Ngondo wa 9

Tuetu tuenza malu bimpe ne tshipedi tshia kuakula, netumanyike mutudi batendeledi ba Yehowa kudi bantu bakuabu. Nebienze bua bantu badi batumona bafike ku dimona dishilangana didi “pankatshi pa muntu udi wenzela Nzambi mudimu ne udi kayi umuenzela mudimu.” (Mal. 3:18) Tumonayi muvua tshivua tshienzekele muanetu wa bakaji mukuabu diende Kimberly tshileje mudi bualu ebu bulelela. Bavua bamupeshe mudimu wa kuenza mu kalasa, yeye ne mulongi wabu mukuabu. Bu muvuabu benze mudimu wabu au pamue, mulongi wabu wakafika ku dimona ne: Kimberly uvua mushilangane ne balongi bakuabu. Kavua ubipisha bakuende to, uvua ne mêyi mimpe a bulunda, mukana muende kamuvua mupatuka mêyi mabi to. Bivua bikemeshe mulongi wabu au, ne ndekelu wa bionso kuitabaye bua kulonga Bible. Yehowa utu usanka bikole patudi tuakula ne mêyi adi enza bua bantu banyishe bua kulonga bulelela! Tuetu bonso tudi basue bua ngakuilu wetu ikale upesha Yehowa bunême. w22.04 5-6 §5-7

Yezu wakumbusha bademon 7 munda mua Mariya wa ku Magadala! Dianyisha divuaye nadi diakamusaka bua kulua muyidi wende ne bua kumukuatshisha mu mudimu wa kuyisha. (Luka 8:1-3) Nansha muvua Mariya musanke bikole bua tshivua Yezu mumuenzele, kavua mua kuikala mumanye ne: Yezu uvua ulua kumuenzela bia bungi kupita apu to. Uvua ne bua kufila muoyo wende, “bua muntu yonso udi uleja ditabuja kudiye” apete muoyo wa tshiendelele. (Yone 3:16) Tshidibi, Mariya wakashala mulamate Yezu bua kuleja muvuaye ne dianyisha. Pavua Yezu ukenga ne muoyo ku mutshi wa makenga, Mariya uvua muimane muaba au, [umukolesha yeye ne bantu] bakuabu bavua muaba au. (Yone 19:25) Yezu mumane kufua, Mariya ne bakaji bakuabu babidi bakalua ne bintu bia dipembu dimpe ku lukita luende bua kumulaba. (Mâko 16:1, 2) Mariya wakapeta disanka dia kutuilangana ne Yezu ne kuyukila nende pakavuaye mubishibue ku lufu. Bayidi ba bungi kabakapeta diakalenga adi to.—Yone 20:11-18. w23.01 27 §4

Katuedi meji ne: bu mutuvua benzele Yehowa mudimu kumpala katuena ne bua kumuenzelawu mpindieu to. Nansha kuoku malu adi atupangisha bua kumuenzelawu bu kumpala, mbimpe tuikale anu ne bia bungi bia kuenza mu “mudimu wa Mukalenge,” tushala anu batabale ne badimuke too ne ku nshikidilu. (1 Kol. 15:58; Mat. 24:13; Mâko 13:33) Tudi ne bua kuikala ne tshisumi, tudifila ne muoyo mujima ku malu a Yehowa. Mu mukenji uvua Yezu mutumine bena ku Laodikiya uvua mulejamu bualu bua mushindu mukuabu kabidi. Bavua “tshiuyuya” mu ntendelelu wabu. Bu muvuabu balengulula malu, Yezu wakabambila ne: bavua ‘bena dikenga, ne bavua benza luse.’ Bivua bikengela bikale ne tshisumi bua Yehowa ne bua ntendelelu wende. (Buak. 3:16, 17, 19) Bidi bitulongesha tshinyi? Tuetu bakepeshe tshisumi tshietu, tudi ne bua kuikala ne dianyisha dia bungi bua bintu bimpe bionso bidi Yehowa ne bulongolodi buende batupesha. (Buak. 3:18) Katulekedi dikeba dia nsombelu wa dikala ne makuta ditubueja mu ditanaji, bitufikisha ku dilengulula malu a mu nyuma to. w22.05 3-4 §7, 8

Kukadi bidimu bia bungi bidi Yehowa ufunda mukanda wa pa buawu. Mu mukanda eu mudi mêna a bantu. Udi ubanga ne dîna dia ntemu wa kumpala wa lulamatu, Abele. (Luka 11:50, 51) Yehowa mmutungunuke ne kukumbaja mêna mu mukanda eu, lelu udi ne mêna miliyo ya bungi. Bible udi ubikila mukanda eu ne: “Mukanda wa tshivulukilu,” “mukanda wa muoyo,” anyi “muvungu wa muoyo.” (Mal. 3:16; Buak. 3:5; 17:8) Mu mukanda wa pa buawu eu mudi mêna a bantu bonso badi batendelela Yehowa ne ditshina, anyi ne kanemu kakole; badi bangata dîna diende ne mushinga wa bungi. Nebikale ne mpunga wa kupeta muoyo wa tshiendelele. Lelu Yehowa udi mua kufunda dîna dietu mu mukanda eu anu tuetu badie nende malanda a nsungansunga ku diambuluisha dia mulambu wa kupikulangana nawu wa Muanende, Yezu Kristo. (Yone 3:16, 36) Tuetu bonso tudi basue ne: bafunde dîna dietu mu mukanda eu, nansha bikale ne ditekemena dia kuya mu diulu anyi kusomba pa buloba! w22.09 14 §1, 2

