TSHIBUTSHILU TSHIA MIKANDA TSHIA KU ENTERNETE tshia Watchtower
TSHIBUTSHILU TSHIA MIKANDA TSHIA KU ENTERNETE
tshia Watchtower
Tshiluba
  • BIBLE
  • MIKANDA
  • BISANGILU
  • es21 dib. 98-108
  • Ngondo wa 10

Kakuena filme nansha umue mu tshitupa etshi to.

Tshilema ntshienzeke mu diambula dia filme.

  • Ngondo wa 10
  • Tukonkononayi Mifundu dituku dionso—2021
  • Tumitu tua bualu
  • Ditanu dia 1/10
  • Disambombo dia 2/10
  • Dia lumingu dia 3/10
  • Dimue dia 4/10
  • Dibidi dia 5/10
  • Disatu dia 6/10
  • Dinayi dia 7/10
  • Ditanu dia 8/10
  • Disambombo dia 9/10
  • Dia lumingu dia 10/10
  • Dimue dia 11/10
  • Dibidi dia 12/10
  • Disatu dia 13/10
  • Dinayi dia 14/10
  • Ditanu dia 15/10
  • Disambombo dia 16/10
  • Dia lumingu dia 17/10
  • Dimue dia 18/10
  • Dibidi dia 19/10
  • Disatu dia 20/10
  • Dinayi dia 21/10
  • Ditanu dia 22/10
  • Disambombo dia 23/10
  • Dia lumingu dia 24/10
  • Dimue dia 25/10
  • Dibidi dia 26/10
  • Disatu dia 27/10
  • Dinayi dia 28/10
  • Ditanu dia 29/10
  • Disambombo dia 30/10
  • Dia lumingu dia 31/10
Tukonkononayi Mifundu dituku dionso—2021
es21 dib. 98-108

Ngondo wa 10

Ditanu dia 1/10

Mêsu a Yehowa adi akenzakana pa buloba bujima bua kuleja bukole buende kudi bantu badi ne muoyo mujima kudiye.​—2 Kul. 16:9.

Kudi malu a bungi adi ajadika ne: Yehowa udi ulama batendeledi bende lelu. Tuelabi meji bua bualu ebu: Tudi tuyisha bulelela ne tubulongesha pa buloba bujima. (Mat. 28:19, 20) Patudi tuenza nunku, tudi tuela malu mabi a Diabolo patoke. Bulelela, bu Satana muikale ne bukole, uvua mua kuimanyika mudimu wetu, kadi kena mua kukumbana to. Nunku katutshinyi nyuma mibi to. Tuetu balamate Yehowa, nyuma mibi kayena mua kutuenzela bualu bubi buashala kashidi to. Kadi tuetu bonso tudi ne bua kukandamena nyuma mibi ne kueyemena Yehowa. Tuetu benze nunku, netupete mabenesha a bungi, ne Satana kakutupambuisha ne mashimi ende to. Katuakuzakala bua bademon to. Bualu bua mushinga mukole menemene budi ne: netukoleshe bulunda buetu ne Yehowa. Muyidi Yakobo wakafunda ne: “Kandamenayi Diabolo, ne yeye neanunyeme. Semenayi pabuipi ne Nzambi ne yeye neasemene pabuipi nenu.”​—Yak. 4:7, 8. w19.04 24 §15; 25 §18

Disambombo dia 2/10

Mamuma a difu ndifutu.​—Mis. 127:3.

Bana bebe ndipa dia tshijila, “bumpianyi bua kudi Yehowa.” Mudimu wa kukuba bana bebe udi pa makaya ebe. Ntshinyi tshiudi mua kuenza bua kubakuba bua kababanyangi? Tshia kumpala, keba bua kumanya malu a dinyanga bana. Keba bua kumanya ne: mbantu ba mushindu kayi batu banyanga bana, ne mmayele kayi atubu babashimakaja nawu. Dimukila njiwu idi mua kumueneka. (Nsu. 22:3; 24:3) Ikala mumanye ne: misangu ya bungi bantu batu banyanga bana mbantu badi bana bamanye bimpe ne beyemena. Tshibidi, ikala uyukila ne bana bebe bimpe. (Dut. 6:6, 7; Yak. 1:19) Ikala mumanye ne: bana batubu banyange kabatu basue kuambila muntu bualu abu to. Badi mua kuikala batshina ne: muntu kakuitaba tshidibu bamba to, anyi bantu badi babanyange abu badi mua kuikala babakanyine bua kabambi. Wewe mumone ne: kudi bualu, bela nkonko ne budimu bua bakuambilabu ne ubateleje ne lutulu padibu bakuandamuna. Tshisatu, longesha bana bebe. Balongesha tshia kuamba ne tshia kuenza padi muntu ukeba kubalenga mu mushindu mubi. w19.05 13 §19-22

Dia lumingu dia 3/10

Muntu yonso udi ne lutambishi mu muoyo udi tshintu tshibi kumpala kua Yehowa.​—Nsu. 16:5.

Bua tshinyi Yehowa mmukine bena lutambishi? Bumue bualu mbua ne: bantu badi ne budinangi ne badi basaka bakuabu bua kuikala nabu, badi ne lutambishi anu bu Satana. Anji elabi meji, Yezu ke uvua Nzambi muenze nende mudimu bua kufuka bintu bionso; kadi dimue dituku Satana udi udikuma pa tshiadi, udiambila ne: Yezu uvua ne bua kumukukuila ne kumutendelela! (Mat. 4:8, 9; Kolos. 1:15, 16) Lutambishi lua buena elu ludi bantu nalu ludi lujadika mudi meji a bena panu mikale bupote kumpala kua Nzambi. (1 Kol. 3:19) Kadi Bible udi utuambuluisha bua kuikala ne nkatshinkatshi mu mushindu utudi tudimona. Bilondeshile Bible, kudinanga mu mushindu muakanyine ki nkubi to. Yezu wakamba ne: ‘Nanga mukuebe muudi mudinange.’ Dîyi edi didi dileja ne: mbimpe kutabalela majinga etu mu mushindu mukumbanyine. (Mat. 19:19) Kadi Bible kena ulongesha ne: tudi ne bua kudimona bapite bakuabu to. Udi wamba ne: “Kanuenji bualu nansha bumue ne lungenyi lua dikokangana anyi lua kudimona bapite bakuabu, kadi ne didipuekesha, numone bakuabu bu banupite nuenu.”​—Filip. 2:3; Lomo 12:3. w19.05 24 §13, 14

Dimue dia 4/10

Lekelayi kuikala nufumbibua kudi ndongoluelu wa malu eu, kadi nushintuluke pa kukudimuna meji enu.​—Lomo 12:2.

