“Nansha munudi kanuyi banji kumumona, nudi bamunange”
“Nansha munudi kanuyi banji kumumona, nudi bamunange. Nansha munudi kanuyi numutangila mpindieu, kadi nudi nuleja ditabuja kudiye ne nudi nusanka bikole.”—1 PETELO 1:8, NW.
1. Nansha mudi muntu nansha umue pa buloba lelu’eu kayi muanji kumona Yezu, mmunyi mudi bamue bena malu a Nzambi benza madikolela bua kuleja bulamate buabu kudiye?
MUNTU wa muoyo nansha umue lelu’eu pa buloba ki mmuanji kumona Yezu Kristo. Pabi, miliyo ya bantu badi bamba mudibu bamunange. Ku tshidimu tshionso mu dia 9 Tshiongo ku Manille, mu Philippines, batu bendesha mu misesu lupingu lua bunene bukumbane lua Yezu Kristo muambule nkuruse, mu tshidibu bumvuije bu dileja dinenanenayi, dia mikukuku, dia ntendelelu wa bantu ba bungi mu ditunga edi. Musumba wa bantu ne mioyo kulukulu udi usesa ne usakilangana; bamue badi mene babandangana pa mitu ne zukuzuku bua kulenga tshimfuanyi atshi. Bavule bàdì kuoku bua kubandila bualu ebu badi bakokibua nangananga kudi mindololotshi eyi ya disanka. Pabi, bamue ba kudibu kabiyi mpata mbantu badi badiumvua bakokibue ne muoyo umue kudi Yezu. Bu tshijadiki tshia bualu abu, badi mua kuvuala nkuruse anyi kuya pa tshibidilu mu ekleziya. Kadi, ditendelela bimfuanyi dia nunku didi mua kuangatshibua bu ntendelelu mulelela anyi?
2, 3. (a) Mbanganyi munkatshi mua balondi ba Yezu bakamumona ne bakamuteleja bushuwa? (b) Mbanganyi bakuabu mu siekele wa kumpala bakananga Yezu ne bakamuitabuja, nansha muvuabu kabayi banji kumumona buobu bine?
2 Mu siekele wa kumpala, kuvua binunu bivule bia bantu mu provense ya bena Roma ya Yudeya, Samariya, Pereya, ne Ngalileya bakadimuenena nkayabu ne kumvua Yezu Kristo. Bakateleja pavuaye umvuija malelela masanguluji a mutshima pa bidi bitangila Bukalenge bua Nzambi. Bakadimuenena ne mêsu abu abidi bishima biakenzaye. Bamue ba ku buobu aba bakalua bayidi bende baditshipe, batuishibue se: yeye uvua “[Kristo], Muana wa Nzambi udi ne muoyo.” (Matayo 16:16) Nansha nanku, aba bavua mupostolo Petelo mufundile mukanda wende wa kumudilu muenzeja ku spiritu kabavua banji kuikala munkatshi mua buobu aba.
3 Aba bavua Petelo mufundile bavua basombele mu provense ya bena Roma ya Ponto, Galatia, Kapadokia, Asia, ne Bitunia—yonso idi mu tshitupa tshia Turquie wa lelu. Petelo wakabafundila ne: “Nansha munudi kanuyi banji kumumona, nudi bamunange. Nansha munudi kanuyi numutangila mpindieu, kadi nudi nuleja ditabuja kudiye ne nudi nusanka bikole ne disanka kadiyi kuamba ne dia butumbi.” (1 Petelo 1:1, 8, NW) Mmunyi muakaluabu kumanya Yezu Kristo pa kufika too ne ku dimunanga ne ku dileja ditabuja kudiye?
4, 5. Mmunyi muvua bantu abu bàvuà katshia kabayi bamone Yezu balonge bikumbanyine pa bidi bimutangila bua kumunanga ne kumuitabuja?
4 Mbimueneke patoke se: bamue bavua mu Yeruzaleme pakafila mupostolo Petelo bumanyishi kudi musumba uvua mulue mu difesto dia Pentekoste mu 33 B.B. Kunyima kua difesto adi bayidi bavule bakashala mu Yeruzaleme bua kupeta dishidimunyibua dia pa mutu kudi bapostolo. (Bienzedi 2:9, 41, 42; fuanyikija ne 1 Petelo 1:1.) Mu ngendu ya ku misangu ne ku misangu ya bu misionere, mupostolo Paulo wakakumbaja kabidi mudimu wa mitalu munkatshi mua bantu bavua basombele mu tshitupa tshia buloba tshiakalua Petelo pashishe kutumina mukanda wa mu Bible wa kumudilu ùdì ne dîna diende.—Bienzedi 18:23; 19:10; Galatia 1:1, 2.
