Dinanga (dia agape)—Tshididio kadiyi ne tshididio
“Nusakidile ku . . . disuangana dienu dia buena-muntu dinanga.”—2 PETELO 1:5, 7.
1. (a) Ntshikadilu kayi tshidi Bible uzangika? (b) Mmiaku kayi inayi ya tshiena-Greke itubu misangu mivule bakudimune ne: “dinanga,” ne nguepi udibu batele mu 1 Yone 4:8?
BIKALAKU buimpe anyi tshikadilu tshidi Bible, Dîyi dia Nzambi ditamba kuzangika, tudi mua kutela dinanga. Mu tshiena-Greke, muakulu uvuabo batumike nawu ku ntuadijilu bua kufunda Mifundu ya bena-nkristo, mudi miaku inayi idibo bakudimune “dinanga” misangu mivule. Dinanga ditudi nadi bualu mpindieu kadiena eʹros (muaku udi kawuyi usanganyibua mu Mifundu ya tshiena-Greke ya bena-nkristo), udi mushindamena pa ditumika ne bitupa bia lulelu; kabidi kadiena stor·geʹ, mmuenenu udi mushindamena pa malanda a bantu badi bafume ku mashi amue; anyi kabidi kadiena phi·liʹa, malanda a musangelu adi mashindamena pa diangatangana ne mushinga, a buena atuvua bakule mu tshiena-bualu tshishale. Kadi, didi a·gaʹpe—dinanga diashila pa mêyi-maludiki, didi ne diumvuija dia muomumue ne kalolo, dinanga divua mupostolo Yone mutele pakambaye ne: “Nzambi udi dinanga.”—1 Yone 4:8.
2. Ntshinyi tshidi tshiambibue bimpe pa bidi bitangila dinanga (dia a·gaʹpe)?
2 Pa bidi bitangila dinanga edi (dia a·gaʹpe), Mulongeshi William Barclay wakafunda mu mukanda wende wa New Testament Words ne: “Agapē udi utangila tshieledi tshia lungenyi: ki mmpampakenu patupu udi uledibua diakamue mu mitshima yetu [anu bu mudibi mua kuikala bua phi·liʹa]; kadi, ndiyi-diludiku didi dituambuluisha bua kudisungula ne budikadidi nsombelu. Agapē mmusuikakaja bikole ku disua. Nditshimuna ne dilubuluka. Ku tshilelelu, muntu nansha umue katu unanga baluishi bende. Kunanga baluishi nkutshimuna majinga etu wonso ne mpampakenu bia ku tshilelelu. Agapē eu . . . udi bua bualu ebu, bukole bua kunanga tshidi katshiyi mua kunangibua, kunanga bantu badi kabayi batulengelela.”
3. Mmushindu kayi uvua Yezu Kristo ne Paulo bazangike dinanga?
3 Eyowa, munkatshi mua malu adi asunguluja ntendelelu mukezuke wa Yehowa Nzambi ne mishindu mikuabu yonso ya ntendelelu mbazangike mushindu eu wa dinanga. Pa nanku, Yezu Kristo wakafila mikenji ibidi mitambe bunene: “Wa kumpala, . . . ‘Udi ne bua kunanga Yehowa, Nzambi webe, ne muoyo webe wonso, ne anyima webe wonso, ne tshieledi tshiebe tshionso tshia lungenyi, ne bukole buebe buonso.’ Monayi mukenji muibidi: ‘Udi ne bua kunanga muntu nebe amu bu wewe muine.’ Kakuena mukuabo mukenji nansha umue udi mupite ayi to.” (Mako 12:29-31) Mu nshapita wa 13 wa 1 Kolinto, mupostolo Paulo udi uzangika dinanga mushindu wa muomumue. Kunyima kua yeye mumane kumanyisha se: dinanga ntshikadilu tshia kumpala tshidi tshikengedibua, wakafila nkomenu pa kuamba ne: “Kadi, mpindieu, nkushala ditabuja, ditekemena, dinanga, kadi, ku bisatu ebi, tshidi tshitambe bunene tshia kudibi, ndinanga.” (1 Kolinto 13:13) Yezu wakamba bimpe bitambe se: dinanga nedikale tshimanyinu tshidi tshisunguluja bamulondi bende.—Yone 13:35.
