Ikalayi ne dikima!
“Ikala ne dikima ne wamba ne: ‘Yehowa mmungambuluishi wanyi.’”—EBELU 13:6.
1. Mu siekele wa kumpala B.B., mbukitu kayi buakaleja bantu bakalonga bulelela budi butangila Nzambi?
BIVUA mu siekele wa kumpala wa tshikondo tshietu etshi. Masiya uvuabo batambe kuindila wakafika. Wakalongesha balongi bende bimpe bitambe ne kutuadija mudimu wa mushinga mukole wa buambi. Tshivua tshikondo tshia bantu kumvuabu lumu luimpe lua Bukalenge bua Nzambi. Pa nanku, balume ne bakaji bakalonga bulelela bakamanyisha ne bukitu mukenji eu wa mpatshi.—Matayi 28:19, 20.
2. Bua tshinyi Bantemu ba Yehowa badi bakengela dikima lelu’eu?
2 Tshikondo atshi, Bukalenge bua Nzambi kabuvua buanji kubanjijibua to. Kadi Mukalenge musungula, Yezu Kristo, uvua mufile mulayi uvua wakula bua dikalaku diende dikena dimueneka mu matuku atshivuavua mu bukole bua Bukalenge. Tshikondo atshi tshivua ne bua kudisunguluja ku amue malu bu mudi mvita, biyole bia nzala, bipupu bia masama, bikumina ne kabidi bumanyishi bua lumu luimpe pa buloba bujima. (Matayi 24:3-14; Luka 21:10, 11) Bu mutudi Bantemu ba Yehowa, tudi tukengela dikima bua kuakama nsombelu eyi mikole ne dikengeshibua bidi bitufikila. Nenku, nebikale diambuluisha kutudi bituakonkonona imue miyuki ya mu Bible pa bidi bitangila bamanyishi ba Bukalenge ba dikima ba mu siekele wa kumpala B.B.
Dikima bua kuidikija Kristo
3. Nnganyi wakafila tshilejilu tshilenga tshitambe tshia dikima, ne ntshinyi tshidi tshiambibue bua bualu buende mu Ebelu 12:1-3?
3 Yezu Kristo wakafila tshilejilu tshimpe tshitambe tshia dikima. Yeye mumane kuakula bua ‘divuba dinene’ dia bantemu ba Yehowa ba dikima ba kumpala kua bena-nkristo, mupostolo Paulo wakashikila ne Yezu, pa kuamba ne: “Nenku, tuetu petu bu mutudi ne divuba bunene nenku dia bantemu badi batunyunguluke, tumbushayi bujitu buonso ne mpekatu udi utupumbisha, ne tunyemayi ne dinanukila lubilu ludi lututekela kumpala, batangile ne ntema kudi Yezu, Ntunga-mulongo ne Mupuangaji wa ditabuja dietu. Bua disanka divuabo bamutekele kumpala, wakatantamena mutshi wa tshinyongopelu, kupetula bundu, e kusomba ku dia balume dia nkuasa wa bumfumu wa Nzambi. Eyowa, tangilayi ne ntema eu wakakenga pa kulama lutulu bua miaku ya lukuna ya kudi bena mpekatu, tshivua katshiyi bua diakalenga diabo, bua kanupungidi ne kanuteketshi mu anyima yenu.”—Ebelu 12:1-3.
