Ntempelo munene wa mu nyuma wa Yehowa

“Tudi ne muakuidi munene bu wa mushindu’eu, . . . musadidi wa patoke wa muaba munsantu ne wa ntenta mulelela, udi Yehowa muase, kadi ki mmuntu.”​—EBELU 8:1, 2, NW.

1. Ndilongolola kayi dia dinanga divua Nzambi muenze bua bukua-bantu buena mpekatu?

YEHOWA NZAMBI, ku dinanga diende dinene bua bantu, wakapetesha mulambu bua kumbusha mpekatu ya bukua-bantu. (Yone 1:29; 3:16) Biakalomba bua kumbusha muoyo wa Muanende wa balume muanabute kumbukila mu diulu ne kuwela mu difu dia nsongakaji kampanda muena Yuda mutshikale kamama muena dîna dia Mariya. Muanjelu wa Yehowa wakumvuija Mariya patoke se: muana uvuaye ne bua kuimita uvua ne bua ‘kubikidibua ne: wa tshijila, Muana wa Nzambi.’ (Luka 1:34, 35) Yozefe, ukàvua mubangile Mariya, bakamuambila bualu buvua butangila dimitshibua mu tshishima dia Yezu ne wakamanya se: yeye eu uvua ne bua ‘kusungila bantu bende ku mibi yabu.’​—Matayo 1:20, 21.

2. Ntshinyi tshiakenza Yezu pakakumbajaye bidimu bu 30, ne mbua tshinyi?

² Mu dikola diende, Yezu uvua ne bua kuikala mujingulule amue a ku malu aa adi atangila diledibua diende mu tshishima. Uvua mumanye se: Tatuende wa mu diulu uvua ne mudimu wa dipandisha mioyo uvuaye mumupeshe bua kuenza pa buloba. Nunku, pakavuaye muntu mushindame wa bidimu bitue ku 30, Yezu wakalua kudi muprofete wa Nzambi Yone bua kutambuishibua mu musulu wa Yordane.​—Mâko 1:9; Luka 3:23.

3. (a) Ntshinyi tshivua Yezu usua kumvuija ku mêyi aa: ‘Kuakasua nyama mishipa ne bintu bifila’? (b) Ntshilejilu kayi tshia pa buatshi tshivua Yezu mufile bua bonso badi basue kulua bayidi bende?

³ Yezu uvua usambila dîba dia batismo wende. (Luka 3:21) Mbimueneke patoke se: uvua utumika buende yeye muine ne Musambu wa 40:6-8, anu bu muakalejibuabi pashishe kudi mupostolo Paulo ne: ‘Kuakasua nyama mishipa ne bintu bifila, kadi wakandongoluela mubidi.’ (Ebelu 10:5) Nunku Yezu wakaleja didianjila kumanya diende dia se: Nzambi ‘kavua musue’ bua milambu ya nyama itungunuke ne kufidibua mu ntempelo wa Yeruzaleme. Bishilangane, wakajingulula se: Nzambi ukavua mulongolole mubidi mupuangane wa bumuntu buende yeye, Yezu, wa kufila bu mulambu. Ebi bivua ne bua kumbusha dikengela kayi dionso dia pa mutu dia milambu ya nyama. Pa kuleja dijinga diende dijima dia kukokela disua dia Nzambi, Yezu wakatungunuka pa kusambila ne: ‘Mona, ndi mvua (mu mukanda muvunga udi ufundibua bua bualu buanyi) bua kuenza disua diebe, Nzambi.’ (Ebelu 10:7) Ntshilejilu kayipu tshilengele tshia dikima ne budiambiki bukena budinangi tshiakaleja Yezu dituku adi bua aba bonso bavua ne bua kulua bayidi bende pashishe!​—Mâko 8:34.

4. Mmunyi muvua Nzambi muleje dianyisha diende bua didifila dia Yezu yeye muine?

⁴ Nzambi wakaleja dianyisha diende bua disambila edi dia batismo dia Yezu anyi? Tulekelayi umue wa ku bapostolo basungula ba Yezu atupe diandamuna: ‘Pakamubatizabu nunku, Yezu wakumuka mu mâyi; ne monayi, diulu diakamubulukila, yeye wakatangila nyuma wa Nzambi upueka bu nyunyu wa nkutshi, umuikila; ne umvuayi, dîyi diakafuma mu diulu ne: Eu udi Muana wanyi munanga, [undi muanyishe, NW].’​—Matayo 3:16, 17.

