Diishayi tshisumbu tshia mikoko ya Nzambi ne dinanga
“Diishayi tshisumbu tshia mikoko ya Nzambi tshidi ku bukubi buenu.”—1 PETELO 5:2, NW.
1, 2. Nngikadilu munene wa Nzambi ntshinyi, ne mmunyi mutuyi udileja?
MU MIFUNDU Minsantu, mbimueneke patoke se: dinanga didi ngikadilu munene wa Nzambi. “Nzambi udi dinanga,” ke mudi 1 Yone 4:8 wamba. Bu mudi dinanga diende dilejibua ku bienzedi, 1 Petelo 5:7 udi wamba se: Nzambi “udi ukukuba.” Mu Bible mushindu utu Yehowa ukuba tshisamba tshiende mbawufuanyikije ne mushindu utu mulami wa dinanga, ne diengeleka dionso ukuba mikoko yende: “Monayi! Mukalenge Munene udi ku mutu kua bionso, Yehowa yeye muine . . . neadiishe tshisumbu tshiende tshia mikoko. Ne maboko ende neasangishe kaba kamue tuana tua mikoko; ne neatuambule mu tshiadi tshiende. Eyi idi yamusha neayilombola ne dikuba dionso.” (Yeshayi 40:10, 11, NW) Ndikankamija kayipu diakafikisha Davidi ku diamba ne: “Yehowa udi Mulami wanyi. Tshiakupangila tshintu nansha tshimue”!—Musambu wa 23:1, NW.
2 Mbikumbanyine padi Bible ufuanyikija bantu badi Nzambi muanyishe ne mikoko, bualu mikoko mmiena ditalala, idi ikokela, itumikila mulami wayi udi uyikuba. Bu mudiye Mulami wa dinanga, Yehowa udi ne muende muonso, ukuba bantu badi bafuanangana ne mikoko. Udi wenza nunku pa kubapetesha biakudia bia ku mubidi ne bia mu nyuma ne pa kubapetesha bulombodi mu “matuku a ku nshikidilu” aa makole a bulongolodi ebu bubi bua kubabueja mu bulongolodi buende bupiabupia buakane bualua.—2 Timote 3:1-5, 13; Matayo 6:31-34; 10:28-31; 2 Petelo 3:13.
3. Mmunyi muakumvuija mufundi wa misambu mushindu utu Yehowa ukuba mikoko yende?
3 Anjibi kumona dikuba dia Yehowa dia dinanga bua mikoko yende: “Mesu a Yehowa adi kudi bakane, ne matshu andi adi buashi ku kudila kuabo. . . . Bantu bakane badi badila dikuatshisha, Yehowa udi ubunvuila, udi ubahandula mu makenga abo onso. Yehowa udi habuihi ne bantu badi ne mitshima idi itamba kunyingalala, udi usungila badi ne mitshima ya majia.” (Musambu wa 34:15-19) Ndikankamija kayipu bunene didi Mulami Munene wa Bionso upetesha bantu badi bafuanangane ne mikoko!
Tshilejilu tshia Mulami mulenga
4. Mmudimu kayi udi Yezu nawu mu dikuba tshisumbu tshia mikoko ya Nzambi?
4 Muana wa Nzambi, Yezu, wakalongela bimpe kudi Tatuende, bualu Bible udi ubikila Yezu ne: “mulami mulenga.” (Yone 10:11-16, NW) Mudimu wende mufidi wa muoyo wenzelaye tshisumbu tshia mikoko ya Nzambi mmulejibue mu Buakabuluibua nshapita wa 7, NW. Mu mvese wa 9, basadidi ba Nzambi ba lelu’eu mbabikidibue “musumba munene . . . wa mu matunga wonso ne bisa bionso ne bisamba bionso ne miakulu yonso.” Pashishe mu mvese wa 17 mbafunde ne: “Muana wa mukoko [Yezu] . . . neabadiishe ne neabalombole ku mpokolo ya mâyi a muoyo. Ne Nzambi neakupule tshinsonji tshionso ku mêsu abo.” Yezu udi ulombola mikoko ya Nzambi ku mâyi a bulelela budi bufikisha ku muoyo wa kashidi. (Yone 17:3) Bu mudi Yezu ubikidibua “Muana wa mukoko,” ebi bidi bileja ngikadilu yende mene idi mifuanangane ne ya mukoko, udi tshilejilu tshinene tshia bukokedi kudi Nzambi.
