Njila mulenga

BANTEMU BA YEHOWA badi baditatshisha pa bidi bitangila dimungutuka dia malu a mu nyuma mu bulongolodi ebu ne tshiendenda pamue ne dipanga dishindika dia malu a ntendelelu bìdì bimuangalake mu bantu. Bu tshipeta, mbabikidibue imue misangu ne: bashimatshi ku malu a ntaku. Kadi badi nanku anyi? Tòo. Nansha mudibu ne mitabuja makole mu malu a ntendelelu, ki mbashimatshi ku malu a ntaku mu ngumvuilu mutumika ne mbikidilu eu nansha. Kabena bafimpakaja balombodi ba tshididi bua kulubulujabu mmuenenu kampanda, ne kabena benza ngendu mu njila ne benzela aba badibu kabayi bapetangana nabu ku mêyi tshinyangu nansha. Mbapete njila mulenga. Badi bidikija Mulombodi wabu, Yezu Kristo.

Bantemu ba Yehowa mbatuishibue se: bulelela bua malu a ntendelelu budiku, ne se: budi busanganyibua mu Bible. (Yone 8:32; 17:17) Kadi Bible udi ulongesha bena nkristo bua bikale ne bulenga, buimpe, bupole-malu, ne butshintshikidi​—ngikadilu ikena itaba dinanga dinekesha. (Galatia 5:22, 23; Filipoi 4:5) Mu mukanda wa mu Bible wa Yakobo, bena nkristo mbakankamija bua kudiundisha ‘meji adi afuma mu diulu,’ adi malejibue bu adi ‘diambedi mimpe, pashishe a ditalala, [“a butshintshikidi, madiakaje bua kutumikila,” NW] muule tente ne luse ne mamuma mimpe.’ Yakobo wakasakidila ne: “Mamuma a buakane adi akunyibua mu ditalala kudi bantu badi benze[j]a ditalala.”​—Yakobo 3:17, 18.

Bantemu ba Yehowa mbavuluke ne: Yezu uvua utamba kuditatshisha bua bulelela. Wakambila Ponsio Pilato ne: “Tshidibo bandelele, kabidi tshindi muvuile pa buloba apa, mbua kujadikila bantu bulelela.” (Yowanese 18:37, Mukanda wa Mvidi Mukulu) Nansha muvuaye mubingishi wa bukitu wa bulelela, kakakeba bua kuitabijija malongesha ende kudi bakuabu. Kadi, wakalenga bieledi biabu bia lungenyi pamue ne mitshima yabu. Uvua mumanye ne: Tatuende wa mu diulu, Nzambi “muimpe ne muakane,” uvua ne bua kupangadija mushindu ne dîba dia kujikija dishima ne dibula kulumbuluisha kuakane pa buloba. (Musambu 25:8) Nunku, kakakeba bua kushipa aba bavua kabayi bamuteleja. Bishilangane, bamfumu ba malu a ntendelelu a kalekale ba mu tshikondo tshiende ke bakateta bua kushipa Yezu.​—Yone 19:5, 6.

Bantemu ba Yehowa badi ne mitabuja makole bua malongesha a malu a Nzambi, ne badi baleja ngikadilu mishindame ya mushinga mu malu a nsombelu wa tshitembu. Bia muomumue ne mupostolo Paulo, mbatuishibue ne: kudi anu ‘Mukalenge umue, ditabuja dimue, dibatiza dimue.’ (Efeso 4:5) Mbamanye kabidi mêyi a Yezu aa: “Mushiku wa mbelu udi mubumbakane, ne n[j]ila wa ku muoyo udi mubumbakane, ne bantu banya-banya badi bamumona.” (Matayo 7:13, 14) Nansha nanku, kabena bateta kuenzeja bakuabu bua kulondabu mitabuja abu. Kadi, badi bidikija Paulo ne ‘basengelela’ aba bonso bàdì bajinga nenku bua ‘kulengejangana ne Nzambi.’ (2 Kolinto 5:20) Eu ke njila mulenga. Udi njila wa Nzambi.

Bushimatshi ku malu a ntaku bua malu a Nzambi, bu mudi tshiambilu etshi tshitumika natshi lelu’eu, mbushilangane bikole. Bashimatshi ku malu a ntaku badi batumika ne mayele a bungi​—pamue ne tshinyangu—​bua kuitabijija mêyi-maludiki abu mu nsangilu wa bantu. Mu dienza nunku, badi balua tshitupa tshinene tshia ndongoluelu wa malu a tshididi. Kadi, Yezu wakamba ne: balondi bende kabena ne bua kuikala “bena mu bulongolodi ebu nansha.” (Yone 15:19; 17:16, NW; Yakobo 4:4) Mu diumvuangana ne mêyi au, Bantemu ba Yehowa mbalame ne dîsu dikole ndubidilu mu makokangana a malu a tshididi. Ne, anu muakitaba tshikandakanda tshia Fuoripagina tshia bena Italie, “kabena benzeja muntu bualu nansha bumue ku bukole; muntu yonso udi ne budikadidi bua kuitaba peshi kubenga bidibu bamba.” Tshipeta? Mukenji wa mu Bible wa ditalala wa Bantemu udi ukoka bantu ba mishindu yonso, nansha aba bavua bashimatshi ku malu a ntaku ku kale.​—Yeshaya 2:2, 3.

