Yehowa akubadile malu mimpe

“Bualu ebu . . . ubuvuluke buanyi meme, O Nzambi wanyi . . . Umvuluke, O Nzambi wanyi, bua malu mimpe.”​—NEHEMIYA 13:22, 31, NW.

1. Ntshinyi tshidi tshiambuluisha aba badi badilambule kudi Nzambi bua kudiandamuina bimpe kudi Yehowa?

BASADIDI ba Yehowa badi ne diambuluisha dionso didi dikengedibua bua kudiandamuina bimpe kudiye. Bua tshinyi? Bualu badi ne malanda makole ne Nzambi bu mudibu bena mu bulongolodi buende bua pa buloba. Mmubasokoluele malongolola ende, ne mmubapeshe diambuluisha ne busunguluji bua mu nyuma ku diambuluisha dia spiritu wende munsantu. (Misambu 51:11; 119:105; 1 Kolinto 2:10-13) Pa kutangila nsombelu eyi ya pa buayi, Yehowa udi ulomba ne dinanga dionso bua basadidi bende ba pa buloba badiandamuine kudiye bua tshidibu mene ne bua tshidibu bakumbaja ku bukole buende ne ku diambuluisha dia spiritu wende munsantu.

2. (a) Mmu mishindu kayi muvua Nehemiya mudiandamuine bimpe kudi Nzambi? (b) Nehemiya wakakomesha mukanda udi ne dîna diende ne dilomba kayi?

² Muntu umue wakadiandamuina bimpe kudi Nzambi uvua Nehemiya, mutuadi wa dikopo wa Mukalenge wa bena Perse Atashasete (Wa-tshianza-tshile). (Nehemiya 2:1) Nehemiya wakalua ngovena wa bena Yuda ne wakibakulula tshimanu tshia Yeruzaleme kumpala kua baluishi ne njiwu mivule. Muikale ne lukunukunu bua ntendelelu mulelela, wakashindika Mikenji ya Nzambi ne kuleja diditatshisha bua bavua bakengeshibua. (Nehemiya 5:14-19) Nehemiya wakabela bena Lewi bua kudikezulabu pa tshibidilu, kulama biibi, ne kusantuisha dituku dia Nsabatu. Nunku uvua mua kusambila ne: “Bualu ebu, kabidi, ubuvuluke buanyi meme, O Nzambi wanyi, ne umfuile luse bilondeshile divulangana dia bulenga-bunangi buebe.” Kabidi, mu mushindu muakanyine, Nehemiya wakakomesha mukanda wende mufundisha ku spiritu wa Nzambi ne dilomba edi: “Umvuluke, O Nzambi wanyi, bua malu mimpe.”​—Nehemiya 13:22, 31, NW.

3. (a) Mmunyi muudi mua kumvuija muntu udi wenza malu mimpe? (b) Diela meji pa nsombelu wa Nehemiya didi mua kutufikisha ku didiela nkonko kayi?

³ Muntu udi wenza malu mimpe udi ne ngikadilu milenga ne udi wenza bienzedi biakane bua diakalenga dia bakuabu. Nehemiya uvua muntu wa nunku. Uvua ne ditshina dia Nzambi dia kanemu kabidi ne lukunukunu lukole bua ntendelelu mulelela. Kupita apu, uvua ne dianyisha bua masanka ende mu mudimu wa Nzambi ne wakadiandamuina bimpe kudi Yehowa. Diela meji pa nsombelu wende didi mua kutufikisha ku didiebeja tuetu bine se: ‘Mmunyi mundi ngangata masanka anyi a mudimu pamue ne majitu anyi bia kudi Nzambi? Ndidiandamuina dia mushindu kayi dindi mfila kudi Yehowa Nzambi ne Yezu Kristo?’

Dimanya didi dituambika bujitu bua kudiandamuina

4. Mmudimu kayi uvua Yezu mupeshe balondi bende, ne ntshinyi tshivua aba bavua “badiakaje bimpe bua muoyo wa kashidi” benza?

