Bantu ba bungi badi bamba mudibu ne ditabuja

MUNTU mukaji mukuabu mutendeledi wa mu ditunga dia Brésil wakatua tshikemu ne: “Yezu mmulenga be! Mmuntu wa dikema!” Bushuwa, kakuena mushindu wa kuvila bukole budi nabu dîna dia Yezu. Katshia ku kale too ne lelu, bantu mbakenge ku budisuile ne bafue bua bualu buende.

Mupostolo Petelo ne mupostolo Yone bakayisha ‘mu dîna dia Yezu’ mu Yeruzaleme. Bakabakuata ne kubela mfimbu bua bualu ebu. Kadi ‘bakumuka kumpala kua bena tshilumbuluidi basanka bualu bua bakabadibua ne: mbakane bua kufuishibuabu bundu bualu bua dîna dia Yezu.’​—Bienzedi 5:28, 41.

Antipa uvua muena nkristo mukuabu wa mu siekele wa kumpala uvua wangata dîna dia Yezu ne mushinga. Mu Buakabuluibua, mukanda wa ndekelu wa mu Bible, Yezu wakakula bualu buende bu “ntemu wanyi, muena lulamatu, uvuabu bashipe ku luseke luenu, muaba udi Satana musombele.” (Buakabuluibua 2:13, NW) Pamue ne bena nkristo bakuabu ba mu Pergame, Antipa wakabenga bua kuvila ditabuja diende mu Kristo. Antipa wakashala mulamate ku dîna dia Yezu ne kufuaye mene bua bualu ebu!

Kunyima bu kua tshia bibidi tshia siekele, mu 155 B.B., muntu uvua udiamba muvuaye muena nkristo dîna diende Polycarpe wakapeta diteta dia muomumue pakamutuminabu dîyi bua kupenda Kristo. Diandamuna diende divua ne: “Ndi mumukuatshile mudimu bidimu 86, ne ki mmungenzele bualu bubi to. Mmunyi mundi mua kupenda Mukalenge wanyi udi mumpandishe?” Bakuoshila Polycarpe ku mutshi bualu uvua mubenge bua kuvila Kristo.

Bapostolo, Antipa ne bantu bakuabu bavua badiakaje bua kufua bua kujadika bumanyishi buabu bua Kristo! Netuambe tshinyi bua bantu lelu’eu?

Dîna dia Yezu lelu’eu

Dîna dia Yezu didi ditungunuka ne kujula majiya. Mu Amerike wa kuinshi, mu makumi a bidimu bidi panshi ebi ekleziya idi yamba mudiyi itabuja Yezu mmivule bikole. Nansha misoko mitambe bukese idi ne ekleziya wa bena Pentekoste. Buenzeji bua malu a tshididi a ekleziya eyi budi buenda buvula. Tshilejilu, mu Tshipangu tshia Banene bedi ba mikenji mu Brésil, bena mu ekleziya eyi mbasombe mu nkuasa 31.

Yezu ke udi kabidi mukana mua bena mu tshisumbu tshipiatshipia tshia malu a Nzambi tshia mu États-Unis. Bena mu tshisumbu etshi badi badibikila ne: Balami ba Mulayi. Tshikandakanda tshia Time tshiakamanyisha mu 1997 ne: bantu badi babuela mu bisangilu biabu mbavule kumbukila ku 4 200 mu 1991 too ne ku 1 100 000 mu 1996. Umue musambu wa tshisumbu etshi udi wamba ne: “O butshimunyi mu Yezu, Musungidi wanyi bua kashidi.”

Nansha nanku, meji onso adi dîna dia Yezu difila kaena anu malenga nansha. Misangu mivule kutu mvita itubu baluangana mu dîna diende. Mbashipe bena Yuda, mbabutule bampangano, mbakengeshe batontolodi, mbabakose bidimba ne babuoshile ku makunji​—bonso mu dîna dia Yezu. Ne matuku adi panshi aa, dienda mushinga ne evanjeliyo ndilue kutangalaka. Bionso ebi ndikuata mudimu bibi menemene ne dîna dia Yezu ne tshididi diumvuija bushuwa!

Kabidi, dîna edi didi dijula imue nkonko ya mushinga: Kuikala ne ditabuja mu dîna dia Yezu kudi kumvuija tshinyi? Ne ntshinyi tshidi mmuenenu wa Bantemu ba Yehowa pa muanda eu? Tshiena-bualu tshidi tshilonda netshiandamune nkonko eyi.