Dilonga dia mu dîku dìdì difila disanka

Bible udi wamba ne: “Bua dimanya, nzubu ya munda neyuwule tente ne bintu bionso bia mushinga mukole ne bintu bidi bisankisha bia mushinga.” (Nsumuinu 24:4, NW) Bintu ebi bia mushinga mukole kabiena anu bilengele bia ku mubidi, kadi bidi bikonga kabidi dinanga dilelela, ditshina dia Nzambi ne ditabuja dikole. Ngikadilu ya nunku idi bushuwa ivuija nsombelu wa mu dîku mubanji. (Nsumuinu 15:16, 17; 1 Petelo 1:7) Kadi bua kuyipeta, bidi bitukengela kubueja dimanya dia Nzambi mu nzubu yetu.

MFUMU wa dîku udi ne bujitu bua kulongesha dimanya edi kudi bena dîku diende. (Dutelonome 6:6, 7; Efeso 5:25, 26; 6:4) Umue wa ku mishindu mipite bulenga ya kuenza nenku ndilonga dia pa tshibidilu dia mu dîku. Mmunyipu mudi dilonga edi mua kuikala dia disanka bua badi babuelamu padi dilonga dilombola mu mushindu udi ulongesha ne udi ufila disanka! Nenku, tukonkononayi amue malu a mushinga pa mushindu wa kulombola dilonga dia mu dîku dipatudi dia bipeta bilenga.a

Dilonga dia mu dîku didi ditamba kupatula bipeta bilenga padidi dia pa tshibidilu. Biashindamenadi pa ndongoluelu wa ku mpukapuka anyi dienzeka kakuyi dilongolola, didi mua kuikala dia ntumpintumpi nansha mu nsombelu mitambe buimpe. Nenku, nudi ne bua ‘kudisumbila tshikondo’ bua dilonga edi. (Efeso 5:15-17) Kusungula dîba dia pa tshibidilu didi diakanyine bonso kudi mua kuikala lutatu. Mfumu mukuabu wa dîku udi utonda ne: “Tuvua ne lutatu bua dîku dietu kutungunukadi ne kulonga pa tshibidilu. Tuakateta mêba mashilangane too ne patuakapeta tshikondo tshia ku dilolo tshivua tshituakanyine. Mpindieu dilonga dietu dia mu dîku didi dienzeka pa tshibidilu.”

Diakamue nuenu bamane kupeta tshikondo tshia dîba tshidi tshiakanyine, nudimuke bua kubenga kulekela ditanaji dipumbakaja dilonga. Maria,b udi mpindieu ne bidimu 33, udi uvuluka ne: “Pavua benyi balua tuetu bikale munkatshi mua dilonga, Papa uvua ubambila bua kuindila too ne pavua dilonga dijika. Ne pavuabu bela nshinga, uvua wambila muntu au patupu ne: neandamune ku dibikila adi pashishe.”

Kadi, ebi kabiena biumvuija ne: kakuena mushindu wa kushintuluka. Malu a lukasalukasa anyi kaayi malongolola adi mua kumueneka, ne bidi mua kukengela bua kushipa anyi kutuma dilonga bua musangu mukuabu. (Muambi 9:11) Kadi udimuke bua kulekedi nansha bumue bua ku malu aa bukondakaja muanda webe wa buatshiabuatshia.​—Filipoi 3:16.

Dilonga didi ne bua kunenga mutantshi bule kayi? Robert, eu udi mulubuluke mu dikolesha bimpe muanende wa bakaji ne wa balume, udi wamba ne: “Malonga etu a pa tshibidilu avua anenga dîba dijima. Patshivua bana bapuekele, tuvua tuteta bua kulama ntema yabu munkatshi mua dîba dijima edi pa kukonkonona malu kabukabu, bu mudi ndambu wa bikoso mu tshiena-bualu tshia dilonga mu Tshibumba tshia Nsentedi, mvese misungula ya mu Bible, ne bitupa bia mu mikanda mikuabu.” Maria udi uvuluka ne: “Patutshivua bapuekele bikole meme ne bayayanyi babidi, dilonga dietu divua dinenga minute bu 20 ne dienzeka misangu ibidi anyi isatu ku lumingu. Patuakakola, dilonga dietu dia ku lumingu ku lumingu dia mu dîku divua dinenga dîba dijima anyi kupita apu.”

