Ngondo 7

Tudi mu “bikondo bia malu makole bidi bikole mua kupita nabi,” ne nsombelu neakole bikole kumpala kua dituku dipiadipia kutuadija ne kua ditalala dia bushuwa kuikaladi pa buloba kabidi. (2 Tim. 3:1) Nunku tudi ne bua kudiebeja ne: ‘Tudi mua kupetela buludiki ne diambuluisha kudi nganyi?’ Kukadi bidimu nkama ya bungi, mufundi wa misambu kampanda wakaleja mudibi bikengela kubandisha mêsu etu kudi Yehowa bua kulomba diambuluisha mu bikondo bia ntatu. (Mis. 123:1-4) Wakafuanyikija ditangila dietu kudi Yehowa ne mushindu udi muena mudimu utangila kudi mfumuende. Uvua musue kuamba tshinyi? Muena mudimu katu utangila kudi mfumuende anu bua kupeta tshiakudia ne bukubi to, kadi utu kabidi ushala mumutangile bua kujingulula tshidiye musue ne pashishe utshikumbaja. Bia muomumue, tudi ne bua kukonkonona Dîyi dia Nzambi dituku dionso bua kujadika tshidi Yehowa musue bua tuetu kuenza ne tudi ne bua kutshienza. Tuetu benze nanku, Yehowa neatuambuluishe mu tshikondo tshia ntatu. w18.07 12 §1-2

Yezu uvua wakula bua dipikudibua ku bupika bukole ne dikengeshibua bidi bantu bapete, mmumue ne: kuikala ‘bapika ba mpekatu.’ (Yone 8:34) Mpekatu kena anu utufikisha ku dienza malu mabi to, kadi udi kabidi mua kutupangisha mua kuenza tshitudi bamanye ne: ntshiakane anyi tshitudi bakumbane mua kuenza. Mu ngumvuilu eu ke mutudi bapika ba mpekatu, ne bipeta biende bidi anu diedibua mâyi ku makasa, tunyinganyinga, makenga, ne ndekelu wa bionso lufu. (Lomo 6:23) Netupete budikadidi bulelela buvua nabu baledi betu ba kumpala anu pikala Nzambi mua kujikija mpekatu bua kashidi. Mêyi a Yezu a ne: “nuenu bashale mu dîyi dianyi” adi umvuija ne: kudi amue malu malomba, anyi mikalu, adi akengedibua bua yeye kutupesha budikadidi. (Yone 8:31) Bu mutudi bena Kristo badi badilambule, tudi badibenge ne basungule bua kuenza malu bilondeshile malongesha a Kristo bualu tudi bayidi bende. (Mat. 16:24) Anu muvua Yezu mulaye, netuikale bushuwa ne budikadidi patuapeta masanka onso a mulambu udi upikula bantu. w18.04 7 §14-16

Yehowa utu uditatshisha bua mushindu udi bantu bende bumvua, nansha padi meji abu kaayi mimpe to. Tuangate tshilejilu tshia muprofete Yona. Nzambi uvua mumutume bua kumanyisha bena Niniwe mukenji wa dibutuka. Pakanyingalalabu, Nzambi wakapangadija bua kubenga kubabutula. Kadi dipangadika adi kadivua disankishe Yona to. “Wakafiika munda bikole” bualu dîyi dia buprofete divuaye mumanyishe kadivua dikumbane to. Kadi Yehowa wakamuleja lutulu, kumuambuluishaye bua kuakaja meji ende. (Yona 3:10–4:11) Yona wakalua kumvua tshivua Yehowa musue kumulongesha, ke Yehowa kulua kumuambila too ne bua kufunda malu au bua diakalenga dietu. (Lomo 15:4) Mushindu uvua Yehowa muenzele bena mu tshisamba tshiende malu udi utushindikila ne: udi uditeka pa muaba wa batendeledi bende. Mmumanye ntatu ne makenga bidi nabi yonso wa kutudi. Mmumanye meji etu onso, mutudi tudiumvua, ne malu atudi mua kuenza ne atudi katuyi mua kuenza. ‘Kakulekela bua tutetshibue ne diteta ditudi katuyi mua kutantamena’ to. (1 Kol. 10:13) Mulayi eu udi utukolesha bushuwa! w19.03 16 §6-7

Bilondeshile Mikenji ya Mose bakulu bavua Yehowa muteke bavua balumbuluisha bilumbu bia malu a ntendelelu, bia malu mabi avua enzeka, ne bilumbu pankatshi pa bantu. Tukonkonone bilejilu bikese. Pavua muena Isalele ushipa muntu, kabavua bamushipa musangu umue to. Bakulu ba mu tshimenga tshiabu bavua ne bua kulondesha muvua malu menzeke kumpala kua kuambabu bikalaye uvua mukumbanyine tshibawu tshia lufu. (Dut. 19:2-7, 11-13) Bakulu bavua kabidi balumbuluisha bilumbu bishilashilangane bia buatshia buila. Tshilejilu, bavua balumbuluisha bilumbu bia difuilakana maloba too ne bia mu mêku. (Ekes. 21:35; Dut. 22:13-19) Pavua bakulu bakosa bilumbu bimpe ne pavua bena Isalele batumikila mikenji, bivua biambuluisha bantu bonso, ne tshisamba tshijima tshivua tshitumbishisha Yehowa. (Lew. 20:7, 8; Yesh. 48:17, 18) Bilejilu ebi bidi bileja mudi Yehowa utabalela bualu buonso butudi tuenza. Ki mmusue bua tuikale ne kansungansunga to, kadi mmusue tuenzele bantu bakuabu malu ne dinanga. Udi kabidi umona malu atudi tuamba ne tuenza, nansha tuetu bikale nkayetu mu nzubu. w19.02 23 §16-18