4. Mmunyi muakaleja Yezu dikima pakatetshibuaye kudi Satana?
4 Kunyima kua batismo wende ne matuku 40 a dieleela meji, masambila ne dibuela mu tshijila mu tshipela, Yezu wakatantamena Satana ne bukitu. Pakatetshibuaye kudi Diabolo bua kuandamuna mabue pa kuavuija mampa, Yezu wakabenga, bualu mbibi bua kuenza bishima bua kusankisha majinga a budinangi. “Mbafunde ne:” ke muakamba Yezu, “Muntu udi ne bua kuikala ne muoyo, ki ng’anu bua mampa nkayawu, kadi bua muaku wonso udi upatuka mukana mua Yehowa.” Satana pakabandishaye Yezu pa musonga wa ntempelo ne kumuteya bua adikupe mu tshibuashibuashi, Yezu wakabenga, bualu bivua mua kuikala mpekatu wa kuteta Nzambi pa kumulomba diambuluisha mu tshienzedi tshia dinaya ne lufu. “Kabidi, mbafunde ne:” ke muakamba Kristo, “Kuena ne bua kubueja Yehowa Nzambi webe mu diteta nansha.” Satana wakamulaya bua kumupesha makalenge wonso a pa buloba pa kuashintakaja ne “tshienzedi tshia dimutendelela,” kadi, Yezu wakabenga bua kudivuija mutontolodi ne kutua diyobola dia Satana nyama ku mikolo dia se: bantu kabena mua kushala ne lulamatu kudi Nzambi mu diteta. Nenku, Yezu wakamba ne: “Umuka, Satana! Bualu mbafunde ne: ‘Yehowa Nzambi webe ke uudi ne bua kutendelela, amu yeye nkayende ke uudi ne bua kusadila ne mudimu munsantu.’” Anu pinapo, Mutetshianganyi “wakumuka kudiye too ne ku tshikondo tshikuabu tshiakanyine.”—Matayi 4:1-11; Luka 4:13.
5. Ntshinyi tshidi mua kutuambuluisha bua kutantamena ditetshibua?
5 Yezu uvua ukokela Yehowa ne ukandamena Satana. Bia muomumue, ‘bituikala tukokela Nzambi ne tukandamena Diabolo, neanyeme kule netu.’ (Yakobo 4:7) Amu bu Yezu, tudi mua kutantamena ditetshibua ne dikima bituatumikila malu adi mu Mifundu, pamu’apa nansha pa kutela imue mvese patudi tutetshibua bua kuenza bualu kampanda bua mpekatu. Bidiku mua kuenzeka bua tuetu kupona mu ditetshibua dia kuiba bituambulula pa dine dîba adi mukenji eu wa Nzambi wa ne: “Kuena ne bua kuiba” anyi? Bena nkristo babidi badi mua kupona mu ditetshibua dia kuenda masandi biapeta umue wa kudibo dikima bua kutela miaku eyi: “Kuena ne bua kuenda masandi” anyi?—Lomo 13:8-10; Ekesode 20:14, 15.
6. Mmunyi muvua Yezu mutshimune ne dikima bena mu bulongolodi ebu?
6 Bu mudi bena nkristo bakinyibue kudi bena mu bulongolodi ebu, tudi mua kuepuka mmuenenu yabu ne bienzedi bia mpekatu. Yezu wakambila bamulondi bende ne: “Mu bulongolodi ebu, nudi ne makenga, kadi, ikalayi ne dikima! Ngatshimunyi bena mu bulongolodi ebu.” (Yone 16:33) Wakatshimuna bena mu bulongolodi ebu pa kubenga kudienza bu buobu. Tshilejilu tshiende bu mutshimunyi ne tshipeta tshia nsombelu wende wa dilama muoyo mutoke bidi mua kutuwuja tente ne dikima bua kumuidikija pa kushala baditapulule ne bena mu bulongolodi ebu ne bukoya buabu.—Yone 17:16.
Dikima bua kutungunuka ne kulongesha
7, 8. Ntshinyi tshiatuambuluisha bua kutungunuka ne buambi nansha dikengeshibua dikalaku?
