Bantemu ba Yehowa pa buloba bujima: Inde

INDE! Muntu 1 pa 6 buonso badi pa buloba mmusombele mu ka-kontinan kalabale aka. Pa kusangisha yonso, badi bakula mu ditunga edi dia bantu bashilashilangane miakulu minene ne mikese mipite pa 1 000. Bantu ba bungi mbena Hindu, bantu 83 pa lukama ba kudibu, eku bantu 11 pa lukama ba-Mizilma, ne ba-Sikh, bena Buddha, ba-Jain, ne bena nkristo ku dîna badi benza tshitupa tshidi tshishala.

Bantemu ba Yehowa mbalue kupeta dilubuluka dikole mu Inde bidimu bishala ebi. Mbapete bantu badi bu mikoko badi basue kutua Bukalenge bua Yehowa nyama ku mikolo, nansha mudiku bifimpakaji bia mishindu yonso ne buluishi.

Tshilejilu, muana wa bakaji kampanda muena mu dîku dia ntendelelu wa bena Hindu uvua mutshibukile panshi ku disama dia tuneke kutuadija ku buana buende. Kusama kuende kuakamufikisha ku diela meji pa bidi bitangila Nzambi ne pa tshipatshila tshia muoyo. Wakakonkonona ntendelelu mivule bua kupeta diandamuna kadi kakapeta disulakana. Bu tshipeta, wakajimija ditabuja diende ku ntendelelu, kadi ki nkudi Nzambi.

Tshikondo atshi Bantemu babidi bakapetangana ne muana wa bakaji eu mu mudimu wabu wa ku nzubu ne ku nzubu. “Binsonji biakampueka pangakabumvua babala Buakabuluibua 21:4,” ke mudiye uvuluka. Wakitaba mikanda mivule ya Société Watch Tower ne wakanyisha dilonga dia Bible kumbelu nansha muvuaku buluishi bua mamuende. Muana wa bakaji eu wakenza mashintuluka a bungi mu nsombelu wende, kuakamaye ne dikima buluishi bua kudi balela bende, ne kuluaye Ntemu mutambule. Udi wamba ne: “Ndi muenda njila mule, ne uvua njila wa lutatu bushuwa. Kadi Yehowa Nzambi uvua nanyi misangu yonso ne umpesha ditalala dinene ne disanka.”

Mukandamane bua ntendelelu mukezuke mu kalasa

Muanetu wa bakaji kampanda mutshikale nsonga wakalombibua kudi mulongeshi wende bua kuya ku nzubu wa nzambi wa bena Katolike pamue ne balongi nende bakuabu. Ne bukalanga buonso, muanetu wa bakaji wakabenga, pa kuamba se: bu muvuaye Ntemu wa Yehowa kavua mua kutendelela muntu mukuabu anyi tshintu tshikuabu, pa kumbusha Yehowa. Mulongeshi wakamba ne: pavua bakuabu buonso ne bua kuya ku nzubu wa nzambi, uvua ne bua kukuya pende. Kadi muanetu wa bakaji wakashala mushindame ne kuamba ne: bu muvua aba bavua baya ku nzubu wa nzambi kabayi ne bua kusambila Yehowa, kavua umona mushindu uvuaye ne bua kuikala munkatshi mua bateleji mu muab’au.

Pa kumona bushindame bua muana wa bakaji eu, mulongeshi wende wakasua kumanya bivule pa ditabuja diende. Nunku dituku diakalonda muanetu wa bakaji wakamupesha tshiena-bualu kampanda mu Tshibumba tshia Nsentedi pa bidi bitangila ntendelelu wa Yehowa. Mukemeshibue bikole ku biakabalaye, mulongeshi wakamulekela pashishe bua kabuedi kabidi mu midimu yonso ya malu a Nzambi mu kalasa. Muanetu wa bakaji wakakumbana bua kumushila yeye pamue ne balongeshi bakuabu bibejibeji dikumi.

Ditumikila mukenji wa Nzambi pa mashi didi difutshibua

Matuku adi panshi aa, tshipupu tshia disama dia mubidi luya dituala kudi tuishi diakatuadija mu bimue bitupa bia Etat wa Kerala. Disama edi didi dinyanga bikole tuonyi ne difikisha lukasa ku dikengela dia kuondapibua lukasa ne dialyseur. Misangu mivule batu bela bantu mashi. Mu tshimenga kampanda bakabueja bantu 14 mu lupitadi ne disama edi. Umue wa ku babedi aba uvua Ntemu, mukulu mu tshisumbu tshia mu tshimenga atshi. Bakamuambila ne: amu diedibua mashi ke ngondapilu uvuaku. Mukulu’eu wakumvuija mitabuja ende mashila pa Mifundu ne wakabenga mashi ne muoyo umue. (Bienzedi 15:28, 29) Kunyima kua dikokangana ku mêyi dikole ba-minganga bakamuambila se: uvua ne bua kufua bua dibenga diende dia diedibua mashi.

Babedi bakuabu 13 bakedibua mashi. Bia dibungama, buonso buabu bakafua mu matuku makese. Amu muanetu wa balume ke wakapanduka! Balombodi ba lupitadi bakakema bikole. Bena mudimu wa diondapa bakalengibua bikole ku muoyo pa kumona bungi bua makumbula a pa tshibidilu menza kudi bena mu tshisumbu. Kunyima kua dimupatula mu lupitadi, muanetu eu wa balume wakaya bua kuela ba-minganga tuasakidila, kadi buobu bakamba ne: “Bua tshinyi udi utuela tuasakidila? Sakidila Nzambi webe, Yehowa. Yeye ke uvua mukupandishe. Bu wewe mua kusua usambile kabidi Nzambi webe, Yehowa, buetu.”

[Kazubu mu dibeji 24]

NSOMBELU WA DITUNGA

Tshidimu tshia mudimu 1994

BUNGI BUBANDILE BUA BAMANYISHI: 14 271

MUAYENE: Ntemu 1 bua bantu 65 266

BAKABUELA MU TSHIVULUKILU: 38 192

MUAYENE WA BAMPANDA-NJILA: 1 780

MUAYENE WA MALONGA A BIBLE: 12 453

BUNGI BUA BABATIZA: 1 312

BUNGI BUA BISUMBU: 410

BIRO BIA FILIALE: LONAVLA

[Tshimfuanyi mu dibeji 25]

Biro bia filiale, Lonavla

[Tshimfuanyi mu dibeji 25]

Bumanyishi mu diumvuangana ne mpuilu wa distrike “Lumu luimpe lua kashidi” mu 1963

[Tshimfuanyi mu dibeji 25]

Difila bumanyishi kudi mupanyi wa bintu pambelu pa Red Fort ku Delhi