Bantemu ba Yehowa pa buloba bujima: Pologne

MU MUVU wa automne wa 1989, mbulamatadi ya ba-koministe kumbukila ku Mbuu wa Baltike too ne ku Mbuu Mufike yakatuadija kushimbuka. Bu muvua mukalu uvua utapulula matunga a ku Mputu wa ku Weste ne wa ku Este wenda ubumbudibua, matunga a ku Mputu wa ku Este akatuadija kukeba budikadidi buawu bua kudienzela malu. Munkatshi muawu muvua ditunga dia Pologne, ditunga dia tukunakuna tutentakanangane, mpata mibasame, ne mikuna midindamane.a

Bena ditunga dia Pologne mbeji ba mudimu ba kalanda musenga, ne ditunga dia Pologne ndimane kupatula bazodi ne bashikuluji benda lumu pa buloba bujima. Kadi, kupita bionso abi, kudi mpindieu musumba udi wenda udiunda wa bamanyishi ba lumu luimpe lua Bukalenge bua Nzambi.

Ne dikima mu diela dishima patoke

Mu ditunga dia Pologne mudi bantu ba bungi badi basua kulonga bulelela bua mu Bible. Kadi bakuabo mbatekesha mu mikolo kudi balela babo anyi bena mutumba nabo. Tshilejilu, pabuipi ne Wrocław, mukaji kampanda musankididi wa bulelela wakalekela kulonga Bible ne Bantemu ba Yehowa pakamufimpakaja dîku diende ne balunda bende. Kadi, muanende wa bakaji wa bidimu dikumi ne bia mu njila wakabala mulongolongo wa biena-bualu bia Tshibumba tshia Nsentedi bidi biela ntendelelu wa dishima patoke. Biena-bualu ebi biakamusaka ku disankidila bulelela.

Kunyima kua ngondo isambombo ya dilonga dia Bible, nsongakaji eu wakangata dipangadika dia kukosa bisuikidi biende ne ntendelelu wa dishima. Wakakumbula mfumu wa Ekleziya wende bua kumumanyisha dipangadika diende. Wakamulomba bua kufundaye ne: “Meme, K​——​ P​——, ngabengi ditabuja dia ekleziya Katolike.”

Mu dia lumingu diakalonda, dimanyisha edi diakabadibua mu Ekleziya. Kaku-mulume muledi wa mamuende wa nsongakaji eu wakafua tshipuka, ne kakuende mukaji wakatudika ne muadi. Kadi, bena parwase bakuabo bakalengibua ku muoyo ne kuambabu ne: “Ndekelu wa bionso, muntu kampanda wapetshi dikima dia bungi bua kuamba ne: mu Ekleziya wetu mudi dishima dia bungi.” Nsongakaji eu wa dikima udi mpindieu muanetu wa bakaji wa mu nyuma mubatiza ne mmumane kutuadija kulombola malonga muanda-mutekete a Bible mu musoko wende.

‘Ku mamuma abo’

Tshikandakanda tshia ku lubingu tshia Kujawy i Pomorze tshiakapatula tshiena-bualu “Nenubajingulule ku mamuma abo.” Muaba kampanda, tshiena-bualu etshi tshiakamba ne: batendeledi ba Bukua-buena-nkristo “bulelela kabatu menemene banemeka mêyi-maludiki a malu a Nzambi adibo bitabuje to. Kudi dishilangana dinene pankatshi pa batendeledi ba Bukua-buena-nkristo ne Bantemu ba Yehowa badi benza malu mu diumvuangana ne bidibo bamanyisha, ne badi bamanyisha tshidi Bible utuma dîyi.”

Kunyima kua tshimane kuleja dishilangana didi pankatshi pa Bantemu ne aba badi bena nkristo anu ku dîna, tshiena-bualu etshi tshiakatungunuka ne: “Bena nkristo anu ku dîna pamu’apa ki mbatambe kumanya to, ne kupita apu misangu ya bungi kabatu benza midimu ne malelela ne mêyi-maludiki bia nshindamenu bia ditabuja diabo to. . . . Ku mmuenenu wabo, Bantemu ba Yehowa badi baleja diumvuangana pankatshi pa mêyi ne bienzedi biabo, pa nunku badi bajadika ne: kabena ‘baprofete ba dishima,’ bishilangane, badi mua kujinguludibua ku mamuma abo. ‘Nansha musangu umue bantu kabena mua kupola tumuma tua mvinyo ku mêba peshi mfigi ku mingonga, ki mmuomu anyi?’ (Matayo 7:15-20).”

Mukaji kampanda wakatumina tshikandakanda tshia ku lubingu tshia Przyjaciółka mukanda, muikale udiabakena ne: muanende wa balume wakumbuka mu ekleziya Katolike ne kuvuaye umue wa ku Bantemu ba Yehowa. Mubelu kayi wakamubela mukaji mulombodi wa tshikandakanda etshi? “Bikala muanebe wa balume: mufike ku didisangisha ne Bantemu ba Yehowa, mulonge ne muitabuje ditabuja diabo, ndipangadika diende nkayende dijima, didi ne bua kuanyishibua ne kunemekibua. . . . Tshisumbu etshi tshia malu a Nzambi tshidi tshidisunguluja ku ngikadilu milenga ne mimpe bua nsangilu wa bantu, bu mudi diambuluishangana dia pa buadi ne bisuikidi biondoke bia disuangana, bujalame ne dilamata ku mikenji ya nsangilu wa bantu biabo, ne ndekelu wa bionso, bukokeshi budibo nabu bua kuikala ne nsombelu udi mu diumvuangana ne bulelela buabo, pa kukumbaja mu bienzedi malu manyisha kudi buonso bu mimpe. Eyeyi nngikadilu milenga ya mushinga mukole.”

[Mêyi adi kuinshi]

[Kazubu mu dibeji 9]

NSOMBELU WA DITUNGA

Tshidimu tshia mudimu 1993

BUNGI BUBANDILE BUA BAMANYISHI: 113 551

MUAYENE: Ntemu 1 bua bantu 339

BAKABUELA MU TSHIVULUKILU: 235 642

MUAYENE WA BAMPANDA-NJILA: 7 961

MUAYENE WA MALONGA A BIBLE: 79 131

BUNGI BUA BABATIZA: 8 164

BUNGI BUA BISUMBU: 1 397

BIRO BIA FILIALE: Nadarzyn

[Tshimfuanyi mu dibeji 9]

Biro bia filiale wa ku Pologne ku Lodz mu 1948

[Tshimfuanyi mu dibeji 9]

Mudimu ne mabaya mafunda, Kabalashipu 1948, Prussie wa kale wa ku Este

[Tshimfuanyi mu dibeji 9]

Bena dîku dia Betele wa Pologne 72, Tshiongo 1993

[Tshimfuanyi mu dibeji 9]

Filiale mupiamupia ku Nadarzyn