Dipangadika dia kusadila Yehowa!

“KUENA ne bua kupatuka mu buambi to!” “Tshiena musue kumona bantu bebe abu apa to!” Bakaji bavule bena nkristo batu bumvua babayabo baluishi ba ditabuja diabo babamba mêyi aa ne makuabu a bu nunku. Kadi, padi bine balume aba batumika ku busalayi, ditabuja dia bakaji babo didi dibuejibua mu ditete dia pa buadi. (Yeshayi 2:4; Yone 17:16) Nunku, mmunyi mudi bakaji aba bena nkristo mua kushala bakole mu nyuma ne kuikala bakumbaja mudimu wa Bukalenge?

Dileja lulamatu kudi Yehowa pamue ne dipangadika dikole dia muntu pa nkayende bidi biambuluisha bua kunanukila. “Ndi ngela meji se: dipangadika dianyi divua dikole,” ke mudi Yvonne umvuija, mukaji wa musalayi. “Mvua mumanye se: kuvua mishindu mivule ya kutuuyisha buluishi bua bayanyi.” Ne ivuaku bushuwa.

Mukaji mukuabu muena nkristo, musela kudi mfumu wa basalayi, udi umvuija muvua dipangadika diende dikole dipepejile bayende nsombelu. “Mmumanye programme wanyi anu mudiye mumanye wende, ne basalayi mbasue muanda eu bikole,” ke mudiye umvuija. Nansha nanku, ki mbipepele misangu yonso bua kutungunukaye ne kusadila Yehowa ne tshisumi nansha.

Ditantamena bunkaya

Bakaji ba bena mudimu batu bapetangana misangu mivule ne lutatu lua kumuangala mu matuku makese bua kuya ne babayabu ku miaba ya midimu kule ne ku mabo. Nunku, kuya kusomba mu muaba kawuyi mumanya, mbipepele bua kudiumvua nkaya. Kadi, kabitu nanku misangu yonso to. Aba badi basadila Yehowa mba dikalenga. Ndiepi adi? Bilondeshile mupostolo Petelo, ke “dîku dijima dia bana betu.” Bantemu ba Yehowa, badi mpindieu miliyo mivule mu matunga 231, badi benza dîku dinene dia bena nkristo, “dîku dia bana betu.” Badi basanganyibua miaba bu yonso.​—1 Petelo 2:17.

Susan, bua kumushibua kuende diakamue mu musoko mumulela, wakaya kusomba mu kamponya ka basalayi bendeshi ba ndeke ya mvita, kuvuabo batume bayende. Bu muvuaye muena kuitabuja mupiamupia uvuabo baluisha kudi bayende mubule ditabuja bua kulekelaye mudimu wa bena nkristo, udi ulonda ne: “Diakamue ngakaya kubuela mu bisangilu bia tshisumbu bia muaba eu, ne muinemu ngakasomba ne kuyukila ne bana betu ba bakaji bakuabu. Mu bululame buonso ndi mua kujadika se: dibatantshila edi ke diakangambuluisha bua meme kuya kumpala.”

Pamu’apa, bunkaya butu bulela tunyinganyinga tukole. Nansha mu nsombelu eu, lumu luimpe lutu lutuala dikankamija didi dikengedibua. Glenys, muanetu wa bakaji muena Angleterre uvua muye ne bayende ku muaba mule kuvuabo bamutume, udi ulonda ne: “Anu pamvua ne dibungama dikole ngakapeta mukanda wa kudi mukaji kampanda umvua mumanye kukadi bidimu bivule pantshivua meme muine musalayi, uvua ummanyisha muvuaye ufuma ku ditambushibua bu umue wa ku Bantemu ba Yehowa. Lumu elu e kunkankamija pa dîba menemene.”

Jane, wakaya ne bayende ku Kenya, wakajingulula se: bisangilu bia bena nkristo bidi bikolesha mu nyuma, nansha muvuabi bienzeka mu muakulu uvuaye kayi umvua. “Mvua mumanye se: mmuaba uvua Yehowa musue bua meme kuikala,” ke mudiye umvuija. “Mvua pamue ne bana betu ba balume ne ba bakaji, ne bakampetesha makanda mu nyuma. Bakangakidila ne meme kujingulula se: tudi bena dîku dimue.”