5 Bua tshinyi bantu abu, bàvuà katshia kabayi bamone Yezu, bavua batambe kukokibua nunku kudiye? Mu matuku etu aa, bua tshinyi miliyo mivule mikuabu, pa buloba bujima, mmimunange bikole nunku?
Malu akumvuabu
6. (a) Bu wewe muikale mumvue Petelo ufila bumanyishi pa bidi bitangila Yezu mu Pentekoste wa mu 33 B.B., ntshinyi tshiuvua mua kuikala mulonge? (b) Mmunyi muakenzejabi bantu batue ku 3 000 bavuapu?
6 Bu wewe muikale mu Yeruzaleme pakakula Petelo ne musumba au mu difesto dia mu 33 B.B., ntshinyi tshiuvua mua kuikala mulonge pa bidi bitangila Yezu? Kakuyi mpata nansha mikese, bishima biakenzaye biakaleja ne: uvua mutumibue kudi Nzambi. Ne: nansha muvua bantu bena mpekatu bashipe Yezu, katshivua kabidi mu lukita kadi ukavua mumane kubiishibua ne pashishe uvua mubandishibue mu diulu ku tshianza tshia balume tshia Nzambi. Ne: bushuwa Yezu uvua Kristo, Masiya uvua baprofete bafunde bualu buende. Ne: ku butuangaji bua Yezu Kristo, spiritu munsantu uvua muitshikijibue pa balondi bende mushindu wa se: bavua diakamue ne mushindu wa kufila bumanyishi kudi bantu ba matunga mavule pa malu a dikema avua Nzambi wenza ku butuangaji bua Muanende. Mitshima ya bavule bakumvua Petelo mu tshikondo atshi yakalengibua bikole, ne bantu batue ku 3 000 bakatambuishibua bu bayidi bena nkristo. (Bienzedi 2:14-42) Bu wewepu, uvua mua kuikala muangate dipangadika dikole mushindu’au anyi?
7. (a) Bu wewe muikalepu mu Antiokia pavua mupostolo Paulo uyisha muine amu, ntshinyi tshiuvua mua kuikala mulonge? (b) Bua tshinyi bamue mu musumba au bakalua bena kuitabuja ne kuabanyanganabu lumu luimpe ne bakuabu?
7 Bu wewe muikale munkatshi mua aba bavuapu pakalongesha mupostolo Paulo mu Antiokia mu provense wa bena Roma wa Galatia, ntshinyi tshikuabu tshiuvua mua kuikala mulonge pa bidi bitangila Yezu? Uvua mua kumvua Paulo umvuija ne: difundila Yezu lufu kudi bakokeshi mu Yeruzaleme dikavua didianjila kuamba kudi baprofete. Uvua mua kumvua kabidi pa bidi bitangila tshijadiki tshidimuenena tshia dibiishibua dia Yezu. Uvua bushuwa mua kukemeshibua kudi diumvuija dia Paulo dia se: pa kubiisha Yezu ku bafue, Yehowa wakashindika ne: yeye eu uvua bushuwa Muana wa Nzambi. Ne mutshima webe kauvuaku mua kusanguluka bu muuvua mua kumanya ne: dilekelela dia mpekatu dipetesha ku ditabuja mu Yezu divua ne bua kufikisha ku muoyo wa kashidi anyi? (Bienzedi 13:16-41, 46, 47; Lomo 1:4) Pa kuanyisha diumvuija dia bivuabu bumvua, bamue ba mu Antiokia bakalua bayidi, babanyangana ne tshisumi lumu luimpe ne bakuabu, nansha muvua dienza nunku diumvuija ne: bavua ne bua kutuilangana ne dikengeshibua dikole.—Bienzedi 13:42, 43, 48-52; 14:1-7, 21-23.
8. Bu wewe muikale mu tshisangilu mu tshisumbu tshia ku Efeso pakapetabu mukanda mubatumina kudi Paulo, ntshinyi tshiuvua mua kuikala mulonge?
