“Ufukune munda muanyi, Ô Nzambi”
“Ufukune munda muanyi, Ô Nzambi, ne umanye mutshima wanyi. . . . Undombole mu njila wa bikondo kabiyi bijadika.”—MUSAMBU WA 139:23, 24.
1. Mmunyi mudi Yehowa wenzela basadidi bende malu?
BUONSO buetu, tudi banange kupetangana ne bantu badi bamanye kutumvua, badi bangata nsombelu yetu ne mushinga, badi bavua kutuambuluisha patudi tuenza bilema ne badi kabayi batulomba bivule bipitshidile pa bitudi mua kuenza. Ke mushindu udi Yehowa wenzela basadidi bende malu. Musambu wa 103:14 udi wamba ne: “Bualu, yeye nkayende mmumanye bimpe mushindu utudi benza, uvuluka se: tudi lupuishi.” Ne Yezu Kristo, udi tshimfuanyi tshipuangane tshia Tatu’ende, udi wenza dibikila edi dia musangelu: “Vuayi kundi meme, nuenu buonso badi bakenga ne badi bazengele ne mabuki, ne meme nennukankamije. Angatayi bujitu buanyi [peshi: “Nuditeke muinshi mua bujitu buanyi pamue nanyi,” note (angl.)] ne nulongele kundi meme, bualu ndi mupole-malu ne mudipuekeshi mu mutshima, ne nenupete dikankamijibua bua anyima yenu. Bualu bujitu buanyi mbutekete ne dibuki dianyi ndipepele.”—Matayi 11:28-30.
2. Ndishilangana kayi didi pankatshi pa Yehowa ne bantu mu mushindu wabu udibo bangata (a) Yezu Kristo, ne (b) balondi ba Kristo?
2 Mmuenenu wa Yehowa bua basadidi bende utu ushilangana misangu mivule ne wa bantu. Udi umona malu mu mushindu mukuabu ne udi wangata ne mushinga malu kampanda adi pamu’apa bantu mua kuikala kabayi bamanye. Patshivua Yezu pa buloba, bavua “bamupetula ne bamuepuka kudi bantu.” Aba bavua kabayi bamuitabuja bu Masiya “kabakamutabalela nansha kakese.” (Yeshayi 53:3; Luka 23:18-21) Pabi, ku mêsu kua Nzambi, uvua “Muana [wa Nzambi], munangibue,” uvua Nzambi muambile ne: “Ndi mukuanyishe.” (Luka 3:22; 1 Petelo 2:4) Ku balondi ba Yezu Kristo, kudi bamue badi bapetudibua bualu mbapele ne kabidi bananukila dikengeshibua dikole. Pabi, bantu ba mushindu’eu, badi mua kuikala babanji ku mêsu kua Yehowa ne kua Muanende. (Lomo 8:35-39; Buakabuluibua 2:9) Bua tshinyi mmuenenu mmushilangane nunku?
3. (a) Bua tshinyi mushindu udi Yehowa wangata basadidi bende mmushilangane bikole ne wa bantu? (b) Bua tshinyi bidi bia mushinga mukole bua tuetu kukonkonona né tudi bantu ba mushindu kayi munda munda?
3 Yelemiya 11:20 udi wandamuna ne: “Yehowa . . . udi ukonkonona tuonyi ne mutshima.” Udi umona tshitudi munda munda; udi umona too ne bitupa bia bumuntu buetu budi busokome ku mêsu a bantu. Mu dikonkonona edi, Yehowa udi utuma ntema ya pa buayi ku ngikadilu ne malu malomba bidi bikengedibua bua malanda etu nende masheme, malanda adi apatuisha masanka a musangu mule. Tudi ne dishindika dia kumanya nenku; kabidi, abi bidi bituelesha meji. Bu mudi Yehowa utabalela tshitudi tuetu bine munda munda, bituasua kuikala bantu ba mushindu udiye ujinga kumona ne muoyo mu bulongolodi buende bupiabupia, bidi bia mushinga bua tuetu kudikonkonona tshitudi munda munda. Dîyi diende didi dituambuluisha bua kuenza dikonkonona dia mushindu’eu.—Ebelu 4:12, 13.
