Mushindu udi batangidi bena ngendu basadila bu balami ba lulamatu

“Bu mu mushindu udi muntu ne muntu mupete dipa, tumikayi nadi mu dikuatshilangana mudimu bamue ne bakuabu bu balami balenga ba bulenga bukena butuakanyine bua Nzambi buleja mu mishindu kabukabu.”​—1 PETELO 4:10, NW.

1, 2. (a) Mmunyi muudi mua kumvuija muaku “mulami”? (b) Mbanganyi badi munkatshi mua balami badi Nzambi utumika nabu?

YEHOWA udi utumika ne bena nkristo bonso ba lulamatu bu balami. Pa tshibidilu, mulami mmusadidi muambika bujitu bua kutangila nzubu. Udi kabidi mua kulongolola bintu bia bungenda bia mfumuende. (Luka 16:1-3; Galatia 4:1, 2) Yezu wakabikila kasumbu kende ka bela manyi balamatshi ku mikenji bàdì pa buloba ne: “mulami wa lulamatu.” Mmupeshe mulami eu “bintu biende bionso,” bìdì bikonga midimu ya diyisha Bukalenge.​—Luka 12:42-44; Matayo 24:14, 45, NW.

² Mupostolo Petelo wakamba ne: bena nkristo bonso mbalami ba bulenga bukena butuakanyine bua Nzambi buleja mu mishindu kabukabu. Muena nkristo yonso udi ne tshiende tshitupa tshisunguluke tshidiye mua kukumbajila bulami buende bua lulamatu. (1 Petelo 4:10) Bakulu bena nkristo batekibue mbalami, ne munkatshi muabu mudi batangidi bena ngendu. (Tito 1:7) Mmunyi mutudi ne bua kuangata bakulu aba bena ngendu? Nngikadilu kayi ne mbipatshila kayi bidibu ne bua kuikala nabi? Ne mmunyi mudibu mua kutamba kutumika bimpe?

Ne dianyisha bua mudimu wabu

3. Bua tshinyi batangidi bena ngendu badi mua kubikidibua ne: “balami balenga”?

³ Mu difundila mutangidi muena ngendu ne mukajende, bena dibaka babidi kampanda bena nkristo bakamba ne: “Tudi basue kuleja dianyisha dietu bua dîba dionso ne dinanga dionso binudi batupeshe. Bu mutudi benze dîku, tudi bapetele masanka a bungi ku dikankamija dienu ne mibelu yenu. Tudi bamanye se: tudi ne bua kutungunuka ne kudiunda mu nyuma, kadi ne diambuluisha dia Yehowa ne bana betu ba balume ne ba bakaji bu nuenu, ntatu ya dienza malu mapiamapia idi itamba kupepela.” Biambilu bu ebi bitu biumvuika misangu mivule bualu batangidi bena ngendu badi batabalela muntu ne muntu munkatshi mua bena kuitabuja nabu, anu bu mudi mulami muimpe utabalela bimpe bidi bena diende bakengela. Bamue mbangamba-malu ba dilambu. Bavule mbapiluke mu mudimu wa buambi, eku bakuabu bamanyike bua musangelu ne luse biabu. Pa kulongolola ne pa kutumika ne bipedi bia nunku mu dikuatshila bakuabu mudimu, batangidi bena ngendu badi mua kubikidibua biakane se: “balami balenga.”

4. Mbualu kayi butuakonkonona mpindieu?

⁴ “Tshidibo balomba kudi balami ntshia se: muntu yonso [“ikale muena lulamatu,” NW],” ke muakafunda mupostolo Paulo. (1 Bena Korente 4:2, MMM) Dikuatshila bena nkristo netu mudimu mu tshisumbu tshishilangane ku lumingu ne ku lumingu mmuabi wa pa buawu ne wa disanka. Nansha nanku, didi kabidi bujitu bunene. Nunku, mmunyi mudi batangidi bena ngendu mua kukumbaja ne dilubuluka dionso bulami buabu ne lulamatu?

Dilubuluka mu dikumbaja bulami buabu

5, 6. Bua tshinyi dieyemena Yehowa mu masambila didi ne mushinga wa bungi mu nsombelu wa mutangidi muena ngendu?