7 Yezu ne balongi bende bavua ne dishindika dia se: Nzambi neabapeteshe dikima bua kutungunuka ne kulongesha nansha muvuaku dikengeshibua. Kristo wakakumbaja mudimu wende ne bukitu nansha muvuaku dikengeshibua, ne kunyima kua Pentekoste wa tshidimu tshia 33 B.B., balongi bende bavua bakengeshibua bakatungunuka ne kumanyisha lumu luimpe nansha muvua bamfumu ba malu a Nzambi bena Yuda bateta mua kubimanyika. (Bienzedi 4:18-20; 5:29) Balongi bakasambila nunku: “Yehowa, uteya ntema ku ditufunyina diabo, ne wambuluishe bapika bebe bua kutungunuka ne kumanyisha dîyi diebe ne bukitu buonso.” Ne ntshinyi tshiakenzeka? “Pajikijilebo dienza musengelelu eu, muaba uvuabo basangile wakazakala,” muyuki udi utungunuka ne: “ne buonso buabu bakuwujibua tente ne spiritu munsantu ne bavua bamanyisha dîyi dia Nzambi ne bukitu.”—Bienzedi 4:24-31.
8 Bu mudi tshitupa tshinene tshia bantu lelu’eu kabayi basankidila lumu luimpe, misangu mivule bidi bikengela bukitu bua kutungunuka ne kubamanyishalu. Nangananga padibo babakengesha, ke tshikondo tshidi basadidi ba Yehowa bakengela menemene dikima dia kudi Nzambi bua kumona mua kufila bumanyishi buondoke. (Bienzedi 2:40; 20:24) Nenku, Paulo mumanyishi wa Bukalenge wa dikima, wakambila umue wa ku benzejanganyi nende ba mudimu, nsonga utshivua ne dimanya kuenza dishadile ne: “Nzambi ki mmutupeshe spiritu wa buowa, kadi wa bukole, dinanga ne mmuenenu muimpe mu tshieledi tshia lungenyi. Nenku, kumvu bundu bua kufila bumanyishi pa bidi bitangila Mukalenge wetu, anyi buanyi meme, muena lukanu bua bualu buende, kadi kumbaja tshiebe tshitupa pa kuakama malu mabi bua lumu luimpe bilondeshile bukole bua kudi Nzambi.” (2 Timote 1:7, 8) Bituasambila bua kupeta dikima, netupete bukole bua kutungunuka ne kulongesha, ne nansha dikengeshibua kadiakutupangisha disanka dietu dia bamanyishi ba Bukalenge nansha.—Matayi 5:10-12.
Dikima bua kuditeka ku luseke lua Yehowa
9, 10. (a) Bena Yuda ba mu siekele wa kumpala ne bena matunga menyi bakenza tshinyi bua kuluabo balondi ba Kristo batambushibue? (b) Bua tshinyi bivua bikengela dikima bua kulua muena nkristo?
9 Bena Yuda bavule ba mu siekele wa kumpala ne bena matunga menyi, bakapeta dikima bua kulekela bilele bivua kabiyi mu diumvuangana ne Mifundu bua kulua balondi ba Kristo batambule. Matuku makese kunyima kua Pentekoste wa tshidimu tshia 33 B.B., “bungi bua balongi buvua buenda buvula bikole mu Yeruzaleme; ne musumba munene wa bakuidi bakatuadija kutumikila ditabuja.” (Bienzedi 6:7) Bena Yuda aba bakapeta dikima dia kukosa bisuikidi ne tshitendelelu tshiabu ne kuitaba Yezu bu Masiya.
10 Bituadijile mu tshidimu tshia 36 B.B., bena matunga menyi bavule bakalua bena kuitabuja. Pakumvuabo lumu luimpe, Korneyi, bena dîku diende ne bantu bakuabu bena matunga menyi, bakaluitaba diakamue, kuwujibua ne spiritu munsantu ne “kutambushibua mu dîna dia Yezu Kristo.” (Bienzedi 10:1-48) Ku Filipoi, muntu kampanda muena ditunga dienyi, nsentedi wa nzubu wa buloko ne bena mu nzubu muende, bakanyisha ne lukasa luonso buena-nkristo, ne “anu pinapo, yeye ne bena dîku diende bakatambushibua.” (Bienzedi 16:25-34) Bivua bikengela dikima bua kuangata dipangadika dia mushindu’eu, bualu bena nkristo bavua kasumbu kakese kavua kakengeshibua ne kanangibue bikese. Bidi kabidi bia muomumue lelu’eu. Kadi, biwikala kuyi muanji kuditshipa kudi Nzambi ne mutambushibue bu umue wa ku Bantemu ba Yehowa, buebe wewe, edi ki ndîba dia kuela biidia ebi ne dikima anyi?
