Bamanyishi ba Bukalenge badi balonda
Nsongalume munangi wa ngendu ya ku tuwulu udi upeta bulelela
BIKALA mutshima wa muntu kampanda mutangija ku buakane, Yehowa Nzambi, ku butuangaji bua Yezu Kristo ne banjelo bende, neatabalele bua se: muntu eu mufuanangana ne mukoko apete lumu luimpe lua Bukalenge bua Nzambi. Pa tshikondo tshiakanyine, neikale pamu’apa ku dia balume dia Yezu, ku luseke luimpe. (Matayi 25:31-33) Ke muvuabi bua nsongalume kampanda muena ditunga dia Autriche uvua mutambe kunanga ngendu ya ku tuwulu.
Tshivuaye mutambe kunanga tshivua kuenza luendu mu mutu wa kawulu, ku dianyisha dia batangidi ba njila ya njanja. Ne kamera, uvua ukuata filme wa njila mujima bua kumubandila tshiakabidi kuende. Mu tshikondo kampanda tshiakenzaye luendu kumbukila ku tshimenga tshia Vienne too ne ku Salzbourg, muendeshi wa kawulu uvua umue wa ku Bantemu ba Yehowa. Ntemu eu wakababidila tshikondo atshi bua kuyukidilangana ne nsongalume eu pa bidi bitangila Bukalenge bua Nzambi. Bangabanga, nsongalume wakakema pa kumvua muendeshi wa kawulu wakula bua Nzambi ne bua Bible, kadi munkatshi mua luendu, wakatamba kutabalela bikole dikuata filme kupita bivua muendeshi wa kawulu umuambila.
Pakalukilaye tshiakabidi kuende, nsongalume eu wakabandila kasete kende ka vidéo, kabiyi amu musangu umue, kadi misangu dikumi, bualu luendu elu luvua lumusankisha bikole. Bu muvuaye kabidi mukuate mêyi, uvua umvua ku musangu ne ku musangu bivua Ntemu mumuambile. Uvua utamba kuibidilangana ne bivuaye umvue ku kakese ku kakese pavuaye utamba kubandila filme uvuaye mukuate pa kasete ka vidéo. Ndekelu wa bionso, wakafika ku dielelapu meji ne kuanyisha bikole bitambe dimanya dia dikema dia mu Bible. Uvua ne dijinga dia kumanya bia bungi.
Wakavuluka dîna dia muendeshi wa kawulu ne uvua mumanye se: muendeshi eu uvua usombele muaba kampanda ku Vienne. Nenku, wakaya ku poste ne kutuadija kuteta nimero ya telefone umue ku umue ivua ku luseke lua dîna dia muendeshi wa kawulu eu, mu annuaire. Uvua webeja yonso uvua wandamuna ku telefone ne: “Udi muendeshi wa kawulu anyi?” Pavuabo bamuandamuna ne: to, uvua ubikila ku nimero mukuabo. Ndekelu wa bionso, wakapeta muendeshi wa kawulu, wakamulondela muyuki wende ne kumumanyisha muvuaye ne dijinga dia kumanya bia bungi pa mukenji udi mu Bible.
Ntemu wakamanyisha filiale muanda eu bua muntu kampanda udi musombele pabuipi ne nsongalume kuya kumukumbula. Nenku, mu tshisumbu tshia muaba eu, muvua Ntemu mukuabo uvua pende muendeshi wa kawulu. Muendeshi mukuabo wa kawulu eu, wakakumbula munangi wa ngendu ya ku tuwulu, e kutuadija kulonga nende Bible. Nsongalume wakatambula mu muvu wa été 1991.
Yehowa, udi ukonkonona mitshima yonso, wakamona se: nsongalume eu uvua munange buakane ne muoyo umue. Nenku wakapeta bulelela bua mu Bible—nansha muvuabi mu mushindu wa pa buawu.—1 Kulondolola 28:9; Yone 10:27.
[Mêyi a dianyisha bua tshimfuanyi mu dibeji 9]
Ne dianyisha dia kumpanyi ya njanja ya Autriche