Ngondo wa 11

Didibela didi kabidi diumvuija kuditangila bimpe bua kuakaja bienzedi bietu ne ngelelu wetu wa meji. Katuena baledibue ne meji a kudibela to. Tudi ne bua kulonga mua kudibela. Padi baledi batungunuka ne kukolesha bana babu ne lutulu “ne mibelu ne didimuija bia Yehowa,” badi kabidi babambuluisha bua bikale badibela ne bikale ne meji. (Ef. 6:4) Bualu ebu budi kabidi butangila bantu badi balonga mua kumanya Yehowa pakadibu bakulumpe. Eyowa, badi mua kuikala bakadi bamanye mua kudibela ndambu. Kadi mu ngumvuilu wa mu nyuma, muyidi mupiamupia ki mmuanji kushindama to. Nansha nanku, padiye ulonga mua kuvuala “bumuntu bupiabupia” bua buena bua Kristo, udi wenda ukola ku kakese ku kakese too ne ku dishindama. (Ef. 4:23, 24) Kudibela kudi ne mushinga mukole bua tuetu kukola nanku. w18.03 29 §3, 4

Tudi tuakidila bonso badi babuela mu bisangilu bietu bualu mbenyi netu balue bua kudia biakudia bia mu nyuma. Yehowa ne bulongolodi buende ke badi batuakidila. (Lomo 15:7) Padi bantu bapiabapia babuela mu bisangilu, tuetu petu tudi tulua bakididianganyi. Kuenaku mua kuikala wa kumpala bua kubakidila nansha bobu bavuale mushindu kayi anyi bikale ne tshimuenekelu kayi anyi? (Yak. 2:1-4) Wewe mumone muenyi muikale pa nkayende, kuenaku mua kumulomba bua nusombe nende anyi? Udi mua kusanka bikole wewe umuambuluisha bua kulonda bisangilu ne pamuapa bua kupeta mvese mu Bible. Eu mmushindu muimpe wa ‘kuikala ne tshibidilu tshia kuakidila benyi.’ Patu bangamba-malu ba mu bisumbu bikuabu ne batangidi ba bijengu, ne bimue bikondo, baleji mpala ba Betele balua kutukumbula, tutu tupeta mpunga ya kuleja mutudi bakididi ba benyi. (3 Yone 5-8) Kubapeshaku kantu ka kusanguluja naku mukana anyi tshiakudia tshia bujitu mmushindu muimpe wa kubakidila. Kuenaku mua kubakidila pebe anyi? w18.03 15 §5, 7

Tuangate tshilejilu tshia muena Yuda uvua ukengesha bena Kristo. Uvua muledibue mu tshisamba tshikavua tshidilambule kudi Nzambi. Kadi bena Yuda bakajimija malanda a pa buawu avuabu nawu ne Yehowa. Muntu au uvua ulonda bilele bia buena Yuda ne tshisumi tshionso, kadi wakalua kulonga mushindu muimpe wa kutendelela Nzambi. Yezu ukavua mubishibue ne mutumbishibue wakadiyishilaye nkayende. Muntu au wakenza tshinyi? Wakitaba bua Anania ukavua muyidi wa Kristo amuambuluishe. Bible udi utuambila bua muntu au ne: “Pashishe wakajuka, kubatijibuaye.” (Bien. 9:17, 18; Gal. 1:14) Udi bushuwa mumanye muena Yuda au, ke yeye wakalua kumanyika bu mupostolo Paulo. Mona ne: diakamue pavua Paulo mujingulule ne: Nzambi uvua wenza mudimu ne Yezu bua kukumbaja malu adiye mulongolole, wakabatijibua kayi uladikija malu to. (Bien. 22:12-16) Ke mudibi kabidi bua balongi ba Bible lelu, bana anyi bakole. w18.03 5-6 §9-11

Yakoba wakapeta ntatu mu nsombelu wende. Uvua ne bua kuakamangana ne lutatu lua kudi muanabu Esau uvua mudifile ku malu a mubidi uvua ukeba kumushipa. Kusakidila apu, tatuende muenu uvua ne dishima ne uvua mutete kumumuna misangu ne misangu. Kadi nansha muvua Yakoba munyunguluka kudi bantu ‘ba mu mubidi,’ yeye uvua anu muntu wa mu nyuma. (1 Kol. 2:14-16) Uvua ne ditabuja mu malu avua Nzambi mulaye Abalahama ne uvua mudifile bua kutabalela dîku diende divua mua kuikala ne mudimu munene mu dikumbana dia disua dia Yehowa. (Gen. 28:10-15) Mêyi ne bienzedi bia Yakoba bidi bileja muvuaye mumanye mikenji ya Nzambi ne disua diende. Tshilejilu, pavuaye mumone ne: Esau uvua ukeba kumuenzela bibi, wakambila Nzambi ne: “Ndi nkulomba ne: umpandishe koku . . . Wewe wakamba ne: ‘Bushuwa nenkuenzele malu mimpe, nemvuije bana bebe bu nsenga ya ku mbuu.’” (Gen. 32:6-12) Bidi bimueneka ne: uvua ne ditabuja mu malu avua Yehowa mumulaye ne uvua musue kuenza malu mu diumvuangana ne disua dia Nzambi ne tshivuaye mulongolole. w18.02 20 §9, 10

