Bulongolodi bulenga​—Ntshilota patupu anyi?

BU WEWE mua kuikala mulondi wa dilongesha dia Ahura Mazda divuabu bamanyisha kudi muprofete Zoroaster wa ku Iran, uvua mua kuikala windila dituku dialukila buloba ku bulenga buabu bua ku mbangilu. Bu wewe mua kuikala ne muoyo mu Grèce wa kale, pamu’apa, bu tshilota, uvua mua kujinga kuya ku bidiila bilenga bia Diakalenga anyi kumona dipingana dia tshikondo tshia kumpala tshivua tshia masanka tshidi mufundi wa misambu ya tusala Hesiod ukonkonona mu siekele wa muanda-mukulu K.B.B. Guaraní kampanda muena Inde wa mu Amerike wa ku Sud yeye udi mua kuikala ukeba Buloba Bukena Bubi. Pa kuikala ne muoyo mu tshikondo tshietu etshi, pamu’apa, udi mua kutekemena ne: bulongolodi ebu nebulubuluke ku butuangaji bua malu a tshididi anyi dilubuluka diabo ntshipeta tshiafumina ku mbabi idiku lelu’eu mu dikuba bintu bidi binyunguluke bantu.

Tshikondo tshia masanka, bidiila bia Diakalenga, Buloba Bukena Bubi​—aa ng’amue a ku mêna mavule adibu batumika nawu bua kufunkuna ditekemena dia muomumue, ditekemena dia bulongolodi bulenga.

Bulongolodi ebu, bulongolodi buetu, kakuyi mpata, ki mmuaba mulenga bua kusomba nansha. Divulangana dia buntomboji bua tshikisu, mvita ya tshinyangu tshikole ne mishipianganyi, idi ibudika munkatshi mua bena tshisamba tshimue, dishipa bantu bungi kabuyi kubala, dilengulula dia makenga a bakuabo, bupele ne nzala, bulofua ne dibenga kuambuluishangana, makenga adi afumina ku bintu bidi binyunguluke bantu, masama akena luondapu adi akengesha miliyo ne miliyo ya bantu​—mulongolongo wa makenga adiku lelu’eu udi umueneka bu ukena ndekelu. Pa kuela meji ku mvita idi yenda ibudika patudi tuakula apa, kamona-kamba kampanda muena Italie wakamba ne: “Lukonko ludi lumvuila diakamue mu lungenyi ndua kumanya bikala tshikisu tshikale mmuenenu mutambe bunene udi usunguluja tshikondo tshietu etshi.” Pa kukonkonona nsombelu udiku, udi mua kuamba ne: bidi bia meji bua kutekemena tshintu kampanda tshishilangane, tshintu tshilenga anyi? Peshi dijinga dia nenku ntshilota tshidi katshiyi mua kukumbana musangu nansha umue anyi? Tudi ne muoyo mu bulongolodi bulenga budi butambe makuabo wonso adi mua kuikalaku anyi?

Nkonko eyi ki mmipiamipia nansha. Mu kupita kua siekele mivule, bu tshilota, bantu bavua batekemena bulongolodi muikala diumvuangana, buakane, dilubuluka, ne dinanga. Mu kupita kua bikondo, ba-filozofe bakumvuija mu bule ne mu butshiama mmuenenu yabo pa bidi bitangila Matunga mapuangane, malongolodi malenga. Kadi, diakabi, nansha musangu umue ki mbakumbane kumvuija mushindu wakualubuluja.

Mulongolongo wa bilota, malu makuatakaja mu lungenyi ne majinga makuabo a bantu adi atangila nsangilu wa bantu mulenga bia mu kupita kua siekele mivule, bidi mua kutulongesha tshintu kampanda anyi?

[Tshimfuanyi mu dibeji 3]

Bulongolodi ebu mbulenga kupita makuabo kayi wonso anyi?