Tangila dia muamua dia bintu biudi umona!

LUMONU luena dîna luimpe ndibenesha. Bushuwa, bantu bavule nebambe ne: anu bintu bikese bidibu nabi ke bidi ne mushinga mupite wa lumonu. Kadi, bua bena nkristo, kudi mushindu kampanda wa lumonu udi mupostolo Paulo mutele udi ne mushinga mutambe mene wa lumonu luimpe luena dîna. ‘Katuena tutangila bintu bidi bimueneka ku mêsu, kadi tudi tutangila bintu bidi kabiyi bimueneka ku mêsu,’ ke muakafunda Paulo. (2 Kolinto 4:18) Ludi bushuwa ne bua kuikala mushindu wa pa buawu mene wa lumonu udi upetesha muntu bukokeshi bua kumona bintu bikena bimueneka! Tudi mua kulubikila bu lumonu lua 10/10 lua mu nyuma.

Bua tshinyi ndukengedibue?

Bena nkristo ba mu siekele wa kumpala bavua bushuwa bakengela mushindu eu wa lumonu lua mu nyuma. Bavua bakumbaja mudimu wabu wa Buena-nkristo munkatshi mua ntatu mivule. Paulo wakaleja nsombelu eu mu mushindu udi ulonda eu: “Tudi tutata ne makenga a mishindu yonso, kadi kabena batuboze to; tudi tulubakana, kadi katuena bajimije ditekemena to; badi batukengesha, kadi [Nzambi, NW] kena utulekela nansha; badi batufina, kadi kabena batubutula nansha.”​—2 Kolinto 4:8, 9, Muanda Mulenga Lelu.

Nansha muvuaku nsombelu ya mushindu’eu, bayidi bena lulamatu bakashala bashimate. Ne ditabuja dikole kudi Nzambi, bavua mua kuamba anu bu muakamba Paulo ne: “Ke bualu kayi katuena tuteketa. Nansha mudi mubidi wetu wa bumuntu wenda ubutuka ku kakese ku kakese, muoyo wetu wa munda udi wowo wenda wandamuka mupiamupia ku dituku ku dituku.” Kadi, ntshinyi tshivua tshienzeja diandamuka edi dia ku dituku ku dituku? Paulo wakatungunuka ne kuamba se: “Bualu, dikenga dikese dia tshitupa didi ditulongoluela lumu luvule ne lua kashidi, luye ne mua patupu. Ke patudi katuyi tutangila bidi bimueneka, amu bidi kabiyi bimueneka; bualu bidi bimueneka bidi bia tshitupa tshipi, kadi bidi kabiyi bimueneka bidi bia kashidi.”​—2 Bena Korente 4:16-18, MMM.

Paulo uvua ukankamija bana babu ba mu nyuma bua kabalekedi ntatu, makenga, dikengeshibua​—makenga a mushindu kayi wonso—​bua kubuitshidija mmuenenu wabu wa difutu dia butumbi divua diteka kumpala kuabu. Bavua ne bua kutangila dia muamua dia nsombelu yabu ya mpindieu, pa kutuishila mêsu abu pa tshipeta tshia disanka tshia lubilu lua Buena-nkristo. Ke tshivua tshibambuluisha bua kuvuija dipangadika diabu dia kutungunuka ne mvita dipiadipia ku dituku ku dituku. Bena nkristo lelu’eu badi bakengela bia muomumue bua kuikala ne lumonu luimpe lua mu nyuma lua mushindu’eu.

Tangila makenga a mpindieu bu a tshitupa tshîpi!

Mu mushindu ukena kuepuka, tudi ku dituku ku dituku tumona bintu bitudi katuyi basue bua kumona. Dîsu ditapa mu lumuenu didi dituleja matoba akena mimpe ne bilema bia mubidi, bijadiki bia dipanga bupuangane dia mubidi. Patudi tutapa dîsu mu lumuenu lua Dîyi dia Nzambi, tudi tumona matoba ne bilema bia mu nyuma, bietu tuetu nkayetu ne bia bakuabu. (Yakobo 1:22-25) Ne patudi tutangila tshikandakanda tshia ku dituku ku dituku anyi televizion, ntema yetu idi ikokibua lukasa kudi miyuki ya kansungasunga, luonji, ne malu makuate buôwa bidi bitukebela tshinyongopelu.