5. Ntshinyi tshivua tshileja mu tshimfuanyi kudi tshilambuilu tshiena-dîna tshia mu ntempelo?

⁵ Bu muakanyisha Nzambi dimulambula dia mubidi wa Yezu bu mulambu, ebi biakumvuija ne: mu ngumvuilu wa mu nyuma, tshilambuilu kampanda tshinene kupita etshi tshia mu ntempelo wa Yeruzaleme tshikavua tshimane kuzangika. Tshilambuilu tshiena-dîna, muaba uvua nyama ifidibua bua mulambu, tshivua mundidimbi wa tshilambuilu atshi tshia mu nyuma, tshivua bushuwa “disua” dia Nzambi peshi ndongoluelu wende bua kuanyisha muoyo wa bumuntu wa Yezu bu mulambu. (Ebelu 10:10) Ke bualu kayi mupostolo Paulo uvua mua kufundila bena nkristo nende se: ‘Tudi ne tshilambuilu tshidi bakuatshi ba mudimu mu ntenta [peshi, ntempelo] kabayi ne bukenji bua kudia bivuabo balambulapu.’ (Bena Hebreyi 13:10, MMM) Mu mêyi makuabu, bena nkristo balelela badi bababidila mulambu wa dibuikidila mpekatu mutambe bunene, eu wakimanshabu kudi bavule ba ku bakuidi bena Yuda.

6. (a) Ntshinyi tshiakazangikibua ku batismo wa Yezu? (b) Ntshinyi tshidi muanzu Masiya, peshi Kristo, umvuija?

⁶ Diedibua manyi a spiritu munsantu dia Yezu divua diumvuija ne: Nzambi ukavua mupunge mpindieu ndongoluelu wende mujima wa ntempelo wa mu nyuma, ne Yezu muikale usadilamu bu Muakuidi Munene. (Bienzedi 10:38; Ebelu 5:5) Muyidi Luka wakenzejibua kudi spiritu bua kufunkuna ne dishindika dionso tshidimu tshiakenzeka bualu ebu bua mushinga mukole bu “tshidimu tshia dikumi ne tshitanu tshia bukalenge bua Tiberiyo Kezare.” (Lukase 3:1-3, MMM) Ntshikumbanangane ne tshidimu tshia 29 B.B.​—mbingu 69 bulu bulu ya bidimu, peshi bidimu 483, kumbukila ku tshikondo tshivua Mukalenge Artaxerxes mutume dîyi bua bimanu bia Yeruzaleme kuibakuludibuabi. (Nehemiya 2:1, 5-8) Bilondeshile mulayi, “Masiya Mulombodi” uvua ne bua kumueneka mu tshidimu atshi tshidianjila kufunkuna. (Danyele 9:25, NW) Mbimueneke se: bena Yuda ba bungi bakavua bamane kumanya bualu ebu. Luka udi umanyisha ne: “bantu bonso bavua batekemene” dimueneka dia Masiya, peshi Kristo, mianzu idi ifumina ku muaku wa tshiena-Ebelu ne wa tshiena-Greke idi ne diumvuija dia muomumue, “muela manyi.”​—Lukase 3:15, MMM.

7. (a) Ntshikondo kayi tshivua Nzambi muele “Munsantu wa Minsantu” manyi, ne ntshinyi tshivua bualu ebu bumvuija? (b) Mbualu kayi bukuabu buakenzekela Yezu ku batismo wende?

⁷ Mu tshikondo tshia batismo wa Yezu, tshisombelu tshia mu diulu tshia Nzambi tshiakedibua manyi, peshi kutekibua ku luseke, bu “Munsantu wa Minsantu” mu ndongoluelu munene wa ntempelo wa mu nyuma. (Danyele 9:24) “Ntenta mulelela [peshi, ntempelo], udi Yehowa muase, kadi ki mmuntu” bakavua batuadije kutumika nende. (Ebelu 8:2, NW) Kabidi, ku batismo wende wa mâyi ne spiritu munsantu, Yezu Kristo muntu wakaledibua tshiakabidi bu Muana wa mu nyuma wa Nzambi. (Fuanyikija ne Yone 3:3.) Ebi biakumvuija ne: Nzambi uvua ne bua kupingaja tshiakabidi Muanende ku muoyo wa mu diulu pavua tshikondo ne bua kukumbana, muaba uvuaye ne bua kusadila ku tshianza tshia balume tshia Tatuende bu Mukalenge ne Muakuidi Munene “kashidi, bu muvua Melkisedeke.”​—Bena Hebreyi 6:20, MMM; Musambu wa 110:1, 4.