⁵ Dieyemena Yehowa mu masambila didi ne mushinga mukole pikala batangidi bena ngendu ne bua kuikala balami balubuluki. Bua mudibu ne programe ne majitu a bungi, badi mua kudiumvua imue misangu banemena kudi bujitu. (Fuanyikija ne 2 Kolinto 5:4.) Nunku badi ne bua kuenza malu mu diumvuangana ne musambu wa mufundi wa misambu Davidi ne: “Upuila Yehowa yeye nkayende bujitu buebe, ne yeye neakukoleshe. Kakulekela nansha kakese bua muakane kutetukaye.” (Musambu wa 55:22, NW) Kabidi, mêyi a Davidi aa nga busambi: ‘Mukalenge avudijibue disanka, udi ututuadila bujitu buetu ku dituku ku dituku.’​—Musambu wa 68:19.

⁶ Nkuepi kuakapetela Paulo bukole bua kukumbaja majitu ende a mu nyuma? “Ndi ne bukole mu malu onso ku diambuluisha dia eu udi umpesha bukole,” ke muakafundaye. (Filipoi 4:13, NW) Eyowa, Yehowa Nzambi ke uvua Mpokolo wa bukole bua Paulo. Bia muomumue, Petelo wakabela ne: ‘Biakuata muntu mudimu, enze bu mudi bukole buakamupa Nzambi; enze biende bua Nzambi atumbishibue mu malu onso [“ku butuangaji,” NW] bua Yezu Kristo.’ (1 Petelo 4:11) Muanetu mukuabu uvua mutangidi muena ngendu munkatshi mua bidimu bia bungi wakazangika dikengela dia kueyemena Nzambi, pa kuamba ne: “Tangila misangu yonso kudi Yehowa mu dipita ne ntatu, ne keba diambuluisha dia bulongolodi buende.”

7. Mmunyi mudi ditshintshija dikale ne mushinga mu mudimu wa mutangidi muena ngendu?

⁷ Ditshintshija didi dikengedibua kudi mutangidi muena ngendu mulubuluki. Bu bena nkristo bakuabu, udi wenza madikolela bua ‘kumona mua kusunguluja tshidi tshipite bulenga.’ (Bena Filipi 1:10, MMM)a Padi bakulu ba mu tshisumbu bikale ne nkonko pa tshilumbu kampanda, mbia meji bua buobu kuyukidilangana ne mutangidi wa tshijengu udi ubakumbula. (Nsumuinu 11:14; 15:22) Pamu’apa, mmuenenu yende mitshintshija ne mibelu yende miashila pa Mifundu nebikale mua kuambuluisha bikole pikala bakulu mua kutungunuka ne diakaja tshilumbu etshi kunyima kua yeye mumane kushiya tshisumbu. Mu luidi lumue lumue elu, Paulo wakambila Timote ne: “Bintu biwakumvua kundi ne diambuluisha dia bantemu ba bungi, bine bintu ebi ubipeshe balume ba lulamatu, ku luabu luseke, bikale pabu bakumbane bua kubilongesha bakuabu biakane.”​—2 Timote 2:2, NW.

8. Bua tshinyi dilonga dia Bible, dikebulula, ne dieleela meji bidi ne mushinga mukole?

⁸ Dilonga Mifundu, dikebulula, ne dieleela meji bidi ne mushinga bua kufila mibelu miakane. (Nsumuinu 15:28) Mutangidi mukuabu wa distrike wakamba ne: “Mu dienza tshisangilu ne bakulu, katuena ne bua kutshina bua kuitaba se: katuena bamanye diandamuna ku lukonko lusunguluke.” Dienza madikolela bua kuanji kupeta “meji a kudi Kristo” pa muanda kampanda didi dipetesha mushindu wa kufila mibelu mishindamene pa Bible yambuluisha bakuabu bua kutumikila disua dia Nzambi. (1 Bena Korente 2:16, MMM) Imue misangu mutangidi muena ngendu udi ne bua kufundila Société Watch Tower bua kupeta buludiki. Mu mishindu yonso, ditabuja kudi Yehowa ne dinanga dia bulelela mbia mushinga wa bungi kupita ne kule mmuenekelu wetu anyi bungamba-malu buetu. Pamutu pa kulua ne “dinekesha dia ngakuilu peshi dia meji,” Paulo wakatuadija mudimu wende mu Kolinto “mu butekete, mu kutshina pamue ne kuzakala kukole.” Ebi biakamupangisha bua kupatula bipeta anyi? Bishilangane, biakambuluisha bena Kolinto bua kushindamija ditabuja diabu, “ki mpa meji a bantu, apu pa bukole bua Nzambi.”​—1 Kolinto 2:1-5, NW.