Anji vuluka malu auvua ne bua kushintulula pauvua muitabe bulelela ne muangate dipangadika dia kuenzela Yehowa mudimu. Bua ba bungi ba kutudi, bivua bikengela kulekela malu mabi. (1 Kol. 6:9-11) Tudi ne dianyisha dia bungi kudi Yehowa bua muvuaye mutuambuluishe bua kulekela malu mabi au! Kadi katuedi meji ne: nkujike to. Nansha mutuvua balekele kuenza mpekatu ituvua tuenza kumpala kua kubatijibua, tudi ne bua kutungunuka ne kudienzeja bua kuepuka tshintu kayi tshionso tshidi mua kutupingaja ku malu mabi au. Tudi ne bua kuenza malu abidi. Bua kumpala, tudi ne bua ‘kulekela kuikala kufumbibua’ kudi bena panu anyi katuyi tubalekela batunyanga. Buibidi, tudi ne bua ‘kushintuluka’ pa kukudimuna meji etu. Ki ndishintuluka dia pamutu pamutu to. Kadi ndishintuluka dia tshitudi menemene munda muetu. Tudi ne bua kukudimuna meji etu, mbuena kuamba ne: mushindu utudi tuela meji, utudi tudiumvua, ne majinga etu. w19.06 9 §4-6

Dibidi dia 5/10

Wewe, Yehowa, udi muambuluishi wanyi ne munsambi.​—Mis. 86:17.

Patudi ne tunyinganyinga, tuetu tubuela mu bisangilu bia bena Kristo, tudi mua kupetulula bukole. Patudi mu bisangilu, tudi tupesha Yehowa mpunga mikuabu ya yeye kuikala ‘muambuluishi wetu ne mutusambi.’ Udi utukoleshamu ku diambuluisha dia nyuma wende muimpe, dia Dîyi diende, ne dia batendeledi bende. Tudi tupetamu kabidi mpunga wa “kukankamijangana.” (Lomo 1:11, 12) Muanetu kampanda wa bakaji diende Sophia wakamba ne: “Yehowa ne bena Kristo nanyi bakangambuluisha bua kupita bimpe ne tunyinganyinga tuanyi. Bisangilu bivua ne mushinga wa bungi kundi. Ngakamona ne: kuyisha bikole ne kudifila bikole mu tshisumbu kuvua kungambuluishe bua kupita bimpe ne tunyinganyinga tuanyi.” Patudi tudiumvua batekete mu mikolo, tuvuluke ne: Yehowa mmutulaye bua kujikija tunyinganyinga tuetu bua kashidi mu matuku atshilualua, ne udi utuambuluisha bua kupita natu bimpe mpindieu. Udi utupesha “dijinga ne bukole” bua kupita bimpe ne ditekeshibua mu mikolo ne meji a dishikila atudi nawu.​—Filip. 2:13. w19.06 19 §17, 18

Disatu dia 6/10

Ndayi, nuambile bana betu lumu elu bua bamone mua kuya mu Galela, nebammuenenaku.​—Mat. 28:10.

Yezu uvua ne bua kuikala ne mêyi kampanda a mushinga wa bungi a kuambila bayidi bende, bualu dituilangana adi divua tshintu tshia kumpala tshivuaye mulongolole panyima pa dibishibua diende ku lufu! Mu tshisangilu tshivua Yezu mulongolole atshi, wakakula bua mudimu wa mushinga mukole uvua bayidi bende ne bua kukumbaja mu bidimu lukama bia kumpala; mudimu au ngutudi tukumbaja petu lelu. Wakamba ne: “Ndayi nuvuije bantu ba mu bisamba bionso bayidi, . . . nubalongesha mua kutumikila malu onso andi munuambile.” (Mat. 28:19, 20) Yezu uvua musue bua bayidi bende bonso bayishe. Kavua mutumine anu bapostolo bende ba lulamatu 11 nkayabu dîyi adi to. Bua tshinyi tudi tuamba nanku? Tuanji kuamba: anu bapostolo abu ke bavuapu pavuaye mutume dîyi dia kuvuija bantu bayidi ku mukuna wa ku Galela au anyi? Vuluka ne: muanjelu wakambila bakaji abu ne: ‘Nenumumuenene ku Galela.’ (Mat. 28:7) Nunku, bakaji ba lulamatu abu bavua ne bua kuikala pabu muaba au. w20.01 2-3 §1-4

Dinayi dia 7/10

Bu munudi kanuyi ba pa buloba, kadi munusungule mu ba pa buloba, bua bualu ebu ba pa buloba mbanukine.​—Yone 15:19.

Yezu wakumvuija bua tshinyi tudi ne bua kuikala batuishibue ne: nebatuluishe. Wakamba ne: bena panu nebatukine bualu katuena ba pa buloba to. Dikengeshibua kadiena dileja ne: Nzambi katshiena utuanyisha to. Kadi didi dileja ne: tudi tuenza tshidi tshiakane! Bantu betu bendenda aba kabena mua kutupangisha bua kuenzela Yehowa Nzambi wa Bukole Buonso mudimu nansha. Ba bungi mbatete, kadi bele bua tshiombe musabu. Mona tshivua tshienzeke mu Mvita mibidi ya buloba bujima. Tshikondo atshi, mbulamatadi ya matunga a bungi yakakengesha Bantemu ba Yehowa bikole. Bavua bakandike midimu yabu mu Allemagne kudi bena Nazi; mbulamatadi wa mu Australie, wa mu Canada, ne ya mu matunga makuabu yakayikandika payi. Kadi mona tshiakenzeka. Mu 1939 pavua mvita ayi mituadije, kuvua bamanyishi 72 475 pa buloba bujima. Kadi pakajika mvita mu 1945, luapolo yakaleja ne: ku diambuluisha dia Yehowa, bamanyishi bakavua 156 299. Bungi bua bamanyishi buakavula, kupitabu bua kumpala misangu ibidi ne bia mu njila! w19.07 9 §4, 5

Ditanu dia 8/10

Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.​—Yone 13:35.