Mutambe-Bunsantu wa mu diulu

8. Nngikadilu kayi mipiamipia yakangata nkuasa wa bumfumu wa Nzambi mu diulu tshikondo atshi?

⁸ Dituku dia batismo wa Yezu, nkuasa wa bumfumu wa mu diulu wa Nzambi wakangata ngikadilu mipiamipia. Ditumika mushindu musunguluke ne mulambu wa muntu mupuangane bua kubuikidila mpekatu ya bukua-bantu diakazangika bunsantu bua Nzambi budi bushilangane ne ngikadilu wa mpekatu wa bantu. Luse lua Nzambi luvua kabidi luzangika mu mushindu uvuaye mpindieu uleja didiakaja diende bua kutuyishibua, anyi kuikala mulekeledi. Nunku, nkuasa wa bumfumu wa Nzambi mu diulu wakalua bu tshibambalu tshia munda menemene tshia ntempelo, muvua muakuidi munene ubuela musangu umue ku tshidimu ne mashi a nyama bua kubuikidila mpekatu mu mushindu wa mu tshimfuanyi.

9. (a) Ntshinyi tshivua tshilamba tshikudika pankatshi pa Munsantu ne Mutambe-Bunsantu tshileja? (b) Mmunyi muakaya Yezu dia muamua dia tshilamba tshikudika tshia ntempelo wa mu nyuma wa Nzambi?

⁹ Tshilamba tshikudika tshivua tshiabuluje Munsantu ne Mutambe-Bunsantu tshivua tshimfuanyi tshia mubidi wa musunyi wa Yezu. (Ebelu 10:19, 20) Uvua tshijikilu tshiakapangisha Yezu bua kubuela kumpala kua Tatuende patshivuaye muntu pa buloba. (1 Kolinto 15:50) Ku lufu lua Yezu, ‘tshilamba tshivua tshikudika mu ntempelo tshiakapandika bipesa bibidi ku mutu kuatshi too ne kuinshi.’ (Matayo 27:51) Ebi biakaleja mu mushindu wa dikema se: tshijikilu tshivua tshipangisha Yezu bua kubuela mu diulu tshiakumbushibua tshikondo atshi. Matuku asatu kunyima, Yehowa Nzambi wakenza tshishima tshia pa buatshi. Wakabiisha Yezu ku bafue, ki mbu muntu wa musunyi ne mashi udi kabidi ne bua kufua, kadi bu tshifukibua tshia mu nyuma tshia butumbi ‘tshidi tshishala tshiendelele.’ (Ebelu 7:24) Matuku 40 pashishe, Yezu wakabanda mu diulu ne wakabuela mu “Munsantu wa Minsantu” mulelela, ‘bua kumuenekaye mpindieu kumpala kua Nzambi bua bualu buetu.’​—Ebelu 9:24.

10. (a) Ntshinyi tshiakenzeka kunyima kua Yezu mumane kufila mushinga wa mulambu wende kudi Tatuende wa mu diulu? (b) Ntshinyi tshivua diedibua manyi a spiritu munsantu diumvuija bua bayidi ba Kristo?

