Ngondo 5

Bidimu bidi panshi ebi, bantu ba bungi mbanyemene mu matunga makuabu. Kuenaku mua kulonga mua kuelangana muoyo mu muakulu wabu anyi? Kuenaku mua kulonga kabidi bimue biambilu bidi mua kukoka ntema yabu anyi? Nunku udi mua kubaleja site wetu wa jw.org, ne kubaleja filme ne mikanda yetu mishilashilangane bia mu muakulu wabu bidimu. Yehowa mmutuenzele Tshisangilu tshia Nsombelu ne mudimu wetu ne dinanga dionso bua tuikale bakumbane menemene bua kuyisha. Mibelu itutu tupetamu itu yambuluisha ba bungi ba kutudi bua bikale bapinganyina bantu ne babalongesha Bible kabayi belakana. Nuenu baledi, longeshayi bana benu bua bikale bandamuna mu abu mêyi bua bakenkeshe butoke buabu kumpala kua bantu. Misangu ya bungi, mandamuna abu matoke adi afumina mu muoyo atu asaka bapiabapia bua kuitaba bulelela.​—1 Kol. 14:25. w18.06 22-23 §7-9

Mbimpe tuvuluke ne: kumpala tuetu bonso tuvua petu “benyi,” anyi bantu ba ku babende, bikale kule ne Nzambi. (Ef. 2:12) Kadi Yehowa wakatukoka kudiye “ne nshinga ya dinanga.” (Hosh. 11:4; Yone 6:44) Kristo wakatuakidila, kutunzuluilaye tshiibi bua tulue bena mu dîku dia Nzambi. Nansha mutudi bapange bupuangane, Yezu mmutuitabe ne bulenga buonso, nunku katuena ne bua kuela meji a kubenga muena Kristo netu nansha kakese! Kakuyi mpata, bu mutudi basemene pabuipi ne nshikidilu wa ndongoluelu wa malu eu, matapuluka, kansungansunga, ne tshikisu nebivulangane bikole. (Gal. 5:19-21; 2 Tim. 3:13) Kadi bu mutudi batendeledi ba Yehowa, tudi tukeba meji a mu diulu adi kaayi ne kansungansunga, kadi adi enza bua tuikale anu ne ditalala. (Yak. 3:17, 18) Tudi ne disanka bua mutudi tudia bulunda ne bena Kristo netu ba mu matunga makuabu, tuitaba bilele bia kuabu, ne tulonga too ne miakulu yabu. Patudi tuenza nunku, ditalala didi dipueka anu bu musulu munkatshi muetu, ne buakane bu mavuala a mbuu.​—Yesh. 48:17, 18. w18.06 12 §18-19

Musalayi muena Lomo uvua kayi muvuale bisabata kavua ukumbana bua kuya ku mvita to. Bisabata biende, bivua bu sandala mienza ne biseba bisatu bilamakaja pamue, bivua bimuambuluisha bua kuenda bimpe. Bavua babienze mu mushindu wa biobi kunenga bikole ne kusombabi bimpe ku makasa. Bisabata bivua basalayi bena Lomo bavuala bivua bibambuluisha bua kuya ku mvita, kadi bisabata bia mu tshimfuanyi bidi bena Kristo bavuala bidi bibambuluisha bua kumanyisha mukenji wa ditalala. (Yesh. 52:7; Lomo 10:15) Nansha nanku, bidi bilomba dikima bua kuamba mukenji eu padi mpunga umueneka. Muanetu Bo udi ne bidimu 20 udi wamba ne: “Mvua ntshina bua kuyisha balongi betu. Ndi mmona ne: mvua ne bundu. Kadi pandi ngela meji ku bualu abu, tshiena mmona bua tshinyi mvua ntshina to. Mpindieu ndi ne disanka dia kuyisha bena mulongo nanyi.” Bansonga ba bungi mbamone ne: padibu badilongolola bimpe bua kuyisha, badi bayisha badilekelele. w18.05 29 §9-11

Yezu wakambila bapostolo bende ne: “Ndi nnupesha ditalala dianyi.” (Yone 14:27) Mmunyi mudi ditalala diende edi dituambuluisha bua kukuama mamuma? Patudi tunanukila, tudi tumvua ditalala didi kadiyi dijika mu muoyo wetu bualu tudi bamanye ne: Yehowa ne Yezu badi batuanyisha. (Mis. 149:4; Lomo 5:3, 4; Kolos. 3:15) Yezu mumane kuleja muvuaye musue ne: disanka divua bapostolo bapeta “diuwujibue tente,” wakabumvuija mushinga wa kudipangisha amue malu bua kuleja bakuabu dinanga. (Yone 15:11-13) Pashishe wakamba ne: “Ndi munubikile balunda.” Kuikala balunda ba Yezu, ndiakalenga dinene be! Ntshinyi tshivua bapostolo ne bua kuenza bua kushala balunda ba Yezu? Bavua ne bua “kuya ne kutungunuka ne kukuama mamuma.” (Yone 15:14-16) Bidimu bitue ku bibidi kumpala, Yezu uvua muambile bayidi bende ne: “Panudi nuya, nuyishe, nuamba ne: ‘Bukalenge bua mu diulu mbusemene pabuipi.’” (Mat. 10:7) Nunku dilolo kumpala kua kufuaye, wakabakankamija bua kunanukila mu mudimu uvuabu batuadije au.​—Mat. 24:13; Mâko 3:14. w18.05 20-21 §15-16

