Shala mu “tshimenga tshia disokomena” bua wikale ne muoyo!

“Udi ne tshia kushala mu tshimenga tshiende tshia kusokomena too ne pafua muakuidi munene.”​—DIBADIKA 35:28, MMM.

1. Musombuedi wa mashi nnganyi, ne mbualu kayi bukadiye pa kuenza?

MUSOMBUEDI wa mashi wa Yehowa, Yezu Kristo ukadi pa kututa. Ne biluilu biende bia banjelu, Musombuedi eu neenze mu katupa kîpi emu tshintu kampanda bua aba badi bapie tshibawu tshia mashi bakena banyingalala. Eyowa, Yezu neatumike bu Mushipianganyi bua Nzambi munkatshi mua “dikenga dinene” didi dienda disemena ne lukasa. (Matayo 24:21, 22; Yeshaya 26:21) Bukua-bantu nebutuilangane mpala ne mpala ne dipia diabu dia tshibawu tshia mashi.

2. Muaba umuepele mulelela wa disokomena mmuaba kayi, ne nnkonko kayi idi ikengela mandamuna?

² Njila udi ufikisha ku dikubibua udi wa dibuela mu njila udi ufikisha ku tshimenga tshia disokomena tshidianjila kuleja ne kunyemenaku bua kupandisha muoyo! Bianyishibuaye mu tshimenga etshi, munyemi udi ne bua kushalamu, bualu ke muaba umuepele mulelela wa disokomena. Kadi údí mua kudiebeja ne: ‘Bualu bavule ba kutudi ki mbanji kushipa muntu, tudi bushuwa bapie tshibawu tshia mashi anyi? Bua tshinyi Yezu udi Musombuedi wa mashi? Tshimenga tshia disokomena tshia lelu’eu ntshinyi? Muntu udi mua kumbukamu ne kutungunuka ne kukubibua anyi?’

Tudi bushuwa bapie tshibawu tshia mashi anyi?

3. Ntshitupa kayi tshia Mikenji ya Mozese tshiatuambuluisha bua kusunguluja ne: miliyare ya bantu pa buloba badi ne tshiabu tshitupa mu dipia tshibawu tshia mashi?

³ Tshitupa kampanda tshia Mikenji ya Mozese netshituambuluishe bua kumona se: miliyare ya bantu pa buloba badi ne tshiabu tshitupa mu dipia tshibawu tshia mashi. Nzambi uvua womekela bena Izalele bujitu bua tshinsanga bua diupumunyibua dia mashi. Bikala muntu kampanda mupetshibue mushipa ne mumushipi wende kayi mumanyibue, ba-nzuji bavua ne bua kupima mutantshi uvua pankatshi pa muaba wa dimushipela ne bimenga biena mutumba bua kumanya tshimenga tshivua tshitambe kuikala pabuipi. Bua kumbusha dibunda edi dia tshibawu, bakulu ba tshimenga atshi tshivuabu bafuanyikija bu tshipie tshibawu tshia mashi bavua ne bua kutshibula nshingu wa muana wa ngombe, udi kayi muanji kutumika mu tshibanda tshikena tshidima mudi mâyi apitshila. Ebi bivua bienjibua kumpala kua bakuidi bena Lewi ‘bualu Yehowa wakabasungula bua kukosa bilumbu bionso bia bantu badi batandangane nansha batapangane mputa.’ Bakulu ba tshimenga etshi bavua ne bua kuowa mâyi ku bianza biabu pa mutu pa muan’eu wa ngombe ne kuamba ne: “Bianza bietu kabiena biele mashi a muntu ewu panshi, meso etu kaena mamone bualu. [Yehowa, NW] ufuile bantu bebe bena I[zal]ele luse bualu wewe ke uvua mubapikule. Kulekedi mashi a muntu udi kayi ne bualu apumuka munkatshi mua bantu bebe bena I[zal]ele.” (Diyi Dielulula 21:1-9, MMM) Yehowa Nzambi kavua musue bua ditunga dia Izalele dinyangibue ne mashi anyi bua bantu benadi bambule dipia tshibawu thia mashi dia tshinsanga.