Padi malu matutonde, bitu bikole bua kuikala ne bupuekele. Tudi mua kubanga kupatula mêyi mabi anyi kuakula mu mushindu mubi. Malu owu makutonde mushindu eu, londa tshilejilu tshia Yezu. Mu ngondo ya ndekelu ivua mishadile Yezu pa buloba, malu akamutonda bikole. Uvua mumanye ne: bavua ne bua kumukengesha bibi menemene ne kumushipa. (Yone 3:14, 15; Gal. 3:13) Ngondo mikese kumpala kua lufu luende, wakamba muvua malu mamutonde bikole. (Luka 12:50) Matuku makese kumpala kua kufuaye, wakamba ne: “Ndi ne dipampakana.” Tudi tumona muvuaye udipuekesha ne ukokela Nzambi pakamusambilaye uleja muvuaye umvua. (Yone 12:27, 28) Pakafika dîba dia Yezu kufua, wakadifila ne dikima dionso mu bianza bia bena lukuna ba Nzambi; bakamushipa mu mushindu mubi wa dimupuekesha milongo. Yezu wakenza disua dia Nzambi ne bupuekele buonso nansha muvua malu mamutonde ne bamukengeshe bikole. Kakuyi mpata, tudi mua kuamba ne: Yezu udi tshilejilu tshitambe buimpe bua muvuaye muleje bupuekele pavua malu mamutonde!​—Yesh. 53:10. w19.02 11 §14-15

Bua kubuela mu bisangilu pa tshibidilu, bidi mua kutulomba bua kuikala ne dikima padiku nsombelu mikole. Bamue bana betu ba balume ne ba bakaji batu babuela mu bisangilu nansha mudibu ne tunyinganyinga tua bungi, batekeshibue mu mikolo, anyi bikale ne masama. Bakuabu batu babuelamu ne dikima dionso nansha mutubu babaluisha kudi bena mu mêku abu anyi bakokeshi ba mbulamatadi. Anji elabi meji bua mudi tshilejilu tshietu tshikolesha bena Kristo netu badibu bele mu maloko bua ditabuja diabu. (Eb. 13:3) Padibu bumvua ne: tudi tutungunuka ne kuenzela Yehowa mudimu nansha mu ntatu, bidi bibakolesha bua kuikalabu anu ne ditabuja, ne dikima, ne muoyo mutoke. Pavua Paulo mu buloko mu Lomo, uvua usanka dîba dionso divuaye umvua ne: bena Kristo nende bavua benzela Nzambi mudimu ne lulamatu. (Filip. 1:3-5, 12-14) Matuku makese kumpala kua kumulekelabu anyi patshivuabu bamulekelelaku, wakafundila bena Ebelu mukanda. Wakafundila bena Kristo ba lulamatu abu bua kabalekedi kudisangisha pamue nansha.​—Eb. 10:25. w19.01 28 §9

Satana nntomboji utu upetula mikenji ya Yehowa ne utu ne budinangi; mmusue bua tumufuane. Udi wenza bua tuikale banyunguluka kudi bantu bakadiye munyange, ushala mutekemene ne: ‘nebanyange’ ngelelu wetu wa meji ne ngenzelu wetu wa malu. (1 Kol. 15:33) Satana udi kabidi utusaka bua tueyemene meji a bantu pamutu pa kueyemena meji a Yehowa bualu mmusue kunyanga muoyo wetu. (Kolos. 2:8) Mona lumue lua ku ngenyi idi Satana umuangalaja: wewe kuyi mubanji kuena muntu to. Bantu badi bela meji mushindu eu badi mua kulua babanji anyi kubenga kulua babanji. Nansha balue babanji anyi kabayi balue babanji, badi mu njiwu. Bua tshinyi? Bualu badi mua kulua kuditua anu mu dikeba makuta, bibafikisha too ne ku dinyanga makanda abu a mubidi, malanda abu ne bena mu mêku abu, too ne bulunda buabu ne Nzambi anu bua makuta. (1 Tim. 6:10) Tudi ne disanka bua mudi Tatu wetu wa mu diulu udi ne meji utuambuluisha bua tuikale ne nkatshinkatshi mu tshilumbu tshia makuta.​—Muam. 7:12; Luka 12:15. w19.01 15 §6; 17 §9

Nansha kumpala kua muana wa Yehowa kulua pa buloba ne kushiya tshilejilu tshimpe tshia mua kukankamijangana, batendeledi ba Yehowa ba lulamatu bavua bamanye mudibi bikengela kukankamija bakuabu. Pavua bena Ashû bakeba kubunda bena Yuda, Hezikiya wakasangisha bamfumu ba basalayi ne bena Yuda bine bua kubakankamija. Bible udi wamba ne: “Nunku bantu bakakoleshibua ne mêyi [ende].” (2 Kul. 32:6-8) Nansha muvua Yobo dijinga ne busambi, wakapesha ‘basambi [basatu] bavua bamutatshisha’ dilongesha dia mua kukankamija muntu. Wakabambila ne: bu biobi ne: yeye ke uvua muye kubasamba, uvua ‘mua kubakolesha ne mêyi a mukana muende, ne busambi bua ku mishiku yende buvua mua kufila disulakana.’ (Yobo 16:1-5) Ndekelu wa bionso, Elihu ne Yehowa bakakankamija Yobo.​—Yobo 33:24, 25; 36:1, 11; 42:7, 10. w18.04 16 §6; 17 §8-9

