kantu badi mu tshisumbu tshietu ne mushinga wa bungi? Tudi ne bua kudia bulunda ne bantu ba nunku ne kubambuluisha bua bamone ne: badi ne mushinga mu tshisumbu. (1 Kol. 12:22) Bantemu ba bungi badi badienzeja bua kulonga muakulu mukuabu bualu badi baditeka pa muaba wa bantu ba mu matunga makuabu badi balue mu ditunga diabu. (1 Kol. 9:23) Kuenza nunku nkubapeteshe masanka a bungi. w17.08 23-24 §7-9

Yonso wa kutudi udi ne bua kuitaba bua kuindila, mmumue ne: kuleja lungenyi lua lutulu. Kadi ntshinyi tshiatuambuluisha bua kuenza nunku? Lomba nyuma wa Nzambi mu disambila. Vuluka ne: lutulu nngikadilu wa dimuma dia nyuma. (Ef. 3:16; 6:18; 1 Tes. 5:17-19) Lomba Yehowa bua akuambuluishe bua unanukile ne lutulu. Vuluka kabidi tshivua tshiambuluishe Abalahama, Jozefe, ne Davidi bua kuindila ne lutulu dikumbana dia milayi ya Yehowa. Nditabuja diabu kudi Yehowa ne dieyemena diabu mu mushindu uvuaye ubenzela malu. Kabavua batuishile mêsu abu ku malu abu bobu ne ku majinga abu to. Patudi tuelangana meji a malu mimpe avuabu bapete, nebitukoleshe petu bua kuikala ne lungenyi lua kuindila. Nunku, nansha mutudi tutuilangana ne mateta ne ntatu, tudi badisuike bua kuleja “lungenyi lua dindila.” Eyowa, imue misangu tudi mua kudila ne: “Too ne dîba kayi, Yehowa?” (Yesh. 6:11) Kadi ku diambuluisha dia bukole bua nyuma muimpe wa Nzambi budi bukolesha, tudi mua kuambulula mêyi a Yelemiya adi mu mvese wa lelu. w17.08 7 §18-20

Patshivua Yezu muana, uvua ne bua kuikala unaya ne usanka pamue ne bakuabu. Anu mudi Dîyi dia Nzambi dileja, kudi “tshikondo tshia kuseka” ne “tshikondo tshia kuja maja.” (Muam. 3:4) Yezu uvua kabidi usemena pabuipi ne Yehowa pavuaye ulonga Mifundu. Pavuaye ne bidimu 12, balongeshi bavua ku ntempelo bakakema bua “lungenyi luende ne mandamuna avuaye ufila” bua malu a mu nyuma. (Luka 2:42, 46, 47) Pakakola Yezu, uvua ne disanka mu nsombelu wende. Tshivua tshimupetesha disanka ntshinyi? Tshilejilu, uvua mumanye ne: Nzambi uvua musue bua yeye “kuambila bapele lumu luimpe,” ne bua “kuambila bampofu bua kutabala kua mêsu abu.” (Luka 4:18) Pavua Yezu wenza tshivua Nzambi umulomba bua kuenza uvua umvua disanka. Uvua musue kulongesha bantu malu a Tatuende wa mu diulu. (Luka 10:21) Umue musangu Yezu mumane kuambila mukaji kampanda malu avua atangila ntendelelu mulelela, wakambila bayidi bende ne: “Biakudia bianyi nkuenza disua dia udi muntume ne kujikija mudimu wende.” (Yone 4:31-34) Yezu uvua ne disanka bualu uvua uleja muvuaye munange Nzambi ne bantu bakuabu. Wewe muenze bia muomumue, newikale pebe ne disanka. w17.07 23 §4, 5

