Ngondo 2

Muaku “buakane” udi mu Bible udi umvuija nangananga kuenza bualu budi Nzambi umona ne: mbuimpe, kubuenza kakuyi kansungansunga. Mona muvua bienzedi bia Yezu bileja buakane buende. Tshikondo tshiende, bamfumu ba bitendelelu bena Yuda bavua bakine bantu bavua kabayi bena Yuda, bavua bapepeja bena Yuda bakuabu bavua kabayi balonge tulasa tua tshitendelelu tshiabu, ne kabavua banemeka bantu bakaji to. Kadi Yezu yeye uvua wenzela bantu bonso malu makane kayi ne kansungansunga. Kavua ubenga bantu bavua kabayi bena Yuda bavua bamuitabuja to. (Mat. 8:5-10, 13) Uvua uyisha babanji ne bapele, kayi usunguluja muntu. (Mat. 11:5; Luka 19:2, 9) Kavua ne malu makole kudi bantu bakaji anyi ubenzela malu ne tshikisu to. Kadi uvua ubanemeka, unemeka too ne bavuabu bapepeja kudi bantu bakuabu, ne uvua ubenzela bonso malu mimpe. (Luka 7:37-39, 44-50) Tudi mua kuidikija Yezu patudi tuenzela bantu malu katuyi ne kansungansunga ne tuyisha bonso badi bitaba bua kututeleja, nansha bobu bapele anyi babanji, peshi bikale mu tshitendelelu kayi. Bantu balume bena Kristo badi bidikija Yezu padibu banemeka bantu bakaji. w19.05 2 §1; 5 §15-17

Lelu bakulu badi ne dinanga ne badi batabalelangana batu pabu basamba bantu badi dijinga ne diambuluisha, babasamba ne mêyi mimpe mangatshila mu Bible adi aleja mudibu babanange. Anu bakulu ke badi mua kusamba bantu bavuabu banyange anyi? Tòo. Tuetu bonso tudi ne bua ‘kutungunuka ne kusambangana.’ (1 Tes. 4:18) Bana betu ba bakaji badi bakole mu nyuma badi mua kuambuluisha bikole bana betu ba bakaji badi bakengela busambi. Mbikumbane bua muvua Yehowa Nzambi mudifuanyikije ne mamu udi usamba muanende. (Yesh. 66:13) Bible udi wakula bua bantu bakaji bavua basambe bantu bavua mu dikenga. (Yobo 42:11) Lelu Yehowa udi usanka bikole padiye umona bana betu ba bakaji basamba bana betu ba bakaji bakuabu badi batata ne tunyinganyinga. Kudi misangu idi mukulu umue anyi babidi mua kuyukila ne muanetu wa bakaji udi mukole mu nyuma pa nkayende, bamulomba bua kuambuluisha muanetu wa bakaji udi utata ne tunyinganyinga, bikalaye ne mushindu. Patudi tuambuluisha muena Kristo netu, tuamanya, katukebi bua kumanya malu adiye kayi musue kuambila bantu to.​—1 Tes. 4:11. w19.05 16-17 §10-12

Kumpala kua bakulu kuenza komite wa dilumbuluisha, bua tshinyi mbimpe kuikale bujadiki bua bantemu nansha babidi? Bualu ke tshidi Bible wamba ne: ntshiakane. Padi muntu uvila ne: ki mmumanye bualu, bidi bikengela kuikale bantemu babidi bua kujadika bualu abu. Dîba adi bakulu badi mua kuenza komite wa dilumbuluisha. (Dut. 19:15; 1 Tim. 5:19) Muntu au yeye muvile, bakulu badi bimanyina pa bujadiki bua bantemu ba bualu abu. Padi bantu nansha babidi bajadika bualu abu, dîba adi bakulu badi benza komite wa dilumbuluisha. Padiku kakuyi ntemu muibidi, kabiena biumvuija ne: muntu udi mulue kumanyisha bualu abu mmushime to. Nansha padiku kakuyi bantemu babidi badi mua kujadika tshilumbu, bakulu mbamanye anu ne: kudi mua kuikala bualu bubi menemene budi buenzeke. Bakulu nebatungunuke ne kuambuluisha muntu yonso udi bualu bubi abu bunyingalaje. Nebashale kabidi badimuke bua muntu kalu kunyanga bana bakuabu mu tshisumbu.​—Bien. 20:28. w19.05 11 §15, 16

Bidi ne mushinga bua baledi balongeshe bana mua kudilongela. Tshilejilu, mbimpe bana bamanye mua kulongolola bisangilu anyi kuenza makebulula bua bualu kampanda buvua bujuke mu kalasa. (Eb. 5:14) Bobu bangata dîba dia kulonga malu kampanda a mu Bible kumbelu, kabiakubakolela bua kumvua malu makuabu adibu balongesha mu bisangilu, mu mpuilu, ne mu mpungilu to. Mbimpe baledi bakose bule bua dilonga dionso bilondeshile bidimu bia bana ne tshidibu. Mbimpe balongi betu ba Bible bamanye pabu mua kudilongela. Ku ntuadijilu, bitu bitusankisha bikole padibu balongolola dilonga diabu dia Bible anyi bisangilu benda bela mishonyi pa mandamuna. Kadi mbimpe tubalongeshe mua kuenza makebulula ne mua kumanya kudilongela bimpe. Dîba adi padibu bapeta ntatu, nebamanye mua kukebulula malu mu mikanda yetu bua kupeta mibelu idi mua kubambuluisha. w19.05 26 §2; 28 §10, 11