Yeshaya ukavua mumvuije muakolesha Yehowa bantu bende wamba ne: “Yehowa nealue muikale ne bukole, ne diboko diende nedikokeshe buende yeye.” (Yesh. 40:10) Bible utu utamba kutela “diboko” bua kumvuija bukole. Nunku tshiambilu tshia ne: “diboko [dia Yehowa] nedikokeshe,” tshidi tshituvuluija ne: Yehowa mMukalenge wa bukole. Uvua muambuluishe bena mudimu bende ba kale ne mubasungile ne makanda ende a kanzekele, ne lelu utshidi anu ukolesha bantu badi bamueyemene ne ubakuba. (Dut. 1:30, 31; Yesh. 43:10, dim.) Yehowa udi ukumbaja mulayi wende wa ne: “nenkukoleshe” nangananga padi bena lukuna betu batukengesha. Lelu mu imue miaba, bena lukuna betu badi benza muabu muonso bua kuimanyika mudimu wetu wa buambi anyi kuimanyika midimu ya bulongolodi buetu. Nansha nanku, katuena tupampakana bikole bua buluishi ebu to. Yehowa mmutujadikile ne: neatupeshe bukole ne dikima bia bungi. Udi utulaya ne: “Tshia mvita tshionso tshienza bua kukuluisha natshi katshiakutshimuna to.”​—Yesh. 54:17. w19.01 5-6 §12-13

Udi mushilangane ne nyama bualu udi dijinga ne malu a mu nyuma adibu mua kukukumbajila anu kudi Mufuki webe. (Mat. 4:4) Paudi umuteleja bimpe, udi upeta busunguluji, meji, ne disanka. Nzambi udi ukukumbajila majinga ebe a malu a mu nyuma ku diambuluisha dia Dîyi diende ne dia biakudia bia bungi bia mu nyuma bidiye ufidila kudi “mupika wa lulamatu udi mudimuke.” (Mat. 24:45) Biakudia ebi mbishilashilangane ne mbia bungi be! (Yesh. 65:13, 14) Biakudia bia mu nyuma bidi Nzambi ufila nebikupeshe meji ne bukokeshi bua kunana lungenyi bikala mua kukukuba mu mishindu ya bungi. (Nsu. 2:10-14) Tshilejilu, ngikadilu eyi neyikangule mêsu ebe bua kujandula malongesha a dishima bu mudi dia ne: Mufuki katuku to. Idi ikuambuluisha bua kubenga dishima dia ne: makuta ne bintu ke bidi bifila disanka. Idi ikuambuluisha kabidi bua kujingulula majinga mabi ne kuakandamena, anyi kuepuka bikadilu bidi mua kukuenzela bibi. Nunku tungunuka ne kukeba meji a Nzambi ne bukokeshi bua kunana lungenyi, ubimone ne mushinga wa bungi! w18.12 20 §6-7

Nekuikalaku tshikondo tshikala matuku etu “bu matuku a mutshi” anyi? Imue mitshi itu ilala bidimu binunu ne binunu. Nebikengele bua bantu bikale ne makanda a mubidi mimpe bua kulala bidimu bungi abu. Bobu bikale mu nsombelu uvua Yeshaya muambe au, mparadizu uvua bu wa mu tshilota au udi ulua mulelela! Dîba adi mêyi a buprofete neakumbane! Elangana meji a mudi milayi ya mu Bible yakula bua mparadizu utudi bindile kumpala eku: Nzambi neabeneshe bantu ba pa buloba bujima. Muntu nansha umue kakupeta buluishi bua kudi nyama anyi bua kudi bantu badi benza malu bu nyama to. Bampofu nebamone, bampudi matshi nebumvue, ne balema nebende. Bantu nebibake nzubu yabu ne nebadie bia pa madimi biakunabu. Nebalale bidimu bia bungi kupita mitshi. Bulelela, mu Bible mudi bijadiki bidi bileja ne: malu a nunku mmatuindile kumpala eku. Kadi bamue badi mua kuamba ne: bitudi tubambila bua mêyi a buprofete au kabiena bileja malu mudiwu to. Mbualu kayi bunene budi bukusaka bua kushala ne muoyo kuulu kuulu bua kuindila mparadizu mulelela wikala pa buloba? Muntu munene wa katshia ne katshia udi utulejabu.​—Luka 23:43. w18.12 5 §13-15