Mukanda wa Buakabuluibua udi wakula bua “dragon munene mukunze bu kapia.” (Buak. 12:3) Dragon eu udi uluisha Yezu ne banjelu bende. (Buak. 12:7-9) Udi uluisha bantu ba Nzambi, ne upesha nyama ya luonji anyi mbulamatadi bukole. (Buak. 12:17; 13:4) Dragon eu nnganyi? ‘Nnyoka wa ku tshibangidilu, udibu babikila ne: Diabolo ne Satana.’ (Buak. 12:9; 20:2) Yeye ke udi panyima pa bena lukuna bakuabu bonso ba Yehowa. Ntshinyi tshiafikila dragon? Buakabuluibua 20:1-3 udi umvuija ne: muanjelu neele Satana mu dijimba dile menemene. Dijimba edi didi bu buloko. Pikalaye mu buloko emu, ‘kakupambuisha kabidi bisamba too ne pajika bidimu tshinunu.’ Ndekelu wa bionso Satana ne bademon bende nebabutudibue musangu umue bua kashidi. Ke tshidi ‘diedibua diabu mu dijiba dia kapia ne sufre’ diumvuija. Elabi meji muikala nsombelu pa buloba apa pikala Satana ne bademon kabatshiyiku. Netshikale tshikondo tshimpe tshia katshia! w22.05 14 §19, 20

Yezu uvua muenji wa mudimu wa dipoko. Pavuaye mupuekele, uvua muena mabaya. (Mâko 6:3) Baledi bende bavua baditatshisha bua kupetesha bena mu dîku diabu dinene bivuabu nabi dijinga, nunku bavua anu ne bua kuikala ne dianyisha kudi Yezu bua muvuaye ubambuluisha. Bu muvua Yezu mupuangane, uvua wenza bintu kabiyi kalema; nunku bantu bavua pamuapa basue anu bintu bivuaye wenza. Bidi anu bimueneka ne: uvua munange mudimu wende eu bikole. Kadi nansha muvuaye udifilaku, uvua kabidi muteke dîba dia kuenza malu a mu nyuma. (Yone 7:15) Pashishe, bu muvuaye muyishi, wakabela bateleji bende ne: “Kanuenji mudimu bua biakudia bidi binyanguka to, kadi enzayi mudimu bua biakudia bidi bishala bua muoyo wa tshiendelele.” (Yone 6:27) Wakamba mu muyuki wende wa pa mukuna ne: “Nudibutshile biuma mu diulu.” (Mat. 6:20) Meji a kudi Nzambi adi atuambuluisha bua kuikala ne nkatshinkatshi bua mudimu wetu wa bianza. Tuetu bena Kristo mbatulongeshe bua kuenza “mudimu bikole . . . , mudimu muimpe.” w22.05 22 §9, 10

Eunike uvua mushile Timote tshilejilu tshimpe. Kakuyi mpata, uvua mua kuikala mumone muvua bienzedi bia mamuende bileja ne: uvua munange Yehowa bikole ne kuenzela Yehowa mudimu kuvua kupetesha mamuende disanka. Bia muomumue lelu eu, bamamu ba bungi mbafike ku diambuluisha bena mu mêku abu bua kutendelela Yehowa “kakuyi dîyi.” (1 Pet. 3:1, 2) Nudi penu mua kuenza nanku. Ntshinyi tshinudi mua kuenza? Malanda enu ne Yehowa ikale pa muaba wa kumpala mu nsombelu wenu. (Dut. 6:5, 6) Utu pebe udipangisha amue masanka anu bu bamamu ba bungi. Utu ufila dîba diebe, utula makuta ebe, upumba tulu, ne udipangisha bintu bikuabu bua kutabalela majinga a ku mubidi a bana bebe. Kadi ki mbimpe udifile bikole anu mu ditabalela majinga a bana bebe au, upanga too ne dîba dia kushemeja malanda ebe ne Yehowa. Ikala udilamina dîba dia kuikala kusambila, kudilongela Bible, ne kubuela bisangilu. Wewe wenza nanku, neushemeje bulunda buebe ne Yehowa ne newikale tshilejilu tshimpe kudi bena mu dîku diebe ne bantu bakuabu. w22.04 16 §1; 19 §12, 13