Bansonga wetu, angatayi dipangadika dia kuenzela Yehowa mudimu bikole mu nsombelu wenu. Abi bidi bilomba kutamba kudifundila bipatshila bia mu nyuma. Bansonga bakuabu ba mulongo wenu badi mua kuikala badine ne kasuki mu dikeba dia masanka, ne pamuapa nebanulombe bua nubalonde. Vulukaye ne: ku tototo nansha ku ndandanda, nebikengele nuenu kuleja bakuabu munudi badisuike bua kukumbaja bipatshila bienu. Nanku, kanulekedi bakuabu banupangisha bua kukumbaja bipatshila bienu to. Kudi mishindu ya bungi ya kukandamena buenzeji bua bantu bakuabu. Tshilejilu, epukayi nsombelu idi mua kunuteka mu diteta. (Nsu. 22:3) Elayi meji a bipeta bibi bia dilonda bakuabu mu malu mabi adibu benza. Bualu bukuabu buanuambuluisha nkuitaba ne: nudi dijinga ne mibelu. Budipuekeshi nebunuambuluishe bua kuitaba mibelu ya baledi benu ne ya bena mu tshisumbu bakuabu badi bakole mu nyuma. (1 Pet. 5:5, 6) Udiku pebe ne budipuekeshi bukumbane bua kuitaba mibelu mimpe anyi? w18.04 28-29 §14-16

Mu mêyi avua Yezu mutumine bimue bisumbu bia mu Asia mukese, wakaleja dianyisha bua mudimu uvua bayidi bende benze. Tshilejilu, wakabanga mêyi ende avuaye mutumine tshisumbu tshia Tuatila wamba ne: “Ndi mumanye bienzedi biebe ne dinanga diebe ne ditabuja diebe ne mudimu webe ne dinanukila diebe, ndi mumanye kabidi ne: bienzedi biebe bia ku ndekelu eku mbipite biuvua muenze kumpala.” (Buak. 2:19) Yezu kavua mubele kalumbandi anu bua muvuabu bavudije mudimu wabu to, kadi wakabelaku kabidi bua ngikadilu ivua mibasake bua kuenza malu mimpe. Nansha muvua Yezu ne dijinga dia kubela bamue bena mu tshisumbu tshia Tuatila, wakanji kutuadija mêyi ende ne dikankamija, kuajikijaye kabidi ne dikankamija. (Buak. 2:27, 28) Ela meji bua bukokeshi budi nabu Yezu bu mfumu wa bisumbu bionso. Ki mmuenzejibue bua kutuela tuasakidila bua mudimu wonso utudi tumuenzela to. Nansha nanku, mmusue anu kutuleja dianyisha. Ntshilejilu tshimpe tshitambe bua bakulu! w19.02 16 §10

Kasumbu kaludiki ka mu bidimu lukama bia kumpala kavua kakankamija bantu bavua ne midimu mu tshisumbu ne bena Kristo bonso basanga. Bakatuma babidi ba kudibu, Petelo ne Yone, bua kusambidila bena kuitabuja bapiabapia bua bapete nyuma muimpe. (Bien. 8:5, 14-17) Diambuluisha dia bena mu kasumbu kaludiki adi divua bushuwa dikankamije Filipo ne bena kuitabuja bapiabapia abu bikole!Lelu, Kasumbu kaludiki ka Bantemu ba Yehowa katu kakankamija bena mu dîku dia Betele, bana betu bakuabu badi mu midimu ya pa buayi ya ku dîba ne ku dîba, ne dîku dia pa buloba bujima dia bena Kristo balelela. Bipeta bidi anu bia muomumue ne bia mu bidimu lukama bia kumpala, mmumue ne: tudi tusanka bua dikankamija edi! Bualu bukuabu, mu 2015, Kasumbu kaludiki kakapatula broshire wa Pingana kudi Yehowa. Broshire eu mmukankamije bantu ba bungi pa buloba bujima bikole. w18.04 19 §18-20

Bantu badi mua kuela meji ne: bobu ne budikadidi bukena mikalu nebikale ne nsombelu muimpe, kadi bulelela budi ne: kuikala ne budikadidi kakuyi mikalu mmuele wa ntapa kubidi. Fuanyikijabi muvua nsombelu mua kuikala bu kakuyi mikenji. Bua bualu abu, mukanda kampanda udi wamba ne: “Mikenji ya nsangilu yonso wa bantu mulongolola bimpe kayitu itamba kumvuika bimpe bualu idi ne bua kukuba bantu eku ibapangisha kabidi bua kuikala ne budikadidi.” (The World Book Encyclopedia) Padibu bamba ne: “kayitu itamba kumvuika bimpe,” mbambilamu. Anji elabi meji bua bungi bua mikenji mifunda kudi bantu, katuyi tubala bungi bua bandumbulula ne balumbuluishi badi ne bua kuyumvuija ne kuenza bua bantu bayitumikile. Mubelu wa Yezu wa mua kupeta budikadidi udi ne malu abidi a kuenza. Bua kumpala, itaba bulelela buvuaye mulongeshe; ne buibidi, ikala muyidi wende. Kuenza malu aa kudi kufikisha ku budikadidi bulelela. Kadi budikadidi mbua kusuludibua ku tshinyi? Yezu wakumvuija ne: “Muenji wa mpekatu yonso mmupika wa mpekatu. . . . Muana yeye munupeshe budikadidi, nenuikale bushuwa ne budikadidi.”​—Yone 8:34, 36. w18.04 6-7 §13-14