Mmeji kayipu a mushinga mukole a Nzambi!
4. (a) Ntshinyi tshivua tshisake mufundi wa Misambu bua kuamba ne: meji a Nzambi avua ne mushinga mukole kudiye? (b) Bua tshinyi adi ne bua kuikala ne mushinga mukole kutudi?
4 Kunyima kua yeye mumane kueleela meji pa butshiama ne buondoke bua dimanya didi nadi Nzambi pa bidi bitangila basadidi bende, ne pa dikumbana diende dia dikema bua kubatuadila diambuluisha didibo bakengela, mufundi wa Misambu Davidi wakafunda ne: “Kabidi, meji ebe adi ne mushinga mukole kundi!” (Musambu wa 139:17a) Meji aa, masokolola mu Dîyi diende difunda, mmatambe kubandila mapite wonso a bantu, abalakana kabidi kupita ngenyi yabu. (Yeshayi 55:8, 9) Meji a Nzambi adi atuambuluisha bua kushindamija ntema yetu pa bintu bidi ne mushinga menemene mu nsombelu ne bua kuikala ne mitalu mu mudimu wende. (Filipoi 1:9-11) Adi atuambuluisha bua kumona malu amu bu mudi Nzambi uamona. Adi atuambuluisha bua kuikala ne ngikadilu wa bululame kutudi tuetu bine, ne bua kudimona amu bu mutudi menemene mu mutshima wetu. Udiku mudiakaje bua kuenza nenku anyi?
5. (a) Ntshinyi tshidi Dîyi dia Nzambi ditukankamija bua kulama “kupita bintu bikuabu bionso”? (b) Muyuki wa mu Bible udi wakula bua Kayina udi ututuadila disanka kayi? (c) Nansha mutudi katuyi muinshi mua Mikenji ya Mozese, nku tshinyi kudiyi yituambuluisha bua kujingulula tshidi tshilengelela Yehowa?
5 Bantu batu ne tshibidilu tshia kuangata tshilunji ne mushinga munekesha, ke bua tshinyi Mifundu idi itupesha mubelu eu: “Kupita bintu bikuabu bionso bidi ne bua kulamibua, ukube mutshima webe.” (Nsumuinu 4:23) Ke tshidi Bible utuambuluisha bua kuenza pa kutupesha mêyi-matuma pamue ne bilejilu. Udi utuambila ne: Kayina wakafila milambu kudi Nzambi kadi kayi ne dishindika, eku, muoyo mujoboke munda, ne pashishe, kushala ne lukinu bua muanabu Abele. Udi utukankamija kabidi bua katufuananganyi nende. (Genese 4:3-5; 1 Yone 3:11, 12) Mbafundamu mêyi-matuma a butumike a Mikenji ya Mozese. Kadi, udi uleja kabidi ne: bualu bulomba bua mushinga mukole bua mu Mikenji buvua se: batendeledi ba Yehowa bavua ne bua kumunanga ne muoyo wabu mujima, ne tshieledi tshiabu tshijima tshia lungenyi, ne anyima wabu mujima ne bukole buabu buonso; kupita apu, udi wamba ne: dîyi-dikulu didi ne mushinga mukole kunyima kua edi, divua dia kunanga muntu nabu amu bu buobo bine.—Dutelonome 5:32, 33; Mako 12:28-31.
6. Mu ditumikila Nsumuinu 3:1, nnkonko kayi itudi ne bua kudiela?
6 Mu Nsumuinu 3:1, tudi bakankamijibue, ki ng’amu bua kutumikila mêyi-matuma a Nzambi, kadi, ne bua kutabalela bua kutumikila kuetu kuikale dileja patoke dia bidi mu mutshima wetu menemene. Tudi ne bua kudiebeja muntu pa nkayende ne: ‘Ke mushindu untu ntumikila mêyi-matuma a Nzambi anyi?’ Bituadimona ne: mu nsombelu kampanda, bukole budi butusaka ku dienza peshi ngelelu wetu wa meji kêna muimpe—ne muntu nansha umue wa kutudi kêna mua kuamba ne: kêna kalema—nanku, bidi bikengela kudiebeja ne: ‘Ntshinyi tshindi ngenza bua kuakaja nsombelu wanyi?’—Nsumuinu 20:9; 1 Yone 1:8.
