Utuku unemeka muaba wenu wa ntendelelu anyi?

“Katshia ku ntuadijilu wa Evanjeliyo, bena nkristo bavu’amu ne muaba musunguluke ne mujadikibue wa ntendelelu wa Nzambi.”​—“Le christianisme primitif,” kudi William Cave.

TSHISAMBA tshia Nzambi tshitu pa tshibidilu tshisanka bua kudisangisha bua kumutendelela. Amu bu muvuabi mu siekele wa kumpala, ke mudibi kabidi lelu’eu. Kumpala kua dîba, bafundi ne balongeshi ba teoloji bu mudi Lucien, Clément, Justin ne Tertullien, badi bapunga ku dîyi dia se: bena nkristo bavua ne miaba misunguluke ivuabu badisangisha pa tshibidilu bua kutendelela Nzambi.

Bible udi pende ujadika muanda wa muomumue, bualu, misangu mivule, udi wakula bua bisangilu bivua bena nkristo benza pa tshibidilu. Bantu aba bavua badisangisha bavua bamanyike ku dîna dia bisumbu bia bena nkristo. Ebi bivua bikumbanyine, bualu mu miakulu ivuabu bafunde Bible ku ntuadijilu, muaku “tshisumbu” udi uleja tshisumbu tshia bantu badi badisangishe bua mudimu kampanda peshi bua tshipatshila kansanga bia pa buabi.

Miaba ya ntuadijilu ya ntendelelu wa bena nkristo

Ntshinyi tshivua bena nkristo ba mu siekele wa kumpala benza mu bisangilu biabo? Bible udi utela bimue bia ku bisangilu bia mushindu’eu ne uleja se: dilongesha divua tshitupa tshinene. (Bienzedi 2:42; 11:26; 1 Kolinto 14:19, 26) Bavua balongolola programme ya nkoleshilu, miyuki, bavua balondelangana malu mamonamona avua akankamijangana, ne bakonkonona ne ntema mikanda ivua ifumina kudi kasumbu kaludiki kavua ku Yeruzaleme anyi mukanda uvua ufumina kudi mupostolo kampanda.

Mu Bienzedi 15:22-35, tudi tubala ne: kunyima kua buobo bamane kubala umue wa ku mikanda ya mushindu’eu uvuaye batumine tshisumbu tshia bena nkristo ba ku Antiokiya, Yudas ne Silas “bakakankamija bana betu ne miyuki mivule ne bakabakolesha mu nyuma.” Mukuabu muyuki udi umanyisha ne: pakafika Paulo ne Barnabase ku Antiokiya, “bakasangisha tshisumbu ne kubamanyisha mianda mivule ivua Nzambi mukumbaje ku butuangaji buabu.” Disambila divua padi tshitupa tshinene mu bisangilu bia bena nkristo.​—Bienzedi 14:27.

Miaba ivua bisumbu bidisangisha bua ntendelelu mu siekele wa kumpala kayivua miibaka ne ngibakilu munekesha bu wa bitendelelu bivule bia mu bukua-buena nkristo lelu’eu nansha. Misangu mivule, bena nkristo ba kumpala bavua badisangisha ku nzubu ya bantu kampanda. (Lomo 16:5; 1 Kolinto 16:19; Kolosai 4:15; Filemone 2) Pa tshibidilu, bavua batumika ne tshibambalu tshia kuulu kua nzubu wa muntu kampanda. Didia dia Dilolo dia Mukalenge diakenzekela mu tshibambalu tshia kuulu. Kabidi, mu tshibambalu tshia kuulu ke muakedibua balongi 120 spiritu munsantu mu dituku dia Pentekoste.​—Luka 22:11, 12, 19, 20; Bienzedi 1:13, 14; 2:1-4; 20:7, 9.