Pavua Yezu muena luse pa buloba, wakaleja ku mêyi ne bienzedi biende muvuaye uditeka pa muaba wa bakuabu anu bu Yehowa. (Yone 5:19) Yehowa wakatuma Yezu pa buloba bua kusamba “mitshima ya badi batamba kunyingalala” ne “bonso badi mu madilu.” (Yesh. 61:1, 2; Luka 4:17-21) Ke bualu kayi uvua ne luse lua bungi, mumanye dikenga dia bantu ne ujinga ne muoyo mujima bua kubambuluisha. (Eb. 2:17) Bible udi utujadikila ne: “Yezu Kristo udi muomumue makelela, lelu ne bua kashidi.” (Eb. 13:8) Bu mudi “Mulombodi Munene udi ufikisha ku muoyo” mumanye bimpe tshidi kuikala ne kanyinganyinga, “mmukumbane bua kuambuluisha bantu badibu bateta.” (Bien. 3:15; Eb. 2:10, 18) Yezu utshidi anu umvua bibi padi bakuabu ne kanyinganyinga, mmumanye kanyinganyinga kabu, ne mmukumbane bua kubasamba “pa dîba dikumbane.”—Eb. 4:15, 16. w17.07 13 §6, 7; 14 §10

Satana ne bulongolodi buende badi anu bakeba kutekesha dinanga ditudi nadi bua biuma bia mu nyuma bidi Yehowa mutupeshe. Udi anu mua kutusesuisha ne mayele ende. Tuetu katuyi badimuke, neatukoke kudiye ku bintu bu mudi: ditulaya mudimu wa makuta a bungi, dilota bua kuikala ne biuma bia bungi, anyi dijinga dia kuleja bintu bia ku mubidi bitudi nabi. Mupostolo Yone udi utuvuluija ne: buloba ebu budi bupita, nansha dijinga diabu kabidi. (1 Yone 2:15-17) Ke bua tshinyi tudi ne bua kudienzeja bua kulama dinanga ne dianyisha dietu bua biuma bia mu nyuma ne kubikuba. Ikala mudiakaje bua kulekela tshintu tshionso tshidi mua kutekesha dinanga diebe dikole dia Bukalenge bua Nzambi. Tungunuka ne kuyisha ne tshisumi, kujimiji dinanga diebe dia mudimu udi usungila bantu nansha. Tungunuka ne kukeba ne muoyo mujima malu malelela a mu Bible. Paudi wenza nunku, neudibutshile ‘biuma mu diulu mudi muivi kayi mua kusemena pabuipi anyi tshishi katshiyi mua kudia.’—Luka 12:33. w17.06 13 §19, 20

Bukokeshi bua Yehowa ki mbua tshikisu to. Kadi bantu badi bamutumikila badi badiumvua ne budikadidi ne badi ne disanka. (2 Kol. 3:17) Davidi wakamba bua Yehowa ne: “Bunene ne butumbi bidi kumpala kuende; bukole ne disanka bidi mu muaba wende wa kusombela.” (1 Kul. 16:7, 27) Mufundi wa Misambu Etana wakafunda ne: “Ba diakalenga mbantu badi bamanye lubila lua disanka. Yehowa wetu, badi bendela mu butoke bua mpala webe. Badi basankila mu dîna diebe dituku dijima, ne badi batumbila mu buakane buebe.” (Mis. 89:15, 16) Patudi tuelela buimpe bua Yehowa meji bikole, tudi tutuishibua bikole ne: bukokeshi buende ke butambe buimpe. Ntshinyi tshidi mua kuenzeka tuetu katuyi benze nanku? Bu mudi Yehowa muikale Mufuki wetu wa dinanga, mmumanye bimpe menemene tshiatupetesha disanka, ne udi utupesha kupita ne bitudi nabi dijinga. Bualu buonso budiye utulomba bua kuenza budi bua diakalenga dietu ne budi butupetesha disanka. Netudipete nansha biobi bitulomba bua kudipangisha amue malu.—Yesh. 48:17. w17.06 29 §10, 11

