Utshidi muvuluke anyi?

Uvuaku mutabalele mushindu udi nimero ya ndekelu ya Tshibumba tshia Nsentedi ne ngenyi idi mua kukuambuluisha anyi? Bikalabi nanku, bua tshinyi kuenaku mua kuteta makokeshi ebe a dikuata malu ku muoyo ku diambuluisha dia nkonko idi ilonda eyi?

▫ Pikala ngenyi mibi ibuela mu tshieledi tshietu tshia lungenyi kabiyi ku disua dietu, ntshinyi tshitudi ne bua kuenza?

Tudi ne bua kutuma lungenyi ku tshintu tshikuabu, kuya kuendakana, kuditua mu dibala mikanda anyi kuenza mudimu kampanda wa ku nzubu. Nangananga disambila didi diambuluisha mushindu wa pa buawu mu tshikondo bu nunku. (Musambu wa 62:8)​—15/4, dibeji dia 17.

▫ Bua tshinyi bansonga badi ne bua kuikala ne budimu bua mishindu ya mijiki idibu bateleja?

Mijiki idi ne bukole bua kusonsola, kukoka ne kusaka muntu ku dienza amue malu. Bu mudi misambu mivule idi mimuangalake mikale ne mêyi a bungi mabubika pa bidi bitangila ditumika dibi ne bitupa bia lulelelu ne mêyi a mipinganyi adi afunkuna tshiendenda tshia masandi, mbipepele bua kujingulula se: bidi bikengela kuikala ne budimu bukole mu disungula dia diske ne kasete bitudi tuteleja.​—15/4, dibeji dia 20 ne dia 21.

▫ Miaku “dikalaku dia Mukalenge wetu Yezu Kristo” idi yumvuija tshinyi? (1 Tesalonike 5:23)

Idi ifunkuna dikalaku bu mukalenge dia Mukalenge Yezu Kristo, kubangila mu 1914, tshidimu tshia dibanjijibua diende mu diulu. (Musambu wa 110:1, 2)​—1/5, dibeji dia 11.

▫ Ntshipatshila kayi tshiakakumbaja Yehowa ku dikezula ntempelo wende wa mu nyuma? (Malaki 3:1-4)

Yehowa uvua musue bua ntempelo wende ikale mukezuke, bua pakokibua bungi buvule bua bamutendeledi badi ne ditekemena dia kuikala ne muoyo pa buloba, basangana muaba udi bumfumu buende ku mutu kua bionso bunemekibue, muaba udi dîna diende dia bunzambi dibingishibue ne udibo batumikila mikenji yende miakane.​—1/5, dibeji dia 16.

▫ “Bintu” bidi Yezu Kristo mupesha mupika wende udiye muteke mbinganyi? (Matayi 24:45-47)

“Mbintu” bionso bia mu nyuma bidi pa buloba, binebi mbilue tshiuma tshia Kristo bilondeshile bukokeshi bupeteleye bu mukalenge wa mu diulu. Binebi bidi ne bukenji bua kuenza bantu ba mu matunga wonso balongi ba Kristo. (Matayi 28:19, 20)​—1/5, dibeji dia 17.

▫ Mmunyi mudi bakulu bena nkristo baleja se: badi bakumbaja mudimu wabu wa balami ku “budisuile,” bilondeshile mubelu wa Petelo udi mu 1 Petelo 5:2?

Mukulu muena nkristo udi ukuba mikoko udi wenza nunku ku budisuile, ku budikadidi ne disua diende, kadi muikale ku bulombodi bua mulami mulenga, Yezu Kristo. Kuenza ku budisuile kudi kumvuija kabidi ne: mulami muena nkristo udi ukokela bukokeshi bua Yehowa ne uleja kanemu kende ku budisuile bua ndongololuelu idi yangatshibua ku bulombodi bua Nzambi.​—15/5, dibeji dia 20.