4. Babilone Munene udi ne lumu kayi pa bidi bitangila dipia tshibawu tshia mashi?

⁴ Bushuwa, tshintu bu mudi dipia tshibawu tshia mashi dia tshinsanga, anyi dia mu tshi-bungi tshituku. Anjibi kutangila dipia tshibawu dinene nunku didi diomekela Babilone Munene, nsangilu wa pa buloba bujima wa ntendelelu ya dishima. Ee, mmukuatshike mashi a basadidi ba Yehowa! (Buakabuluibua 17:5, 6; 18:24, NW) Ekleziya ya Bukua-buena-nkristo idi idituta pa tshiadi mudiyi ilonda Mukalenge wa Ditalala, kadi mvita, tubadi tua ekleziya tua dinyoka batontolodi, ne mvita ya krwazade mishipianganyi mbiyipiishe tshibawu tshia mashi kumpala kua Nzambi. (Yeshaya 9:6; Yelemiya 2:34) Bushuwa, udi ne bua kuambula tshibawu tshinene bua lufu lua miliyo ya bantu mu mvita ibidi ya buloba bujima mu siekele eu. Nunku, balamatshi ba ntendelelu ya dishima pamue ne bayikuatshishi bayi ne badibueji ba mu mvita ya bantu mbapie tshibawu tshia mashi kumpala kua Nzambi.

5. Mmunyi mudi bamue bantu bafuane mushipianganyi wa ku mpukapuka mu Izalele?

⁵ Bamue bantu mbakebeshe lufu lua bakuabu ku budisuile anyi ku lulèngù. Bamue mbaditue mu dishipangana dienza mu tshinsanga, pamu’apa batuishibue kudi bamfumu bena malu a Nzambi se: ndisua dia Nzambi. Kabidi bakuabu mbakengeshe ne mbashipe basadidi ba Nzambi. Kadi, nansha bituikala katuyi benze malu a mushindu’eu, tudi ne tshietu tshitupa tshia bujitu bua tshinsanga bua dijimina dia muoyo wa bantu bualu katuvua bamanye mikenji ne disua bia Nzambi. Tudi bafuane mushipianganyi wa ku mpukapuka ‘uvua mushipe muntu nende kupanga kumanya ne uvua kayi nende lukuna kale.’ (Dutelonome 19:4) Bantu ba mushindu’eu badi ne bua kulomba Nzambi luse ne badi ne bua kunyemena ku tshimenga tshia disokomena tshidianjila kuleja. Biabengabu kuenza nanku nebapetangane ne ditutakena dia lufu ne Musombuedi wa mashi.

Midimu ya mushinga ya Yezu

6. Bua tshinyi tudi mua kuamba ne: Yezu udi mulela wa pabuipi menemene wa bukua-bantu?

⁶ Mu Izalele musombuedi wa mashi uvua mulela mulume wa pabuipi menemene wa mufue. Bua kusombuela aba buonso badi bashipibue pa buloba ne nangananga basadidi bashipa ba Yehowa, Musombuedi wa lelu wa mashi udi ne bua kuikala mulela mulume wa pabuipi menemene wa bukua-bantu bujima. Mudimu eu mmuenjibue kudi Yezu Kristo. Wakaledibua muntu mupuangane. Yezu wakafila muoyo wende ukena mpekatu mu lufu bu mulambu wa tshia-bupikudi, ne panyima pa dibiishibua diende ku lufu bua kuya mu diulu, wakaleja mushinga wawu kudi Nzambi bua diakalenga dia ndelanganyi ya mpekatu ya Adama idi yenda ifua. Nunku Kristo wakalua Mupikudi wa bukua-bantu, mulela wetu wa pabuipi menemene​—Musombuedi muakanyine wa mashi. (Lomo 5:12; 6:23; Ebelu 10:12) Yezu mmufunkuna bu muanabu ne balondi ba dikasa diende bela manyi. (Matayo 25:40, 45; Ebelu 2:11-17) Bu Mukalenge wa mu diulu nealue “Tatu wa Tshiendelele” wa aba bababidila mulambu wende bu bakokedi bende ba pa buloba. Nebashale ne muoyo bua kashidi. (Yeshaya 9:6, 7) Nunku mu mushindu muakanyine Yehowa mmuteke Mulela menemene wa bukua-bantu eu wa pabuipi bu Musombuedi wa mashi.

