Njila mufimpakane udi ufikisha ku budikadidi

BENA meji bakese batu belangana mpata se: bukua-bifukibua mbulombola kudi mikenji ya ku tshifukilu. Mikenji eyi idi ilombola tshintu tshionso kumbukila ku atome mitambe bukese too ne ku galaksi minenanenayi mienza ne miliyare ya mitoto. Bu biobi kabiyi nunku, kakuvua mua kuikala dilongolola ne lumvuilu, muoyo muine kawuvua mua kuikalaku. Pa kumvua mikenji ya ku tshifukilu ne pa kutumika nayi, muntu mmupete mushindu wa kuenza malu a mponono a kukatshila, bu mudi diya kuenda ku ngondo ne dimuangalaja bimfuanyi bia mêkala kumbukila ku muaba kayi wonso pa buloba anyi nansha kumbukila ku muaba udi pamutu pa mupimbu wa kapepe udi ku mpenge kua buloba pa kubileja ku televizion mu nzubu yetu.

Kadi netuambe tshinyi bua mikenji pa nsombelu wa tshitembu? Diyilamata didi dipatula bipeta bimpe ne dikuama mamuma anyi? Mbimueneke se: bavule badi bamona ne: kakuena mikenji pa nsombelu wa tshitembu ne badi basungula nkindi idi ibingisha malu mabi anyi ntendelelu udi mulengelele majinga abu nkayabu.

Kadi, kudi bakuabu, badi basungula njila mukuabu, ‘njila mufimpakane udi ufikisha ku muoyo’ udi Bible muzangike. Kabiena mua kutukemesha pa kumona se: ndisungula dia bantu bakese patupu, bualu Yezu wakamba bua njila mufimpakane ne: “Bakese ke badi bamupeta.” (Matayo 7:14, NW) Anu bakese bua tshinyi?

Bualu njila mufimpakane mmuelela mikalu kudi mikenji ne mêyi-maludiki bia Nzambi. Mmulengelele anu eu udi ne mutshima mujima usua bua nsombelu wende ikale mu diumvuangana ne mêyi-makulu a Nzambi. Bishilangane menemene ne njila munene, udi upetesha budikadidi bua tshidingishilu kadi udi bua kuamba bulelela uvuija bantu bapika, njila mufimpakane, udi umueneka bu udi welelangana mikalu, udi upikula bantu mu malu wonso a mushinga. Mikalu yende miela kudi “mukenji mupuangane wa budikadidi.”​—Yakobo 1:25, NW.

Mudi njila mufimpakane upikula

Bushuwa, kabitu misangu yonso bipepele bua kushala mu njila mufimpakane. Muntu yonso udi ne muoyo mmupange bupuangane ne udi ne dinyikibua dia lungenyi dipiana ku dienza bubi. Nunku muntu udi mua kuikala muinyikibue ku dipambuka kakese. Pabi, bipeta bimpe bia ku dilamata ‘njila mubulakane’ mbiakanyine didikanda kayi dionso ne madiakaja bidi bikengedibua, bualu Nzambi ‘udi utulongesha bua tuikale ne diakalenga.’​—Yeshaya 48:17; Lomo 3:23.

Tshilejilu: Mu malu a ndiilu baledi ba meji mbalongoluele bana babu ‘njila mubulakane.’ Ebi bidi imue misangu bilomba kuikala ne dîsu dikole dîba dia kudia. Kadi pakola bana, nebanyishe mushinga wa mibelu ya dinanga ya baledi babu. Ku bukulumpe, nebanange biakudia bifidi bia makanda. Ne dibodiama dia biakudia bidi ne bidiishi nedikande nyanji yabu ya didiumvua belela mikalu.

Mu malu a mu nyuma, Nzambi udi wenza bia muomumue ne aba badi mu njila mufimpakane udi ufikisha ku muoyo. Udi udima munda mua badipuekeshi majinga mimpe adi apetesha disanka ne budikadidi bulelela. Ebi udi ubienza pa kupetesha Dîyi diende, Bible. Kupita apu, udi utulomba bua kusambila bua spiritu wende atuambuluishe, ne udi ututumina dîyi bua kushemesha malanda ne bena nkristo netu, badi mua kutukankamija bua kushala mu njila mufimpakane. (Ebelu 10:24, 25) Bushuwa, Nzambi udi dinanga, ne ngikadilu eu mupite yonso udi nshindamenu wa bipatshila biende ne ngenzelu yende yonso.​—1 Yone 4:8.