Meji etu atu ashintuluka anu kushintuluka. Malu atudi tubueja mu lungenyi luetu ne atudi tuelela meji ke adi ashintulula meji etu bikole. Tuetu ne tshibidilu tshia kuelangana meji bua mushindu udi Yehowa wela meji, netudijadikile ne: mmuenemu wende wa malu mmuimpe. Dîba adi, netuikale tudiumvua nkayetu basakibue bua kuenza bua meji etu ikale apetangana ne a Nzambi. Kadi mona ne: bua ngelelu wetu wa meji kupetangana ne wa Yehowa, tudi ne bua ‘kulekela kuikala kufumbibua kudi ndongoluelu wa malu eu.’ Katuena ne bua kubueja ngenyi ne mmuenenu ya malu bidi bibengangana ne bia Nzambi mu lungenyi luetu to. Tuangate tshilejilu tshia biakudia bua kuleja mushinga wa bualu bua kumpala bua kuenza ebu. Muntu udi musue kuikala ne makanda a mubidi mimpe utu udia biakudia bidi bidiisha. Kadi yeye udia kabidi biakudia bibi, biakudia bimpe abi nebimuambuluishe ku tshinyi? Bia muomumue, tuetu tunyanga meji etu ne ngenyi ya bena panu, meji a Yehowa atudi tubueja mu lungenyi luetu kaakutuambuluisha to. w18.11 21 §14-15

Tudi ne bua kudisuika bikole bua kutumikila bulelela dituku dionso. Vuala mukaba wa bulelela mu tshimono. Mu bikondo bia kale, mukaba wa musalayi uvua ulama tshimono tshiende ne bia munda biende ne ubikuba. Kadi bua kumukubawu, uvua ne bua kuwukanga bimpe. Yeye muwushiye muzebelele kawuvua umukuba bimpe to. Mmunyi mudi mukaba wetu wa mu nyuma wa bulelela utukuba? Tuetu bashale badisuikawu bimpe anu bu mukaba wetu muena dîna, bulelela nebutukube ku ngelelu mubi wa meji ne nebutuambuluishe bua kuangata mapangadika mimpe. Patukuata mateta anyi ntatu, bulelela bua mu Bible nebukoleshe dipangadika dietu dia kuenza tshidi tshiakane. Anu mudi musalayi kayi mua kuela meji a kuya ku mvita kushiya mukaba, tuetu petu tudi ne bua kudisuika bua katumbushi mukaba wetu wa bulelela anyi kuwushiya muzebelele. Kadi tudi tuenza muetu muonso bua kuwulama musuike bimpe pambidi patudi tuenza malu mu diumvuangana ne bulelela. w18.11 12 §15

Bua kupeta bulelela bua mu Dîyi dia Nzambi, bidi bikengela tuditatshishe. Tudi ne bua kuikala badiakaje bua kudipangisha tshionso tshidi tshikengedibua bua kubupeta. Anu bu mudi mufundi wa mukanda wa Nsumuinu muena meji wa wamba, patudi anu ‘tusumba bulelela’ anyi tubupeta, mbimpe tudimuke bua ‘katubupanyishi,’ anyi katubujimiji to. Tshintu nansha tshiotshi tshia bafila tshianana katuena mua kutshipeta tuetu bashale bavunge maboko to. Muaku wa tshiena Ebelu udibu bakudimune mu Nsumuinu 23:23 ne: ‘kusumba’ udi kabidi umvuija ‘kupeta.’ Miaku yonso ibidi idi ne lungenyi lua kuditatshisha bua kupeta tshintu tshia mushinga anyi kufila tshintu bua kupeta tshintu tshikuabu tshia mushinga. Bua kumvua tshidi kusumba bulelela kumvuija, tuangabi tshilejilu. Fuanyikijabi ne: udi umvua bamba ne: mu tshisalu badi bapeshangana bibote tshianana. Bibote abi nebilue kuditeka pa mêsa ebe nkayabi anyi? Tòo. Tudi ne bua kuditatshisha bua kuya mu tshisalu bua kubiangata. Nansha mudi bibote abi bia tshianana, tudi ne bua kuditatshisha ne kukeba dîba dia kuya kubiangata mu tshisalu. Bia muomumue, kabiena bikengela makuta bua kusumba bulelela to. Kadi tudi ne bua kuditatshisha bua kubupeta. w18.11 4 §4-5

Yezu uvua mubikile Petelo, Yakobo, ne Yone bua baye kumufila ku mukuna mule. Pavuabu kuntu aku, bakamona tshikena kumona tshia dikema. Mpala wa Yezu wakatua nsese bu dîba ne bilamba biende biakabalakana. Bimfuanyi bibidi bivua bileja Mose ne Eliya biakatuadija kuyukila ne Yezu bua lufu luende ne dibishibua diende. (Luka 9:29-32) Pashishe ditutu divua dikenka diakababuikila, kumvuabu dîyi dipatuka mu ditutu amu; divua dîyi dia Nzambi! Tshikena kumona atshi tshivua tshileja butumbi ne bukole bivua Yezu ne bua kuikala nabi pavuaye ne bua kulua Mukalenge wa Bukalenge bua Nzambi. Bivua bushuwa bikankamije Kristo ne bimukoleshe bua kutantamena makenga ne lufu lubi bivua bimuindile. Tshikena kumona atshi tshivua kabidi tshikoleshe ditabuja dia bayidi ba Yezu ne tshibapeshe bukole bua kutantamena mateta avua mabindile ne kukumbaja mudimu mukole uvuabu ne bua kuenza munkatshi mua bidimu bia bungi. Bidimu bitue ku 30 pashishe, mupostolo Petelo wakakula bua tshikena kumona atshi, uleja muvuatshi katshiyi tshianji kumukupuka mu lungenyi.​—2 Pet. 1:16-18. w19.03 10 §7-8