Nsombelu wa Yobo uvua mushintulukangane bikole. Kumpala kua kupetaye mateta, uvua “muntu munene ku bantu bonso bavua ku Est.” (Yobo 1:3) Uvua mubanji, muntu muende lumu ne wa kunemekibua. (Yobo 29:7-16) Nansha nanku, kavua udimona mupite bakuabu anyi umona ne: kavua dijinga ne Nzambi to. Ke bualu kayi, Yehowa wakamubikila ne: “muena mudimu wanyi.” Satana wakatumina Yobo ntatu mibi milondangane, umufikisha ku diela meji ne: Nzambi ke uvua mumukebelayi. (Yobo 1:13-21) Pashishe balunda ba mafi basatu ba Yobo bakalua kumuamba mêyi mabi, bamba ne: Nzambi uvua umufuta bua bienzedi biende. (Yobo 2:11; 22:1, 5-10) Kadi Yobo wakalama muoyo wende mutoke. Pakajika ntatu, Yehowa wakapesha Yobo bintu bipite bivuaye nabi kumpala kua ntatu yende misangu ibidi, kumutentekelaye ne bidimu bikuabu 140. (Yak. 5:11) Mu tshikondo atshi, wakashala anu mulamate Yehowa. w18.02 6 §16; 7 §18

Bantu badi ne ngikadilu eyi batu basue bua bakuabu bikale babanyisha ne babatumbisha. Mumanyi mukuabu wakafunda bua muntu udi ne lutambishi lua menemene ne: “Mu muoyo wende mudi katshioshelu kudiye udinamina.” Bamue badi bamba ne: lutambishi lunekesha ndubi bikole lutondesha too ne bena lutambishi bine padibu balumona kudi bakuabu. Bushuwa Yehowa katu musue lutambishi to. Mmukine “mêsu a didibandisha.” (Nsu. 6:16, 17) Lutambishi ludi lupangisha muntu bua kudia malanda ne Nzambi. (Mis. 10:4) Nngikadilu wa Diabolo. (1 Tim. 3:6) Diakabi, too ne bamue bantu bavua balamate Nzambi bakapeta lutambishi. Uziya, mukalenge wa Yuda, uvua mulamate Nzambi bidimu bia bungi. Kadi Bible udi wamba ne: “Diakamue pakaluaye ne bukole, muoyo wende wakadibandisha kumufikishabi ku dibutuka, ne wakapanga lulamatu kudi Yehowa Nzambi wende pa kubuela mu ntempelo wa Yehowa bua kuosha musenga wa manananshi.” Panyima pa matuku, didibandisha diakakuata mukalenge Hezikiya pende, nansha muvuabi anu bua tshitupa tshîpi.—2 Kul. 26:16; 32:25, 26. w18.01 28 §4, 5

Tshilumbu tshia difila bintu bietu ntshileja patoke mu Bible. Imue misangu, bantu ba Yehowa bakafila bintu biabu bua malu masunguluke. (Ekes. 35:5; 2 Bak. 12:4, 5; 1 Kul. 29:5-9) Pavuabu balombe bena Kristo ba kumpala bua kutumina bena Kristo nabu bintu biabu bua tshiyole tshia nzala tshivuaku, ‘bakadisuika, muntu ne muntu bilondeshile dimona diende, bua kutumina bana babu bavua basombele mu Yudaya diambuluisha.’ (Bien. 11:27-30) Bushuwa, bintu bivuabu bafila ebi bavua babipeta mu mishindu mishilashilangane. Mu bidimu lukama bia kumpala, bamue bena Kristo bavua bapana bintu biabu bu mudi madimi anyi nzubu, batuadila bapostolo makuta. Bapostolo bavua baabanyina bantu bavua bakengela bintu. (Bien. 4:34, 35) Bakuabu bavua bateka makuta ku luseke ne bafila mapa pa tshibidilu bua kutua mudimu wa Nzambi mpanda. Nunku, bantu ba nsombelu yonso, mmumue ne: babanji ba menemene too ne bapele ba menemene, bavua bafila bintu.—Luka 21:1-4. w18.01 18 §7; 19 §9

Nansha tuetu mua kuikala ne bipedi bia mushindu kayi, katuena mua kukokesha bua kuenza malu onso ne bukole buetu to. Atshi ntshitudi tuetu bonso ne bua kumanya. Nansha muvua mupostolo Paulo mua kuenza malu a bungi, kavua anu mua kuenza malu onso avuaye musue kuenza to. Pakakuatshilaye Nzambi lutatu luende, Nzambi wakamuambila ne: “Bukole buanyi budi buenda buvuijibua bupuangane mu butekete.” Wakumvua tshivua Nzambi mumuambile. Ke bualu kayi wakamba ne: “Pandi ne butekete ke pandi ne bukole.” (2 Kol. 12:7-10) Uvua musue kuamba tshinyi? Paulo wakajingulula ne: kavua mua kuenza malu a bungi kayi ne diambuluisha dia kudi Nzambi to. Nyuma muimpe wa Nzambi uvua mua kupesha Paulo bukole buvuaye mupangile. Uvua kabidi mua kumupesha bukole bua kuenza malu avuaye kayi mua kuenza ku bukole buende. Ke mudibi kabidi buetu tuetu. Padi Yehowa utupesha nyuma muimpe, tudi tupeta bushuwa bukole. w18.01 9 §8, 9