Bulongolodi bùdì ne ngikadilu mishindame ya mushinga

Bantemu mbajingulule ne: bantu kabena mua kujikija malu adi atangila bashimatshi ku malu a ntaku. Kuena mua kuenzeja muntu ku bukole bua kuitabujaye Nzambi peshi bua kuitabaye mitabuja a ntendelelu webe. Diela meji ne: tshintu bu nenku tshidi mua kuenzeka diakafikisha ku amue a ku malu matambe bubi a mu miyuki ya bantu makuate buôwa, bu mudi krwazade, Makonkoloja a mu Moyen Âge, ne “dikudimuija mitshima” dia bena Inde ba mu Amerike. Kadi, biweyemena Nzambi, newanyishe bua kulekela malu mu bianza biende.

Bilondeshile Bible, Nzambi mmuteke mukalu mu tshikondo tshidiye ulekelela bantu bua kunyanga mikenji yende ne nunku kulela makenga ne ntatu. Tshikondo atshi tshikadi tshimane kukumbana. Yezu ukadi mumane kutuadija kukokesha bu Mukalenge mu Bukalenge bua mu diulu bua Nzambi, ne mu katupa kîpi emu Bukalenge abu nebuenze bua kumbusha mbulamatadi yonso ya bantu ne kuangata bulombodi bua ku dituku ne ku dituku bua bukua-bantu. (Matayo 24:3-14; Buakabuluibua 11:15, 18) Tshipeta netshikale mparadizu wa pa buloba bujima muikala ditalala ne buakane bivulavulayi. Mu tshikondo atshi kakuakuikala dipanga dishindika mushindu utuikala ne bua kutendelela Nzambi mulelela. “Bantu bakane neba[p]iane buloba, nebashikamemu tshiendelele.” (Musambu 37:29) Ngikadilu ya mushinga bu mudi bulenga-bunangi, bulelela, kulumbuluisha kuakane, ne buimpe nebitshimune bua diakalenga dia bukua-bantu buonso buena butumike.

Muindile tshine tshikondo atshi, mufundi wa misambu udi wamba mu ngakuilu wa kasala ne: ‘[“Bulenga-bunangi,” NW] ne lulamatu lua bushuwa biakusangakanangana; buakane ne ditalala biakutuangana mishiku. Lulamatu lua bushuwa ludi lutoloka mu buloba; buakane bua mu diulu budi butangila panshi. Bulelela, Yehowa neatupeshe masanka adi mimpe, buloba buetu nebukuame bintu biabu bikumbane. Buakane nebuende kumpala kuende, nebuvuije biendedi biende njila wa kuendelamu.’​—Musambu 85:10-13.

Nansha mutudi katuyi mua kushintulula bulongolodi ebu, tudi mua kudiundisha muntu ne muntu ngikadilu ya buena Nzambi kubangila ku lelu mene. Nunku, tudi mua kuteta bua kuikala bantu ba mushindu wasua Nzambi bu bamutendeledi bende mu bulongolodi abu bupiabupia. Nenku netuikale munkatshi mua bena bupuekele badi mufundi wa misambu wamba ne: ‘Badi ne mitshima mipuekele nebapiane buloba, mioyo yabu neyisanke mu ditalala dikumbane.’ (Musambu 37:11) Nzambi udi ukuatshisha ne ubenesha aba bàdì benza disua diende, ne udi ulaya malu a mpatshi bua matuku abu atshilualua. Mupostolo Yone wakamba ne: “Buloba budi bujimina ne lukuka luabu kabidi; kadi yeye udi wenza mudi disua dia Nzambi udi ushalaku tshiendelele.”​—1 Yone 2:17.

[Tshimfuanyi mu dibeji 7]

Bantemu ba Yehowa badi babikila bantu bonso bua kumanyabu lumu luimpe lua Bukalenge bua Nzambi

[Mêyi a dianyisha bua tshimfuanyi mu dibeji 6]

Muendu mu dibeji 3, 4, 5, ne 6: Printer’s Ornaments/​by Carol Belanger Grafton/​Dover Publications, Inc.