Mua kujula muji wa dinyanguka dia mutshima ne dia lungenyi

YEHOWA kavua mupeshe muntu dijinga dia kuikala ne bukoya peshi kupanga bulongame nansha. Tshisombedi tshiende, buloba, tshivua tshilongolola bua kuikalatshi mparadizu wa mankenda, wa bulongame ne muimpe kumona. Dilongolola dia Nzambi kadivua dia kumona [buloba] buandamuka diala dia bukoya kadiyi kutangila nansha.​—Genese 2:8, 9.

Kadi, kunyima kua bamane kuimansha bulombodi bua Nzambi, bantu bakatuadija kuteka pa buloba bujima tshiabu tshidibo babikila ne: bulongame. Bu muvuabo kabayi mua kupeta diambuluisha dia Nzambi ne kabayi ne dimonamona dia malu, bavua balonga mianda mu dibubuta. Miyuki ya kale idi ileja bulelela bua mu Bible bua se: bantu kabena mua kulubuluka mu kudikokesha nkayabo; kukadi mbombo ya bidimu, “muntu udi ukokesha mukuabo amu bua diakabi diende.” (Muambi 8:9; Yelemiya 10:23) Kupanga bukole bua kukokesha ke tshiledi tshia dinyanguka dia mishindu yonso.

Tuanyishayi mmuenenu wa Nzambi

Bantu badi bajinga kulengelela Nzambi badi benza madikolela malelela bua kuikala ne nsombelu udi mu diumvuangana ne mêyi a mankenda mafunda kudi Mufuki. Ke bua tshinyi Bantemu ba Yehowa bakapetangana ne ntatu mivule mu tshikondo tshia mpuilu wa bukua-matunga mulongolola ku tshimenga tshia Prague, mu ditunga dia Tchécoslovaquie, munkatshi mua tshidimu tshia 1991.a Bantu 75 000 ke bavua ne bua kuya kubuelamu, musumba uvua mukumbane bua kubuela mu tshipalu etshi tshia Strahov. Kadi, kabavua batumikamu to kukadi bidimu bitanu. Bua nanku, tshivua tshinyanguke bikole. Bantemu ba Yehowa batue ku 1 500 bakapitshisha mêba 65 000 bua kutshilongolola bimpe ne kutshilaba mukubu. Pakafika tshikondo tshia mpuilu, mudimu eu wa disukula uvua muvuije tshipalu etshi muaba muakanyine menemene, muvuabo mua kutendelela Nzambi mulelela, Yehowa.

Ntshinyi tshidi tshisaka Bantemu ba Yehowa bua kuikalabo bashilangane ne bantu buonso badi bangata mankenda ne bulongame ne mushinga amu mukese? Ndilamata diabo ku mubelu eu wa mu Bilbe udi wamba ne: bena nkristo badi ne bua kuimansha bilema bu mudi: buiminyi, kupanga kutabalelangana, dinanga dinekesha dia bubanji ne kupanga kua dinanga. “Jikayi bumuntu bukulukulu ne ngenzelu yabo,” ke tshidi Bible wamba. Pa muaba wabu, pingajayi “bumuntu bupiabupia, budi budienzulula ku dimanya dijalame pa tshimfuanyi tshia Eu wakabufuka.” Bumuntu bua dinanga ne mankenda, bua bulongame ne bulengele budi buimansha mishindu yonso ya dinyanga mubidi ne lungenyi.​—Kolosai 3:9, 10; 2 Kolinto 7:1; Filipoi 4:8; Tito 2:14.

Bumuntu bupiabupia budi bulomba bena nkristo bua kuditatshishabo bua se: dinyanguka dia kapepa, buloba ne mâyi didi dibatangila pabu pa kubenga kunyanga kapepa, buloba ne mâyi kabiyi pa bualu ne pa kutumikila mikenji idi ilomba bua kunemeka bufuki budi butunyunguluke. Bumuntu bupiabupia budi buambuluisha bena nkristo bua kabavu kuimansha bintu bia bukoya mu muaba kayi wonso, amu bua lulengu. Budi bukankamija bua kunemeka bintu bia bakuabo, kabidi, ne bua kubenga kuzola bimfuanyi ku bimana bu mushindu wa kumvuija majinga adi munda, bua kujikija lutetuku peshi tshipedi tshia muzodi. Bumuntu bupiabupia budi bulomba bua bisombedi bia bantu, vwatire, bilamba ne mubidi kulamibuabi ne mankenda menemene.​—Fuanyikija ne Yakobo 1:21.

Bantu badi kabayi banyishe bua kuvuala bumuntu ebu bupiabupia badi mua kubanda Nzambi ne: kêna ubanyisha mu Mparadizu wende mulaya anyi? Mbikole. Muntu kampanda udi musangu wonso ne mutshima anyi lungenyi “binyanguke” udi’amu munyangi wa bulengele bua Mparadizu muasulula, pa buloba, bua dibungama dia aba badi bajinga kumulama. Dipangadika dia Nzambi dia “kubutula aba badi banyanga buloba” didi diakane ne ndiuwule tente ne dinanga.​—Buakabuluibua 11:18; 21:8.

Tudi mua kudibueja ne kasuki mu mudimu eu anyi?

Kadi, abi bidi biumvuija ne: bena nkristo badi ne bua kudibueja ne kasuki mu midimu ya diepula kunyanga kua buloba, kapepa ne mâyi peshi ya disukula anyi?