Satana mmusue bua tutekete mu mikolo bua bintu bitudi tumona anyi bua tusesuke ne tutuadije kutenkakana mu ditabuja. Mmunyi mutudi mua kupumbisha dienzeka dia bionso ebi? Tudi ne bua kulonda tshilejilu tshifila kudi Yezu Kristo, anu bu muvua mupostolo Petelo mufile mubelu pakambaye ne: “Pabi mene, nuakabikidibua bua muanda eu, bualu Kristo wakakenga bua bualu buenu, e kunushila tshilejilu bua nuenu kulonda mu makasa ende biakane.” (1 Petelo 2:21, NW) Mu tshitupa kayi tshionso tshia nsombelu wa Buena-nkristo, Yezu uvua tshilejilu tshipuangane.

Mu difunkuna Yezu bu tshitembelu tshietu, Petelo wakazangika se: Yezu wakakenga. Bushuwa, Yezu wakakenga bikole pavuaye pa buloba. Bu “muena mudimu wa dilambu” wa Yehowa uvuapu ku difukibua dia bukua-bantu, uvua mumanye bimpe tshivua Nzambi musue bua bantu kuikala. (Nsumuinu 8:30, 31, NW) Kadi mpindieu wakamona buludiludi tshivua mpekatu ne dipanga bupuangane bibavuije. Ku dituku ku dituku uvua umona ne uvua ne bua kuakama mapanga bupuangane ne matekete bia bantu. Abi bivua ne bua kuikala diteta kudiye.​—Matayo 9:36; Mâko 6:34.

Pa kumbusha makenga a bakuabu, Yezu wakakama pende ende nkayende. (Ebelu 5:7, 8) Kadi ne lumonu lupuangane lua mu nyuma, wakatangila dia muamua dia makenga bua kumona difutu dia kuikala mubandishibue ku muoyo ukena lufu bua muoyo wende mutoke. Pashishe bu Mukalenge Masiya, neikale ne disanka dia mudimu dia kumbusha bukua-bantu budi bukengakana ku nsombelu wa dipuekeshibua ne kububandisha ku bupuangane buvua Yehowa mulongolole biangatshile ku mbangilu. Ditungunuka ne kutuishila mêsu ende pa matekemena aa akena amueneka a matuku atshivua alua diakamuambuluisha bua kulama disanka mu mudimu wa Nzambi nansha muvuaku makenga akamonaye ku dituku ku dituku. Paulo wakafunda pashishe ne: “Bua disanka divuabu bamutekele kumpala, wakatantamena mutshi wa tshinyongopelu, kupetula bundu, e kusomba ku dia balume dia nkuasa wa bumfumu wa Nzambi.”​—Ebelu 12:2, NW.

Yezu kakalekela nansha kakese ntatu ne nsombelu ya matetshibua bua kumufikisha ku diteketa mu mikolo, kusesuka, anyi kutenkakana mu ditabuja diende. Bu mutudi bayidi bende, tudi ne bua kulonda bitulu bitulu tshilejilu tshiende tshitambe buimpe.​—Matayo 16:24.

Shindamena pa bintu bia kashidi bikena bimueneka!

Wakula pa bidi bitangila tshiakambuluisha Yezu bua kunanukila, Paulo wakatufunkuina kabidi njila pakafundaye ne: “Tunyemayi ne dinanukila lubilu ludi lututekela kumpala, batangile ne ntema kudi Yezu, Ntunga-mulongo ne Mupuangaji wa ditabuja dietu.” (Ebelu 12:1, 2, NW) Eyowa, bua kutshimuna mu dinyema lubilu lua Buena-nkristo ne disanka, tudi ne bua kutangila dia muamua dia bintu bitudi tumona bidi biteka buludiludi kumpala kuetu. Kadi mmunyi mutudi “batangile ne ntema” kudi Yezu, ne nebituenzele tshinyi?

Bu tshilejilu, mu 1914, Yezu wakatekibua bu Mukalenge wa Bukalenge bua Nzambi, ne udi ukokesha kumbukila mu diulu. Bushuwa, bionso ebi, kabiena bimueneka ku mêsu etu mena dîna. Kadi, bituikala “batangile ne ntema” kudi Yezu, lumonu luetu lua mu nyuma nelutuambuluishe bua kumona se: udi mpindieu mudiakaje bua kufikisha ndongoluelu eu mubi wa malu wa mpindieu ku ndekelu ne kuela Satana ne bisumbu biende bia ba-demon mu nkanu ya nsombelu wa bukàta. Kupita apu kabidi, lumonu luetu lua mu nyuma nelusokolole bulongolodi bupiabupia bua dikema muikala ‘kamuyi lufu kabidi, nansha madilu, nansha mbila, nansha bisama kabitshiyiku kabidi. Bintu bia kale bijimine.’​—Buakabuluibua 19:11-16; 20:1-3; 21:4, NW.