Tudi tumvua disulakana bua mutudi balonge ne: katuena ne bujitu bua kuangata dipangadika dia mudi bantu ne bua kulumbuluishibua to! Bu mudi Yehowa muikale Mulumbuluishi mutambe bunene, neatabalele mudimu wa mushinga mukole eu. (Lomo 14:10-12) Tudi bashindike ne muoyo mujima ne: nealumbuluishe mu diumvuangana ne mikenji yende mipuangane ya tshidi tshimpe ne tshidi tshibi. (Gen. 18:25) Kena mua kuenza bualu budi kabuyi buakane nansha! Tudi bindile ne muoyo kuulu kuulu tshikondo tshikala Yehowa mua kujikija malu mabi onso adi dipanga bupuangane ne mpekatu bikebeshe. Tshikondo atshi, mputa yonso ya ku mubidi ne ya mu muoyo neyondapibue. (Mis. 72:12-14; Buak. 21:3, 4) Katuakuyivuluka kabidi to. Patutshidi bindile tshikondo tshilenga atshi, tudi ne dianyisha dia bungi bua mudi Yehowa mutupeshe mushindu wa kumuidikija, tufuilangana luse bu yeye. w22.06 13 §18, 19

Mulumbuluishi muimpe udi ne bua kumanya mikenji bikole. Udi ne bua kuikala ne dimanya diondoke dia tshidi tshimpe ne tshidi tshibi. Mbualu kayi bukuabu budi mulumbuluishi muimpe nabu dijinga? Udi dijinga ne kumanya mudi malu onso adi atangila tshilumbu kampanda kumpala kua kutshikosa. Nunku Yehowa mMulumbuluishi mutambe buimpe bualu utu anu mumanye mudi malu onso. Yehowa mmushilangane ne balumbuluishi bakuabu, bualu yeye utu anu umvua malu onso adi atangila tshilumbu tshidibu bamuambila mu mushindu mupuangane. (Gen. 18:20, 21; Mis. 90:8) Katu wimanyina anu pa bidi bantu bamona anyi bumvua to. Mmumanye bimpe menemene mudi malu adi muntu wenza bilondeshile ngikadilu ne bibidilu bidiye mupiane kudi baledi bende, nkoleshilu udiye mupete, muaba udiye musombele, ne bilondeshile mutu lungenyi luende anyi mutuye udiumvua. Yehowa utu kabidi umona tshidi mu muoyo. Mmumanye bimpe menemene meji ne majinga adi yonso wa kutudi nawu. Kakuena tshintu tshidiye mua kupanga kumona to. (Eb. 4:13) Nunku padi Yehowa ufuila muntu luse, udi umufuilalu bualu mmumanye malu onso mudiwu. w22.06 4 §8, 9

Tudi ne bua kumanya bimpe menemene mayele avua Satana muenze nawu mudimu kudi Yobo bualu udi ne mayele a muomumue nansha lelu. Satana udi wamba mutudi katuyi banange Yehowa menemene; wamba kabidi ne: biobi bilomba kusungila muoyo wetu, tudi tumuela nyima. Udi wamba mudi Nzambi kayi mutunange ne mudiye kayi mua kumona bionso bitudi tuenza bua kumusankisha. Bu mutudi bamanye tshidiye ukeba kuenza, katuena tuitaba bua mayele ende atudingakaje to. Mbimpe tumone ntatu bu mpunga ya kumanya tshitudi. Ntatu ivua Yobo mupete yakamuambuluisha bua kumanya amue matekete avuaye nawu, ne kuajikija. Tshilejilu, wakalonga ne: uvua ne bua kuikala ne budipuekeshi bua bungi menemene. (Yobo 42:3) Tuetu petu tudi mua kumanya tshitudi menemene patudi mu ntatu. Patudi tumanya matekete etu, tudi mua kudienzeja bua kuajikija. w22.06 23 §13, 14

Yehowa udi utujadikila ne: neatukuatshishe. Tshilejilu, kumpala kua yeye kuamba ne: “Nudi bantemu banyi,” wakamba ne: “Paudi upitshila mu mâyi, meme nengikale nebe, ne paudi upitshila mu misulu, kayakukubuikila. Paudi wendela mu kapia, kuakupia, peshi ndimi ya kapia kayakukuosha to.” (Yesh. 43:2) Patutu tuyisha, imue misangu tutu tutuilangana ne bipumbishi bidi bu mâyi muwule ne tutuilangana kabidi ne ntatu mienze bu kapia. Nansha nanku, Yehowa udi utuambuluisha, tutungunuka ne kuyisha. (Yesh. 41:13) Bantu ba bungi lelu badi babenga mukenji utudi tuyisha. Tudi anu bavuluke ne: dibenga diabu adi kadiena dileja ne: katuena tuenza mudimu wetu wa Bantemu ba Yehowa bimpe to. Bidi bitukolesha patudi tumanya ne: Yehowa udi usanka patudi tutungunuka ne kuyisha mukenji wende ne lulamatu luonso. Mupostolo Paulo wakamba ne: “Muntu yonso neapete difutu diende bilondeshile mudimu wende.”—1 Kol. 3:8; 4:1, 2. w22.11 4 §5, 6