Satana mmudisuike bua kunyanga lungenyi luetu. Ke bualu udi ukeba kushintulula ngelelu wetu wa meji ne kutushiya mu dielakana ku diambuluisha dia ngelelu ya meji mishilashilangane. Satana utshidi anu wela lukonko lua buena luvuaye muele Eva mu budimi bua Edene lua ne: “Nzambi uvua muambe bulelela ne: . . . ?” (Gen. 3:1) Mu buloba budi ku bukokeshi bua Satana ebu, bantu batu batamba kutuela nkonko idi mua kutupetesha dielakana bu mudi: ‘Mu bulelela, Nzambi mmubenge disangila dia bantu ba mubidi umue peshi disela bakaji ba bungi anyi? Mu bulelela, Nzambi ki mmusue nuenze difesto dia Nowele, dia bunane, peshi dia mifikilu ya diledibua anyi? Mu bulelela, Nzambi webe mmusue ne: ubenge bua kabakuedi mashi anyi? Mu bulelela, Nzambi wetu wa dinanga eu udi mua kukulomba bua kubenga kulamakanangana ne balunda anyi ne balela bebe badibu bipate mu tshisumbu anyi?’ Bidi bikengela tuikale batuishibue bua malu atudi tuitabuja. Tuetu katuyi bakebe mandamuna a nkonko minene idi itangila malu atudi tuitabuja, tudi mua kupeta dielakana dia bungi. Dielakana edi didi mua kulua kunyanga meji etu ne kutekesha ditabuja dietu. w19.06 12-13 §15-17

Yehowa mmutunange bikole. (Yone 3:16) Tudi basue kuidikija Tatu wetu wa dinanga eu. Ke bualu kayi tudi tuditatshisha bua ‘kuditeka pa muaba wa bakuabu, kunangangana bikole bu bana ba muntu, ne kumvuila bantu bonso luse,’ kadi nangananga “bana betu mu ditabuja.” (Gal. 6:10) Padi bana betu aba batuilangana ne malu adi abakebela tunyinganyinga, mbimpe tubambuluishe. Ntshinyi tshitudi mua kuenza bua kusamba muntu udi mufuishe muena dibaka nende? Bualu bua mushinga butudi ne bua kuanji kuenza nkuyukila nende nansha tuetu tudimona katuyi bakumbane anyi katuyi bamanye menemene tshia kumuambila. Paula, uvua bayende mufue lufu lua tshikoso, udi wamba ne: “Ndi mumanye ne: padi muntu mufuishe, bitu bitatshisha bantu mu lungenyi bobu bakeba kumusamba. Batu batshina ne: badi mua kulua kupatula dîyi dibi. Kadi mbimpe kuamba nansha tshiudi wela meji ne: katshiena tshikumbana atshi pamutu pa kushala mupuwe.” Muntu udi mufuishe katu pamuapa ukeba anu bua tumuambile bualu bunene bua mushinga to. Paula udi wamba ne: “Pavua balunda banyi bangambila tshianana muvua lufu lua bayanyi lubatonde, bivua bindenga ku muoyo bikole.” w19.06 20 §1; 23 §14

Bobu bakandika midimu yetu, bakulu nebalongolole bua nuenze bisangilu mu mushindu wa kubenga kukoka ntema ya bantu. Badi mua kunulomba bua kudisangisha bakese bakese mu tusumbu, ne badi mua kuikala bashintulula dîba dia kuenza bisangilu ne muaba wa kubienzela. Bua mudimu wa kuyisha, nsombelu neyishilangane bilondeshile muaba ne muaba. Kadi bu mutudi banange Yehowa ne basue kuambila bantu malu a Bukalenge buende, netupete anu mushindu wa kuyisha. (Luka 8:1) Mumanyi kampanda wa malu a kale, diende Emily Baran, wakamba bua Bantemu ba Yehowa bavua mu ditunga divuabu babikila ne: Union soviétique ne: “Pavua mbulamatadi mukandike Bantemu bua kuyisha, bakatuadija kuyukila ne bena mutumba nabu, bena mudimu nabu, ne balunda babu, babambila malu a Nzambi. Tshivuabu benza etshi tshiakabatumishisha mu tumponyi tua dienzejangana midimu mikole; kadi Bantemu bakakeba mishindu ya kuyukila ne bena lukanu nabu.” Nansha muvuabu bakandike midimu yetu, bana betu kabakalekela kuyisha muntu amu to. Idikija koku bana betu aba! w19.07 11 §12, 13