Nansha wewe kuyi ulonga Bible ne muntu, kudi malu audi mua kuenza bua kuambuluisha mu mudimu wa kuvuija bantu bayidi. Tshilejilu, udi mua kuakidila bantu bapiabapia badi balua mu bisangilu ne kubambuluisha. Dîba adi, udi mua kubafikisha ku dimona ne: tudi bena Kristo balelela bualu tudi ne dinanga. Mandamuna audi ufila mu bisangilu, nansha owu mîpi menemene, adi mua kulongesha bantu bapiabapia mua kuandamuna ne muoyo mujima ne kanemu bua kuleja ditabuja diabu. Udi kabidi mua kuyisha ne mumanyishi mupiamupia ne kumuleja mua kueleshisha bantu meji ne mvese ya mu Bible. Paudi wenza nanku, udi umulongesha mua kuidikija Kristo. (Luka 10:25-28) Bena Kristo ba bungi batu ne malu a bungi a mushinga atu abangata dîba. Nansha nanku, batu bakeba dîba dia kulonga Bible ne bantu, ne bualu ebu butu bubapetesha disanka dia bungi. w19.07 17 §11, 13

Disambombo dia 9/10

Bu mundi mupue malu adi mashale panyima muoyo ne ngipatshila malu adi kumpala, ndi ndienzeja bua kufika ku tshipatshila.​—Filip. 3:13, 14.

Mupostolo Paulo kavua mulekele malu mimpe a kale avuaye muenze anyi bilema biende bia kale bimubueja mu ditanaji to. Kadi wakamba ne: bivua bikengela ‘kupua malu avua mashale panyima muoyo’ bua ‘kuipatshila malu avua kumpala,’ tuambe ne: kujikija lubilu luende bimpe. Ngamue malu kayi avua mua kumubueja mu ditanaji? Tshia kumpala, Paulo uvua muenze malu a dikema kumpala kua kuluaye muena Kristo. Kadi uvua uamona onso bu “bintu bia butshiafu.” (Filip. 3:3-8) Tshibidi, kavua mulekele didipisha bua muvuaye mukengeshe bena Kristo kumpala dimupangisha bua kuenzela Yehowa mudimu to. Tshisatu, kavua mudiambile ne: bikavuaye muenzele Yehowa bivua bikumbane, ne kabivua ne mushinga bua atungunuke to. Paulo wakenza malu a bungi mu mudimu wa Yehowa nansha muvuaye mupete ntatu ya bungi. Tshilejilu, bakamuela mu buloko, bakamututa, bakamuasa mabue, mazuwa akabatshibukila mu mâyi, wakapangila too ne biakudia ne bilamba. (2 Kol. 11:23-27) Kadi uvua mumanye ne: uvua ne bua kutungunuka ne lubilu nansha mukavuaye muenze bia bungi ne mukenge bikole. Ke tshitudi petu ne bua kuenza. w19.08 3 §5

Dia lumingu dia 10/10

Ndi nnutuma bu mikoko munkatshi mua mbua ya ditu.​—Mat. 10:16.

Bena Kristo netu ba bungi badi mu matunga adibu kabayi mua kuyisha kutoke anyi ku nzubu ne ku nzubu, ke bualu kayi badi bakeba mishindu mikuabu ya kumanyisha bantu lumu luimpe. (Mat. 10:17-20) Mu dimue dia ku matunga aa, mutangidi wa tshijengu kampanda wakafila lungenyi lua ne: mumanyishi yonso ayishe balela ne bamanyangana nabu, bena mutumba, balongi nende, ne bena mudimu nende. Mu bidimu bibidi tshianana, bisumbu biakavulangana mu tshijengu atshi bikole. Tudi mua kuikala tuetu mu ditunga mutudi tuyisha badilekelele. Kadi tshilejilu tshia bena Kristo netu ba mu matunga aa tshidi tshitulongesha bualu bua mushinga ebu: Tuikale tukeba mishindu ya kuyisha ne muetu muonso, batuishibue ne: Yehowa neatupeshe bukole budi bukengela bua kutantamena tshipumbishi nansha tshia mushindu kayi. (Filip. 2:13) Mu tshikondo tshikole tshitudi etshi, tudisuikayi bua kutumikila mibelu ivua Paulo mufundile bena Filipoyi. Tudi ne bua kukeba mua kumanya malu adi ne mushinga wa bungi, kuikala katuyi kalema, kubenga kulenduisha bakuabu, ne kukuama dimuma dia buakane. Dîba adi, dinanga dietu nedivulangane ne netutumbishishe Yehowa, Tatu wetu wa dinanga. w19.08 13 §17, 18

Dimue dia 11/10

Ndi mumone bena mudimu babande pa tubalu kadi bakokeshi benda ku makasa anu bu bena mudimu.​—Muam. 10:7.

Bantu ba bungi kabatu basue kusomba ne bantu batu bobu anu basumisha bua bakuabu benze tshidibu basue anyi batu babenga kuitaba ngenyi ya bakuabu to. Kadi bitu bitukolesha patudi tusomba ne bena Kristo netu badi ‘baditeka pa muaba wa bakuabu, banangangana bikole bu bana ba muntu, bumvuilangana luse ne badipuekesha.’ (1 Pet. 3:8) Tuetu ne budipuekeshi, patudi tusomba ne bantu ba nunku, bobu pabu badi mua kujinga bua kusomba netu. Budipuekeshi butu kabidi butupepejila malu. Mu bulelela, tudi mua kumona amue malu kaayi amueneka makane. Bantu kabatu anu batumbisha bantu batu ne dimanya dia bungi to. Bantu batu kabayi ne bua nsongo ke batubu imue misangu batumbisha. Kadi Solomo wakajingulula ne: tudi ne bua kuitaba malu a mu nsombelu anu mudiwu amu pamutu pa kumvua bitutonda bua mudiwu enda aya. (Muam. 6:9) Tuetu ne budipuekeshi, nebituteketele bua kumona malu a mu nsombelu anu mudiwu amu, katuyi tujinga bua ikale mutudi basue to. w19.09 4-5 §9, 10

Dibidi dia 12/10

Nuenu batatu, . . . tungunukayi ne [kukolesha bana benu] ne mibelu ne didimuija bia Yehowa.​—Ef. 6:4.

