Nkonko ya babadi

Bu mudi bena nkristo kabayi badia lupiku lua mfranga, badi mua kuanyisha tiké anyi kudifila mu manaya a tombola muikalebu mua kupeta tudo anyi?

Elu ndukonko ludi lujudibua pa tshibidilu, kabidi, bakavua bamane kuluandamuna mu mikanda yetu. Index bu mudi ya Publications de la Société Watch Tower​—Index 1950-1985 (ne mukuabu wa mikanda mipatula mu 1986-1989) idiku mu imue miakulu. Index eyi bikalayiku mu muakulu wenu, idi mua kumueka mikumbanyine menemene bua kupeta lukasa mandamuna adi asankisha ku nkonko yenu.

Lukonko ludi lujula kulu eku ntshilejilu kampanda. Pa kutangila mu Index wa 1950-1985, muinshi mua tshiena-bualu tshia “Questions des lecteurs,” tudi tusangana ka-tshiena-bualu ka “‘loterie,’ chrétien peut-t-il y prendre part?” Badi batuma mubadi bua kutangila ku tshitupa tshia “Questions des lecteurs” mu La Tour de Garde wa dia 1 Juin 1973, dibeji dia 350 ne dia 351.a Bantemu bavule badi ne relié (anyi nimero) ya La Tour de Garde ya 1973, anyi badi mua kuyitangidila mu biblioteke bidi bisumbu bivule nabi mu Nzubu ya Bukalenge.

Tshiena-bualu tshipatula mu 1973 tshivua tshileja patoke se: bena nkristo balelela badi bepuka manaya kayi wonso a tombola adi akengela kusumba tiké (bu mudi tiké wa loterie) peshi kutula mfranga bua kututa dikasa dilenga bua kupeta kado kampanda. Mu mêyi makuabo, tudi tuepuka manaya a kufuilakana mfranga, adi bushuwa mushindu kampanda wa lukuka.​—1 Kolinto 5:11; 6:10; Efeso 4:19; 5:3, 5.

Magazin kampanda anyi ditanda kansanga didi mua kutumika ne disungula dia tiké ku mpukapuka bua kudiendeshila lumu. Tshionso tshidi muntu ne bua kuenza, nkufila patupu dîna diende anyi kuuja dibeji kampanda anyi tiké kakuyi difuta mfranga. Disungula dia tiké ku mpukapuka ng’umue wa ku mishindu ya kuendesha lumu lua bintu kampanda; ngenzelu eu udi wambuluisha bua kusungula kakuyi kansungansunga eu waluabu kupesha kado anyi tudo. Bamue bena nkristo badi batshinka se: badi mua kuanyisha kado tshikondo tshidibo basungula tiké bualu kabiena mu diumvuangana ne manaya a difuilakana mfranga, anu mudibo mua kuanyisha bintu kampanda kakuyi difuta mfranga anyi bintu bidi magazin peshi ditanda kampanda biabanya mu kampanye kabi ka didimanyisha ku bantu.

Kadi, bamue bena nkristo badi bepuka bintu bionso bia mushindu’eu, bualu kabena basue kulenduisha anyi kulubakaja bantu nabo, ne kabena bajinga nansha kakese kueyemena Dikasa dilenga. Amu bu mudi Yeshayi 65:11 ubileja, basadidi ba Nzambi kabena beyemena kudi “nzambi mututshishi wa Dikasa Dilenga” anyi “nzambi wa Mpukapuka.” Pamu’apa, kabidi badi bepuka bua kudifila mu mudimu kayi wonso wa diendesha lumu udibu mua kulua kulomba eu wapeta kado bua kukumbaja. Bushuwa, aba badi bela meji a mushindu’eu, kabena ne bua kujana muena nkristo anyi bena nkristo badi babuela mu disungula dia tiké dia mushindu’eu ne kuondo ka muoyo kapole nansha.​—Fuanyikija ne Lomo 14:1-4.

[Mêyi adi kuinshi]