Ntshinyi tshitudi mua kuenza bua kuambuluisha bantu badi kabayi batendelela bua banange Nzambi ne balue bayidi ba Kristo? Tudi ne bua kumanya ne: muaba udi muntu mukolele udi mua kuenza bua ateleje mukenji wetu anyi awubenge. Tshilejilu, bantu badi bakolele ku Mputu kabena mua kututeleja mumue ne bantu ba mu Azi to. Bua tshinyi? Bualu ku Mputu, bantu ba bungi mbamanye amue malu a mu Bible ne batu bumvua bamba ne: Nzambi ke utu mufuke bintu bionso. Kadi mu Azi muomu, bantu ba bungi ki mbatambe kumanya malu a mu Bible to, ne pamuapa kabatu bitabuja ne: kudi Mufuki to. Nanku ikala ne dishindika. Kudi bantu bavua kabayi batendelela badi balua Bantemu ba Yehowa tshidimu tshionso etshi. Ba bungi ba kudibu bakavua balonda mikenji ya bikadilu bilenga, kadi lubombo luvuabu bamona mu bitendelelu luvua lubatonda. Bakuabu bobu kabavua balonda mikenji ya bikadilu bilenga to, ne ba bungi ba kudibu bakalekela bienzedi bibi bivuabu nabi. Tuikale bashindike ne: Yehowa neatuambuluishe bua kupeta bantu badi “bakaje muoyo wabu bimpe bua kupeta muoyo wa tshiendelele.”​—Bien. 13:48; 1 Tim. 2:3, 4. w19.07 20-21 §3, 4

Nansha tuetu ne ditekemena dia kupeta muoyo wa tshiendelele mu diulu anyi mu Mparadizu pa buloba, tudi ne bua kudienzeja bua kufika ku tshipatshila atshi. Nansha tuetu ne nsombelu wa mushindu kayi, katutangidi malu adi mashale panyima anyi katulekedi tshintu nansha tshimue tshitupangisha bua kutungunuka ne lubilu luetu nansha. (Filip. 3:16) Tudi mua kuikala batekemene malu kampanda kadi tumona anu bu ne: adi anengakana; makanda etu a mubidi adi mua kuikala makepele; tudi mua kuikala batate ne bakengeshibue munkatshi mua bidimu bia bungi. Nansha wewe mu nsombelu kayi, ‘kusamishi mutu bua tshintu nansha tshimue’ to. Kadi umanyishe Nzambi milombu yebe, ne yeye neakupeshe ditalala kupita muuvua muele meji. (Filip. 4:6, 7) Anu bu munyemi wa lubilu udi udienzeja ne muende muonso padi mushonyi wa ndekelu usemena, tutumayi meji etu onso anu ku tshipatshila tshia kujikija lubilu luetu bua kupeta muoyo. Tudienzejayi ne muoyo mujima, bilondeshile makanda etu ne nsombelu wetu, tuya batangile ku malu mimpe adi matuindile kumpala eku. w19.08 7 §16, 17

Bidi mua kutukolela bua kumanya tshia kuambila muntu udi ne kanyinganyinga ka difuisha. Imue misangu kupuekesha binsonji nkupite tshitudi mua kuamba. Pavua Lazalo mulunda wa Yezu mufue, Mariya ne Mâta ne bantu bakuabu bavua badila muanabu ne mulunda wabu munanga. Pakafika Yezu panyima pa matuku anayi, yeye pende “wakapuekesha binsonji” nansha muvuaye mumanye ne: ukavua pa kumubisha ku lufu. (Yone 11:17, 33-35) Dipuekesha binsonji adi diakaleja muvua Tatu wende mumvue bua lufu alu. Diakajadika kabidi ne: Yezu uvua munange dîku adi, ne bivua bushuwa bisambe Mariya ne Mâta. Bia muomumue, padi bena Kristo netu bajingulula mutudi babanange ne tuditeka pa muaba wabu, badi bamona ne: kabena nkayabu to, kadi badi ne balunda badi babatabalela ne babakuatshisha. Misangu mikuabu tudi ne bua kuanji anu kuteleja tshianana. Lekela muanenu apatule yende yonso ya munda, kufiiki munda bua ‘mêyi a tshiakulakula’ to. (Yobo 6:2, 3) Mitoyi ya balela bende badi kabayi Bantemu idi mua kuikala kabidi imusamisha meji bikole. Nunku sambila nende. Lomba “Muteleji wa disambila” bua amupeshe bukole ne amuambuluishe bua kumanya tshia kuenza.​—Mis. 65:2. w19.04 18-19 §18, 19

