Bantemu ba Yehowa pa buloba bujima: Porto Rico

PANKATSHI pa Mbuu wa Caraïbe ne Mbuu wa Atlantike padi tshidiila tshia mpatshi, tshia luya tshia Porto Rico. Christophe Colomb wakalomba bua kuikalatshi teritware wa ditunga dia Espagne mu 1493 ne kutshinyikaye dîna dia San Juan Bautista bua kuvuluka Yone Mubatiji. Tshimenga tshiatshi tshitambe bualabale bakatshibikila bua tshikondo tshile Porto Rico, anyi “Dibungu dibanji.” Kunyima, tshidiila tshijima tshiakalua kubikidibua ku dîna edi, pakaluabu kubikila tshimenga bu San Juan.

Porto Rico wadijadiki mudiye dibungu dibanji mu malu kabukabu. Ngolo wa bungi uvua utumibua kumbukilamu mu bidimu bia kumpala bia bukokeshi bua ditunga dia Espagne. Tshidiila tshidi mpindieu tshisumbisha ku matunga menyi mienge, kafé, makonde, ne madima, nansha mudi biapu ne midimu mikese ya mu matanda bipatula tshitupa tshinene tshia biuma lelu’eu. Pabi, Porto Rico wadijadiki mudiye dibungu dibanji mu ngumvuilu wa mushinga mupite bukole.

Lumu luimpe lua Bukalenge bua Nzambi luakatuadija kumanyishibua munemu mu bidimu bia 1930. Lelu’eu, kudi bamanyishi ba lumu luimpe bapite pa 25 000 mu Porto Rico. Mu 1993 tshisumbu tshia bena mudimu ba filiale eu wa Société Watch Tower ntshidiunde kumbukila ku 23 kupitatshi too ne 100. Didiunda edi divua ne mushinga bua kupetesha filiale mushindu wa kutangila dikudimuna dia mikanda miumvuiji ya Bible mu tshiena-Espagne, pa kupetesha bakudi 350 000 000 ba tshiena-Espagne badi pa buloba bujima mushindu wa kupeta mikanda ya mushindu’eu.

Budimi bupiabupia

Biro bia filiale bidi kabidi bilonda ne: “Budimi bupiabupia mbunzuludibue mu Porto Rico bualu tuvua tuenza madikolela bua kutuadila bena mapàpà mukenji wa Bukalenge. Muanetu kampanda wa bakaji udi ulonda bualu bumona ebu: ‘Mvua ntumika munkatshi mua bena mapàpà ne ngakakumbula mukaji kampanda uvua ne bana babidi batekete. Pakajingululaye ne: mvua Ntemu, wakampidia diakamue bualu bayende, uvua pende muena mapàpà, kavua munange Bantemu ba Yehowa to.

“‘Ngondo mikese kunyima mukaji umue umue eu wakakumbula mulunda wende uvua ulonga Bible ne Bantemu. Wakaditua mu dilonga edi ne diakamusankisha bikole. Ngakakumbula mukaji eu tshiakabidi, ne wakambulula ne: bayende kavua munange Bantemu aba to. Kadi, mukaji uvua ujinga bua kumvua Bible ne Ekleziya wende ukavua mumutonde bualu kabavua balongesha Bible to. Tuakatuadija kulonga, pa kutumika ne trakte. Dimue edi wakandomba bua kupinganuna mu Disambombo bualu bayende uvua mua kuikalaku. “Kadi katu mutunange to, ki mmuomu anyi?” ke mungakebeja. Wakandamuna ne: “Mmusue bua kujingulula menemene tshidi Bantemu ba Yehowa balongesha.”

“‘Dituku diakalonda bubidi buabu bakakokola ku tshîbi tshianyi! Bu muvua mulume ne nkonko ya bungi, ngakabalomba bua kuya ku bisangilu bietu bua bena mapàpà. Mulume wakakufika kumpala kuanyi ne katshia dituku adi katu upumbisha tshisangilu nansha tshimue. Udi umanyisha kudi bakuabu bena mapàpà, wakabuela mu mpuilu umue, ne udi ne diluijakana dionso muindile batismo.’”

Luapolo lua filiale ludi lutungunuka ne: “Ku mpuilu wetu wa distrike tshidimu etshi, programe mujima uvua mulejibua mu ngakuilu wa bimanyinu, nunku bena mapàpà ba bungi bavuamu ne mêku abu. Tshikondo tshia mpampakenu mikole tshiakalua dîba dia muyuki wa ndekelu pavua ngamba-malu wakula bua mudimu udi wenda wenjibua munkatshi mua bena mapàpà ne kuamba ne: bena mapàpà pabuipi ne 70 bavuamu. Kuvua dituta dikole dia bikashi, kadi, anu bu muakaleja ngamba-malu, bena mapàpà kabavua mua kudiumvua to. Nunku ke kulombaye bena mapàpà bua kutangila bateleji, ngamba-malu e kuambulula lukonko, ‘Nudiku ne disanka bua kuikala ne bana benu bena mapàpà munemu anyi?’ ne kulombaye bateleji bua kuelabu bikashi pa kukupa bianza bionso bibidi. Bivua bualu bua kukatshila bua kumona bana betu ba balume ne ba bakaji 11 000 bela bikashi​—pa kukupa bianza biabu. Bana betu ba balume ne ba bakaji bena mapàpà bakatshionkomoka ne bakadiumvua ne: bavua tshitupa tshia bu-wetu bunene. Bavule bakapuekesha binsonji bia disanka.”

Bu mudi Bantemu ba Yehowa badifile mu mudimu wa dinowa mu Porto Rico, kakuyi mpata tshidiila etshi netshitungunuke ne kuikala dibungu dibanji. “Mikoko” ya Nzambi, idiye ubikila bu “bintu bilengele bia mu matunga wonso,” neyitungunuke ne kulua, bua nunku nzubu wa Yehowa mmuuja ne butumbi.​—Yone 10:16; Hagai 2:7, NW.

[Kazubu mu dibeji 9]

NSOMBELU WA DITUNGA

Tshidimu tshia mudimu 1994

BUNGI BUBANDILE BUA BAMANYISHI: 25 428

MUAYENE: Ntemu 1 bua bantu 139

BAKABUELA MU TSHIVULUKILU: 60 252

MUAYENE WA BAMPANDA-NJILA: 2 329

MUAYENE WA MALONGA A BIBLE: 19 012

BUNGI BUA BABATIZA: 919

BUNGI BUA BISUMBU: 312

BIRO BIA FILIALE: GUAYNABO