Padiku dinanga, ditalala, bulenga, didikanda, ne mamuma makuabu a spiritu, njila mufimpakane kêna umueneka bu udi welelangana mikalu. Anu bu mudi mvese eu wamba, “kakuena mukenji udi ukandika malu bu nunku.” (Galatia 5:22, 23, NW) “Muaba udi spiritu wa Yehowa, ke udi budikadidi.” (2 Kolinto 3:17, NW) Nansha mpindieu, bena nkristo balelela badi balabula ka-diosha ka budikadidi ebu. Mbapikudibue ku mishindu mivule ya ditshina divule didi nadi bantu lelu’eu, bu mudi ditshina dia matuku atshilualua ne ditshina dia bitabataba dia lufu. Ndisankapu kayi bua kutekemena matuku atshilualua pikala ‘buloba buujibue tente ne dimanya dia Yehowa anu bu mudi mâyi abuikila mbuu’! (Yeshaya 11:9, NW) Nunku, nansha ditshina dia dibunda dia bibawu kadiakuikalaku kabidi. Bikuvu ne milonda ya biamu nebivulaminyibue kashidi. Buonso nebadiumvue badikadile ne bakubibue​—butuku ne munya, ku nzubu ne kule ne nzubu. Abu nebuikale budikadidi bushuwa!

Tudi ne dijadika pa bidi bitangila diambuluisha dia Nzambi

Bushuwa, kuikala ne nsombelu udi mu diumvuangana ne mêyi-makulu a Nzambi kudi kulomba madikolela, kadi “mêyi-maludiki ende kaena bujitu,” nansha bua bantu bapange bupuangane. (1 Yone 5:3, NW) Patudi tuibidilangana ne njila mufimpakane ne tumvua bipeta bimpe bia dimuendela, tudi tudima muengu udi wenda udiunda bua bienzedi ne ngelelu wa meji bia aba badi mu njila munene. (Musambu wa 97:10) Kutumikila mikenji ya Nzambi kudi kulengelela kuondo ketu ka muoyo katupa kudi Nzambi. Pamutu pa “kanyinganyinga ka mutshima” ne “dinyanguka dia tshieledi tshia lungenyi” bidi bavule nabi, Nzambi udi ulaya ne: “Monayi! basadidi banyi nebele mbila ya disanka bua ngikadilu muimpe wa mutshima wabu.” Bushuwa, mutshima mulongesha kudi Yehowa udi wa disanka ne mmudikadile.​—Yeshaya 65:14, NW.

Yezu wakafua bua kutupetesha budikadidi bulelela. Bible udi wamba ne: “Nzambi wakananga bantu bikole e kubapa Muanende umu’epele bua muntu yonso udi wenza midimu ya ditabuja kudiye kabutudibu, kadi apete muoyo wa kashidi.” (Yone 3:16, NW) Mpindieu, bu mudiye Mukalenge wa Bukalenge bua mu diulu bua Nzambi, Yezu udi upetesha masanka a ku mulambu awu. Katupa kîpi kunyima kua “dikenga dinene,” pabutudibua njila munene ne aba badimu, neatuadije kulombola ne lutulu luonso bukua-bantu butumikidi mu tshitupa tshidi tshishale tshia njila mufimpakane too ne ku ndekelu wende, bupuangane bua bantu. (Buakabuluibua 7:14-17; Matayo 24:21, 29-31) Ndekelu wa bionso netumone dikumbana dia dilaya dinene edi: “Bifukibua pabi nebipikudibue ku bupika bua dinyanguka bua kusankabi ne budikadidi bua butumbi bua bana ba Nzambi.” Kakuena tshintu tshidi mua kupita budikadidi ebu bupetesha kudi Nzambi. Nansha lufu nelumbushibue.​—Lomo 8:21, NW; Buakabuluibua 21:3, 4.

Pa kumona ne kujingulula patoke muaba udi njila mufimpakane ufikisha, muntu udi upeta mushindu muakane bua kusungula njila eu ne kutungunuka ne kuendelamu. Bansonga badi nangananga bambuluishibua bua kabikadi bena lumonu luîpi ne bua kabateki tshiji bua tshidibu bangata bu mikalu mibelela kudi mêyi-makulu a Nzambi. Badi bafika ku dibimona bu tshijadiki tshia dinanga dia Nzambi ne bu dikubibua ku mibi ya njila munene. (Ebelu 12:5, 6) Bushuwa, muntu udi ne bua kuikala ne lutulu, pa kuvuluka se: bidi bikengela lupolo lua tshikondo bua kudima ngikadilu ne majinga bia buena Nzambi, anu bu mudibi bikengela lupolo lua tshikondo bua mutshi kukuamawu mamuma mimpe. Kadi mutshi neukuame biadimibuawu ne biawumiaminabu mâyi.

