Bamanyishi ba Bukalenge badi balonda
Tulondayi ne bupuekele buonso njila wa Yehowa
“KEBAYI Yehowa, nuenu bena kalolo bonso ba [p]a buloba.” Dibikila edi, dimanyisha kudi muprofete muena Ebelu Sefanya kukadi siekele mipite pa 26, ditshidi dienda ditangalaka mu bantu pa buloba bujima lelu’eu. (Sefanya 2:3) Kukeba Yehowa kudi kumvuija tshinyi? Kuenza bualu ebu kudi kutuadija ne kupeta dimanya dia Yehowa, Nzambi umuepele mulelela ne wa muoyo.—Yelemiya 10:10; Yone 17:3.
Kadi kupeta dimanya nkayaku kakuena kufikisha ku nsombelu muanyisha kudi Nzambi nansha. Bua kuanyishibua kudi Nzambi, muntu udi kabidi ne bua kutumikila dimanya edi. Mmushindu kayi? Mu diakaja ne bupuekele buonso ngelelu wende wa meji ne tshikadilu tshiende bilondeshile mêyi-makulu a Nzambi, bu mudibi bileja kudi bualu bumona budi bulonda ebu buenzeke mu ditunga dia Suriname.—Efeso 4:22-24.
Eddy, mulongeshi wa kalasa wa bidimu bipite pa 30, uvua ujinga bikole bua kupeta mandamuna ku nkonko bu mudi: ‘Mmudimu kayi udi nawu bitendelelu mu nsangilu wa lelu?’ ne ‘Bu mudiye mukanda wa kale, Bible udi umvuangana ne malu a sianse a buena lelu anyi?’ Pakamukumbula Bantemu ba Yehowa ne kumupesha mandamuna mashindamene pa Bible ku nkonko eyi, Eddy wakateleja ne ntema. Wakafunda malu avuabu bamuambila bua kumonaye mua kukonkonona mumvuija a Bantemu.
Kumpala Eddy uvua ubuela mu tshitendelelu tshiakamulongesha ne: bantu bavua tshipeta tshia ndekelu tshia dishintuluka dia ntshima dienza kudi Nzambi. Nenku pakamupesha Bantemu mukanda wa La vie: Comment est-elle apparue? Évolution ou création? wakawitaba lukasa. Diumvuija ditoke dia mukanda eu pa muyuki wa bufuki wa mu Bible diakamukemesha. Ku diambuluisha dia dilonga diende dia Bible, wakalua kutuishibua ne: uvua mupete bulelela!
Kadi mpindieu wakapeta diteta kampanda. Eddy uvua musombele mu nzubu muvua nsombelu wa buivi ne dipanga bululame. Nenku uvua kumpala kua disungula: kulonda nsombelu munyanguke wa bavuaye nabu mu nzubu anyi kubenga tshikadilu tshia nunku bua kuikala ne nsombelu udi utumbisha Nzambi. Ne meji onso, Eddy wakasungula nsombelu udi utumbisha Nzambi. Wakakosa malunda mabi onso e kupatukaye mu nzubu au.—1 Kolinto 15:33, 34.
Eddy wakadiunda lubilu lubilu panyima pa mumane kutuadija dibuela mu bisangilu ku Nzubu wa Bukalenge. Wakenza kabidi mashintuluka mu mvuadilu ne mu nkoseshilu wende wa nsuki ne kutuadijaye kuambila balunda ne balela bende malu avuaye ulonga. Pashishe, disanka diende diakavula pakamuitabilabu bua kuyisha “lumu luimpe” patoke. (Matayo 24:14; Bienzedi 20:20) Mu Tshisua-munene 1996 dituku dindila mutantshi mule diakalua pakalejaye didilambula diende kudi Yehowa ku diambuluisha dia batismo wa mu mâyi.
Ku tshidimu tshionso, bantu nkama ya binunu bena mitshima milulame badi bitaba dibikila dia ‘kukeba Yehowa.’ Mu dienza nunku, badi bamona bulelela bua Nsumuinu 22:4, udi wamba ne: “Difutu dia kudi[p]uekesha ne dia ditshina dietu dia Yehowa didi bubanji, butumbi ne muoyo.” Eyowa, mu dilonda ne bupuekele buonso njila wa Yehowa, banangi ba bulelela badi bapeta mabenesha aa mpindieu, ne dishindika dionso batekemene mabenesha a kashidi pa buloba apa.—Musambu 37:29.
[Tuarte mu dibeji 18]
(Bua kumona malu bimpe, tangila mu mukanda)
Mbuu wa Karaibe
GUYANA
SURINAME
GUYANE FRANÇAISE
BRÉSIL
[Mêyi a dianyisha]
Buloba: Mountain High Maps® Copyright © 1997 Digital Wisdom, Inc.