5. Mmunyi muvua Yezu udiumvua munda munda bua bantu?
5 Pa buloba, Yezu uvua munkatshi mua bantu ne wakamona nsombelu wabo mukuate luse. Mmunyi muakandamunaye ku ntatu yabo mikole? “Luse luakamukuata, bualu bavua bapungile ne batangalakangane bu mikoko idi kayiyi muyilami.” (Matayi 9:36, NW) Mikoko yoyi kayiyi mulami itu ikengeshibua bikole bitambe kudi nyama ya luonji, anu bu mutubi bua mikoko idi ne balami bapungakanyi. Kadi, Yezu wakatamba kuyikuba, bualu wakamba ne: “Vuayi kundi meme, nuenu buonso badi bakenga ne bazengele ne majitu, ne meme nennukankamije. Angatayi tshikokedi tshianyi ne nulongele kundi meme, bualu ndi mupole-malu ne mudipuekeshi mu mutshima, ne nenupete dikankamijibua bua anyima yenu. Bualu tshikokedi tshianyi ntshitekete ne bujitu buanyi mbupepele.”—Matayi 11:28-30, NW.
6. Yezu wakangata bena mitshima mizengele ne mushinga kayi?
6 Mulayi wa mu Bible wakadianjila kumanyisha se: Yezu uvua ne bua kusomba mu dinanga dionso ne bantu: “Yehowa wakangela manyi . . . bua kupolesha badi ne mitshima mizengele, . . . bua kusamba buonso badi mu madilu.” (Yeshayi 61:1, 2, NW; Luka 4:17-21) Yezu kakapepeja nansha kakese bapele ne bena dikenga to. Bishilangane, wakakumbaja bidi mu Yeshayi 42:3, [NW]: “Kakutshibula tshituta tshisunsula, ne kakujima mukaba wa muendu muenza ne lin udi ufuma ku dikenkesha.” (Fuanyikija ne Matayo 12:17-21.) Bena tunyinganyinga bavua anu bu bituta bitshibula, anu bu mikaba ya minda pabuipi ne kujima bua dijika dia mafuta. Pa kumanya nsombelu wabu mukuate luse, Yezu wakabaleja luse ne wakabapetesha bukole ne ditekemena, pa kubuondopa mu nyuma ne ku mubidi.—Matayo 4:23.
7. Nkuepi kuvua Yezu ulombola bantu bavua bamuandamune bimpe?
7 Musumba munene wa bantu bafuanangane ne mikoko bakandamuna Yezu bimpe. Dilongesha diende divua ditambe bulengele, e kufikishadi basalayi bakatumibua bua kumukuata ku diamba ne: “Muntu mukuabo nansha umue katu muanji kuakula malu bu aa to.” (Yone 7:46, NW) Ke bualu kayi, bamfumu bena malu a Nzambi bena lubombo bakadiabakena ne: “Bantu bamulondi munyima”! (Yone 12:19, NW) Kadi Yezu kavua musue butumbi anyi lumu buende nkayende to. Wakakoka ntema ya bantu kudi Tatuende. Wakabalongesha bua kusadila Nzambi pa kuikala basakibue kudi dinanga bua ngikadilu Yende ya mpatshi: “Udi ne bua kunanga Yehowa Nzambi webe ne mutshima webe mujima ne anyima webe mujima ne bukole buebe buonso ne tshieledi tshiebe tshia lungenyi tshijima.”—Luka 10:27, 28, NW.
8. Mmunyi mudi butumikidi budi tshisamba tshia Nzambi tshimuleja bushilangane ne budi bakuabo baleja bakokeshi bena mu bulongolodi ebu?
8 Yehowa udi wenda ntunku bualu bukokeshi buende bukena-mikalu badi babutua nyama ku mikolo kudi bantu badi bafuanangane ne mikoko, bushindamene pa dinanga diabo buende. Badi basungula ku budisuile bua kumusadila bualu mbamanye ngikadilu yende ya dinanga. Ndishilangana kayipu ne balombodi ba bena mu bulongolodi ebu badi babakokedi babatumikila anu bua ditshina patupu, anyi bua tshifula-muoyo anyi bua tshimue tshipatshila tshibubika! Malu aa kaena ne bua kuambibua nansha kakese bua Yehowa anyi bua Yezu anu bu bivuabo bambe bua papa wa bena ekleziya Katolike wa Roma: “Bavua bamukatshila kudi bavule, bamutshina kudi buonso, kayi munangibue kudi muntu nansha umue.”—Vicars of Christ—The Dark Side of the Papacy, kudi Peter De Rosa.
