Udi muvuluke anyi?

Udiku muanyishe dibala nimero ya ndekelu ya Tshibumba tshia Nsentedi anyi? Nanku anji tangila né udi mua kuandamuna ku nkonko idi ilonda eyi:

◻ Mêyi a Yezu a se: ‘Muntu yonso unuajimijila mibi yende neyijimijibue,’ adi umvuija ne: bena nkristo badi mua kujimijilangana mibi anyi? (Yone 20:23)

Kakuena tshishimikidi tshia mu Mifundu bua kukoma se: bena nkristo mu tshi-bungi, anyi mene bakulu batekibue mu tshisumbu, badi ne bukenji bua kudi Nzambi bua kujimijilangana mibi. Mêyi a Yezu adi manyunguluke miaku eyi mmamueneke bu àdì asua kumvuija ne: bapostolo bakavua bamane kupetela kudi Nzambi mu mêyi au ku diambuluisha dia tshienzedi kampanda tshia spiritu bukokeshi bua pa buabu bua kujimijilangana anyi kubenga kujimijilangana mpekatu. (Tangila Bienzedi 5:1-11; 2 Kolinto 12:12.)​—15/4, dibeji dia 28.

◻ Mbualu kayi bua mushinga bùdì butangila nkudimuinu wa J. J. Stewart Perowne wa mukanda wa Misambu, mupatula bua musangu wa kumpala mu 1864?

Mu nkudimuinu wende, Perowne wakateta bua kulamata “bikole ku mfundilu wa tshiena-Ebelu, mu malu atshi a muakulu ne mu dilondangana dia biambilu.” Mu dienza nunku, wakambuluisha dipingajilula dia dîna dia Nzambi mu mfundilu wa “Yehowa.”​—15/4, dibeji dia 31.

◻ Mbulombodi kayi buvua Yezu mupeshe bamulondi pa bidi bitangila malanda abu ne mbulamatadi ya mu bulongolodi ebu?

Yezu wakamba ne: “Nunku, pingajilayi Kezare bintu bia Kezare, kadi nupingajile Nzambi bintu bia Nzambi.” (Matayo 22:21, NW) Wakamba kabidi ne: “Bikala mukokeshi wa [mbulamatadi] ukuenzeja bua kuambula bujitu bua kuya ku kilometre umue, ambula bujitu abu bua kuya nabu ku kilometre ibidi.” (Matayo 5:41, Muanda Mulenga Lelu) Mu nsombelu wa muyuki eu Yezu uvua umvuija dîyi-diludiki dia kukokela ku budisuile malomba adi mu diumvuangana ne mikenji, nansha mikale itangila malanda pankatshi pa bantu anyi itangila malu malomba a mbulamatadi adi mu diumvuangana ne mikenji ya Nzambi. (Luka 6:27-31; Yone 17:14, 15)​—1/5, dibeji dia 12.

◻ ‘Kuendela mu bulelela’ kudi kumvuija tshinyi? (Musambu wa 86:11)

Ebi bidi bikonga kutumikila malu malomba a Nzambi ne kumusadila ne lulamatu ne muoyo mululame. (Musambu wa 25:4, 5; Yone 4:23, 24)​—15/5, dibeji dia 18.

◻ Ntshinyi tshivua Yehowa mukumbaje mu dituma Yona ku Ninive?

Amu bu muakamuenekabi, mudimu wa Yona wa diyisha mu Ninive wakaleja patoke dishilangana divua pankatshi pa bena Ninive banyingaladi ne bena Izalele ba mutu mukole, bàvuà bapange menemene kuleja ditabuja ne budipuekeshi. (Fuanyikija ne Dutelonome 9:6, 13; Yona 3:4-10.)​—15/5, dibeji dia 28.

◻ Nyoka ne “mukaji” badibu batela mu Genese 3:15 mbanganyi?

Nyoka ki nnyoka wa patupu, kadi ng’eu wakatumika nende, Satana Diabolo. (Buakabuluibua 12:9) “Mukaji” ki ng’Eva, apu mbulongolodi bua mu diulu bua Yehowa, mamu wa basadidi bende bela manyi a spiritu bàdì pa buloba. (Galatia 4:26)​—1/6, dibeji dia 9.