Tuangate tshilejilu tshia muanetu kampanda wa bakaji wa mu ditunga dia Angleterre uvua anu ujinga bua kupeta muana. Pakajingululaye ne: kavua mua kupeta muana mu ndongoluelu wa malu eu, malu onso akamutonda. Pashishe yeye ne bayende bakangata dipangadika dia kudiila muana buledi. Kadi wakashala ne dibungama bua tshikondo kampanda. Wakamba ne: “Mvua mumanye ne: kudiila muana buledi kakuvua menemene muomumue ne kulela webe muana to.” Bible udi wamba ne: mukaji “nealamibue bua dilela dia bana.” (1 Tim. 2:15) Bualu ebu kabuena bumvuija ne: neapete muoyo wa tshiendelele anu bualu udi ne bana to. Kadi bilondeshile mvese eu, bu mudi mamu ne mudimu wa bungi wa kutabalela bana bende ne nzubu wende udi mua kuepuka malu bu mudi: bijanu anyi dibuelakana mu malu adi kaayi mamutangile.—1 Tim. 5:13. w17.06 5-6 §6-8

Elihu uvua usua kuamba ne: madikolela etu bua kuenzela Nzambi mudimu kaena ne mushinga anyi? Tòo. Uvua wamba ne: Yehowa kena anu dijinga ne: tumutendelela to, yeye mmukumbane mu bionso. Kakuena tshintu nansha tshimue tshitudi mua kuenza tshiamuvuije mubanji anyi ne bukole to. Mu bulelela, ngikadilu ne bipedi bionso bimpe bidi bifumina kudi Nzambi ne udi umona mutudi tukuata nabi mudimu. Patudi tuleja dinanga dia lulamatu kudi bantu badi batendelela Yehowa, udi umona anu bu ne: yeye ke utudi tuenzela bienzedi bia lulamatu abi. Tudi tubala mu Nsumuinu 19:17 ne: ‘Udi ufuila mupele luse udi usombesha Yehowa bintu; yeye neamuenzele bimpe ku buimpe buakumuenzelaye.’ Musangu wonso utudi tuleja bakuabu luse, Yehowa udi umona. Nansha mudi Yehowa Mufuki wa diulu ne buloba, udi umona bionso bitudi tuenza ebi bu tudi tumusombesha yeye bintu, yeye pende neatufute bintu bimpe bia bungi. Yezu Muana wa Nzambi wakajadika bualu ebu.—Luka 14:13, 14. w17.04 29 §3, 4

Ntshinyi tshikuabu tshiatuambuluisha bua kukolesha dinanga dietu bua bulelela bua mu Bible? Tudi ne bua kuikala ne tshibidilu tshia kubuela mu bisangilu bietu bionso mudi Yehowa utulongeshila. Dilonga dia Bible ku diambuluisha dia Tshibumba tshia Nsentedi lumingu luonso ke umue wa ku mishindu minene itudi tulongeshibua. Tuetu basue bua tshisangilu etshi tshituambuluishe bikole, tudi ne bua kudilongolola kumpala kua dîba. Tshilejilu, tudi mua kubala mvese yonso idibu bafile. Lelu, ba bungi badi mua kubala Tshibumba tshia Nsentedi anyi kutshiambuila mu tuamu tuabu bipepele bualu tshidiku mu miakulu ya bungi mu site wetu wa jw.org ne mu programe wa JW Library. Imue mishindu ya bibejibeji bia mu tuamu idi yambuluisha bua kupeta mvese idibu bafile ne lukasa. Kadi tudi tulonga tshiena-bualu tshionso patudi tubala mvese ne ntema ne tuelelanganapu meji bikole, nunku dinanga dietu bua bulelela bua mu Bible didi dikola. w17.05 20 §14