Nansha tuetu ku Betele anyi mu midimu mikuabu ya ku dîba ne ku dîba, tudi mua kufika ku dinanga bantu bikole, too ne muaba utudi tuenzela mudimu. Mudimu wetu wowu muimane bua bualu kampanda anyi kansanga, tudi mua kumvua bibi menemene. Bana betu badi bashala badi mua kutusamina muoyo bikole, ne tudi mua kusamisha mutu bua bualu buabu, nangananga tuetu babashiye bualu baluishi bavua batukengesha. (Mat. 10:23; 2 Kol. 11:28, 29) Bualu bukuabu, padibu batushintulula midimu anyi nansha patudi tupingana kuetu, misangu ya bungi bitu bitamba kutukolela bua kuibidilangana ne nsombelu. Bana betu badi midimu yabu mimane badi mua kupeta diakamue lutalu lua makuta. Badi mua kudimona bapange tshia kuenza, bashikile, ne batekete mu mikolo. Ntshinyi tshidi mua kubambuluisha? Shala pabuipi ne Yehowa. (Yak. 4:8) Mushindu kayi? Mueyemena yeye “Muteleji wa disambila.” (Mis. 65:2) Yehowa udi mua kuenza “bivule bipitshidile kule ne kule malu onso atudi tulomba anyi tuelela meji.” (Ef. 3:20) Kena utuenzela anu malu atudi tumulomba mu masambila to. Udi mua kujikija ntatu yetu mu mushindu utuvua katuyi belele meji. w19.08 21 §5, 6

Bantu batu bamba ne: “Armagedone” mmvita ya bingoma binene bia mbutula anyi nkabutu ka buloba bujima. Kadi Bible udi wamba ne: Armagedone udi ne lumu luimpe, bualu butudi ne bua kusankila! (Buak. 1:3) Mvita ya Armagedone kayakubutula bantu bonso to, neyisungile bukua bantu! Bua tshinyi tudi tuamba nanku? Mvita eyi neyibutule bukokeshi bua bantu bua kumona mua kusungila bukua bantu. Bua kubusungila, neyibutule bantu babi, ishiya bantu bakane ne muoyo. Neyibutule kabidi bantu badi banyanga buloba. (Buak. 11:18) Muaku “Armagedone” udi anu muaba umue mu Bible, ne udi ufumina ku muaku wa mu tshiena-Ebelu udi umvuija “Mukuna wa Megido.” (Buak. 16:16; dim.) Megido uvua tshimenga tshia mu Isalele wa kale. (Yosh. 17:11) Kadi Armagedone kena uleja muaba wetu muena dîna eu pa buloba to. Bua kuamba bualu pa bualu, udi uleja nsombelu wa disangisha “bakalenge ba pa buloba bujima budi bantu basombele” bua kuluisha Yehowa.​—Buak. 16:14. w19.09 8 §1-3

Muntu mukaji au uvua ukeba diambuluisha ne muoyo mujima. Uvua muye kudi baminganga ba bungi bua bamuondope. Wakenza bidimu 12 utata anu kutata ne disama. Bilondeshile mikenji ya Mose, uvua mukoya. (Lew. 15:25) Pashishe yeye kumvua ne: Yezu uvua wondopa babedi; yeye kuya kumukeba. Pakamupetaye, wakamulenga ku luzemba lua tshilamba tshiende tshia pamutu, diakamue yeye kumvua bimpe! Kadi Yezu kavua anu mumuondope patupu to, uvua muenze kabidi bua adimone ne: uvua ne mushinga. Tshilejilu, pavua Yezu uyukila nende, wakamubikila ne musangelu ne kanemu konso ne: “Muananyi wa bakaji.” Bushuwa, muntu mukaji au wakapetulula bukole, yeye kukankamana! (Luka 8:44-48) Udi mumone tshivua muntu mukaji au muenze’s? Uvua mudienzeje bua kuya kudi Yezu. Nansha tuetu lelu tudi ne bua kudienzeja bua kuya kudi Yezu. Tshikondo tshietu etshi, Yezu kakuenza tshishima bua kuondopa bantu badi baya kudiye badi ne masama a ku mubidi to. Kadi utshidi anu ubabikila wamba ne: “Luayi kundi, . . . nennupeshilule bukole.”​—Mat. 11:28. w19.09 20 §2, 3

Muprofete Zekâya ukavua pende mumanyishe bualu bua muomumue ebu wamba ne: “Mu matuku au bantu dikumi ba miakulu yonso ya bisamba nebakuate, eyowa, nebakuate bikole ku muzabi wa muena Yuda, bamba ne: ‘Tudi basue kuya nenu, bualu tudi bumvue ne: Nzambi udi nenu.’” (Zek. 8:23) Bantemu ba Yehowa mbajingulule ne: bua bantu ba miakulu yonso kusangishibua, bidi bikengela kuyisha lumu luimpe mu miakulu ya bungi. Lelu tudi tuenza mudimu munene menemene wa dikudimuna, tuwenza mu miakulu nkama ne nkama; wa nunku kawutu muanji kuenzeka to. Bidi bimueneka patoke ne: Yehowa udi wenda usangisha musumba munene wa bantu ba mu bisamba bionso. Etshi ntshishima tshidiye wenza matuku etu aa! Bu mudi Bible ne mikanda mikuabu idi imumvuija bikudimuna mu miakulu ya bungi nunku, bena mu musumba eu badi batendelela Yehowa mu buobumue nansha mudibu bafumine miaba mishilashilangane. Bantu ba Yehowa mbamanyike kabidi bimpe bua mudibu bayisha ne tshisumi ne banangangane bu bana ba muntu. Bualu ebu budi bukolesha ditabuja dietu bikole be!​—Mat. 24:14; Yone 13:35. w19.09 30-31 §16, 17

