Andamunayi ku malaya a Nzambi ne midimu ya ditabuja
“Yeye [Yehowa Nzambi] mmutupeshe ne budikadidi malaya a mushinga mukole ne manene matambe.”—2 PETELO 1:4.
1. Ntshinyi tshidi tshituambuluisha bua kuenza midimu ya ditabuja dilelela?
YEHOWA udi ujinga bua tuetu kuenza midimu ya ditabuja mu malaya ende. Kadi, “ditabuja ki ntshintu tshidi natshi bantu buonso.” (2 Tesalonike 3:2) Tshikadilu etshi ndimuma dia spiritu munsantu wa Nzambi, peshi bukole buenzeji. (Galatia 5:22, 23) Nenku, amu aba badi balombodibue ku spiritu munsantu wa Yehowa ke badi mua kuikala ne ditabuja.
2. Mmunyi mudi mupostolo Paulo umvuija “ditabuja”?
2 Kadi ditabuja ntshinyi? Mupostolo Paulo udi udibikila ne: “dileja patoke dia malelela adi kaayi amueneka ne mêsu.” Dileja patoke dia malelela aa adi kaayi amueneka ndikole ne pa nanku ndikumbanangane ne ditabuja. Ditabuja didi kabidi “dindila dishindame dia malu atudi batekemene” bualu aba badi ne tshikadilu etshi badi ne dishindika dia se: tshintu tshionso tshilaya kudi Yehowa Nzambi ntshijadikibue e kuenza anu bu tshikadi tshimane kukumbana.—Ebelu 11:1.
Ditabuja ne malaya a Yehowa
3. Ntshinyi tshienzekela bena nkristo bela manyi pikalabo benze midimu ya ditabuja?
3 Bua kulengelela Yehowa, tudi ne bua kuenza midimu ya ditabuja mu malaya ende. Mupostolo Petelo wakabileja mu mukanda wende muibidi mufundisha ku spiritu, pabuipi ne 64 B.B. Wakaleja ne: bikala bena nkristo nende bela manyi mua kuenza midimu ya ditabuja, bavua mua kumona dikumbana dia “malaya a mushinga mukole ne manene matambe” a Nzambi. Bu tshipeta, bavua ne bua kulua “babanyanganyi ba ngikadilu wa bunzambi” bu bapianyi diatshimue ne Yezu Kristo mu Bukalenge bua mu diulu. Ku ditabuja ne ku diambuluisha dia Yehowa, bakakopoka ku bupika bua bibidilu ne bienzedi bia bulongolodi ebu bunyanguke. (2 Petelo 1:2-4) Anjibi kuela meji! Aba badi benza midimu ya ditabuja dilelela badi bapeta budikadidi bua dikema bua muomumue lelu’eu.
4. Mbikadilu kayi bitudi ne bua kusakidila ku ditabuja dietu?
4 Ditabuja mu malaya a Yehowa ne dianyisha bua budikadidi budi Nzambi mutupeshe bidi ne bua kutusaka bua kuenza muetu muonso bua kulua bena nkristo ba tshitembu. Petelo wakamba ne: “Mu kuandamuna kuenu ne madikolela wonso, nusakidile ku ditabuja dienu buimpe, ku buimpe buenu dimanya, ku dimanya dienu didikanda, ku didikanda dienu dinanukila, ku dinanukila dienu ditshina dia Nzambi, ku ditshina dienu dia Nzambi disuangana dia buena muntu, ku disuangana dienu dia buena muntu dinanga.” (2 Petelo 1:5-7) Nenku, Petelo udi utupesha liste wa malu atudi ne bua kukuata bimpe ku muoyo bituikale ne budimu. Tukonkononayi bikadilu ebi ne ntema mikole.
Bintu binene bidi mu ditabuja
5, 6. Buimpe ntshinyi, ne mmunyi mutudi mua kubusakidila ku ditabuja dietu?
5 Petelo wakamba ne: ngikadilu bu mudi buimpe, dimanya, didikanda, dinanukila, ditshina dia Nzambi, disuangana dia buena muntu, ne dinanga idi ne bua kusakidibua umue ku mukuabo ne ku ditabuja dietu. Tudi ne bua kuenza madikolela mavule bua kuvuija bikadilu ebi bintu binene bia mu ditabuja dietu. Tshilejilu, buimpe ki ntshikadilu tshitudi tuleja pikalaku kakuyi ditabuja to. Mushikuluji wa miaku, W. E. Vine udi uleja se: mu 2 Petelo 1:5, “buimpe mbusakidila bu tshikadilu tshia ntuadijilu tshidi tshikengedibua mu dienza midimu ya ditabuja.” Tshionso tshia ku bikadilu bikuabu bidi Petelo utela tshidi kabidi tshitupa tshia ditabuja dietu.