Lelu, tudi tumona mudi mêyi a buprofete enda akumbana. Bantu “ba miakulu yonso ya bisamba” badi benda balonga mua kuakula “muakulu mukezuke” wa bulelela bua mu Bible. (Zek. 8:23; Sef. 3:9) Mu bulongolodi bua Yehowa mudi bantu bapite pa miliyo 8 ba mu matunga 240, ne bantu binunu bia bungi badi babatijibua tshidimu tshionso etshi! Kadi tshidi ne mushinga kupita bungi bua bantu ebu nngikadilu yabu ya mu nyuma, tuambe ne: “bumuntu bupiabupia” budi bayidi bapiabapia aba bapete. (Kolos. 3:8-10) Ba bungi mbalekele tshiendenda, tshikisu, kansungansunga, ne buena ditunga. Dîyi dia buprofete didi mu Yeshaya 2:4 didi dienda dikumbana; kabena ‘balonga kabidi mvita nansha.’ Patudi tudienzeja bua kuvuala bumuntu bupiabupia bidi bituambuluisha bua kukoka bantu mu bulongolodi bua Nzambi ne tudi tuleja ne: tudi tulonda dikasa dia mutangidi wetu Yezu Kristo. (Yone 13:35) Bionso ebi kabiena bienzeka ku mpukapuka to, Yezu udi utuambuluisha mudibi bikengela. w22.07 9 §7, 8

Patudi tusambila, mbimpe tuikale ne kanemu ka bungi. Elabi meji bua bikena kumona bivua Yeshaya, Yehezekele, Danyele, ne Yone bapete. Buonso buabi bidi bileja mudi Yehowa muikale Mukalenge mutambe bunene. Yeshaya ‘wakamona Yehowa musombe mu nkuasa wa bukalenge mutumbuke ne mubandishibue muulu.’ (Yesh. 6:1-3) Yehezekele wakamona Yehowa musombe mu ditempu diende dia mu diulu, bamunyunguluke kudi “nsese . . . bu ya muanza nkongolo.” (Yeh. 1:26-28) Danyele wakamona “Wa Kale wa Matuku a Bungi” muvuale bilamba bitoke, ndimi ya kapia ipatuka ku nkuasa wende wa bukalenge. (Dan. 7:9, 10) Yone wakamona Yehowa musombe mu nkuasa wa bukalenge, bamunyunguluke kudi tshintu bu muanza nkongolo mulenga bu dibue dia emerode. (Buak. 4:2-4) Patudi tuelangana meji bua butumbi bua Yehowa budi muntu kayi mua kuikala nabu, bidi bileja mutudi katuyi nansha tukumbanyina diakalenga dia kusemena kudiye mu disambila ne bituvuluija mushinga wa kumusambila ne kanemu. w22.07 20 §3

Basonga wetu, Satana neenze bua kanupetshi ditabuja dikole ne kanutambi kusemena pabuipi ne Yehowa to. Umue mushindu udiye wenza nanku ngua kubueja dielakana mu lungenyi luebe bua amue malongesha a mu Bible. Tshilejilu, ku tototo nansha ku ndandanda neutuilangane ne dilongesha didi dipendesha Nzambi dia ne: bintu mbidienze. Pautshivua muana mutekete, pamuapa kuvua utuma meji ku dilongesha edi to, kadi mpindieu uukadi mutantamane, kudi misangu idibu banulongeshadi mu kalasa. Udi mua kumona bu ne: bidi balongeshi benu bamba bua kutua dilongesha edi mpanda bidi ne mutu. Kadi pamuapa kabatu nansha banji kudifila bua kukonkonona malu adi ajadika ne: kudi Mufuki to. Vuluka dîyi dinene didi mu Nsumuinu 18:17 dia ne: “Muntu udi ulumbulula wa kumpala udi umueneka bu mubinge, too ne padi udiye nende tshilumbu ulua, ne umulondolola.” Pamutu pa kuitaba ngenyi iudi umvua mu kalasa kakuyi bijadiki, mbimpe kukonkonona malu malelela adi mu Bible, Dîyi dia Nzambi ne mu mikanda yetu. w22.08 2 §2; 4 §8

Tutu basue kumanya tshidi malu atudi tubala mu Dîyi dia Nzambi umvuija. Tshianana malu au kaakutuambuluisha menemene to. Tshilejilu, tumonayi mushindu uvua Yezu muyukile ne “mumanyi wa Mikenji mukuabu.” (Luka 10:25-29) Pavua muntu au muebeje Yezu tshivuaye ne bua kuenza bua kupeta muoyo wa tshiendelele, Yezu wakamuambuluisha bua kupeta diandamuna mu Dîyi dia Nzambi kumuebejaye ne: “Mbafunde tshinyi mu Mikenji? Mmunyi muudi ubala?” Muntu au wakafila diandamuna dimpe, kutelaye mêyi a mu Mifundu adi akula bua dinanga Nzambi ne mukuetu. (Lew. 19:18; Dut. 6:5) Kadi mona tshiakebejaye pashishe: “Mukuanyi nnganyi menemene?” Muntu au wakaleja patoke muvuaye kayi umvua bimpe menemene malu avuaye ubala to. Ke bualu kayi, kavua mumanye mua kutumikila mvese ayi bimpe to. Tutu basue Yehowa atuambuluishe bua tumvue Mifundu bimpe, nunku mbimpe tumulombe nyuma wende muimpe bua tumone mua kutuma ntema ku bitudi tubala, ne mulomba akuambuluishe bua kutumikila malu audi mubale. w23.02 9 §4, 5