Bantu badi ne ndambu wa bukokeshi, bu mudi batatu, badi ne mushindu wa kuambuluisha bantu bakuabu. Yehowa mmuteke tatu ku mutu kua dîku diende, ne udi umulomba bua kulongesha bana bende ne kubabela anyi kubaludika. (1 Kol. 11:3) Kadi bukokeshi bua tatu budi ne mikalu bualu udi ne bua kubadila Yehowa malu. Yeye ngudi dîku dionso dipetele dîna kudiye. (Ef. 3:14, 15) Bua batatu kuleja ne: badi bakokela Yehowa, mbimpe benze malu ne bukokeshi buabu mudi Yehowa musue. Kanuenji malu bibi ne bukokeshi budi Yehowa munupeshe to. Itabayi bilema bienu, ne nuitabe mibelu ya mu Bible idi bantu bakuabu banupesha. Nuenu benze nunku, bena mu mêku enu nebanunemeke bua munudi ne budipuekeshi. Panudi nusambila ne bena mu mêku enu, lejayi Yehowa yenu yonso ya munda, nunku nebamone ne: nudi nueyemena Yehowa bikole. Bualu bua mushinga menemene mbuobu ebu: tekayi mudimu wa Yehowa pa muaba wa kumpala. (Dut. 6:6-9) Tshilejilu tshienu tshimpe ke tshimue tshia ku bintu bia mushinga mukole binudi mua kupesha bena mu mêku enu. w19.09 15 §8; 17 §14; 18 §16

Disatu dia 13/10

[Nuakidile Mâko] yeye mulue kunudi.​—Kolos. 4:10.

Mâko uvua ne disanka dia kuambuluisha bakuabu. Wakenza mudimu ne mupostolo Paulo ne mupostolo Petelo misangu ne misangu pavuabu bakumbaja midimu yabu, pamuapa ubambuluisha bua kupeta bintu bivuabu nabi dijinga. (Bien. 13:2-5; 1 Pet. 5:13) Paulo wakamba muvua Mâko muikale umue wa ku ‘benzejanganyi nende ba mudimu bua Bukalenge bua Nzambi’ ne muikale ‘diambuluisha divua dimukolesha.’ (Kolos. 4:10, 11, dim.) Mâko wakalua pende mulunda wa Paulo wa pa muoyo. Tshilejilu, pavuabu bele Paulo mu buloko mu Lomo bua musangu wa ndekelu bu mu 65 panyima pa Yezu, wakafunda mukanda muibidi wa kutumina Timote. Mu mukanda au, Paulo wakambila Timote bua balue ku Lomo ne Mâko. (2 Tim. 4:11) Paulo uvua ne bua kuikala musanke bikole bua muvua Mâko mumuambuluishe ne lulamatu luonso; ke bualu kayi wakalomba bua Mâko ikale nende dîba adi. Mâko wakambuluisha Paulo muvuabi bikengela, pamuapa umuambuluisha ne biakudia anyi ne bintu bikuabu bia kufunda nabi anyi bia kufundila. Dikankamijibua divua Paulo mupete divua mua kuikala dimuambuluishe bua kunanukila mu matuku ende a ndekelu kumpala kua kumushipabu. w20.01 11 §12, 13

Dinayi dia 14/10

Luayi kundi.​—Mat. 11:28.

Tudi basungule nsombelu wa didipangisha malu ne basungule mudimu mukole. Yezu uvua mutudimuije ne: nebatukengeshe. Kadi tuikale batekemene ne: Yehowa neatupeshe bukole bua kunanukila mu lutatu nansha lua mushindu kayi. Tuetu tutungunuka ne kunanukila, netulue ne bukole bua bungi. (Yak. 1:2-4) Tuikale batekemene kabidi ne: Yehowa neatupeshe bintu bitudi nabi dijinga, Yezu neatulame, ne bena Kristo netu nebatukankamije. (Mat. 6:31-33; Yone 10:14; 1 Tes. 5:11) Muntu mukaji uvua Yezu muondope “disama dia mashi apueka” au wakapetulula bukole anu dituku divuabu bamuondope adi. (Luka 8:43-48) Kadi uvua mua kupetulula bukole kashidi ne tshiendelele anu yeye mulue muyidi wa Kristo wa lulamatu. Buebe wewe, mukaji au uvua muenze tshinyi? Bikalabi ne: uvua bushuwa muitabe bua kuambula mutshi wa tshikokedi wa Yezu, dîba edi badi ne Yezu mu diulu! Malu onso avuaye mua kudipangisha bua kulonda Kristo kaavua mua kuikala nansha tshibuipi ne diakalenga edi to! Nansha tuetu ne ditekemena dia kuikala ne muoyo wa kashidi mu diulu anyi pa buloba, tudi ne disanka dia bungi bua mutudi bitabe dibikila dia Yezu dia ne: “Luayi kundi!” w19.09 25 §21, 22

Ditanu dia 15/10

Ku meji nzubu udi wibakibua, ne ku dijingulula dia malu udi ujadikibua.​—Nsu. 24:3.

Bantu ba Davidi bavua dijinga ne diambuluisha; bakaya kudi muena Isalele kampanda uvua mubanji diende Nabala bua kumulomba ndambu wa biakudia, tshionso tshivuaye mua kubapesha. Bakamona ne: bavua mua kumulomba bualu bavua bamulamine mikoko mu tshipele. Kadi bu muvua Nabala ne minu mikole, kakabapesha kantu nansha kamue to. Davidi wakafiika munda bikole, kupangadijaye bua kuya kushipa Nabala ne muntu mulume yonso wa kuende. (1 Sam. 25:3-13, 22) Kadi Abigayila mukaji wa Nabala uvua ne busunguluji bua malu ne uvua muimpe kumona. Wakaleja muvuaye ne dikima dikole, kudielaye ku makasa a Davidi umusengelela bua kadisombuedi bualu uvua mua kupia dibanza dia mashi. Wakamubela ne bukalanga buonso bua ashiye malu au mu bianza bia Yehowa. Mêyi a Abigayila mamba ne budipuekeshi ne bienzedi biende bia meji biakalenga Davidi, kufikaye ku dijingulula ne: Yehowa ke uvua mutume mukaji au. (1 Sam. 25:23-28, 32-34) Abigayila uvua muditatshishe bua kuikala ne ngikadilu ivua mienze bua Yehowa enze nende mudimu. Lelu Yehowa udi mua kuenza kabidi mudimu ne bana betu ba bakaji badi baditatshisha bua kuikala ne busunguluji bua malu ne baditatshisha bua kuakula ne bukalanga bua kukolesha mêku abu ne bana betu bakuabu mu tshisumbu.​—Tito 2:3-5. w19.10 23 §10

Disambombo dia 16/10

Bantu banyi, patukayi munkatshi muende binuikala kanuyi basue kubuelakana nende mu mpekatu yende, ne binuikala kanuyi basue kupeta tshitupa tshia bipupu biende.​—Buak. 18:4.