Balami ba tshikisu mu Izalele
9, 10. Akula bua bamfumu ba mu Izalele wa kale ne ba mu siekele wa kumpala.
9 Bashilangane ne Yezu, bamfumu ba malu a Nzambi mu Izalele ba mu matuku ende kabavua banange mikoko to. Bavua anu bu bamfumu ba kumpala mu Izalele bavua Nzambi muakule bualu buabo ne: “Mulawu kudi balami ba Izalele, badi balue badidiishi ba nkayabo! Ki ntshisumbu tshia mikoko tshidi balami ne bua kudiisha anyi? . . . Eyi idi isama kanuena nuyikolesha, ne eyi idi ne bubedi kanuvua bayondope, ne eyi ivua mitshibuke kanuvua bayisuike, ne eyi ivua mitangalake kanuvua bayipingaje, ne ivua mijimine kanuena baditatshisha bua kuyipeta, kadi nuakayikokesha ne muoyo mupape, eyowa ne tshikisu tshionso.”—Yehezekele 34:2-4, NW.
10 Anu bu balami abu bena malu a tshididi, bamfumu ba bena Yuda bena malu a Nzambi ba mu siekele wa kumpala bavua bena mutshima mupape. (Luka 11:47-52) Bua kuleja muanda eu, Yezu wakakula bua muena Yuda wakanyengabo bintu, kututshibua, ne kushiyibua mufue tshipuuka ku kala kua njila. Muakuidi muena Izalele wakapitshila muaba awu, kadi pakamonaye muena Yuda, wakamusesuka, yeye e kuya ku lukuabo luseke lua njila. Muena Lewi wakenza bia muomumue. Pashishe, muntu uvua kayi muena Izalele, muena Samariya mupepeja, wakapitshila pende muaba eu ne luse luakamukuata bua muntu eu muena diakabi. Wakasuika mputa yende, kumubandisha pa nyama ne kuya nende ku nzubu wa tshilala-benyi, ne wakamukuba. Wakafuta mulami wa nzubu wa tshilala-benyi ne kumuambila se: uvua ne bua kualukila bua kufuta mfranga ya pa mutu yatudibua.—Luka 10:30-37.
11, 12. (a) Mmunyi muakafika bubi bua bamfumu bena malu a Nzambi ba mu matuku a Yezu ku katongobela kabu? (b) Ndekelu wa bionso, ntshinyi tshiakenzela bena Roma bamfumu bena malu a Nzambi?
11 Batambe kubiipa bavua bamfumu bena malu a Nzambi ba mu matuku atshivua Yezu pa buloba, bualu pakabiishibua Lazaro ku lufu kudi Yezu, bamfumu ba bakuidi ne Bafarizeyi bakasangisha kabadi kakulu ka Sanhédrin ne kuamba ne: “Ntshinyi tshitudi ne bua kuenza, bualu muntu eu [Yezu] udi wenza bishima bivule? Bituamulekela utungunuka ne kuenza nunku, buonso nebamuitabuje, ne bena Roma nebalue kumbusha muaba wetu ne ditunga dietu.” (Yone 11:47, 48, NW) Kabakangata ne mushinga bimpe bionso biakenza Yezu bua muntu uvua mufue to. Bavua baditatshisha bua mianzu yabo. Nenku “bituadijile ku dituku adi bakela tshipangu bua kushipa [Yezu].”—Yone 11:53, NW.
12 Kusakidila ku bubi buabo, bamfumu ba bakuidi ndekelu wa bionso “bakela tshipangu bua kushipa Lazaro pende, bualu, anu buende yeye, bena Yuda bavule bavua bayaku ne bavua bitabuja Yezu.” (Yone 12:10, 11, NW) Madikolela abo a buiminyi avuabo benza bua kukuba mianzu yabo kaavua ne dikuatshisha nansha, bualu Yezu wakabambila ne: “Nzubu wenu nyawu munulekela.” (Matayi 23:38, NW) Mu dikumbana dia mêyi aa, mu tshipungu atshi, bena Roma bakalua ne kumbusha ‘muaba wabo ne ditunga diabo,’ bia muomumue ne mioyo yabo.
