Bushimatshi ku malu a ntaku​—Ntshinyi?

NKUEPI kuakatuadijila bushimatshi ku malu a ntaku? Ku ndekelu kua siekele mushale eu, bena teoloji badikadile bavua bashintulula mitabuja abu bua kuakaja ku dijana dia Bible ne malongesha a sianse, bu mudi edi dia didimenena dia bintu. Bu tshipeta, dieyemena dia bantu ku Bible diakatenkakana. Balombodi ba bitendelelu bia kale mu États-Unis bakandamuna pa kujadika biakabikilabu ne: malu a ntaku a ditabuja.a Ku ntuadijilu wa siekele wa 20, bakapatula diyukidilangana dia malu a ntaku aa mu bitupa bilondangane bivua ne tshiena-bualu ne: Malu a ntaku: Bujadiki ku bulelela. Ku tshiena-bualu etshi ke kudi kufumina mbikidilu wa “bushimatshi ku malu a ntaku.”

Mu tshitupa tshia kumpala tshia siekele wa 20, bushimatshi ku malu a ntaku buakalua tshiena-bualu tshia muyuki ku tshikondo ne ku tshikuabu. Tshilejilu, mu 1925, bashimatshi ku malu a ntaku bena malu a Nzambi bakafunda ku kabadi mulongeshi wa kalasa mubikidibue ne: John Scopes wa mu Tennessee, mu États-Unis, mu tshiakalua kumanyika bu tshilumbu tshia Scopes. Mbualu kayi buakabundaye? Uvua ulongesha didimenena dia bintu, ne abi bivua bibengangane ne mukenji wa Mbulamatadi. Mu matuku au, bamue bakela meji ne: bushimatshi ku malu a ntaku buvua ne bua kuikala bua tshitupa tshîpi. Mu 1926, tshikandakanda tshia bena Mishonyi tshia Christian Century tshiakamba ne: buvua “bua dishima ne bua patupu” ne “bubule tshishiki ngikadilu ya dijama nayi peshi lupandu lua mutantshi mule.” Mmunyipu muvua ditshinka adi dia dishima!

Kubangila mu bidimu bia 1970, bushimatshi ku malu a ntaku mbuikale misangu yonso mu ngumu. Profesere Miroslav Volf, wa mu Seminere munene wa teoloji, mu Californie, États-Unis, udi wamba ne: “Bushimatshi ku malu a ntaku kabuena anu bupanduke patupu, kadi mbulubuluke kabidi.” Lelu’eu, mbikidilu “bushimatshi ku malu a ntaku” kêna utangila anu bisumbu bia bena Mishonyi kadi kabidi ne ebi bia mu bitendelelu bikuabu, bu mudi Buena-Katolike, Izlame, Buena-Yuda, ne Buena-Hindu.

Diandamuna mu bikondo bietu ebi

Bua tshinyi bushimatshi ku malu a ntaku mbutangalake? Aba badi babulonga badi babulamika, mu katupa kakese, ku dielakanangana dia malu a nsombelu wa tshitembu ne a Nzambi dia bikondo bietu ebi. Mu bidimu bia kumpala nsangilu mivule ya bantu ivua mu nsombelu wa bujalame bua malu a tshitembu mashindamene pa mitabuja a kale. Mpindieu mitabuja au adi edibua mpata peshi abengibua. Bamanyi ba mukanda bavule badi bashindika ne: kakuena Nzambi ne se: muntu udi nkayende mu bukua-mabulunge bupange ditabalela. Bena sianse bavule badi balongesha ne: bukua-bantu budi tshipeta tshia didimenena dia bintu dia diakalenga, ki ntshia malu a Mufuki muena dinanga nansha. Lungenyi lua tshidi muoyo musue ndutangalake. Bantu mbasuya kudi dijimija dia ngikadilu ya mu nsombelu mu bitupa bionso bia nsangilu wa bantu.​—2 Timote 3:4, 5, 13.

Bashimatshi ku malu a ntaku badi bipatshila mitabuja a kale, ne bamue ba kudibu badi badienzeja bua kupingaja binsanga biabu pamue ne matunga ku tshidibu bamona se: mmalu makanyine a mu nsombelu ne bishimikidi bia malongesha manene. Badi benza bionso bìdì ku bukole buabu bua kuenzeja bakuabu bua kuikalabu ne nsombelu mumvuangane ne tshisumbu “tshiakanyine” tshia mêyi a mu nsombelu ne ndongoluelu wa mitabuja a malongesha. Mushimatshi ku malu a ntaku mmutuishibue bikole ne: udi wamba bulelela ne bakuabu badi bashima. Mu mukanda wende wa Fondamentalisme (angl.), profesere James Barr udi wamba ne: bushimatshi ku malu a ntaku “budi buangatshibua misangu yonso buikale bu muaku wa buluishi ne wa tshipendu, uleja dipanga budikadidi bua lungenyi, diela kalela mu mmuenenu kampanda, diluisha dimanya ne dibenga mmuenenu ya bakuabu.”