Mikuabu ngikadilu ya mushinga mukole

9. Bua tshinyi bakulu bena ngendu badi bakengela diumvuilangana?

⁹ Diumvuilangana didi diambuluisha batangidi bena ngendu bua kufika ku bipeta bimpe. Petelo wakalomba bena nkristo bonso bua ‘kuleja diumvuilangana,’ anyi kuikala “baditeki ba pa muaba wa bakuabu.” (Note kuinshi kua 1 Petelo 3:8, NW) Mutangidi kampanda wa tshijengu udi umona dikengela dia ‘kuditatshisha bua muntu yonso mu tshisumbu ne kuikala ne ntema milelela kudiye.’ Ne lungenyi lua muomumue, Paulo wakafunda ne: “Nusanke ne badi basanka; nudile ne badi badila.” (Lomo 12:15) Mmuenenu bu nunku udi usaka batangidi bena ngendu bua kuenza madikolela malelela bua kumvua ntatu ne nsombelu ya bena kuitabuja nabu. Pashishe badi mua kufila mibelu miibakianganyi ya mu Mifundu ìdì mua kukumbaja malu mimpe bushuwa padibu bayitumikila. Mutangidi kampanda wa tshijengu udi mupiluke mu dileja diumvuilangana wakapeta mukanda eu wa kudi tshisumbu kansanga pabuipi ne Turin, mu Italie: “Biwasua kuikala musankishi, ikala musankididi; biwasua kuanyishibua, ikala ne dianyisha; biwasua kunangibua, ikala wa kunanga; biwasua bakuambuluishe, ikala mudiakaje bua kuambuluisha. Ebi ke bitudi balongele kuudi!”

10. Ntshinyi tshidi batangidi ba bijengu ne ba distrike bambe pa bidi bitangila dikala mudipuekeshi, ne ntshilejilu kayi tshivua Yezu mufile mu muanda eu?

¹⁰ Dikala mudipuekeshi ne wa kukuatshila bualu didi diambuluisha batangidi bena ngendu bua kuenza bimpe bitambe. Mutangidi mukuabu wa tshijengu wakamona se: “Mbia mushinga mukole mutambe bua kulama ngikadilu wa budipuekeshi.” Wakabela batangidi bena ngendu bapiabapia ne: “Kanudilekeledi ku buenzeji bukena buakanyine bua kudi bana betu bena kantu ku bianza bua bidibu mua kunuenzela, anyi kuimanyikila bulunda buenu pa bantu ba nunku, kadi enzayi madikolela misangu yonso bua kuikala mu malanda ne bakuabu kakuyi kansungasunga.” (2 Kulondolola 19:6, 7) Ne mutangidi muena ngendu mudipuekeshi wa bushuwa kakuikala ne mmuenenu munekesha wa mushinga wende yeye muine bua mudiye muleji-mpala wa Société. Mutangidi kampanda wa distrike wakela nseka mu mushindu muakanyine se: “Ikala mudipuekeshi ne mudiakaje bua kuteleja bana betu. Ikala wa kukuatshila bualu misangu yonso.” Bu muntu mutambe bunene wa katshia ne katshia, Yezu Kristo uvua mua kusuya bantu, kadi uvua mudipuekeshi ne wa kukuatshila bualu, mu mushindu wa se: nansha bana bavua badiumvua bapepele bua dikalaku diende. (Matayo 18:5; Mâko 10:13-16) Batangidi bena ngendu mbasue bua bana, bansonga, bakulumpe​—tuambe ne: muntu kayi yonso mu tshisumbu—​badiumvue bapepele bua kubakuatshila bualu.

11. Mbuenzeji kayi budi dilomba luse ne bua kuikala nabu padidi dikengedibua?

¹¹ Bushuwa, “buonso buetu tudi tulenduka mu malu a bungi,” ne kakuena mutangidi muena ngendu udi mukubibue ku dienza bilema. (Yakobo 3:2) Padibu benza bilema, dilomba luse ne muoyo umue didi dipesha bakulu bakuabu tshilejilu tshia budipuekeshi. Bilondeshile Nsumuinu 22:4, ‘difutu dia kudipuekesha ne dia ditshina dietu dia Yehowa [dia kanemu kondoke] didi bubanji, butumbi ne muoyo.’ Ne basadidi bonso ba Nzambi kabenaku bakengela bua ‘kuenda ne Nzambi wabu ne mutshima mupuekele’ anyi? (Mika 6:8) Pakamuebejabu mibelu ivuaye mua kuikala nayi bua mukulu muena ngendu mupiamupia, mutangidi mukuabu wa tshijengu wakandamuna se: “Ikala ne kanemu ka bungi ne bunême bua bana betu bonso, ne ubangate bu badi bimpe kukupita wewe. Neulongele bivule kudi bana betu. Ushale mudipuekeshi. Ikala amu bu muutu. Kudiûji nansha.”​—Filipoi 2:3.