8 Netuambe tshinyi biwikala uvua mudisangishe mu tshisumbu tshia bena nkristo mu Efeso, provense wa bena Roma wa Asia, tshikondo tshiakapetabu mukanda wa Paulo mufundisha ku spiritu mutumina bayidi ba muaba au? Ntshinyi tshiuvua mua kuikala mulongele ku mukanda au pa mudimu wa Yezu mu dilongolola dia Nzambi? Mu mukanda au Paulo wakumvuija ne: ku butuangaji bua Kristo bintu bionso mu diulu ne pa buloba nebipingajibue mu diumvuangana ne Nzambi, ne se: dipa dia Nzambi ku butuangaji bua Kristo divua dialabajila bantu ba matunga onso, ne se: bantu bakavua bafue ku mêsu kua Nzambi bua mibi yabu bavua benda bapeshibua muoyo ku diambuluisha dia ditabuja mu Kristo, ne se: bu tshipeta tshia ndongoluelu eu, mushindu wakamueneka tshiakabidi bua bantu kuluabu bana banangibue ba Nzambi.—Efeso 1:1, 5-10; 2:4, 5, 11-13.
9. (a) Ntshinyi tshidi mua kukuambuluisha bua kusunguluja biwikala mukuate wewe muine diumvuija dia tshivua Paulo mufundile bena Efeso? (b) Mmunyi muvua bana betu ba mu provense ya bena Roma batela kudi Petelo balengibue kudi malu avuabu balonga pa bidi bitangila Yezu?
9 Dianyisha bua bionso ebi divuaku mua kuikala dikoleshe dinanga diebe bua Muana wa Nzambi anyi? Dinanga adi divuaku mua kuikala ne buenzeji pa nsombelu webe wa buatshiabuatshia, bu muakakankamija mupostolo Paulo mu nshapita 4 too ne 6 mu Efeso anyi? Dianyisha dia nunku divuaku mua kukusaka bua kukonkonona malu àdì pa muaba wa kumpala mu nsombelu webe muine ne lubatshi luonso anyi? Bua dinanga dia Nzambi ne dianyisha bua Muanende, uvuaku mua kuenza mashintuluka adi akengedibua bua se: dienza disua dia Nzambi divua bushuwa muanda wa mushinga mukole mu nsombelu webe anyi? (Efeso 5:15-17) Pa kutangila mushindu uvua bena nkristo mu Asia, Galatia, ne mu provense mikuabu ya bena Roma balengibue kudi bivuabu balonga, mupostolo Petelo wakabafundila ne: “Nansha munudi kanuyi banji kumumona [Yezu Kristo], nudi bamunange. . . . Nudi nuleja ditabuja kudiye ne nudi nusanka bikole ne disanka kadiyi kuamba ne dia butumbi.”—1 Petelo 1:8, NW.
10. (a) Ntshinyi tshiakambuluisha kakuyi mpata dinanga dia bena nkristo ba kumpala bua Yezu? (b) Mmunyi mutudi petu mua kupetelaku disanka?
10 Kuvua tshintu tshikuabu tshivua kakuyi mpata tshiambuluishe mu dinanga bua Muana wa Nzambi tshiakumvuabu kudi bena nkristo aba ba kumpala bavua Petelo mufundile. Tshivua tshinyi atshi? Mu tshikondo tshiakafunda Petelo mukanda wende wa kumudilu, bu ibidi ya ku Evanjeliyo—Matayo ne Luka—ikavua mimane kuikalaku. Bena nkristo ba mu siekele wa kumpala bàvuà katshia kabayi banji kumona Yezu bavua mua kubala miyuki eyi mifunda ya Evanjeliyo. Tudi petu mua kuenza nanku. Evanjeliyo ki mmianu mifuikakaja nansha; idi ne bimanyinu bionso bia malu a kale atudi mua kutamba kueyemena. Mu miyuki mifunda ayi, tudi tupeta bivule bidi bikolesha dinanga dietu bua Muana wa Nzambi.
Ngikadilu wa lungenyi wakalejaye
11, 12. Ntshinyi tshidi tshikuenzeja mu ngikadilu wa lungenyi uvua Yezu uleja bakuabu bantu bua wewe kumunanga?
11 Muine mu muyuki mufunda au wa nsombelu wa Yezu, tudi tulonga mushindu uvuaye wangata bantu bakuabu. Ngikadilu wa lungenyi wakalejaye udi ulenga mitshima ya bantu nansha mpindieu, bidimu bipite pa 1 960 kunyima kua lufu luende. Muntu yonso udi ne muoyo mmuambule bujitu bua bipeta bia mpekatu. Miliyo mivule idi ikenga bua dilumbuluisha dikena diakane, iluangana ne masama, peshi bua tubingila tukuabu idiumvua mitekeshibue bikole mu mikolo. Kudi bantu bonso ba nunku, Yezu udi wamba ne: “Luayi kundi, nuenu bonso badi bakenga ne bazengele ne majitu, ne nennukankamije. Angatayi tshikokedi tshianyi ne nulongele kundi, bualu ndi mupole-malu ne mupuekele mu mutshima, ne nenupete dikankamijibua bua anyima yenu. Bualu tshikokedi tshianyi ntshinefuke ne bujitu buanyi mbupepele.”—Matayo 11:28-30, NW.