7. Bu Muakuidi Munenanenayi, ntshinyi tshidi Yezu wenzela bantu?

⁷ Yezu udi kabidi Muakuidi Munene ukena mpekatu, mutetshibue, muena dinanga. (Ebelu 4:15) Pa kutumika ne muanzu au udi wenzela bukua-bantu malu adi makanyine mulambu wende wa dibuikidila mpekatu. Bimenga bia disokomena bivua bilongolodibue ‘bua bena Izalele ne bua benyi ne bua muntu yonso uvua musombe munkatshi muabu.’ (Nomba 35:15) Nunku Muakuidi Munenanenayi wakenzela diambedi bamulondi bela manyi, ‘bana ba Izalele’ malu adi makanyine mulambu wende. Mpindieu badi baenzela ‘benyi’ ne ‘basombi’ mu tshimenga tshia disokomena tshidianjila kuleja. “Mikoko mikuabu” eyi ya Mukalenge Yezu Kristo idi ne ditekemena dia kushala ne muoyo wa kashidi pa buloba.​—Yone 10:16; Musambu wa 37:29, 34.

Tshimenga tshia disokomena tshia lelu

8. Tshimenga tshia disokomena tshidianjila kuleja ntshinyi?

⁸ Tshimenga tshia disokomena tshia lelu tshidianjila kuleja ntshinyi? Ki mmuaba kampanda wa pa buloba bu mudi Ebron, tshimue tshia ku bimenga bisambombo bia disokomena bia bena Lewi ne tshisombelu tshia muakuidi munene wa Izalele. Tshimenga tshia disokomena tshia lelu tshidi ndongoluelu wa Nzambi bua ditukuba ku lufu bua ditupa ku dîyi-dituma diende didi ditangila ngikadilu wa tshijila wa mashi. (Genese 9:6) Nansha bikale bienza ku budisuile anyi ku mpukapuka, mushipi kayi yonso wa dîyi-dituma adi udi ne bua kukeba difuidibua luse dia kudi Nzambi ne dilekeledibua dia mpekatu yende ku diambuluisha dia ditabuja mu mashi a Muakuidi Munene, Yezu Kristo. Bena nkristo bela manyi badi ne ditekemena dia mu diulu ne “musumba munene” udi ne ditekemena dia pa buloba mbababidile masanka a ku mulambu wa dibuikidila mpekatu wa Yezu ne badi mu tshimenga tshia disokomena tshidianjila kuleja.​—Buakabuluibua 7:9, 14, NW; 1 Yone 1:7; 2:1, 2.

9. Mmunyi muvua Saulo wa ku Tarse mutupe ku dîyi-dituma dia Nzambi didi ditangila mashi, kadi mmunyi muakalejaye mmuenenu mushintuluke?

⁹ Kumpala kua kuluaye muena nkristo, mupostolo Paulo wakatupa ku dîyi-dituma didi ditangila mashi. Bu Saulo wa ku Tarse, uvua ukengesha balondi ba Yezu ne wanyisha mene dishipibua diabu. ‘Kadi,’ ke muakamba Paulo, ‘ngakafuidibua luse bualu bua ngakabienza mu bupidia buanyi tshiyi mumanye.’ (1 Timote 1:13; Bienzedi 9:1-19) Saulo uvua ne mmuenenu wa dinyingalala, muleja pashishe ku midimu mivule ya ditabuja. Kadi tshidi tshilombibue ntshipite ne kule ditabuja mu mulambu bua kubuela mu tshimenga tshia disokomena tshidianjila kuleja.