7. (a) Mmunyi mêyi avua Yezu mudiuwule nawu Bafarizeyi mu Matayi 15:3-9 mua kutuambuluisha bua kukuba mutshima wetu? (b) Nnsombelu kayi idi mua kutuenzeja bua kuangata mapangadika makole bua kulongesha tshieledi tshietu tshia lungenyi ne mutshima wetu?
7 Yezu wakadiuwula buena-mpala ibidi bua Bafarizeyi bavua bamba muvuabo banemeka Nzambi, eku balubuluija bilele bia pa majinga abo, ne wakaleja ne: ntendelelu wabu uvua patupu. (Matayi 15:3-9) Yezu mmutudimuije kabidi ne: bua kulengelela Nzambi, udi ubala mu mitshima yetu, kabiena bikengela kuikala ne tshidingishilu tshia bikadilu bilenga nansha, eku, tudilekelela ku meji a dipanga bikadilu bilenga ku misangu ne ku misangu ne tshipatshila tshia kusankisha majinga a mubidi. Pamu’apa nebikengele kuangata mapangadika ne dîsu dikole bua kulongesha tshieledi tshietu tshia lungenyi ne mutshima wetu. (Nsumuinu 23:12; Matayi 5:27-29) Dilongesha dia mushindu’eu nedikengedibue kabidi bikala mudimu wetu wa ku mubidi, bipatshila bietu mu malonga anyi mu disungula dietu dia mishindu ya kujikijila mukodi mua kutufikisha bua kulua biidikiji ba bena mu bulongolodi ebu ne bua tudilekelela tuenza malu bilondeshile mmuenenu yabu. Katupu muoyo musangu nansha umue bua se: aba badi badiamba mudibo ba Nzambi, kadi basue kuikala balunda ba bena mu bulongolodi ebu, mulongi Yakobo udi ubafunkuna bu “bakaji ba ndumba”! Mbua tshinyi? Bualu “bena mu bulongolodi ebu buonso badi ku bukokeshi bua mubi.”—Yakobo 4:4; 1 Yone 2:15-17; 5:19.
8. Bua kubabidila menemene ngenyi ya mushinga mukole ya Nzambi, ntshinyi tshitudi ne bua kuenza?
8 Bua kubabidila menemene ngenyi ya Nzambi pa malu aa ne pa makuabu kabidi, tudi ne bua kudilamina dîba bua kubala mikanda peshi kumvua miyuki idi yakula bua ngenyi eyi. Kabidi, tudi ne bua kulonga ngenyi eyi, kuakula bualu buayi ne kueleelapu meji. Ku musangu ne ku musangu, babadi bavule ba Tshibumba tshia Nsentedi badi babuela mu bisangilu bienza mu bisumbu bia Bantemu ba Yehowa, mudibu bakonkonona Bible. Bua kufika aku, badi ‘badisumbila tshikondo’ pa midimu mikuabu. (Efeso 5:15-17) Ne tshidibo bapetamu pashishe, tshidi ne mushinga mukole mutambe mupite bubanji. Ke mudi kabidi mmuenenu webe wa malu anyi?
9. Bua tshinyi bamue ba ku aba badi babuela mu bisangilu bia bena nkristo batu badiunda mu nyuma ne lukasa luonso kupita bakuabo?