Dikima mu mêku mapanduluke
11. Eunice ne Timote bakafila bilejilu kayi bilenga bia dikima?
11 Eunice ne muanende wa balume Timote bakafila bilejilu bimpe bitambe bia ditabuja [dikuna] ne dikima mu dîku dipanduluke pa bidi bitangila malu a Nzambi. Nansha muvuaye ne mulume mumpangano, Eunice wakalongesha muanende wa balume “mifundu minsantu” bituadijile ku buana buende. (2 Timote 3:14-17) Pakaluaye muena nkristo, wakaleja ‘ditabuja dikêna ngikadilu wa mpala ibidi.’ (2 Timote 1:5) Uvua kabidi ne dikima dia kubueja mu lungenyi lua Timote dilongesha dia bena nkristo, eku utungunuka ne kuleja kanemu bua bumfumu bua bayende uvua kayi muena kuitabuja. Kabiyi mpata, ditabuja diende ne dikima diende biakafutshibua dîba diakasungula Paulo muanende, uvua mulongeshibue bimpe, bua kumufila mu ngendu yende ya bu-misionere. Ndikankamijibua kayipu bua baledi bena nkristo badi basanganyibua mu nsombelu ya muomumue!
12. Timote wakalua muntu wa mushindu kayi, ne mbanganyi badi lelu’eu bamuidikija?
12 Nansha muvuaye mu dîku dipanduluke pa bidi bitangila ntendelelu, Timote wakitaba buena-nkristo ne dikima dionso ne wakashindama bikole mu malu a mu nyuma, e kufikisha Paulo ku diamba bua bualu buende ne: “Mu Mukalenge Yezu, ndi mutekemena bua kunutumina [nuenu bena Filipoi] Timote mu katupa kîpi emu, bua ngikale pamu’apa ne anyima udi ne disanka pangamanya malu adi anutangila. Bualu tshiena ne mukuabu muenji wa malu ku budisuile bu yeye, bua kuditatshishaye bua bualu buenu. . . . Nudi bamanye tshijadiki tshiakafilaye buende yeye muine, bu muana ne tatuende, pamue nanyi wakasadila bu mupika bua lumu luimpe.” (Filipoi 2:19-22) Lelu’eu, bana ba balume ne ba bakaji bavule mu mêku mapanduluke pa bidi bitangila ntendelelu badi banyisha ne dikima dionso buena-nkristo bulelela. Anu bu Timote, badi bafila bijadiki buabu buobo bine, ne ndisanka kayipu ditudi nadi bu mudibo bena mu bulongolodi bua Yehowa!
Dikima bua ‘kuakama njiwu ya kujimija mutu wetu’
13. Mmu mushindu kayi muakaleja Akila ne Priska dikima?
13 Akila ne mukajende, Prisila (Priska), bakafila tshilejilu tshia dikima pa ‘kuakama njiwu ya kujimija mitu yabu’ bua benzejanganyi nabu ba mudimu. Bakakidila Paulo kuabu, kutumika pamue nende mu dienza ntenta ne kumuambuluisha bua kuenza tshisumbu tshipiatshipia ku Kolinto. (Bienzedi 18:1-4) Mu bidimu 15 biakanenga bulunda buabu, muoyo wabu uvua mu njiwu bua bualu buende mu mushindu ukêna mumanyike. Bavua basombele ku Roma tshikondo tshivua Paulo wambila bena nkristo bavua mu tshimenga etshi ne: “Ngelelayi Priska ne Akila muoyo, benzejanganyi nanyi ba mudimu mu Kristo Yezu, bakakama njiwu ya kujimija mitu yabu bua anyima wanyi, ne ndi mbela tuasakidila, ki ng’anu meme nkayanyi, kadi ne bisumbu bionso bia mu matunga menyi.”—Lomo 16:3, 4.