10. Mmunyi mudi kuondo kimpe ka muoyo mua kupetshibua, ne ntshinyi tshidi ne bua kuenjibua bua kukalama?

¹⁰ Mushipianganyi wa ku mpukapuka uvua mua kushala mu tshimue tshia ku bimenga bia disokomena bia Izalele anu pavuaye mua kujadika se: uvua ne kuondo ka muoyo kimpe kudi Nzambi pa bidi bitangila mashi muupumuna. Bua kupeta kuondo ka muoyo kimpe, tudi ne bua kuenza midimu ya ditabuja mu mulambu wa Yezu, kunyingalala bua mpekatu yetu, ne kushintulula nsombelu wetu. Bidi bikengela bua tuetu kulomba kuondo ka muoyo kimpe mu diditshipa dienza mu masambila kudi Nzambi ku butuangaji bua Kristo, pa kuleja tshimanyinu tshiadi ku batismo wa mâyi. (1 Petelo 3:20, 21) Kuondo ka muoyo kimpe aka kadi katupetesha mushindu wa kushemesha malanda makezuke ne Yehowa. Mushindu umuepele wa kulama kuondo ka muoyo kimpe nkukumbaja malu malomba a Nzambi ne kuenza mudimu mutuomekela mu tshimenga tshia disokomena tshidianjila kuleja, anu bu muvua banyemi mu bimenga bia disokomena bia kale ne bua kutumikila Mikenji ne kukumbaja midimu yabu. Mudimu munene bua tshisamba tshia Yehowa lelu’eu udi wa dimanyisha mukenji wa Bukalenge. (Matayo 24:14; 28:19, 20) Kuenza mudimu au nekutuambuluishe bua kuikala basombi badi bambuluishangana ba mu tshimenga tshia disokomena tshia lelu.

11. Ntshinyi tshitudi ne bua kuepuka bituikala basue kushala mu dikubibua munkatshi mua tshimenga tshia disokomena tshia lelu?

¹¹ Kumbuka mu tshimenga tshia disokomena tshia lelu nkudianyika tuetu nkayetu ku dibutudibua, bualu Musombuedi wa mashi neabutule mu katupa kîpi emu buonso badi bapie tshibawu tshia mashi. Etshi ki ntshikondo tshia kushala pambelu pa tshimenga tshia bukubi etshi anyi muaba wa njiwu udi pabuipi ne maloba atshi a mpata. Tudi mua kulua kufuila pambelu pa tshimenga tshia disokomena tshidianjila kuleja bituajimija ditabuja mu mulambu wa dibuikidila mpekatu wa Muakuidi Munene. (Ebelu 2:1; 6:4-6) Katuena mene mua kuikala mu dikubibua bituasungula njila ya bulongolodi ebu, bimane ku nzembe ya bulongolodi bua Yehowa, anyi basesuke ku mêyi-makulu makane a Tatuetu wa mu diulu.​—1 Kolinto 4:4.

Bapikula ku tshimenga tshia disokomena

12. Ntshikondo bule kayi tshidi bantu bavua ku kale bapie tshibawu tshia mashi ne bua kushala mu tshimenga tshia disokomena tshidianjila kuleja?

¹² Mushipianganyi wa ku mpukapuka mu Izalele uvua ne bua kushala mu tshimenga kampanda tshia disokomena ‘too ne pavua muakuidi munene ufua.’ (Nomba 35:28) Nunku mmusangu bule kayi udi bantu bavua ku kale bapie tshibawu tshia mashi ne bua kushala mu tshimenga tshia disokomena tshidianjila kuleja? Too ne pikalabu kabayi kabidi bakengela midimu ya Muakuidi Munene, Yezu Kristo. “Udi ne bukole bua kupandisha bonso badi bapitshila kudiye bua kuya kudi [Nzambi, NW],” ke muakamba Paulo. (Bena Hebreyi 7:25, MMM) Bu mudi dipia tshibawu tshia mashi ditungunuke, midimu ya Muakuidi Munene mmikengedibue bua se: bantu bapange bupuangane bapete mushindu wa kuimana luseke luakane kumpala kua Nzambi.