Lelu’eu, Bantemu ba Yehowa badi balonda tshilejilu tshivua bapostolo bashiye. Badi batumika ne miaba ya bisangilu idi mimanyike bu Nzubu ya Bukalenge. Muaba awu ke udibu balongeshibua mudimu wa bamanyishi ba lumu luimpe lua Bukalenge bua Nzambi. (Matayi 24:14) Mu Nzubu wa Bukalenge, badi balonga kabidi Mifundu, basambila ne bakankamijangana. Nenku, ebi bidi mu diumvuangana ne mubelu udi mu Ebelu 10:24, 25: “Tutangilanganayi bamue ne bakuabo bua kusakangana ku dinanga ne ku midimu milenga, katuyi tupumbisha didisangisha dietu tuetu bine, bu mudi bakuabu babienza pa tshibidilu, kadi, tukankamijanganayi, too ne panudi numona dituku disemena pabuipi.”

Tutumikayi bimpe ne muaba wetu wa ntendelelu

Nutshidi bavuluke mêyi a mupostolo Paulo: “Nzambi, kêna Nzambi wa tshimvundu, kadi ng’wa ditalala” ne, “bionso bienzeke mu bulongame ne mu dilondangana” anyi? Biwakonkonona diumvuija dia mêyi aa, neujingulule menemene se: Paulo uvua wakula bua mushindu uvua bisangilu bia bena nkristo ne bua kulombodibua. Amu bu mu tshikondo tshia bapostolo, bena nkristo lelu’eu, badi batabalela bua bisangilu biabu kuenzekabi mu bulongame ne kuikalabi bilongolola bimpe.​—1 Kolinto 14:26-40.

Mu La Tour de Garde wa dia 15 Mai 1971 mbafunde ne: “Mu Nzubu wa Bukalenge mudi ngikadilu wa mu nyuma muimpe, ufumina ku ditabalela dijima didi bateleji baleja bua ntendelelu mulelela ne malongesha a mu Bible. Ku lukuabu luseke, bilengejilu bipepele ne bimueneka bimpe bidi bisaka aba badimu bua kuikala ne ngikadilu wa bulunda ne kuyukidilangana ne bakuabu, pamutu pa kukemeshibua kudi bilengejilu bivule bikena biumvuika.” Bushuwa, badi batabalela bua se: ditumika ne Nzubu wa Bukalenge dikale pa tshibidilu dileja kanemu ne buneme.

Bukua-buena-nkristo mbubule kanemu mu muanda eu. Amue malongolodi a malu a Nzambi adi atumika ne miaba yawu ya ntendelelu bu miaba ya kujikijila lutetuku. Badi benzelamu konsere ya mijiki ya rock ya malu a Nzambi, mudi bibambalu mudibo benzela manaya a didibidija nawu mubidi pa kuambula biamu bia bujitu, tshinayilu tshia mabi pa mesa (tables de billiard), bibambalu bia bundeji bua bana, ne bibambalu bia munda bia kulejila filme. Tshitendelelu kampanda tshivua tshibueje mu programme wa midimu yatshi manaya [kabukabu, tshilejilu bu mudi manaya] a dielangana bibula, kutua ndundu wa makasa anyi wa bianza, ne makuabu. Abi kabiena mu diumvuangana ne tshilejilu tshivua bapostolo bashiye.

Pavua tshisumbu kayi tshionso mu siekele wa kumpala tshienza malu avua kaayi makumbanyine, bavua ne bua kutshibela. Tshilejilu, bamue bena nkristo ba ku Kolinto bavua bababidila ne Didia dia Dilolo dia Mukalenge bu tshikondo tshia kudia ne kunua kuondoloka. Bavua batuala biakudia biabu bia dilolo bua kubidia kumpala anyi munkatshi mua tshisangilu; bakuabu bavua mene badia budiavi anyi banua bunuavi. Kabivua menemene mu njila nansha. Mupostolo Paulo wakabafundila ne: “Nenku, kanuena ne nzubu kunudi mua kudila ne kunuina anyi?”​—1 Kolinto 11:20-29.