Balami bena dinanga mu tshisumbu tshia bena nkristo
13. Nnganyi uvua Yehowa mulaye bua kutuma bua kudiisha tshisumbu tshiende tshia mikoko?
13 Pamutu pa balami ba tshikisu, biiminyi, Yehowa wakajula Mulami Mulenga, Yezu, bua kukuba tshisumbu Tshiende tshia mikoko. Wakalaya kabidi bua kujula balami-bindondi bena dinanga bua kukuba mikoko: “Nenjule balami ku mutu kuayi bayidiisha bimpe; ne kayakukuatshika buôwa nansha bukese.” (Yelemiya 23:4, NW) Nenku, anu bu muvuabi mu bisumbu bia bena nkristo mu siekele wa kumpala ke mudibi kabidi lelu’eu, “ditekibua dia bakulu mu tshimenga ne mu tshimenga” didi dienjibua. (Tito 1:5, NW) Bakulu aba bena ngikadilu ya mu nyuma badi bakumbaja ngikadilu milomba idi mu Mifundu badiku bua “kudiisha tshisumbu tshia mikoko ya Nzambi.”—1 Petelo 5:2; 1 Timote 3:1-7; Tito 1:7-9.
14, 15. (a) Nngikadilu kayi wakamona balongi mukole bua kudima? (b) Ntshinyi tshiakenza Yezu bua kubaleja se: bakulu badi ne bua kuikala basadidi bena budipuekeshi?
14 Mu dikuba mikoko, bakulu badi ne bua kuikala “kupita bintu bionso” ne “dinanga divule” buayi. (1 Petelo 4:8, NW) Kadi, balongi ba Yezu baditatshishi bua mianzu ne butumbi, bavua ne bua kulongela ku malu aa. Nenku, pakambila mamuende wa balondi kampanda babidi Yezu ne: “Tuma diyi bua umue asombe ku diebe dia balume, mukuabo ku diebe dia bakaji, mu Bukalenge buebe,” biakatonda balongi bakuabo. Yezu wakabambila ne: “Nudi bamanye mudi bamfumu ba matunga bàtumina diyi dia bumfumu, kabidi mudi banene bàleja bumfumu buabo. Munkatshi muenu kabikadi nanku; kadi wa ku nuenu udi musue kuikala munene, adienze musadidi wenu; kabidi udi musue kuikala wa kumpala kunudi, adienze mupika wenu.”—Mateus 20:20-28, Mukenji Mulenga.
15 Mu tshikuabo tshikondo, kunyima kua balongi bende “bamane kuelangana mpata bua kumanya wa munkatshi muabo udi mutambe bunene,” Yezu wakabambila ne: “Bikala muntu musue bua kuikala wa kumpala, udi ne bua kuikala wa ndekelu ne musadidi wa buonso.” (Mâko 9:34, 35, NW) Budipuekeshi mu tshieledi tshia lungenyi ne kusadila ku budisuile bivua ne bua kulua tshitupa tshia bu-muntu buabo. Kadi, balongi bavu’anu ne lutatu bua kujingulula ngenyi eyi, bualu anu butuku buine abu kumpala kua Yezu kufuaye, mu didia diende dia dilolo dia ndekelu, “matandu makole” akajuka munkatshi muabo pa eu uvua ne bua kuikala mutambe bakuabo bunene! Ke muakenzekabi nansha muvua Yezu mubaleja mushindu udi bakulu ne bua kusadila tshisumbu tshia mikoko; wakadipuekesha yeye muine ne kubowesha mâyi ku makasa abo. Wakamba ne: “Bingikala meme, nansha bu mundi Mukalenge ne Mulongeshi, munuoweshe mâyi ku makasa, nudi penu ne bua kuoweshangana mâyi ku makasa umue ne mukuabo. Bualu mbanupi tshilejilu, anu bu mmumvua munuenzele, ke munudi penu ne bua kuenza.”—Luka 22:24; Yone 13:14, 15, NW.