Mbimueneke patoke se: dinyanguka dia buloba, kapepa ne mâyi kadiena dimpe to bua makanda a mubidi ne bua dikubibua dia bantu. Amu bu mudibi bisokolola mu mikenji ivuaye mupeshe bena Izalele, Yehowa udi uditatshisha bikole bua malu aa. (Ekesode 21:28-34; Dutelonome 22:8; 23:12-14) Kadi, musangu nansha umue, kavua mutumine tshisamba tshiende dîyi dia kuenza kampanye kudi bisamba bikuabo pa bidi bitangila dikubibua dia bantu ne miaba idibo basombele; nansha bena nkristo ba mu siekele wa kumpala, bobo pabu kabavua bapete mukenji wa kuenza nenku to.

Lelu’eu, mbipepele bua kubueja mianda ya kukuba bufuki mu politike. Pa kuamba bulelela, bisumbu bia politike mbienjibue ne tshipatshila tshia kujikija ntatu mu mianda eyi. Nanku, muena nkristo udi udibuejakaja mu mianda ya politike kêna kabidi ne ndubidilu to. Eku, Yezu mutekele balongi bende dîyi-diludiki edi: “Kabena ba mu bulongolodi ebu, bu mundi meme tshiyi wa mu bulongolodi ebu.” Muena nkristo ukadi katshiyi wangata dilomba edi ne mushinga udi mu njiwu ya kuditeka ku luseke lua “bamfumu ba mu bulongolodi ebu bua malu, badi ne bua kubutudibua bua kashidi.”​—Yone 17:16; 1 Kolinto 2:6.

Yezu kavua mukebe mua kujikija ntatu yonso ya bantu ba mu tshikondo tshiende to; kavua nansha mulombe balongi bende bua kuenza nenku to. Kadi, wakabatumina dîyi edi: “Nunku, ndayi ne nuvuije bantu ba mu matunga wonso balongi, nubatambuishe . . . , nubalongeshe mua kutumikila mêyi wonso anakanutumina.” Kavua mubatumine dîyi nansha dimue pa bidi bitangila mianda ya politike ya kukuba miaba idi bantu ne nyama basombele nansha.​—Matayi 28:19, 20.

Bua kumvuija tshivua ne bua kuikala tshipatshila tshia kumpala mu nsombelu wa muena nkristo, Kristo udi wamba ne: “Nunku, tungunukayi ne kukeba diambedi bukalenge ne buakane buende.” (Matayi 6:33) Mianda ya dikuba bufuki budi butunyunguluke neyijike kashidi ne kashidi bua disanka dia buonso, pavua Yehowa kunemekija mêyi-maludiki ende makane pa buloba bujima ku butuangaji bua Bukalenge bua Masiya.

Nunku, Bantemu ba Yehowa badi ne mmuenenu wa pankatshinkatshi. Bilondeshile Lomo 13:1-7, mbalombibue bua kutumikila ne muoyo mujima mikenji ya ditunga idi itangila bintu bidi bibanyunguluke. Kupita apu, dinanga dia muntu nabo didi dibasaka bua kunemeka bintu bia bakuabo​—nansha bikale bia bantu buonso peshi bia muntu pa nkayende—​pa kubenga kumupepeja ne pa kubenga kuangata miaba yonso bu ya kuimanshila bukoya. Kadi, mukenji nansha umue ki mmubelela bua kuikalabo mu mulongo wa kumpala mu mudimu eu wa kusukula buloba to. Badi ne kabingila kanene ka kuteka mudimu wa kumanyisha mukenji wa Bukalenge pa muaba wa kumpala, bualu, mbamanye ne: ke bualu buimpe bua kashidi budibo mua kuenzela bakuabo.

Dikezudibua mu nyuma

Bena Izalele ba kale bavua badimujibua ku musangu ne ku musangu bua bipeta bibi bivuabo mua kupeta bu bobo mua kuikala banyanga buloba pa kuupumonapu mashi, pa kuikala ne nsombelu wa tshiendenda peshi pa kupanga kanemu bua bintu binsantu. (Nomba 35:33; Yelemiya 3:1, 2; Malaki 1:7, 8) Mbiumvuike ne: bakabipishibua bua dinyanguka edi dia mu nyuma, kadi ki mbua mushindu kampanda wa dinyanguka dia ku mubidi divuabo pamu’apa mua kuikala bapie nansha.b

Nenku, lelu’eu, dinyanguka peshi dipanga bukezuke dia mu nyuma ke didi muena nkristo udianjila kuenza madikolela bua kuimansha. Neenze nenku pa kuvuala “bumuntu bupiabupia” budi bujikija dinyanguka dionso dia mutshima ne dia lungenyi. Bantemu ba Yehowa bapite pa miliyo inayi badi bapetela mabenesha ku dikezudibua edi dia mu nyuma, bakumbaja pabo [midimu ya] dikezula mu malu a ntendelelu wa Nzambi ne a mu nsombelu mulenga, amu bu mudibi bimueneka patoke bua dikezuka dia ku mubidi.​—Efeso 4:22-24.

Tshikondo tshiakumbanyi bua kuenza kampanye ka dikezula dia mu nyuma. Kampanye ka pa buloba bujima ka disukula buloba nekenjibua pakumbana tshiaku tshikondo bua tshisombedi tshietu bua katshivu kuandamuka diala dinenanenayi dia bukoya, kadi, bua kutshivuija muaba mulenga udi kawuyi kunyanga kua kapepa, buloba ne mâyi.​—Muambi 3:1.

[Mêyi adi kuinshi]