12. Bua tshinyi mitalu mu mudimu wa bena nkristo mmitambe kuikala ne mushinga munene?

¹² Mitalu bua mudimu wa bena nkristo idi ifila bujitu ku mêyi a mutangidi muena ngendu. Bushuwa, padi yeye ne mukajende bafila bilejilu bia mitalu mu mudimu wa dimuangalaja Evanjeliyo, bakulu, bakaji babu, ne bena mu tshisumbu bakuabu bonso badi bakankamijibua bua kuleja mitalu mu mudimu wabu. “Ikala muena mitalu mu mudimu,” ke muakabela mutangidi mukuabu wa tshijengu. Wakasakidila ne: “Pa tshibidilu, ndi mumone se: padi tshisumbu tshitamba kuikala ne mitalu, kakuena kutamba kuikala bilumbu.” Mukuabu mutangidi wa tshijengu wakaleja ne: “Ndi ngitaba se: pikala bakulu batumika mu budimi pamue ne bana betu balume ne bakaji ne babambuluisha bua kusankidila mudimu eu, ebi nebifikishe ku ditalala dia lungenyi ne ku disankishibua ditambe bunene mu disadila Yehowa.” Mupostolo Paulo ‘wakakolesha mutshima [“ne dikima,” NW] bua kuambila bena Tesalonike lumu luimpe lua Nzambi mu kuluangana kua bungi.’ Kabiena bikemesha bua muvuabu bavuluke dikumbula diende ne mudimu wende wa diyisha ne bikale bajinga bua kumumona tshiakabidi!​—1 Tesalonike 2:1, 2; 3:6.

13. Ntshinyi tshidi mutangidi muena ngendu wangata ne mushinga padiye utumika pamue ne bena nkristo nende mu mudimu wa budimi?

¹³ Padiye utumika pamue ne bena nkristo nende mu mudimu wa budimi, mutangidi muena ngendu udi wangata ne mushinga nsombelu yabu ne mikalu yabu. Nansha mudi ngenyi yende mifila mua kuikala miambuluishi, mmumanye ne: bamue badi mua kuikala ne buôwa padibu bayisha pamue ne mukulu kampanda mupiluke. Pa nanku, mu imue nsombelu, dikankamija didi mua kuikala ne dikuatshisha kupita mibelu. Padiye ufila bamanyishi anyi bampanda-njila mu dilonga kampanda dia Bible, badi mua kujinga bua yeye kudilombola. Ebi bidi pamu’apa mua kubibidija ne imue mishindu ya kulengeja ndongeshilu yabu.

14. Bua tshinyi tudi mua kuamba ne: batangidi bena ngendu ba mitalu badi basonsola mitalu munda mua bakuabu?

¹⁴ Batangidi bena ngendu ba mitalu badi basonsola mitalu munda mua bakuabu. Mutangidi mukuabu wa tshijengu mu Uganda wakenda dîba dijima pa kupitshila mu diitu dikutakane bua kufila muanetu kampanda mu dilonga dia Bible divua dienda dilubuluka kakese. Mu luendu luabu mvula e kuloka bikole mushindu wakafikabu babole bu tunyunyi. Pakamanya dîku edi dia bantu basambombo ne: mubakumbudi wabu eu uvua mutangidi muena ngendu, bakakemeshibua bikole. Bavua bamanye ne: ba-ministre ba ekleziya wabu kabavua mua kuleja nansha kakese ditabalela bu nunku bua tshisumbu tshia mikoko. Dia lumingu diakalonda, bakabuela mu tshisangilu tshiabu tshia kumpala ne bakaleja dijinga dia kulua Bantemu ba Yehowa.