⁴ Yezu wakapesha balondi bende mudimu eu: “Ndayi ne nuvuije bantu ba mu matunga onso bayidi, nubatambuishe . . . , nubalongeshe mua kutumikila mêyi onso andi munutumine.” (Matayo 28:19, 20, NW) Bantu bavua ne bua kuvuijibua bayidi pa kulongeshibua. Nunku aba bavua balongeshibue ne bavua “badiakaje bimpe bua muoyo wa kashidi” bavua ne bua kutambuishibua, bu muakatambuishibua Yezu. (Bienzedi 13:48, NW; Mâko 1:9-11) Dijinga diabu dia kutumikila mêyi onso avuaye mutume divua ne bua kufumina mu mutshima. Bavua ne bua kufika ku didilambula pa kulonga dimanya dijalame dia Dîyi dia Nzambi ne kuditumikila.​—Yone 17:3.

5, 6. Mmunyi mutudi ne bua kumvua Yakobo 4:17? Umvuija mushindu wa kutumika nende.

⁵ Padi dimanya dietu dia Mifundu diondoka bikole, tshishimikidi tshia ditabuja dietu tshidi tshilengela bikole. Ne nunku didiandamuina dietu kudi Nzambi didi dilua dipite bunene. Yakobo 4:17 udi wamba ne: “Bikala muntu mumanye mua kuenza tshidi tshiakane, kadi kayi utshienza, bidi mpekatu buende yeye.” (NW) Mbimueneke patoke se: tshiambilu etshi nnkomenu wa tshivua muyidi Yakobo ufuma ku diamba pa bidi bitangila diditumbisha pamutu pa kuikala menemene ku bukokeshi bua Nzambi. Bikala muntu mumanye se: kêna mua kukumbaja bualu nansha bumue budi bunenga kabiyi ku diambuluisha dia Yehowa kadi kayi wenza mushindu’eu, bualu ebu budi mpekatu. Kadi mêyi aa a Yakobo tudi mua kualamika kabidi mpekatu ya kalèngù. Tshilejilu, mu mufuanu wa Yezu wa mikoko ne mbuji, mbuji mmipishibue, ki mbua bienzedi bibi, kadi mbua dipanga kuambuluisha bana babu ne Kristo.​—Matayo 25:41-46.

⁶ Muntu mukuabu uvua ulonga Bible ne Bantemu ba Yehowa uvua udiunda amu kakese mu malu a mu nyuma, bimueneka ne: bualu kavua ulekela dinua makanya, nansha muvuaye mumanye se: uvua ne bua kualekela. Mukulu kampanda wakamulomba bua kubala Yakobo 4:17. Pakamanaye kufila diumvuija dia mvese eu, mukulu eu wakamba ne: “Nansha muudi kuyi mutambule, udi ne bua kudiandamuina bua bualu ebu ne kudiambuila bujitu buonso bua dipangadika diebe.” Diakalenga, muntu eu wakandamuna bimpe, kulekelaye dinua makanya, ne kakanenga bua kukumbaja malu malomba bua batismo bu tshimanyinu tshia didilambula diende kudi Yehowa Nzambi.

Tudi ne bua kudiandamuina bua mudimu wetu

7. Mmushindu kayi umue utudi mua kuleja dianyisha dietu bua “dimanya mene dia Nzambi”?

⁷ Dijinga dietu dia mu mutshima didi ne bua kuikala dia kusankisha Mutufuki. Mushindu umue wa kuleja dianyisha bua “dimanya mene dia Nzambi” nkukumbaja mudimu wa dienza bayidi ba Muanende, Yezu Kristo. Eu udi kabidi mushindu wa kuleja dinanga dietu bua Nzambi ne bua muntu netu. (Nsumuinu 2:1-5, NW; Matayo 22:35-40) Eyowa, dimanya dietu dia Nzambi didi dituambika bujitu bua kudiandamuina kudiye, ne tudi ne bua kuangata bantu netu bu bayidi ba mu matuku adi kumpala.

8. Bua tshinyi tudi mua kuamba ne: Paulo wakadiumvua muikale ne bua kudiandamuina kudi Nzambi bua mudimu wende?

⁸ Mupostolo Paulo uvua mumanye ne: ditaba lumu luimpe ne muoyo mujima ne dilutumikila divua difikisha ku lupandu, pavua eku dilubenga mua kutuala kabutu. (2 Tesalonike 1:6-8) Nunku wakadiumvua muikale ne bujitu bua kudiandamuina kudi Yehowa bua mudimu wende. Bushuwa, Paulo ne balunda bende bavua banyisha bikole mudimu wabu mushindu wa se: bavua bepuka ne ntema yonso bua kumueneka mene ku mêsu kua bantu bu bavua batapa makasa ku mudimu wabu. Kupita apu, mutshima wa Paulo wakamusaka bua kuamba ne: “Nunku, bingamanyisha lumu luimpe, ki nkabingila ka meme kuditumbishila, bualu ndikengedibua didi dingomekela. Bushuwa, diakabi ndianyi bingikala tshiyi mmanyisha lumu luimpe!”​—1 Kolinto 9:11-16, NW.

