Tusankayi mu ditekemena dia buloba bukezula mu matuku atshilualua!
TUDI ne bua kuikala ne disanka menemene bualu Yehowa, Nzambi wa bulongame ne wa mankenda, neakumbaje dilongolola diende dia ku ntuadijilu dia kuandamuna buloba mparadizu munenanenayi! (Yeshayi 11:6-9) Mmulaye ne: “Dîyi didi dipatuka mukana muanyi . . . kadiena dipingana kundi kadiyi ne bipeta, kadi, kabiyi mpata, nedikumbaje tshidi tshinsankisha.” Bu mudibi “kabiyi mua kuenzeka bua Nzambi kushima,” miaku eyi kayena ya patupu.—Yeshayi 55:11; Ebelu 6:18.
Bua dinanga diende, Yehowa neenze bualu kampanda diambedi bantu kabayi banji kufika ku nsombelu mukole udibo kabayi mua kujikija kunyanga kua buloba, mâyi ne kapepa, wa dibutudibua dijima dia tshisombedi tshia nyama ne muntu. Ndisanka kayipu ditudi nadi bua bualu ebu!—Buakabuluibua 11:18.
Biabengabo kunyingalala, Yehowa neashipe aba badi banyanga buloba ku bukole ne badi bayobola bumfumu buende pa kubenga kuangata ne mushinga mêyi-maludiki ende adi atangila bulongame ne bukezuke. Kakulekelela muntu nansha umue unyanga Mparadizu muasa pa buloba nansha.—Nsumuinu 2:20-22.
Ku bukokeshi bua Bukalenge bua Nzambi bulombola kudi Kristo Yezu, bantu nebalonge mua kujimija bishadile bia biledi bia dinyanguka dia buloba, kapepa ne mâyi. Mu tshikondo atshi—ki mpindieu to—ke muikala basadidi buonso ba Nzambi ne bua kuditua ne kasuki mu mudimu wa kuangata mapangadika, a muntu pa nkayende ne a mu tshi-bungi, ambuluisha bua disukula ditu kadiyi dianji kuenzeka.—Fuanyikija ne Yehezekele 39:8-16.
Aba bapanduka ku nshikidilu wa bulongolodi ebu bua malu bubi nebatue programme eu wa disukula nyama ku mikolo ne didifila dia muomumue ne musangelu wa muomumue ne bidibo nabi lelu’eu mu kampanye ka dikezula dia mu nyuma.—Musambu wa 110:3.
Tudi bashindike se: kampanye kanene ka katshia ne katshia ka disukula kakumbajibua kudi Bukalenge bua Nzambi nekakezule buloba. Bimanyinu bionso bia dinyanguka dia buloba, kapepa ne mâyi nebiumbushibue. Kakuakuikala kabidi bimfuanyi ku bimana. Bilangilangi, bikopokopo, tubudimbu, tubeji tua bazoka ne bonbon, mabeji a bikandakanda ne a bibejibeji kabiakuikala kabidi bilekela panshi bua kunyanga tshisenga anyi muaba kampanda wa mparadizu to.
Tusankayi bua buloba bua mankenda bukadi pabuipi!
[Tshimfuanyi mu dibeji 7]
Neudisangishe pebe mu mudimu munene wa disukula watuadija mu tshitupa tshîpi etshi anyi?