Padi muanebe uleja dijinga dia kubatijibua, ukonkonone malu adi mu mikanda ne mu bintu bidi bulongolodi bua Yehowa bupatuile baledi. Kuenza nunku nekukuambuluishe bua kudilongolola bua kuleja muanebe mudi kuditshipa kudi Yehowa ne kubatijibua kupetesha masanka ne mudiku kakuyi bualu bua bilele to. Bu muudi muledi, udi ne bujitu bunene ne diakalenga dia kukolesha bana bebe “ne mibelu ne didimuija bia Yehowa.” (Ef. 6:4) Kuenza nanku kakuena kulomba anu kubalongesha tshidi Bible wamba patupu to, kadi kudi kulomba kabidi kubambuluisha bua batuishibue bua malu adibu balonga. Eyowa, badi dijinga ne dituishibua dikole didi mua kubasaka bua kuditshipa nkayabu kudi Yehowa bua kumuenzela mudimu ne muoyo mujima. Muledi wetu, Dîyi dia Yehowa ne nyuma wende ne bionso biudi wenza biambuluishe bana bebe bua kulua ‘bena meji bua kupeta lupandu.’ w17.12 22 §17, 19

Danyele ukavua ne bidimu bitue ku 100 ne ukavua mikolo ku tshina. Danyele uvua mua kupetulula kabidi ne muoyo anyi? Eyowa! Ku ndekelu kua mukanda wa Danyele, tudi tubala muvua Nzambi mumujadikile ne: “Wewe, ndaku too ne ku ndekelu. Newikishe.” Danyele ukavua mununu eu uvua mumanye ne: bafue mbikishe, kabayi ne “kulongolola kua malu anyi dimanya peshi meji mu Lukita.” Danyele ukavua pa kuyamu. (Muam. 9:10) Kadi atshi katshivua nshikidilu wende to, bualu bavua bamulaye bualu buimpe matuku atshivua alua. Muanjelu wakatungunuka, kuambilaye muprofete Danyele mêyi a mvese wa lelu aa. Kavua mumuambile tshikondo anyi lupolu luvua mua kupita to. Danyele uvua ne bua kufua, pashishe kuikisha. Kadi pavua muanjelu muambe ne: ‘uvua ne bua kujuka bua kuangata tshiende tshitupa’ mu matuku atshivua alua, Danyele wakamanya bimpe ne: uvua ne bua kubishibua ku lufu matuku atshivua alua, mmumue ne: matuku a bungi yeye mumane kufua. w17.12 7 §17, 18

Yehowa uvua mutumine bakulu ba mu Isalele dîyi bua kuidikija mikenji yende mitumbuke ya buakane. Tshia kumpala, bakulu bavua ne bua kuikala ne bijadiki bionso. Pashishe, bavua ne bua kukonkonona bimpe bimpe meji a muntu uvua mushipangane, mmuenenu wende wa malu, ne bikadilu bivuaye nabi kumpala, bua kumanya ni bivua bikengela kumufuila luse. Bua bakulu kulumbuluisha ne buakane bua Nzambi, bavua ne bua kumanya bikala muntu au uvua mushipangane bua “tshiji” anyi bua lukinu ne meji mabi. (Nom. 35:20-24) Kuoku bajadiki ba bualu abu, bivua bikengela, bobu bakese bikale babidi bua kushisha kukosela mushipianganyi tshibawu tshia lufu. Nunku, bakulu bobu bamane kuikala ne bijadiki bionso bia tshilumbu, bavua ne bua kutangila muntu, kabayi bimanyina pa tshivuaye muenze. Bavua ne bua kuikala ne lungenyi lutue, mmumue ne: bukokeshi bua kubenga kuimanyina pa tshidi tshimueneka ku mêsu, kadi kuya mu ndondo wa bualu. Kadi bavua nangananga dijinga ne nyuma wa Yehowa uvua ne bua kubambuluisha bua kuleja lungenyi lutue, luse, ne buakane biende.—Ekes. 34:6, 7. w17.11 16 §13, 14