Nunku, pamutu pa kuikala bazengeja kudi makenga a tshitupa tshîpi atudi mua kuakama dituku dionso, bua tshinyi kubenga kutuishila ditangila dietu pa bintu bidi bia tshiendelele? Ne mêsu a ditabuja, bua tshinyi kubenga kutangila dia muamua dia bubedi ne lukuka bìdì pa buloba ebu bunyanguke bua kumona mparadizu muule tente ne bantu badi ne makanda a mubidi, bena disanka, ne batabaledianganyi? Bua tshinyi kubenga kutangila dia muamua dia bilema bietu, bia ku mubidi ne bia mu nyuma, ne kudimona bapikula ku bintu ebi bua kashidi ku diambuluisha dia mushinga wa mulambu wa tshia-bupikudi wa Kristo? Bua tshinyi kubenga kutangila dia muamua dia dishipangana dishiya panyima kudi mvita, buntomboji, ne tshikisu ne kumona babiishibue bapiabapia benda bashidimunyibua mu ditalala ne buakane bia Yehowa?

Kupita’apu, ‘kutangila ne ntema’ kudi Yezu nekukonge kabidi dituishila lumonu luetu lua mu nyuma pa tshidi Bukalenge, nansha mudibu kabuyi bumueneka, bumane kukumbaja munkatshi mua bantu ba Nzambi pa buloba: buobumue, ditalala, dinanga, disuangana dia buena-muntu, ne dilubuluka dia mu nyuma. Muntu mukaji kampanda muena nkristo mu Allemagne, kunyima kua dibandila video wa United by Divine Teaching (Batuangaja kudi dilongesha dia Nzambi) wakafunda ne: “Video eu neangambuluishe bitulu bitulu bua kuvuluka se: bana betu ba balume ne ba bakaji pa buloba bujima badi dîba edi benda basadila Yehowa ne lulamatu luonso​—pa kuenza nunku kabiyi kutangila ngandamuinu wa bantu. Mmunyipu mudi buobumue buetu bua buena-muntu ne mushinga mu bulongolodi ebu bua tshikisu ne lukinu!”

Udiku “umona” Yehowa, Yezu, banjelu bena lulamatu, ne miliyo ya bena nkristo nebe bikale ku luseke luebe anyi? Bikalabi nanku, kuakutamba kulua muena kanyinganyinga bua “ntatu ya pa buloba” idi mua kukujamija mu diteketa mikolo ne kukuvuija ‘kuyi ukuama mamuma’ mu mudimu wa Buena-nkristo. (Matewuse 13:22, MMM) Nunku ‘tangila ne ntema’ kudi Yezu pa kutuishila mêsu ebe a mu nyuma pa Bukalenge buteka bua Nzambi ne mabenesha abu, a mpindieu ne atshilualua.

Enza madikolela bua kupeta muoyo bua kumona tshidi katshiyi tshimueneka!

Pa kumona dishilangana dinene pankatshi pa bulongolodi bupiabupia bua tshiendelele bua Nzambi ne bulongolodi bukulukulu bua lelu budi buenda bushimbuka, tudi ne bua kusakibua ku dikala ne nsombelu wenza bua se: tubadibue bakanyine bua kuikala ne muoyo bua kumona mu ngakuilu wa ku dîna bintu bitudi mua kumona anu ku diambuluisha dia mêsu a ditabuja lelu’eu. Nebikale bikole bua misumba ya babiishibue kuitabujabu tshiamona mêsu abu pajudibuabu bua kumona mparadizu wa buakane pa buloba mushilangane bikole ne bulongolodi buvuabu bamone kumpala kua lufu luabu. Tshinka disanka dietu pa kuikala ne muoyo bua kubakidila ne kubumvuija tshidi Nzambi muenze!​—Fuanyikija ne Yoele 2:21-27.

Eyowa, mmunyipu mudi lumonu lua mu nyuma ne mushinga, ne munyipu mudibi bikengela bua kululama lutue! Tudi mua kuenza nunku pa kuditua pa tshibidilu mu dilonga dia Bible dia muntu pa nkayende, kubuela mu bisangilu bia bena nkristo, kuakula ne bakuabu pa bidi bitangila ditekemena dietu diashila pa Bible, ne pa mutu pa bionso, kusambila bua kupeta buludiki bua Nzambi. Ebi nebilame lumonu luetu lua mu nyuma lutue ne lulenga, bitupetesha mushindu wa kutangila dia muamua dia bintu bitudi tumona!