15. Mbualu kayi buimpe bumona buakasankisha mutangidi wa tshijengu wa mitalu mu Mexique?

¹⁵ Mu rejon wa Oaxaca, mu Mexique, mutangidi mukuabu wa tshijengu wakenza madikolela àdì kaayi kutekemena bushuwa kudiye. Wakadilongolola bua kushala mu kazubu ka bena buloko matuku anayi bua kumona mua kukumbula kasumbu ka benamu muanda-mutekete bakavua balue bamanyishi ba Bukalenge. Munkatshi mua matuku a bungi, wakafila bena buloko aba pavuabu bafila bumanyishi ku kazubu ne ku kazubu konso ka buloko ne bakalombola malonga a Bible. Bua disankidila dileja, amue a ku malonga aa akatungunuka bimpe too ne butuku. “Ku ndekelu kua dikumbula edi, bena mu buloko ne meme tuakadiumvua bûjibue ne disanka bu tshipeta tshia dishintakaja dikankamijangana,” ke mudi mutangidi eu wa tshijengu wa mitalu ufunda.

16. Bua tshinyi bidi ne dikuatshisha dinene padi batangidi bena ngendu ne bakaji babu bapetesha dikankamija?

¹⁶ Batangidi bena ngendu badi benza madikolela bua kuikala bakankamijanganyi. Pakakumbula Paulo bisumbu bia mu Makedonia, ‘wakakolesha mitshima yabu ne mêyi a bungi.’ (Bienzedi 20:1, 2) Mêyi a dikankamija nawu adi mua kuikala ne diambuluisha menemene mu diludika bana ne bakulumpe ku bipatshila bia mu nyuma. Ku bimue biro bia filiale binene bia Société Watch Tower, dikonkonona luapolo kampanda diakaleja ne: batangidi ba bijengu bavua bakankamije bia pa lukama bitue ku 20 bia bena budisuile bua kuanyisha mudimu wa ku dîba ne ku dîba. Ku tshilejilu tshiende tshilenga bu mumanyishi wa Bukalenge wa ku dîba ne ku dîba, mukaji wa mutangidi muena ngendu udi pende mpokolo munene wa dikankamija.

17. Mmunyi mudi mutangidi mukuabu wa tshijengu mukulakaje udiumvua pa bidi bitangila diakalenga diende dia kupetesha bakuabu diambuluisha?

¹⁷ Bakulumpe ne bena tunyinganyinga tukole badi nangananga bakengela dikankamijibua. Mutangidi mukuabu wa tshijengu mukulakaje udi ufunda ne: “Tshitupa tshia mudimu wanyi tshidi tshituala disanka dia mu mutshima dikena kuamba ndiakalenga dia kupetesha diambuluisha kudi aba bakena badifila kabidi mu mudimu ne kabatshiyi ne makanda a ku mubidi munkatshi mua tshisumbu tshia mikoko ya Nzambi. Mêyi a mu Lomo 1:11, 12 adi ne diumvuija dia pa buadi buanyi meme, bu mundi mpetelaku dikankamijibua dinenanenayi ne bukole eku ‘mpesha bamue [bantu] ba mushindu’eu kupa kukuabu kua nyuma, bua buobu bajadikibue.’”

Mafutu a mudimu wabu wa disanka

18. Mbipatshila kayi bia mu Mifundu bidi nabi batangidi bena ngendu?

¹⁸ Batangidi bena ngendu badi bangata ne muoyo umue bipatshila bitambe buimpe bua bena kuitabuja nabu. Mbasue kukolesha bisumbu ne kubiibaka mu nyuma. (Bienzedi 15:41) Mutangidi muena ngendu mukuabu udi utumika bikole bua “kufila dikankamija, kupetesha makanda, ne kulubuluja dijinga dia kukumbaja mudimu ne kutungunuka ne kuendela mu bulelela.” (3 Yone 3) Mukuabu udi ukeba bua kushindamija bena kuitabuja nende mu ditabuja. (Kolosai 2:6, 7) Vuluka se: mutangidi muena ngendu udi “muena mudimu [nebe] wa lulamatu,” ki mmukokeshi pa ditabuja dia bakuabu to. (Filipoi 4:3, Muanda Mulenga Lelu; 2 Kolinto 1:24) Dikumbula diende ntshikondo tshia dikankamijibua ne tshia mudimu ukena wa pa tshibidilu, ne kabidi tshikondo bua kasumbu ka bakulu kukonkononaku dilubuluka dienza ne kutangila bipatshila bia matuku atshilualua. Ku mêyi ende ne ku tshilejilu tshiende, bamanyishi ba mu tshisumbu, bampanda-njila, basadidi ba midimu, ne bakulu badi mua kutekemena kuibakibua ne kusonsodibua bua mudimu udi kumpala. (Fuanyikija ne 1 Tesalonike 5:11.) Nunku, tuayi makumbula a mutangidi wa tshijengu nyama ku mikolo, ne babidilayi tshishiki mudimu mukumbaja kudi mutangidi wa distrike.