Mu dikenga dinene, bantu nebakeme bikole bua malu enzeka. Nebamone bintu bionso bivuabu beyemene, mmumue ne: malongolodi a tshididi, a bungenda mushinga, ne makuabu a pa buloba bituadija kubutuka. Nebikale ne “kanyinganyinga,” bumvua buôwa bamona pamuapa ne: bu mukadibu mu tshikondo tshibi tshitambe tshitu katshiyi tshianji kuikalaku, kuabu kukadi pa kujika. (Sef. 1:14, 15) Bidi bimueneka ne: tshikondo atshi, nsombelu neatambe kukolela kabidi ne bantu ba Yehowa. Bu mutudi katuyi ba pa buloba, netupete pamuapa ntatu. Netuikale pamuapa mua kupangila too ne nshima ya kudia. “Mupika wa lulamatu udi mudimuke” ukadi mubange kutulongolola bua tushale ne lulamatu mu dikenga dinene. (Mat. 24:45) Mmuenze nanku mu mishindu ya bungi. Tuangate anu tshilejilu tshimue tshia mpungilu ivua milue pa dîba diayi ituvua benze mu 2016-2018. Bavua batukankamijamu bua kukolesha ngikadilu itudi nayi dijinga bu mutudi tuenda tusemena pabuipi ne dituku dia Yehowa. w19.10 14 §2; 16 §10; 17 §12

Patudi anu tumina biakudia, mubidi nkayawu udi ubanga kubitata ne bidiishi bia mubidi bidimu bidi bibuelekana mu mubidi mujima. Biakudia bimpe bidi bifila makanda a mubidi; bia bibi bidi biobi binyanga mubidi. Tshidibi bienza mu mubidi katshiena mua kumueneka diakamue to, kadi tshitu tshilua kumueneka pashishe. Ke mudibi kabidi patudi tusungula mishindu ya dipitshisha kapepe; tuetu ke badi ne bukenji bua kusungula tshitudi basue kubueja mu lungenyi luetu. Padi malu au abuela mu lungenyi luetu, owu nkayawu ke adi abanga kushintulula mushindu utudi tuela meji ne utudi tudiumvua. Mushindu muimpe wa dipitshisha kapepe udi utupeshilula bukole, kadi wa mubi udi utunyanga. (Yak. 1:14, 15) Tshitu dipitshisha kapepe mu mushindu mubi dikebesha katshitu tshimueneka diakamue to, kadi kamana kamana tshitu tshilua anu kumueneka. Ke bualu kayi Bible udi utudimuija ne: “Tshionso tshidi muntu ukuna, ke tshiapuolaye kabidi; bualu muntu udi ukunyina mubidi wende bintu neapuole dibola dia kudi mubidi wende.” (Gal. 6:7, 8) Bidi bikengela kubenga mishindu yonso ya dipitshisha kapepe idi ikankamija malu adi Yehowa mukine.​—Mis. 97:10. w19.10 30 §12-14

Yehowa uvua muleje mudiye mutunange pavuaye mufile Muanende bua kutupikula. (Yone 3:16) Ntshinyi tshitudi mua kuenza bua kuleja ne: tudi ne dinanga bu dia Yehowa? Tuikale tuangata bena Kristo netu bonso ne mushinga wa bungi, ne tuakidila ne disanka dionso “mukoko mujimine” udi upingana kudi Yehowa. (Mis. 119:176; Luka 15:7, 10) Patudi tudifila bua bena Kristo netu, tshilejilu tubambuluisha padibu bakengela tshintu, bidi bileja mutudi babanange. (1 Yone 3:17) Yezu wakelela bayidi bende mukenji wa kuikala ne dinanga didi dibasaka bua kudifila bua bakuabu. (Yone 13:34, 35) Mukenji wa Yezu eu mmupiamupia bualu udi utulomba bua kuikala ne dinanga divuabu kabayi balombe bena Isalele mu mikenji ivua Nzambi mubapeshe. Bilondeshile mukenji eu, tudi ne bua kunanga bana betu anu bu muvua Yezu mutunange, mmumue ne: kuikala ne dinanga didi ditusaka bua kudifila bua bakuabu. Tudi ne bua kunanga bena Kristo netu kupita mutudi badinange. Tudi ne bua kubananga bikole, tuitaba nansha bua kubafuila, anu bu muvua Yezu mutufuile. w19.05 4 §11-13