9. Ndibanza kayi dinene didi bena nkristo bonso ne bua kufuta?

⁹ Bu mutudi basadidi ba Yehowa badilambule, ‘dikengedibua ndituomekela bua kumanyisha lumu luimpe.’ Mmudimu mutuambika wa kuyisha mukenji wa Bukalenge. Tuakitaba bujitu abu patuakadilambula tuetu bine kudi Nzambi. (Fuanyikija ne Luka 9:23, 24.) Kusakidil’apu, tudi ne dibanza ditudi ne bua kufuta. Paulo wakamba ne: ‘Ndi muena dibanza wa bena Greke ne wa Basenji kabidi, ne wa bena lungenyi ne wa bapote kabidi. Nunku, bu mundi mua kuenza, ndi mudilongolole bua kuamba lumu luimpe kudi nuenu kabidi badi mu Roma.’ (Lomo 1:14, 15) Paulo uvua muena dibanza bualu uvua mumanye ne: wende mudimu uvua wa kuyisha bua bantu kumvuabu lumu luimpe ne kupandishibuabu. (1 Timote 1:12-16; 2:3, 4) Nunku wakatumika bikole bua kukumbaja mudimu wende ne kufuta diende dibanza kudi bantu nende. Bu mutudi bena nkristo, tudi petu ne dibanza dia nunku ditudi ne bua kufuta. Dimanyisha Bukalenge didi kabidi mushindu wa mushinga utudi tuleja dinanga kudi Nzambi, kudi Muanende, ne kudi bantu netu.​—Luka 10:25-28.

10. Bamue mbenze tshinyi bua kualabaja mudimu wabu?

¹⁰ Mushindu mukuabu wa kufila didiandamuina dianyishibue kudi Nzambi nkutumika ne makokeshi etu bua kualabaja mudimu wetu. Tshilejilu: Bidimu bidi panshi ebi, bisumbu bivule bia bantu ba matunga makuabu mbibuele mu Grande-Bretagne. Bua kufikisha lumu luimpe kudi bantu aba, bampanda-njila (bamanyishi ba Bukalenge ba ku dîba ne ku dîba) bapite pa 800 ne nkama ya bakuabu Bantemu badi benda balonga miakulu mishilangane. Bualu ebu mbufikishe ku tshisonsodi tshimpe mu mudimu. Mpanda-njila kampanda udi ulongesha kalasa ka tshiena-Chine wakamba ne: “Katshia tshivuaku muele meji ne: mvua mua kulongesha nansha muakulu wanyi mene kudi Bantemu bakuabu, bua buobu kumona mua kuabanyangana bulelela ne bakuabu mu mushindu eu. Bidi bisankisha be!” Udiku mua kualabaja mudimu webe mu mushindu wa muomumue anyi?

11. Ntshipeta kayi tshiakamueneka pakafila muena nkristo kampanda bumanyishi bua mu mpukapuka?

¹¹ Pamu’apa, muntu ne muntu wa kutudi udi mua kuenza muende muonso bua kupandisha muntu udi wamba kufua mu mâyi. Basadidi ba Yehowa badi bia muomumue ne dijinga dikole dia kutumika ne makokeshi abu bua kufila bumanyishi mu tshikondo tshionso. Ntemu kampanda mu matuku mashale aa wakasomba ku luseke lua mukaji kansanga mu bise ne kuakula nende pa Mifundu. Musonsola kudi malu akumvuaye, mukaji eu wakela nkonko mivule. Pakavua Ntemu eu usua kutuluka mu bise, mukaji eu wakamusengelela bua kuluaye kuende pamutu pa kutuluka, bu mutshivuaye ne nkonko ya bungi. Ntemu eu e kuitaba. Tshipeta? Dilonga dia Bible diakatuadija, ne ngondo isambombo pashishe mukaji eu wakalua mumanyishi wa Bukalenge ukena mutambule. Kakanenga bua kutuadija kulombola yeye muine malonga asambombo a Bible kumbelu. Ndifutu kayipu didi disonsola padi muntu utumika ne makokeshi ende mu mudimu wa Bukalenge!