Bena Kristo balelela bonso badi ne bua kuikala bashilangane bikole ne bena mu Babilona Munene. Mulongi kampanda wa Bible uvua mua kuikala mu tshitendelelu kampanda tshia dishima. Uvua mua kuikala ubuela mu masangisha a mu tshitendelelu atshi anyi wenzamu pende midimu. Peshi uvua mua kuikala ufilamu makuta. Kumpala kua kumuitabilabu bua kulua muambi wa lumu luimpe, udi ne bua kukosa malanda onso ne ntendelelu wa dishima. Udi ne bua kufundila tshitendelelu tshivuaye anyi bulongolodi budi mu diumvuangana ne Babilona Munene buvuaye mukanda wa dipatukamu peshi kukosa nabi malanda onso. Muena Kristo mulelela udi ne bua kuenza bua mudimu wende kawikadi mu diumvuangana ne Babilona Munene to. (2 Kol. 6:14-17) Bua tshinyi tudi tuamba nunku tuosha ne munu muiku? Bualu katuena basue kubuelakana mu malu a malongolodi a ntendelelu ne mpekatu yawu to; mmakoya ku mêsu kua Nzambi.​—Yesh. 52:11. w19.10 12 §16, 17

Dia lumingu dia 17/10

Yehowa udi ne luse ne udi uditeka pa muaba wa bakuabu . . . Kakuikala anu utulangana bilema, peshi ushala mulaminangane munda bua kashidi to.​—Mis. 103:8, 9.

Yelemiya wakafunda mukanda udi ne dîna diende, ne pamuapa wakafunda kabidi wa 1 Bakalenge ne 2 Bakalenge. Kakuyi mpata mudimu wa difunda eu uvua mutambe kumuambuluisha bua kumanya mutu Yehowa ufuila bantu bapange bupuangane luse. Tshilejilu, wakamanya ne: pavua mukalenge Ahaba mulekele malu mabi, Yehowa wakabenga bua kubutula dîku diende dijima patshivuaye ne muoyo. (1 Bak. 21:27-29) Yelemiya wakamanya kabidi ne: Manashe uvua muenze yeye malu mabi a bungi kupita Ahaba bua kufiikisha Yehowa munda. Nansha nanku, Yehowa wakafuila Manashe luse bualu uvua munyingalale. (2 Bak. 21:16, 17; 2 Kul. 33:10-13) Malu aa adi aleja ne: Nzambi uvua uleja bantu lutulu ne ubafuila luse. Yelemiya wakidikija Nzambi, kulejanganaye pende lutulu ne kufuilanganaye luse. Mona tshivua Yelemiya muenze pavua Baluka muanji kubuela mu ditanaji pavuaye wenza mudimu uvuabu bamupeshe. Pamutu pa kukosaye nende bulunda diakamue, wakamuambila mukenji muimpe wa kudi Nzambi kayi udia tshibanga, bua kumuambuluisha.​—Yel. 45:1-5. w19.11 6 §14, 15

Dimue dia 18/10

Nzambi ki mmupange buakane bua kupuaye mudimu wenu muoyo ne dinanga dinuvua baleje bua dîna diende.​—Eb. 6:10.

Mukanda wa Lewitiki udi utuleja ne: muena Isalele uvua mua kufila mulambu wa diumvuangana kudi Nzambi ‘bua kumuela tuasakidila.’ (Lew. 7:11-13, 16-18) Muntu uvua uwufila bualu uvua musue kuwufila, kadi ki mbualu bavua bamuenzeje to. Anu bu milambu ya diumvuangana ayi, mudimu utudi tuenzela Yehowa mmushindu utudi tumuleja nkayetu mutudi tudiumvua bua bualu buende. Tudi tupesha Yehowa tshintu tshimpe menemene tshitudi natshi, ne tudi tumupeshatshi bualu tudi bamunange ne muoyo wetu mujima. Padi Yehowa umona batendeledi bende miliyo ne miliyo bamuenzela mudimu ku budisuile bua mudibu bamunange ne basue kuenza malu mudiye musue, udi umvua disanka dia katshia! Yehowa udi umona malu atudi tuenza ne tshidi tshitusaka bua kuenza ne ubiangata ne mushinga. Tshilejilu, wewe muikale mukulakaje kutshiyi kabidi mua kuenza malu a bungi muudi musue, ikale mutuishibue ne: Yehowa mmumanye ne: kuena mua kuenza kabidi malu muuvua uenza kumpala to. Udi mua kumona ne: kuena ne tshia nsongo tshia kufila, kadi Yehowa udi umona yeye ne: dinanga dikole didi munda muebe ke didi dikusaka bua kuenza tshiudi mua kuenza. Udi usanka bua kuitaba tshionso tshiudi mua kufila. w19.11 22 §9; 23 §11, 12

Dibidi dia 19/10

Luayi . . . muaba udi kawuyi bantu, nuikishe ndambu.​—Mâko 6:31.

Bua kuenza mudimu bimpe, bidi bikengela kuikala ne nkatshinkatshi. Mukalenge Solomo wakafunda ku nyuma muimpe ne: “Kudi tshikondo tshisungula bua . . . bualu buonso.” Wakakula bua dikuna dia bintu, bua dibaka, bua didila muadi, bua diseka, bua dija maja, ne bua malu makuabu. (Muam. 3:1-8) Bidi bimueneka patoke ne: mudimu ne dikisha mmalu manene abidi a mu nsombelu wa muntu. Yezu uvua uteka dîba dia mudimu ne dia dikisha pa muaba wadi. Dituku dikuabu, bapostolo bakafuma mu buambi. Bavua bayishe bikole ‘kabayi bapete nansha dîba dia kudia biakudia to.’ Yezu wakabambila mêyi adi mu mvese wa lelu aa. (Mâko 6:30-34) Nansha muvua Yezu ne bayidi bende kabayi anu bafika ku dikisha muvuabu basue, Yezu uvua mumanye ne: buonso buabu bavua dijinga ne dikisha. Kutu misangu itutu tuetu bonso tujinga kuikisha anyi kushintulula makuabu malu. Tudi mua kumuenena bualu ebu ku bualu buvua Nzambi mulongoluele bena Isalele wa kale, mmumue ne: Nsabatu wa ku lumingu. Katuena muinshi mua Mikenji ya Mose to. Nansha nanku, kukonkonona tshivua mukenji wa Nsabatu wamba kudi mua kutuambuluisha. w19.12 3 §6, 7

Disatu dia 20/10

Kanuditatshishi nansha.​—Mat. 6:31.