Malu adi dinanga kadiyi
4. Mbitupa bungi munyi bibi ne bimpe bia dinanga bidi Paulo utela mu 1 Kolinto 13:4-8?
4 Bakajadika se: mbipepele bua kuamba tshidi dinanga kadiyi kupita kuamba tshididi. Mmuenenu eu ki ng’wa dishima to, bualu mupostolo Paulo, mu nshapita wende udi wakula bua dinanga, mu 1 Kolinto 13, mvese 4 too ne wa 8, udi utela malu tshitema adi dinanga kadiyi ne malu muanda mutekete adidi dikale.
5. Mmunyi muakumvuijabu “mutshiawudi,” ne mmunyi mudibu batumike nawu mu mushindu muimpe mu Mifundu?
5 Bilondeshile miaku ya Paulo, bualu bua kumpala budi dinanga kadiyi mbua se: dinanga “kadiena ne mutshiawudi.” Bualu ebu budi bulomba diumvuija dikese, bualu kudi mutshiawudi udi muimpe ne mutshiawudi udi mubi. Nkonga-miaku kampanda udi umvuija “mutshiawudi” bu “dibenga kuanyisha difuilakana” ne kabidi bu “udi usua bua kushala balamate amu kudiye nkayende.” Nenku, Mozese wakamba mu Ekesode 34:14 ne: “Kuena ne bua kuinama kumpala kua nzambi mukuabu, bualu Yehowa, udi dîna diende dikale Mutshiawudi, udi Nzambi wa mutshiawudi.” Mu Ekesode 20:5, Yehowa udi wamba ne: “Meme ndi Yehowa, Nzambi webe, ndi Nzambi udi ulomba kundamata anu meme nkayanyi.” Mushindu wa muomumue, mupostolo Paulo wakafunda ne: “Ndi ne mutshiawudi bua bualu buenu, mutshiawudi udi mu diumvuangana ne disua dia Nzambi.”—2 Kolinto 11:2.
6. Mbilejilu kayi bia mu Mifundu bidi bileja bua tshinyi dinanga kadiena ne mutshiawudi?
6 Kadi, mu ngumvuilu mualabale, “mutshiawudi” mmubi, bua kabingila aka udi usanganyibua mu liste wa midimu ya mubidi idibo batele mu Galatia 5:20. Eyowa, mutshiawudi wa mushindu’eu ng’wa budinangi ne udi ulela lukinu, ne lukinu ludi luluishangana ne dinanga. Mutshiawudi ke wakasaka Kayina ku dikina Abele, e kumufikishawu too ne kudimushipa, ne wowo kabidi ke wakasaka bana babu ne Yozefe dikumi bua kumukina, e kuamba kubafikishawu too ne ku dimushipa. Dinanga kadiena ne mutshiawudi bua bintu anyi masanka bia bakuabu nansha, amu bu muvua mukalenge Akabe ne mutshiawudi bua madimi a mvinyo a Nabote.—1 Bakalenge 21:1-19.
7. (a) Mmuanda kayi wakenzeka udi uleja se: Yehowa kêna wanyisha bena lutambishi? (b) Bua tshinyi dinanga kadiena diditambisha nansha kabiyi bielela meji?
7 Pashishe, Paulo udi utuambila ne: dinanga “kadiena diditambisha.” Diditambisha didi dipangisha dinanga, bualu didi diteka eu udi uditambisha ku mutu kua bakuabu. Yehowa kêna usanka nansha kakese bua bena lutambishi, anu mudibi mua kumueneka mu mushindu wakapuekeshaye mushinga wa Nebukadnezare pakaditambishaye. (Danyele 4:30-35) Misangu mivule, diditambisha didi mua kuenzeka kabayi badielela meji, bualu muntu udi mua kusanka bua dilubuluka anyi bua bintu bidiye nabi. Bamue mene batu bafika ne ku diditambisha bua bidi bitangila bipeta bidibu bapatula mu mudimu wabu wa bena nkristo. Bakuabu mbafuanangane ne mukulu kampanda wakapanga kudikanda bua kumanyisha balunda bende muvuaye ufuma ku disumba vwatire mupiamupia wa mushinga wa makuta a dolare matue ku 50 000 pa kubela nshinga. Mmuenenu yonso ya mushindu’eu ki nya dinanga, bualu idi ileja muena lutambishi bu udi mutambe bamuteleji bende.