Bua kupeta nyuma muimpe, tudi ne bua kumulomba ne disuminyina. (Luka 11:13) Tshilejilu tshivua Yezu mufile mu Luka 11:5-9 tshidi tshituambuluisha kabidi bua kumanya bua tshinyi Yehowa neatupeshe nyuma muimpe. Muntu udiye mutele mu tshilejilu atshi uvua musue kuikala muakididi muimpe wa benyi. Wakadimona muenzejibue bua kupesha muenyi uvua mumuendele mundankulu tshiakudia; kadi kavua ne tshintu tshia kumupesha to. Yezu wakamba ne: muena mutumba nende wakamupesha mampa bualu wakamulomba ne disuminyina dia dikima. Tshivua Yezu musue kuamba ntshinyi? Bikala muntu mupange bupuangane witaba bua kuambuluisha udi umulomba tshintu ne disuminyina, Tatu wetu wa mu diulu muena malu mimpe udi mua kupanga mua kuambuluisha muntu udi umulomba nyuma muimpe ne disuminyina anyi? Nunku mbimpe tusambile batuishibue ne: patudi tulomba Yehowa nyuma muimpe ne disuminyina neatupeshaye. (Mis. 10:17; 66:19) Tuikale batuishibue ne: nansha mudi Satana utuluisha anu kutuluisha kayi utshioka, tuetu netumutshimune. w19.11 13 §17-19

Yezu uvua mumanye ne: kuvua misangu ivuaye yeye ne bayidi bende dijinga ne dikisha. Kadi bantu ba bungi tshikondo atshi, nansha lelu kabidi, badi mua kuikala bafuanangane ne muntu mubanji wa mu tshilejilu tshivua Yezu mufile. Muntu au uvua udiambila ne: Ndi ‘ngikisha, ndia, nnua, nsanka.’ (Luka 12:19; 2 Tim. 3:4) Muoyo wende uvua anu ku dikisha ne ku masanka. Kadi Yezu ne bapostolo bende kabavua bobu nanku to; kabavua badifila mu masanka to. Lelu, tudi tuditatshitsha bua kuidikija Yezu patudi tuangata dîba ditudi katuyi ku mudimu bua kuikisha ne kuyisha bakuabu ne kubuela mu bisangilu. Mu bulelela, kuvuija bantu bayidi ne kubuela mu bisangilu bidi ne mushinga wa bungi kutudi, bitusaka bua kuenza tshionso tshitudi mua kuenza bua kudifila mu malu a tshijila aa. (Eb. 10:24, 25) Nansha tuetu mu dikisha, tudi tulama tshibidilu tshietu tshia kubuela mu bisangilu muaba wonso utudi, ne tukeba mpunga ya kuyisha bantu batudi tutuilangana nabu.​—2 Tim. 4:2. w19.12 7 §16, 17

Yehowa utu utulekela bua kudisunguila tshitudi basue kuenza. Udi utulongesha mua kuangata mapangadika mimpe, ne patudi tuangata mapangadika adi amusankisha, udi utuambuluisha bua kuakumbaja. (Mis. 119:173) Tuetu ne tshibidilu tshia kutumikila mibelu ya meji itudi tupeta mu Dîyi dia Nzambi, netulue bantu badi bangata mapangadika mimpe. (Eb. 5:14) Kadi nansha tuetu bangate dipangadika dimpe, bidi mua kututatshisha bua kujikija tshituvua batuadije. Tuangate bilejilu ebi: Muanetu kampanda utshidi nsongalume udi wangata dipangadika dia kubala Bible mujima. Udi ukokesha bua kumubala mu mbingu ya ntuadijilu kadi ulua kulekela bua bualu kampanda. Muanetu wa bakaji udi wangata dipangadika dia kulua mpanda-njila wa pa tshibidilu, kadi udi wenda uladikija dituku dia yeye kutuadija. Kasumbu ka bakulu kadi kangata dipangadika bua kukumbula bantu ba bungi mu makumbula a bulami, kadi badi babuela muabu mua nzubu balala eku ngondo yenda ipita. Nansha mudi malu aa mashilangane, mmafuanangane ku bualu bumue. Bana betu aba ki mbakumbaje mapangadika abu bimpe menemene to. w19.11 26 §1, 2

Yezu wakafuanyikija tshikondo tshietu etshi ne “matuku a Noa,” ne kakuyi mpata, tudi mu “bikondo bia malu makole bidi bikole mua kupita nabi.” (Mat. 24:37; 2 Tim. 3:1) Bua bualu ebu, balume bakuabu ne bakaji babu mbafike ku dimona ne: mbimpe kuanji kubenga kulela bua kuenzela Yehowa mudimu bikole. Mulume ne mukaji badi ne meji bobu bamone ne: bidi bikengela kulela bana, ne bajinga kumanya bungi bua kubalela, mbimpe ‘babadike bungi bua makuta adibu ne bua kutula.’ (Luka 14:28, 29) Baledi bakadi bakoleshe bana badi bamba ne: kukolesha bana kutu kulomba makuta. Kutu kulomba kabidi dîba ne makanda. Nunku, mbimpe mulume ne mukaji bele meji bua nkonko bu mudi eyi: ‘Nebikengele bua tuetu bonso babidi tuenze mudimu bua kukumbaja majinga a dîku dietu a buatshia buila anyi? Tudi bapetangane bua tshidi “majinga a buatshia buila” umvuija anyi? Bana nebalonde dikasa dia nganyi?’ Mulume ne mukaji badi bayukila bua malu aa ne lutulu luonso badi batumikila mêyi adi mu mvese wa dituku dia lelu. w19.12 23-24 §6, 7