Ngumue mushindu kayi udi bena Kristo balelela bashilangane ne bena mu bitendelelu bia dishima? Tudi ‘tuamba bulelela.’ (Zek. 8:16, 17) Netuambe bulelela mu nsombelu yonso, mmumue ne: kudi bantu batudi katuyi bamanye, bena mudimu netu, balunda betu, ne balela betu. Netuambe tshinyi biwikala nsonga udi musue kulengelela bena diebe? Dienzeja bua kulu muena mpala ibidi to, umueneka muntu muimpe paudi ne bena mu dîku dienu anyi bena Kristo nebe, kadi paudi ne bansonga badi kabayi batendelela Yehowa anyi ubuela ku Enternete wenza malu bu bena panu. Au nsombelu wa dishima, ushima baledi bebe, bena Kristo nebe, too ne Nzambi. (Mis. 26:4, 5) Bituikale anu ‘tunemeka [Yehowa] ne mishiku yetu, kadi mioyo yetu kule menemene nende,’ mmumanye bualu abu. (Mâko 7:6) Mbitambe buimpe bua tuetu kuenza tshidi Bible wamba etshi: “Muoyo webe kawalakanyi benji ba mpekatu, kadi ikala ne ditshina dia Yehowa dituku dijima.”​—Nsu. 23:17. w18.10 9 §14-15

Batendeledi ba Nzambi pa buloba bujima badi benza dîku dimue dia mu nyuma dia bantu badi banangangane bikole. (1 Yone 4:21) Dinanga diabu edi kadiena dimuenekela anu mu malu manene adibu benzelangana ku mpukapuka to, kadi didi dimuenekela kabidi mu tumalu tukese tua bungi tudibu benzelangana. Patudi tutabalela bakuabu ne tubenzela malu ne bulenga, tudi ‘tulua bidikiji ba Nzambi bu bana bende bananga.’ (Ef. 5:1) Yezu uvua muidikije Tatu wende mu mushindu mupuangane. Wakamba ne: “Luayi kundi, nuenu bonso badi batata ne midimu mikole ne bambule majitu mabapite, nennupeshilule bukole . . . , bualu meme ndi mupole malu ne mupuekele mu muoyo.” (Mat. 11:28, 29) Patudi tuidikija tshilejilu tshia Kristo tshia ‘kutabalela muntu mupuekele,’ Tatu wetu wa mu diulu neatuanyishe ne netupete disanka dia bungi. (Mis. 41:1) Nunku, tutabalelayi bakuabu mu dîku, mu tshisumbu, ne mu buambi bua kuleja mutudi ne dinanga. w18.09 28 §1-2

Mushindu mukuabu utudi mua kuenza mudimu pamue ne Nzambi nkuambuluisha bena Kristo netu badi bipupu bikuate. Tshilejilu, tudi mua kufila makuta etu. (Yone 13:34, 35; Bien. 11:27-30) Tudi kabidi mua kubalongoluela mu nzubu anyi kubibakilayi kabidi. Tuangate tshilejilu tshia Gabriela, muanetu wa bakaji wa mu Pologne. Mâyi avua mapasalale mamunyangile nzubu bibi bitambe. Wakasanka pavua bana betu ba mu bisumbu bia pabuipi balue kumuambuluisha. Udi wamba ne: “Tshiena musue kuakula bua bindi mujimije to, bualu bidi anu bintu. Kadi ndi musue kunuambila bua bindi mupete. Bualu budi bumfikile ebu mbunjadikile ne: kuikala mu tshisumbu tshia bena Kristo ndiakalenga dia pa buadi ne kudi kupetesha muntu disanka.” Bantu ba bungi badibu bambuluishe panyima pa tshipupu, batu bamba ne: batu bumvua disanka dia bungi. Bantu badi benza mudimu pamue ne Yehowa bua kuambuluishangana mushindu eu batu pabu bumvua disanka dia muomumue.​—Bien. 20:35; 2 Kol. 9:6, 7. w18.08 26 §12

Tuetu basue kulama muoyo wetu bimpe, tudi ne bua kumanya mua kujandula njiwu idiku ne kukeba tshia kuenza musangu umue bua kudikuba. Muaku udibu bakudimune ne: “ulame” udi utuvuluija mudimu uvua nsetendedi wenza. Mu matuku a mukalenge Solomo, bansentedi bavua bimana pa bimanu bia tshimenga ne bamanyisha pavuabu bamona bena lukuna babaluila. Bualu ebu budi butuambuluisha bua kumanya tshitudi ne bua kuenza bua kupangisha Satana bua kunyanga meji etu. Mu bikondo bia kale, bansentedi bavua benza mudimu pamue ne balami ba ku biibi. (2 Sam. 18:24-26) Bu muvuabu benza mudimu pamue, tshimenga tshivua mu bukubi bualu bavua benza bua biibi bikale bikanga dîba dionso divua muena lukuna mua kulua. (Neh. 7:1-3) Kondo ketu ka muoyo kalongesha kudi Bible kadi paku mua kuenza malu anu bu nsentedi ne kutudimuija padi Satana ukeba kunyanga muoyo wetu, mmumue ne: padiye ukeba kunyanga meji etu, mutudi tudiumvua, tshidi tshitusaka bua kuenza malu kampanda, anyi majinga etu. Dîba dionso didi kondo ketu ka muoyo katuta, mbimpe tukateleje ne tuenze muetu muonso bua kuepuka njiwu. w19.01 17 §10-11