13. “Bana ba Izalele” ba lelu mbanganyi, ne ntshikondo bule kayi tshidibu ne bua kushala mu “tshimenga tshia disokomena”?

¹³ Vuluka se: bimenga bia kale bia disokomena bivua bilongolola bua ‘bana ba Izalele,’ benyi, ne basombi. ‘Bana ba Izalele’ mbena Izalele ba mu nyuma. (Galatia 6:16) Badi ne bua kushala mu tshimenga tshia disokomena tshidianjila kuleja mu kupita kua bule bua muoyo wabu pa buloba. Mbua tshinyi? Bualu batshidi mu mubidi mupange bupuangane ne nunku bakengela midimu ya dibuikidibua dia mpekatu ya Muakuidi wabu Munene wa mu diulu. Kadi padi bena nkristo aba bela manyi bafua ne babishiibua ku lufu bua kupeta muoyo wa mu nyuma mu diulu, kabatshiena kabidi bakengela midimu ya dibuikidibua dia mpekatu ya Muakuidi Munene; nebikale bamane kushiya bua kashidi mubidi wa musunyi ne dipia tshibawu tshia mashi disuikakajaku. Bua babiishibue bela manyi ba mushindu’eu, Muakuidi Munene neikale mumane kubafuila bu mubuikididi wa mpekatu, ne mukubi.

14. Ntshinyi thikuabo thidi tshienzeja ne: aba badi ne matekemena a mu diulu bashale mu tshimenga tshia disokomena tshia lelu?

¹⁴ Dikala mene ne mubidi wa musunyi didi dienzeja ne: aba bikala ‘bapianyi tshiapamue ne Kristo’ bashale mu tshimenga tshia disokomena tshidianjila kuleja too ne padibu bajikija ne lulamatu luonso lubilu luabu lua pa buloba mu lufu. Pafuabu, nebafile bu mulambu mubidi wabu wa musunyi bua kashidi. (Lomo 8:17; Buakabuluibua 2:10) Mulambu wa Yezu udi utangila anu aba badi ne mubidi wa musunyi. Nunku, Muakuidi Munene udi ufua bua bena Izalele wa mu nyuma padibu babiishibua ku lufu bu bifukibua bia mu nyuma biashala bua kashidi mu diulu bu ‘babanyanganyi ende ba muoyo wa bunzambi.’​—2 Petelo 1:4.

15. ‘Benyi’ ne ‘basombi’ ba lelu mbanganyi, ne ntshintu kayi tshiabenzela Muakuidi Munenanenayi?

¹⁵ Ntshikondo kayi tshialua “kufua” Muakuidi Munene bua ‘benyi’ ne ‘basombi’ ba lelu, bua kubapetesha mushindu wa kumbuka mu tshimenga tshia disokomena tshidianjila kuleja? Bena mu musumba munene eu kabena mua kupatuka mu tshimenga etshi tshia disokomena diakamue panyima pa dikenga dinene. Mbua tshinyi? Bualu nebatungunuke ne kuikala mu mubidi wabu mupange bupuangane, wa mpekatu ne nebakengele bua kushala muinshi mua dikubibua dia Muakuidi Munene. Pa kubabidila midimu yende ya dibuikidila mpekatu mu kupita kua bukalenge buende ne buakuidi bua bidimu tshinunu, nebafike ku bupuangane bua muntu. Pashishe Yezu neabambike kudi Nzambi bua ditetshibua dia ndekelu, dia kashidi dia muoyo wabu mutoke pa kusulula Satana ne ba-demon bende bua tshikondo tshîpi. Bualu nebatshimune ditetshibua edi ne dianyisha dia Nzambi, Yehowa neababale bu bakane. Nunku nebafike ku bupuangane bua tshishiki bua muntu.​—1 Kolinto 15:28; Buakabuluibua 20:7-10.a

16. Ntshikondo kayi tshikala bapanduki ba mu dikenga dinene kabatshiyi bakengela midimu ya dibuikidila mpekatu ya Muakuidi Munene?