Bitu bituenza disanka patudi munkatshi mua bantu badi baditeka pa muaba wetu ne baditatshisha bua bualu buetu. Badi baditatshisha bua kumanya mutudi tumvua ne tuela meji. Badi badianjila kumona bitudi nabi dijinga ne batuambuluisha kumpala mene kua tuetu kubalomba diambuluisha. Tutu banange bantu badi ‘baditeka pa muaba wetu.’ Tuetu bena Kristo bonso tudi basue kuditeka pa muaba wa bakuabu. Kadi mu bulelela, kabitu anu bipepele to. Bua tshinyi? Tshia kumpala, tudi bapange bupuangane. (Lomo 3:23) Tutu ne tshibidilu tshia kuditatshisha anu buetu nkayetu. Ke bualu kayi, tudi ne bua kudienzeja bua kuditatshisha bua bakuabu. Tshibidi, bitu bikolela bamue ba kutudi bua kuditeka pa muaba wa bakuabu bua malu akadi mabafikile anyi bua mudibu bakole. Tshisatu, tudi mua kubanga kulonda bantu badi batunyunguluke. Mu matuku a ku nshikidilu aa, bantu ba bungi kabena baditeka pa muaba wa bakuabu to, kadi ‘mbadinangi.’ (2 Tim. 3:1, 2) Tshidibi, tuetu bidikije Yehowa Nzambi ne Muanende Yezu Kristo, nebituambuluishe bua kuikala kuditeka pa muaba wa bakuabu. w19.03 14 §1-3

Mukenji wa ndekelu wa mu Mikenji Dikumi uvua ukandika dialakana. (Dut. 5:21; Lomo 7:7) Yehowa uvua muele mukenji eu bua kulongesha bualu bua mushinga mukole ebu: bantu bende badi ne bua kulama muoyo wabu, mmumue ne: meji abu, ne mudibu badiumvua. Mmumanye ne: malu mabi atu atuadijila mu meji a muntu ne munda muende. Tshilejilu, mukalenge Davidi wakakuluka mu buteyi ebu. Mu bulelela, uvua muntu muimpe. Kadi umue musangu, wakalakana mukaji wa bende. Dialakana adi diakamufikisha ku mpekatu. (Yak. 1:14, 15) Davidi wakenda masandi, kukebaye bua kushimakaja bayende wa mukaji, ne pashishe kumushipeshaye. (2 Sam. 11:2-4; 12:7-11) Yehowa kena anu umona tshimuenekelu tshia muntu to. Udi umona tshitudi munda menemene, mmumue ne: tshidi mu muoyo wetu. (1 Sam. 16:7) Katuena mua kumusokoka meji etu, mutudi tumvua, anyi malu atudi tuenza to. Udi ukeba malu mimpe adi munda muetu ne mmusue bua tuikale anu nawu. Kadi mmusue tujingulule meji mabi atudi nawu kumpala kua kutufikishawu ku bienzedi bibi, ne tuakande.​—2 Kul. 16:9; Mat. 5:27-30. w19.02 22 §9, 11

Mu Bible badi bakula bua Mose baleja muvuaye “muena bupuekele kupita bantu bonso bavua pa buloba.” (Nom. 12:3) Bidiku biumvuija ne: Mose uvua muntu wa bantu bonso bamuenena, kayi mua kudiangatshila mapangadika, ne kayi mua kuimana kumpala kua baluishi anyi? Ke mutu bamue bantu bamona muntu udi ne bupuekele. Kadi kabiena nanku to. Mose uvua ne bukole, mumanye kuangata mapangadika, ne uvua muena mudimu wa Nzambi wa dikima. Yehowa wakamuambuluisha, kuimanaye kumpala kua mfumu wa bukole wa mu Ejipitu kayi utshina, kulombolaye bantu bu miliyo isatu mu tshipela, ne kuambuluishaye tshisamba tshia Isalele bua kutshimuna baluishi batshi. Katuena tutuilangana ne ntatu ya buena ivua Mose mutantamene to, kadi dituku dionso edi tudi tutuilangana ne bantu anyi malu bidi mua kutupangisha bua kuikala ne bupuekele. Kadi kudi bualu bunene budi butusaka bua kuikala ne ngikadilu eu. Yehowa mmulaye ne: “Bena bupuekele nebapiane buloba.” (Mis. 37:11) Udiku mua kuamba ne: utu muena bupuekele anyi? Bantu bakuabu batu bakumona nanku anyi? w19.02 8 §1-2

Yehowa uvua mufuke muntu ne kondo ka muoyo. Adama ne Eve bamane kushipa mukenji wa Yehowa, bakasokoma. Bualu ebu budi buleja ne: kondo kabu ka muoyo kavua kabalumbuluisha. Bantu badi kabayi ne kondo ka muoyo kalongesha bimpe badi anu bu mazuwa adi enda pa mâyi mikale ne yende anyi volan munyanguke. Kuenza luendu mu mazuwa a nunku nkubi be! Mpepele ne muenji wa mâyi bidi mua kuatuma kua tshianana bipepele. Kadi volan yeye muimpe, udi mua kuambuluisha muendeshi wa mazuwa bua kualudika bimpe pa mâyi. Kondo ka muoyo nkafunangane ne volan. Mbukole budi munda muetu budi butuleja tshidi tshimpe ne tshidi tshibi budi mua kutulombola mu njila muimpe. Bua koku kutulombola bimpe, tudi ne bua kukalongesha bimpe. Kondo ka muoyo kadi kakayi kalongesha bimpe, kakena mua kukanda muntu bua kuenza malu mabi to. (1 Tim. 4:1, 2) Kondo ka muoyo ka nunku kadi mua kufikisha muntu ku diangata “bualu bubi ne: mbuimpe.” w18.06 16 §1-3