8. (a) Mmuenenu kayi udi Yehowa nende kudi aba badi badiuwuja tente ne didisua? (b) Bua tshinyi dinanga kadiena dilonda njila eu?
8 Pashishe, mbatuambile ne: dinanga “kadiena didiuwuja tente ne didisua.” Eu udi muwule tente ne didisua, mudibandishi, mmubule dinanga ne udi uditeka ku mutu kua bakuabu. Mmuenenu wa mushindu’eu mmubule meji, bualu “Nzambi kêna wanyisha bena didisua, kadi, udi ufila buimpe bukena butuakanyine kudi badipuekeshi.” (Yakobo 4:6) Dinanga diodi didi dienza malu mushindu mushilangane; didi diangata bakuabu bu badi ku mutu, anu bu muakafunda Paulo mu Filipoi 2:2, 3 ne: “Wuujayi disanka dianyi ku etshi: numvuangane ku mêyi ne nuikale ne dinanga dia muomumue, bu munudi basangisha pamue mu anyima, nuela meji ku bualu bumue; kanuenji bualu nansha bumue bua kutembangana anyi bua budiambi, kadi, ne budipuekeshi mu tshieledi tshia lungenyi, angatayi bakuabu bu badi banutambe.” Mmuenenu wa mushindu’eu mu lungenyi kêna utondesha bakuabu, pabi, eu udi muena lutambishi ne muena difuilakana udi ne mmuenenu udi utondesha bakuabu.
9. Bua tshinyi dinanga kadiena dienza malu adi afuisha bundu?
9 Paulo udi wamba pashishe ne: dinanga “kadiena dienza malu adi afuisha bundu.” Nkonga-miaku kampanda udi umvuija “kufuisha bundu” bu ngikadilu “udi udiombola nsombelu mimpe anyi bikadilu bia kanemu.” Muntu udi ufuishangana bundu (udi kayi ne dinanga) kêna unemeka mmuenenu ya bakuabu. Nkudimuinu mivule ya Bible idi ikudimuna muaku eu wa tshiena-Greke bu “mupange bukalanga.” Muntu wa mushindu’eu kêna unemeka bidi bantu buonso bangata bu biakane ne bimpe to. Bushuwa, eu udi ne kanemu kuule tente ne dinanga bua bakuabu udi ne bua kuepuka ngikadilu yonso ya kufuishangana bundu ne dipanga bukalanga, malu adi atapa bakuabu ku mutshima anyi abatondesha.
Makuabu malu adi dinanga kadiyi
10. Mmu mushindu kayi mudi dinanga kadiyi dikeba anu tshiakasombela tshiadi nkayadi?
10 Pashishe mbatuambile ne: dinanga “kadiena dikeba tshia kasombela tshiadi nkayadi,” mbuena kuamba ne: padiku difuilakana dia tshia kasombela tshietu ne bia bakuabo. Mupostolo wakafunda ku lukuabo luseke ne: “Muntu nansha umue katu muanji kukina mubidi wende yeye muine; kadi, udi uudiisha ne wuwengeleka.” (Efeso 5:29) Kadi, padi tshia kasombela tshietu tshiluishangana ne bia bakuabu, ne padiku kakuyi dîyi-diludiki nansha dimue dia mu Bible didi mua kukosa tshilumbu, tudi ne bua kuenza malu anu bu muakenza Abrahame ne Lota, kulekela ne dinanga dionso bua muntu mukuabu kudianjilaye kusungula.—Genese 13:8-11.
11. Muanda wa se: dinanga kadiena difika munda udi umvuija tshinyi?
11 Dinanga kabidi kadiena difika munda lukasa lukasa. Nunku, Paulo udi utuambila ne: dinanga “kadiena difika munda.” Dinanga kadiena bu didimba kabantengeshi. Kadi didi didikanda. Nangananga mulume ne mukaji badi ne bua kulama mu mutshima mubelu eu ne kudikanda bua kubandisha dîyi ne kubulukilangana. Mu imue nsombelu, mbikole bua kubenga kufika munda; bua kabingila aka, Paulo wakamona se: bidi bikengela kufila mubelu udi ulonda eu kudi Timote: “Mupika wa Mukalenge kêna ne bua kubuela mu ditandangana, kadi, udi ne bua kuikala mupole-malu kudi buonso, mukumbane mua kulongesha, udikanda mu malu mabi—eyowa, kêna ne bua kufika munda, ushidimuna ne lutulu bena mutu mukole.”—2 Timote 2:24, 25.
