Bamanyishi ba Bukalenge badi balonda

Difika ku misoko mikese ya Groënland

MUNKATSHI mua makumi mavule a bidimu Bantemu ba Yehowa mbatumike ne bibejibeji bia Tshibumba tshia Nsentedi ne Réveillez-vous! mu buambi bua lumu luimpe. Bikandakanda ebi bidi bizangika meji a Yehowa anu bu mudiwu mazangika mu Bible, Dîyi diende. Mbitungunuke ne kutentekela malu a bulongolodi ebu adi akumbaja milayi ya mu Bible, ne pa bidi bitangila ntatu ya lelu’eu bidi bitumika ne mibelu ya meji ya mu Bible.​—Yakobo 3:17.

Mu 1994, Bantemu mu Groënland bakenza madikolela a pa buawu bua kufila Tshibumba tshia Nsentedi ne Réveillez-vous! kudi bantu bavulavulayi. Munkatshi mua muvu wa été, bakadilongolola bua kukumbula imue ya ku misoko mikese ya kulekule mu Groënland. Tshisumbu tshia bamanyishi ba Bukalenge tshiakenza luendu lua kilometre mipite pa 4 000 ne buatu batangile ku muelelu wa ku Ouest ku Qaanaaq (Thule), kufika too ne ku bimue binsanga bidi ku Nord menemene wa dibulunge-buloba. Luendu luabu luakanenga mbingu muanda-mutekete. Ku muelelu wa ku Est, bena dibaka babidi Bantemu bakafika too ne ku musoko mukese wa It-toq-qor-toor-miit ne bua musangu wa kumpala bakawukumbula wonso mujima mu mushindu mulongolola pa kumanyisha lumu luimpe.

Ku ntuadijilu wa tshidimu atshi, mu ngondo wa Tshisanga, bakashila bena Groënland bibejibeji 7 513 bia Tshibumba tshia Nsentedi ne Réveillez-vous!. Abi bidi biumvuija ne: muayene wa bungi bua bibejibeji bifila kudi yonso wa ku bamanyishi ba Bukalenge 127 uvua wa 59​—tshibejibeji 1 bua basombi 7 kayi buonso. Ngondo awu, Réveillez-vous! wakazangika mulongolongo wa tubiena-bualu muinshi mua mutu wa bualu wa tshizubu wa “Kansere ka dibele​—Ditshina dia mukaji yonso.” Ntemu umue, wakafila bibejibeji 140, wakashila kamona-kamba kampanda wa televizion bibejibeji bia Réveillez-vous! awu. Matuku makese kunyima, programe kampanda wa ngumu ku televizion wakazangika biena-bualu bia kansere ka dibele. Kamona-kamba eu wakaleja tshibejibeji etshi ku televizion, pa kuleja mabeji mavule eku usamuna bulenga bua nkudimuinu [watshi] mu tshiena-Groënland. Wakazangika kabidi mibelu mimpe mifila kudi Réveillez-vous! bu mushindu wa kuepuka disama edi.

Ntemu wakafila bua musangu wa kumpala bibejibeji ebi kudi kamona-kamba eu wakedibua nkonko dîba dia programe umue umue eu ku televizion. Wakandamuna nkonko mikese pa Bantemu ba Yehowa ne wakakula pa bidi bitangila diabanyibua dialabale dia bibejibeji ebi ngondo awu. Wakafila kabidi mumvuija pa meji makuatshishi adi asanganyibua mu Bible ne kuleja se: mibelu ya meji ya mushindu’eu idi mua kutuambuluisha bua kuakama ntatu ya lelu’eu.

Programe wakakomeshibua ne nkonko miela mulombodi wa Société wa Groënland wa mianda ya Kansere. Wakamanyisha ne: kavua muanji kumona mukanda mulenga ne wa mamanyisha mavule pa tshiena-bualu etshi mu muakulu wende. Pashishe wakalomba buonso bavua basua kumanya bivule pa disama dia kansere ka dibele bua kubala biena-bualu bia Réveillez-vous!. Wakamba ne: kuvua kabingila kimpe bua kuikala ne dianyisha kudi Bantemu ba Yehowa bua tshiidia tshiabu tshibanjiji.

Anu bu mu Groënland, Bantemu ba Yehowa pa buloba bujima mbatungunuke ne kumanyisha lumu luimpe “mu bifukibua bionso bidi muinshi mua diulu.” (Kolosai 1:23, NW; Bienzedi 1:8) Ku diambuluisha dia mikanda miumvuiji ya Bible, idi ikonga Tshibumba tshia Nsentedi ne Réveillez-vous!, badi bambuluisha bantu ba mishindu yonso bua kuakama ntatu ya matuku adi panshi aa, badi bia muomumue babapetesha ditekemena bua matuku malenga atshilualua.

[Karte mu dibeji 8]

(Bua kumona malu bimpe, tangila mu mukanda)

Qaanaaq (Thule)

Ittoqqortoormiit

Nuuk (Godthåb)