¹⁰ Nzambi wakanyisha mushinga wa mashi mitshikija a Yezu bu dibuikidila bua mpekatu ya bukua-bantu anyi? Bushuwa wakanyisha. Tshijadiki tshia bualu ebu tshiakalua matuku 50 bulu bulu kunyima kua dibiishibua dia Yezu, mu dituku dia difesto dia Pentekoste. Spiritu munsantu wa Nzambi wakitshikijibua pa bayidi 120 ba Yezu badisangishe pamue mu Yeruzaleme. (Bienzedi 2:1, 4, 33) Amu bu Muakuidi wabu Munene, Yezu Kristo, bakedibua mpindieu manyi bua kusadila bu “buakuidi bunsantu, bua kufila milambu ya mu nyuma” bilondeshile ndongoluelu wa ntempelo munene wa mu nyuma wa Nzambi. (1 Petelo 2:5, NW) Kupita apu, bela manyi aba bakenza ditunga dipiadipia, “ditunga dinsantu” dia Nzambi dia Izalele wa mu nyuma. Bua bualu ebu, milayi yonso ya bintu bimpe ivua itangila Izalele, bu mudi dilaya dia “tshiovo tshipiatshipia” difunda mu Yelemiya 31:31 (NW), ivua ne bua kukumbanyina tshisumbu tshia bena nkristo bela manyi, “Izalele wa Nzambi” mulelela.​—1 Petelo 2:9; Galatia 6:16, NW.

Ngikadilu mikuabu ya ntempelo wa mu nyuma wa Nzambi

11, 12. (a) Ntshinyi tshivua tshileja mu tshimfuanyi kudi lubanza lua bakuidi bua Yezu, ne tshidi tshileja tshinyi bua balondi bende bela manyi? (b) Dilongo dia mâyi ntshimfuanyi tshia tshinyi, ne mmunyi mudibu batumika nadi?

¹¹ Nansha muvua Mutambe-Bunsantu tshimfuanyi tshia “diulu dine,” muaba udi Nzambi musombe mu nkuasa wa bumfumu, ngikadilu mikuabu yonso ya ntempelo wa mu nyuma wa Nzambi mmisuikakaja ku bintu bidi pa buloba. (Ebelu 9:24, NW) Mu ntempelo wa mu Yeruzaleme, muvua lubanza lua munda bua bakuidi mùvuà musanganyibua tshilambuilu bua milambu ne dilongo dinene dia mâyi, avua bakuidi batumika nawu bua kudikezula buobu bine kumpala kua kuenza mudimu wa tshijila. Bintu ebi bidi bimfuanyi bia tshinyi mu ndongoluelu wa ntempelo wa mu nyuma wa Nzambi?

¹² Bua Yezu Kristo, lubanza lua munda lua bakuidi luvua tshimfuanyi tshia nsombelu wende ukena mpekatu bu Muana wa muntu mupuangane wa Nzambi. Ku dienza midimu ya ditabuja mu mulambu wa Yezu, balondi bela manyi ba Kristo badi bitabijibua bu bena buakane. Nunku, Nzambi udi ne kabingila ka kubangata bu badi kabayi ne mpekatu. (Lomo 5:1; 8:1, 33) Pa nanku, lubanza elu ludi kabidi tshimfuanyi tshia nsombelu muambika bu muakane wa bumuntu udi bena mu buakuidi bunsantu balabula muntu ne muntu kumpala kua Nzambi. Nansha mudibi nanku, bena nkristo bela manyi batshidi amu bapange bupuangane ne bafuane kuenza mpekatu. Dilongo dia mâyi mu lubanza didi tshimfuanyi tshia Dîyi dia Nzambi, dìdì Muakuidi Munene utumika nadi bua kukezula buakuidi bunsantu ku kakese ku kakese. Pa kukokela ku ngenzelu eu wa dikezudibua, mbafike ku dipeta mmuenekelu wa bunême udi wambika Nzambi lumu ne ukoka bantu ba pambelu ku ntendelelu wende mukezuke.​—Efeso 5:25, 26; fuanyikija ne Malaki 3:1-3.

Munsantu

13, 14. (a) Munsantu wa ntempelo udi tshimfuanyi tshia tshinyi bua Yezu ne balondi bende bela manyi? (b) Ntshinyi tshidi tshitekedi tshia miendu tshia ngolo tshileja?