Jane udi’anu umue wa ku aba batu, mu nsombelu bu nunku, bavue kumanyangana ne balela ba mu nyuma bavuabo kabayi bamanye diambedi!​—Mako 10:29, 30.

Dipangadika dikole kumpala kua buluishi

“Kanuedi meji ne: ndi muvue kuteka ditalala pa buloba,” ke muambile Yezu. “Ndi muvue kuteka, ki nditalala, apo muele wa mvita.” (Matayi 10:34) Ebi bidi biumvuija tshinyi? Nansha mu dîku dine, mudi yonso mutekemene ditalala, mudi mua kuikala “muele mutuula diakamue,” ke muakamba A. T. Robertson mu mukanda wende wa Word Pictures in the New Testament. Yezu wakamanyisha bimpe bitambe ne: “Bushuwa, bena lukuna ba muntu nebikale bena mu nzubu wende muine.” (Matayi 10:36) Mmushindu kayipu udi mêyi aa ajadikibua padi muena dibaka umue udileja bu muluishi wa bulelela!

Pakatuadija Diane kulonga Bible ne Bantemu ba Yehowa, bayende uvua mfumu wa tshiluilu tshia mvita ya muulu, uvua munyengabale bikole. Ebi biakatuala bipeta kayi mu nsombelu wabu wa dibaka? Diane udi umvuija ne: “Bivua bifuane kuamba se: tshipese tshia dibue dia mashika tshivua tshitujike pankatshi petu babidi. Tuvua bena dibaka ba disanka. Diakamue, kuenzabi bu tuavu’anu basangile nzubu umue.” Mmunyi muakatantamenaye lutatu elu? “Dituishibua dianyi ne dipangadika dianyi dikole bivua ne mushinga mukole, pamue ne diambuluisha dia kudi Yehowa ne spiritu wende.” Diane wakalonda tshilejilu tshia mu Bible tshia muprofete Danyele.

Pavuaye mu bupika ku Babilone ne pakamupeshabo biakudia bivua musadidi wa Nzambi kayi mua kudia, Danyele “wakangata dipangadika dikole mu mutshima wende bua kubenga kudinyanga ne biakudia bisheme bia mukalenge.” Eyowa, Danyele wakangata dipangadika ne muoyo umue. Wakapangadija mu mutshima wende bua kubenga kudinyanga pa kudia biakudia ebi. Ndikolesha muoyo kayipu dilejileye pashishe, bualu “wakatungunuka ne kulomba kapita ka bena mudimu ba mu lubanza lua mukalenge bua kumumvuila bua yeye kadinyangi”! Ntshipeta kayi tshiakamueneka? Yehowa wakabenesha ngenzelu wende wa dilonda dikasa dimue dimue.​—Danyele 1:8, 9, 17.

Bia muomumue lelu’eu, mulume muluishi wa bulelela udi mua kukandika mukajende bua kulekela dibuela mu bisangilu bia tshisumbu. Ntshinyi tshidiye mua kuenza? Jane wakapetangana ne lutatu elu. Udi umvuija ne: “Tshitu muanji kuditekesha bua mikanu to. Mvua mumanye ne: tshivua mua kuimansha ditabuja dianyi to. Mvua ne bua kuleja se: bisangilu bivua ne mushinga mukole buanyi meme.” Yehowa wakabenesha dipangadika diende bu muvuaye utungunuka ne kubuela mu bisangilu.

“Bayanyi wakateta mua kumpumbisha bua kuya mu bisangilu, kadi kabiakanenga to,” ke mudi Glenys ulonda. “Mvua ntungunuka ne kuya. Pamvua mpingana ku nzubu, imue misangu uvua unkuma, anyi ubenga kungakuisha.” Kadi, wakatshimuna diteta edi pa kusambila misangu yonso. Bakulu babidi ba tshisumbu bavua basambila kabidi nende ku musangu ne ku musangu, ebi biakamukankamija bikole bua kutungunuka ne kubuela mu bisangilu.​—Yakobo 5:13-15; 1 Petelo 2:23.