“Mmunyi muuvua mumanye bulelela?” Kakuyi mpata, ukadi muandamune lukonko elu njila ne njila. Ndumue lua ku nkonko idi bena Kristo nebe mua kukuela panudi nukeba kumanyangana. Tutu basue kumanya muvua bena Kristo netu bafike ku dimanya Yehowa ne ku dimunanga. Tutu kabidi basue kubambila mudi bulelela ne mushinga kutudi. (Lomo 1:11) Diyukidilangana mushindu eu ditu dituvuluija mudi bulelela ne mushinga wa bungi menemene. Ditu dituambuluisha kabidi bua kudisuika bikole bua ‘kutungunuka ne kuenda mu bulelela,’ mmumue ne: kuikala anu ne nsombelu wenza bua Yehowa atubeneshe ne atuanyishe. Kudi malu a bungi adi atusaka bua kunanga bulelela. Bualu bua mushinga mukole budi ne: tudi banange Yehowa Nzambi, Mpokolo wa bulelela. Ku diambuluisha dia Bible, Dîyi diende, katuena anu bafike ku dimumanya bu Mufuki wa bukole buonso wa diulu ne buloba patupu to, tudi kabidi bamumanye bu Tatu wetu wa dinanga udi mu diulu udi ututabalela bimpe.—1 Pet. 5:7. w22.08 14 §1, 3

Mupostolo Paulo wakakankamija bena Kristo nende bua baleje dinanga ku diambuluisha dia “bienzedi bimpe.” (Eb. 10:24) Uvua ubambuluisha mu mêyi ne mu bienzedi. Tshilejilu, pavua tshiyole tshia nzala tshikuate bena Kristo bavua mu Yudaya, Paulo wakabatuadila bintu bivuabu nabi dijinga. (Bien. 11:27-30) Nansha muvua Paulo mudifile mu mudimu wa diyisha ne wa dilongesha, uvua anu ukeba mishindu ya kuambuluisha aba bavua dijinga ne bintu bia ku mubidi. Ke mushindu uvuaye mushindikile bena Kristo ne: Yehowa uvua ne bua kubatabalela. Lelu, patudi tufila dîba dietu, makanda etu, ne tudifila ne mamanya etu bua kuambuluisha bana betu badi bipupu bitulukile, tudi tukolesha ditabuja dia bena Kristo netu. Tudi tukolesha kabidi ditabuja dia bana betu patudi ne tshibidilu tshia kufila mapa bua mudimu wetu wa pa buloba bujima. Mu mishindu eyi ne mu mikuabu, tudi tuambuluisha bena Kristo netu bua kuikala ne dishindika dia ne: Yehowa kakubalekela to. w22.08 24 §14

Mu Bible mudi mêyi a buprofete a bungi akadi makumbane; amue a kudiwu avua makumabane panyima pa bidimu nkama ya bungi bamane kuafunda. Malu a kale adi ajadika ne: mêyi a buprofete au akakumbana. Kabiena bitukemesha to, bualu tudi bamanye ne: Yehowa ke Muena mêyi a buprofe a mu Bible. Elabi meji a mêyi a buprote adi akula bua dikuluka dia tshimenga tshia Babilona wa kale. Mu bidimu bia 700 K.Y., muprofete Yeshaya wakamanyisha ku bukole bua nyuma wa Nzambi ne: bavua ne bua kukuata tshimenga tshia bukole tshia Babilona. Wakatela too ne dîna dia Kolesha mfumu uvua ne bua kutshitshimuna, kumanyishaye bimpe muvuabu ne bua kutshikuata. (Yesh. 44:27–45:2) Yeshaya wakamanyisha kabidi ne: ndekelu wa bionso bavua ne bua kubutula Babilona butubutu ne kumushiya tshipela. (Yesh. 13:19, 20) Bena Madayi ne bena Pelasa bakakulula Babilona mu tshidimu tshia 539 K.Y., ne muaba uvua tshimenga tshinene atshi mmushale bikulu too ne lelu. w23.01 4 §10

Yehowa mmutusungule bua tuikale bena mu dîku dia batendeledi bende ba pa buloba bujima. Edi ndiakalenga dia pa buadi didi ditupetesha masanka a bungi! (Mâko 10:29, 30.) Tudi ne bana betu pa buloba bujima badi banange Yehowa bu tuetu, ne badi badienzeja ne muabu muonso bua kutumikila mikenji yende. Tudi mua kuikala bashilangane nabu ku muakulu, ku bibidilu, ne ku tshimuenekelu; kadi tudi babanange nansha patudi tutuilangana nabu bua musangu wa kumpala. Tudi basue kuikala nabu nangananga bua kutumbisha Tatu wetu wa mu diulu ne kumutendelela, ne tudi ne bua kushala mu buobumue nabu. (Mis. 133:1) Kudi misangu idibu mua kutuambuluisha bua kuambula majitu atudi nawu. (Lomo 15:1; Gal. 6:2) Batu batukankamija kabidi bua kutungunuka ne kuenzela Yehowa mudimu ne kushala anu balunda bende. (Eb. 10:23-25) Elabi meji mutuvua mua kumvua bu tuetu katuyi ne bukubi budi tshisumbu tshia bena Kristo tshitupetesha budi butuambuluisha bua kukandamena baluishi betu banene aba: Satana Diabolo ne bulongolodi buende bubi. w22.09 2-3 §3, 4