Bakulu kabena ne bua kuimanyina pa mmuenenu yabu ya malu anyi pa bilele bia miaba idibu basombele padibu bakonkonona ngikadilu ya bansonga betu balume to, kadi badi ne bua kulamata ku Dîyi dia Nzambi. (2 Tim. 3:16, 17) Bobu kabayi balonda mêyi a mu Bible, badi mua kupangisha bana betu ba balume badi bakumbane bua kuluabu basadidi ba mudimu anyi bakulu. Mu ditunga kampanda, bakulu bavua bapeshe musadidi wa mudimu uvua mukumbane midimu ya bungi. Nansha mudi bakulu aba bitaba ne: muanetu wa balume eu udi ukumbaja ngikadilu milomba mu mushindu mukumbanyine bua kulua mukulu, kabavua anu bamulombele mudimu wa bukulu to. Bamue bakulu bavua bakulumpe bavua basumishe ne: muanetu au utshivua umueneka muana bikole. Bia dibungama, kabakamuteka mukulu to, anu bua tshimuenekelu tshiende. Luapolo idi ileja ne: ngelelu wa meji eu mmutangalake bikole. Bidi ne mushinga wa bungi bua tuetu kueyemena Bible pamutu pa kueyemena mmuenenu wetu wa malu. Eu ke mushindu umuepele utudi tutumikila Yezu ne tubenga kulumbuluisha bantu bilondeshile tshimuenekelu tshiabu.​—Yone 7:24. w18.08 12 §16-17

Kutuminangana ne lukasa mesaje audi mupete mu biamu anu mudiwu amu kudi ne njiwu. Mu amue matunga mbatuelele mikenji anyi mbakandike midimu yetu. Baluishi betu ba mu matunga a nunku badi mua kutuendeshila ngumu mibi ku bukole bua kutukuatshisha buôwa anyi bua kutusaka ku dibenga kueyemenangana. Tshilejilu, mu ditunga dia kale dia Union Soviétique, bampulushi ba kansokomansokoma (ba KGB) bakamuangalaja ngumu ya mafi ne: bana betu ba bungi bavua bamanyike bavua basonguele bantu ba Yehowa. Bana betu ba bungi bakitaba ngumu ya mafi ayi, kulekelabu bulongolodi bua Yehowa. Bia dibungama be! Diakalenga, ba bungi bakalua kupingana mu bulongolodi, kadi bakuabu bakayilamu luonso. Ditabuja diabu divua dinyanguke. (1 Tim. 1:19) Ntshinyi tshitudi mua kuenza bua bualu bua nunku kabutufikidi? Kumuangalaji ngumu mibi anyi ngumu iudi kuyi ne bijadiki to. Kuikadi tshitaba mvinyingu to. Kadi ikala mutuishibue ne: udi ne bijadiki. w18.08 4 §8

Mu miakulu ya bungi ya lelu, batu bela bimanyinu bia mu difunda bu mudi tukoselu anyi bitudilu bibidi bua kupatula lungenyi ludi mu tshiambilu anyi bua kulutokesha. Kadi mu mivungu ya tshiena Greke ya kumpala menemene idiku lelu, kabavua bela bimanyinu bia mu difunda misangu yonso to. Kadi lukonko ndolu elu: Yezu uvua wamba ne: “Ndi nkuambila ne: lelu newikale nanyi mu Mparadizu” anyi? Peshi uvua wamba ne: “Ndi nkuambila lelu ne: newikale nanyi mu Mparadizu”? Vuluka ne: Yezu uvua mudianjile kuambila bayidi bende ne: “Muana wa muntu neenze matuku asatu, munya ne butuku, munda mua buloba.” (Mat. 12:40; 16:21; 17:22, 23; Mâko 10:34; Bien. 10:39, 40) Nanku Yezu kavua muye mu Mparadizu kampanda dituku divuaye yeye ne muenzavi au bafue to. Yezu uvua “mu Lukita [anyi “Hadese”]” munkatshi mua matuku too ne pakamubisha Nzambi ku lufu. (Bien. 2:31, 32; dim.) Muenzavi ukavua ukula muoyo au kavua mumanye ne: Yezu ukavua mudie tshipungidi ne bapostolo bende ba lulamatu bua bikale nende mu Bukalenge bua mu diulu to. (Luka 22:29) Bualu bukuabu, muenzavi au kavua nansha mubatijibue to. (Yone 3:3-6, 12) Nuntu mparadizu wa pa buloba uvua ne bua kulua matuku atshilualua ke uvua Yezu mumulaye. w18.12 6 §17-18, 20-21

Mu matuku makese tshianana, bakatuadija kutendelela kana ka ngombe ka or! Nansha muvuabu babenge kutumikila Nzambi patoke, bavua badishima ne: batshivua anu ku luseke lua Yehowa. Alona wakabikila too ne ntendelelu wa kana ka ngombe au ne: “tshibilu bua Yehowa”! Yehowa wakumvua bishi? Bavua bamuele mâyi ku makasa. Yehowa wakambila Mose ne: bantu bavua ‘badinyange’ ne ‘basesuke mu njila uvuaye mubelele mukenji bua kuendela.’ Mu “tshiji [tshiende] tshikole,” Yehowa wakajinga mene bua kubutula tshisamba tshipiatshipia tshia Isalele atshi. (Ekes. 32:5-10) Kadi Yehowa wakapangadija bua kubenga kubutula bena Isalele. (Ekes. 32:14) Nansha muvua Alona muanji kubuelakana mu dienza lupingu alu, wakanyingalala, kulondaye bena Lewi bavua bambe muvuabe ku luseke lua Yehowa. Bantu binunu bia bungi bakafua bua ditendelela dia mpingu, kadi bakalaya aba bavua ku luseke lua Yehowa dibenesha.​—Ekes. 32:26-29. w18.07 20 §13-16