¹⁶ Nunku, bua bualu ebu, bapanduki ba mu dikenga dinene nebikale ne bua kulama kuondo ka muoyo kimpe pa kushala mu tshimenga tshia disokomena tshidianjila kuleja too ne ku ndekelu kua Bukokeshi bua Bidimu Tshinunu bua Kristo. Bu bantu bapuangaja, kabakuikala ne dijinga dia midimu ya pa mutu ya dibuikidibua dia mpekatu ya Muakuidi Munene ne nebumbuke muinshi mua bukubi buende. Yezu neabafuile apu bu Muakuidi Munene, bualu kabiakukengela kabidi bua abenzele malu bua diakalenga diabu ne mashi makezudi a mulambu wende. Dîba adi nebumbuke mu tshimenga tshia disokomena tshidianjila kuleja.

17. Bua tshinyi kabiakukengela bua aba babishiibua ku lufu munkatshi mua Bukokeshi bua Bidimu Tshinunu kubuelabu mu tshimenga tshia disokomena tshidianjila kuleja ne kushalamu?

¹⁷ Aba babishiibua munkatshi mua Bukokeshi bua Bidimu Tshinunu bua Yezu nebikale ne bua kubuela mu tshimenga tshia disokomena tshidianjila kuleja ne kushalamu too ne ku lufu lua Muakuidi Munene anyi? Tòo, bualu pa kufua bakafuta tshibawu bua ngikadilu wabu wa mpekatu. (Lomo 6:7; Ebelu 9:27) Nansha nanku, Muakuidi Munene neabambuluishe bua kufika ku bupuangane. Bialubulukabu mu ditshimuna diteta dia ndekelu panyima pa Mileniume, Nzambi neababale kabidi bu bakane badi ne dieyemena dia kupeta muoyo wa kashidi pa buloba. Bushuwa, kupanga kukumbaja malu malomba a Nzambi nekutuale dilumbuluishibua dia dipiishibua ne kabutu pa bantu buonso badi kabayi batshimuna diteta dia ndekelu bu balami ba muoyo mutoke.

18. Pa bidi bitangila bukalenge ne buakuidi bia Yezu, ntshinyi tshiashala bua kashidi ne bukua-bantu?

¹⁸ Ndekelu wa bionso bakuidi banene bena Izalele bavua bafua. Kadi Yezu “m[m]umane kulua muakuidi munene tshiendelele wa ku mulongo wa Melekisedeke.” (Ebelu 6:19, 20 [Disendamija miaku ndietu]; 7:3) Nunku dilekela mudimu dia Yezu bu Muakuidi Munene mutuangaji bua bukua-bantu kadiena diimanyika muoyo wende nansha. Buenzeji buimpe bua mudimu wende bu Mukalenge ne Muakuidi Munene nebushale bua kashidi kudi bukua-bantu, ne bantu nebikale ne dibanza kudiye tshiendelele bua ditumika diende mu mianzu ayi. Kupita apu, bua tshiendelele Yezu neikale ntunga-mulongo mu ntendelelu mukezuke wa Yehowa.​—Filipoi 2:5-11.

Malongesha a mushinga buetu

19. Ndilongesha kayi ditudi mua kulongela pa bidi bitangila lukinu ne dinanga ku ndongoluelu eu wa bimenga bia disokomena?