Bu mudi muntu nansha umue kayi wanyisha bua kubikidibua ne: mupangi wa budikadidi bua lungenyi, muedi wa kalela mu mmuenenu kampanda, peshi mubengi wa mmuenenu ya bakuabu, bonso kabena bapetangana pa udi ne ukena mushimatshi ku malu a ntaku. Nansha nanku, kudi bimue bitupa bidi bisunguluja bushimatshi ku malu a ntaku mu malu a Nzambi.

Disunguluja mushimatshi ku malu a ntaku

Bushimatshi ku malu a ntaku mu malu a Nzambi budi misangu yonso buteta bua kulama tshidibu bitabuja bu bilele bia ku tshibangidilu peshi mitabuja a bitendelelu a nshidimukilu kampanda ne kuluisha tshidi tshimueneka bu lungenyi lua dibenga malu a Nzambi lua mu bulongolodi ebu. Abi kabiena biumvuija ne: bashimatshi ku malu a ntaku badi baluisha bionso bia buena-lelu. Bamue badi batumika bimpe menemene ne mishindu ya buena-lelu ya dituangaja bantu bua kulubuluja mmuenenu yabu. Kadi badi baluisha lungenyi lua dipidia malu a Nzambi mu nsangilu wa bantu.b

Bamue bashimatshi ku malu a ntaku mbangate dipangadika kadiyi anu dia kudilamina nkayabu ndongoluelu kampanda wa kale wa malongesha peshi nsombelu patupu kadi bua kuitabijija bine ebi kudi bakuabu, bua kushintulula ndongoluelu ya malu a mu nsombelu bua se: yakanangane ne mitabuja a bashimatshi ku malu a ntaku. Nunku, mushimatshi ku malu a ntaku muena Katolike kakuimanyina ku dibenga dia ditula mafu. Udi mua kufimpakaja batumi ba mêyi ne mikandu ba mu ditunga diende bua kulubuluja mikenji idi ikandika ditula mafu. Mu Pologne, bilondeshile tshikandakanda tshia La Repubblica, bua kuitababu mukenji udi ukandika ditula mafu, Ekleziya Katolike wakalombola “‘mvita’ muakalejilaye bukole buende buonso pamue ne buenzeji.” Mu dienza nanku, bamfumu ba Ekleziya bavua bakuata mudimu bikole benze bu bashimatshi ku malu a ntaku. Bulongolodi bua Tshikongu tshia bena nkristo bena Mishonyi mu États-Unis budi buluangana “mvita” ya muomumue.

Bashimatshi ku malu a ntaku mbasunguluke nangananga ku mitabuja abu makolakolayi a malu a ntendelelu. Nunku, mushimatshi ku malu a ntaku muena Mishonyi neikale mulumbuluidi mutuishibue wa diumvuija dia Bible muaku ku muaku, bumue pa kukonga ne ditabuja dia se: buloba buakafukibua mu matuku asambombo mena dîna. Mushimatshi ku malu a ntaku muena Katolike kêna ne mpata bua dibenga kutupakana dia pape.

Nenku, bidi biumvuika bua tshinyi mbikidilu “bushimatshi ku malu a ntaku” udi ubikidija tshimfuanyi tshia dinanga dinekesha dikena lungenyi ne mudi aba bakena bashimatshi ku malu a ntaku ne buôwa padibu bamona bushimatshi ku malu a ntaku buenda butangalaka. Tuetu pa nkayetu, tudi mua kukandamena bashimatshi ku malu a ntaku ne kuikala bakuatshishibue buôwa kudi midimu yabu ya tshididi ne bienzedi biabu bia tshinyangu bia imue misangu. Bushuwa, bashimatshi ku malu a ntaku ba mu tshitendelelu kampanda badi mua kutshinyishibua kudi bienzedi bia aba badi mu tshitendelelu tshikuabu! Nansha nanku, bantu bavule bena meji badi baditatshisha bua malu adi akebesha ditangalaka dia bushimatshi ku malu a ntaku​—didiunda dia dilengulula dia nsombelu wa tshitembu, dijimija dia ditabuja, ne dipidia dia malu a mu nyuma mu nsangilu wa bantu wa buena-lelu.

Bushimatshi ku malu a ntaku ke diandamuna dimuepele ku minyikibua aa anyi? Bikalabi kabiyi nanku, kudiku diandamuna dikuabu anyi?

[Mêyi adi kuinshi]

[Lungenyi lunene lua mu dibeji 5]

Mu 1926 tshikandakanda tshia bena Mishonyi tshiakumvuija bushimatshi ku malu a ntaku bu “bua dishima ne bua patupu” ne “bubule tshishiki ngikadilu ya dijama nayi peshi lupandu lua mutantshi mule”