Mupostolo Paulo wakatuilangana ne ntatu milondangane ivua miambe kumushipesha. (2 Kol. 11:23-28) Uvua utata kabidi ne ‘dieba divua mu mubidi wende.’ Dieba adi divua mua kuikala disama kampanda. (2 Kol. 12:7) Bualu bukuabu, pavua Dema mumuele mâyi ku makasa, biakamutonda bikole. Dema eu uvua muenze nende mudimu musangu kampanda, kadi wakamulekela “bualu uvua munange ndongoluelu wa malu eu.” (2 Tim. 4:10) Paulo uvua muena Kristo muela manyi uvua ne dikima dia bungi. Uvua wambuluisha bakuabu ne muoyo mujima, kadi kuvua misangu ivuaye udiumvua mutekeshibue mu mikolo. (Lomo 9:1, 2) Paulo wakapeta busambi ne dikankamijibua bivuaye ukengela. Mmushindu kayi? Yehowa wakamukolesha ne nyuma wende. (2 Kol. 4:7; Filip. 4:13) Yehowa wakamukolesha kabidi ku diambuluisha dia bena Kristo nende. Paulo wakamba ne: bamue ba kudibu bavua ‘bamusamba bikole.’ (Kolos. 4:11) Mu bavuaye mutele mu mêna muvua Alistâko, Tukiko, ne Mâko. Bakakolesha Paulo, bamuambuluisha bua kunanukila mu ntatu. w20.01 8 §2, 3

Yezu wakaleja kabidi ne: bobu kabayi bele muntu manyi, kakuena mushindu wa kumumvuija menemene tshidi ‘kuledibua tshiakabidi,’ anyi ‘kuledibua kudi nyuma’ kumvuija to. (Yone 3:3-8) Ntshinyi tshidi tshishintuluka mu ngelelu wa meji wa bena Kristo padibu babela manyi? Kumpala kua Yehowa kubelaye manyi, bavua banange ditekemena diabu dia kupeta muoyo pa buloba. Bavua bindile ne muoyo kuulu kuulu bua kumona dîba diumbusha Yehowa malu mabi onso ne kuvuija buloba mparadizu. Pamuapa bakavua badimona benda bakidila bena mu mêku abu anyi balunda babu bavua bafue. Kadi padibu babela manyi, badi batuadija kuela meji mushindu mukuabu. Bua tshinyi nanku? Ki mbualu kabatshivua kabidi basanka ne ditekemena dia kupeta muoyo pa buloba to. Meji abu ki mmashintuluke bua tunyinganyinga anyi bualu bavua basame masama a mutu to. Kabavua batuadije kumvua musangu umue ne: kupeta muoyo wa kashidi pa buloba kuvua mua kulua kubatonda to. Kadi Yehowa mmuenze mudimu ne nyuma wende bua kushintulula mushindu uvuabu bela meji ne ditekemena divuabu banange. w20.01 22 §9-11

Bilondeshile Mikenji ivua Nzambi mupeshe bena Isalele, bantu bavua Nzambi muteke abu bavua balumbuluisha bilumbu bia malu a ntendelelu, bia pankatshi pa bantu, ne bia malu makuabu avua ashipa mikenji. Kadi bilondeshile “mukenji wa Kristo,” bakulu badi ne mudimu wa kulumbuluisha anu bilumbu bia malu a ntendelelu. (Gal. 6:2) Mbamanye ne: Nzambi mmupeshe bakokeshi ba mbulamatadi mudimu wa kulumbuluisha bilumbu bionso bidi kabiyi bitangila malu a ntendelelu. Padi bakokeshi balumbuluisha bantu, badi mua kubakosela bibawu bu mudi tshia kufuta makuta bungi kampanda anyi tshia buloko. (Lomo 13:2-4) Ntshinyi tshitu bakulu benza padi muntu wenza mpekatu? Batu bakonkonona bilumbu ku diambuluisha dia Bible bua kuangata mapangadika. Mbamanye bimpe ne: mukenji wa Kristo mmushindamene pa dinanga. Nunku dinanga nedibasake bua kukeba tshidibu mua kuenza bua kuambuluisha bantu bonso ba mu tshisumbu badi mpekatu au mushiye ne tunyinganyinga. Dinanga nedisake bakulu bua kukonkonona malu aa: ‘Muenji wa mpekatu au mmunyingalale anyi? Tudi mua kumuambuluisha bua akajilule malanda ende ne Yehowa anyi?’ w19.05 7 §23, 24