Patudi tubuela miaba ya dipetelangana ku Enternete bidi mua kutukolela bua kudikanda. Tuetu katuyi badimuke, tudi mua kudimona tukadi bambile bantu ba bungi malu masokoka a bende. Tuetu bamane kumuangalaja malu ku biamu nanku, katuakumanya tshikala bakuabu mua kuenza ne malu au anyi ntatu ya bungi ikala mua kumueneka to. Didikanda didi dituambuluisha bua kushala bapuwe padi baluishi betu batusaka bua tubambile malu adi mua kukebela bena Kristo netu njiwu. Bidi mua kuenzeka nanku padibu batuela nkonko kudi bampulushi ba mu ditunga mudibu bakandike mudimu wetu. Mbimpe tutumikile dîyi dinene dia ‘kulama mukana muetu ne tshintu tshia kumujika natshi.’ (Mis. 39:1) Bidi bikengela tuikale bantu ba kueyemena kudi bena mu dîku dietu, kudi balunda betu, kudi bena Kristo netu, anyi kudi muntu mukuabu kayi yonso. Bua kuikala bantu ba kueyemena, mbimpe tuikale ne didikanda. w22.09 13 §16

Bua kuikala ne disanka dilelela, tudi ne bua kudia biakudia bia mu nyuma. Tudi nabi dijinga bushuwa. Ke bualu kayi Yezu wakamba ne: “Muntu udi ne bua kuikala ne muoyo, kabuyi anu bua diampa nkayadi, kadi bua dîyi dionso didi dipatuka mukana mua Yehowa.” (Mat. 4:4) Nunku, katupitshishi dituku katuyi badie biakudia bia mu nyuma bidi mu Bible, dîyi dia Nzambi dia mushinga mukole to. Mu Bible mudi malu a mushinga mukole adi Yehowa mutupeshe ne dinanga dionso, utuleja mua kuikala ne nsombelu wa disanka. Tudi tumanya tshidiye mutupeshile muoyo. Tudi tumanya mua kusemena pabuipi nende ne tufuidibua luse bua mpekatu yetu. Tudi tumanya kabidi malu malenga adiye mutulaye kumpala eku. (Yel. 29:11) Malu malelela atudi tupeta mu didilongela dietu aa adi uwuja muoyo wetu ne disanka dia bungi be! Musangu wonso udi ntatu ikutekesha mu mikolo, angata dîba dia bungi dia kubala Dîyi dia Yehowa ne welangane meji a biudi mubale. w22.10 7 §4-6

Bible udi ne tshidiye utukankamijila bua katushadi katuyi ne dimanya to. Tudi tupeta dimanya dimpe patudi tutumikila mêyi manene a mu Bible. Ku kakese ku kakese, netudimuenene mudiwu atuambuluisha bua kuepuka bilumbu ne bua kuangata mapangadika mimpe. Mbimpe tudikonkonone bua kumanya ni tudi tuya kumpala mu tshilumbu etshi. Bikalabi ne: tudi babange kulonga Bible ne tubuela mu bisangilu kukadi matuku, tudi mua kudiebeja bua tshidi tshienza bua tujanguluke bua kuenza malu adi akengela bua kuditshipa ne kubatijibua. Bituikala tukadi babatijibue, tudiku baye kumpala, balue bayishi bimpe ba lumu luimpe badi balulongesha kabidi bimpe anyi? Mapangadika etu atuku aleja ne: mêyi manene a mu Bible atu atulombola anyi? Tutuku tuleja ngikadilu ya buena Kristo mu malanda etu ne bakuabu anyi? Tuetu bamone ne: kudi miaba ya kuakaja, mbimpe tuele meji bikole bua mavuluija a Yehowa; owu ke adi ‘avuija muntu udi kayi ne dimanya muena meji.’—Mis. 19:7. w22.10 20 §8