Ntshinyi tshitudi ne bua kulonga?

Dielangana meji pa lukonko elu padi bantu bonso basangile pamue bua kulonga didi mua kufikisha ku didiumvua bibi ne ku dijimija dia dîba dia mushinga bua kuenza dilonga. Bu biobi nanku, bana badi mua kupangila bualu bua nsongo bua kutekemena, ne mutantshi mukese badi mua kujimija disankidila diabu. Nenku, udianjile kusungula umue wa ku mikanda ya Société unuakonkonona.

“Mupika wa lulamatu ne wa budimu” mmufile mikanda mipite bungi ya kusungula. (Matayo 24:45-47, NW) Imue misangu nudi mua kutumika ne mukanda udi dîku kadiyi dianji kulonga. Ne ndisankapu kayi dia kukonkonona bitupa bisungula mu mukanda wa Auxiliaire pour une meilleure intelligence de la Bible! Tshilejilu, nudi mua kuambulula tshiena-bualu tshia Didia dia Dilolo dia Mukalenge mu mbingu ya kumpala kua Tshivulukilu. Mêku mavule adi asanka bua kulongolola dilonga dia Tshibumba tshia Nsentedi tshia mu lumingu. Kadi biena-bualu bisakidila bia mu Tshibumba tshia Nsentedi bidi bipetesha kabidi malu malenga bua dilonga. Bu mudi mfumu wa dîku mumanye majinga a mu nyuma a dîku diende, yeye ke udi mukumbane bua kuangata dipangadika bua mikanda idibu ne bua kulonga.

Maria udi uvuluka ne: “Tuvua tulonga misangu yonso mukanda musungula kumpala kua dîba. Kadi pavua lukonko lujuka anyi nsombelu kampanda umueneka mu kalasa, apu tuvua tunyemena ku mamanyisha makanyine.” Malu a pa buawu, bu mudi ntatu idi bansonga bapeta mu kalasa, ditantshilangana pankatshi pa bena bitupa bia lulelu bishilangane, midimu ikena ya mu tulasa, ne makuabu malu a muomumue, atu ajuka. Padibi bienzeka, sungulayi biena-bualu peshi mikanda idi yakula pa tshilumbu tshidiku. Binuamona mamanyisha mu nimero ya ndekelu ya Tshibumba tshia Nsentedi nansha ya Réveillez-vous! anuasua bua kukonkonona pamue ne dîku, kanuelakanyi bua kulongolola bualu abu. Bushuwa, nudi mua kumanyisha bena mu dîku bua dishintuluka edi kumpala kua dîba. Kadi nuikale bashindike bua kupingana ku malu avua malongolola diakamue padi dijinga dikumbana.

Lama tshimuenekelu tshia bupole

Dilonga ditu dienzeka bimpe menemene mu nsombelu ya ditalala. (Yakobo 3:18) Nenku, ikala ne tshimuenekelu tshidilekelele ne tshia kanemu. Mfumu mukuabu wa dîku wa mu États-Unis udi wamba ne: “Nansha tuetu tulongela mu tshisombedi anyi mu lutanda, tutu tuteta bua kusomba balamakane bikole umue pamue ne mukuabu pamutu pa kutangalaka mu nzubu mualabale. Buetu tuetu, ebi bidi bilela nyanji ya musangelu.” Ne Maria udi uvuluka ne dijinga dikole ne: “Bavua batulomba meme ne bana betu ba bakaji bua kusungula muaba utuvua mua kulongela bua lumingu alu. Ebi biakatukolesha ku muoyo.” Lamayi mu lungenyi bua se: bukenke buakanyine, muaba wa disomba mulongolola bimpe, ne nsombelu mimpe ne kayiyi ya mukodi, bionso ebi bidi biambuluisha bua kuikala ne bupole. Didia biakudia mu dîku panyima pa dilonga didi diambuluisha kabidi bua kuvuija dilolo adi dia musangelu.