Mbimpe tujingulule ngelelu ya meji ya bena panu ne tuyibenge nansha padiyi imueneka bu ne: mmimpe. Tshilejilu, badi mua kufila ngumu kampanda mu mushindu udi wanyishisha malu a tshididi. Bualu kampanda buimpe buvua muntu muenze budi mua kusaka bantu ku dianyisha bipatshila bia bena panu ne malu adibu benza. Imue filme ne mikanda bitu bikankamija lungenyi lua ne: “Ngikale wa kumpala mu bionso” ne lua ne: “dîku dianyi dikale dia kumpala mu bionso,” biyivuija bu mimpe, isankisha, anyi mene mikumbane. Mmuenenu ya malu eyi idi ibengangana ne mmuenenu wa Bible wa ne: bua muntu anyi bua dîku dietu kupeta disanka, bidi bikengela kunanga Yehowa kumpala kua malu onso. (Mat. 22:36-39) Bualu ebu kabuena bumvuija ne: kujikija lutetuku mu mushindu muimpe nkubi to. Kadi mbimpe tudiebeje ne: ‘Tutuku tujingulula malongesha a bena panu nansha kabayi baamba buludiludi anyi? Tutuku tudielela tuetu anyi bana betu mikalu bua kubenga kulonda imue ndongamu ya ku TV anyi kubala bimue bintu anyi? Tutuku tulongesha bana betu mmuenenu wa malu wa Yehowa bua malu adibu bumvua anyi bamona kudi bena panu kaabafumbi anyi?’ w18.11 22 §18-19

Yehowa udi utuma ntema yende yonso kutudi ne mmutunange bikole, bileja mudiye netu. Tumonayi mêyi adi aleja mudiye mutunange bikole menemene. Udi wamba ne: “Wewe wakalua tshintu tshia mushinga mukole ku mêsu kuanyi. Wakapeshibua bunême, ndi mukunange.” (Yesh. 43:4) Kakuena tshintu pa buloba anyi mu diulu tshidi mua kupangisha Yehowa bua kunanga bantu badi bamuenzela mudimu to; lulamatu luende kutudi kalutu lunyungishibua to. (Yesh. 54:10) Yehowa kena wamba ne: udi utumbushila ntatu to, kadi kakulekela “misulu” ya ntatu ituina anyi “ndimi ya kapia” ya makenga ituenzela bibi bua kashidi to. Udi utujadikila ne: neikale netu, utuambuluisha bua ‘kupitshila’ mu ntatu ayi. Ntshinyi tshienza Yehowa? Neatuambuluishe bua tutshimune buôwa bua tulame muoyo wetu mutoke kudiye nansha kumpala kua lufu. (Yesh. 41:13; 43:2) Patudi tueyemena mulayi wa Nzambi wa ne: “nengikale nebe,” netuikale petu ne dikima ne bukole patudi mu ntatu. w19.01 3 §4-6

Biwikala nsonga, pamuapa balongeshi benu, bafidi ba mibelu ba mu tulasa, ne bantu bakuabu bakadi bakukankamije bua ulonge tulasa tutumbuke anyi ukebe mudimu wa makuta. Kadi Yehowa udi ukubela bua wenze malu mushindu mukuabu. Mu bulelela, mmusue bua udienzeje bikole pautshidi mu kalasa apu bua upete mushindu wa kulua kudiambuluisha paudi ujikija. (Kolos. 3:23) Kadi paudi wangata mapangadika bua malu audi ne bua kuteka muaba wa kumpala mu nsombelu webe, udi ukulomba bua ulonde mêyi manene ne disua diende bidi mu diumvuangana ne tshidiye mutulongoluele tshikondo tshia ku nshikidilu etshi. (Mat. 24:14) Yehowa udi umona mudi malu onso enda aya bualu mmumanye tshiafikila ndongoluelu wa malu eu ne mukadiye pa kushikila. (Yesh. 46:10; Mat. 24:3, 36) Mmutumanye petu, mmumanye malu adi atupetesha dikisha ne disanka dilelela ne adi atutekesha mu mikolo ne atujimijila disanka. Nunku nansha mibelu ya bantu mua kumueneka bu mimpe, yoyi kayiyi yumvuangana ne Dîyi dia Nzambi, ki nya meji to. w18.12 19 §1-2

Kadi “bena bupuekele nebapiane buloba, nebikale ne disanka dipite bungi mu ditalala divule.” Davidi wakamanyisha kabidi ku bukole bua nyuma ne: “Bantu bakane nebapiane buloba, nebasombapu bua kashidi.” (Mis. 37:11, 29; 2 Sam. 23:2) Buebe wewe, bantu bavua basue kuenza disua dia Nzambi bavua bumvue bishi bua milayi ayi? Bavua mua kuikala ne malu avua abasaka bua kutekemena ne: pa buloba popu pikale anu bantu bakane, dimue dituku buloba nebulue mparadizu mufuanangane ne budimi bua Edene. Mu kupita kua matuku, bena Isalele ba bungi bavua bamba muvuabu batendelela Yehowa bakamuela yeye ne ntendelelu mukezuke nyima. Ke Nzambi kulekela bua bena Babylona batshimune bantu bende, banyangakaje buloba buabu, ne bakuate bantu ba bungi baye nabu. (2 Kul. 36:15-21; Yel. 4:22-27) Nansha nanku, baprofete ba Nzambi bakamanyisha ne: panyima pa bidimu 70, bantu bende bavua mua kupingana kuabu. Mêyi a buprofete au akakumbana. Kadi adi kabidi atuleja ne: nekuikale mparadizu pa buloba kumpala eku. w18.12 4-5 §9-10