¹³ Tshibambalu tshia kumpala tshia ntempelo tshidi tshimfuanyi tshia nsombelu mutambe eu wa lubanza. Bua muntu mupuangane Yezu Kristo, tshidi tshimfuanyi tshia diledibua diende tshiakabidi bu Muana wa mu nyuma wa Nzambi mufundila dipingana ku muoyo mu diulu. Bamane kuangatshibua bu bakane, pa tshishimikidi tshia ditabuja diabu mu mashi mitshikija a Kristo, balondi aba bela manyi badi pabu bamona ditumika edi dia pa buadi dia spiritu wa Nzambi. (Lomo 8:14-17) Ku diambuluisha dia “mâyi [mbuena kuamba ne: batismo wabu] ne spiritu,” badi ‘baledibua tshiakabidi’ bu bana ba mu nyuma ba Nzambi. Mushindu’eu, badi ne ditekemena dia kubiishibua ne kuikala ne muoyo mu diulu bu bana ba mu nyuma ba Nzambi, pikalabu bashale ne lulamatu too ne ku lufu.​—Yone 3:5, 7, NW; Buakabuluibua 2:10.

¹⁴ Bakuidi bavua basadila munda mua Munsantu wa mu ntempelo wa pa buloba kabavua babamona kudi batendeledi bavua pambelu. Bia muomumue, bena nkristo bela manyi badi balabula nsombelu wa mu nyuma udibu kabayi nende anyi udibu kabayi bumvua tshishiki kudi bavule ba ku batendeledi ba Nzambi badi ne ditekemena dia kuikala ne muoyo wa kashidi pa buloba bua Mparadizu. Tshitekedi tshia miendu tshia ngolo tshia mu tabernakle tshidi tshimfuanyi tshia nsombelu mutokesha wa bena nkristo bela manyi. Ditumika dia spiritu wa Nzambi, anu bu manyi mela mu miendu, didi dimuangalaja butoke pa Bible. Bujinguludi budi bena nkristo bapeta bu tshipeta, kabena babulama anu buabu buobu bine. Kadi, badi batumikila Yezu, eu wakamba ne: “Nudi butoke bua bukua-bantu. . . . Butoke buenu bukenke kumpala kua bantu, bua bamone midimu yenu mimpe ne batumbishe Tatuenu udi mu diulu.”​—Matayo 5:14, 16, NW.

15. Ntshinyi tshidi tshileja mu tshimfuanyi kudi diampa didi pa mesa a mampa a mulambu?

¹⁵ Bua kushala mu nsombelu eu mutokesha, bena nkristo bela manyi badi ne bua kudidiisha pa tshibidilu ne tshidi tshilejibue mu tshimfuanyi bu diampa didi pa mesa a mampa a mulambu. Mpokolo wabu wa mushinga wa biakudia bia mu nyuma n’Dîyi dia Nzambi, didi dibalomba bua kuenza madikolela bua kubala ne kueleelapu meji. Yezu wakalaya kabidi bua kubapetesha “biakudia biabu pa tshikondo tshiakane” ku butuangaji bua “mupika [wende] wa lulamatu ne wa budimu.” (Matayo 24:45, NW) “Mupika” eu nkasumbu kajima ka bena nkristo bela manyi pa buloba mu tshikondo kayi tshionso tshisunguluke. Kristo mmutumike ne kasumbu aka kela manyi bua kutangalaja mamanyisha pa dikumbana dia milayi ya mu Bible ne kufila mu tshikondo tshiakanyine buludiki pa ditumika ne mêyi-maludiki a mu Bible mu nsombelu wa matuku onso wa buena-lelu. Nunku, bena nkristo bela manyi badi badidiisha ne dianyisha dionso ne biakudia bionso bia mu nyuma bia mushindu’eu. Kadi dikuatshisha dia nsombelu wabu wa mu nyuma ndisuikakaja ku bivule bipite ne kule dimanya patupu dia Nzambi mu bieledi biabu bia lungenyi ne mu mitshima yabu. Yezu wakamba ne: ‘Bidia bianyi bidi kuenza bu mudi wakuntuma musue ne kujikija mudimu wende.’ (Yone 4:34) Bia muomumue, bena nkristo bela manyi badi balabula disankishibua ku dienza diabu dia madikolela ku dituku ku dituku bua kuenza disua disokolola dia Nzambi.