Patuakatuadija kudisangisha ne bantu ba Nzambi, tuakapeta amue malu malelela a mushinga mukole. Tuakalonga ne: Yehowa ke Mufuki wetu udi mutupeshe muoyo, kabidi ne: udi ne tshidiye mulongoluele bantu. Tuakalonga kabidi ne: dinanga divua disake Nzambi bua kufila mulambu udi upikula wa Muanende bua kutupikula ku mpekatu ne ku lufu. Tuakalonga pashishe ne: Bukalenge buende nebujikije makenga onso, kabidi ne: tudi mua kushala ne muoyo kashidi pa buloba mu ditalala ne disanka anu mu bukokeshi bua Bukalenge ebu. (Yone 3:16; Buak. 4:11; 21:3, 4) Imue misangu, badi mua kushintulula ngumvuilu wa mulayi kampanda wa mu Bible anyi wa mvese kansanga. Padibi bienzeka nanku, mbimpe kukeba dîba dia kulonga malu adibu bashintulule aa ne kuelelanganapu meji. (Bien. 17:11) Katuena anu ne bua kukeba bua kumvua bimpe malu mapiamapia adibu bakaje to, kadi tumvue kabidi dishilangana dinene didi pankatshi pa ngumvuilu wa kale ne mupiamupia. Tuetu tuenza nunku tudi tuela bulelela bupiabupia mu tshibutshilu tshietu. w17.06 12-13 §15, 16

Bidi nangananga ne mushinga bua tuetu kuikala badimuke patudi kumpala kua nsombelu idi mua kutufikisha ku dishipa mikenji ya Yehowa. Tshilejilu, mbimpe bua bantu batshidi batuadija kutantshilangana bua dibaka badielele mikalu bua malu bu mudi: dilengangana pambidi, dituangana mishiku, ne bua dikala pa nkayabu. (Nsu. 22:3) Njiwu mikuabu idi mua kumueneka padi muena Kristo mu luendu lua malu a midimu mushiye dîku diende, anyi padiye wenza mudimu ne muntu udi kayi mukaji anyi mulume nende. (Nsu. 2:10-12, 16) Tudi mua kudisangana kabidi mu njiwu minene patudi babungame anyi tudimona nkaya. Tudi mene mua kudiumvua bashikile, bitufikisha ku ditaba tshionso tshidi muntu kayi yonso mua kutuambila. Wewe mudiumvue mushindu eu, sambila Yehowa ne lomba diambuluisha kudi bantu bende.—Mis. 34:18; Nsu. 13:20. w17.11 26 §4, 5

Mu Isalele wa kale, Yehowa kavua ulengulula tshilumbu tshia diela mashi a muntu panshi to. Bantu bavua bashipangana ku bukole bavua pabu babashipa kudi mulela wa balume wa muntu uvuabu bashipe, uvuabu babikila ne: “musombuedi wa mashi.” (Nom. 35:19) Tshienzedi etshi tshivua tshisombuela mashi a muntu avua kaayi ne bualu avua maye panshi. Dishipa mushipianganyi diakamue divua dienza bua Buloba Bulaya kabunyanguki to, bualu Yehowa uvua mutume dîyi ne: ‘Kanunyangi buloba bunudi bashikamamu; bualu diela mashi a muntu panshi didi dinyanga buloba.’ (Nom. 35:33, 34) Kadi mmunyi muvua bena Isalele bapita ne tshilumbu tshia muntu uvua wela mashi a mukuabu panshi ku mpukapuka? Nansha muvuabi bienzeka ku mpukapuka, muntu uvua ushipa mukuabu uvua anu ne dipila bua diela mashi avua kaayi ne bualu panshi. (Gen. 9:5) Kadi diakalenga, bavua bamuanyishile bua kunyema musombuedi wa mashi ne kuya mu umue wa ku misoko isambombo ya kunyemena. Uvua ushala mu bukubi mu musoko amu. Muntu eu uvua ne bua kushalamu too ne pavua muakuidi munene ufua.—Nom. 35:15, 28. w17.11 9 §3-5

Muanetu wa bakaji kampanda wa mu Australie udi ulonda ne: “Tatuanyi muenu uvua uluisha bulelela bikole. Kumpala kua meme ne bayanyi kumubikila bua kumanya mudiye, tuvua tulomba Yehowa bua atuambuluishe bua kubenga kumuandamuna ne tshiji padiye wakula ne tshiji. Bua kuepuka miyuki mile ivua mua kutufikisha ku dikokangana bua malu a ntendelelu, tuvua badikosele dîba dia kusomba nende patuvua tuya kumumona.” Bilumbu bidi mua kukufikisha ku didiumvua mupile, nangananga biwikale munange balela bebe bikole ne udienzeja bua kubasankisha. Kadi dienzeja bua kuteka lulamatu luebe kudi Yehowa kumpala kua dinanga diudi nadi bua bena mu dîku diebe. Kuenza nunku kudi bushuwa mua kuambuluisha balela bebe bua kumona ne: kutumikila malu malelela a mu Bible ntshilumbu tshia lufu anyi muoyo. Vuluka ne: kuena mua kuenzeja bantu bakuabu bua kuitaba bulelela to. Kadi enza bua bamuenene kuudi malu mimpe adi muntu upeta padiye ulonda njila ya Yehowa. Nzambi wetu wa dinanga udi ubapesha mpunga wa kusungula njila walondabu anu mudiye mutupeshe petu.—Yesh. 48:17, 18. w17.10 15-16 §15, 16