14. Pa kuakama njiwu ya dijimija mitu yabu bua Paulo, Akila ne Priska bakatumika mu diumvuangana ne dîyi-dituma kayi?
14 Pa kuakama njiwu ya kujimija mitu yabu bua Paulo, Akila ne Priska bakenza malu mu diumvuangana ne miaku ya Yezu eyi: “Ndi nnupesha mukenji mupiamupia: nunangangane bamue ne bakuabo, amu bu mundi mununange, nuenu penu nunangangane bamue ne bakuabo.” (Yone 13:34) Mukenji eu uvua “mupiamupia” bualu uvua ulomba kupita too ne pa tshivua Mikenji ya Mozese ilomba, mbuena kuamba ne: muntu anange muinende anu mudiye mudinange yeye muine. (Lewitiki 19:18) Abi bivua bilomba dinanga diena ngikadilu wa didibudisha amue masanka didi disaka too ne ku difila muoyo bua bakuabu, anu muvua Yezu muenze. Tertullien, mufundi wa mu siekele muibidi ne muisatu B.B. wakatela miaku ya bena mu bulongolodi ebu pa bidi bitangila bena nkristo pakafundaye ne: “‘Monayi,’ ke mudibo bamba, ‘mmushindu kayipu udibo banangangane bamue ne bakuabo . . . ne mbadiakaje nansha bua kufua bamue bua bakuabo.’” (Apologétique, nshapita wa 39, kanungu ka 7) Nangananga dîba dia dikengeshibua, ke ditudi ne bua kuleja dinanga dia buena-muntu pa kuakama ne dikima njiwu ya kujimija mioyo yetu bua kuepula bena kuitabuja netu ku tshinyangu peshi lufu bia ku bianza bia baluishi betu.—1 Yone 3:16.
Dikima didi dipetesha disanka
15, 16. Anu bu mudibi bilejibue mu Bienzedi nshapita wa 16, ndiumvuangana kayi didi pankatshi pa dikima ne disanka?
15 Paulo ne Silase bakaleja patoke se: kuleja dikima mu diteta kudi mua kupetesha disanka. Ku dîyi diakatuma balumbuluishi ba mu tshimenga tshia Filipoi, bakabatuta patoke ne milangala, kubela mu buloko ne kubakanga nkanu. Kadi, kabakalekela buowa bubatekesha mu maboko to. Nansha muvuabo mu nsombelu eyi mikole, bavu’anu ne dikima dia kudi Nzambi ne disanka didi bena nkristo bena lulamatu bapetelaku.
16 Pabuipi ne mundankulu, Paulo ne Silase bavua basambila ne basamuna Nzambi mu misambu. Diakamue, tshikumina e kuzakeja nzubu wa buloko, kusulula nkanu yabo ne kunzulula biibi ne bukole buonso. Buowa bukole e kukuata nsentedi mulami wa nzubu wa lukanu pamue ne bena dîku diende, kupetabo bumanyishi bua bukitu buakabasaka ku batismo wabu ne kuvuabo basadidi ba Yehowa. Nsentedi eu “wakasanka bikole ne bena dîku diende bua muvuabu bitabuje Nzambi.” (Bienzedi 16:16-34) Ndisanka kayipu dipetele Paulo ne Silase ku muanda eu! Tuetu bamane kukonkonona tshilejilu etshi ne bikuabu bia mu Mifundu pa bidi bitangila dikima, mmunyi mutudi mua kushala bena dikima bu mutudi basadidi ba Yehowa?
