Utshidi muvuluke anyi?

Uvuaku muanyishe bikole dibala dia nimero ya ndekelu ya Tshibumba tshia Nsentedi anyi? Bikalabi nanku, neusanke bua kuvuluka ngenyi idi ilonda eyi:

▫ Bua tshinyi batentekedi bena Isalele bakasungula bua kutuudila kua Rahabe, mukaji wa ndumba?

Bena Izalele bavua batumikila Mikenji ya Nzambi, nunku kabakalala kuende bua kuenda nende masandi to. Pamu’apa bavua bela meji se: biashalabo kua mukaji wa ndumba eu, abi bivua mua kujudija manunganyi kudi bena mu tshimenga. Bu muvua nzubu wende muibakila pa lumbu lua tshimenga, batentekedi bavua mua kudiopoka bipepele. Kadi nangananga, mbimueneke se: Yehowa ng’wakabalombola kudi mukaji eu muenji wa mpekatu uvua mulengibue ku muoyo kudi miyuki ya malu avua Nzambi muenzele bena Izalele, nunku kunyingalalaye ne kushintululula nsombelu wende.​—15/12, mabeji 24-25.

▫ Mmunyi mudi tshiji tshia mulunguluku tshikale ne njiwu pa makanda etu a mubidi?

Malonga mmaleje se: tshiji tshia mulunguluku tshidi tshisaka ku divula dia mâyi a lulengu [adi celile iluka] mu mubidi, mine mâyi adi akebesha tshikutakanyi mu lungenyi. Dikuata tshiji ku musangu ne ku musangu didi mua kulela dipampalamuka dia bungi bua cholestérol (mâyi adi dimuma diluka) mukumbaji wa mudimu muimpe ne mubi mu mubidi, ne nunku kuvudija njiwu ya kupeta disama dia mutshima ne tujilu.​—15/12, dibeji dia 32.

▫ Mmibelu kayi yatuambuluisha bua kuvudija diabanya dietu dia bibejibeji bia Tshibumba tshia Nsentedi ne Réveillez-vous!?

Tabalela Tshibumba tshia Nsentedi ne Réveillez-vous!; vuija dileja diebe dipepele; enza dileja dîpi, difundile tshipatshila.​—1/1, dibeji dia 24-25.

▫ Mmu mushindu kayi muvua Mozese tshilejilu tshimpe tshia muntu wakakokesha muinshi mua bukokeshi bua Yehowa Nzambi?

Pavua bilumbu bijuuka, Mozese uvua ukeba bulombodi kudi Yehowa. Kavua wipatshila buneme buende nkayende, kadi uvua uditatshisha bikole bua butumbi bua Yehowa. Uvua ne ditabuja dishindame, ne kakapua muoyo ne: Yehowa ke uvua Mukokeshi wa ditunga dia Izalele.​—15/1, dibeji dia 11.

▫ Mmu imue mishindu kayi mudi dilongesha dia Nzambi ditshimuna?

Dilongesha dia Nzambi didi ditshimuna pa kupetesha tshisamba tshia Yehowa dijingulula dia ku kakese ku kakese dia bulelela. Didi dibueja bantu mu butoke bua mu nyuma, ne didi dileja badipuekeshi mushindu wa kutendelela Nzambi “ne nyuma ne bulelela.” (Yone 4:24) Dilongesha dia Nzambi didi kabidi ditshimuna mateta ne bulongolodi ebu bubi.​—1/2, dibeji dia 10-12.

▫ Nsapi wa dilubuluka mu dibelangana ntshinyi?

Nsapi udi mu dileja bakuabo kanemu ne mu dibangata ne buneme budibu bakengela. Ke bualu kayi, mubedianganyi muena nkristo udi ne bua kuikala ne bulenga ne dîsu dikole kadi muikale wangata mubedibue ne buneme.​—1/2, dibeji 28.

▫ Mmunyi muakafika Ekleziya katolike wa ku Roma ku ditabuja dilongesha dia diambuibua dia Mariya?

Mu siekele ya kumpala kunyima kua lufu lua Yezu, lungenyi lua Diambuibua dia Mariya mu diulu luvua luenyi mu tshieledi tshia lungenyi tshia bena nkristo. Kunyima kua dilongesha dia Busatu-Bunsantu dimane kuvuijibua dilongesha dia Ekleziya, apo, bakatuadija kuteya ntema kudi Mariya ne kumuangata ne mushinga munene. Kadi, mu dia 1 Kasuabanga 1950, Ekleziya wakangata dipangadika dia ndekelu. Papa Pius XII wakamanyisha ne: “Tudi tumvuija Diambuibua bu dilongesha disokolola kudi Nzambi.”​—Munificentissimus Deus.​—15/2, dibeji 26-27.

▫ Mu Yelemiya nshapita wa 24, bibondo bibidi bia mfigi, mfigi mimpe ne mibi, bidi bileja tshinyi?

Mfigi mimpe idi ileja bena Yuda ba kale bakayabo nabu mu bupika ku Babilone, kuvua bashadile ne bua kualukila ku Yuda. Mfigi mibi idi ileja mukalenge Sedekiase ne aba bavua nende bakatombokela mukalenge Nebukadnezare nansha muvua [Sedekiase] muenze mutshipu mu dîna dia Nzambi. Bia muomumue, mu tshikondo tshietu etshi kudi bashadile ba Izalele wa mu nyuma, batu bakuame mamuma mempe mu nsombelu wabu, bishilangane ne bamfumu ba bukua-buena-nkristo batu bakuame mamuma mabi.​—1/3, dibeji dia 14-6.

▫ Ba-Quartodecimans bavua banganyi, ne bua tshinyi ngenzelu wabo udi ne mushinga lelu’eu bua bena nkristo?

Kunyima kua tshikondo tshia bapostolo, kuvua bantu bakuabo bavua balonda tshilejilu tshia bapostolo. Bakamanyika bu ba-Quartodecimans. Bidi bia mushinga lelu’eu, bualu bidi bileja ne: nansha kunyima kua lufu lua bapostolo, kuvua bamue bantu bavua balamate ngenzelu muimpe wa kuvuluka lufu lua Yezu musangu umue ku tshidimu dituku dia 14 Nisan.​—15/3, dibeji 4-5.

▫ William Whiston uvua nnganyi?

Uvua mukebuludi wa lungenyi lutue wa mu siekele wa 18 ku Angleterre, uvua ulongela pamue ne Sir Isaac Newton. Whiston wakakudimuna Mifundu ya tshiena-Greke ya bena Nkristo, wakabenga patoke dilongesha dia Busatu-Bunsantu, ne uvua mulongeshi wa malu a mitoto ne makumi. Kadi Whiston udi uvulukibua nangananga bua dikudimuna diende mu anglais dia mikanda mifunda kudi Flavius Josèphe, mushikuluji wa malu a kale a bena Yuda.​—3/15, dibeji 26-28.

▫ Mmu ngumvuilu kayi muvua muntu mufukibue ku tshimfuanyi tshia Nzambi? (Genese 1:27)

Mu ngumvuilu wa se: muntu wakapeshibua mushindu wa kudima ngikadilu ya Nzambi bu mudi​—dinanga, buakane, meji, ne bukole​—bia muomumue ne ngikadilu mikuabo.​—1/4, dibeji dia 25.