Mibelu ya bungi ya bena panu kayena ipetangana ne Bible to. Kadi mibelu eyi idiku ne mushinga wa nsongo lelu eu anyi? Yezu wakamba ne: “Meji adi adileja makane ku bienzedi biawu.” (Mat. 11:19) Bantu mbaye kumpala bikole mu malu a biamu; kadi ki mbafike ku dijikija malu manene adi apangisha bantu bua kupeta disanka bu mudi mvita, kansungansunga ka makoba, ne buenzavi to. Netuambe tshinyi bua mudibu kabayi ne dîsu dikole mu malu a bikadilu? Bantu ba bungi badi bamona ne: ki ndienze tshia nsongo to, kadi didi dinyanga mêku, dikebesha masama, ne ntatu mikuabu. Kadi bena Kristo badi ne mmuenenu wa malu wa Nzambi badi ne malanda mimpe mu mêku abu, makanda a mubidi mimpe bua dikala bakezuke mu bikadilu, ne ditalala munkatshi mua bena kuitabuja nabu pa buloba bujima. (Yesh. 2:4; Bien. 10:34, 35; 1 Kol. 6:9-11) Bualu ebu kabuenaku buleja ne: ngelelu wa meji wa Yehowa mmupite wa bena panu kule ne kule anyi? w18.11 20 §8-10

Nansha mutudi tudienzeja bua kuikala mu malanda mimpe ne bena mu dîku dietu, tubenzela malu ne bulenga, tudi ne bua kuikala badimuke bua katunyangi mikenji ya Nzambi anu bua kubasankisha. Nansha tuetu tutungunuka ne kudienzeja bua kuikala bimpe ne bena mu dîku dietu, mbimpe tudie bulunda anu ne bantu badi banange Yehowa. Bantu bonso badi bendela mu bulelela badi ne bua kuikala ba tshijila. (Yesh. 35:8; 1 Pet. 1:14-16) Patuakamanya bulelela, tuetu bonso tuakakaja amue malu bua nsombelu wetu apetangane ne mikenji miakane ya mu Bible. Bamue mbenze mashintuluka manene. Nansha owu a mushindu kayi, katuena ne bua kushintakaja bienzedi bietu bikezuke bia tshijila ku buenzavi bua panu nansha. Ntshinyi tshidi mua kutuambuluisha bua katukuluki mu bikadilu bibi? Mbimpe tuelangane meji bua mushinga mukole udi Yehowa mufute bua tuetu kuikala ba tshijila, mmumue ne: mashi a mushinga mukole a muanende Yezu Kristo. (1 Pet. 1:18, 19) Bua Yehowa kutungunuka ne kutumona bakezuke, tudi ne bua kuikala bamanye ne muoyo wetu wonso ne: mulambu wa tshia kupikulangana natshi wa Yezu udi ne mushinga wa bungi menemene. w18.11 11 §10-11

Bantu ba bungi badi mu mudimu wa ku dîba ne ku dîba badi pabu mua kujadika mudi kudifila mu mudimu wa kuyisha kubambuluishe bua kuikala ne nkatshinkatshi nansha muvua nsombelu yabu mishintuluke. Anu mudi bilejilu biabu bileja, tuetu tuenza tshionso tshitudi mua kukokesha mu nsombelu utudi nende ne tueyemena Yehowa ne muoyo mujima, netulame ditalala dietu dia mu muoyo. Tudi mene mua kumona ne: tshituvua benze bua kuibidilangana ne sombelu uvua mushintuluke tshivua bulelela tshikoleshe malanda etu ne Yehowa. Nsombelu webe yeye mushintuluke, pamuapa bualu mbashintulule midimu iuvua nayi mu bulongolodi, anyi bua masama, peshi bua majitu a dîku audi mupete, ikala mushindike ne: Yehowa udi ukutabalela ne neakuambuluishe mu tshikondo tshiakanyine. (Eb. 4:16; 1 Pet. 5:6, 7) Kadi wewe anji ikala wenza tshiudi mua kukokesha mu nsombelu uudi nende. Semena pabuipi ne Tatu webe wa mu diulu mu disambila, ne bu mudiye ukutabalela, ikala udishiya mu bianza biende. Wewe wenza nanku, neulame pebe ditalala dia mu muoyo nansha nsombelu webe yeye mushintuluke. w18.10 30 §17; 31 §19, 22