16. Mu 1899, mmumvuija kayi akenza Tshibumba tshia Nsentedi (mu anglais) pa ngikadilu mutambe yonso bua bakulu?
16 Pa tshibidilu, Bantemu ba Yehowa mbalongeshibue se: bakulu badi ne bua kuikala nunku. Kukadi siekele bu umue, Tshibumba tshia Nsentedi tshia mu dia 1 Tshisanga 1899, tshiakatêla mêyi a Paulo adi mu 1 Kolinto 13:1-8 ne pashishe kuamba ne: “Mupostolo wakasunguluja patoke se: dimanya ne ngikadilu wa bu-ngamba malu ki mbijadiki bitambe bionso to, kadi dinanga didi dibuela mu mutshima ne disapalala mu nsombelu wonso wa muoyo, ne disaka ku dienza ne dikuata mudimu mu mubidi wetu muena kufua, ntshijadikilu tshilelela—tshijadiki tshilelela tshia malanda etu masheme ne Nzambi. . . . Ngikadilu mulombodi udi ne bua kutekemenyibua kudi muntu kayi yonso muitaba bu musadidi wa Ekleziya, bua kuenza mudimu mu malu mansantu, udi ne bua kuikala diambedi ne mmuenenu wa dinanga.” Mbijadikibua ne: bantu badi kabayi basadila ne budipuekeshi buonso ne dinanga “mbalongeshi babi, ne mbamueneka benza malu mabi kupita malu mimpe.”—1 Kolinto 8:1, NW.
17. Mmunyi mudi Bible uzangika ngikadilu idi bakulu ne bua kuikala nayi?
17 Nenku, bakulu kabena ne bua kuikala bu ‘bakalenge pa’ mikoko to. (1 Petelo 5:3) Bishilangane, badi ne bua kuikala ba-ntunga mulongo mu dilejangana “buimpe umue kudi mukuabo, baditeki ba pa muaba wa bakuabo ne dinanga dionso.” (Efeso 4:32, NW) Paulo wakazangika ne: “Nuvuale dinanga dileji luse, ne buimpe, ne budipuekeshi bua mu tshieledi tshia lungenyi, ne bupole-malu ne muoyo-mule. . . . Kadi, kupita bionso ebi, divuadikayi dinanga, bualu ntshisuikidi tshipuangane tshia buobumue.”—Kolosai 3:12-14, NW.
18. (a) Ntshilejilu kayi tshilenga tshiakashiya Paulo mu nsombelu wende ne mikoko? (b) Bua tshinyi bakulu kabena ne bua kupanga kumanya bidi mikoko ikengela?
18 Paulo wakalonga mua kuenza malu aa, pa kuamba ne: “Tudi balue bapole-malu munkatshi muenu, amu bu mudi mamu ukuba bana badiye udiisha. Nunku, bua dinanga dikole tuvua nadi kunudi, tuvua ne disanka dia kunumanyisha, ki ng’amu lumu luimpe lua Nzambi, kadi ne anyima yetu popamue, bualu nuakalua banangibue betu.” (1 Tesalonike 2:7, 8, NW) Mu diumvuangana ne malu awu, wakamba ne: “Nukankamije anyima idi isama, nukoleshe bena butekete, ikalayi ne muoyo-mule kudi buonso.” (1 Tesalonike 5:14, NW) Ni mbualu kayi buonso budi mikoko ne bua kubatuadila, bakulu badi ne bua kuvuluka Nsumuinu 21:13, NW: “Bua yonso udi ujibika matshi ende ku lubila lua kudiabakena lua mukese, yeye pende neabikile ne kabakumuandamuna to.”
19. Bua tshinyi bakulu bena dinanga badi dibenesha, ne mmunyi mudi mikoko yandamuna ku dinanga dia mushindu’eu?
19 Bakulu badi badiisha tshisumbu tshia mikoko ne dinanga dionso badi dibenesha kudi mikoko. Yeshaya 32:2 wakadianjila kumanyisha ne: “Muntu neikale bu tshisokomenu ku tshihehele, ne tshinyemenu tshia ku tshihuhu, neikale bu misulu ya mai mu muaba mûme, bu dileshi dia dibue dinene mu buloba budi butondesha bantu.” Tudi ne disanka bua kumanya se: bavule ba ku bakulu betu lelu’eu badi benza malu mu diumvuangana ne malu a dipoleshangana adi maleja mu mvese eu. Mbalonge mua kutumikila dîyi-diludiki didi dilonda edi: “Mu dilejangana dinanga dia buena-muntu nuikale ne disuangana dia buena-muntu umue kudi mukuabo. Ikalayi ba-ntunga mulongo mu dilejangana kanemu.” (Lomo 12:10, NW) Padi bakulu baleja dinanga ne budipuekeshi bia mushindu’eu, mikoko idi yandamuna pa kubaleja “kanemu ka pa buaku mu dinanga bua mudimu wabo.”—1 Tesalonike 5:12, 13, NW.