▫ Ntshinyi tshivua Yezu usua kumvuija pakambaye ne: muntu yonso udi musue kundonda udi ne bua “kudipidia yeye muine”? (Matayi 16:24)

‘Kudipidia wewe muine’ kudi kumvuija ne: udi ne bua kuitaba bua kubenga kuikala ne muoyo buebe wewe muine, kadi bua Yehowa. (1 Kolinto 6:19, 20) Abi bidi biumvuija ne: muntu udi ne muoyo, ki mbua kudisankisha, kadi kusankisha Nzambi. (Lomo 14:8)​—1/6, dibeji dia 9.

▫ Ntshinyi tshidi tshikengedibua bua kuikala ne disanka?

Kuikala mu malanda masheme ne Yehowa ne kutumika bivule mu mudimu wende. Abi ke bidi bipetesha disanka dilelela mu nsombelu.​—1/6, dibeji 22.

▫ Bua tshinyi Yehowa uvua mupeshe Abrahama budikadidi bua kuakula bu muvuaye muenze pa bidi bitangila dijinga Diende dia kubutula Sodomo? (Genese 18:22-32)

Diambedi, bualu Abrahama uvua mulunda wa Nzambi. (Yakobo 2:23) Pashishe, mbua pavuaye mumanye kanyinganyinga kakole kavua munda mua Abrahama. Uvua mumanye ne: Lota, muana wa muanabo ne Abrahama, uvua musombele mu Sodome, ne Abrahama uvua uditatshisha bua dikubibua diende. Bua mabingila aa ke buvua Yehowa mudiakaje bua kuandamuna ku nkonko ya Abrahama pa bidi bitangila dijinga Diende dia kubutula Sodomo.​—15/6, dibeji 16.

▫ Mu siekele wa 16, Dishintuluka diakafikisha ku mishonyi, diakalukija ku buena-nkristo bulelela anyi?

Tòo, kadiakenza nanku! Pamutu pa kualukija buena-nkristo bulelela, Dishintuluka diakapatuisha musumbasumba wa ekleziya ya ditunga anyi ya rejon ivua ikeba dianyishibua kudi bena mianda ya politike ya matunga ne kubakuatshisha muabu muonso tshikondo tshia mvita yabu.​—1/7, dibeji dia 10 ne dia 11.

▫ Mbinganyi bidi “biuma mu diulu” bivua Yezu muakule bualu buabi mu Matayi 6:20?

Mbiuma bidi kabiyi bifubidila, bu mudi kuikala ne lumu luimpe kudi Nzambi ne kusadila ne lulamatu mu mudimu wa bena nkristo. Ebi bidi munkatshi mua bintu bidi Yehowa kayi upua muoyo nansha kakese. (Ebelu 6:10)​—1/7, dibeji dia 32.

▫ Mbikadilu kayi bidi Petelo utela bidi bikengela bua ditabuja dietu? (2 Petelo 1:5-7)

Petelo wakamba ne: buimpe, dimanya, didikanda, dinanukila, ditshina dia Nzambi, disuangana dia buena muntu ne dinanga tudi ne bua kubisakidila ku ditabuja dietu.​—15/7, dibeji dia 13.

▫ Ndidimuija kayi bua basadidi ba Nzambi didi mu muyuki wa mpekato wa Davidi ne Bath-sheba? (2 Samuele 11:2-4)

Nansha muvuaye ne mushindu wa kulabula disanka didi difuma ku dimanyangana dia mulume ne mukaji mu dibaka diende nkayende, Davidi wakalekela dijinga dibi dia kushala pamue kua mulume ne mukaji didiunda munda muende. Pa kumona bulengele bua mukaji wa Uriya, wakalekela lungenyi luende lumulombola​—too ne ku dienza bualu—​anu bua kulabula pamue nende disanka dibengangane ne mikenji. Ke tshidi mua kufikila musadidi yonso wa Nzambi biabengaye kuepuka mushindu eu wa lukuka. (Yakobo 1:14, 15)​—1/8, dibeji dia 14.