Yehezekele wakamona mu tshikena kumona muvua nyuma wa Nzambi wambuluisha banjelu ba bukole ne wenza bua nkata ya ditempu dia mu diulu yende. (Yeh. 1:21) Tshiakenza Yehezekele ntshinyi? Wakafunda tshivua tshienzeke, wamba ne: “Pamvua mutshimone, ngakatua mpala panshi.” Yehezekele wakumvua buôwa bua bungi, kukulukaye panshi. (Yeh. 1:28) Pashishe, dîba dionso divuaye wela meji a tshikena kumona tshia dikema atshi, bivua anu ne bua kuikala bitamba kumushindikila kabidi ne: Yehowa uvua ne bua kumuambuluisha ne nyuma wende muimpe bua akumbaje mudimu wende. Yehowa wakatumina Yehezekele dîyi ne: “Muana wa muntu, imana kuulu bua mmone mua kuyukila nebe.” Dîyi divuabu batumine Yehezekele adi diakamupesha bukole anyi “nyuma” uvuaye nende dijinga bua kujuka panshi. (Yeh. 2:1, 2) Pashishe “tshianza” tshia Nzambi, tuambe ne: nyuma wende ke ukavua ulombola Yehezekele mu mudimu wende wonso wa diyisha.—Yeh. 3:22; 8:1; 33:22; 37:1; 40:1. w22.11 4 §7, 8

Muprofete Yeshaya udi wamba mudi Yehowa muikale mulongeshi udi ne ntema, ulonda balongi bende panyima bienze anu bu udi ubaleja njila kumpala kuabu bua kubaludika. Lelu tudi tumvua dîyi dia Nzambi panyima petu. Mushindu kayi? Mêyi a Nzambi mafundisha ku bukole bua nyuma mmafunda mu Bible kukadi bidimu bia bungi panyima petu. Nunku patudi tubala Bible, mbienze anu bu ne: tudi tumvua dîyi dia Nzambi difumina panyima petu. (Yesh. 51:4) Ntshinyi tshitudi mua kuenza bua buludiki budi Yehowa utupesha butuambuluishe bikole menemene? Mona ne: Yeshaya mmuambe malu abidi. Bua kumpala, “njila nyeye eu.” Buibidi, “Endelayimu.” Kumanya “njila” nkayaku kakuena kukumbana to, tudi ne bua ‘kuendelamu.’ Yehowa udi utulongesha malu adiye musue bua tuenze ku diambuluisha dia Dîyi diende didi bulongolodi buende butumvuija. Tudi tulonga kabidi mua kutumikila bitudi tulonga. Bua kunanukila ne disanka mu mudimu utudi tuenzela Yehowa, tudi ne bua kuenza malu abidi au. Dîba adi netuikale batuishibue ne: Yehowa neatubeneshe. w22.11 11 §10, 11

Matuku makese bapostolo ba Yezu ba bungi bamane kufua, bena Kristo ba dishima bakabuela mu tshisumbu. (Mat. 13:24-27, 37-39) Bavua bakula “malu makonyangale bua kukoka bayidi mu nyima muabu.” (Bien. 20:29, 30) Bumue bua ku “malu makonyangale” avuabu batuadije kulongesha au buvua ne: Yezu kavua mufile mubidi wende “musangu umue bua kashidi bua kuambula mpekatu ya bantu ba bungi” to. Kadi bavua balongesha ne: mulambu wende uvua ne bua kuikala ufidibua misangu ne misangu. (Eb. 9:27, 28) Lelu bantu ba bungi ba muoyo muimpe badi bitaba dilongesha dia dishima adi. Batu badisangisha mu bitanda biabu pa tshibidilu anyi imue misangu dituku dionso bua kuenza tshitubu babikila ne: “mulambu wa misa.” Bitendelelu bikuabu kabitu bivuluka lufu lua Yezu pa tshibidilu to, ne benamu ba bungi ki mbamanye bimpe tshitu mulambu wa Yezu umvuija to. w23.01 21 §5

Mu bidimu tshinunu biakokesha Yezu, bantu nebabishibue ku lufu, ne bonso batumikila Yehowa nebavuijibue bapuangane. Bantu badi Yehowa umona ne: mbakane “nebapiane buloba, nebasombapu bua kashidi.” (Mis. 37:10, 11, 29) Bualu buenza disanka budi ne: “Muena lukuna wa ndekelu” wikala “ne bua kubutudibua ndufu.” (1 Kol. 15:26) Ditekemene dietu dia kuikala ne muoyo kashidi ndishindamene mu Dîyi dia Nzambi. Ditekemene adi didi mua kutuambuluisha bua kushala ne lulamatu mu matuku makole a ku nshikidilu aa. Pa kumbusha dijinga dikole dia kupeta muoyo wa kashidi didi mua kutusaka bua kusankisha Yehowa, tudi ne bua kuenza malu makuabu. Dinanga dikole ditudi banange nadi Yehowa ne Yezu ke bualu bunene budi butusaka bua kushala ne lulamatu kudibu. (2 Kol. 5:14, 15) Kubananga mushindu eu kudi kutusaka bua kubidikija ne kuambila bakuabu ditekemene ditudi nadi. (Lomo 10:13-15) Bu mutudi tulonga bua kutabalela bakuabu ne kubambuluisha, tudi tulua bantu badi Yehowa ujinga bua balue balunda bende bua kashidi. w22.12 6-7 §15, 16