Mu Bible mudi bilejilu bia bungi bidi bileja mudi Yehowa utabalela batendeledi bende. Tshilejilu, mona mushindu uvua Yehowa muambuluishe Samuele bua kumanyisha Muakuidi munene Eli mukenji wa dilumbuluisha mudibu baleje mu 1 Samuele 3:1-18. Mikenji ya Yehowa ivua ilomba bana bua banemeke bakulakaje, nangananga bantu bavua ne bukokeshi. (Ekes. 22:28; Lew. 19:32) Bivuaku bipepele bua Samuele kuya kudi Eli mu dinda bua kumuambila ne dikima dionso mukenji mukole wa dilumbuluisha wa kudi Nzambi anyi? Tòo. Bualu Bible udi wamba ne: Samuele “uvua utshina bua kuambila Eli bua tshikena kumona.” Kadi Nzambi wakamanyisha Eli patoke ne: Yeye ke uvua ubikila Samuele. Ke bualu kayi, Eli wakadiangatshila malu mu bianza, kuambilaye Samuele bua kamusokoki “bualu nansha bumue.” Samuele “wakamuambila malu onso,” ne mêyi ende au avua apetangana ne mukenji wa kumpala. (1 Sam. 2:27-36) Muyuki wa mu Bible eu udi utulongesha ne: Yehowa udi ne meji ne udi utabalela bantu. w18.09 23 §2; 24 §4-5

Dishima nditape bu meshi lelu mu bantu. Tshiena-bualu tshia ne: “Malu atu atusaka bua kushima” tshifunda kudi Bhattacharjee tshiakamba ne: “Kushima nkulue kumanyika bu ngikadilu udi bantu baledibue nende.” Bantu batu batamba kushima bua kudikuba anyi bua diakalenga diabu. Batu bashima bua kusokoka bilema biabu ne bienzedi biabu bibi anyi bua kudiangana makuta ne kupeta bintu bikuabu. Bilondeshile tshiena-bualu atshi, kudi bantu batu “bashima anu bu badi banua mâyi, bashima badibu kabayi bamanye, bena mudimu nabu, balunda babu, ne balela babu mu malu onso.” Kushima nunku nkupatule bipeta kayi? Bantu kabatshiena beyemenangana ne malanda abu mmafue. Muimbi wa misambu Davidi wakasambila Yehowa ne: “Wewe udi wanyisha bulelela budi nabu muntu munda.” (Mis. 51:6) Davidi uvua mumanye ne: muambi wa bulelela ngeu udi nabu mu muoyo wende. Bena Kristo balelela badi ‘bambilangana bulelela’ mu nsombelu yonso.​—Zek. 8:16. w18.10 7 §4; 8 §9-10; 10 §19

Pakumbuka bena Isalele mu Ejipitu mu 1513 kumpala kua Yezu, bavua mua kuikala bapite pa miliyo 3. Bavua ne bana, bakulumpe, pamuapa bamue ba kudibu bavua basama anyi bavua ne butekete. Bua kupatula musumba munene nunku mu Ejipitu, bivua bikengela mulombodi wa dinanga uvua umvuilangana. Yehowa uvua muenze malu mushindu au ku diambuluisha dia Mose. Ke bualu kayi bena Isalele bakadiumvua mu bukubi pavuabu bashiya buloba bukavuabu bibidilangane nabu. (Mis. 78:52) Ntshinyi tshivua Yehowa muenze bua bantu bende badiumvue mu bukubi? Bumue bualu mbuobu ebu: wakabapatula mu Ejipitu “bu basalayi badilongolole bua mvita.” (Ekes. 13:18) Mushindu uvuaye mubalongolole eu uvua mubajadikile ne: uvua mubalame. Yehowa wakabalombola kabidi “mu munya ne ditutu, ne . . . butoke bua kapia” butuku. (Mis. 78:14) Mu bulelela, Yehowa uvua bu uvua wamba ne: “Kanutshinyi to. Ndi nenu bua kunulombola ne kunukuba.” w18.09 26 §11-12

Mu bikondo bia kale, bamue batendeledi ba Nzambi ba lulamatu bakadiumvua bibi menemene bua ntatu ivuabu bapete, kujingabu ne lufu. Tshilejilu, Yobo uvua ntatu mikole mitulukile wakadila ne: “Ndi nkina muoyo wanyi; tshiena musue kushala ne muoyo to.” (Yobo 7:16) Yona wakadiumvua muedibue mâyi ku makasa bua muvua malu maye mushindu uvuaye kayi mutekemene mu mudimu uvuabu bamupeshe, kuambaye ne: “Mpindieu, Yehowa, umbusha koku muoyo wanyi, bualu mbimpe meme kufua pamutu pa kushala ne muoyo.” (Yona 4:3) Musangu mukuabu, muprofete wa lulamatu Eliya wakadiumvua bibi bua nsombelu uvua mumutulukile, kulombaye bua afue. Wakamba ne: “Mbikumbane! Mpindieu, Yehowa wanyi, angata muoyo wanyi.” (1 Bak. 19:4) Kadi Yehowa wakangata batendeledi ba lulamatu abu ne mushinga wa bungi, ne uvua musue bua bikale ne muoyo. Pamutu pa kubanyoka, wakabambuluisha bua bumbushe meji abu a kufua au, kubakoleshaye ne dinanga bua batungunuke ne kumuenzela mudimu ne lulamatu. w18.09 13 §4