12 Yezu wakaleja diditatshisha dikole bua bapele, bua bavua ne nzala, ne bua aba bavua ne tunyinganyinga. Pavuaku mushindu, uvua mene udiisha misumba minene mu tshishima. (Luka 9:12-17) Wakabapikula ku bilele bìdì bikuata ku bupika. Wakibaka kabidi ditabuja diabu mu dilongolola dia Nzambi dia kujikija difinakajibua mu malu a tshididi ne a mpetu. Yezu kakazaza lungenyi lua aba bakavua bamane kuikala batshibuila panshi nansha. Ne diengeleka ne dinanga, wakajula ne mbabi yonso bapuekele. Wakakankamija aba bavua bu bituta bitshibula bikavua bikobame ne aba bavua bu mikaba ya miendu ivua ifuima ikavua pa kujimibua. Kubangila pine apu too ne mpindieu, dîna diende didi difila ditekemena, nansha mu mitshima ya aba badi katshia kabayi banji kumumona.—Matayo 12:15-21; 15:3-10.
13. Bua tshinyi mushindu uvua Yezu wangata benji ba mpekatu udi ukoka bantu?
13 Yezu kakanyisha malu mabi to, kadi wakumvuila bantu bavua benze bilema mu nsombelu wabu kadi bavua baleja dinyingalala ne batangila kudiye bua kupeta diambuluisha. (Luka 7:36-50) Uvua usomba ne udia ne bantu bavuabu bajebula mu tshinsanga pavuaye wela meji ne: bualu ebu buvua mua kupetesha mushindu wa kubambuluisha mu nyuma. (Matayo 9:9-13) Bu tshipeta tshia ngikadilu wa lungenyi wakalejaye, miliyo ya bantu badi mu nsombelu ya muomumue badi katshia kabayi banji kumona Yezu mbasakibue ku dimumanya ne ku dimuitabuja.
14. Ntshinyi tshidi tshikukoka pa bidi bitangila mushindu uvua Yezu wambuluisha babedi, balema, peshi bena tshinyongopelu?
14 Mushindu uvua Yezu wangata bantu bavua basama anyi balema udi ufila tshijadiki tshia musangelu wende ne luse luende pamue ne bukokeshi buende bua kubatuadila disulakana. Bua nanku, pakasemena mubedi kampanda mûle ne nsudi pamue nende ne kumusengelela bua kumuambuluisha, Yezu kakamujebula pakamumonaye. Ne kakambila muntu au ne: nansha muvuaye umumvuila luse, disama diende dikavua kule menemene ne kakuvua tshikuabu tshia kuenza bua kumuambuluisha. Muntu eu wakamudidila ne: “Mfumu, unkezulaku bu wewe musue.” Kakuyi dielakana, Yezu wakolola tshianza ne wakalenga muena nsudi au, pa kuamba ne: “Ndi muanyishe, kezukaku.” (Matewuse 8:2, 3, MMM) Musangu mukuabu mukaji kampanda wakakeba bua kuondapibua pa kulenga mu musokoko luzemba lua tshilamba tshiende. Yezu wakamuenzela malu mu mushindu mulenga ne ùdì upolesha muoyo. (Luka 8:43-48) Ne pakasambakenaye ne mulongo wa bantu bavua baya ku dijiika tshitalu, wakasakibua ne luse bua mukàmbà muena tshinyongopelu muena muana umuepele uvua mufue. Nansha muvua Yezu mubenge bua kutumika mu tshishima ne bukole bumupesha kudi Nzambi bua kudipetela yeye muine biakudia, wakatumika nabu ku budisuile bua kubiisha muntu mufue au ne kumupingaja kudi mamuende.—Luka 4:2-4; 7:11-16.