12. (a) Mmu ngumvuilu kayi mutudi mua kuamba ne: dinanga kadiena dibadika bubi budibu badienzela? (b) Bua tshinyi kabiena bia meji bua kubadika bibi bidibu bakuenzela?
12 Utungunuka ne malu adi dinanga kadiyi, Paulo udi ufila mubelu eu: “Dinanga . . . kadiena dibadika malu mabi adibu badienzela.” Abi kabiena biumvuija se: dinanga kadiena diumvua malu mabi adibu badienzela to. Yezu wakaleja mushindu utudi ne bua kuenza padibo batuenzela bualu kampanda bubi. (Matayi 18:15-17) Kadi, dinanga kadiena ditupesha njila wa kushala ne muoyo mubi wa disombuela, kukuatshilangana njiya nansha. Kubenga kubadika bubi butuenzela, nkulekelelangana bilema ne kubipua muoyo diakamue padi tshilumbu tshijika mu diumvuangana ne Mifundu. Eyowa, kuditatshishi ne kudivuiji muena diakabi pa kutela amu kutela bubi, kubadika bubi buakakuenzelabu!
13. Kubenga kusanka bua dipangika dia buakane kudi kumvuija tshinyi, ne mbua tshinyi dinanga kadiena disanka bua dipangika dia buakane?
13 Kabidi, mbatuambile ne: dinanga “kadiena disanka bua kupanga kua buakane.” Bena mu bulongolodi ebu badi basanka bua dipanga dia buakane, anu mudibi bilejibue ku ditumbisha dia tshikisu ne masandi bidibo baleja mu mikanda, mu filme ne mu programme ya televizion. Disanka dia mushindu’eu ndia budinangi, kadiyi dinemeka nansha kakese mêyi-maludiki a Nzambi a buakane anyi disanka dia bakuabu. Eu udi wenza malu mushindu’eu, udi ukuna bua mubidi; nenku, nekulue dituku kampanda dianowaye dinyanguka didi difuma ku mubidi.—Galatia 6:8.
14. Bua tshinyi tudi mua kuamba ne dishindika se: dinanga kadiakupita nansha?
14 Mpindieu, mona bualu bua ndekelu budi dinanga kadiyi dienza: “Dinanga kadiakupita nansha.” Diambedi, dinanga kadiakupita anyi kujika, bualu Nzambi udi dinanga ne udi “Mukalenge wa kashidi.” (1 Timote 1:17). Mu Lomo 8:38, 39, mbatushindikile se: dinanga didi nadi Yehowa kutudi kadiakupita: “Ndi mutuishibue bua se: nansha lufu, nansha muoyo, nansha banjelo, nansha mbulamatadi, nansha bintu bidiku mpindieu, nansha bintu bialua, nansha makole, nansha butumbuke, nansha buondoke, anyi tshifukibua kayi tshionso katshiena mua kundamuna ku dinanga dia Nzambi didi kudi Kristo Yezu Mukalenge wetu.” Kabidi, dinanga kadiakupita nansha mu ngumvuilu wa se: kadiena mua kujimina nansha. Dinanga didi anu dikole nansha mu nsombelu kayi wonso, nansha mu diteta kayi dionso.
Malu adi dinanga dikale
15. Bua tshinyi Paulo udi utela diambedi muoyo mule munkatshi mua bitupa bimpe bia dinanga?
15 Mpindieu tutangile ku luseke luimpe, malu a tshidi dinanga dikale, Paulo udi utuadija ne: “Dinanga didi ne muoyo mule.” Bakamba ne: malanda masheme kaena mua kuikala pankatshi pa bena nkristo padiku kakuyi muoyo mule, mbuena kuamba ne: makole a kushala ne lutulu bua kutantamena bibi bidi bakuabu batuenzela. Bidi nunku, bualu tuetu buonso tudi bapange bupuangane, ne kabidi bilema bietu bidi bibueja bakuabu mu mateta. Kabiena bikemesha padi mupostolo Paulo utela kumpala tshitupa etshi tshia dinanga mu liste wa malu adi dinanga dikale!