6 Tshia kumpala, tudi ne bua kusakidila buimpe ku ditabuja dietu. Kuikala ne buimpe kudi kumvuija kuenza bidi bimpe ku mêsu kua Nzambi. Muaku wa tshiena-Greke udibo bangate apa ne: “buimpe,” imue nkudimuinu mmiwandamune ne: “malu mimpe” (Français courant) peshi “nsombelu mulenga.” (Muanda Mulenga Lelu) Buimpe budi butusaka munda muetu bua kuepuka kuenza bibi peshi bua kuenzela bantu netu bibi. (Musambu wa 97:10) Budi kabidi butusaka bua kuikala ne dikima mu dienza bimpe bua diakalenga dia bakuabo mu nyuma, ku mubidi, ne mu mutshima.
7. Bua tshinyi tudi ne bua kusakidila dimanya ku ditabuja dietu ne ku buimpe buetu?
7 Bua tshinyi Petelo udi utulomba ne lukasa luonso bua kusakidila dimanya ku ditabuja dietu ne ku buimpe buetu? Eyowa, patudi tupeta bipumbishi bipiabipia bia ditabuja dietu, tudi tukengela dimanya bua kusunguluja bimpe ne bibi. (Ebelu 5:14) Ku dilonga dia Bible ne ku dishikuluja mu ditumikila dia Dîyi dia Nzambi ne mu dienza midimu ya meji mu nsombelu wa ku dituku ne ku dituku, tudi tuvudija dimanya dietu. Pa nanku, ebi bidi bituambuluisha bua kulama ditabuja dietu ne kutungunuka mu dienza bidi bimpe patudi mu diteta.—Nsumuinu 2:6-8; Yakobo 1:5-8.
8. Didikanda ntshinyi, ne mmunyi mudidi disuikibue ku dinanukila?
8 Bua kutuambuluisha bua kutantamena mateta ne ditabuja, tudi tukengela kusakidila ku dimanya dietu didikanda. Muaku wa tshiena-Greke udibo bakudimune ne: “didikanda” udi uleja bukole bua kudikontolola tuetu nkayetu. Dimuma edi dia spiritu wa Nzambi didi dituambuluisha bua kudilama mu lungenyi, mu miaku ne mu ngikadilu. Pa kusuminyina mu ditumika ne didikanda, tudi tusakidilaku dinanukila. Muaku wa tshiena-Greke udibo bakudimune ne: “dinanukila” udi umvuija dishindama dia dikima, ki ndidilekelela mu dikenga didi muntu kayi mua kuepuka. Yezu wakatantamena mutshi wa tshinyongopelu bua disanka divua dimutekela kumpala. (Ebelu 12:2) Disanka dia kudi Nzambi disangisha ne dinanukila didi dikolesha ditabuja dietu ne didi dituambuluisha bua kusanka mu makenga, kutantamena mateta, ne kuepuka divila ditabuja dietu patudi mu dikengeshibua.—Filipoi 4:13.
9. (a) Ditshina dia Nzambi ntshinyi? (b) Bua tshinyi tudi ne bua kusakidila disuangana dia buena muntu ku ditshina dietu dia Nzambi? (c) Mmunyi mutudi mua kusakidila dinanga ku disuangana dietu dia buena muntu?
9 Ku dinanukila dietu tudi ne bua kusakidila ditshina dia Nzambi—didi diumvuija kunemekela, kutendelela ne kusadila Nzambi. Ditabuja dietu didi dikola patudi tuenza malu a ditshina dia Nzambi ne tumona mushindu udi Yehowa wenzela tshisamba tshiende malu. Kadi, bua kuleja ditshina dia Nzambi, tudi tukengela disuangana dia buena muntu. Ndekelu wa bionso, “muntu udi kayi unanga muanabo udiye umona, kêna mua kunanga Nzambi udiye kayi umona.” (1 Yone 4:20) Mitshima yetu idi ne bua kutusaka bua kuleja disuangana dilelela kudi bakuabo basadidi ba Yehowa ne kukeba misangu yonso diakalenga diabo. (Yakobo 2:14-17) Kadi, bua tshinyi mbatuambile bua kusakidila dinanga ku disuangana dia buena muntu? Bushuwa, Petelo uvua usua kuamba ne: tudi ne bua kuleja dinanga kudi bukua-bantu buonso, ki nganu kudi bana betu to. Dinanga edi didi dilejibua nangananga mu diamba dia lumu luimpe ne mu diambuluisha bantu mu nyuma.—Matayi 24:14; 28:19, 20.