¹⁹ Tudi mua kulongela malu kabukabu ku ndongoluelu wa bimenga bia disokomena. Tshilejilu, mushipianganyi nansha umue úvuá ne lukinu lua lufu bua uvuaye mushipe kavua upeshibua dianyisha bua kusomba mu tshimenga tshia disokomena. (Nomba 35:20, 21) Nunku mmunyi mudi muntu kampanda udi mu tshimenga tshia disokomena tshidianjila kuleja mua kushiila lukinu bua muanetu kampanda mpunga ludiunda mu mutshima wende? ‘Muntu yonso udi ne muan’abo lukuna udi mushipianganyi,’ ke muakafunda mupostolo Yone, ‘ne nudi bamanye ne, Kakuena mushipianganyi udi ne muoyo wa tshiendelele muikale munda muende.’ Nunku “tunangangane, bualu bua dinanga didi difume kudi Nzambi.”​—1 Yone 3:15; 4:7.

20. Bua kuepuka Musombuedi wa mashi, ntshinyi tshidi aba badi mu tshimenga tshia disokomena tshidianjila kuleja ne bua kuenza?

²⁰ Bua kuepuka musombuedi wa mashi, mushipianganyi wa ku mpukapuka uvua ne bua kushala mu tshimenga tshia disokomena ne kayi uya kule ne maloba atshi a mpata. Netuambe tshinyi bua aba badi mu tshimenga tshia disokomena tshidianjila kuleja? Bua kuepuka Musombuedi wa mashi, kabena ne bua kumbuka mu tshimenga etshi. Bushuwa, badi ne bua kudilama ku mateyi a diya ku mukalu wa maloba a mpata, mu ngakuilu wa mu tshimfuanyi. Badi ne bua kutabala bua kabashidi dinanga bua bulongolodi bua Satana mpunga bua kudiundadi mu mitshima yabu. Ebi bidi mua kukengela masambila ne madikolela, kadi mioyo yabu mmisuikakajaku.​—1 Yone 2:15-17; 5:19.

21. Mmudimu kayi wa mafutu udi wenda wenjibua kudi aba badi mu tshimenga tshia disokomena tshia lelu?

²¹ Bashipianganyi ba ku mpukapuka mu Izalele wa kale bavua ne bua kuikala benji ba mudimu udi upatula bipeta. Bia muomumue, “bana ba Izalele” bela manyi mbaleje tshilejilu tshimpe bu benji ba mudimu wa dinowa ne bamanyishi ba Bukalenge. (Matayo 9:37, 38; Mâko 13:10) Bu ‘benyi’ ne ‘basombi’ ba mu tshimenga tshia disokomena tshia lelu, bena nkristo bàdì ne ditekemena dia pa buloba badi ne diakalenga dia kuenza mudimu eu mupandishi wa muoyo pamue ne bela manyi batshidi pa buloba. Ne mmudimu kayipu wa mafutu! Aba badi batumika ne lulamatu luonso mu tshimenga etshi tshia disokomena tshidianjila kuleja nebepuke lufu lua tshiendelele ku bianza bia Musombuedi wa mashi. Bishilangane, nebapetele mabenesha a tshiendelele ku mudimu wende bu Muakuidi Munenanenayi wa Nzambi. Neushale mu tshimenga tshia disokomena bua wewe kuikala ne muoyo wa kashidi anyi?

[Mêyi adi kuinshi]

Newandamune munyi?

◻ Bua tshinyi tudi mua kuamba ne: miliyare ya bantu pa buloba mbapie tshibawu tshia mashi?

◻ Mmidimu kayi idi Yezu ukumbaja pa bidi bitangila bukua-bantu?

◻ Tshimenga tshia disokomena tshidianjila kuleja ntshimenga kayi, ne mmunyi mudi muntu mua kubuelamu?

◻ Ntshikondo kayi tshialua bantu kupikudibua ku tshimenga tshia disokomena tshidianjila kuleja?

◻ Mmalongesha kayi a mushinga atudi mua kulongela ku ndongoluelu wa bimenga bia disokomena?

[Tshimfuanyi mu dibeji 16]

Udiku mumanye midimu ya mushinga idi mikumbajibue kudi Yezu Kristo anyi?