Dinanga dietu kadiena ne bua kuikala anu dia mukana to, nangananga padibi bikengela kuenza bualu kampanda. Tshilejilu, padi muena Kristo netu mupangile bintu bia mushinga bu mudi biakudia ne bilamba, kena anu dijinga ne mêyi etu mimpe to. (Yak. 2:15, 16) Bia muomumue, dinanga ditudi banange Yehowa ne bantu netu didi ditusaka bua kulomba Nzambi bua ‘atume bena mudimu mu mudimu wa dinowa’ ne didi ditusaka kabidi bua kuyisha bikole. (Mat. 9:38) Mupostolo Yone wakafunda ne: tudi ne bua kunangangana “mu bienzedi ne mu bulelela.” Nunku dinanga dietu didi ne bua kuikala “kadiyi ne lubombo.” (Lomo 12:9; 2 Kol. 6:6) Ebi bidi biumvuija ne: katuena mua kuleja dinanga dilelela eku bikale tshintu tshikuabu munda, bienze anu bu badi bavuale buadi anyi tshifuebe to. Tudi mua kudiebeja ne: ‘Dinanga didi ne lubombo ndinanga anyi?’ Ki ndinanga menemene to, ntshidingishilu patupu. w17.10 8 §5, 6

Bua Dîyi dia Nzambi kutuambuluishadi, tudi ne bua kuikala ne tshibidilu tshia kudibala, kudibala dituku dionso kuoku mushindu. Bushuwa, ba bungi ba kutudi badi ne bia bungi bia kuenza. Nansha nanku, katuena ne bua kulekela tshintu nansha tshimue, nansha majitu etu manene, tshitupangisha bua kuikala ne tshibidilu tshia kubala Bible to. (Ef. 5:15, 16) Bantu ba Yehowa ba bungi mbakebe mishindu ya kupeta dîba dia kubala Bible dituku dionso, pamuapa mu dinda menemene, ku dilolo anyi munda munya. Badi badiumvua anu bu mufundi wa misambu wakafunda ne: ‘Mona mundi munange mikenji yebe! Ndi ngelangana meji bualu buayi dinda too ne ku dilolo.’ (Mis. 119:97) Pa kumbusha kubala Bible, mbimpe kuelangana meji a malu atudi tubala. (Mis. 1:1-3) Tuetu benze nunku, nebituambuluishe bua kutumikila bimpe meji adi mu Bible mu nsombelu wetu. Nansha tuetu tubadila Dîyi dia Nzambi pa mabeji anyi mu tshiamu, tshipatshila tshietu tshidi ne bua kuikala tshia kudibueja mu mioyo yetu. w17.09 24 §4, 5

Kabitu bikengela kuleja luse mu nsombelu yonso to. Tshilejilu, mukalenge Shaula wakabenga kutumikila pavuaye muleje tshivuaye umona bu diumvuilangana luse. Wakashiya Agaga muena lukuna wa bantu ba Nzambi ne muoyo. Bua bualu ebu Yehowa wakabenga Shaula bua kikadi kabidi mukalenge wa Isalele to. (1 Sam. 15:3, 9, 15, NWT; dim.) Bushuwa Yehowa mMulumbuluishi muakane. Udi mua kubala mu mioyo ya bantu, ne mmumanye padibi bikengela kulejangana luse. (Muad. 2:17; Yeh. 5:11) Tshikondo tshidi tshilua tshialumbuluisha Yehowa bantu bonso badi babenga kumutumikila. (2 Tes. 1:6-10) Katshiakuikala tshikondo tshia yeye kuleja bantu badiye wangata ne: mbantu babi luse to. Kadi kubashipa nekuikale mushindu muimpe udi Nzambi uleja bantu bakane bakubaye luse. Bidi bimueneka patoke ne: tuetu katuena ne bukenji bua kukosa ne: aba ke bafua anyi ne: aba ke bashala ne muoyo to. Kadi tuetu bonso tudi ne bua kuenza tshionso tshidi tshikengela ku mpindieu bua kuambuluisha bantu. w17.09 10-11 §10-12

Didikanda nngikadilu udi Nzambi utuambuluisha bua kupeta. Yehowa utu uleja didikanda mu mushindu mupuangane. Kadi bantu mbapange bupuangane, ne badi baluangana bua kuikala ne didikanda. Bushuwa, bilumbu bia bungi bidi bantu bapeta lelu bidi bitamba kufumina ku dipanga didikanda. Dipangila ngikadilu eu didi mua kufikisha muntu ku diladikija malu ne ku dibenga kupatula bipeta bimpe mu kalasa anyi ku mudimu. Didi kabidi mua kufikisha muntu ku buakulavi, dikuatshika dia maluvu, tshikisu, dishipa dia dibaka, dibuela mabanza tshianana tshianana, dilua mupika wa tshintu kampanda, diedibua mu buloko, tunyinganyinga tukole, masama a mu bilamba, mafu a panshi ne malu makuabu. (Mis. 34:11-14) Lutatu lua dipangila didikanda ludi luenda luvula. Bavua benze makebulula bua tshilumbu tshia didikanda mu bidimu bia 1940, kadi makebulula adibu benze matuku mashale aa mmaleje ne: bantu kabena batamba kudikanda to. Bualu ebu kabuena bukemesha balongi ba Dîyi dia Nzambi to, bualu Bible ukavua muleje ne: tshimue tshimanyinu tshidi tshileja ne: tudi mu “matuku a ku nshikidilu” tshidi ne: bantu bavua ne bua kuikala “kabayi badikanda.”—2 Tim. 3:1-3. w17.09 3 §1, 2