Pamu’apa, bamfumu ba mudimu ba mulume batu bamusaka ku ditekesha mukajende mu maboko bua alekele kumanyisha lumu luimpe. Diane wakajingulula se: uvua ne bua kumvuija bayende malu avuaye muteke kumpala mu nsombelu wende. “Mvua mudiakaje,” ke muakambaye, “bua kuanyisha bionso bivua ne bua kumvuila bu mumvua ntungunuka ne kupatuka mu buambi.” Anu bu bapostolo, wakalama dikasa anu dimue! (Bienzedi 4:29, 31) Kadi, wakakaja difila diende dia bumanyisha bilondeshile nsombelu. Udi ulonda ne: “Mvua mbikila bantu bua kulua kunua dikopo dia kamfuele ne ndeja yonso wa kudibo mukanda wa Bulelela.”​—Matayi 10:16; 24:14.

Dikokela pamue ne dilama ditabuja

Padibo batatshishibua kudi ndululu ya mu dibaka, bakaji bena nkristo badi bavuluka masanka atshivuavua ne beyemena Yehowa. Ebi bidi bibambuluisha bua kulama mmuenenu wa pankatshikatshi. Badi batua babayabo nyama ku mikolo muabu muonso, eku kabayi balekela ditabuja diabo. Pa kuenza nunku, badi balonda mubelu wa Petelo mufunda ku spiritu munsantu: “Bia muomumue, nuenu bakaji, nukokele babayenu.” (1 Petelo 3:1) Mu nkudimuinu wa The Amplified New Testament, dîyi-diludiki edi dia mupostolo didi dibadibua nunku: “Bakokelayi bu nudi kuinshi kuabu, nuindila bionso kudibu, ne akajayi bienu bionso bilondeshile disua diabu.” Tabalela mushindu uvua Jane mulonde mubelu eu. “Bayanyi wakangambila ne: malu amvua musue kuenza kaena ne bua kumukebela ntatu ku mudimu wende to,” ke mudiye umvuija. “Nunku, ngakateta mua kupeta mishindu ya kumuambuluisha.”

Bamue bakaji bena nkristo batu banyisha bua kuya mu mafesto adi babayabo babikidibue. Kadi, batu bapangadija mu mitshima yabu bua kubenga kutundubija ditabuja diabo. Jane wakangata dîba dia kuyukila ne bayende pa muanda eu. Wakamumvuija ne bukalanga ne: uvua muanyisha bua kuya nende, kadi kavua musue bua dikalaku diende dimukebele ntatu nansha. “Mvua mumanye ne: pamu’apa, babikidibue buonso batu biimana ne babandisha tukopo tuabu mulu bua kuambika muntu kampanda butumbi. Mvua mulonge ne: Anu Yehowa ke udi mukumbanyine kuambika butumbi ne kuleja lulamatu kaluyi mikalu, ne kukumbajila muntu tshizendi tshia dimuambika butumbi, abi kabitshiena anu dileja kanemu to. Bayanyi wakajingulula se: muanda eu newikale mua kutukebela ntatu, e kungambilaye anu bipepele ne: ‘Kulu to!’ Meme kutumikila.”

Glenys, ku luende luseke, uvua ufila bayende mu mafesto a mushindu’eu, kadi uvua ulonda ne mêsu baludiki ba ku mêsa abu. Pavuaye umona se: bakadi pa kudilongolola bua kuela tukopo tuabu mulu, uvua uya kupengama ku bisokomenu! Kabiyi mpata, bakaji aba bakenza malu ne lungenyi lutabuluke, kadi kabakatundubisha peshi kulekela ditabuja diabu to.

“Bakokibue kabiyi ku dîyi”

“Meme mua kulua mukaji musela wa tshitembu, bayanyi neamone se: bulelela budi bunshintulula,” ke muvua Yvonne wela meji. Nunku, wakatuadija kubala ne kubalulula nshapita wa mu mukanda wa Nsombelu wa disanka mu dîku udi ne mutu wa bualu wa “Mukaji munangibue bikole.”a “Ngakashindamena pa malongesha adi mu ka-tshiena-bualu ka ‘Midididilu ne Matandu’! Kadi, ngakajingulula se: misangu yonso imvua nkeba mua kuakula ne bayanyi, matandu avua atamba kujuka.” Kadi ndekelu wa bionso, wakafika ku diambuluisha bayende bua kusadilaye pende Yehowa. Mmushindu kayi? Pa kutumikila dîyi-diludiki didi mu 1 Petelo 3:1, dia se: balume nebikale mua “kukokibua kabiyi ku dîyi.”