Bipeta bishilangane
10. (a) Netuikale ne bienzedi kayi patuasakidila buimpe, dimanya, didikanda, dinanukila, ditshina dia Nzambi, disuangana dia buena muntu, ne dinanga ku ditabuja dietu? (b) Ntshinyi tshidi tshienzeka pikala mudiambi wa mudiye muena nkristo mupange bikadilu ebi?
10 Bituasakidila buimpe, dimanya, didikanda, dinanukila, ditshina dia Nzambi, disuangana dia buena muntu ne dinanga ku ditabuja dietu, netuele meji, netuakule, netuenze malu mu mishindu idi Nzambi muanyishe. Kadi, pikala muntu udiamba muena nkristo upangila bua kuleja bikadilu ebi, udi ulua mufofo mu nyuma. Udi ‘ubuikila mêsu ende pa butoke’ bua kudi Nzambi ne upua muoyo bua se: wakakezudibua ku mpekatu yende ya kale. (2 Petelo 1:8-10; 2:20-22) Katupangidi mushindu’eu ne katujimiji ditabuja mu malaya a Nzambi.
11. Ntshinyi tshitudi ne bua kutekemena kudi bena nkristo bela manyi balamatshi ba mikenji?
11 Balamatshi ba mikenji bena nkristo bela manyi a nyuma badi ne ditabuja mu malaya a Yehowa ne badi benza muabo muonso bua dibikila diende ne dibasungula diende kuikalabi bishindika. Nansha kuoku kuikale bilenduishi bia mushindu kayi mu njila wabo, tudi mua kutekemena bua buobo kuleja bikadilu bia bantu ba Nzambi. Bua bela manyi ba lulamatu, ‘kudi tshibuelelu tshia mushinga mukole mu bukalenge bua kashidi bua Yezu Kristo’ ku diambuluisha dia dibiishibua bua kupeta muoyo wa mu nyuma mu diulu.—2 Petelo 1:11.
12. Mmunyi mutudi ne bua kumvua miaku idi mu 2 Petelo 1:12-15?
12 Petelo uvua mumanye se: uvua ne bua kufua mu tshikondo tshîpi, ne uvua mutekemene bua kupeta dibiishibua bua muoyo wa mu diulu. Kadi, bu mutshivuaye ne muoyo mu “tabernakle eu”—peshi mubidi wende wa bumuntu—wakakeba mua kuibaka ditabuja munda mua bena kuitabuja nende ne kubatabeja pa kubavuluija bintu bidi bikengedibua bua kupeta dianyishibua dia Nzambi. Kunyima kua lufu luende, bana babo ne Petelo ba mu nyuma, ba balume ne ba bakaji, bavua mua kukolesha ditabuja diabo pa kuvuluka miaku yende.—2 Petelo 1:12-15.
Ditabuja mu dîyi dia buprofete
13. Mmunyi muvua Nzambi mufile tshijadiki tshidi tshikolesha ditabuja pa bidi bitangila dilua dia Kristo?
13 Nzambi nkayende wakafila bumanyishi budi bukolesha ditabuja bua dilua dia Yezu “ne bukole ne butumbi bunene.” (Matayi 24:30; 2 Petelo 1:16-18) Bu muvuabo kabayi ne bijadiki, bansaserdose bampagano bakamba malu a dishima pa bidi bitangila ba-nzambi babo, kadi Petelo, Yakobo ne Yone bavua bantemu bakadimuena butumbi bua Yezu mu dikudimuka dia mpala wende. (Matayi 17:1-5) Bakamumona mutumbishibue ne bakumvua dîyi dia Nzambi yeye muine dianyisha Yezu bu Muanende munanga. Dianyisha edi ne dikenka dia Kristo bivua bimupuekeshile lumu ne butumbi. Bua disokolodibua edi dia kudi Nzambi, Petelo wakabikila muaba eu, uvua imue misangu ku luseke lua Hermon, ne: “mukuna munsantu.”—Fuanyikija ne Ekesode 3:4, 5.