Mushindu mutambe buimpe wa kumanyibua utudi ne bua kukeba mmushindu kayi? Ki ndumu lutu bantu bakeba mu dilonga tulasa tutumbuke, mu malu a bungenda mushinga, mu manaya, ne mu malu makuabu a panu to. Kadi ndudi Paulo utumvuija elu: “Mpindieu unudi bafike ku dimanya Nzambi, anyi unudi bafike ku dimanyibua kudi Nzambi, mmunyi munudi nupingana kabidi ku malu matekete a ntuadijilu a tshianana ne basue kudishiya kabidi ku bupika buawu?” (Gal. 4:9) Tudi ne diakalenga dia dikema dia mutudi “bafike ku dimanyibua kudi Nzambi,” Mukokeshi mutambe bunene wa diulu ne buloba! Yehowa mmumanye tshitudi, mmutunange, ne mmusue bua tuikale balunda bende. Ke tshivuaye mutufukile.​—Muam. 12:13, 14. w18.07 7-8 §3-4

Bua mikenji ya Nzambi kutuambuluisha, tudi ne bua kuyinanga ne kuyitumikila. (Amo. 5:15) Mmunyi mutudi mua kuenza nunku? Bualu bunene butudi mua kuenza nkulonga mua kumona malu mudi Yehowa uamona. Fuanyikijabi ne: mbikukolele bua kumona tulu. Doktere udi ukufundila amue malu a kulonda bu mudi kudia biakudia bidi bimpe, kuibidija mubidi, ne kushintulula bimue bibidilu. Mpindieu dilonda malu aa ndikuambuluishe bua kumona tulu! Kakuyi mpata, newikale ne dianyisha dia bungi kudi doktere au bua mudiye mukuambuluishe. Bia muomumue, Mufuki wetu mmutuelele mikenji idi itukuba ku ntatu idi kuenza mpekatu kukebesha bua tuikale ne nsombelu muimpe. Anji elabi meji bua mudi kutumikila mibelu ya mu Bible kutuambuluisha mu malu bu mudi dishima, dilukakaja meji mabi, masandi, tshikisu, ne malu a mîdima. (Nsu. 6:16-19; Buak. 21:8) Patudi tupeta masanka bua mutudi tuenza malu mudi Yehowa musue, tudi tumunanga yeye ne mikenji yende bikole ne tumuanyisha. w18.06 17 §5-6

Pamuapa nguvena eu uvua utshina ne: Yezu uvua mua kusaka bantu ku ditombokela bena Lomo. Yezu wakandamuna ne: “Bukalenge buanyi ki mbua pa buloba ebu to.” (Yone 18:36) Kavua musue kubuelakana mu malu a tshididi to, bualu Bukalenge buende buvua ne bua kuikala bua mu diulu. Wakambila Pilato ne: mudimu wende pa buloba uvua wa “kumanyisha bulelela.” (Yone 18:37) Anu bu Yezu, patudi tumanya bimpe menemene tshidi mudimu wetu, katuakutua mangumba a tshididi mpanda nansha munda munda to. Kadi ki mbipepele to. Mutangidi wa tshijengu kampanda udi wamba ne: “Bantu ba muaba utudi badi benda anu bakeba kushintulula malu. Bantu badi ne lungenyi lua buena muetu, ne ba bungi badi bitaba ne muoyo mujima ne: bantu badibu basue bobu bakokesha, nsombelu wabu nealengele. Diakalenga, bena Kristo netu mbalame buobumue buabu bualu badi bayisha lumu luimpe lua Bukalenge bikole. Badi batekemena bua Nzambi alue kujikija malu mabi ne ntatu idibu batuilangana nayi.” w18.06 4-5 §6-7

Anu mu mikanda isatu ya mu Mifundu ya mu tshiena Ebelu eyi: Kulondolola wa kumpala, Yobo, ne Zekâya, ke mudibu batele dîna Satana didi diumvuija ne: “Muluishi.” Bua tshinyi Bible kavua mutambe kuakula bua muena lukuna wetu eu kumpala kua dilua dia Masiya? Bidi bimueneka ne: Yehowa kavua musue kuela Satana muulu tshianana, ufundisha malu a bungi adi amutangila yeye ne midimu yende mu Mifundu ya mu tshiena Ebelu to. Tshipatshila tshinene tshivua Yehowa mufundishile Mifundu eyi ku nyuma wende tshivua tshia kuambuluisha bantu ba Nzambi bua bamanye Masiya ne bamulonde. (Luka 24:44; Gal. 3:24) Pakafika Masiya, Yehowa wakenza nende mudimu ne bayidi bende kabidi bua kutuleja malu a bungi adi atangila Satana ne banjelu bavua badisange kudiye atudi bamanye. Mbikumbane nanku bualu Yehowa neenze mudimu ne Yezu ne bela manyi bua kubutula Satana ne bena diende. (Lomo 16:20; Buak. 17:14; 20:10) Tumanye ne: bukole bua Satana budi ne mikalu. Yehowa ne Yezu ne banjelu ba lulamatu badi batukuatshisha; nunku, tudi mua kukandamena muena lukuna wetu eu. w18.05 22-23 §2-4