Mushindu udi bakaji bena nkristo batabalela mêku abu udi wambuluisha bikole bua bakuabu kusakibua ku dianyisha buena nkristo. Diane udi ulonda ne: “ngakakeba mu mishindu yonso bua kuvuija bulelela tshintu tshilengele tshidi tshikoka bakuabu. Pamvua nya mu bisangilu, bayanyi uvua udiumvua mushiyibue nkayende menemene, nunku ngakabela bana bua kutamba kuleja bukalanga patuvua tualukila ku nzubu. Ngakateta kabidi bua kumutabalela mu mushindu wa pawu mu dipingana dietu.” Ku kakese ku kakese, bikadilu bia bayende biakashintuluka, bilondeshile muvuaye ulengibua ku muoyo kudi bienzedi bia bulenga bia dîku diende.

Basadidi bakuabu ba Yehowa badi mua kufila diabu diambuluisha. Jane udi ulonda muvua bayende unanga bunyana bua Bantemu ba-misionere bakasanganaye ku Kenya. “Bakadia nende bulunda ne bavua bayukila pa dinaya dia ndundu wa makasa, kabidi bavua bakididi ba benyi ba bushuwa. Misangu mivule, bavua batubikila ku nzubu mishilangane ya ba-misionere bua kudia nabu biakudia.” Ku shoo bayende wakumvuija ne: “Ngakatuadija kuangata ditabuja dia Jane bilondeshile mmuenenu mushilangane lukama pa lukama. Balunda bende bavua bantu ba lungenyi lutue bavua mua kuasa mayuki pa biena-bualu kabukabu.” Bia muomumue, bayende wa Diane wakashintulula mmuenenu wende pa bulelela. Dimue dituku pavua vwatire wende munyanguke, nsongalume kampanda Ntemu wakamuelesha diboko. Udi wamba ne: “Biakandenga ku muoyo bushuwa.”

Kadi, balume buonso kabatu bakokibua ku bulelela nansha. Ntshinyi tshitu tshienzeka? Yehowa utu ufila diambuluisha bua bena lulamatu bende bamone mua kunanukila. (1 Kolinto 10:13) Mona dikankamija difila kudi Glenys bua aba buonso badi mu nsombelu bu nunku: “Kuedi mpata nansha kakese, nansha kakese ne: Yehowa ng’Eu wakafuka dibaka ne mmusue bua bena dibaka bashale muaba umue. Nunku, nansha biakuenzela bayebe malu kayi peshi biwapetangana ne buluishi bua mushindu kayi bukujudila kudi aba badi bakunyunguluke, Yehowa kakulekela bua wewe kutetuka nansha.” Nansha mudi bayende kayi muanji kutuadija kutendelela Yehowa, bienzedi biende kudiye ne mmuenenu wende pa bulelela mbituuye.

‘Kuna ne bisonji; unowe ne disanka’

Bushuwa, bakaji aba bena nkristo mbapangadije ne muoyo umue bua kusadila Yehowa. Biwikala mu nsombelu wa muomumue, angata pebe dipangadika dikole ne ukoleshe muoyo. Vuluka musengelelu eu: “Yehowa Nzambi webe ke uudi ne bua kutshina. Anu yeye ke uudi ne bua kusadila, ne Yeye ke uudi ne bua kulamata.”​—Dutelonome 10:20.

“Udi uya biandi, wenda udila, mutuale maminu bua kukuna, neapingane bulelela ne mbila ya disanka, mutuale bisumbu biandi bia blé,” ke mudi mufundi wa misambu wamba. (Musambu wa 126:6, Mukanda wa Nzambi) “Udi upuekesha bisonji bia bungi bu muudi uteta mua kuleja muena dibaka nebe bulelela, nansha bikale pa kupuwa peshi ne dîyi,” ke mudi muena nkristo kampanda witaba. “Kadi, ku ndekelu udi wela lubila lua disanka bualu nansha biabengaye kuanyisha bulelela, Yehowa udi ukubenesha bua madikolela awudi wenza.”

Aba buonso badi basadila Yehowa ne lulamatu nansha mudibo bâkama buluishi bua bena dîku diabu, mbakumbanyine ka-lumbandi bushuwa. Mbakumbanyine kueleshibua diboko ne kunangibua. Balonde anu dikasa diabo dimue pa kulama ditabuja diabo, bangate dipangadika dikole dia kusadila Yehowa!

[Mêyi adi kuinshi]

[Tshimfuanyi mu dibeji 28]

Didilongela ne masambila bidi bikolesha dipangadika dia muena nkristo