Pavua Yezu muambe mêyi adi kuulu aa, uvua mumanye bimpe ne: Tatuende uvua Mpokolo wa muoyo wende ne Mumukuatshishi. Yezu uvua weyemena Tatuende ne muoyo mujima, ne Yehowa pende uvua umukumbajila majinga ende a ku mubidi. Bualu bua mushinga mukole buvua ne: Yehowa uvua umutabalela bua ashale ne lulamatu. (Yone 4:4) Yehowa udi utukumbajila majinga etu a mu nyuma. Mu Dîyi diende, udi utuleja tshidiye menemene, malu adiye mulongolole bua kuenza, tshivuaye mutufukile, ne tshienzeka kumpala eku. Wakaleja muvuaye utabalela yonso wa kutudi pavuaye mutulongeshe bua kufika ku dimumanya ku diambuluisha dia baledi betu anyi dia muntu mukuabu. Utshidi utuambuluisha kabidi ku butuangaji bua bakulu badi batunange ne bena Kristo netu bakuabu badi bakole mu nyuma. Yehowa udi kabidi utulongesha mu bisangilu mutudi tulonga pamue ne dîku dietu dia mu nyuma. Mu mishindu eyi ne mu mikuabu, Yehowa udi uleja mudiye Tatu udi utabalela yonso wa kutudi.​—Mis. 32:8. w20.02 3 §8; 5 §13

Tuetu tumvuila bakuabu mukawu, katuakushala nabu mu ditalala to. Bidi bikengela tumbushe mukawu mu mioyo yetu ne katuikadi tusaka bakuabu bua kumvuilangana mukawu to. Ntshinyi tshitudi nangananga mua kuenza bua kuambuluisha bakuabu bua kabikadi bumvuilangana mukawu? Mmunyi mutudi mua kukeba ditalala? Mmuenenu wetu wa malu ne malu atudi tuenza bidi mua kuambuluisha bakuabu bikole anyi kubanyanga. Bena panu mbasue bua tuikale ‘tuleja bintu’ bitudi nabi. (1 Yone 2:16) Kadi lungenyi elu lutu lukebesha anu mukawu. Tuetu katuyi tuakula misangu yonso bua bintu bitudi nabi anyi bitudi balongolole bua kusumba, katuakubueja bantu mukawu munda to. Mukuabu mushindu utudi katuyi mua kukebesha mukawu ngua kuikala ne bupuekele patudi ne midimu mu tshisumbu. Tuetu tukoka ntema ya bantu ku midimu itudi nayi mu tshisumbu, tudi mua kubajula mukawu. Kadi patudi tuleja mutudi tutabalela muntu ne muntu ne muoyo umue ne tuitaba ne: batu benza pabu malu mimpe, tudi tubambuluisha bua basanke ne bidibu nabi ne tudi tuenza bua tshisumbu tshishale mu ditalala ne mu buobumue. w20.02 18 §15, 16

Udi mua kulongela malu a Yehowa ku bifukibua. (Buak. 4:11) Elangana meji bua meji a Yehowa adi amuenekela mu bikunyibua ne nyama bidiye mufuke. Mushindu wa dikema udi mubidi webe muenza ukulongeshaku nansha malu makese. (Mis. 139:14) Elangana kabidi meji bua bukole budi Yehowa muele mu dîba, mumanye ne: dîba ngumue wa ku mitoto idi bungi bu ntunta ne ngenena. (Yesh. 40:26) Paudi wenza nanku, neunemeke Yehowa bikole. Kadi kumanya ne: Yehowa udi ne meji ne bukole bua bungi mbualu bumuepele tshianana bua ku malu adi akuambuluisha bua kudia nende malanda. Bua kunanga Yehowa bikole, bidi bikengela kumanya malu a bungi adi amutangila. Bidi bikengela wikale mutuishibue ne: Yehowa udi ukutabalela menemene. Vuluka ne: “Wewe mumukebe, neenze bua umupete.” (1 Kul. 28:9) Yehowa mmuambe ne: “Ndi mukukoke kundi.” (Yel. 31:3) Paudi wenda ujingulula malu onso adi Yehowa mukuenzele, neulue kumunanga kabidi bikole. w20.03 4 §6, 7

Mupostolo Paulo udi pende tshilejilu tshimpe bua muvuaye muteke mudimu wa kuyisha pa muaba wa kumpala. Pavuaye mu Kolinto mu luendu luende luibidi lua bumisionere, uvua mushale ne tukuta tukese, kumonaye ne: bivua bikengela atuadije kuenza ntenta. Uvua umuambuluisha anu bua kukumbaja majinga ende bua amone mua kuyisha bena Kolinto lumu luimpe ‘kabayi bafuta tshintu’ to. (2 Kol. 11:7) Nansha muvua Paulo ne bua kuenza mudimu wa bianza, uvua utungunuka ne kuteka mudimu wa kuyisha pa muaba wa kumpala, uyisha dituku dionso dia Nsabatu. Pavua nsombelu wende mulongoloke, wakapeta mushindu wa kuyisha bikole. “Wakatuadija kudifila bikole mu mudimu wa dîyi, ufila bumanyishi kudi bena Yuda bua kubajadikila ne: Yezu udi Kristo.” (Bien. 18:3-5; 2 Kol. 11:9) Pashishe pavuabu bamukuate, bamulame mu nzubu muende mu Lomo bua bidimu bibidi, uvua uyisha bantu bavua balua kumumona ne ufundilangana mikanda. (Bien. 28:16, 30, 31) Paulo uvua mudisuike bua tshintu nansha tshimue katshiangatshi muaba wa mudimu wende wa kuyisha to. w19.04 4 §9