Patudi ne “ditalala dia Nzambi,” mioyo yetu ne lungenyi luetu mbikishe. Tudi bamanye ne: Yehowa udi ututabalela ne mmusue bua tuikale ne diakalenga. (1 Pet. 5:10) Dimanya edi didi ditulama bua tunyinganyinga anyi ditekeshibua mu mikolo kabitupitshi bukole. Mu katupa kîpi emu, bantu nebatuilangane ne dikenga dinene ditu katshia kadiyi dianji kuenzeka pa buloba apa. (Mat. 24:21, 22) Katuena bamanye tshikala dikenga edi mua kutuenzela muntu ne muntu pa nkayende to. Kadi katuena ne bua kulekela kanyinganyinga katupita bukole to. Nansha mutudi katuyi bamanye malu onso enza Yehowa, tudi bamanye Nzambi wetu bimpe. Malu avuaye muenze kale adi atuleja ne: nansha bualu kayi mua kuenzeka, Yehowa neakumbaje anu tshidiye mulongolole, ne imue misangu utshikumbaja mu mushindu uvua bantu kabayi batekemene. Musangu wonso udi Yehowa utuenzela bualu butuvua katuyi batekemene, tudi tumvua “ditalala dia Nzambi didi dipite dijingulula dionso dia malu” mu mushindu mukuabu. w17.08 12 §16, 17

“Musangu bule munyi?” Elu ndukonko luvua baprofete ba lulamatu, Yeshaya ne Habakuka, bele. (Yesh. 6:11; Hab. 1:2) Nansha Mukalenge wetu Yezu Kristo wakela pende lukonko lua muomumue pavuaye mutuilangane ne bantu bavua kabayi ne ditabuja. (Mat. 17:17) Nunku, kabiena ne bua kutukemesha biobi bitufikile imue misangu bua kuela lukonko lua muomumue elu to. Pamuapa, bavua batuenzele bualu kampanda mu mushindu uvua kawuyi muakane. Anyi pamuapa tudi tutantamena ntatu ya bukulakaje ne masama, peshi nsombelu mikole ya mu “bikondo bibi bidi bikole mua kupita nabi” ebi. (2 Tim. 3:1) Anyi mene lungenyi lubi lua bantu badi batunyunguluke ludi mua kuikala lututshiokesha. Nansha kuoku bualu bua mushindu kayi, bidi bitukolesha patudi tumanya ne: batendeledi ba Yehowa ba lulamatu ba kale kabakatshina bua kuela lukonko lua muomumue elu ludi mua kuikala lututatshisha mu lungenyi, ne kabavua babapishe bua muvuabu baluele to. Ntshinyi tshidi mua kutuambuluisha tuetu batuilangane ne nsombelu mikole ya nunku? Muyidi Yakobo mmutuleje tshia kuenza mu mêyi a mvese wa lelu. w17.08 3-4 §1-3

Yezu wakabela balongi bende bua badikebele balunda mu diulu ne “biuma bidi kabiyi biakane.” Umue mushindu utudi tuleja lulamatu patudi ne bintu bia ku mubidi mpatudi tufila mapa bua mudimu wa diyisha uvua Yezu mumanyishe ne: uvua ne bua kuenzeka. (Mat. 24:14) Muana wa bakaji kampanda wa mu Inde uvua ne kashete kavuaye wela tukuta tuende ku kakese ku kakese. Wakalekela kusumba too ne tubintu tua kunaya natu. Pakuwula kashete aku, wakafila makuta onso au bua mudimu wa diyisha. Muanetu wa balume kampanda wa mu Inde utu ne budimi bua mitshi ya koko. Wakafila koko ya bungi ku biro bia mudimu wa dikudimuna bia mu Malayalam. Bu muvua bena ku biro ne dijinga dia kusumba koko, wakamona ne: dipa diende divua ne mushinga wa bungi kupita makuta avuaye mua kufila. Atshi ke meji adi ambuluisha. Bia muomumue, bana betu ba mu Grese batu ne tshibidilu tshia kupesha bena mu dîku dia Betele mafuta a olive, fromaje ne biakudia bikuabu. w17.07 8 §7, 8