16. Mmu mishindu kayi mudi bena mu dîku mua kulejangana bulenga?
16 Paulo udi wamba kabidi ne dinanga didi “bulenga.” Mbuena kuamba ne: dinanga didi diambuluisha, ditabalela, ne diuwule tente ne kanemu kudi bakuabu. Bulenga budi bumueneka mu bintu binene ne bikese. Muena Samariya wakaleja kabiyi mpata bulenga kudi muntu uvuabu babunde kudi bivi. (Luka 10:30-37) Dinanga didi disanka bua kuamba ne: “bu wewe mua kusua.” Kuamba ne: “Mpesha diampa,” nkutumina muntu dîyi. Dîyi-dituma edi didi divua dilomba bituadidianjidila ne tshiambilu bu etshi: “bu wewe mua kusua.” Balume badi baleja bulenga kudi bakaji babu padibu batumikila mubelu udi mu 1 Petelo 3:7: “Nuenu balume, tungunukayi ne kushala ne bakaji benu bilondeshile dimanya, nubape kanemu bu mabungu matekete, mabungu a bakaji, bualu nuenu penu, nudi pamue nabu bena bumpuanyi bumue bua buimpe bua muoyo ukena mutukumbanyine, bua masambila enu kaapumbishibu.” Bakaji badi baleja bulenga kudi babayabu padibu ne “kanemu kuondoke” kudibu. (Efeso 5:33) Ba-tatu badi baleja bulenga kudi babu bana padibu batumikila mubelu udi mu Efeso 6:4: “Ba-tatu, kanufikishi benu bana munda, kadi tungunukayi ne kubapesha mibelu ne manyoka bilondeshile nkoleshilu wa lungenyi lua Yehowa.”
17. Tela mishindu ibidi idi dinanga disanka ne bulelela.
17 Dinanga kadiena disanka bua dipangika dia buakane, kadi, “didi disanka bua bulelela.” Dinanga ne bulelela bidi bienda tshiapamue—Nzambi udi dinanga, ne udi kabidi “Nzambi wa bulelela.” (Musambu wa 31:5) Dinanga didi disanka padidi dimona bulelela butshimuna mashimi ne buela mashimi patoke; ke tshidi mu mushindu kampanda tshiledi tshia didiunda dinene didi dienzeka mu batendeledi ba Yehowa bavule lelu’eu. Kadi, bualu bulelela budi buluishangana ne dipangika dia buakane, lungenyi ludi mua kuikala kabidi lua se: dinanga didi disanka ne buakane. Dinanga didi disanka padidi dimona buakane butshimuna; ke bualu kayi Yehowa udi ulomba bamutendeledi bende bua kusanka bua dipona dia Babilone Munene.—Buakabuluibua 18:20.
18. Mmu ngumvuilu kayi mudi dinanga dibuikila malu wonso?
18 Paulo udi kabidi utuambila ne: dinanga didi “dibuikila malu wonso.” Ke mudibi bileja mu mukanda wa Kingdom Interlinear. Kadiena “disokolola tshilema” tshia muanetu to, pabi ke mutu bantu babi benza ne lukasa luonso. (Musambu wa 50:20; Nsumuinu 10:12; 17:9) Eyowa, tudi tusangana lungenyi lua muomumue ne elu ludi mu 1 Petelo 4:8: “Dinanga didi dibuikila mpekatu mivulavulayi.” Kadi, bulamatshi ku mikenji budi butukandika bua kubuikila mpekatu minene idi muntu muenzela Nzambi anyi muenzela tshisumbu.
19. Mmu ngumvuilu kayi mudi dinanga ditabuja malu wonso?
19 Kabidi, dinanga “didi ditabuja malu wonso.” Abi bidi biumvuija se: dinanga didi dindila diakalenga, kadi ki ndiakabi nansha. Kadiena ditabuja lukasa lukasa malu adi akemesha adi enzeka nansha. Kadi, bua kuitabuja Nzambi, bidi bikengela kuikala ne disua bua kuitabuja. Nenku, dinanga kadiena ne mutshima mujoboke ne kadiena dijana kakuyi kabingila. Kadiena dibenga kuitabuja, bu mudi muntu udi kayi witabuja dikalaku dia Nzambi; ne kadiena nansha difuanangana ne eu udi kayi ujadika se: kakuena mushindu wa kumanya kutudi bafume, bua tshinyi tudi pa buloba ne tshikala matuku atshilualua. Pa bidi bitangila malu wonso aa, Dîyi dia Nzambi didi ditupetesha dishindika. Dinanga kadiena dibenga bua kuitabuja bualu didi dianyishangana, ne kadiena dielela bakuabu meji mabi anu pikalaku tshijadiki.