12. Mmunyi mutudi mua kutumika ne makokeshi etu a mutudi ba-ministre bua kupatula bipeta bimpe mu mudimu wa budimi?

¹² Tudi mua kutumika ne makokeshi etu a mutudi ba-ministre mu mushindu udi upatula bipeta mu budimi pa kutumika ne mikanda bu mudi eu wa mabeji 192 wa Dimanya didi difikisha ku muoyo wa kashidi. Mu ngondo wa Tshisanga 1996, Komité wa difunda wa Kasumbu Kaludiki ka Bantemu ba Yehowa ukavua mufile dianyisha bua dipatula dia mukanda wa Dimanya mu miakulu mipite pa 140, ne kutuadija tshikondo atshi kopi yawu 30 500 000 ikadi mimana kupatula mu miakulu 111. Mukanda eu uvua mufunda ne tshipatshila tshia kuambuluisha balongi ba Bible bua kulonga bikumbanyine pa Dîyi dia Nzambi ne kabidi bua kudilambula kudi Yehowa ne kutambuishibua. Bu muikala bamanyishi ba Bukalenge kabayi ne bua kulombola dilonga dia Bible kumbelu ne mulongi umue umue bua bidimu bivule, badi mua kulombola malonga ne bantu bapitshidile anyi kuvudija didifila diabu mu mudimu wa ku nzubu ne ku nzubu ne mishindu mikuabu ya mudimu wetu. (Bienzedi 5:42; 20:20, 21) Bamanye mudibu ne bua kudiandamuina kudi Nzambi, badi bakoka ntema ya bantu ku madimuija a Nzambi. (Yehezekele 33:7-9) Kadi tshipatshila tshiabu tshinene ntshia kuambika Yehowa lumu ne kuambuluisha bantu ba bungi badi mua kupeteka bua kulonga malu adi atangila lumu luimpe mu lupolo luîpi lua tshikondo lutshidi lushadile ndongoluelu eu mubi wa malu.

Difila didiandamuina dimpe mu mêku

13. Bua tshinyi mêku a buena-Nzambi adi ne bua kuikala ne dilonga dia Bible dia pa tshibidilu?

¹³ Muntu yonso anyi bena dîku bonso badi balamata Buena-nkristo bulelela badi ne bua kudiandamuina kudi Nzambi ne nunku badi ne bua ‘kuya diakamue kumpala batangile ku dikola’ ne kulua “bakole mu ditabuja.” (Ebelu 6:1-3; 1 Petelo 5:8, 9, NW) Tshilejilu, aba bakaadi balonge mukanda wa Dimanya ne batambuishibue badi ne bua kukumbaja dimanya diabu dia Mifundu pa kubuela pa tshibidilu mu bisangilu ne kabidi pa kubala Bible pamue ne mikanda mikuabu ya Buena-nkristo. Mêku a buena-Nzambi adi kabidi ne bua kuikala ne dilonga dia dîku dia pa tshibidilu, bualu eu ke mushindu wa mushinga mukole bua ‘kushala batabale, kutantamana mu ditabuja, kuikala balume mene, kukuatshibua bikole.’ (1 Kolinto 16:13) Biwikala mfumu wa nzubu, udi nangananga ne bua kudiandamuina kudi Nzambi bua kujadika se: dîku diebe didi didiishibua bimpe mu malu a mu nyuma. Anu bu mudi biakudia bia ku mubidi bidi bidiisha bikale bipetesha makanda a mubidi mimpe, bia muomumue biakudia bia mu nyuma bivulavulayi ne bia pa tshibidilu bidi bikengedibua bua wewe ne dîku diebe kushala ‘balenge mu ditabuja.’​—Tito 1:13.

14. Ntshipeta kayi tshiakamueneka ku bumanyishi bufila kudi muana wa bakaji muena Izalele mulongesha bimpe?

¹⁴ Bikalaku bana mu nzubu webe, Nzambi neakubadile malu mimpe bua dibapesha dishidimuna ditshintshikila dia mu nyuma. Dilongesha bu nunku nedibapeteshe disanka, bu muakapeteshadi muana mutekete wa bakaji muena Izalele wakakuatabu kudi bena Syrie mu matuku a muprofete wa Nzambi Elisha. Wakalua musadidi wa mukaji wa mfumu wa tshiluilu tshia bena Syrie, Namana, muena nsudi. Nansha muvua muana eu wa bakaji mutshikale mutekete, wakambila mfumuende-mukaji ne: ‘Bu mukalenge wanyi muikale [“kumpala kua,” NW] muprofete udi mu Samariya, yeye uvua mua kumuondapa disama diende dia nsudi.’ Bua bumanyishi buende bufila, Namana wakaya ku Izalele, ne ndekelu wa bionso kuitabaye tshiakamuambila Elisha bua kuya kudiina misangu muanda-mutekete mu musulu wa Yordane, ne wakakezudibua ku nsudi. Kupita apu, Namana wakalua mutendeledi wa Yehowa. Mmunyipu muvuabi mua kuikala bilenge muana wa bakaji eu ku mutshima!​—2 Bakelenge 5:1-3, 13-19.