Bu muvua bena Yuda bakuatshibue mu Babilona, kabavua bumvue mua kuimba to. Bavua dijinga ne kubakolesha ne kubasamba. Kadi anu mukavua dîyi dia buprofete dia Nzambi diambe, dipikudibua diabu diakavuila mu Kolesha, mukalenge wa Pelasa. Wakatshimuna Babilona, kuambaye ne: ‘Yehowa wakungelela mukenji bua kumuashila nzubu mu Yelushalema. Muntu yonso wa bantu bende bonso badi munkatshi muenu aye biende, ne Yehowa Nzambi wende ikale nende.’ (2 Kul. 36:23) Bualu ebu buvua ne bua kuikala bukankamije bena Isalele bavua mu Babilona bikole. Yehowa wakakolesha tshisamba tshijima tshia Isalele ku muoyo ne muena Isalele yonso pa nkayende. Ke mudiye wenza kabidi lelu. Nzambi udi wondopa anyi ‘ukolesha badi ne mitshima minyingalale, udi ujingila bilulu pa mputa yabu.’ (Mis. 147:3) Patudi tusama anyi babungame, tuikale bashindike ne: Yehowa udi ututabalela. Udi ne dijinga dikole dia kutusamba ne kutuondopa mputa ya tunyinganyinga. (Mis. 34:18; Yesh. 57:15) Udi utupesha meji ne bukole bua tumone mua kupita ne ntatu kayi yonso itudi mua kuikala nayi.—Yak. 1:5. w17.07 18 §4, 5

Yehowa ke Mubanji munene mu diulu ne pa buloba. (1 Kul. 29:11, 12) Bu mudiye Tatu wetu muena tshipapayi, bantu bonso badi bajingulula mushinga wa biuma bia mu nyuma, udi ubapeshabi ne tshianza tshilekelela. Bushuwa tudi ne dianyisha bua mudi Yehowa mutupeshe biuma bia mu nyuma bu mudi: 1) Bukalenge bua Nzambi, 2) mudimu wetu wa diyisha, ne 3) malu malelela a mushinga adi mu Dîyi diende. Kadi tuetu katuyi badimuke, mu bule bua matuku tudi mua kupua mushinga udi nawu biuma ebi muoyo. Tudi ne bua kutungunuka ne kuvuluka mushinga wabi ne kukolesha dinanga dietu kudibi. Bua kulua bena dia Bukalenge bua Nzambi, ba bungi ba kutudi bavua ne bua kushintulula nsombelu wabu bikole. (Lomo 12:2) Kadi mvita yetu ki mmijike to. Katuena mua kulekela tshintu kayi tshionso bu mudi: dinanga dia bintu bia ku mubidi anyi majinga mabi a masandi tshitekesha dinanga dietu dia Bukalenge to.—Nsu. 4:23; Mat. 5:27-29. w17.06 9 §1; 10 §7

Kakuena muaba udibu bafunde ne: Nzambi uvua muambile Yobo tshivua tshikebeshe ntatu yende to. Yehowa kavua mumvuije Yobo bua tshinyi uvua ukenga muenze bu ne: uvua udibingisha to. Kadi, uvua musue kumuambuluisha bua ajingulule muvuaye mushadile pa kumufuanyikija ne Nzambi. Wakalongesha Yobo ne: kuvua malu avua ne mushinga wa bungi kupita ntatu ivuaye nayi. (Yobo 38:18-20) Mêyi a Yehowa akambuluisha Yobo bua kuakaja mmuenenu wende. Bivuaku bibi bua muvua Yehowa muakule ne Yobo mushindu au panyima pa makenga ende onso au anyi? Tòo, Yobo muine kavua muele meji nanku to. Nansha muvuaye mukenge nanku, ndekelu wa bionso wakakula ne dianyisha, wamba mene ne: ‘Ndi mudipishe, ndi nkudimuna mutshima wanyi, ndi nsomba mu lupuishi ne mu butue.’ Ke tshivua tshileja buimpe bua mibelu ya Yehowa mifila mu mushindu mujalame. (Yobo 42:1-6) Yobo mumane kuteleja mibelu ya Yehowa ya dinanga ne mushintulule mmuenenu wende, Yehowa wakaleja bantu bakuabu ne: uvua wanyisha lulamatu luvua Yobo muleje mu ntatu.—Yobo 42:7, 8. w17.06 24-25 §11, 12

Bua kumanya ni tudi ne nkatshinkatshi bua mudimu wa bianza, mbimpe tudiebeje ne: ‘Ndiku munange mudimu wanyi wa bianza ne udi unsankisha bikole kadi mmona mudimu wa Nzambi bu mudimu wa tshianana udi utonda anyi?’ Kuvuluka lukonko elu ne kuluelela meji kudi mua kutuambuluisha bua kumanya tshitudi banange menemene. Yezu wakatulongesha tshidi mua kuikala pa muaba wa kumpala mu nsombelu wetu. Musangu mukuabu, wakaya kutangila bana ba muntu babidi, Mariya ne Mâta kumbelu kuabu. Diakamue Mâta wakatuadija kumulambila biakudia, kadi Mariya wakasomba pamue ne Yezu uteleja malu avuaye ulongesha. Mâta wakadiabakena bua muvua Mariya kayi umuambuluisha. Yezu wakambila Mâta mêyi adi mu mvese wa lelu aa. (Luka 10:38-42) Muaba eu Yezu wakafila dilongesha dinene. Bua majinga etu kubenga kutubueja mu ditanaji ne bua kuleja mutudi banange Kristo, tudi ne bua kusungula “tshitupa tshimpe,” mmumue ne: kuteka malu a mu nyuma pa muaba wa kumpala mu nsombelu wetu. w17.05 24 §9, 10