◻ Mmunyi mudi muntu mua kupatuka mu Babilone Munene ne kupeta dikubibua? (Buakabuluibua 18:4)

Udi ne bua kuditapulula menemene ku malongolodi a bitendelelu bia dishima ne kabidi ku bilele biawu ne tshinyikilu tshia lungenyi tshidiwu alela, ne pashishe udi ne bua kupeta dikubibua mu bulongolodi bua teokrasi bua Yehowa. (Efeso 5:7-11)​—1/6, dibeji dia 18.

◻ Bua tshinyi mukanku mmutedibue misangu mivule mu Mifundu?

Bafundi ba Bible bakakula bua ngikadilu ya mukanku bua kuleja bintu bu mudi meji, bukubi bua kudi Nzambi, ne lubilu lukole.​—15/6, dibeji dia 8.

◻ Basadidi ba Nzambi badi lelu’eu ne ditekemena dia kupiana buloba, badi pabu ne spiritu wa Nzambi bungi bumue ne bena nkristo bela manyi a spiritu anyi?

Mu tshikoso, diandamuna didi: eyowa. Spiritu wa Nzambi udi upeteka bungi bumue kudi bisumbu bionso bibidi, ne dimanya ne bujinguludi bidi bipeshibua mushindu wa muomumue kudibi bionso bibidi.​—15/6, dibeji dia 31.

◻ Bua tshinyi bidi ne dikuatshisha lelu’eu bua tuetu kukonkonona mudimu wa tshijila muenza kudi bakuidi ba Izalele mu ntempelo wa Yeruzaleme?

Mu dienza nunku, tudi mua kufika ku dianyisha tshishiki ndongoluelu wa luse udi bantu bena mpekatu lelu’eu mua kuvua kupunga ne Nzambi ku diambuluisha diende. (Ebelu 10:1-7)​—1/7, dibeji dia 8.

◻ Mmunyi muvua ntempelo muibidi muibaka mu Yeruzaleme mupete butumbi bunene kupita eu uvua muibaka kudi Solomo?

Ntempelo muibidi wakanenga bidimu 164 kupita eu wa Solomo. Batendeledi bapite bungi ba ku matunga mavule mapite bakakukila mu mbanza yende. Bualu bukuabu bunene budi se: ntempelo eu muibidi wakakidila Muana wa Nzambi, Yezu Kristo, ulongesha munda mua mbanza yende.​—1/7, mabeji 12, 13.

◻ Ntshikondo kayi tshivua Nzambi muase ntempelo wende wa mu nyuma?

Bivua mu tshidimu tshia 29 B.B. pakaleja Nzambi dianyisha diende bua disambila dia batismo dia Yezu. (Matayo 3:16, 17) Dianyisha dia Nzambi dia difila dia mubidi wa Yezu divua diumvuija ne: mu ngumvuilu wa mu nyuma, tshilambuilu kampanda tshinene kupita etshi tshia mu ntempelo wa Yeruzaleme tshikavua tshimane kutuadija mudimu.​—1/7, mabeji 14, 15.

◻ Bua tshinyi tudi ne bua kuikala tufuilangana luse?

Difuila muenji wa bubi luse padiye ululomba didi ne mushinga mukole bituikala basue kulama buobumue bua bena nkristo. Lukuna ne dilaminangana tshiji nebituibe ditalala dia mu tshieledi tshia lungenyi. Bituikala katuyi tufuilangana luse, kudi njiwu ya se: dimue dituku Yehowa neabenge pende kutulekelela mpekatu yetu. (Matayo 6:14, 15)​—15/7, dibeji dia 18.

◻ Mmunyi muvua bena Izalele mua kulua bansantu?

Bunsantu buvua mua kuikalaku amu ku dikala diabu ne malanda masheme ne Yehowa, Nzambi munsantu, ne ku ntendelelu wabu mukezuke buende yeye. Bavua bakengela dimanya dijalame dia “Mutambe Bunsantu” bua kumutendelela mu bunsantu, mu bupeluke bua ku mubidi ne bua mu nyuma. (Nsumuinu 2:1-6; 9:10, NW)​—1/8, dibeji dia 11.