15. Mmunyi mudi dibala miyuki mifunda pa bidi bitangila Yezu ne dieleelapu meji bikale ne buenzeji kuudi?
15 Mu dibala miyuki mifunda eyi ne dieleela meji pa ngikadilu wa lungenyi uvua Yezu uleja, dinanga dietu didi dikoleshibua bua eu wakafila muoyo wende wa bu-muntu bua se: tumone mua kuikala ne muoyo wa tshiendelele. Nansha mutudi katuyi banji kumumona, tudi tudiumvua bakokibue kudiye, ne tudi basue bua kulonda mu makasa ende.—1 Petelo 2:21.
Dieyemena diende dia budipuekeshi kudi Nzambi
16. Mpa nganyi pakajadika Yezu ntema kumpala kua bionso, ne wakatukankamija bua kuenza tshinyi?
16 Kupita bionso bikuabu, Yezu wakatangija ntema yende ne yetu kudi Tatuende wa mu diulu, Yehowa Nzambi. Wakasunguluja dîyi-dituma ditambe bunene mu Mikenji, pa kuamba ne: “Udi ne bua kunanga Yehowa Nzambi webe ne mutshima webe wonso ne anyima webe yonso ne lungenyi luebe luonso.” (Matayo 22:36, 37, NW) Wakabela bayidi bende ne: “Nuitabu[j]e Nzambi mene.” (Mâko 11:22) Pakapetanganabu ne diteta dikole dia ditabuja diabu, wakababela ne: “Sambilayi misangu yonso.”—Matayo 26:41, NW.
17, 18. (a) Mmunyi muakaleja Yezu dieyemena diende dia budipuekeshi kudi Tatuende? (b) Bua tshinyi biakenzaye bidi ne mushinga mukole kutudi?
17 Yezu yeye muine wakashiya tshilejilu. Disambila divua tshitupa tshia mushinga mu nsombelu wende. (Matayo 14:23; Luka 9:28; 18:1) Pakalua tshikondo bua yeye kusungula bapostolo bende, Yezu kakeyemena amu ngelelu wende yeye wa meji, nansha muvua kumpala banjelu bonso mu diulu bikale ku bulombodi buende. Ne budipuekeshi buonso, wakapitshisha butuku bujima mu disambila Tatuende. (Luka 6:12, 13) Pakatuilanganaye ne dikuatshibua ne lufu lua bisama, Yezu wakatangila kabidi kudi Tatuende, e kusambila ne muoyo umue. Kakangata mmuenenu wa se: uvua mumanye bimpe Satana ne uvua mua kujikija bipepele tshintu kayi tshionso tshivua mubi au mua kufuikakaja. Yezu uvua mujingulule muvuabi ne mushinga bua kapangidi. Ndipangila kayipu dia bundu dìvuà mua kuikalaku bua Tatuende! Ne ndijimija kayipu bua bukua-bantu, buena matekemena a muoyo avua masuikakaja ku mulambu uvua Yezu ne bua kufila!
18 Yezu wakasambila misangu ne misangu—pavuaye ne bapostolo bende mu nzubu wa kuulu mu Yeruzaleme ne nansha mene ne lukunukunu luonso mu budimi bua Gethsemane. (Matayo 26:36-44; Yone 17:1-26; Ebelu 5:7) Pavuaye ukenga pa mutshi wa tshinyongopelu, kakapenda aba bàvuà bamupenda. Bishilangane, wakasambila bua aba bàvuà benza malu bua bupangi ne: “Tatu, ubabuikidile bubi buabo, kabena bamanye bualu budibo benza.” (Luka 23:34) Wakalama lungenyi luende lutangija kudi Tatuende, ‘mudifile mu bianza bia udi ulumbuluisha biakane.’ Mêyi a ndekelu akapatulaye pa mutshi wa tshinyongopelu avua disambila kudi Tatuende. (1 Petelo 2:23; Luka 23:46) Mmunyipu mutudi ne dianyisha se: ne dieyemena dia tshishiki kudi Yehowa, Yezu wakakumbaja ne lulamatu luonso mudimu uvua Tatuende mumuomekele! Nansha mutudi katuyi banji kumona Yezu Kristo, mmunyipu mutudi bamunange bikole bua malu akenzaye!