Dikengeshibua didi mua kutunyangila bintu bia bungi bitu bitupetesha ditalala. Tudi mua kubanga kusamisha mutu, tumvua buôwa bua malu adi mua kutufikila. Kumvua nanku ki nkubi to. Kadi tudi ne bua kuikala badimuke. Yezu wakaleja ne: bayidi bende bavua mua kulenduka pavuabu babakengesha. (Yone 16:1, 2) Pavua Yezu muambe ne: nebatukengeshe, uvua mutujadikile kabidi ne: tudi mua kushala anu ne lulamatu. (Yone 15:20; 16:33) Patubu bakandika mudimu wetu anyi bawelela mikenji mishile, Betele ne bakulu badi mua kutuambila malu a kulonda. Batu benza nunku bua kutukuba, benza bua tuikale tupeta biakudia bia mu nyuma ne batuambuluisha bua kutungunuka ne kuyisha bilondeshile mudi nsombelu. Dienzeja bikole bua kutumikila malu adibu batuambila bua kulonda. (Yak. 3:17) Bualu bukuabu, kuambidi bantu malu a bana betu padibu kabayi ne bukenji bua kuamanya to.—Muam. 3:7. w22.12 20-21 §14-16

Lelu, Yezu udi utungunuka ne kulombola bayidi bende padibu benza mudimu wa kuyisha lumu luimpe lua Bukalenge pa buloba bujima. Ukadi mukumbaje tshivuaye mulaye. Ku diambuluisha dia bulongolodi bua Yehowa, udi utulongesha mua kuyisha, ne udi utupesha bitudi nabi dijinga bua kumuangalaja lumu luimpe. (Mat. 28:18-20) Tudi tuenza tshietu tshitupa patudi tudienzeja bikole bua kuyisha ne kulongesha, ne tushala batabale bindile bua Yehowa abutule ndongoluelu wa malu eu. Tuetu batumikile mubelu udi mu Ebelu 6:11, 12, netuikale anu ne ditekemena dietu “too ne ku ndekelu.” Yehowa ukadi muteke dituku ne dîba diabutulaye ndongoluelu mubi wa malu wa Satana eu. Pakumbana dituku adi, neakumbaje mêyi a buprofete onso akavuaye mufundishe mu Dîyi diende. Imue misangu tudi mua kuela meji ne: nshikidilu wa ndongoluelu wa malu eu kakulua mpindieu to. Kadi dituku dia Yehowa ‘kadiakujanguluka nansha!’ (Hab. 2:3) Nunku tudisuikayiku bua ‘kushala batangile kudi Yehowa,’ tuleja “lungenyi lua kuindila Nzambi wa lupandu [luetu].”—Mika 7:7. w23.02 19 §15, 16

Tshipatshila tshia muntu utu ubanda pa mukuna ntshia kufika ku lusongo luawu. Kadi kutu miaba ya bungi ituye wimana bua kubandila bidiye umona. Bia muomumue, ikala ukeba dîba dia kuanji kuimana ne kuela meji a mudi Yehowa ukututshisha diakalengele nansha paudi unanukila mu lutatu kampanda lukole. Ikala udiebeja ku ndekelu kua dituku dionso ne: ‘Mmushindu kayi udi Yehowa mumbeneshe lelu eu? Nansha mutshidiku lutatu, mmunyi mudi Yehowa ungambuluisha bua kulunanukila?’ Keba bua kumanya bualu buimpe nansha bumue budi Yehowa mukuenzele bua kukututshisha diakalengele. Mu bulelela, udi mua kuikala usambila bua lutatu luebe lujike. (Filip. 4:6) Kadi tudi ne bua kumanya kabidi mabenesha atudi nawu mpindieu. Yehowa mmulaye bua kutukolesha ne kutuambuluisha bua kunanukila. Nunku ikala anu ne dianyisha bua mudi Yehowa ukukuatshisha. Neumone mudi Yehowa ukuambuluisha bua malu ebe ende bimpe nansha mu bikondo bia ntatu.—Gen. 41:51, 52. w23.01 19 §17, 18

Diebeja ne: ‘Malu andi ngenza adiku aleja mundi mumanye ne: tukadi basemene pabuipi ne nshikidilu wa ndongoluelu wa malu eu anyi? Mapangadika andi ngangata bua kulonga tulasa ne bua mudimu adiku aleja ne: kuenzela Yehowa mudimu kudi ne mushinga wa bungi mu nsombelu wanyi anyi? Ndiku ngitabuja ne: Yehowa neakumbajile dîku dietu majinga adi anyi? Yehowa udi usanka bikole padiye utumona tudienzeja bua kuenza disua diende mu malu etu onso. (Mat. 6:25-27, 33; Filip. 4:12, 13) Mbimpe tuikale tukonkonona meji etu pa tshibidilu ne tutungunuka ne kuakaja malu adi akengedibua. Paulo wakambila bena Kolinto ne: “Tungunukayi ne kuditeta bua kumanya ni nudi mu ditabuja; tungunukayi ne kupima tshinudi nuenu bine.” (2 Kol. 13:5) Nanku bua tuetu kutungunuka ne kukudimuna meji etu, mbimpe tuikale tubala Dîyi dia Nzambi, tulonga mua kuela meji mudiye wela, ne kabidi tuenza tshionso tshidi tshikengela bua kumusankisha.—1 Kol. 2:14-16. w23.01 9 §5, 6