Mu diumvuangana ne mubelu wa Paulo, Bantemu ba Yehowa badi benza madikolela bua kuyukidilangana pa mianda idi ibatangila buobo bine ku nzubu yabu peshi muaba mukuabu pa kumbusha ku Nzubu wa Bukalenge. Bushuwa, bisangilu bietu bidi bitupetesha bikondo bia kumonangana ne bana betu bungi kampanda musangu umue. Kadi, Nzubu wa Bukalenge mmulongolola bua Yehowa, nenku, badi ne bua kutumika nende anu bua ntendelelu wende. Katuena mua kubabidila dikalaku dietu muaba eu bua kukumbaja midimu yetu ya ku mubidi anyi bua kunanangana mabanza adi atutangila tuetu bine nansha.

Kabidi, tshisumbu katshiena tshitumika ne Nzubu wa Bukalenge bua kujikija lutetuku anyi bua kusangisha mfranga peshi kulongolola midimu kampanda bu mudi bundeji bua bana. Kudi miaba mikuabu mutudi mua kuenzela mianda idi itutangila tuetu bine anyi bungenda-mushinga bia mushindu’eu.

Mu Nzubu wa Bukalenge kampanda, bakulu bakajingulula se: bena mu tshisumbu bakavua ne tshibidilu tshia kusombangana bintu ne kubipingajilangana mu bisangilu. Bakavua kabidi ne tshibidilu tshia kushintakajangana tusete tua vidéo ku Nzubu wa Bukalenge. Nansha muvua mudimu eu kawuyi wa bungenda-mushinga, bakulu bakabambuluisha bua kujingulula ne meji se: kuvua mushindu wa kuenzelabu mianda ya mushindu’eu ku nzubu yabu.

Bua kuepuka nsombelu idi mua kufila mmuenenu mubi ne bua kuikala ne dishindika dia se: badi batumika bimpe ne Nzubu wa Bukalenge, muntu yonso wa kutudi udi ne bua kudiebeja nkayende ne: ‘Kudiku mianda idi intangila meme nkayanyi imvua mua kukumbajila ku nzubu kuanyi indi ntuala ku Nzubu wa Bukalenge anyi?’ Tshilejilu, patudi tulongolola didiolola anyi didisangisha pamue ne balunda, kabienaku bimpe bitambe bua kuyukidilangana bua malongolola a mushindu’eu ku metu anyi? Katuenaku mua kutumika ne nshinga (telefone) peshi kukumbula aba batudi basue bua kupetangana nabu anyi? Amu bu Paulo, tudi mua kuamba ne: ‘Nenku, katuena ne nzubu kutudi mua kuyukidilangana mianda ya mushindu’eu anyi?’

Tshikondo tshijadika ne muaba musunguluke bua kutendelela Yehowa

Mu Muambi 3:1 Bible udi wamba ne: “Kudi tshikondo tshijadika bua malu wonso, eyowa, tshikondo bua malu wonso muinshi mua diulu.” Patudi tubuela mu bisangilu ku Nzubu wa Bukalenge, tudi mua kudifila ne kasuki mu midimu idi itangila mudimu wa bena nkristo. Ntshikondo tshijadika bua kutendelela Yehowa.

Yakobo, muakunyi wa Yezu, wakafila mubelu bua kubenga kuikala ne kansungansunga mu tshisumbu tshia bena nkristo. (Yakobo 2:1-9) Mmunyi mutudi mua kutumikila mubelu eu mu Nzubu yetu ya Bukalenge? Padibu babanya mabeji a dibikila bua kujikija lutetuku pamue ne balunda dilolo kampanda, bidi mua kumueneka bu kansungansunga. Mu tshisumbu kampanda, bavua ne tshibidilu tshia kuela mabeji a dibikila nawu bantu a mushindu’eu mu bibuta anyi mu Bible ya aba bavuamu. Bushuwa, ebi mbitambe buimpe kupita kubatumina mabeji a dibikila ku poste anyi kubatuadilawu ku nzubu yabu. Kadi, aba badi kabayi bapeta dibeji dia dibikila ne bavua bamone pavuabu baabanya nebadiumvue munyi? Ebi kabiena mua kuangatshibua bu kansungansunga anyi?