Yehowa udi utuangata bu bena mudimu bende anu patudi tukuama mamuma. (Mat. 13:23; 21:43) Nunku, mu tshilejilu tshidi mu Yone 15:1-5, mamuma adi muena Kristo yonso ne bua kukuama, ki mbantu batudi tuvuija bayidi bapiabapia to. (Mat. 28:19) Bu biobi nanku, Bantemu ba lulamatu badi kabayi bafika ku divuija bantu bayidi bualu badi bayisha mu teritware udi bantu ba bungi kabayi bateleja bavua mua kuikala matamba a mu tshilejilu tshia Yezu adi kaayi akuama mamuma. Kadi kabiena ne bua kuikala nanku nansha kakese! Bua tshinyi? Bualu katuena mua kuenzeja bantu bua balue bayidi to. Bu mudi Yehowa mutunange, kakutulomba bua kuenza tshitudi katuyi mua kukumbana bua kuenza to. Yehowa utu utulomba bua kuenza anu tshitudi mua kukumbana bua kuenza. (Dut. 30:11-14) Kadi mamuma atudi ne bua kukuama ntshinyi? Kakuyi mpata, mamuma adi ne bua kuikala mudimu udi yonso wa kutudi ukumbana bua kuenza. Mmudimu kayi au? Mmudimu wa kuyisha lumu luimpe lua Bukalenge bua Nzambi.​—Mat. 24:14. w18.05 14 §8-9

Bamfumu ba bitendelelu bena dishima mbavulangane lelu, batu bababikila ne: bapastere, bakuidi, bambi, batatu ba bunsantu, ne bikuabu. Mbafuanangane ne bafalese, bualu badi “bapangisha bulelela [bua mu Dîyi dia Nzambi] bua kabumanyiki” ne ‘mbashintakaje bulelela bua Nzambi ku dishima.’ (Lomo 1:18, 25) Badi ne malongesha a dishima bu mudi dia Ngena wa kapia, dibenga kufua dia anyima; balongesha ne: muntu utu uledibua kabidi panyima pa lufu luende, kabidi ne: Nzambi udi wanyisha bantu badi balala ne balume anyi bakaji nabu, ne wanyisha diselangana diabu. Bamfumu ba tshididi mbashime bantu bua kubapambuisha. Tukadi pa kumvua dimue dia ku mashimi matambe bunene pamba bantu ne: mbapete “ditalala, ne kakuena bualu bua kutshina!” Kadi “dîba adi kabutu ka tshimpitshimpi nekalue kudibu diakamue.” Bana betu, katukuatshiki ku buteyi buabu bua dilengulula kabutu ka ndongoluelu wa malu eu kakadi pabuipi to! Bushuwa, tudi “bamanye bimpe menemene ne: dituku dia Yehowa didi dilua anu bu mutu muivi ulua butuku.”​—1 Tes. 5:1-4. w18.10 7-8 §6-8

Ku diambuluisha dia bela manyi ne “bakokeshi” ba mu mikoko mikuabu badi babelesha diboko, Yezu udi ukankamija bantu badi ne tunyinganyinga tukole ne batekete mu mikolo, ne ubaludika mu tshikondo tshikole etshi. Anu mutudi bamanye, bakulu kabena ne “bukokeshi” pa ditabuja dia bakuabu to, kadi ‘mbenzejanganyi nabu ba mudimu’ bua disanka dia bena Kristo nabu. (Yesh. 32:1, 2; 2 Kol. 1:24) Mupostolo Paulo mmutushile tshilejilu tshimpe. Wakafundila bena Kristo ba mu Tesalonike bavua bakengeshibua ne: ‘Bu mutuvua ne dinanga dikole kunudi, katuvua badisuike bua kunupesha anu lumu luimpe lua Nzambi nkayalu to, kadi bua kudifila kabidi ne tuetu bine, bualu nuvua balue banangibue bikole kutudi.’ (1 Tes. 2:8) Bua kuleja mudi kukankamijangana ne mêyi a mukana patupu kakuyi kukumbane, Paulo wakambila bakulu ba mu Efeso mêyi a mu mvese wa lelu. w18.04 21-22 §6-8

Bua tuetu kupeta budikadidi abu, tudi ne bua ‘kuya kudi Yehowa,’ mmumue ne: kudia nende malanda a nsungansunga. (2 Kol. 3:16) Pavua bena Isalele mu tshipela, kabavua ne mmuenenu wa mu nyuma bua malu avua Yehowa ubenzela to. Bivua anu bu ne: mioyo yabu ne lungenyi luabu bivua bibuikila tshilamba ne bivua bipape. Bavua basue kuenza malu ne budikadidi buvuabu bapete pavuabu bapatuke mu Ejipitu bua kusankisha mubidi. (Eb. 3:8-10) Kadi budikadidi budi nyuma wa Yehowa utupesha mbupite dipikudibua patupu ku bupika bua ku mubidi. Nyuma wa Yehowa udi upikula bantu ku bupika bua mpekatu ne lufu, kabidi ne ku bupika bua bitendelelu bia dishima ne ngenzelu wabi wa malu. Ebu mbualu budi bantu kabayi mua kuenza nansha kakese. (Lomo 6:23; 8:2) Ebu mbudikadidi bua dikema! Muntu udi mua kupeta budikadidi ebu nansha yeye mu buloko anyi mu bupika.​—Gen. 39:20-23. w18.04 9 §3-5