Tshia-mudimu tshipiatshipia bua kuambuluisha bantu bua balonge malu malomba kudi Nzambi
“NGENZELU watshi mupepele, wa buludiludi, ne mulenga neapatule bipeta bipite pa matekemena. Biena-bualu mbifunda mu mushindu ukena mukodiakane ne ùdì usankisha wa se: muntu yonso muena muoyo muimpe, udi mu dikeba neasakibue bua kuamba ne: ‘Nzambi udi bushuwa munkatshi muenu.’” (1 Kolinto 14:25) Ke muakamba umue wa ku Bantemu ba Yehowa wa ku Thaïlande pavuaye wakula bua broshire eu mupiamupia, Ntshinyi tshidi Nzambi utulomba? Uvua mupatula kudi Société Watch Tower mu Mpuilu ya Distrike “Batuadi ba mukenji wa ditalala dia Nzambi” mu 1996/97.
Broshire eu wa mabeji 32 ne wa mekala mashilashilangane mmulongolola bu mukanda wa dilonga nawu Bible. Udi wakula bua malongesha a ntaku a Bible. Mfundilu wende udi mupepele ne wa mu tshikoso, umvuija patoke tshidi Nzambi utulomba. Babadi kabena ne bua kupeta lutatu bua kumumvua. Mmunyi muudi mua kulombola dilonga dia Bible mu broshire eu mupiamupia?
Utumike ne nkonko. Ku ntuadijilu wa dilongesha dionso kudi nkonko. Mu tuboko kunyima kua lukonko luonso, neusangane nimero ya bikoso mudi mandamuna asanganyibua. Nkonko eyi udi mua kutumika nayi bu diambuluisha bua mbangilu wa dilongesha ne bua diambulula. Tshilejilu, ku ntuadijilu kua dilonga dia Bible dia ku nzubu, udi mua kuela mulongi nkonko bua kupeta mumvuija ende. Pamutu pa kuakaja mandamuna onso mabi diakamue, udi mua kutungunuka ne dilonga. Ku ndekelu kua dilongesha, udi mua kupinganuna ku nkonko bua kumona bikala mulongi mukumbane mpindieu bua kuyandamuna mu diumvuangana ne Bible.
Ubale mvese. Mu dilongesha dionso, biambilu bia mu tshikoso bia malelela a mu Bible mbilonda kudi mvese mibisanyiki. Bu mudi mivule ya ku mvese mmifila, kayiyi mitela, bidi bia mushinga bua kukankamija mulongi bua kukeba mifundu eyi mu Bible wende nkayende. Udi ukengela kubala ne kueleela meji pa Dîyi dia Nzambi kumpala kua kuikalaye mua kuditumikila mu nsombelu.—Yoshua 1:8.
Uzangike bimfuanyi. Broshire udi ne bimfuanyi bia foto ne bizola bungi buvumvuke—bionso bipite pa bindidimbi 50. Bine ebi mbifila ki ng’anu bua kusankisha lumonu kadi kabidi bu bikuabu biambuluishi bua dilongesha. Tshilejilu, malongesha abidi a ndekelu (dimue pa dibeji, pa mabeji matangilangane) adi ne biena-bualu “Diambuluisha bakuabu bua benze disua dia Nzambi” ne “Dipangadika diebe bua kusadila Nzambi.” Foto ìdì mu mabeji abidi aa idi ileja dilubuluka dia mu nyuma dia muntu umue-umue eu, imuleja ufila bumanyishi bua mu mpukapuka, mu mudimu wa ku nzubu ne ku nzubu, wenza diditshipa, ne ndekelu wa bionso utambula. Pa kukoka ntema ya mulongi ku bimfuanyi ebi, udi umuambuluisha bua kumona bidia bidi bilombibue bua kusadila Nzambi.
Netuenze tshinyi bikala muntu udi ne dijinga dia kumanya kayi ubala bimpe anyi kayi mua kubala nansha kakese? Société udi upatula broshire eu mupiamupia pa kasete ka kuteleja mu miakulu mivule. Mu kasete mudi malu adi mafunda mu broshire eu pamue ne mvese mivule mifila. Kasete aka nkakuata mushindu udi ulonda eu: Badi babala lukonko lua kumpala, lulonda kudi tshikoso (anyi bikoso) tshidi tshiluandamuna, pamue ne imue ya ku mvese mifila. Pashishe badi babala lukonko ludi lulonda, lulonda kudi malu mafunda mu tshikoso ne mvese bidi biluandamuna, ne batungunuka anu nanku. Mulongi udi mua kuteleja kasete padiye udilongolola bua dilonga. Nudi mua kutumika ne kasete kabidi panudi nulombola dilonga.
Aba bavua mu mpuilu bavua bazuka bua kutumika ne broshire eu mupiamupia mu mudimu wabu wa budimi. Tshilejilu, anu matuku makese panyima pa dipeta broshire eu, bampanda-njila babidi (bamuangalaji ba evanjeliyo ba ku dîba ne ku dîba) ba mu États-Unis bakamushiila bena dibaka bapiabapia babidi bavuabu bakumbula. Pakatangila bena dibaka aba ku tshikebelu, dilongesha dia “Ngenzelu idi Nzambi ukina” diakakoka ntema yabu. “Mvua ngela meji misangu yonso ne: Nzambi kavua nansha kakese mua kukina—udi anu dinanga,” ke muakamba inabanza eu mutekete. “Muine eu ke undi mbala kumpala.” Pakapingana bampanda-njila babidi aba lumingu luakalonda, inabanza mutekete eu wakamba ne: “Mvua mbala broshire eu mupiamupia. Bidi bikole bua kuenza malu onso atudi ne bua kuenza. Yehowa kêna mutuanyishe—katuena baselangane. Kadi tudi bangate dipangadika. Tudi badilongolole bua kuselangana Ditanu didi dilonda.” Bupukila bampanda-njila babidi aba, badi basakidila ne: “Tudi tulomba luse bua dipanga kuikala ne dilonga dia pa tshibidilu, kadi dipangadika dia kuselangana mbujitu bunene butumbusha.”
Mu mishindu yonso, utumike ne broshire eu mupiamupia wa Utulomba. Ntshia-mudimu tshilenga bua kuambuluisha bakuabu bua kulonga malu malomba kudi Nzambi.
[Bimfuanyi mu dibeji 17]
Mmunyi muwatumika ne broshire eu mupiamupia?