9 Kadi, bamue ba ku aba badi babuela mu bisangilu ebi badi bela biidia bia mu nyuma ne lukasa luonso kupita bakuabu. Badi batumikila biakane bulelela mu nsombelu wabu. Mmunyi mutudi mua kumvuija muanda eu? Misangu mivule, tshisumi tshiabu mu dilonga dia pa nkayabu tshitu tshilua tshitupa tshinene tshia mu nsombelu wabu. Mbajingulule se: kabena mua kushala ne muoyo amu ku didia dia diampa nkayadi nansha; bidi kabidi bia mushinga bua kusukumina biakudia bia mu nyuma dituku dionso amu bu mututu tudia pa tshibidilu biakudia bia ku mubidi. (Matayi 4:4; Ebelu 5:14) Ke bua tshinyi badi benza madikolela bua kupitshisha nansha tshikondo tshikese dituku dionso mu dibala dia Bible anyi mikanda idi yimumvuija. Badi badilongolola bua bisangilu bia tshisumbu, bakonkonona malonga kumpala kua dîba ne bakeba mvese ya mu Bible. Badi benza bivule kupita pa dibala dia tshiena-bualu peshi dia nshapita kampanda; badi beleelapu meji. Mu dilonga diabu, badi bela meji ne muoyo umue ku buenzeji budi, bidibo balonga ne bua kuikala nabu mu nsombelu wabu. Padibo benda bakola mu nyuma, ku kakese ku kakese, badi bafika ku diumvua tshiakafunda mufundi wa Misambu ne: “Ndinanga kayipu dindi munange mikenji yebe! . . . Mavuluija ebe adi malenga.”—Misambu 1:1-3; 119:97, 129.
10. (a) Bidi bikengela tshikondo bule munyi bua kutungunuka ne kulonga Dîyi dia Nzambi? (b) Mmunyi mudi Mifundu ibileja?
10 Nansha bituikala tulonga Dîyi dia Nzambi kukadi tshidimu tshijima, bidimu 5 anyi bidimu 50, mudimu eu kawutu ulua umue umue udi utondesha nansha—pikala meji a Nzambi ne mushinga mukole kutudi. Nansha bituikala balonge bivule ku diambuluisha dia Mifundu, kutshidi kabidi malu mavule atudi katuyi bamanye. “O Nzambi, bungi buawu busanga kabuena kubadika!” ke mudi Davidi wamba. “Bu meme mutete bua kuabala, mmapite tutete tua lusenge ku bungi.” Katuena mua kukumbana mua kubala meji a Nzambi. Bituaditeka bua kutela meji a Nzambi dituku dijima too ne mutualadila ku mudimu eu, ne patuabiika ku tulu, mu dinda, nekuikal’amu malu mavule atudi mua kueleela meji. Ke bua tshinyi Davidi mmufunde ne: “Nngabiiki, kadi, ntshidi amu nebe.” (Musambu wa 139:17, 18) Too ne tshiendelele, netutungunuke amu ne kulonga kabidi malu mavule adi atangila Yehowa ne njila yende. Katuakumanya bionso mu muanda eu tshiendelele.—Lomo 11:33.
Tukinayi bidi Yehowa mukine
11. Bua tshinyi bidi bia mushinga mukole, ki ng’amu bua kumanya meji a Nzambi, kadi, ne bua kuabanyangana kabidi mmuenenu yende?
11 Dilonga dietu dia Dîyi dia Nzambi kadiena amu ne tshipatshila tshimuepele tshia kuwuja mutu wetu ne dimanya. Patudi tuenda tubueja meji a Nzambi mu mutshima wetu ku kakese ku kakese, tudi tutuadija kuikala ne mmuenenu ya Nzambi. Abi bidi ne mushinga mukole! Ntshinyi tshidi mua kutufikila bituapanga kupeta mmuenenu ya mushindu’eu? Nansha mutudi bakumbane bua kuambulula tshidi Bible wamba, tudi mua kufika ku dileja dijinga bua malu adibo bakandike peshi ku dimona bidibo batulomba bua kuenza bilue bu bujitu. Nansha bituakina malu mabi, mbimueneke se: bua dipanga bupuangane dia muntu, tudi ne bua kuluangana. (Lomo 7:15) Kadi, bituapanga kuenza madikolela ne muoyo umue bua kuakaja bumuntu buetu bua munda bilondeshile malu makane, tudiku mua kutekemena bua kulengelela Yehowa, “mukonkononyi wa mitshima” anyi?—Nsumuinu 17:3.