20. Ndiumvuangana kayi didi pankatshi pa dinanga ne ditekemena?
20 Mupostolo Paulo udi utushindikila kabidi ne: dinanga didi “ditekemena bionso.” Bu mudi dinanga ditekemena anu bipeta bimpe, didi ne ditekemena dishindame mu bionso bidi bilaya mu Dîyi dia Nzambi. Mbatuambile ne: “Eu udi udima udi ne bua kudima ne ditekemena, ne eu udi ushipula udi ne bua kuenza nunku ne ditekemena dia kupeta tshiende tshitupa.” (1 Kolinto 9:10) Nansha mudi dinanga ne dianyishangana dijima, didi kabidi diuwule tente ne ditekemena, ditekemena anu malu adi matambe buimpe.
21. Ndishindika kayi dia mu Mifundu didi ditutuisha se: dinanga ditu dinanukila?
21 Ndekelu wa bionso, mbatushindikile se: dinanga didi “dinanukila mu malu wonso.” Ndikumbane mua kuenza nunku bilondeshile bidi mupostolo Paulo mutuambile mu 1 Kolinto 10:13: “Kakuena ditetshibua nansha dimue didi dinuvuile dikena divuila bantu buonso. Nzambi mmuena lulamatu, ne kakuanyisha bua nutetshibue ne matetshibua mapite makanda enu bukole bua nuenu kuâkama, kadi ne ditetshibua dine neanulongoluele njila bua nuenu kumona mua kuatantamena.” Dinanga neditusake bua kutangila bilejilu bivule bia mu Bible bia basadidi ba Nzambi bavua bananukile mateta, ku mutu kua buonso anu bu mudi Ebelu 12:2, 3 utuvuluija, kudi tshilejilu tshia Yezu Kristo.
22. Bu mutudi bana ba Nzambi, ntshikadilu kayi tshitambe bunene tshitudi ne bua kutabalela bua kuleja pa tshibidilu?
22 Bushuwa, dinanga (dia a·gaʹpe) ntshikadilu tshitambe bunene tshidi bena nkristo, Bantemu ba Yehowa ne bua kudima, ku lumue luseke, tshididi kadiyi ne ku lukuabu luseke, tshididi dikale. Bu mutudi bana ba Nzambi, tutungunukayi ne kutabalela bua kuleja dimuma edi dia spiritu wende! Kuenza nunku, nkufuanangana ne Nzambi, bualu, tuvulukayi se: “Nzambi udi dinanga.”
Utshidi muvuluke anyi?
◻ Mmunyi mudi Yezu Kristo ne Paulo baleja mudi dinanga ditambe bunene?
◻ Mmu ngumvuilu kayi mudi dinanga kadiyi ne mutshiawudi?
◻ Mmunyi mudi dinanga ‘dikuatshisha malu wonso’?
◻ Bua tshinyi tudi mua kuamba ne: dinanga kadiakupita?
◻ Mmu mishindu kayi ibidi mudi dinanga disanka ne bulelela?
[Kazubu mu dibeji 21]
DINANGA (DIA AGAPE)
Tshididio kadiyi
1. Kadiena ne mutshiawudi
2. Kadiena diditambisha
3. Kadiena didiuwuja tente ne didisua
4. Kadiena dienza malu adi afuisha bundu
5. Kadiena dikeba anu tshiakasombela tshiadi nkayadi
6. Kadiena difika munda
7. Kadiena dibadika bibi bidibu badienzela
8. Kadiena disanka bua dipangika dia buakane
9. Kadiakupita nansha
Tshididio
1. Muoyo mule
2. Bulenga
3. Didi disanka ne bulelela
4. Didi dibuikila malu wonso
5. Didi ditabuja malu wonso
6. Didi ditekemena malu wonso
7. Didi dinanukila malu wonso
[Bimfuanyi mu dibeji 18]
Yehowa wakapuekesha mushinga wa Nebukadnezare bua diditambisha diende