16. Ntshinyi tshidi tshileja mu tshimfuanyi kudi mudimu muenza ku tshilambuilu tshia musenga wa kamonya?

¹⁶ Dinda ne dilolo, muakuidi kampanda uvua woshila Nzambi musenga wa kamonya pa tshilambuilu tshia musenga wa kamonya mu Munsantu. Dîba dimue dimue adi, batendeledi bakena bena mu mulongo wa bakuidi bavua basambila Nzambi bimane mu mbanza ya pambelu ya ntempelo wende. (Luka 1:8-10) “Musenga wa kamonya,” ke mudi Bible umvuija, “udi uleja masambila a bansantu.” (Buakabuluibua 5:8, NW) “Disambila dianyi dibande kuudi bu muishi wa kamonya,” ke muakafunda mufundi wa misambu Davidi. (Musambo wa 141:2, MMM) Bena nkristo bela manyi badi kabidi bangata ne mushinga muabi wabu wa kusemena kudi Yehowa mu masambila ku butuangaji bua Yezu Kristo. Masambila a disuminyina àdì apatuka mu mutshima adi bu musenga wa kamonya wa dipembu dimpe. Bena nkristo bela manyi badi kabidi basamuna Nzambi mu mishindu mikuabu, pa kutumika ne mishiku yabu bua kulongesha bakuabu. Ditantamena diabu mu nsombelu mikole ne muoyo mutoke wabu mu mateta bidi bitamba kusankisha Nzambi.​—1 Petelo 2:20, 21.

17. Ntshinyi tshivua tshikongibua mu dikumbana dia tshindidimbi tshia mulayi tshifila kudi dibuela dia kumpala dia muakuidi munene mu Mutambe-Bunsantu mu Dituku dia Dibuikidila?

¹⁷ Dituku dia Dibuikidila, muakuidi munene wa Izalele uvua ne bua kubuela mu Mutambe-Bunsantu ne kuosha musenga wa kamonya pa tshioshelu tshia ngolo tshia kamonya tshivua ne makala a mudilu mukole. Ebi bivua ne bua kuenjibua kumpala kua kutualaye mashi a bintu bifila bua mpekatu. Mu dikumbana dia tshimfuanyi etshi tshia mulayi, muntu Yezu wakalama muoyo mutoke mu malu onso kudi Yehowa Nzambi kumpala kua kufilaye muoyo wende bu mulambu umuepele wa tshiendelele bua mpekatu yetu. Nunku wakaleja ne: muntu mupuangane udi mua kulama muoyo mutoke wende kudi Nzambi nansha Satana mumukebele tshifimpakaji kayi tshionso. (Nsumuinu 27:11) Pakatetshibuaye, Yezu wakatumika ne masambila ‘ne muadi mukole ne binsonji . . . , ne bakamumvuila bua ditshina diende dia Nzambi.’ (Ebelu 5:7) Mu mushindu eu wakatumbisha Yehowa bu Mfumu mutambe bunene muakane ne mukumbanyine wa bukua-bifukibua. Nzambi wakafuta Yezu pa kumubiisha ku bafue ne kumupa muoyo ukena ufua mu diulu. Mu muanzu wende eu mubandile, Yezu udi utuma ntema ku kabingila ka pa mutu kakamusaka ku dilua pa buloba apa, mbuena kuamba ne: kupungija bantu bena mpekatu bàdì banyingalala ne Nzambi.​—Ebelu 4:14-16.