12. Dinanga bu dia Nzambi ne dikina bua dia Nzambi bidi ne mushinga kayi?
12 Dikina dia buena dia Nzambi mbukubi bunene ku malu mabi, amu bu mudi dinanga didi mu diumvuangana ne mêyi-maludiki a Nzambi difikisha biakane ku ditumikila malu mimpe. (1 Yone 5:3) Misangu ne misangu, Mifundu idi itukankamija bua kudima dinanga pamue ne dikina. “O nuenu badi banange Yehowa, nukine malu mabi.” (Musambu wa 97:10) “Nutambe kukina malu adi mabi, nulamate malu adi mimpe.” (Lomo 12:9) Ke tshitutu tuenza anyi?
13. (a) Pa bidi bitangila dibutula bantu babi, tudi mu diumvuangana ne disambila kayi dia Davidi? (b) Amu bu mudibi bileja mu disambila dia Davidi, bantu babi bavuaye ulomba Nzambi bua kubutula bavua banganyi?
13 Yehowa mmuleje patoke dilongolola diende dia kujimija bantu babi pa buloba ne kuasa buloba bupiabupia muikala buakane ne bua kuikala. (Musambu wa 37:10, 11; 2 Petelo 3:13) Aba badi banange buakane mbindile tshikondo etshi ne mutshima kulukulu. Badi mu diumvuangana ne mufundi wa Misambu Davidi wakasambila mu mêyi aa: “Ah! biwasua kushipa bantu babi, Ô Nzambi! Apu, nansha bamatshishi ba mashi bine nebasemene menemene kule nanyi, buobo badi bakuamba malu bilondeshile ngenyi yabu; badi batela dîna diebe tshitelatela—baluishi bebe.” (Musambu wa 139:19, 20) Davidi kavua ne dijinga dia kushipa bantu babi ba mushindu’eu yeye nkayende to. Uvua ulomba Yehowa bua kubavuijila “difutu.” (Dutelonome 32:35; Ebelu 10:30) Bantu aba kabavua mu njila umue ne aba bavua benzele Davidi bibi nansha. Kadi, bavua baleja Nzambi mu mushindu mubi ne bavua batela dîna diende tshitelatela. (Ekesode 20:7) Ne mpala ibidi, bavua bamba mudibo bamusadila, eku, batumika ne dîna diende bua kulubuluja bipatshila biabu. Davidi kavua ne dinanga bua aba bavua badivuija baluishi ba Nzambi nansha.
14. Kudiku bantu babi badi mua kuambuluishibua anyi? Pikalabi nanku, mmushindu kayi?
14 Kudi miliyare mivule ya bantu badi kabayi bamanye Yehowa. Amu bua dipanga kumanya, bavule ba kudibo badi benza malu adi Dîyi dia Nzambi dibipisha. Biakandamana bantu aba mu njila eu, nebasanganyibue munkatshi mua aba bashipibua mu tshikondo tshia dikenga dinene. Kadi, Yehowa katu usanka bua kumona muntu mubi ufua nansha, ne tudi ne bua kumuidikija. (Yehezekele 33:11) Tshikondo tshionso tshitudi tupeta mushindu, tudi tuenza madikolela bua kuambuluisha bantu ba mushindu’eu bua kulonga njila ya Yehowa ne bua kuendelamu. Kadi, tshiakuenza ntshinyi pikala bamue bakina Yehowa ne muoyo umue?
15. (a) Mbanganyi bavua mufundi wa Misambu wangata bu “bena lukuna balelela”? (b) Mmunyi mutudi lelu’eu mua kuleja ne: tudi “tukina” aba badi batombokela Yehowa?