15. Bua tshinyi bidi bia mushinga bua baledi kupeshabu bana babu dishidimuna dimpe dia mu nyuma? Fila diumvuija.

¹⁵ Ki mbipepele bua kukolesha bana batshinyi ba Nzambi mu bulongolodi ebu bukena malu a tshitembu budi bulale mu bukokeshi bua Satana. (1 Yone 5:19) Nansha nanku, bituadijile ku buana bua Timote, kakuende-mukaji Loise ne mamuende, Enise, bakamulongesha Mifundu mu mushindu udi upatula bipeta. (2 Timote 1:5; 3:14, 15) Dilonga Bible pamue ne bana bebe, dibuela nabu pa tshibidilu mu bisangilu bia bena nkristo, ne dipatuka nabu imue misangu mu mudimu wetu, bionso bidi bitupa bia tshitembelu tshia dishidimuna bana diudi ne bua kufidila didiandamuina kudi Nzambi. Muena nkristo mukuabu mu Pays de Galles, ne bidimu bitue ku 80 mpindieu, udi uvuluka ne: ku ntuadijilu kua bidimu bia 1920, tatuende uvua uya nende pavuaye wenda kilometre 10 ubanda mukuna (luendu lujima lua kilometre 20) bua kuabanya trakte ya malu a mu Bible kudi bena musoko mu tshibanda tshivua tshilonda. “Mu ngendu ayi ke muvua tatuanyi ubueja bulelela mu mutshima wanyi,” ke mudiye wamba ne dianyisha.

Bakulu badi bafila didiandamuina​—Munyi?

16, 17. (a) Mmasanka kayi a mudimu avua nawu balume bakulumpe bapie mu nyuma mu Izalele wa kale? (b) Pa kutangila nsombelu mu Izalele wa kale, bua tshinyi bivule mbilombibue kudi bakulu bena nkristo lelu’eu?

¹⁶ “Nsuki mitoke idi tshifulu tshia bulengele padiyi isanganyibua mu njila wa buakane,” ke muakamba muntu wa meji Solomo. (Nsumuinu 16:31, NW) Kadi kabiena amu bidimu bia ku mubidi patupu bidi bipetesha muntu kampanda bujitu mu tshisumbu tshia bantu ba Nzambi. Balume bakulumpe ne bapie mu nyuma mu Izalele wa kale bavua basadila bu balumbuluishi ne banene bua dilongolola malu a dilumbuluisha ne dilama ditalala, bulongame buimpe, ne makanda mimpe a mu nyuma. (Dutelonome 16:18-20) Nansha mudibi bia muomumue mu tshisumbu tshia bena nkristo, bivule mbilombibue kudi bakulu bu mudi ndekelu wa ndongoluelu eu wa malu wenda usemena pabuipi. Bua tshinyi?

¹⁷ Bena Izalele bavua ‘tshisamba tshisungula’ tshivua Nzambi mupikule mu Ejipitu wa kale. Bu muakapetabu Mikenji ku butuangaji bua mutuangaji wabu, Mozese, ndelanganyi yabu ivua iledibua mu tshisamba tshimana kudilambula ne ivua mibidilangane ne mêyi a Yehowa. (Dutelonome 7:6, 11) Kadi, lelu’eu kakuena muntu udi uledibua mu tshisamba tshidilambule, ne pa kufuanyikija, amu bakese ke badi bakolela mu mêku a buena-Nzambi adi mibidilangane bimpe ne bulelela bua mu Mifundu. Nangananga aba badi mua kuikala batuadije ‘kuenda mu bulelela’ badi bakengela dishidimunyibua pa mushindu wa kuikala ne nsombelu mumvuangane ne mêyi-maludiki a mu Mifundu. (3 Yone 4) Nunku mbujitu kayipu budi pa makaya a bakulu bena lulamatu padibu ‘balamata tshitembelu tshia mêyi a lupandu’ ne bakuatshisha bantu ba Yehowa!​—2 Timote 1:13, 14.