Butumbi bupite bunene bua ntempelo wa mu nyuma wa Nzambi

18. Mmunyi mudi Yehowa mutuale butumbi bua pa buabu ku ntempelo wende wa mu nyuma?

¹⁸ “Butumbi bua nzubu eu wa mpindieu nebuvue bunene kupita bua eu wa kale,” ke muakadianjila kumanyisha Yehowa. (Hagai 2:9, NW) Pa kubiisha Yezu ku lufu bu Mukalenge ne Muakuidi Munene ukena ufua, Yehowa wakatuala butumbi bua pa buabu ku ntempelo wende wa mu nyuma. Yezu udi mpindieu mu muanzu wa dipetesha “lu[p]andu lua tshiendelele kudi bonso badi bamutumikila.” (Ebelu 5:9) Bantu ba kumpala bakaleja butumike bua mushindu’eu bavua bayidi 120 bakapeta spiritu munsantu dituku dia Pentekoste wa mu 33 B.B. Mukanda wa Buakabuluibua wakadianjila kumanyisha ne: bana ba mu nyuma ba Izalele aba bavua ndekelu wa bionso ne bua kuikala bantu 144 000. (Buakabuluibua 7:4) Kunyima kua lufu luabu, bavule ba kudibu bavua ne bua kulala mu lukita lua bukua-bantu kabayi bamanye bualu, pa kuindila tshikondo tshia dikalaku dia Yezu mu bukokeshi bua bukalenge. Dilondangana dia malu a mu milayi didi mu Danyele 4:10-17, 20-27 didi difunkuna 1914 bu tshikondo tshivua Yezu ne bua kutuadija kukokesha munkatshi mua baluishi bende. (Musambu wa 110:2) Makumi mavule a bidimu kumpala kua 1914, bena nkristo bela manyi bavua bindile ne muoyo mujima tshidimu atshi. Mvita ya kumpala ya buloba bujima ne diakabi diakakuata bukua-bantu biakafila tshijadiki tshia se: Yezu uvua bushuwa mutekibue mu nkuasa wa bumfumu bu Mukalenge mu 1914. (Matayo 24:3, 7, 8) Katupa kîpi kunyima, tshikondo tshimane kufika bua “dilumbuluisha kubangadi ku ba mu n[z]ubu wa Nzambi,” Yezu wakakumbaja dilaya didi dilonda edi kudi bayidi bende bela manyi bakavua bamane kulala mu lufu: “Nempingane kabidi, ne[n]nuangate kundi meme muine.”​—1 Petelo 4:17; Yone 14:3.

19. Mmunyi muapeta bashadile ba ku bantu 144 000 mushindu wa kubuela mu Mutambe-Bunsantu wa mu diulu?

¹⁹ Bantu 144 000 bena mu buakuidi bunsantu ki mbanji kutuibua bonso tshitampi tshia ndekelu ne kusangishibua mu tshisombedi tshiabu tshia mu diulu. Bashadile ba kudibu batshidi ne muoyo pa buloba mu nsombelu wa mu nyuma muleja mu tshimfuanyi kudi Munsantu, batapulula ne dikalaku dinsantu dia Nzambi kudi “tshilamba tshikudika,” peshi tshijikilu, tshia mibidi yabu ya misunyi. Padibu bafua ne lulamatu, badi babiishibua diakamue bu bifukibua bia mu nyuma bikena bifua bua kudisangisha pamue ne aba ba ku bantu 144 000 bakadi bamane kuikala mu diulu.​—1 Kolinto 15:51-53.

20. Mmudimu kayi wa mushinga mukole udi bashadile aba ba ku buakuidi bunsantu bakumbaja mu tshikondo etshi, ne mbipeta kayi bidi bifuminaku?

²⁰ Ne bakuidi bungi nunku basadila pamue ne Muakuidi Munenanenayi mu diulu, ntempelo wa mu nyuma wa Nzambi mmupete butumbi bua pa mutu. Eku, bashadile ba ku buakuidi bunsantu badi benza mudimu wa mushinga mukole pa buloba. Ku diambuluisha dia diyisha diabu, Nzambi udi ‘unyukula matunga onso’ ne mêyi a dilumbuluisha diende, anu bu muvuabi bidianjila kumanyisha mu Hagai 2:7 (NW). Mu tshikondo tshimue tshimue etshi, miliyo ya batendeledi balejibue bu “bintu bilengele bia mu matunga onso” badi bakukila mu mbanza ya pa buloba ya ntempelo wa Yehowa. Mmunyi mudibu bapeta muaba mukumbanyine mu ndongoluelu wa Nzambi bua ntendelelu, ne mbutumbi kayi bua matuku atshilualua butudi mua kutekemena bua ntempelo wende munene wa mu nyuma? Malu aa neakonkononyibue mu tshiena-bualu tshidi tshilonda.

Nkonko ya diambulula

◻ Ntshilejilu kayi tshia pa buatshi tshiakafila Yezu mu 29 B.B.?

◻ Nndongoluelu kayi wakatuadija kupatula bipeta mu 29 B.B.?

◻ Ntshinyi tshidi tshileja mu tshimfuanyi kudi Munsantu ne Mutambe-Bunsantu?

◻ Mmunyi mudi ntempelo munene wa mu nyuma mutumbishibue?

[Tshimfuanyi mu dibeji 17]

Pakedibua Yezu manyi a spiritu munsantu mu 29 B.B., bakatuadija kutumika ne ntempelo munene wa mu nyuma wa Nzambi