Nemekayi budikadidi bua kudisunguila
20. Bua tshinyi bakulu badi ne bua kunemeka budikadidi bua kudisunguila?
20 Yehowa wakafuka bantu ne budikadidi bua kudisunguila. Nansha padi bakulu bafila mibelu anyi bafila dinyoka, kabena ne bua kuikala ne bukokeshi pa mioyo anyi ditabuja bia mukuabo nansha. Paulo wakamba ne: “Ki mmumue ne: tudi ne bukokeshi pa ditabuja dienu to, kadi tudi benzejanganyi nenu ba mudimu bua disanka dienu, bualu nudi bimane anu bua ditabuja dienu.” (2 Kolinto 1:24, NW) Eyowa, “muntu ne muntu neadiambuile dibuki diende nkayende.” (Galatia 6:5, NW) Yehowa mmutupe budikadidi buvule mu mikalu ya mikenji yende ne mêyi-maludiki ende. Nenku, bakulu badi ne bua kuepuka bua kuteka mikenji muaba udi mêyi-maludiki a mu Mifundu kaayi matupibue. Ne badi ne bua kukandamena dinyikibua ku dijinga kayi dionso dia kufila yabo mmuenenu bu dilongesha dia nshindamenu anyi kubuejakaja budinangi buabo bikala muntu kampanda kayi wanyisha mmuenenu ya mushindu’eu.—2 Kolinto 3:17; 1 Petelo 2:16.
21. Ntshinyi tshitudi mua kulongela ku ngikadilu uvua nende Paulo kudi Filemon?
21 Tangila mushindu uvua Paulo, nansha pavuaye muedibue mu buloko ku Roma wangata Filemon, muena nkristo uvua ne wende mupika ku Kolosai mu Azi Minere. Mupika wa Filemon uvua ubikidibua ne: Onezime wakanyema ku Roma, yeye e kulua muena nkristo, ne kuditua mu diambuluisha Paulo. Paulo wakafundila Filemon ne: “Mvua musue kumulama pabuipi nanyi bua angambuluishe pamutu pebe, mu nkanu ya lumu luimpe. Kadi, tshivua musue kuenza bualu tshiyi mukuebeje, bua kuenji bilenga ku makolela, wenze amu ku disua diebe.” (Filemona 13, 14, NW) Paulo wakapingaja Onezime ne kulomba Filemon bua kumuangataye bu muanabo muena nkristo. Paulo uvua mumanye se: tshisumbu tshia mikoko katshivua tshiende to; tshivua tshia Nzambi. Kavua mfumuatshi to, apo uvua mutshisadidi. Paulo kakenzeja Filemon malu ku bukole to; wakanemeka budikadidi bua disua diende.
22. (a) Mmushindu kayi udi bakulu ne bua kuangata muaba wabo? (b) Mbulongolodi bua mushindu kayi budi Yehowa wenda udiundisha?
22 Bu mudi bulongolodi bua Nzambi buenda budiunda, badi bateka bakulu bavule pa midimu. Buobo aba ne bakulu bakadi bamonamona malu, badi ne bua kumanya se: muaba wabo ng’wa kusadila ne budipuekeshi. Mu mushindu eu, bu mudi Nzambi utangija bulongolodi buende ku bulongolodi bupiabupia, nebutungunuke ne kudiunda anu bu mudiye usua—bulongolola bimpe kadi kabuyi bushiya dinanga ne luse kunyima bua dizanzamuka to. Nenku, bulongolodi buende nebulengelele ku kakese ku kakese bantu badi bafuanangane ne mikoko bamonamu tshijadiki tshia se: “Nzambi udi usangisha midimu yende yonso bua kueleshanganayi diboko bua bimpe bia aba badi bananga Nzambi.” Ebi ke bidi bitekemenyibua kudi bulongolodi buashila pa dinanga, bualu “dinanga kadiakujika to.”—Lomo 8:28, NW; 1 Kolinto 13:8, NW.
Mmunyi muudi mua kuandamuna?
◻ Mmunyi mudi Bible umvuija dikuba dia Yehowa bua tshisamba tshiende?
◻ Mmudimu kayi udi Yezu nawu mu dikuba tshisumbu tshia mikoko ya Nzambi?
◻ Nngikadilu kayi mutambe bunene udi bakulu ne bua kuikala nende?
◻ Bua tshinyi bakulu badi ne bua kuangata ne mushinga budikadidi bua kudisunguila bua mikoko?
[Tshimfuanyi mu dibeji 16]
Yezu, “mulami mulenga,” wakaleja luse
[Bimfuanyi mu dibeji 17]
Bamfumu bena malu a Nzambi babi bakela tshipangu bua kushipa Yezu