18. Ndiambuluisha dia mushindu kayi didi bakulu ba tshisumbu ne bua kudilongolola bua kufila, ne mbua tshinyi?

¹⁸ Muana udi ulonga mua kuenda udi mua kutetuka ne kudishinda. Udi udiumvua kayi mukubibue ne ukengela diambuluisha dia baledi ne dimupolesha diabu. Muntu mudilambule kudi Yehowa udi mua kutetuka bia muomumue anyi kudishinda mu malu a mu nyuma. Nansha mupostolo Paulo wakamona muvuabi bikengela kuluangana bua kuenza tshidi tshiakane anyi tshimpe ku mêsu kua Nzambi. (Lomo 7:21-25) Balami ba tshisumbu tshia mikoko tshia Nzambi badi ne bua kupetesha dikuatshisha dia dinanga kudi bena nkristo badi benze tshilema kadi bikale bushuwa banyingalala. Pakaya bakulu kukumbula mukaji kampanda mudilambule uvua muenze tshilema tshinene, wakamba kumpala kua bayende mudilambule pende ne: “Ndi mumanye ne: nenungipate mu tshisumbu!” Kadi wakapuekesha binsonji pakamuambilabu se: bakulu bavua basua kumanya diambuluisha divua dikengedibua bua kuakajilula dîku mu malu a mu nyuma. Bamanye se: badi ne bua kudiandamuina kudi Nzambi, bakulu aba bavua ne disanka dia kukuatshisha muena kuitabuja nabu uvua ne dinyingalala.​—Ebelu 13:17.

Tungunuka ne kudiandamuina bimpe

19. Mmunyi mutudi mua kutungunuka ne kudiandamuina bimpe kudi Nzambi?

¹⁹ Bakulu ba tshisumbu ne basadidi bakuabu bonso ba Nzambi badi ne bua kutungunuka ne kudiandamuina bimpe kudi Yehowa. Ebi bidi mua kuenzeka bitualamata Dîyi dia Nzambi ne bituenza disua diende. (Nsumuinu 3:5, 6; Lomo 12:1, 2, 9) Tudi basue nangananga kuenzela aba badi balela betu mu ditabuja bimpe. (Galatia 6:10) Kadi, dinowa ditshidi amu dinene, ne bena mudimu bikale amu banya-banya. (Matayo 9:37, 38) Nunku tuenzelayi bakuabu bimpe pa kumanyisha ne tshisumi mukenji wa Bukalenge. Yehowa neatubadile malu mimpe bituakumbaja didilambula dietu, bituenza disua diende, ne bituamanyisha lumu luimpe ne lulamatu luonso.

20. Ntshinyi tshitudi tulongela ku dikonkonona nsombelu wa Nehemiya?

²⁰ Nunku, tutungunukayi ne kuikala ne bia bungi bia kuenza mu mudimu wa Mfumu. (1 Kolinto 15:58) Ne tudi ne bua kulonda tshilejilu tshia Nehemiya, wakibakulula tshimanu tshia Yeruzaleme, kushindika Mikenji ya Nzambi, ne kulubuluja ntendelelu mulelela ne lukunukunu luonso. Wakasambila bua Yehowa Nzambi amuvuluke bua malu mimpe akenzaye. Suaku udileje pebe bu muntu mudifile kudi Yehowa, ne yeye neakubadile malu mimpe.

Mandamuna ebe adi munyi?

◻ Ntshilejilu kayi tshiakafila Nehemiya?

◻ Bua tshinyi dimanya didi dituambika bujitu bua kudiandamuina kudi Nzambi?

◻ Mmunyi mutudi mua kufila didiandamuina dianyishibue kudi Yehowa mu mudimu wetu?

◻ Ntshinyi tshidi mêku mua kuenza bua kudiandamuina bimpe kudi Nzambi?

◻ Mmunyi mudi bakulu bena nkristo badiandamuina kudi Nzambi?

[Bimfuanyi mu dibeji 18]

Amu bu Paulo, tudi mua kudiandamuina bimpe kudi Nzambi bu bamanyishi ba Bukalenge

[Tshimfuanyi mu dibeji 19]

Bana bebe mbakole mu ditabuja bu muana mutekete wa bakaji muena Izalele mu nzubu wa Namana anyi?