15 Pa bidi bibatangila, mufundi wa Misambu udi wamba ne: “Tshienapu nkina aba badi bakukina ne muoyo umue anyi, Ô Yehowa, ne tshienapu ngumvua muêngu bua aba badi bakutombokela anyi? Ndi mbakina ne lukinu lujima. Buanyi meme, mbalue bena lukuna banyi balelela.” (Musambu wa 139:21, 22) Davidi uvua utangila bantu aba ne ditshina bualu bavua bakine Yehowa ne muoyo umue. Ku aba badi baleja lukinu luabu bua Yehowa pa kumutombokela, kudi batontolodi. Butontolodi budi bushuwa ditombokela Yehowa. Bamue batontolodi badi bamba mudibo basadila Nzambi, kadi, badi biimansha malu malomba peshi malongesha adi malejibue mu Dîyi diende. Bakuabu badi bamba mudibo bitabuja tshidi Bible wamba, kadi, badi babenga bulongolodi bua Yehowa ne benza madikolela bua kupumbisha ntungunukilu wabu. Padi bantu benza malu mabi ku bukole kunyima kua bamane kumanya mua kuenza tshidi tshilulame, padi bubi buasa bikole miji munda muabu, bufika ku dienza tshitupa tshinene tshia nsombelu wabu, bena nkristo badi ne bua kubakina (bilondeshile ngumvuilu wa muaku eu mu Bible), bualu mbalamate bikole ku bubi. Bena nkristo balelela badi ne mmuenenu wa muomumue ne wa Yehowa pa bidi bitangila batontolodi ba mushindu’eu; ngenyi ya butontolodi kayena yijuula dijinga diabu dia kumanya bia bungi nansha. Kabiyi nanku, badi ‘bumvua muêngu’ bua aba badi badivuije bena lukuna ba Nzambi, kadi, badi balekela Yehowa nkayende bua kukumbaja didisombuela diende kudibo.—Yobo 13:16; Lomo 12:19; 2 Yone 9, 10.
Padi Nzambi ufukuna munda muetu
16. (a) Bua tshinyi Davidi uvua ne dijinga dia se: Nzambi amufukune munda muende? (b) Mmalu kayi, adi mu mutshima muetu, atudi ne bua kulomba Nzambi bua atuambuluishe bua kusunguluja?
16 Davidi kavua musue kufuanangana ne bantu babi mu mushindu nansha umue. Bantu bavule bavua bateta mua kusokoka tshidibo munda munda; kadi Davidi wakenza disambila edi ne budipuekeshi: “Ufukune munda muanyi, Ô Nzambi, ne umanye mutshima wanyi. Unkonkonone, ne umanye meji anyi adi alubakaja, ne umone munda muanyi né mudi njila kayi wonso wa bisama, ne undombole mu njila wa bikondo kabiyi bijadika.” (Musambu wa 139:23, 24) Pavuaye wakula bua mutshima wende, Davidi kavua wela meji ku mutshima udi tshitupa tshia mubidi to. Mu diumvuangana ne ngumvuilu wa mu tshimfuanyi wa muaku eu, uvua wela meji ku tshivuaye munda munda, bumuntu buende busokome. Tuetu petu, tudi ne bua kuikala ne dijinga dia se: Nzambi afukune mu mutshima wetu bua asunguluje bituikala ne majinga, bipatshila, mpampakenu, mmuenenu ne ngenyi bidi kabiyi biakane. (Musambu wa 26:2) Yehowa udi utuenzela dibiikila edi: “Muan’anyi, umpeshe kuoku mutshima webe, ne njila yanyi ilengelele mêsu ebe.”—Nsumuinu 23:26.
17. (a) Pamutu pa kusokoka meji etu adi alubakaja, ntshinyi tshitudi ne bua kuenza? (b) Bidiku mua kutukemesha bituasangana meji mabi mu mutshima wetu anyi, ne tshitudi ne bua kuenza ntshinyi bua bualu ebu?