Amue mêku atu mene asungula bua kubueja mêku makuabu mu dilonga diawu ku musangu, avudija musangelu pamue ne mumvuija kabukabu. Padi bapiabapia mu bulelela babikidibue bua kubuela mu ndongoluelu eu, badi mua kupetela dikuatshisha ku dimona mudi mfumu wa dîku mumonamona malu ulombola dilonga dia mu dîku.

Enza bua Bible atumike

Vuija bikondo bia dilonga bikondo bia musangelu bua bana, nenku nebabitekemene ne muoyo mujima. Udi mua kuenza nenku pa kukankamija bana bakese bua kuzola bimfuanyi bia maleja a mu Bible. Padibi biakanyine, usake bana bua kuleja mu dinaya malu menzeke ne drama ya mu Bible. Bua bana batekete, kabiena ne mushinga bua kulamata anu ku ngenzelu wa pa tshibidilu wa nkonko ne mandamuna. Dibala anyi dilonda miyuki ya bantu ba mu Bible mmushindu muimpe wa kulongesha mêyi-maludiki a buena Nzambi. Robert, mutela kumpala eku, udi uvuluka ne: “Imue misangu tuvua mua kubala mvese ya mu Bible, muntu wende musangu, tubala ‘mêyi’ mashilangane a bantu bavuabu batupesha.” Tudi mua kulomba bana bua kusungula muntu muena muaba udibu basue kuangata mu dibala.

Ditumika ne tuarte ne tablo nediambuluishe bana bakadi batantamane bua kumona bitupa ne bimanyinu bia ditunga divua malu adibu bakuila menzekele. Bushuwa, mu ditumaku ndambu wa meji, tudi mua kuvuija dilonga dia mu dîku dia luya ne dia malu kabukabu. Ne bana nebajinge Dîyi dia Nzambi.​—1 Petelo 2:2, 3.

Ambuluisha muntu yonso bua kudifilamu

Bua bana kusankidilabu dilonga, badi pabu ne bua kudiumvua babuejamu. Kadi, kuenza bua se: bana ba bidimu bishilangane badifilamu kudi mua kuikala lutatu. Kadi dîyi-diludiki dia mu Bible didi diamba ne: “Muludiki aludike ne disuminyina.” (Bena Roma 12:8, MMM) Dikala ne musangelu didi diambuluisha, bualu musangelu udi ne tshiambu.

Ronald udi ubuejamu Dina, muanende wa bakaji wa bidimu bitanu, pa kumubadisha tu-biena-bualu tua mu malu a dilonga ne pa kumulomba bua kumvuija bimfuanyi. Tshidimu tshishale, pakasemena Tshivulukilu tshia lufu lua Yezu, wakashindamena pa bimfuanyi bilenga bidi mu mukanda wa Muntu mutambe bunene wa katshia ne katshia.c Udi uleja ne: “Ebi biakamuambuluisha bua kujingulula diumvuija dia bualu ebu.”

Bua Misha, muanende wa bakaji wa bidimu dikumi, Ronald udi usakidila bualu bukuabu bua mushinga, wamba ne: “Misha mmulubuluke pa kufika too ne ku diumvua ki ng’anu tshidi bimfuanyi, kadi diumvuija didibi bifila. Nenku patuvua tukonkonona mukanda wa Buakabuluibua​—Nkomenu wabu munene ukadi pabuipi!,d tuvua tushindamena pa diumvuija dia bimfuanyi, ne ebi mbimuambuluishe.”

Padi bana benda bakola batangile ku bunsonga, ubalombe bua kuleja ntumikilu mulenga ne malu anudi nukonkonona. Padi nkonko ijuka munkatshi mua dilonga, wabanya bitupa bia makebulula. Robert wakenza nanku pavua Paul, muanende wa bidimu 12, mukonke pa bidi bitangila dingumba dipiadipia dienza mu kalasa bua dinaya dia Donjon ne Dragon. Paul ne bakuabu bena mu dîku bakakeba mamanyisha mu ditumika ne Index des publications de la Société Watch Tower, ne bakakonkonona bualu ebu mu dilonga diabu dia mu dîku. Robert udi wamba ne: “Bu tshipeta, Paul wakumvua ne lukasa luonso ne: dinaya adi divua dibi bua bena nkristo.”

