Bamanyishi ba Bukalenge badi balonda

“Dîna dia Yehowa ntshibumba tshikole”

TUDI mu tshikondo tshikole. Nsombelu wetu udi umueneka bu mushindame udi mua kushintuluka mu mupodi wa dîsu, ne padiku kakuyi didimuija, bamue bakadimona mu njiwu minene ivuabo nansha kabayi bajingulule. Njiwu idi mua kufumina ku tshimvundu tshia bena mianda ya politike, kudi muluishi kampanda wa tshikisu, ku tshipupu kampanda tshia ku bintu bifuka, anyi ku disama dikole. Bikalabi nanku, nkuepi kudi muena nkristo ne bua kueyemena padi muoyo wende mu njiwu?

David, misionere udi musombele mu umue wa ku nzubu ya filiale ya Société Watch Tower, wakapetela diandamuna ku lukonko alu ku muanda kampanda mukuate buôwa wakamonaye. Bu muvuaye utumika bu muendeshi wa mashinyi, wakajuuka pa kabundubundu bua kuya kuambula bamue bena dîku dia Betele (batu basombela pambelu pa filiale). Kuîsu kutshivua kufikuluke. Kunyima kua yeye mumane kuambula Rosalía ne mumane kupita muaba uvua nzubu wa bampulushi, wakumvua tshingoma tshidila.

Pashishe, malu akapitakana lukasa. Wakumvua muadi bu wa tshingoma tshinene ne kujingulula pashishe se: umue wa ku ndundu yende ya mashinyi uvua mutayike. Diakamue, wakamona musalayi umue muimane munkatshi mua njila, tshingoma tshitangija kudiye. Malu asatu akenzeka musangu umue: ntende yakamuangalaka ku luseke lua mashinyi, kusasuluja madidishi; David ne Rosalía bakinama; musalayi wakatayisha tshingoma mu lumuenu lua kumpala kua mashinyi pa bule bua mêsu a muendeshi.

Bu muvua ntende mikale amu ituta ku mashinyi, David wakimanyika mashinyi muikale mukobame. David ne Rosalía bakela meji se: bavua batangile ku lufu. Bakasambila Yehowa ne dîyi dikole, bamulomba bua kubakubaye. Ku shòo Rosalía wakamba ne: mu tshikondo atshi wakadiebeja tshivua bena dîku diende mua kuenza pavuabo mua kumvua lumu lua lufu luende!

Bikale ne muoyo!

Ndekelu wa bionso, miadi ya bingoma ne dizakala dia mmuenu biakajika, ne David kuela dîsu kudi Rosalía. Pakamonaye ditoba dia mashi mu nyima muende, mutshima wende wakiimana. Kadi, katshivua mputa wa lutende, apo wa tshilangilangi tshia lumuenu. Mpombo yende ya binu mifiondola kudi biyoyi bia lumuenu, bivua bipuekesha mashi, kadi, ku luseke lukuabo, kavua umueneka mu njiwu nansha.

Bantu bavuale bilamba bia basalayi ne tulamba tutoke tusuika ku maboko bakasemena pepi ne mashinyi, e kubalombabo bua kupatukamu bianza biela muulu. Umue wa kudibo uvua umueneke bu mfumu’abo wakambila disalayi ne: “Katuvuapu bakuambila bua kubenga kuasa ntende kudi bantu badi kabayi basalayi.” Musalayi wakalomba dilekela, e kuamba ne: uvua mumvue muadi wa bingoma bu uvua ufumina ku mashinyi abo.

Pakamanyisha David ne Rosalía muvuabo Bantemu ba Yehowa, tshilunji [tshia basalayi abu] tshiakatuya. Wakumvuija tshivuaye wenza, kadi basalayi bakajinga kubalama. Ntshinyi tshivua tshienzeke pa kabundubundu? Musumba wa basalayi uvua mulongolole diangata bukalenge ku bukole, ne basalayi abo bavua pepi ne kunyenga nzubu wa bampulushi dîba diakapita David ne Rosalía mu mashinyi.

Rosalía uvua ne dipampakana dikole, kadi, wakadikanda tshikondo tshivua David ulomba bua kubalekelabo. Ndekelu wa bionso, bakabambila bua kuyabu​—bianza bitupu kabayi ne mashinyi abo. Bakaya lua makasa ne kuangata bus batangile ku Betele, kuvua nzubu wa tshiondopelu muindile Rosalía bua kumuondopa.

Bukole bua disambila

David wakalonga bualu kampanda ku tshiakabenzekela​—kubenga kupepeja bukole budi nabu disambila dienza ne muoyo umue, ne kubenga kupua muoyo se: kudimanyisha ne bukitu bu umue wa ku Bantemu ba Yehowa kudi misangu mivule dikubibua. Bulelela, “Dîna dia Yehowa ntshibumba tshikole. Muntu muakane udi unyemenaku ne ukubibuaku.”​—Nsumuinu 15:29; 18:10; Filipoi 4:6.

[Mêyi a dianyisha bua tshimfuanyi mu dibeji 19]

Fotografía de Publicaciones Capriles, Caracas, Venezuela