19, 20. Mmunyi mudi batangidi bena ngendu ne bakaji babu bafutshibue bua mudimu wabu wa lulamatu?

¹⁹ Batangidi bena ngendu ne bakaji babu badi bafutshibua bia bungi bua mudimu wabu wa lulamatu, ne badi mua kuikala ne dieyemena dia se: Yehowa neababeneshe bua malu mimpe adibu benza. (Nsumuinu 19:17; Efeso 6:8) Georg ne Magdalena mbena dibaka babidi bakulakaje bavua basadile munkatshi mua bidimu bia bungi mu mudimu wa buena-ngendu. Mu mpuilu kampanda munene mu Luxembourg, muntu mukuabu uvua Magdalena muyishe bidimu bipite pa 20 kale wakamonangana nende. Disankidila bulelela dia mukaji eu muena Yuda divua dijula kudi mikanda miumvuiji ya Bible ivua Magdalena mumushile, ne pashishe wakalua kutambula. Muanetu wa bakaji wa mu nyuma, wakavuluka dikumbula dia Georg kumbelu kuabu bidimu bu 40 kale, wakamonangana ne Georg. Ndongeshilu wende wa lumu luimpe wa musangelu wakafikisha ndekelu wa bionso mukaji eu ne bayende ku ditaba bulelela. Bushuwa, bubidi buabu Georg ne Magdalena bakuujibua tente ne disanka.

²⁰ Mudimu wa bipeta bimpe wa Paulo mu Efeso wakamutuadila disanka ne kumusaka pamu’apa ku ditela mêyi a Yezu aa: “Disanka dia kupa ndipite dia kupeta.” (Bienzedi 20:35, NW) Bu mudi mudimu wa buena-ngendu ulomba kupa misangu yonso, aba bàdì badifilamu badi bapeta disanka, nangananga padibu balua kumanya bipeta bimpe bia mudimu wabu mukole. Mutangidi mukuabu wa tshijengu wakambuluisha mukulu kampanda mutekete mu maboko, bakamufundila mu mukanda ne: “Wewe udi muikale ‘diambuluisha dinene dipeteshi dia makanda’ mu nsombelu wanyi wa mu nyuma​—kupita ne biudi mumanye. . . . Kuakumanya menemene bunene bua diambuluisha diudi muikale bua Asafe wa lelu, muena ‘makasa akavua mambe kupambuka.’”​—Kolosai 4:11; Musambu wa 73:2, NW.

21. Bua tshinyi tudi mua kuamba ne: 1 Kolinto 15:58 mmuakanyine midimu ya batangidi bena ngendu?

²¹ Muanetu muena nkristo mukulakaje uvua mu mudimu wa tshijengu munkatshi mua bidimu bia bungi utu musue kuela meji pa 1 Kolinto 15:58 (NW), muakabela Paulo ne: “Vuayi bashindame, kanuyi nutenkakajibua, pa kuikala misangu yonso ne bivule bia kuenza mu mudimu wa Mukalenge, eku bamanye se: mudimu wenu mukole kawena wa patupu bua bidi bitangila Mukalenge.” Batangidi bena ngendu badi bushuwa ne bia bungi bia kuenza mu mudimu wa Mukalenge. Ne mmunyipu mutudi ne dianyisha mudibu basadila nunku ne disanka bu balami ba lulamatu ba bulenga bukena butuakanyine bua Yehowa!

[Mêyi adi kuinshi]

Newandamune munyi?

◻ Bua tshinyi batangidi bena ngendu badi mua kuangatshibua bu “balami balenga”?

◻ Ng’amue malu kayi adi ambuluisha batangidi ba bijengu ne ba distrike bua kukumbaja malu mimpe a bungi?

◻ Bua tshinyi budipuekeshi ne mitalu mbia mushinga munene bua aba bàdì badifila mu mudimu wa buena-ngendu?

◻ Mbipatshila kayi bilenga bidi nabi batangidi bena ngendu?

[Tshimfuanyi mu dibeji 16]

Batangidi bena ngendu badi bakeba bua kukankamija bena kuitabuja nabu

[Bimfuanyi mu dibeji 17]

Bana pamue ne bakulumpe kabidi badi mua kupetela masanka ku dikala pamue ne batangidi bena ngendu ne bakaji babu

[Tshimfuanyi mu dibeji 18]

Mudimu wa mitalu wa mutangidi muena ngendu udi ulubuluja mitalu mu bakuabu