Dileja dinanga dietu buende yeye
19. Mu dileja dinanga kudi Yezu, ngenzelu kayi itudi ne bua kuepuka bu idi kayiyi miakanyine menemene?
19 Mmunyi mutudi mua kufila tshijadiki tshia se: dinanga ditudi tuamba kadiena amu ku mêyi? Bu muvua Tatuende, eu uvua Yezu munange, mukandike dienza bimfuanyi ne pashishe kuangata bine ebi bu bintu bia kunemekela, katuena bushuwa mua kutuadila Yezu lumu pa kuela tshimfuanyi tshia nunku’eu ku muyoyolo mu nshingu yetu peshi pa kuendesha tshimfuanyi tshia nunku mu misesu nansha. (Ekesode 20:4, 5; Yone 4:24) Kabiakupa Yezu lumu patudi tubuela mu masangisha a bitendelelu, nansha tuetu tuenza nunku misangu mivule ku lumingu, bituikala katuyi ne nsombelu udi umvuangana ne malongesha ende mu matuku makuabu a lumingu. Yezu wakamba ne: “Muntu yonso udi witaba mikenji [“mêyi-matuma,” NW] yanyi ne mmiakane ne uyitumikila, ke yeye udi munnange. Tatu wanyi neanange muntu awu udi munnange.”—Yone 14:21, 23; 15:10, Muanda Mulenga Lelu.
20. Mmalu kayi makuabu aleja bituikala bushuwa banange Yezu?
20 Mmêyi-matuma kayi avuaye mutupeshe? Bangabanga, kutendelela Nzambi mulelela, Yehowa, ne amu yeye nkayende. (Matayo 4:10; Yone 17:3) Bua mudimu wende mu dilongolola dia Nzambi, Yezu wakalongesha kabidi ne: tudi ne bua kuleja ditabuja kudiye bu Muana wa Nzambi ne se: tudi ne bua kudileja pa kulekela midimu mibi ne pa kuenda mu butoke. (Yone 3:16-21) Wakatubela bua kukeba diambedi Bukalenge bua Nzambi ne buakane buende, pa kuteka malu aa kumpala kua diditatshisha bua bintu bia ku mubidi. (Matayo 6:31-33) Wakatuma dîyi bua tunangangane bu muakatunangaye. (Yone 13:34; 1 Petelo 1:22) Ne wakatupesha mudimu wa kuikala bantemu pa bidi bitangila dilongolola dia Nzambi, anu bu muvuaye yeye muine. (Matayo 24:14; 28:19, 20; Buakabuluibua 3:14) Nansha mudibu kabayi banji kumona Yezu, miliyo mipite pa itanu ya Bantemu ba Yehowa lelu’eu mbasakibue kudi dinanga dilelela buende yeye bua kulonda mêyi-matuma au. Dipanga kudimuenena Yezu diabu kadiena nansha kakese ditekesha dipangadika diabu dia kuikala bena butumike. Badi bavuluka tshiakamba Mfumuabu kudi mupostolo Tomase ne: “Udi witabuja mpindiewu anu bua pawakummona, anyi? Ndisanka bunene kayipu dikala kudi bantu badi bangitabuja kabayi bammone!”—Yone 20:29, Muanda Mulenga Lelu.
21. Mmunyi mutudi tupetela masanka mu dibuela mu Tshivulukilu tshia lufu lua Kristo, tshienjibua tshidimu etshi mu Dia lumingu, dia 23 Luabanya?
21 Tudi batekemene se: newikale munkatshi mua aba badisangisha pa buloba bujima mu Nzubu ya Bukalenge ya Bantemu ba Yehowa pabuela dîba mu Dia lumingu, dia 23 Luabanya 1997, bua kuvuluka dileja ditambe bunene dia dinanga dia Nzambi bua bukua-bantu ne bua kuvuluka lufu lua Muanende mulamatshi ku mikenji, Yezu Kristo. Bidibu bamba ne bidibu benza mu tshikondo atshi bidi ne bua kukolesha dinanga bua Yehowa ne bua Muanende ne kudiundisha nunku dijinga dia kulama mêyi-matuma a Nzambi.—1 Yone 5:3.
Newandamune munyi?
◻ Mmunyi muvua aba bakatuminabu mukanda wa Petelo wa kumudilu balue kumanya ne kunanga Yezu?
◻ Ng’amue malu kayi akumvua bena nkristo ba kumpala adi akukemesha?
◻ Ntshinyi tshidi tshikolesha dinanga diebe bua Yezu pa kutangila ngikadilu wa lungenyi uvuaye uleja?
◻ Bua tshinyi dieyemena dia Yezu dia budipuekeshi kudi Nzambi didi ne mushinga kutudi?
◻ Mmunyi mutudi mua kuleja dinanga dietu bua Yezu Kristo?
[Bimfuanyi mu mabeji 16, 17]
Tudi tudiumvua bakokibue kudi Yezu bua ngikadilu wa lungenyi wakalejaye