Benzejanganyi ba mudimu ne Nzambi mbamanyike bu bantu batu bakidila benyi. Mu Mifundu ya tshiena Greke ya buena Kristo, muaku udibu bakudimune ne: “diakidila dia benyi” udi umvuija “dileja benyi muoyo mulenga.” (Eb. 13:2; dim.) Mu Bible mudi malu adi atulongesha mua kunangangana mushindu eu. (Gen. 18:1-5) Tudi ne bua kuikala tuambuluisha bakuabu padi mpunga umueneka, nansha bobu bikale “bana betu mu ditabuja” anyi kabayi bena Kristo. (Gal. 6:10) Bua kuleja muudi wenza mudimu ne Nzambi, kuenaku mua kupesha bana betu badi mu mudimu wa ku dîba ne ku dîba kaba ka kulala anyi? (3 Yone 5, 8) Nebinuambuluishe bua “kukankamijangana.” (Lomo 1:11, 12) Dîyi dia Nzambi didi dilomba bana betu ba balume bua kulua basadidi ba mudimu anyi bakulu bua benze mudimu pamue ne Yehowa. (1 Tim. 3:1, 8, 9; 1 Pet. 5:2, 3) Bana betu badi benza nunku mbasue kuambuluisha bakuabu mu nyuma ne ku mubidi. (Bien. 6:1-4) Bana betu batu benza midimu idi ikengela kuenza mu tshisumbu nebakuambile ne: kuambuluisha bakuabu kutu kusankisha bikole. w18.08 24 §6-7; 25 §10

Nansha muvua Timote ne bukokeshi bua kupesha bena Kristo nende bakulumpe aba buludiki, uvua ne bua kubenzela malu ne luse ne kanemu. Kadi netuambe tshinyi muntu mukulumpe yeye wenza mpekatu ku bukole anyi wenza bualu kampanda budi bunyingalaja Yehowa? Yehowa kakulumbuluisha bilondeshile tshimuenekelu to, ne muntu yeye muenze mpekatu ku bukole, Yehowa kakumufuila luse anu bualu mmukulumpe to. Mona dîyi dinene didi mu Yeshaya 65:20: “Muenji wa mpekatu needibue mulawu, nansha yeye ne bidimu lukama.” Dîyi dia muomumue didi mu tshikena kumona tshia Yehezekele. (Yeh. 9:5-7) Nunku, tudi ne bua kuikala nangananga tuditatshisha bua kunemeka Yehowa Nzambi, Wa Kale wa Matuku a Bungi. (Dan. 7:9, 10, 13, 14) Tuetu tunemeka Yehowa, katuakutshina bua kupingaja muntu udi dijinga ne mibelu mu njila to, nansha yeye ne bidimu bungi kayi.​—Gal. 6:1. w18.08 11 §13-14

Bu mutudi bena Kristo balelela, tudi ne bua kuikala ne dimanya dia mua kukonkonona malu bua kuangata mapangadika mimpe. (Nsu. 3:21-23; 8:4, 5) Tshianana Satana ne bulongolodi buende nebanyange ngelelu wetu wa meji bipepele. (Ef. 5:6; Kolos. 2:8) Bushuwa, bua kuangata mapangadika mimpe, anu tuetu ne bijadiki. Lelu, bantu badi bapeta ngumu mipite bungi. Badi bayipetela ku Enternete, ku televizion, ku bisanji ne ku biamu bikuabu. Batu kabidi batumina bantu ba bungi mesaje mu biamu ne babapesha ngumu kudi balunda ne bamanyangana nabu. Bu mudi bantu batangalaja ngumu ya mafi ne malu a dishima bu mudibu basue, tudi ne bua kutapa ntala kudimuka ne kukonkonona bimpe bimpe malu atudi tumvua. w18.08 3 §1, 3

Pakakumbana tshikondo tshia Muana wa Nzambi kuledibua pa buloba, Yehowa wakasungula Mariya, nsongakaji muena budipuekeshi utshivua kamama, bua ikale mamuende wa muana wa pa buende eu. Mariya uvua musombele mu Nazaleta, musoko mukese uvua kule ne Yelushalema ne ntempelo mulenga uvuamu. (Luka 1:26-33) Mariya wakalua kuleja muvuaye mu malanda makole ne Nzambi pakakulaye ne mulela wende Elizabeta. (Luka 1:46-55) Eyowa, Yehowa ukavua wenda utangila Mariya, pavuaye mumone ne: uvua ne lulamatu, wakamupesha diakalenga divuaye kayi mutekemene edi. Pakalela Mariya Yezu, Yehowa kavua mupeshe muntu munene anyi mukokeshi nansha umue wa mu Yelushalema ne mu Beteleheme diakalenga dia kumanya bualu abu to. Wakatuma banjelu kudi balami ba mikoko ba tshianana bavua balama mikoko yabu mu mpata pambelu pa Beteleheme. (Luka 2:8-14) Pashishe, balami ba mikoko abu kuyabu kutangila muana uvuabu balele. (Luka 2:15-17) Mariya ne Jozefe bavua mua kuikala basanke bikole bua kumona muvua Nzambi mupesha Yezu lumu mushindu eu. w18.07 9-10 §11-12

Bua tshinyi Yehowa wakakuatshila Solomo tshiji? Bible udi wamba ne: “Bualu muoyo wende uvua musesuke kudi Yehowa . . . uvua mumumuenekele misangu ibidi ne uvua mumudimuije bua bualu buine ebu ne: kavua ne bua kulonda nzambi mikuabu to. Kadi kavua mutumikile tshivua Yehowa mumutumine dîyi bua kuenza to.” Ke bualu kayi Nzambi kakamuanyisha ne kakamuambuluisha kabidi to. Ndelanganyi ya Solomo kayakakokesha tshisamba tshijima tshia Isalele to, ne yakapeta ntatu mikole munkatshi mua bidimu bia bungi. (1 Bak. 11:9-13) Anu mudi tshilejilu tshia Solomo tshileja, bumue bua ku malu manene atu ateka malanda etu ne Yehowa mu njiwu, nkudia bulunda ne bantu badi kabayi bamanye mikenji ya Yehowa anyi bayinemeka. Bamue badi mua kuikala mu tshisumbu kadi kabayi mu malanda makole ne Yehowa to. Bakuabu badi mua kuikala balela betu, bena mutumba netu, bena mudimu netu, anyi balongi betu badi kabayi batendelela Yehowa to. Mu mishindu yonso, balunda betu bobu kabayi banemeka mikenji ya Yehowa bikole, ndekelu wa bionso, badi mua kunyanga malanda etu ne Nzambi. w18.07 19 §9-10