Tungunukayi ne kuikala ne dikima
17. Anu mudibi bilejibue mu Musambu wa 27, ndiumvuangana kayi didi pankatshi pa ditekemena kudi Yehowa ne dikima?
17 Ditekemena kudi Yehowa nedituambuluishe bua kushala ne dikima. Davidi wakimba ne: “Utekemene kudi Yehowa; wikale ne dikima ne mutshima webe wikale mukole. Eyowa, utekemena kudi Yehowa.” (Musambu wa 27:14) Musambu wa 27 udi uleja se: Davidi uvua weyemena Yehowa, “lumbu” lua muoyo wende. (Mvese wa 1) Ku kale, Nzambi wakatonkola baluishi ba Davidi, ne abi biakamupetesha dikima. (Mvese 2, 3) Diangata ne mushinga muaba wa mpuilu bua ntendelelu wa Yehowa divua muanda mukuabu munene. (Mvese 4) Dieyemena divua nadi Davidi mu diambuluisha dia kudi Yehowa, dikubibua ne disungidibua biakakankamija kabidi dikima diende. (Mvese 5-10) Bivua kabidi diambuluisha dinene bu muvuaye mulongeshibue ku musangu ne ku musangu mu mêyi-maludiki a njila muakane wa Yehowa. (Mvese wa 11) Kusambila ne dieyemena dionso bua kusungidibua kudi baluishi bende, ditabuja pamue ne ditekemena diende, biakambuluisha Davidi bua kuikalaye ne dikima. (Mvese wa 12-14) Tudi mua kuvudija dikima dietu mushindu wa muomumue, nenku, netuleje se: bushuwa “tudi tutekemena kudi Yehowa.”
18. (a) Ntshinyi tshidi tshileja se: ditantshila pa tshibidilu aba badi batendelela Yehowa pamue netu didi mua kutuambuluisha bua kushala bena dikima? (b) Bisangilu bia bena nkristo bidi bikuata mudimu kayi mu kuibaka kuetu kua dikima?
18 Ditantshila pa tshibidilu bena kuitabuja netu badi batendelela Yehowa didi mua kutuambuluisha bua kushala ne dikima. Bu muakalombaye bua kuya kudi Kezare, Paulo wakaya ku Roma, bena kuitabuja nende bakalua kusambakena nende mu tshisalu tshia Appius ne Trois-Taverne. Muyuki udi wamba ne: “Pakabamonaye, Paulo wakela Nzambi tuasakidila ne kupeta dikima.” (Bienzedi 28:15) Pa kubuela pa tshibidilu mu bisangilu bia bena nkristo, tudi tutumikila mubelu wa Paulo wa ne: “Tukenketangane bamue ne bakuabu, bua kusakangana ku dinanga ne ku midimu milenga, katuyi tulekela didisangisha dietu tuetu bine, bu mudi tshibidilu tshia bakuabu, kadi tuenda tukankamijangana bamue ne bakuabu, ne nutamba kuenza nunku bu munudi numona dituku dienda disemena pabuipi.” (Ebelu 10:24, 25) Kukankamijangana bamue ne bakuabu kudi kumvuija tshinyi? Kukankamija kudi kumvuija “kupetesha dikima, dizanzamuka, ne ditekemena.” (Webster’s Ninth New Collegiate Dictionary) Tudi mua kuenza bivule bua kupetesha bena nkristo bakuabu dikima, ne bia muomumue, makankamija abo adi pawu mua kuibaka tshikadilu etshi munda muetu.