17 Bikalaku ngenyi ya bisama peshi idi ilubakaja idi ifuma ku majinga mabi, bipatshila bibi peshi ku nsombelu wetu mubi misokome munda muetu, bushuwa, netusanke bua Yehowa atuambuluishe bua kululamija malu. Pamutu pa tshiambilu tshia se: “njila kayi wonso wa bisama,” Bible de Maredsous udi ukudimuna mvese eu ne: “njila kayi wonso udi ufikisha ku bubi.” (Tangila Sacy; Segond.) Bible wa Pierre de Beaumont udi wakula bua “njila udi ukunyingalaja [wewe, mbuena-kuamba ne: Nzambi].” Mbimueneke se: katuena mua kuikala tujingulula biakane ngenyi yetu idi ilubakaja, kabidi ne: bua muanda eu, katuyi bamanye mua kulondela Nzambi tunyinganyinga tuetu, kadi yeye mmumanye nsombelu wetu. (Lomo 8:26, 27) Pikalaku majinga mabi adi inyika mutshima wetu, abi kabiena ne bua kutukemesha to; kadi, katuena ne bua kualengulula nansha. (Genese 8:21) Tudi ne bua kukeba diambuluisha dia kudi Nzambi bua kuapatula wonso. Bituikala banange Yehowa menemene ne njila yende, tudi mua kumulomba diambuluisha edi ne dieyemena dionso, “bualu Nzambi mmunene kupita mitshima yetu ne mmumanye malu wonso.”—1 Yone 3:19-21.
18. (a) Mmu mushindu kayi mudi Yehowa utulombola mu njila wa bikondo kabiyi bijadika? (b) Bituatungunuka ne kulonda bulombodi bua Yehowa, nka-lumbandi kayi ka musangelu katudi mua kutekemena bua kupeta?
18 Bilondeshile disambila dia mufundi wa Misambu, uvua ulomba Yehowa bua kumulombola mu njila wa bikondo kabiyi bijadika, Yehowa udi ulombola basadidi bende bena kudipuekesha ne butumikidi. Udi ubalombola ki ng’amu mu njila udi mua kubapetesha muoyo wa bidimu bia bungi kabayi bafua lufu lua tshikoso bua malu mabi adibo mua kuenza, kadi, ne mu njila wa muoyo wa kashidi. Tudi ne bua kujingulula patoke ne: tudi tukengela mushinga wa kubuikila nawu mibi [yetu] wa mulambu wa Yezu. Ku diambuluisha dia Dîyi diende ne bulongolodi buende, udi utupesha bushidimunyi budi bukengedibua bua tuetu kuenza disua diende. Udi utuleja patoke mushinga wa kuikala badiakaje bua kuikala ne ntema ku diambuluisha diende bua bumuntu buetu bua munda kuvuabu amu bu budibu bumueneka ku mêsu. (Musambu wa 86:11) Ne udi utukankamija pa kutupetesha ditekemena dia kuikala ne makanda a mubidi mapuangane, mu bulongolodi bupiabupia muikala buakane ne bua kukokesha ne mutuamusadila, amu yeye nkayende Nzambi mulelela, bua kashidi. Bituatungunuka ne kulonda bulombodi buende ne bulamatshi ku mikenji, bushuwa, neatuambile petu amu bu muvuaye muambile Muan’ende ne: “Ndi mukuanyishe.”—Luka 3:22; Yone 6:27; Yakobo 1:12.
Mmunyi muwumvuija?
◻ Bua tshinyi mushindu udi Yehowa wangata basadidi bende utu ushilangana misangu mivule ne wa bantu?
◻ Ntshinyi tshidi mua kutuambuluisha bua kujingulula tshidi Nzambi umona padiye ukonkonona mutshima wetu?
◻ Ndilonga dia mushindu kayi didi dituambuluisha bua kumanya malu ne kukuba mutshima wetu?
◻ Bua tshinyi bidi bia mushinga ki ng’amu bua kumanya tshidi Nzambi wamba, kadi, ne bua kuabanyangana kabidi mmuenenu yende?
◻ Bua tshinyi tuetu nkayetu tudi ne bua kusambila ne: “Ufukune munda muanyi, ô Nzambi, ne umanye mutshima wanyi”?
[Tshimfuanyi mu dibeji 16]
Patudi tulonga, tuenze madikolela bua mmuenenu yetu ilue ya muomumue ne ya Nzambi
[Tshimfuanyi mu dibeji 18]
Meji a Yehowa “mmavule matambe kupita ntete ya lusenga”
[Mêyi a dianyisha]
Pictorial Archive (Near Eastern History) Est.