Satana utu wenza mudimu ne filme ne ndongamu ya ku TV bua kumuangalaja ngelelelu wende wa meji. Mmumanye ne: malu adibu balonda mu filme anyi ku TV kaatu anu atusankisha tshianana to; atu atulongesha mua kuela meji, mua kudiumvua, ne mua kuenza malu. Yezu uvua mupiluke mu dilondela bantu malu bua kubalongesha. Tshilejilu, wakafila mufuanu wa muena Samalea wa luse ne wa muana uvua mumbuke kuabu ne munyangakaje bumpianyi buende. (Mat. 13:34; Luka 10:29-37; 15:11-32) Kadi bantu bakadi Satana munyange ne ngelelu wende wa meji badi mua kulonda malu mu filme anyi ku TV bua kutunyanga. Mbimpe tuikale ne nkatshinkatshi. Filme ne ndongamu ya ku TV bidi mua kutusanguluja ne kutulongesha kabiyi binyanga meji etu. Kadi tudi ne bua kuikala badimuke. Patudi tusungula malu a kujikija nawu lutetuku, mbimpe tudiebeje ne: ‘Filme eu anyi ndongamu wa ku TV eu udi undongesha ne: mbimpe kudilekelela ku majinga anyi a mubidi anyi?’ (Gal. 5:19-21; Ef. 2:1-3) Ntshinyi tshiwenza wewe mujingulule ne: ndongamu kampanda udi uzangika ngelelu wa meji wa Satana? Mbimpe umuepuke anu muudi mua kuepuka disama dia tshiambu! w19.01 15-16 §6-7

Anu mudi tshifulu tshia musalayi tshikuba buongo buende, “ditekemena dia lupandu” ditudi nadi didi dikuba meji etu anyi bieledi bietu bia meji. (1 Tes. 5:8; Nsu. 3:21) Mmunyi mudi Satana mua kutufikisha ku divula tshifulu tshietu? Tukonkononayi malu avuaye muenzele Yezu. Satana uvua mumanye bimpe ne: Yezu uvua ne ditekemena dia kulua mukokeshi wa bantu. Kadi Yezu uvua ne bua kuindila too ne tshikondo tshivua Yehowa mujadike. Kadi kumpala kua tshiotshi kukumbana, uvua ne bua kukenga ne kufua. Nanku, Satana wakapesha Yezu mpunga wa kukumbaja ditekemena diende adi pa lukasa. Satana wakambila Yezu ne: yeye muenze tshienzedi tshimue tshia dikukuila, uvua mua kumuteka mukokeshi wa bantu anu pine apu. (Luka 4:5-7) Bia muomumue, Satana mmumanye ne: Yehowa neatupeshe bintu bimpe mu bulongolodi bupiabupia. Kadi tudi ne bua kuanji kuindila; patudi tuindila apu, tudi mua kupeta ntatu. Nunku, Satana udi ututeta ne mpunga ya tuetu kupeta nsombelu wa nanku anu mpindieu. Mmusue bua tukebe tshia kumpala bintu bia ku mubidi, tubipete anu mpindieu. Satana udi utusaka bua kuteka Bukalenge pa muaba muibidi.​—Mat. 6:31-33. w18.05 30-31 §15-17

Eyowa, bu muutshidi nsonga, Yehowa mmusue bua muoyo webe usanke. Tungunuka ne kudienzeja bua kukumbaja bipatshila biudi mudifundile mu mudimu wa Nzambi, utumikila mibelu ya Yehowa mu malu onso audi ulongolola bua kuenza. Wewe mutuadije kuenza nunku pautshidi muana, neumone ne lukasa mudi Yehowa ukulombola, ukukuba, ne ukubenesha. Ela meji bua mibelu yonso iudi upeta mu Dîyi dia Nzambi, ne tumikila mubelu eu: “Nunku, vuluka Mufuki webe Munene mu matuku a bunsonga buebe.” (Muam. 12:1) Bansonga badi mu tshisumbu mbakumbane bua tuetu kubela kalumbandi ne muoyo mujima bua mudibu batantamena ntatu eyi ne mudibu badisuike bua kuenzela Yehowa mudimu mu nsombelu wabu mujima. Badi benza nunku padibu badifundila bipatshila bia mu nyuma ne bateka mudimu wa kuyisha pa muaba wa kumpala. Kupita apu, badi bangata dipangadika dia kubenga kulekela bena panu babapangisha bua kukumbaja bipatshila biabu. Mbimpe bansonga batuishibue ne: mudimu wabu mukole eu kawakuya mu mâyi to. Bena Kristo nabu ba balume ne ba bakaji mbabanange, ne badi babambuluisha. Nunku padi bansonga badifila kudi Yehowa, malu onso adibu balongolola bua kuenza mu nsombelu wabu neakumbane. w18.04 29 §17, 19