14. Mmunyi mudi ditabuja dietu mua kushintuluka ku diambuluisha dia dikudimuka dia mpala wa Yezu?
14 Nenku, mushindu kayi udi dikudimuka dia mpala wa Yezu ne bua kuikala ne buenzeji pa ditabuja dietu? Petelo wakamba ne: “Nenku tudi ne dîyi dia buprofete dijadikibue; ne nudi nuenza bimpe pa kuteyaku ntema bu ku muendu udi ukenka mu muaba wa mîdima, too ne patshia butuku ne muajuka mutoto wa mu dinda, mu mitshima yenu.” (2 Petelo 1:19) “Dîyi dia buprofete” didi disua kumvuija milayi ya mu Mifundu ya tshiena-Ebelu ivua itangila Masiya ne dîyi diakamba Yezu dia se: uvua ne bua kulua “ne bukole ne butumbi bunene.” Mmushindu kayi uvua dîyi edi ne bua “kujadikibua” ku dikudimuka dia mpala? Muanda eu wakajadika dîyi dia buprofete pa bidi bitangila dilua dia Kristo mu bukole bua Bukalenge.
15. Kutabalela dîyi dia buprofete kudi kumvuija tshinyi?
15 Bua kukolesha ditabuja dietu, tudi ne bua kutabalela dîyi dia buprofete. Ebi bidi bisua kumvuija kulonga dîyi edi, kudiumvuija mu bisangilu bia bena nkristo, ne kutumikila mibelu yadi. (Yakobo 1:22-27) Tudi ne bua kudivuija “muendu udi utema mu muaba wa mîdima,” bua kukenkesha mitshima yetu. (Efeso 1:18) Anu bituenza nenku ke diodi kutulombola too ne “patshia butuku,” peshi, muavua “mutoto wa mu dinda,” Yezu Kristo, kudisokolola mu butumbi. (Buakabuluibua 22:16) Didisokolola edi nediumvuije kabutu ka aba badi kabayi ne ditabuja ne mabenesha bua aba buonso badi benza midimu ya ditabuja.—2 Tesalonike 1:6-10.
16. Bua tshinyi tudi ne bua kuikala ne ditabuja dia se: malaya wonso a buprofete adi mu Dîyi dia Nzambi neakumbane?
16 Baprofete ba Nzambi kabavua anu bena meji bakenza milayi ya meji, bualu Petelo wakamba ne: “Kakuena mulayi wa mu Mufundu udi ufumina ku diumvuija dia muntu. Bualu, katshia mulayi kawutu muanji kufumina ku disua dia muntu, kadi bantu bakakula basaka kudi Nzambi bu muvuabo benzeja ku spiritu munsantu.” (2 Petelo 1:20, 21) Tshilejilu, Davidi wakamba ne: “Spiritu wa Yehowa ke uvua muakule mukana muanyi.” (2 Samuele 23:1, 2) Ne Paulo wakafunda ne: “Mufundu wonso mmuenzeja ku spiritu wa Nzambi.” (2 Timote 3:16) Bu muvua baprofete ba Nzambi benzeja ku spiritu wende, tudi mua kuikala ne ditabuja dia se: malaya wonso mafunda mu Dîyi diende neakumbajibue.
Bavua ne ditabuja mu malaya a Nzambi
17. Ndilaya kayi divua nshindamenu bua ditabuja dia Abele?
17 Malaya a Yehowa avua nshindamenu wa ditabuja dia bena ‘divuba dinene’ dia bantemu bende ba kumpala kua Kristo. (Ebelu 11:1–12:1) Tshilejilu, Abele uvua ne ditabuja mu dilaya dia Nzambi pa bidi bitangila “kankanunuina” kavua ne bua kuboza “nyoka” ku mutu. Tshivua tshijadiki tshia dikumbana dia mulawu wa Nzambi pa baledi ba Abele. Pambelu pa Edena, Adama ne dîku diende bakadia diampa ku tshisululu tshia pa mpala pabo bualu buloba buela mulawu buvua ne bua kupatula mêba ne mingonga. Bia muomumue, Abele wakamona dijinga divua nadi Eva bua bayende ne wakamona se: Adama wakamukokesha. Bushuwa, wakakula bua bisama bia diimita diende. Ne tshibuelelu tshia lupangu lua Edena tshivua tshilama kudi bakeluba ne muele wa kapia. (Genese 3:14-19, 24) Bionso ebi bivua “dileja patoke” divua dijadikila Abele se: dipikudibua divua ne bua kulua ku diambuluisha dia Kankanunuina mulaya. Abele wakenza tshienzedi tshia ditabuja pa kulambula Nzambi mulambu wakamueneka muikale ne mushinga mukole kupita wa Kayina.—Ebelu 11:1, 4.