Robert kabidi wakabanya bitupa bia makebulula misangu mikuabu. Mukajende Nancy udi uvuluka ne: “Patuvua tuenza makebulula pa bapostolo ba Yezu, bavua bapesha yonso wa kutudi mupostolo umue ku lumingu. Mmunyipu muvuabi bia disanka bua kumona bana ne musangelu wonso baleja luapolo luabu mu dilonga dia mu dîku!” Didienzela makebulula a nkaya ne dilejangana mamanyisha pamue mu dîku didi diambuluisha bana bua ‘kudiunda ku mêsu kua Yehowa.’​—1 Samuele 2:20, 21.

Diela nkonko​—ya mmuenenu pamue ne nkonko miludiki—​didi kabidi mushindu mulenga wa kubueja bana mu dilonga. Yezu, Mulongeshi Muludiki, wakela nkonko ya mmuenenu, bu mudi ‘Udi welangana meji munyi?’ (Matayo 17:25) Maria udi uvuluka ne: “Pavua yonso wa kutudi ne lukonko, baledi betu kabavua batuandamuinalu diakamue. Bavua misangu yonso bela nkonko miludiki, batuambuluisha bua kuela meji pa bualu abu.”

Yukidilanganayi​—Kufiikishi munda!

Disanka dia dilonga dia mu dîku didi didiunda padi bonso badimu bikale ne mushindu wa kumanyisha mmuenenu ne nyanji yabu kakuyi buôwa bua kusekibua. Kadi tatu mukuabu udi wamba ne: “diyukidilangana dimpe munkatshi mua dilonga dia mu dîku didi mua kuenzeka anu padi nshinga ya diyukidilangana mikale miunzulula mu binga bikondo. Kuena mua kudingidija bu udi uyukidilangana anu dîba dia dilonga nansha.” Mu mishindu yonso, epuka nseka mibule lungenyi idi ibungamija bu mudi eyi: ‘Ke bualu buine abu? Mvua ngela meji ne: uvua ne tshintu tshia mushinga tshia kuamba’; ‘Adi ndibula dia meji’; ‘Ee, abu ke buebe bualu bua nsongo! Utshidi anu muana, kuena ne buudi mua kuamba.’ (Nsumuinu 12:18) Diteka pa muaba wa bana bebe ne ikala muena luse. (Musambu 103:13; Malaki 3:17) Petela disanka kudibu, ne ubakuatshishe padibu badienzeja bua kutumikila bidibu balonga.

Tshimuenekelu tshia dilonga dia mu dîku tshidi ne bua kuikala etshi tshidi tshivuija lungenyi lua bana luakididi lua dilongesha. Muledi mukuabu wa bana banayi ne udi mupatule bipeta bimpe udi umvuija ne: “Paudi ubanga kunyoka bana, udi muenze bu udi ne bakuteleji badi kabayi bakididianganyi.” Mu nsombelu wa mushindu’eu, pamu’apa mamanyisha kaakubuela nansha. Nenku, epuka divuija bikondo bia dilonga bu bisangilu bia dikela ne dinyoka. Bikalabi bikengedibua, ubifile pashishe ne kudi muntu pa nkayende.

Madikolela mmakanyine

Kuibaka dîku dibanji mu nyuma kudi kulomba dîba ne madikolela. Kadi mufundi wa misambu udi umanyisha ne: ‘Monayi, bana badi bupianyi bufume kudi Yehowa, bana badi bapatuka munda mua mamu wabu badi difutu diende.’ (Musambu 127:3) Ne baledi mbapete bujitu bua ‘kudiundisha [bana] bimpe ne dibela ne didimuija bia Mukalenge.’ (Efeso 6:4) Nenku, diundisha mbabi ya kulombola dilonga dia mu dîku didi dipatula bipeta bimpe ne didi difila disanka. Enza muebe muonso bua kufila ‘mabele a [“dîyi,” NW], kaayi masambakaja ne tshintu,’ bua bana benu bamone mua ‘kupeta lupandu.’​—1 Petro 2:2, MMM; Yone 17:3.

[Mêyi adi kuinshi]