Yehowa mmulaye ne: neatabalele batendeledi bende ba lulamatu, ne udi udimona muenzejibue bua kukumbaja dîyi adi. (Mis. 31:1-3) Bualu bukuabu, Yehowa mmumanye ne: yeye kayi mutabalele bena mu dîku diende, bidi mua kututonda bikole. Mmulaye bua kutupesha bintu bia ku mubidi ne bia mu nyuma, ne kakuena tshintu tshidi mua kumupangisha bua kukumbaja mulayi au to! (Mat. 6:30-33; 24:45) Patudi tuvuluka tshidi Yehowa ukumbajila mêyi ende, nansha tuetu mu lutatu lua makuta, tudi bamanye ne: neatuambuluishe. Tuangate tshilejilu tshia bena Kristo ba kumpala. Pavuabu batuadije kukengesha tshisumbu bikole mu Yelushalema, “bantu bonso, pa kumbusha bapostolo, bakatangalaka.” (Bien. 8:1) Tshivua mua kubafikila ntshinyi? Bakapeta lutatu lua makuta! Pamuapa bena Kristo bavua bajimije nzubu yabu ne midimu yabu. Nansha nanku, Yehowa kavua mubalekele to; bobu pabu kabakajimija disanka diabu to. (Bien. 8:4; Eb. 13:5, 6; Yak. 1:2, 3) Yehowa neatukuatshishe petu anu muvuaye mukuatshishe bena Kristo ba lulamatu abu.​—Mis. 37:18, 19. w20.01 17-18 §14, 15

Dinayi dia 21/10

Yehowa . . . udi umona bena budipuekeshi.​—Mis. 138:6.

Pavua Davidi musungile mikoko ya tatuende kudi ntambue ne nyama wa urse, wakajingulula ne: Yehowa ke uvua mumuambuluishe bua kutshimuna nyama mibi ya tshisuku ayi. Pavuaye mutshimune Goleyata tshilobo tshia mvita, wakamona patoke ne: Yehowa ke uvua umulombola. (1 Sam. 17:37) Pavuaye kabidi mudiapuke mukalenge Shaula uvua umudiila dînu, wakajingulula ne: Yehowa ke uvua mumupandishe. (Mis. 18, mutu wa mukanda) Muena lutambishi uvua mua kuikala mudikume tshianza mu tshiadi wamba ne: mmuenze malu aa ne bukole buende. Kadi Davidi uvua ne budipuekeshi, ke bualu kayi uvua ujingulula ne: Yehowa ke uvua umuambuluisha mu nsombelu wende. Bualu ebu budi butulongesha tshinyi? Kabiena bikengela anu tuikale tulomba Yehowa diambuluisha paku kujika to. Tudi kabidi ne bua kuditatshisha bua kujingulula dîba didiye utuambuluisha ne mushindu udiye utuambuluisha. Tuetu ne budipuekeshi, netumone ne: katuena ne mufobo wa kuenza malu onso to, kumona kabidi ne: Yehowa ke udi utuambuluisha bua kuenza tshitudi katuyi mua kuenza. Patudi tumona kabidi mudi Yehowa utuambuluisha misangu yonso, malanda etu nende adi ashêma bikole. w19.12 20 §18, 19

Ditanu dia 22/10

Yehowa udi ubela bantu badiye munange, anu mutu tatu ubela muanende udi umusankisha.​—Nsu. 3:12.

Kudi malu a bungi adi atusaka bua kuitabuja ne: Yehowa udi utuangata ne mushinga. Mmutukoke kudiye ne mmumone mushindu utudi bitabe lumu luimpe. (Yone 6:44) Patuakatuadija kusemena pabuipi nende, yeye pende wakasemena pabuipi netu. (Yak. 4:8) Yehowa utu wangata kabidi dîba ne udienzeja bua kutulongesha, bileja ne: tudi ne mushinga ku mêsu kuende. Mmumanye tshitudi mpindieu ne tshitudi mua kulua. Utu kabidi utupesha dinyoka bualu mmutunange. Malu onso aa adi aleja ne: Yehowa utu utuangata ne mushinga wa bungi be! Kuvua bantu bavua bamona mukalenge Davidi bu kantu tshianana, kadi yeye uvua mumanye ne: Yehowa uvua mumunange ne uvua umukuatshisha. Dimanya adi divua dimuambuluishe bua kuikala ne mmuenenu muimpe bua nsombelu wende. (2 Sam. 16:5-7) Padi malu atutonda anyi tutuilangana ne ntatu, Yehowa udi mua kutuambuluisha bua kumona malu mu mushindu mukuabu, ne kutantamena lutatu nansha lua bishi. (Mis. 18:27-29) Padi Yehowa utuambuluisha, kakuena tshintu nansha tshimue tshidi mua kutupangisha bua kumuenzela mudimu ne disanka to.​—Lomo 8:31. w20.01 15 §7, 8

Disambombo dia 23/10

[Balongeshayi] mua kutumikila malu onso andi munuambile.​—Mat. 28:20.

Paudi ulombola dilonga dia Bible, ikala utuadija ne disambila. Pa tshibidilu, kutuadija dilonga ne disambila ne kujikija nadi mbualu buimpe menemene. Bitu nangananga bimpe kutuadija kusambila ne mulongi anu mbingu ya kumpala ya panukadi batuadije dilonga didi dimueneka ne: nediye kumpala. Tudi ne bua kuambuluisha mulongi bua kumona ne: bua kumvua Dîyi dia Nzambi bimpe, anu tuetu ne diambuluisha dia nyuma muimpe. Bamanyishi bakuabu batu basa bualu bua disambila ne mvese wa Yakobo 1:5, udi wamba ne: “Bikala umue wa kunudi mupangile meji, atungunuke ne kualomba kudi Nzambi.” Pashishe batu bebeja mulongi ne: “Ntshinyi tshitudi mua kuenza bua Nzambi kutupesha meji?” Mulongi udi pamuapa mua kuandamuna ne: bidi bikengela tusambile. Longesha mulongi webe mua kusambila. Mujadikila ne: Yehowa mmusue bua kuteleja masambila adiye wenza ne muoyo mujima. Mumvuija ne: mu masambila atudi tuenza pa nkayetu, tudi mua kunzuluila Yehowa muoyo wetu badilekelele, tumuleja malu atudi katuyi pamuapa mua kuambila muntu mukuabu to. Yehowa muine si ukatu mumanye bionso bidi munda muetu.​—Mis. 139:2-4. w20.01 2 §3; 5 §11, 12

Dia lumingu dia 24/10

Kabiena bilondeshila dijinga dia muntu anyi didienzeja diende to, kadi bidi bilondeshila Nzambi.​—Lomo 9:16.