18, 19. Mmu mishindu kayi muvua Abrahame ne Sara benze midimu ya ditabuja?
18 Bankambua Abrahame, Izaka, ne Yakoba bavua pabo ne ditabuja mu malaya a Yehowa. Abrahame wakenza midimu ya ditabuja mu malaya a Nzambi, ke bualu kayi mêku wonso a pa buloba avua ne bua kudibenesha ku diambuluisha diende ne ndelanganyi yende ivua ne bua kupeshibua buloba. (Genese 12:1-9; 15:18-21) Muanende Izaka ne muikulu wende Yakoba bavua “bapianyi nende ba dine dilaya edi.” Bua ditabuja, Abrahame “wakasa bu muenyi mu ditunga dia dilaya” ne wakindila “tshimenga tshivua ne bibakilu bilelela,” [peshi] Bukalenge bua Nzambi bua mu diulu ne yeye udi ne bua kubiishibua ku lufu muinshi muabu bua kupeta muoyo pa buloba. (Ebelu 11:8-10) Udi pebe ne ditabuja dia muomumue anyi?
19 Sara, mukaji wa Abrahame, uvua ne bidimu bitue ku 90 ne katshiyi mukumbane bua kulela muana pakenzaye mudimu wa ditabuja mu dilaya dia Nzambi ne kupeshibuaye bukole bua “kuimita kankanunuina” ne kulela Izaka. Nenku, kudi Abrahame mununu wa bidimu 100, “bu mufue” pa bidi bitangila lulelu, “kuakaledibua bana anu bu mitoto ya muulu ku bungi.”—Ebelu 11:11, 12; Genese 17:15-17; 18:11; 21:1-7.
20. Nansha muvua bankambua kabayi bamone dikumbana dionso dia malaya a Nzambi kudibo, bakenza tshinyi?
20 Bankambua ba lulamatu bakafua kabayi bamone dikumbana dionso dia malaya akabalaya Nzambi. Kadi, “bakamona [bintu bilaya] pa bule ne bakasanka bualu buabi ne bakamba patoke ne: bavua benyi ne bamuangadi mu ditunga.” Kuakapita bipungu bivule kumpala kua Buloba bulaya kuluabo tshintu tshia ndelanganyi ya Abrahame. Kadi, mu nsombelu yabo, bankambua batshinyi ba Nzambi bakenza midimu ya ditabuja mu malaya a Nzambi. Bu muvuabo kabayi bajimije ditabuja nansha kakese, nebabiishibue mu tshitupa tshîpi bua kuikala ne muoyo pa buloba budi buikale “tshimenga” tshivua Nzambi mubalongoluele, [peshi] Bukalenge bua Masiya. (Ebelu 11:13-16) Bia muomumue, ditabuja didi ditukuba bua kuikala balamatshi ba mikenji ya Yehowa nansha tuetu katuyi tumona dikumbana dia buludiludi dia malaya ende wonso a dikema. Ditabuja dietu neditusake kabidi bua kutumikila Nzambi bu muakenza Abrahame. Ne amu bu muakashilaye ndelanganyi yende bumpianyi bua mu nyuma, nenku tudi mua kuambuluisha betu bana bua kuenza midimu ya ditabuja mu malaya a mushinga mukole a Yehowa.—Ebelu 11:17-21.