Yehowa mmupeshe baledi bujitu bua kulongesha bana babu bulelela. Ki mmubupeshe bakakuabu anyi muntu mukuabu to. (Nsu. 31:10, 27, 28) Tshidibi, baledi badi kabayi bamanye muakulu wa muaba udibu basombele badi mua kuikala dijinga ne diambuluisha bua kulengabu muoyo wa bana. Padi baledi balomba diambuluisha, kabiena biumvuija ne: bakadi banyema bujitu buabu bua kukolesha bana to. Kadi kuenza nunku kudi mua kuikala mushindu wa kukolesha bana “ne mibelu ne didimuija bia Yehowa.” (Ef. 6:4) Tshilejilu, baledi badi mua kulomba bakulu ngenyi ya mua kulombola ntendelelu wa mu dîku ne ya mua kupetela bana babu balunda bimpe. Baledi badi mua kuikala kabidi babikila bena mu mêku makuabu bua kuenza nabu ntendelelu wa mu dîku. Bualu bukuabu, bansonga ba bungi batu bamanyina malu kudi bena Kristo bakuabu padibu bayisha nabu ne benza nabu malu makuabu pamue.—Nsu. 27:17. w17.05 11-12 §17, 18

Yezu ne baledi bende bakalua bena tshimuangi mu Ejipitu pavua muanjelu wa Yehowa mudimuije Jozefe ne: mukalenge Helode uvua ukeba kushipa Yezu. Bakashalamu too ne pakafua Helode. (Mat. 2:14, 19-21) Bidimu bia bungi pashishe, bayidi ba Yezu “bakatangalaka mu maloba a Yudaya ne Samalea” bua buluishi. (Bien. 8:1) Yezu uvua mumanye ne: bayidi bende ba bungi bavua ne bua kuenzejibua bua kushiya nzubu yabu. Wakamba ne: “Padibu banukengesha mu tshimenga kampanda, nunyemene mu tshikuabu.” (Mat. 10:23) Bamue batu bapeta njiwu padibu banyema ditunga diabu anyi basombela mu tshitudilu tshia bena tshimuangi, muvua bantu bakuatshika, banaya manaya a makuta, biba ne benzavi. Kadi bavua batungunuka ne kuikala ne meji mimpe pavuabu bavuluka ne: ndekelu wa bionso bavua ne bua kumbuka mu tshitudilu tshia bena tshimuangi anu muvua bena Isalele bumbuke mu tshipela.—2 Kol. 4:18. w17.05 3-4 §2-5

Kudi misangu mikese iudi wewe, anyi muntu uudi mumanye mua kumona bualu budi bumueneka kabuyi buakane mu tshisumbu peshi badi mua kunuenzelabu. Kulenduki to. Kadi shala ne lulamatu kudi Nzambi, sambila bua akuambuluishe, ne umueyemene. Manya ne: bua dipanga bupuangane, udi mua kuikala mumvue bualu bibi, ne pamuapa kuyi ne bijadikiki bionso to. Mbimpe tuepuke mêyi mabi adi mua kunyakaja kabidi malu. Ndekelu wa bionso, pamutu pa kudieyemena, udisuike bua kushala ne lulamatu, windile ne lutulu bua Yehowa akaje malu. Pashishe Yehowa neakuanyishe ne neakubeneshe. Ikala mushindike ne: Yehowa “Mulumbuluishi wa buloba buonso” utu anu wenza malu makane, “bualu njila yende yonso mmiakane.”—Gen. 18:25; Dut. 32:4. w17.04 22 §17

Kadi ntshinyi tshiafikila bantu badi babenga kushintuluka ne aba badi batua ndongoluelu eu udi wenda usemena ku tshikondo tshia dikenga dinene mpanda? Yehowa mmulaye bua kumbusha bantu babi bonso pa buloba. (Mis. 37:10) Bantu babi badi mua kuela meji ne: nebapanduke ku kabutu aka. Ba bungi batu basokoka malu mabi atubu benza, ne misangu ya bungi kabatu babanyoka to. (Yobo 21:7, 9) Kadi Bible udi utuvuluija ne: ‘Yeye udi uteka mêsu ende ku njila idi muntu wendela, udi umona biendedi biende bionso. Kakuena mîdima, kakuena mufitu mukole kudi benji ba malu mabi bamanye mua kusokomena.’ (Yobo 34:21, 22) Nunku kakuena mushindu wa kusokoma Yehowa Nzambi to. Kakuena muntu nansha umue udi mua kumudingakaja to, nansha mifitu ya mushindu kayi kayena mua kupangisha bua kumona bualu buonso mudibu to. Panyima pa Armagedone, netutangile muaba uvuabu, katuakubamona to. Nebikale bakadi babutudibue bua kashidi!—Mis. 37:12-15. w17.04 10 §5