Nunku longa Dîyi dia Nzambi, shemesha malanda ne bena nkristo bakuabu, ne ‘usambile anu kusambila’ bua kupeta spiritu munsantu. (1 Tesalonike 5:17, NW) Eyemena Nzambi bua akuambuluishe mu ‘dilulamija tujila tuebe.’ (Nsumuinu 3:5, 6, NW) Kadi bionso ebi bidi ne dikuatshisha anyi? Bidi bulelela bipatula bipeta bimpe anyi? Bushuwa, biakapatula bipeta bimpe bua Tom ne bua Mary, bavua batedibue mu tshiena-bualu tshishale.

Bakalekela kuendela mu njila munene

Tom udi ufunda ne: “Munkatshi mua bidimu bia 70, tuakapetangana ne Bantemu ba Yehowa pakakumbula umue wa kudibu nzubu wetu. Diyukidilangana diakafikisha ku dilonga dia Bible. Ku kakese ku kakese ngakatuadija kukezula nsombelu wanyi. Ngakatambula mu 1982 ne ndi mpindieu nsadila mu tshisumbu tshia muaba undi. Muanetu mulela wa balume mmutambule pende mpindieu. Ndi ngela mukajanyi tuasakidila bua dindeja muoyo-mule munkatshi mua bidimu bionso abi kumpala kua meme kulonga bulelela. Ne kupita bionso ndi ngela Yehowa ne Muanende, Kristo Yezu tuasakidila, bua bionso bidibu batupeteshe ne bua ditekemena ditudi nadi mpindieu bua matuku atshilualua.”

Ne netuambe tshinyi bua Mary? Ee, wakadiumvua ne: Nzambi kavua mua kumufuila luse, kadi wakajinga bua kulonga pa bidi bimutangila bua diakalenga dia bana bende. Pakumvuaye ne: Bantemu ba Yehowa bavua balongesha muena mutumba nende Bible, wakalomba pende diambuluisha. Kadi, bibidilu biende bibi biela miji biakavuija dilubuluka bualu bukole. Dilonga divua katupa dilubuluka ne katupa dipingana tshia-nyima. Kadi, muanende mutekete wa bakaji wa bidimu muanda-mutekete wakatungunuka ne kumukankamija. “Kulekedi to, mamu. Udi mua kudijikija!” ke muvuaye wamba. Bua nunku Mary uvua uvudija madikolela.

Pakapingana bayende ukena mumanya kudi mbulamatadi ku mbelu, uvua pende utumika bibi ne bintu bia lulengu, wakaditua pende mu dilonga. Ndekelu wa bionso buonso buabu bakatshimuna bilele biabu bibi. Pashishe, kunyima kua kufundisha dibaka diabu mu mikanda ya mbulamatadi ne kutambula batismo, bakalabula disanka dinene ne bakadiumvua bu dîku dilelela bua musangu wa kumpala. Bia dibungama, ndekelu wa bionso disama dia SIDA diakashipa Mary, kadi wakafua ne mutshima wende mujalamija pa dilaya dia mu Bible dia dibiishibua ku lufu ne muoyo mu mparadizu pa buloba, bukena bukoya nansha bukese bua njila munene wa njiwu.

Eyowa, kudi mushindu wa kumbuka mu njila munene ne mualabale udi ufikisha ku kabutu. Kristo Yezu wakamba ne: “Etshi tshidi tshiumvuija muoyo wa kashidi: balonge mua kukumanya, wewe, Nzambi umu’epele mulelela, ne eu uwudi mutume, Yezu Kristo.” (Yone 17:3, NW) Nunku, bua tshinyi kubenga kuangata dipangadika dia kuendela mu njila mufimpakane udi ufikisha ku muoyo? Pa kuvuluka ne kutumikila tshiudi ulonga mu Dîyi dia Nzambi, udi mua kudimuenena dikumbana dia dilaya edi dia mu Bible didi dilenga ku mutshima: “Nenumanye bulelela ne bulelela nebunupikule.”​—Yone 8:32, NW.