Ditabuja didi dipetesha bena nkristo muoyo
21. Bua kuanyishibua kudi Nzambi lelu’eu, ntshinyi tshidi ne bua kubuejibua mu midimu yetu ya ditabuja?
21 Kabiyi mpata, ditabuja didi ne bukuabo bualu pa kulekela ditaba dia dikumbana dia malaya a Yehowa. Mu miyuki ya bukua-bantu, bivua bikengela kuenza midimu ya ditabuja Nzambi mu mishindu mishilangane bua tuetu kupeta dianyishibua kudiye. Paulo wakamanyisha se: “mbikole bua kumulengelela [Yehowa Nzambi] bikala muntu kayi ne ditabuja, bualu eu udi usemena kudi Nzambi udi ne bua kuitabuja se: udi ne utu udienza mufutshi wa aba badi bamukeba menemene.” (Ebelu 11:6) Bua kuanyishibua kudi Yehowa lelu’eu, muntu udi ne bua kuenza midimu ya ditabuja mu Yezu Kristo ne mu mulambu wa tshia-bupikudi uvua Nzambi mufile ku diambuluisha diende. (Lomo 5:8; Galatia 2:15, 16) Bidi’anu bu muvua Yezu nkayende muambe ne: “Nzambi wakananga bantu bikole e kubapa Muanende umuepele bua muntu yonso udi wenza midimu ya ditabuja kudiye kabutudibu, kadi apete muoyo wa kashidi. Eu udi wenza midimu ya dingitabuja udi ne muoyo wa kashidi; eu udi ubenga kutumikila Muana kakuikala ne muoyo, kadi, tshiji tshia Nzambi netshikale kudiye.”—Yone 3:16, 36.
22. Bukalenge bua Masiya nebukumbajije dilaya kayi?
22 Yezu udi ne mudimu wa kumpala mu dikumbaja dia malaya a Nzambi pa bidi bitangila Bukalenge budi bena nkristo basambila bualu buabo. (Yeshayi 9:6, 7; Danyele 7:13, 14; Matayi 6:9, 10) Anu bu muvua Petelo muleje, dikudimuka dia mpala diakashindika dîyi dia buprofete pa bidi bitangila dilua dia Yezu mu bukole ne butumbi bia Bukalenge. Bukalenge bua Masiya nebufikishe dikumbana dikuabo dilaya dia Nzambi, bualu Petelo wakafunda ne: “Kadi, bilondeshile dilaya diende, tudi bindile diulu dipiadipia ne buloba bupiabupia mudi buakane ne bua kuikala.” (2 Petelo 3:13) Mulayi wa muomumue wakakumbana pakapingana bena Yuda bavua bakuatshibue ku bupika mu 537 K.B.B. muinshi mua mbulamatadi uvua ne Zorobabele bu nguvernere ne Yoshua bu muakuidi munene. (Yeshayi 65:17) Kadi, Petelo udi ufunkuna tshikondo tshitshilualua pikala “mawulu mapiamapia”—peshi Bukalenge bua Masiya bua mu diulu—ne bua kukokesha “buloba bupiabupia,” peshi bukua-bantu bakane badi basombe pa dibulunge edi.—Fuanyikija ne Musambu wa 96:1.
23. Nnkonko kayi idi itangila buimpe ituakonkonona mu tshiena-bualu tshidi tshilonda?
23 Bu mutudi basadidi ba Yehowa balamatshi ba mikenji ne balongi ba Muanende munanga Yezu Kristo, tudi ne dijinga dikole dia bulongolodi bupiabupia bulaya kudi Nzambi. Tudi bajadike se: bukadi pabuipi, ne tudi ne ditabuja dia se: malaya wonso a mushinga mukole a Yehowa neakumbane. Bua kuenda mushindu udi Nzambi mua kuanyisha, tudi ne bua kukolesha ditabuja dietu pa kusakidilaku buimpe, dimanya, didikanda, dinanukila, ditshina dia Nzambi, disuangana dia buena muntu ne dinanga.a Bu mutuafiki apa, tudi mua kudiebeja nenku: mmunyi mutudi mua kuleja buimpe? Ne mmunyi mudi kuikala bantu bimpe mua kutuambuluisha tuetu bine ne bakuabo, nangananga bena nkristo netu, badi bandamune ku malaya a Nzambi pa kuenza midimu ya ditabuja?
[Mêyi adi kuinshi]
a Ditabuja ne buimpe mbiumvuija mu nimero eu wa Tshibumba tshia Nsentedi. Dimanya, didikanda, dinanukila, ditshina dia Nzambi, disuangana dia buena muntu, ne dinanga nebikonkononyibue mu buondoke mu biena-bualu bidi bilonda.
Mandamuna ebe adi munyi?
◻ “Ditabuja” didi ne diumvuija kayi?
◻ Bilondeshile 2 Petelo 1:5-7, mbikadilu kayi bitudi ne bua kusakidila ku ditabuja dietu?
◻ Dikudimuka dia mpala wa Yezu didi ne bua kuikala ne buenzeji kayi pa ditabuja dietu?
◻ Mbilejilu kayi bia ditabuja biakafidibua kudi Abele, Abrahame, Sara, ne bakuabo bantu ba ku kale?
[Tshimfuanyi mu dibeji 15]
Udiku mumanye buenzeji budi nabu dikudimuka dia mpala wa Yezu pa ditabuja dia muntu anyi?