Yehowa ke udi mumanye dîba didiye usungula bela manyi. (Lomo 8:28-30) Yehowa wakatuadija kusungula bela manyi panyima pa dibishibua dia Yezu ku lufu. Bidi bimueneka ne: bena Kristo bonso ba mu bidimu lukama bia kumpala bavua bela manyi. Kadi mu nkama ya bidimu yakalonda, ba bungi bavua badiamba muvuabu bena Kristo kabakalonda Kristo memenene to. Nansha nanku, mu bidimu abi, Yehowa wakela bantu bakese bavua bena Kristo balela manyi. Bavua benze bu blé ivua Yezu muambe ne: ivua ne bua kukolela mu lupela. (Mat. 13:24-30) Mu matuku a ku nshikidilu, Yehowa mmutungunuke ne kusungula bantu bikale mu bantu 144 000. Nanku, bu mudi Yehowa Nzambi wa meji, yeye mumone ne: bidi bikengela kusungula bamue ba ku bantu aba anu pakadi nshikidilu ukeba kufika, mu bulelela, katuena ne bua kumuela mpata to. (Lomo 9:11) Tudi ne bua kudimuka bua katuenji malu bu bena mudimu bavua Yezu muakuile mu tshilejilu kampanda tshivuaye mufile. Bakakula bibi bua tshivua mfumuabu muenzele bena mudimu bavua babange mudimu ba ndekelu.​—Mat. 20:8-15. w20.01 30 §14

Dimue dia 25/10

Bena mudimu banyi nebele mbila ya disanka.​—Yesh. 65:14.

Yehowa mmusue bua dîku diende dikale ne disanka. Kudi malu a bungi adi enza bua tuikale ne disanka mpindieu, nansha mutudi mua kutuilangana ne ntatu. Tshilejilu, tudi batuishibue ne: Tatu wetu wa mu diulu mmutunange bikole menemene. Tudi ne dimanya dijalame dia Bible Dîyi dia Nzambi. (Yel. 15:16) Tudi kabidi mu dîku didi kadiyi bu mêku makuabu didi dienza ne bantu badi banange Yehowa, banange mikenji yende mibandile ya bikadilu, ne banangangane. (Mis. 106:4, 5) Tudi mua kushala anu ne disanka bualu tudi batuishibue ne: nsombelu nealengele bikole kumpala eku. Tudi bamanye ne: Yehowa ukadi pa kumbusha bantu babi bonso ne buloba nebulue Mparadizu pikala Bukalenge buende bukokesha. Tudi kabidi ne ditekemena dilenga dia ne: nebabishe bafue bua kupetanganabu kabidi ne balela babu. (Yone 5:28, 29) Netshikale tshikondo tshia disanka dia katshia! Bualu bua mushinga mukole mbua ne: tudi batuishibue ne: mu matuku makese emu, banjelu bonso ba mu diulu ne bantu bonso ba pa buloba nebapeshe Tatu wetu wa mu diulu bunême, butumbi ne nebamutendelele, bualu mmukumbanyine malu onso aa. w20.02 13 §15, 16

Dibidi dia 26/10

Undi muenzele mpekatu nguewe, nguewe nkayebe.​—Mis. 51:4.

Wewe muenze mpekatu munene, kumusokoki to. Mutondela Yehowa mu disambila. Wewe muenze nanku, neupetaku ditalala, kondo ka muoyo kakatshiyi kakulubakaja kabidi to. Kadi wewe musue kuakajilula bulunda buebe ne Yehowa, udi ne bua kuenza bualu bukuabu. Itaba dinyoka. Pavua Yehowa mutume muprofete Natana bua kuleja Davidi mpekatu wende, Davidi kavua mudibingishe anyi mujinge kupepeja mpekatu to. Wakitaba ne lukasa luonso ne: uvua muenzele bayende wa Beta-sheba mpekatu, kadi mutambe kumuenzela Yehowa. Davidi wakitaba dinyoka divua Yehowa mumupeshe, ne Yehowa wakamufuila luse. (2 Sam. 12:10-14) Tuetu benze mpekatu munene, bidi bikengela tumuambile bantu badi Yehowa muteke bua kutulama. (Yak. 5:14, 15) Tudi kabidi ne bua kubenga kudibingisha. Tuetu bitabe dinyoka dionso didibu batupesha ne baditumikile ne lukasa, katuakunenga bua kupetulula ditalala ne disanka to. w20.02 24-25 §17, 18

Disatu dia 27/10

Bantu dikumi . . . nebakuate bikole ku muzabi wa muena Yuda, bamba ne: “Tudi basue kuya nenu, bualu tudi bumvue ne: Nzambi udi nenu.”​—Zek. 8:23.

“Bantu dikumi” badi tshimfuanyi tshia bantu badi ne ditekemena dia kupeta muoyo wa tshiendelele pa buloba. Bu mudibu bamanye ne: Yehowa mmusungule kasumbu ka bela manyi kadi tshimfuanyi tshia “muena Yuda,” badi bamona ne: kutendelela Nzambi pamue nabu ndiakalenga dinene. Nansha mutudi katuyi mua kumanya dîna dia muela manyi yonso udi pa buloba lelu, bantu badi ne ditekemena dia kusomba pa buloba badi mua “kuya” ne bela manyi. Mushindu kayi? Diandamuna didi mu mvese wa lelu. Mona ne: Bible udi wakula bua muena Yuda umue. Kadi muaku “nenu” udi uleja bantu ba bungi. Bidi biumvuija ne: muena Yuda eu kena anu muntu umue to, kadi udi uleja kasumbu kajima ka bela manyi. Bantu badi kabayi bela manyi badi benzela Yehowa mudimu pamue ne bela manyi. Kadi kabena bamona bela manyi bu balombodi babu to, bualu mbamanye ne: Yezu ke Mulombodi wabu.​—Mat. 23:10. w20.01 26 §1, 2

Dinayi dia 28/10

Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.​—Yone 13:35.