19. Mmunyi mudi Mifundu ne mikanda ya bena nkristo mua kutuambuluisha bua kushala bena dikima?
19 Bua kushala bena dikima, tudi ne bua kulonga pa tshibidilu Dîyi dia Nzambi ne kutumikila mibelu yadi mu nsombelu yetu. (Dutelonome 31:9-12; Yoshua 1:8) Dilonga dietu dia pa tshibidilu didi kabidi ne bua kushindamena pa dikonkonona dia mikanda ya bena nkristo idi miashila pa Mifundu, bualu mibelu ya meji idimu neyituambuluishe bua kutantamena, ku dikima didi nzambi ufila, mateta adi ditabuja dietu dipetangana nawu. Miyuki ya mu Bible ituafumi ku dikonkonona, mmileje mushindu uvua basadidi ba Yehowa bashale ne dikima mu nsombelu kabukabu. Mpindieu, katuena pamu’apa bamanye mushindu udi malongesha a mushindu’eu mua kutuambuluisha, kadi Dîyi dia Nzambi didi ne bukole, ne bitudi tulongelaku bidi pa tshibidilu mua kutukuatshisha. (Ebelu 4:12) Tshilejilu, bikala ditshina dia bantu dituadija kutekesha mudimu wetu wa buambi, tudi mua kuvuluka mushindu uvua Henoke mumanyishe ne dikima mukenji wa Nzambi kudi bantu bavua kabayi bamanye Nzambi.—Yuda 14, 15.
20. Bua tshinyi tudi mua kuamba se: masambila adi ne dikuatshisha bua basadidi ba Yehowa badi basue kushala bena dikima?
20 Bua kushala bena dikima bu basadidi ba Yehowa, tudi ne bua kunanukila mu masambila. (Lomo 12:12) Yezu wakaakama mateta ende ne dikima bualu “wakenza misengelelu ne milombo kabidi kudi Eu uvua mukumbane bua kumupandisha ku lufu ne mbila mikole ne binsonji, ne wakatelejibua bilenga bua ditshina diende dia Nzambi.” (Ebelu 5:7) Pa kushala pabuipi ne Nzambi mu masambila, katuakuikala bu bena mu bulongolodi ebu bena buowa badi bafundila “lufu luibidi” ludi kaluyi ne dibiishibua nansha. (Buakabuluibua 21:8) Dikubibua dia kudi Nzambi ne muoyo mu bulongolodi bupiabupia [bidiye mulaye] mbia bamusadidi bende bena dikima.
21. Bua tshinyi Bantemu ba Yehowa balamatshi ba mikenji badi mua kuikala bena dikima?
21 Bu mutudi Bantemu ba Yehowa balamatshi ba mikenji, katuena ne bua kutshina ba-demon ne buluishi bua kudi bantu, bualu tudi ne dikuatshisha dia kudi Nzambi ne tshilejilu tshia dikima tshifila kudi Yezu wakatshimuna bena mu bulongolodi ebu. Bia muomumue, ditantshila bena tshisamba tshia Yehowa diibaki didi dituambuluisha bua kushala bena dikima. Dikima dietu didi kabidi diibakibua ku diambuluisha dia buludiki ne mibelu ya mu Mifundu ne mu mikanda ya bena nkristo idi yumvuija Bible. Kupita apu, miyuki ya mu Bible ya basadidi ba Nzambi ba kale idi ituambuluisha bua kuenda ne dikima mu njila yende. Nenku, mu bikondo ebi bikole bia ku nshikidilu, tuyayi ne bukitu batangile kumpala mu mudimu munsantu. Eyowa, bena tshisamba tshia Yehowa buonso bikale ne dikima!
Newandamune munyi?
◻ Mmunyi mudi tshilejilu tshia Yezu mua kutuwuja tente ne dikima?
◻ Ntshinyi tshiakapetesha Yezu ne balongi bende dikima dia kutungunuka ne kulongesha?
◻ Bua tshinyi bena Yuda ne bena mu matunga menyi bavua bakengela dikima bua kuditeka ku luseke lua Yehowa?
◻ Mbilejilu kayi bia dikima biakafila Eunice ne Timote?
◻ Ntshinyi tshidi tshijadika se: nansha mu dikengeshibua, dikima didi dipetesha disanka?
[Tshimfuanyi mu dibeji 18]
Anu bu Yezu, tudi mua kutantamena ditetshibua bituatumikila ne bituatela Mifundu