Tuetu bamane kutambula, tudi ne bua kutungunuka ne kuenza malu mu diumvuangana ne mutshipu wetu mu mudimu wa Nzambi. Patukadi benze mutshipu wa kuenzela Yehowa mudimu, katuena ne bua kupingana tshianyima to. Muntu udi ulekela kuenzela Yehowa mudimu anyi ulekela nsombelu wa buena Kristo kena ne bua kuamba pashishe ne: kavua muanji kuikala pabuipi bua kudilambula kudi Nzambi, anyi ne: batismo wende kavua mukumbane to. Muntu udi mudilambule kudi Yehowa yeye muenze mpekatu munene, udi udiambuila bujitu buende kumpala kua Yehowa ne kua tshisumbu. Katuena basue musangu nansha umue kuikala bu bantu bavua Yezu muambe ne: “Udi mulekele dinanga diuvua nadi kumpala” to. Kadi tudi basue bua ambe buetu tuetu ne: “Ndi mumanye bienzedi biebe ne dinanga diebe ne ditabuja diebe ne mudimu webe ne dinanukila diebe; ndi mumanye kabidi ne: bienzedi biebe bia mpindieu mbipite bia kale.” (Buak. 2:4, 19) Tutungunukayi ne kusankisha Yehowa, tuenza malu mu diumvuangana ne didilambula dietu. w17.04 6-7 §12, 13

“Mulumbuluishi wa buloba buonso katu wenza bimpe anyi?” (Gen. 18:25) Abalahama wakela lukonko elu bua kuleja muvuaye mutuishibue ne: Yehowa uvua ne bua kulumbuluisha tshimenga tshia Sodoma ne tshia Amola ne kulumbulula kuakane. Uvua mutuishibue ne: Yehowa kavua ne “bua kushipa bantu bakane ne bantu babi popamue” nansha. Ke tshiakasaka Abalahama bua kuamba ne: ‘bualu ebu kabuikadi kuudi’ to. Abalahama uvua mutuishibue ne: Yehowa utu anu wenza malu makane bualu Udi tshilejilu tshitambe buimpe tshia buakane ne tshia kulumbulula kuakane. Bulelela, muaku “buakane” ne tshiambilu tshia ne: “kulumbulula kuakane” bitu misangu ya bungi bienda pamue mu mifundu ya tshiena Ebelu bualu bidi ne diumvuija dia muomumue. Nunku bu mudi mikenji ya Yehowa miakane misangu yonso, nealumbuluishe anu malu bimpe menemene. Bible udi wamba ne: “Yeye udi unanga buakane ne kulumbulula kuakane.”—Mis. 33:5. w17.04 18 §1, 2

Baledi wetu, tshilejilu tshienu tshidi ne mushinga bua kusaka bana benu mu njila wa muoyo wa kashidi. Padi bana benu banumona ‘nukeba tshia kumpala Bukalenge,’ badi balonga mua kueyemena Yehowa bua majinga abu a ku dituku ne ku dituku. (Mat. 6:33, 34) Enza bua mudimu uudi wenzela Yehowa wikale pa muaba wa kumpala pamutu pa kuditua anu mu dikeba bintu bia ku mubidi. Ikala ne nsombelu mupepele ne epuka mabanza. Keba “biuma mu diulu,” mmumue ne: keba dianyishibua dia Yehowa pamutu pa makuta anyi “butumbi bua kudi bantu.” (Mâko 10:21, 22; Yone 12:43) Kuikadi ne bia bungi bia kuenza bikupangisha too ne dîba dia kusomba ne bana bebe. Ubambile ne: udi usanka bikole padibu bapangadija bua kuteka Yehowa pa muaba wa kumpala pamutu pa kudikebelabu lumu anyi makuta, anyi kukukebelabi. Epuka mmuenenu mubi wa ne: bana badi ne bua kupetesha baledi babu nsombelu mutambe buimpe. Vuluka ne: “ki mbana batu balamina baledi babu bintu, kadi baledi ke batu balamina bana babu bintu.”—2 Kol. 12:14. w17.05 8-9 §3, 4