Bushuwa, kabiena bikengela kuela mikandu mikole idi ileja se: muntu nansha umue kêna mua kufidila mukenji kampanda anyi kufidila dibuki kansanga ku Nzubu wa Bukalenge nansha. Kakuena bubi nansha bumue bua kuakula bua midimu kampanda ya ku dituku ku dituku anyi bua mianda kansanga idi mienzeka, kubikidisha muntu kankenga anyi kumulomba bua kudisanga kunudi bua muanda wa didiolola ku Nzubu wa Bukalenge to. Kadi, abi bidi ne bua kuenzeka mu mpukapuka ne mu musokoko. Mianda idi itutangila tuetu bine kayena ne bua kutupambula ku tshipatshila tshilelela tshia didisangisha dietu ku Nzubu wa Bukalenge, mbuena kuamba ne: tshia kukoleshibua mu nyuma.​—Matayi 6:33; Filipoi 1:10.

Bantu badi bafila tshilejilu

Bakulu ne basadidi ba midimu badi bafila tshilejilu ne mitalu pa kuleja kanemu bua Nzubu wa Bukalenge. Pa tshibidilu, badi basungula mukulu umue anyi babidi peshi basadidi ba midimu bua kulombola midimu ya dilama Nzubu wa Bukalenge ne mankenda. Muaba udi bisumbu bivule bitumika ne Nzubu wa Bukalenge umue, kasumbu ka bakulu kadi ne bujitu bua kutangila muanda eu.

Nansha mudi bamue ba kudibu basungudibua bua kutangila midimu ya mushindu’eu, basadidi ba midimu ne bakulu buonso badi ne bua kutabalela Nzubu wa Bukalenge ne muoyo umue. Badi bashindika se: Nzubu wa Bukalenge mmulongolola bua Yehowa ne badi batumika nende bua ntendelelu wende.

Padi dimulongolola dikengedibua, bakulu kabena ne bua kuladikija. (2 Kulondolola 24:5, 13; 29:3; 34:8; Nehemiya 10:39; 13:11) Mu bimue bisumbu, badi bakontolola ku musangu ne ku musangu Nzubu wa Bukalenge bua kumona mua kumulongolola diakamue. Badi benza inventere bua kuikala ne dishindika dia se: biamu bia mudimu bidiku ne kabidi bidi pabuipi. Bikalaku muaba kampanda musunguluke wa kulamina biamu bia mudimu, nkasu, miele, mbeketshi ya mâyi anyi nkombo, bakulu ne basadidi ba midimu badi ne bua kutabalela bua muaba eu kulamibuawu ne mankenda. Aba badi basadila ku biajidilu bia mikanda ne bibejibeji badi ne bua kuangata muanda eu bu udi ubatangila buobo bine pa kutabalela diakamue bua turton tudi munda mutupu katuikadi tulekelela mu Nzubu wa Bukalenge nansha.

Pa kufila tshilejilu, bakulu ne basadidi ba midimu badi mua kuambuluisha bakuabu bena mu tshisumbu bua kuleja mitalu bua Nzubu wa Bukalenge. (Ebelu 13:7) Bantu buonso badi mua kuleja kanemu kadi kakengedibua pa kudifila mu mudimu wa kukomba ne kusukula Nzubu wa Bukalenge ne pa kutabalela mankenda ende wonso.

Yezu udi wamba mu Matayi 18:20 ne: “Muaba udi babidi anyi basatu basangile mu dîna dianyi, meme ndi munkatshi muabu.” Eyowa, Yezu udi utabalela bitudi tuenza patudi tudisangisha bua kutendelela Yehowa. Udi utabalela bisangilu bidi bienzekela ku nzubu ya bantu kampanda ne bisangilu bu mudi mpuilu minene.

Bua miliyo ne miliyo ya Bantemu ba Yehowa, kakuena muaba mukuabu wa mushinga mukole udibo balame mu mutshima wabo kupita muaba wa pa tshibidilu bua ntendelelu, Nzubu wa Bukalenge. Badi baleja kanemu kadi kakengedibua bua muaba eu. Badi bautabalela ne mitalu, ne badi badienzeja bua kutumika bimpe ne muaba eu. Nuenu penu, nulonde mubelu udi Yehowa yeye muine mufile: “Ulame makasa ebe pawudi uya ku nzubu wa Nzambi mulelela.”​—Muambi 5:1.