Yezu wakamba ne: bavua ne bua kumanya bayidi bende balelela bimpe menemene bobu ne dinanga dia buena divuaye nadi. Ke muvuabi bienzeke tshikondo atshi, ne ke mudibi bienzeka kabidi ne lelu. Ke bualu kayi bidi bikengela tudienzeje bua kunangangana nansha padibi bikola bua kuenza nanku. Diebeja ne: ‘Tshilejilu tshia bana betu badi batungunuke ne kunangangana nansha pavuabi bikola tshidi tshindongesha tshinyi?’ Dipanga bupuangane ditu ditutatshisha bua tuetu kunangangana bikole. Nansha nanku, tudi ne bua kudienzeja bua kuidikija Kristo. Yezu mmutuleje mushinga wa kulengejangana ne muanetu udi netu tshilumbu. (Mat. 5:23, 24) Wakamba ushindika ne: tuetu basue kusankisha Nzambi, bidi bikengela tuikale mu malanda mimpe ne bakuabu. Yehowa udi usanka patudi tuenza muetu muonso bua kulengejangana ne bena Kristo netu. Tuetu tulaminangana munda, tubenga too ne bua kulengejangana, kakuangata mudimu utudi tumuenzela ne mushinga to.​—1 Yone 4:20. w20.03 24 §1-4

Ditanu dia 29/10

Tudi tutapulula dîyi dia bulelela diamba ku bukole bua nyuma ne dîyi dia dishima diamba ku bukole bua nyuma.’​—1 Yone 4:6.

Satana, “tatu wa dishima,” mmushime bantu katshia ku tshikondo tshia Adama ne Eva. (Yone 8:44) Mu mashimi amu mudi malongesha a dishima bua lufu ne bua tshidi tshifikila muntu padiye ufua. Malongesha au mmafikishe bantu ku bilele bia bungi ne ku ditabakana malu bua buôwa bua bafue. Bua tshinyi bantu bungi nunku mbitabe mashimi a Satana? Bu mudi Satana mumanye mutu bantu bumvua bua lufu, udi ubuelelapu bua kubashima. Katutu basue kufua to, bualu bavua batufuke bua tuikale ne muoyo kashidi. (Muam. 3:11) Buetu tuetu, lufu mmuena lukuna. (1 Kol. 15:26) Nansha mudi Satana mushime bantu bikole, kudi bantu badi bafike anu ku dimanya bulelela. Lelu eu bantu ba bungi mbamanye tshidi Bible ulongesha bua tshidi tshifikila muntu padiye ufua ne bua ditekemena didiku bua bafue, ne badi bamanyisha bantu bakuabu malu aa. (Muam. 9:5, 10; Bien. 24:15) Malu aa adi atukolesha ku muoyo, atumbusha buôwa ne dielakana bia tshianana. w19.04 14 §1; 15 §5, 6

Disambombo dia 30/10

Nutungunuke ne kuambuishangana majitu, ne mu mushindu eu nenukumbaje mukenji wa Kristo.​—Gal. 6:2.

Yehowa Nzambi mmunange batendeledi bende. Utu anu mubanange, ne neatungunuke anu ne kubananga. Mmunange kabidi buakane. (Mis. 33:5) Nunku tuikale ne dishindika dia malu abidi aa: 1) Bitu bisama Yehowa ku muoyo padibu benzela batendeledi bende malu mabi. 2) Neenze bua bantu badi babenzela malu mabi bapete dinyoka. Mikenji ivua Nzambi mupeshe bena Isalele ku butuangaji bua Mose ivua mishindamene pa dinanga. Ivua isaka bantu bua kuenzela bantu bonso malu makane, too ne bavua kabayi ne wabu wa kubakuila. (Dut. 10:18) Mikenji ayi idi ileja mutu Yehowa uditatshisha bikole bua batendeledi bende. Mikenji ya Mose yakashikila mu 33 panyima pa Yezu pavua tshisumbu tshia bena Kristo tshiledibue. Nunku tudi mua kudiebeja ne: Bena Kristo bavua bashala kabayi mu bukubi bua mikenji idi mishindamene pa dinanga, idi isaka bantu bua kuenza malu makane anyi? Nansha kakese! Bavua ne mukenji mupiamupia, tuambe ne: “mukenji wa Kristo.” Yezu kavua mufundile bayidi bende mulongolongo wa mikenji to, kadi wakabambila malu a kuenza, kubapeshaye kabidi mêyi matuma ne mêyi manene bia kulonda. “Mukenji wa Kristo” udi ukongoloja malu onso avua Yezu mulongeshe. w19.05 2 §1-3

Dia lumingu dia 31/10

Nzambi wa busambi buonso . . . udi utusamba mu mateta etu onso.​—2 Kol. 1:3, 4.

Bantu bonso mbaledibue ne dijinga dia kusambibua ne batu bakumbane bua kusamba bakuabu mu mushindu muimpe. Tshilejilu, padi muana ukuluka mu manaya ne utapika mu tshinu, udi mua kunyemena kudi mama wende anyi papa wende wenda udila. Baledi kabena mua kumisha mputa au to, kadi badi mua kusamba muana. Badi mua kumuambula, kumuebeja tshivua tshienzeke, bamukupula bisonji benda bamuambila tumêyi tuimpe, bamuela mupuya pa mputa, ne pamuapa bamuelamu buanga anyi bamujingilapu tshilamba. Katantshi aka, muana udi ulekela muadi ne udi mene mua kutuadijilula kunaya. Mputa au nealue anu kuma. Kadi imue misangu, kudi mishindu idi bana mua kutapika bibi menemene, bu mudi padibu babanyanga ne malu a masandi. Badi mua kunyanga muana musangu umue patupu, anyi misangu ya bungi munkatshi mua bidimu bia bungi. Nansha biobi bienzeke musangu umue anyi ya bungi, dimunyanga adi didi mua kumushiya ne mputa mibi ku muoyo. Kudi misangu idibu mua kukuata munyangi wa muana, kumunyoka. Misangu mikuabu bidi mua kumueneka bu ne: kabakumunyoka to. Kadi nansha bobu bamunyoke diakamue, muana udiye munyange udi mua kushala utata too ne ku buntu bukulumpe. w19.05 14 §1, 2

    Mikanda ya mu Tshiluba (1982-2024)
    Patuka
    Buela
    • Tshiluba
    • Tumina bakuabu
    • Biudi musue
    • Copyright © 2025 Watch Tower Bible and Tract Society of Pennsylvania
    • Malu a kulonda
    • Mikenji ya mua kulama malu masokoka
    • Biudi witaba bua kuenzekabi mu tshiamu
    • JW.ORG
    • Buela
    Tumina bakuabu